1. მუნერ სიტუაციას რდუ მოციქულ იოანე პირველ  საუკუნეშ ბოლოს?

პირველ საუკუნეშ ბოლოს, მოციქულ იოანე მანგარ რთულ სიტუაციას რდუ. თინა მოხუცებულ რდუ დო კუნძულ პატმოსიშ ციხეს ხედჷ. მუჭოთ იძირე, მოციქულეფშე ხვალე თინა რდუ ცოცხალ (გამოცხ. 1:9). თის უჩქუდ, ნამდა განდგომილეფ კრებეფს მიოჩილითუანდეს, მუდგას კრებეფიშ გორთუალა მაჸუნუდ. თეშ იძირედ, ნამდა მალას ჭეშმარიტებას არძა ქრისტიან მიოტენდჷ (იუდ. 4; გამოცხ. 2:15, 20; 3:1, 17).

2. მუჭოთ გამოცხადებაშ 7:9—14-ს ჭარჷ, მუ ხილუა ძირჷ მოციქულ იოანექ? (ქოძირით სურათ გალენ გვერდის)

² მუჟამსით იოანე თეცალ რთულ სიტუაციას რდუ, ღორონთიქ თის ხილუა ქაძირუ მომავალიშ გურშენ. თე ხილუას ართ ანგელოზ შხვა ოთხ ანგელოზის ურაგად, ქეწიჭოფან გუმანადგურებელ ქარბორიეფ, ნამდგას დიდ გასაჭირ მაჸუნუ დო ვა გუტუან, სოიშახ ართგურ მონეფს ბეჭედის ვეგიაშკვანა (გამოცხ. 7:1—3). ართგურ მონეფიშ თე ჯგუფის 144 000 პიროვნება რე, მით იესოწკუმა ართო იმეფენა ზეცას (ლუკ. 12:32; გამოცხ. 7:4). თეშ უკულ, იოანე ორწყე ანაყუ ხალხის. თეშ მეჯინუ, მოციქულ გაკვირებულო იჩიებ: „თეშ უკულ, მიკიბჯინ დო ქობძირ, ანაყუ ხალხი, მიდგაშ კოროცხუა მითინს ვეშულებუდ, არძა რჯულშე, ტომშე, ხალხშე დო ნინაშე, გერდეს ტახტიშ დო კირიბიშ წოხოლე“ (წეკითხით გამოცხადება 7:9—14). წერმიდგინით, მუნერ ბედნერ იჸუაფუდ იოანე, მუჟამსით ქიგეგენდჷ, ნამდა მომავალს ანაყუ ხალხ ემსახურებუდ იეჰოვას.

3. ა) მუშენ ოკო გამიმანგარან რწმენა იოანეშ ხილუაქ? ბ) მუს გუვარჩიენთ თე სტატიას?

³ მუშო ოკო რაგად, მოციქულ იოანეს თე ხილუა რწმენას გაუმანგარენდჷ. თეშნერო, თე ხილუაქ ჩქი ხოლო ოკო გამიმანგარან რწმენა, მუშენდა თე წინასწარმეტყველებაშ შესრულებაშ პერიოდის ფცხოვრენთ. ჩქინ დროს მილიონობით ხალხიქ დიჭყჷ იეჰოვაშ თაყვანიშცემა; თინეფს იმენდ უღნა,  დიდ გასაჭირს გინასკიდუნა დო მარადიულო იცხოვრენა დედამიწას. თე სტატიაშე ქიგებგენთ, მუჭო გაცხად იეჰოვაქ, 80 წანაშე უმოს წოხოლე, მი რე „ანაყუ ხალხი“. თეს გეძინელ, გუვარჩიენთ ჟირ საკითხის, ნამუთ ოხუ „ანაყუ ხალხიშ“ რაოდენობას დო წარმომავლობას. თე საკითხეფიშ გარჩიება რწმენას გუმანგარენს არძას, მით თე კურთხეულ ჯგუფშა მიშურს.

4. ნამ ბიბილიურ ჭეშმარიტებას ვაგურუანს ქრისტიანულ სამყარო ხალხის დო მუჭო გენესხვავებუდ ბიბლიაშ მარკვიებელეფიშ თვალსაზრის?

⁴ ქრისტიანულ სამყარო ხალხის ვაგურუანს ბიბლიურ ჭეშმარიტებას, ნამდა მორჩილ ადამიანეფ მომავალს მარადიულო იცხოვრენა დედამიწას (2 კორ. 4:3, 4). ამდღა, ქრისტიანულ სამყაროშ უმენტაშ რელიგია ოგურუანს, ნამდა არძა ჯგირ ადამიან ღურაშ უკულ ზეცაშა მეურს. მარა ბიბლიაშ მარკვიებელეფ, მით 1 800-იან წანეფიშ ბოლოს „გინაჯინალ კოშკის“ გიშაშკვანდეს, თეს ვაგურუანდეს. თინეფს ჯგირო არჩქილედეს, ნამდა ღორონთ დედამიწას კინ სამოთხეთ გინაშკვანდჷ დო მილიონობით მორჩილ კათა მარადიულო იცხოვრენდჷ თაქ, დედამიწას დო ვართ ხოლო ზეცას. მარა ბიბლიაშ მარკვიებელეფს დროქ დესაჭირეს თიშ გაგებელო, მი იჸუაფუდ თე მორჩილ კათა (მათ. 6:10).

5. მუშ ჯერდეს ბიბლიაშ მარკვიებელეფს 144 000-იშ გურშენ?

⁵ მუშო ოკო რაგად, ბიბლიაშ მარკვიებელეფქ, ბიბლიაშ საფუძველშა დერწმუნეს, ნამდა ადამიანეფიშ გარკვეულ ჯგუფ, „დედამიწაშე ნაჸიდერ“ იჸუაფუდ, მუშენდა იესოწკუმა ართო იმეფესკო ზეცას (გამოცხ. 14:3). თე ჯგუფის 144 000 დუდგინოდვალირ დო ღორონთშა მეძღვინელ ქრისტიან იჸუაფუდ, მით დედამიწას ცხოვრებაშ დროს ართგურობას დუმტკიცენდჷ ღორონთის. მუშ რაგად შილებე „ანაყუ ხალხშენ“?

6. მუს ფიქრენდეს ბიბლიაშ მარკვიებელეფ „ანაყუ ხალხიშ“ გურშენ?

⁶ იოანექ ხილუას ძირჷ ადამიანეფიშ ჯგუფ, მით „გერდეს ტახტიშ დო კირიბიშ წოხოლე“ (გამოცხ. 7:9). თე სიტყვეფიშ გურშენ ბიბლიაშ მარკვიებელეფქ იფიქრეს, ნამდა „ანაყუ ხალხი“, 144 000 ცხებულცალო, ზეცას იცხოვრენდჷ. მარა, ჟირხოლო ჯგუფ ზეცას ქიცხოვრენდჷ-და, მუ განსხვავება იჸუაფუდ თინეფ შქას? მუჭოთ ბიბლიაშ მარკვიებელეფ ფიქრენდეს, „ანაყუ ხალხი“ თი ქრისტიანეფ იჸუაფდეს, მით დედამიწას ცხოვრებაშ დროს სრულაშო ვამორჩილდეს იეჰოვას. თეს გეძინელ, ბიბლიაშ მარკვიებელეფს მიორჩქუდეს, ნამდა „ანაყუ ხალხ“ შქას იჸუაფდეს თიცალ კათა ხოლო, მით ბიბლიურ ნორმეფით ცხოვრენდჷ, მარა შილებე ქრისტიანულ სამყაროშ ეკლესიეფიშ წევრეფო სქიდუდეს. თინეფქ თი დასკვნაშა მერთეს, ნამდა თეცალ კათას უჸორდჷ ღორონთ, მარა თეშ ვარ, ნამდა იესოწკუმა ართო ზეცას მართველობაშ ღირსეფ ქოჸოფედესკო. ათეშენ, „ანაყუ ხალხი“ ტახტის გეხუნაშ მანგიორო, თიშ წოხოლე ქიგედირთუდ.

7. ბიბლიაშ მარკვიებელეფიშ აზრით, მი იცხოვრენდჷ დედამიწას ქრისტეშ ანთასწანიან მართველობაშ დროს დო მუს ფიქრენდეს თინეფ ღორონთიშ ართგურ მსახურეფიშ გურშენ, მიდგაქ იესოშ დაბადებაშახ ღურეს?

⁷ თე ირფელ თაშ ქიჸუაფუდ-და, მი იცხოვრენდჷ დედამიწას? ბიბლიაშ მარკვიებელეფ ფიქრენდეს, ნამდა თიშ უკულ, მუთ 144 000 დო „ანაყუ ხალხი“ ზეცას დიშაყარუდ, მილიონეფს დედამიწას ცხოვრებაშ ძღვინ ქიმიაჩამდეს დო მიღენდეს თი კურთხევეფს, ნამუთ ქრისტეშ ანთასწანიან მართველობას მაჸუნუდ. ბიბლიაშ მარკვიებელეფ ველდეს, ნამდა თე კათა ქრისტეშ მართველობაშ დოჭყაფაშახ გინირთუდეს იეჰოვაშ მსახურეფო. თინეფიშ აზრით, თე ჯგუფ იეჰოვაშ გურშენ ქრისტეშ ანთასწანიან მართველობაშ დროს დიგურუანდჷ დო მიდგა ღორონთიშ მითითებეფს მიაჸუნუდ, დედამიწას მარადიულო იცხოვრენდჷ. მარა თინეფ, მით თაშ ვემიქციებდეს,  გენადგურებდეს. თეს გეძინელ, ბიბლიაშ მარკვიებელეფს მიორჩქუდეს, ნამდა თი კათა შქას, მით ანთასწანიან მართველობაშ დროს „მთავრეფო“ იმსახურენდეს, იჸუაფდეს ღორონთიშ ართგურ მსახურეფ ხოლო, მიდგაქ იესოშ დაბადებაშახ ღურეს დო ანთასწანიან მართველობაშ დროს გეთელეს. ბიბლიაშ მარკვიებელეფიშ აზრით, თე „მთავრეფშე“ ნამთინე ანთასწანიან მართველობაშ ბოლოს ზეციურ ჯილდოს მიღენდჷ (ფსალმ. 45:16).

8. ბიბლიაშ მარკვიებელეფიშ აზრით, ნამ სუმ ჯგუფ არსებენდჷ?

⁸ ბიბლიაშ მარკვიებელეფს მიორჩქუდეს, ნამდა რდუ სუმ ჯგუფ: 1) 144 000 ცხებულ, მით იესოწკუმა ართო იმეფენდჷ ზეცას, 2) „ანაყუ ხალხ“, მით ნაკლებ მონდომას გიმირჩქინანდჷ დო იესოშ ტახტიშ წოხოლე ქიგედირთუდ ზეცას, დო 3) მილიონობით ხალხ, მით დედამიწას იცხოვრენდჷ დო ქრისტეშ ანთასწანიან მართველობაშ დროს იეჰოვაშ გურშენ დიგურუანდჷ. * მარა საჭირო დროს, იეჰოვა მეხვარებუდ თინეფს, ქინანჭესკო თე საკითხის (იგავ. 4:18).

9. ა) მუ გაგებათ გედირთუ „ანაყუ ხალხ“, „ტახტიშ დო კირიბიშ წოხოლე“? ბ) მუშენ რე გამოცხადებაშ 7:9-შ თეცალ გაგება ლოგიკურ?

⁹ 1935 წანას იეჰოვაშ მოწმეეფქ ქინანჭეს, მი რდუ იოანეშ ხილუას ნაძირეფ „ანაყუ ხალხი“. თინეფქ ქიმეხვადეს, ნამდა თე ხალხ პირდაპირ გაგებათ ვეგედირთუდ ზეცას „ტახტიშ დო კირიბიშ წოხოლე“. თეს სიმბოლურ გაგება უღუდ. მართალ რე, თინეფ დედამიწას იცხოვრენდეს, მარა იშენით ქიგედირთუდეს „ტახტიშ წოხოლე“ თი გაგებათ, ნამდა აღიარენდეს იეჰოვაშ უზენაესობას დო ხუჯის ქუდუკინენდეს თიშ მართველობას (ეს. 66:1). თეს გეძინელ, თინეფ „კირიბიშ წოხოლე“ თი გაგებათ ხოლო ქიგედირთუდეს, ნამდა გეგმირჩქინანდეს იესოშ გიშაჸიდირალიშ რწმენას. გამოცხადებაშ 7:9-ს ინოჭარილ სიტყვეფს, სიმბოლურ მნიშვნელობა უღჷ, მუდგას ამტკიცენს მათეშ 25:31, 32 მუხლეფ, სოდეთ ჭარჷ, ნამდა, „არძა ხალხ“, თინეფ შქას უბადოეფ ხოლო, „ეკიშაყარუ“ იესოშ დიდებულ ტახტიშ წოხოლე. არგამა რე, თე „არძა ხალხ“ ზეცას ვარინ, დედამიწას ეკიშაყარუ. თე ახალ გაგება, ნამუთიქ 1935 წანას გეგმიარგამ, ლოგიკურ რე. თენა ენწყუნს, მუშენ ვეჩიებ ბიბლია, ნამდა „ანაყუ ხალხ“ ზეცაშა იჸუაფ ეშაჸონაფილ დო ხვალე ართ ჯგუფ მიღენს უკვდავებას ზეცას, თენა რე 144 000 ცხებულ ქრისტიან, მით „მეფეეფ . . . [დო] დედამიწაშ მართველეფ“ იჸუაფნა (გამოცხ. 5:10).

10. მუშენ ოკო დიგურუას „ანაყუ ხალხიქ“ იეჰოვაშ გურშენ, ანთასწანიან მართველობაშ დოჭყაფაშახ?

¹⁰ 1935 წანაშე მოჸუნაფილ, იეჰოვაშ მოწმეეფქ ქიგეგს, ნამდა „ანაყუ ხალხ“, ნამუთ იოანექ ხილუას ძირჷ, თი ართგურ ქრისტიანეფ რდეს, მით ღორონთიშ განზრახვათ დედამიწას მარადიულო იცხოვრენდჷ. დიდ გასაჭირს გინასკიდანინ თიშენ, „ანაყუ ხალხიქ“ ანთასწანიან მართველობაშ დოჭყაფაშახ ოკო დიგურუას იეჰოვაშ გურშენ. თენა მეხვარებ თინეფს, გევითარან ძლიერ რწმენა, ნამუთ მეხვარებ გაურზან თი ირფელს, მუთ ქრისტეშ ანთასწანიან მართველობაშ დოჭყაფაშახ მოხვადუ (ლუკ. 21:34—36).

11. მუშენ ფიქრენდეს ბიბლიაშ მარკვიებელეფ, ნამდა შილებე ნამთინე ანთასწანიან მართველობაშ ბოლოშო ზეცაშა იჸუაფუდ ეშაჸონაფილ?

¹¹ მუშენ ჯერდეს ბიბლიაშ მარკვიებელეფს, ნამდა „მთავრეფშე“ ნამთინე ანთასწანიან მართველობაშ უკულ ზეცაშა იჸუაფუდ ეშაჸონაფილ? თინეფს თი დროს ჟირ არასწორ თვალსაზრის უღუდეს: 1) ფიქრენდეს, ნამდა ანაყუ ხალხ ზეცას იცხოვრენდჷ დო 2) თე ჯგუფის იჸუაფუდეს თი ქრისტიანეფ, მით სრულაშო ვეგმირჩქინანდჷ ღორონთიშ ჸოროფას. ათეშენ თინეფ ფიქრენდეს: «მუშენ ოკო იცხოვრან ჯვეშ დროს მახორუ ართგურ პიროვნებეფქ დედამიწას, მუჟამსით „ანაყუ ხალხ“, მით ბოლოშა ართგურეფ ვა რდეს, ზეცაშა იჸუაფნა ეშაჸონაფილ?». თე მიზეზით,  1913 წანაშ 15 ფრევალიშ „გინაჯინალ კოშკის“ ჭარუდ, ნამდა ნამთინე ართგურ კათა, ნამუთ „მთავრეფშა“ მიშეშ, ანთასწანიან მართველობაშ ბოლოშო, ზეცაშა იჸუაფუდ ეშაჸონაფილ.

12, 13. მუ უჩქნა ცხებულეფს დო „ანაყუ ხალხის“ მუნეფიშ ჯილდოშ გურშენ?

¹² მარა მუჭოთ ბძირით, 1935 წანაშე მოჸუნაფილ იეჰოვაშ მოწმეეფქ ბოლოშა ქინანჭეს, ნამდა „ანაყუ ხალხ“, ნამუთ იოანექ მუშ ხილუას ძირჷ, თინეფ რენა, მით არმაგედონს გინასკიდუ. თინეფ დედამიწას დიდ გასაჭირს გეგნიღანა დო მუჭოთ ბიბლიას ჭარჷ, „რსხებას ჩქინ ღორონთის, ტახტის გეხენ ფერს, დო კირიბის“ უმარდუდან იჸი (გამოცხ. 7:10, 14). თეს გეძინელ, თინეფქ ქიგეგეს, ნამდა ჯვეშ დროს მახორუ ართგურ კათა, მიდგაქ იესოშ დაბადებაშახ ღურეს, ზეცას ვეცხოვრენდეს. მუშენდა ბიბლიას ჭარჷ, ნამდა ზეციურ ცხოვრებაშო გათელებურეფ „მუდგარენ უჯგუშის“ მიღენდეს ვინემ ჯვეშ დროს მახორუ ღორონთიშ ართგურ მსახურეფ (ებრ. 11:40). 1935 წანაშ უკულ, მუჟამსით ჯიმალეფქ თე საკითხეფს ქინანჭეს, უმოს გურგედვალირო მოუწოდენდეს ხალხის, ემსახურესკო იეჰოვას დო უღუდესკო დედამიწას მარადიულო ცხოვრებაშ იმენდ.

¹³ „ანაყუ ხალხ“ ბედნერ რენა, მუშენდა თეცალ დიდებულ მომავალიშ იმენდ უღნა. თინეფს ჯგირო არჩქილენა, ნამდა იეჰოვა გინოჭყვიდუნს, მუშ ართგურ მსახურეფ ზეცას ემსახურებნა თის, დო ვარ დედამიწას. ჟირხოლო ჯგუფის, მუჭოთ ცხებულეფს, თეშ „ანაყუ ხალხის“ უჩქჷ, თე ჯილდოს ხვალე თიშენ ღებულენა, ნამდა იეჰოვა ჭყოლოფას გიმირჩქინანს თინეფწკუმა იესოშ მსხვერპლიშ საფუძველშა (რომ. 3:24).

14. მუშენ ოეჭვუდ ბრელს 1935 წანას, მუჭო შესრულებუდ წინასწარმეტყველება „ანაყუ ხალხიშ“ გურშენ?

¹⁴ თიშ უკულ, მუთ 1935 წანას იეჰოვაშ ხალხიქ ქინანჭჷ თე საკითხეფს, ბრელს იშენით ოეჭვუდ, მუჭო გინირთუდ დედამიწას ცხოვრებაშ იმენდ უღდესინ თინეფ, „ანაყუ ხალხო“. მაგალთო, რონალდ პარკინი 12 წანერ რდუ, მუჟამსით გეგმიარგამ, მი რდუ „ანაყუ ხალხ“. თინა იშინანს: „თი დროს, მთელ მსოფლიოს, სოდგარენ 56 000 მაუწყებელ რდუ დო თინეფშე ბრელ, შილებე უმენტაშ ხოლო, ცხებულეფ რდეს. თაშ ნამდა, თეშ იძირედ, ითამ ანაყუ ხალხ, იშენდოიშენ ბრელ ვარდჷ“.

15. მუჭო იძინანდჷ „ანაყუ ხალხიშ“ რაოდენობა?

¹⁵ უკულიან წანეფს, ბრელ ქიანას მისიონერეფ დანიშნეს, თაშ ნამდა, იეჰოვაშ მოწმეეფიშ რიცხვ ირიათო იძინანდჷ. 1968 წანას ბიბლიაშ გურაფეფს ვატარენდით ახალ წიგნით („მარადიულ სიცოცხლემდე მიმყვანი ჭეშმარიტება“). ბიბლიურ გურაფეფ თე წიგნის  მარტივო რდუ ენწყუმილ დო ათეშენ, იეჰოვაშა უმოს მეტ ხალხ მიშჷ, ვინემ თეიშახ. ოთხ წანაშ დინახალე გვერდ მილიონ პიროვნებაქ ინათ. კათოლიკურ ეკლესიაქ ლათინურ ამერიკას დო შხვა ქიანეფს ხოლო მუშ გავლენა მიოდინუ. ათეშენ, ჩქინ საქმიანობაშ აკრძალვა გაუქმეს აღმოსავლეთ ევროპას დო აფრიკაშ ნამთინე მხარეს. შედეგო, მილიონობით პიროვნებაქ დინათ (ეს. 60:22). ბოლო წანეფს იეჰოვაშ ორგანიზაციაქ ბიბლიაშ გურაფას მოხვარნან ფერ ბრელ საშვალება გიშაშკვჷ. თე ირფელ მოხვარნა ხალხის ბიბლიურ ჭეშმარიტება ქუგვოგებაფუათ. არგამა რე, იეჰოვა შაყარანს „ანაყუ ხალხის“, ნამდგაშ რიცხვიქ ბრუო მილიონს გეგნაჩირთჷ.

16. მუნერ წარმომავლობაშ კათა რე „ანაყუ ხალხ“ შქას?

¹⁶ მუშ ხილუაშ ეჭარუაშ დროს იოანექ თქუ, ნამდა ანაყუ ხალხ ქიმიშ „არძა რჯულშე დო ტომშე, ხალხშე დო ნინაშე“. უმოს ადრე, თეცალ მუდგარენ ზაქარიაქ ხოლო იწინასწარმეტყველ. თიქ ჭარჷ: „თი დროს არძა ნინაშ ხალხშე ვით კოჩ მანგარო ქიმეთხუნს ხეს იუდეველიშ კართეს დო უწინს: თქვანწკუმა ართო მოლურთ, მუშენდა გამგონებნა, თქვანწკუმა რენია ღორონთი“ (ზაქ. 8:23).

17. მუს ორთჷ იეჰოვაშ ორგანიზაცია, ნამდა არძა ერიშ დო ნინაშ ხალხიქ ჭეშმარიტება ქიგეგას?

¹⁷ იეჰოვაშ მოწმეეფს უჩქნა, ნამდა არძა ნინაშე  ხალხიქ დიშაყარასინ, სახიოლო ამბე ბრელ ნინაშა ოკო იქადაგან. 130 წანაშე უმოს რე მუთ ფთარგმნუნთ ბიბლიაშ გურაფას მოხვარნან ფერ პუბლიკაციეფს. მარა ასე, ისტორიაშ დინახალე არძაშ უმოს მეტ ნინაშა მეურს თარგმნუაშ საქმე დო ჩქინ პუბლიკაციეფ ოშობით ნინაშა ითარგმნუ. არგამა რე, იეჰოვა ანაყუ ხალხის შაყარანს არძა ერშე დო თენა ასეიან დროს სასწაულ რე. მთელ მსოფლიოს, თე ხალხ ღორონთის გაერთიანებულო ომსახურ, მუშენდა სულიერ საზრდო ბრელ ნინაშა რე ხეშა მალაფარ. თე ხალხ ჯიმალურ ჸოროფათ დო გურგედვალირ ქადაგებათ გიშეგორნა. თეშ ძირაფა მართალო რწმენას მიმანგარენა! (მათ. 24:14; იოან. 13:35).

18. ა) მუჭოთ ესაიაშ 46:10 დო 11-ის ჭარჷ, მუშენ ვამკვენა, ნამდა იეჰოვაქ შეასრულ წინასწარმეტყველება „ანაყუ ხალხიშ“ გურშენ? ბ) მუშენ ვა გინაფლენს დუდის „ანაყუ ხალხ“ თეშ, ითამ ღორონთიშ თოლს ნაკლებო დაფასებულეფ რენა?

¹⁸ ჩქინო მართალო დიდ მნიშვნელობა უღჷ წინასწარმეტყველებას, ნამუთ „ანაყუ ხალხის“ ოხუ. ჩქი ვამკვენა, ნამდა იეჰოვაქ თე წინასწარმეტყველება სარკოთ შეასრულ (წეკითხით ესაია 46:10, 11). ანაყუ ხალხ თი იმენდიშ მარდულ რე, ნამუთ იეჰოვაქ მეჩჷ თინეფს. თინეფ ვა გინაფლენა, ნამდა ცხებულეფ ვა რენან თიშენ, ღორონთიშ თოლს ნაკლებო დაფასებულეფ რენა. ბიბლიაშე ბგებულენთ ღორონთიშ თი ართგურ მსახურეფიშ გურშენ, მიდგას იეჰოვა წმინდა შურით ხემძღვანელენდჷ, მარა თინეფ ვა რენა 144 000 ცხებულ პიროვნებაშ შქას. თეშ ართ-ართ მაგალით იოანე ნათლიშმცემელ რე (მათ. 11:11). ხოლო ართ მაგალით რე, მეფე დავით (საქ. 2:34). თე პიროვნებეფ დო დანარჩენ ართგურ მსახურეფ დედამიწას სამოთხეს იცხოვრენა. თინეფს „ანაყუ ხალხწკუმა“ ართო, საშვალება აღვენუნა ართგურობა დუმტკიცან იეჰოვას დო ხუჯ ქუდუკინან თიშ უზენაესობას.

19. მუჭო მოხვარნა იოანეშ ხილუაშ ძირაფა თიშ გაგებას, ნამდა მართალო ბოლო დღალეფს ფცხოვრენთ?

¹⁹ ამდღა იეჰოვა შაყარანს მილიონობით ხალხის არძა ერშე, ნამდა გაერთიანებულო ცანჷ თის თაყვან. თეცალ მუდგარენ კაცობრიობაშ ისტორიას დღას ვა მოხვალამე! ვა უღჷ მნიშვნელობა, დედამიწას ცხოვრებაშ იმენდ მიღნა, დო ვარ ზეცაშ, მუთ შილებენ ბრელ ხალხის ოკო მივეხვარათ „შხვა შხურიშ“ ნაწილქ ქიჸუან (იოან. 10:16). მალას იეჰოვა შეასრულენს წინასწარმეტყველებას დიდ გასაჭირიშ გურშენ დო განადგურენს მთავრობეფს დო რელიგიეფს, მუდგაქ ბრელ ჭუა მოუღ კაცობრიობას. ნამდვილო, მუშმადიდა პატი უღჷ ანაყუ ხალხის — თინეფს შეულებნა მარადიულო ემსახურან იეჰოვას დედამიწას! (გამოცხ. 7:14).