მთელ მსოფლიოს ქრისტიან უხუცესეფ აფასენა თი მოვალეობეფს, ნამუთ ღორონთიშ ორგანიზაციას უღნა. თენა დასურო დიდ კურთხევა რე არძაშო. მარა ჭიჭე ხანიშ წოხოლე ართ მუდგარენქ დითირ. ხანშა მიშულირ უხუცესეფს თხუეს, ნამდა ნამთინე მნიშვნელოვან პასუხიშმგებლობა ახალგაზრდა უხუცესეფშა გეგნუჩამდესკო.

ცვლილება თინა რე, ნამდა რაიონულ ზედამხედველეფქ დო თოეკრატიულ სკოლეფიშ ინსტრუქტორეფქ, ნამუთ 70 წანას რენა მენჭაფილ, ოკო მიოტუან თეგვარ მსახურება. თეს გეძინელ, 80 წანერ უხუცესეფქ ახალგაზრდა უხუცესეფს ოკო გეგნოჩან შხვადოშხვა მოვალეობეფ, მუნერით რე ფილიალიშ კომიტეტიშ ვარდა უხუცესეფიშ საბჭოშ კოორდინატორობა. მუჭო შეხვადეს თე ცვლილებას ხანშა მიშულირ უხუცესეფქ? თინეფქ იეჰოვაშ დო თიშ ორგანიზაციაშ ართგურობა გეგმირჩქინეს.

„დუდშე ბოლოშა ვოთანხმუდ თე გადაწყვეტილებას. სინამდვილეს, თიმ ოჭმარეს იეჰოვას ლოცვას ვუწი, ნამდა მოსაჭირდეს ახალგაზრდა ჯიმა, ნამუთ ფილილალიშ კომიტეტიშ კოორდინატორო იმსახურენდჷ“, — იჩიებ კენი, ნამუთ  სოდგარენ 49 წანას ფილიალიშ კომიტეტიშ კოორდინატორო მსახურენდჷ. კენცალო ფიქრენს ბრელ ართგურო მსახურენსინ ფერ ხანშა მიშულირ ჯიმა. მუშო ოკო რაგად, თინეფ ჸოროფათ ომსახურდეს მუნეფიშ ჯიმალეფს, მარა დუდშე გურქ გუტირხეს.

ესპერანდო, ნამუთ კრებას კოორდინატორო მსახურენდუნ, იჩიებ: „თე ცვლილებაქ ჭიჭეთ გურ ქელმოჭუ, მარა დასურო მოსაჭირუდ მეტ დრო, ნამდა ჩქიმ ჯანმრთელობაშა ქიმკომჯინუდკო“. თინა აგრძელენს ართგურო მსახურებას დო კურთხევა რე მუშ კრებაშო.

მუშ რაგად შილებე გილმალ ზედამხედველეფშე, მიდგაქ შხვა დანიშნულება მიღეს? ალანი, ნამუთ 38 წანას გილმალ ზედამხედველ რდუნ, იჩიებ: „თეშ გაგებაქ მანგარო გუმაკვირვ“. მარა, თიქ ქიმეხვად, მუ ჯგირობუა მოუღ ახალგაზრდა ჯიმალეფიშ მომზადებას თეგვარ მსახურებაშო. თინა კინ აგრძელენს ართგურო მსახურებას.

რასელ, ნამუთ გილმალ ზედამხედველო დო თეოკრატიულ სკოლეფიშ ინსტრუქტორო 42 წანას მსახურენდუნ, იჩიებ, ნამდა თის დო მუშ ოსურს დუდშე გურქ ქელაჭვეს. „ჩქი ვაფასენთ მსახურებაშ პატის დო ბგინაფლენთ, ნამდა მიღნა ძალეფ, გუვაგრძელათ მსახურება“. რასელ დო მუშ ოსურ მუნეფიშ რჩქინას დო მეღებულ გამოცდილებას ადგილობრივ კრებას გიმირინუანა, მუდგას თექიან მაუწყებელეფშა დიდ ხიოლ მოუღ.

პირადო თქვა ჟიშე მოშინაფილ სიტუაციეფს ვა ჸოფეთ-და, მაჟია სამუელს ინოჭარილ შემთხვევა მიგეხვარებნა ქიგეგათ, მუს გინაფლენდეს თინეფ.

მუჟამსით მეფე დავითის მუშ ქომოლსქუა აბესალომი თხოზუდუნ, თიქ იერუსალიმშე მახანაიმშა ინტჷ, ნამუთ მალწყარ იორდანეშ აღმოსავლეთით რდუ. დავითის დო თიწკუმა ართო რდესინ თი კათას სიცოცხლეშო აუცილებერ მუდგარენეფ ოსაჭირდეს. ქორშუნანო, მუქ მოხვად თე დროს?

თექ მახორუ სუმ ქომოლკოჩიქ თინეფს დანჯირალ, ოჭკომალ დო საჭირო ნივთეფ მეუღ. თინეფშე ართ-ართ რდუ ბარზილაი (2 სამ. 17:27—29). აბესალომს გეგმაქ გეკუცუნ, დავითიქ იერუსალიმშა დორთა გეგნოჭყვიდ დო ბარზილაიქ თინა იორდანეშახ ქიმიაზარ. დავითიქ თის მუწკუმა ართო იერუსალიმშა ულა შეთავაზ. მეფექ პირობა მეჩჷ, ვემიარკენდჷ ოჭკომალს, თიშ უმკუჯინუო ნამდა ბარზილაი „ქონებიერ რდუ“ (2 სამ. 19:31—33). დავით აფასენდჷ ბარზილაიშ თვისებეფს დო თიშ რჩევეფს. ნამდვილო, ბარზილაიშო დიდ პატი იჸუაფუდ მეფეწკუმა ართო სასახლეს ცხოვრება.

80 წანერ ბარზილაის მოკრძალებაქ მეხვარ, რეალურო შეაფასკო მუშ მდგომარეობა. თიქ თქუ: „ანწჷ ხოლო გიშმაგორენო ჯგირ დო ფურ ართიანშე?“. მუს გულისხმენდჷ თინა? ბარზილაის მთელ მუშ ცხოვრებას, სიბრძნე დო გამოცდილება აფუდ მეღებულ. ათეშენ თის,  შეულებუდ თიცალ ჯგირ რჩევეფიშ მეჩამა მუნერით, უმოს გვიანო მეფე რობოამს „უხუცესეფქ“ მეჩეს (1 მეფ. 12:6, 7; ფსალმ. 92:12—14; იგავ. 16:31). მუჟამსით ბარზილაი ჯგირ დო ფურიშ გიშაგორუაშე იჩიებუდუნ, შილებე მუშ ფიზიკურ მდგომარეობას ვარდა შეზღუდულ შესაძლებლობეფს გულისხმენდკო, ნამუთ ასაკიქ მოუღ. თინა ორწყედ, ნამდა ჯვეშობურო ვა გინაფლენდჷ ოჭკუმალიშ გემოს დო ვართ ჸუც არჩქილედ ჯგირო (ეკლ. 12:4, 5). ათეშენ ბარზილაიქ დავითის ელუჩ, იერუსალიმშა მუშ მანგიორო, ახალგაზრდა კოჩ ქიმჰამი მიდუჸუნაფუდკო, ნამუთ საეგებიოთ მუშ სქუა რდჷ (2 სამ. 19:35—40).

ბარზილაიშ მაგალითშე ბგებულენთ, მუშენ მოხვად ორგანიზაციას თი ცვლილებეფქ, ნამუთ ჟიშე მიფშინეთ. გასაგებ რე, ნამდა თე გადაწყვეტილებაშ მეღებაშ დროს ჯიმალეფქ ართ პიროვნებაშ მდგომარეობა დო შესაძლებლობეფიშ გარდა შხვა საკითხეფ ხოლო გეთვალისწინეს. თინეფქ რეალურო შეაფასეს, მუ იჸუაფუდ არძაშ უჯგუშ მთელ მსოფლიოს მსახურენან თი ართგურ უხუცესეფშო.

მოკრძალებურ ხანშა მიშულირ ჯიმალეფ ორწყენა, ნამდა იეჰოვაშ ორგანიზაცია იმანგარებ, მუჟამსით მუნეფიშ პასუხიშმგებლობეფს ახალგაზრდა ჯიმალეფს გინოჩანა. უმენტაშ შემთხვევას, ხანშა მიშულირ ჯიმალეფქ მამზადეს ახალგაზრდა ჯიმალეფ, თეშ მუჭოთ შილებე ბარზილაიქ მამზადკო მუშ სქუა, ვარდა მოციქულ პავლექ — ტიმოთე (1 კორ. 4:17; ფილ. 2:20—22). თე ახალგაზრდა ჯიმალეფქ დამტკიცეს, ნამდა დასურო ძღვინ რენა კრებაშო დო შეულებნა მონაწილება მიღან „ქრისტეშ სხეულიშ შენებას“ (ეფეს. 4:8—12; შეადარით რიცხ. 11:16, 17, 29).

ღორონთიშ ორგანიზაციას ბრელ ჯიმას, ნამუსით ულირს შხვადოშხვა პასუხიშმგებლობეფ უღუდუნ, შეულებ იეჰოვაშ მსახურებას იშენით მეტ გაკეთას.

მარკო, ნამუთ 19 წანას რაიონულ ზედამხედველო მსახურენდუნ, იჩიებ: „ჩქიმ სიტუაციაშ თირუაშ უკულ, საშვალება მიღჷ ვუქადაქე ჩქინ კრებას რენან თი დალეფიშ ქომონჯეფს, ნამუთ იეჰოვაშ მოწმეეფ ვა რენა“.

ჟერალდო, ნამუთ 28 წანას გილმალ მსახურებას რდუნ იჩიებ: „ჩქი ახალ მიზნეფ მიღნა — მივეხვარათ აქტიურ ვა რენან ფერეფს დო მეტ ბიბლიაშ გურაფა ჩუვატარათ“. თე ჯიმა ოსურწკუმა ართო 15 ბიბლიაშ გურაფას ატარენს დო ბრელ აქტიურ ვა რენ ფერს მეხვარ კრებაშ შეხვალამეფშა გილულა ქუდუჭყაფუდკო.

ჟიშე მოშინაფილ ალანი აღნიშნენს: „ასე საშვალება მიღნა, სრულაშე მიბღათ მონაწილება ქადქებაშ საქმეს. მოხიოლნა სტენდით, საქმიან უბანს დო მეზობელეფწკუმა ქადაქება. თე ირფელიშ შედეგო ჟირ მეზობელქ კრებაშ შეხვალამას დესწრჷ“.

შილებე უნარიან დო ართგურ ჯიმა რეთ დო ორგანიზაციას შხვა პასუხიშმგებლობა მიღით. თაშ ქორენ-და, შეილებნა განსაკუთრებულ წვლილიშ მიშაღალა ღორონთიშ საქმეშა თით, ნამდა ახალგაზრდეფს თქვან გამოცდილება გუზიარათ. ჟიშე მოშინაფილ რასელი იჩიებ: „იეჰოვა ოგურუანს დო გიმირინუანს ნიჭიერ, ჯგირ ახალგაზრდეფს. მთელ საჯიმალოშა მოუღ ჯგირობუა, მუჟამსით თეცალ ჯიმალეფ შურ დო გურით ოგურუანა დო ჭყიშანა კრებას“ (ქოძირით ჩარჩო „ქიმეხვარით ახალგაზრდეფს სრულაშე გეგმირინუან მუნეფიშ შესაძლებლობეფი“).

ამდღა თქვა შხვანერ სახეთ აგრძელენთ ღორონთიშ მსახურებას, ათეშენ ვადინუათ დადებით განწყობა. გურგედვალირ მსახურებათ ბრელ პიროვნებაშ ცხოვრება დოთირეთ დო შეილებნა გაგრძელათ თეშ კეთება. თქვა ბრელს უჸორდით დო ასე ხოლო უჸორთ.

არძაშ უმოს მნიშვნელოვან რე, ნამდა იეჰოვაშ გურ გაფნა მოგებულ. თინა დღას „ვეგიჭყოლიდუანს თქვან ხანდას დო ჸოროფას, ნამუთ თიშ სახელიშ გურშენ გიმირჩქინით, მუშენდა ომსახურუდით  დო ასე ხოლო ომსახურუთ წმინდეფს“ (ებრ. 6:10). თე სიტყვეფ მარწმუნენა, ნამდა იეჰოვა ხვალე ულირ საქმეეფით ვა მაფასენა. თიშო ძვირფას რეთ ულირს კეთებულ დო ასე ორთუთინ თი ჯგირ საქმეეფიშ გურშენ!

თე საკითხ თინეფს ხოლო ოხუ, მიდგაშ პასუხიშმგებლობეფ დიო ვათირე. მუშენ შემლებნა თეშ რაგად?

ართგურ ხანშა მიშულირ ჯიმალეფწკუმა ურთიერთობა ქოიღუნან-და, თინეფიშ გამოცდილებაშე ბრელ მუთუნ დუგაგურენა. ქელაკითხეთ თინეფს რჩევა. თეს გეძინელ, ქიდეკვირით, მუჭო ასრულენა თი პასუხიშმგებლობას, ნამუთ ასე ოვალნა დო მუჭო გიმირინუანა მუნეფიშ გამოცდილებას.

ვა უღჷ მნიშვნელობა, ხანშა მიშულირ პიროვნება რეთ დო ვარ ახალგაზრდა ჯიმა ვარდა და, მით შხვეფიშ გამოცდილებაშე ღებულენს სარგებელს, ირიათო ქორშუდან, ნამდა იეჰოვა აფასენს თინეფიშ ართგურობას, მით წანეფ რე ომსახურ თის დო აგრძელენს თეშ კეთებას.