1, 2. ა) მუშენ იჸუაფ არმაგედონ სახიოლო მოვლენა კაცობრიობაშო? ბ) მუ კითხვეფს გუვარჩიენთ თე სტატიას?

ამდღა არმაგედონს ხალხიშ უმენტაშ ბირთვულ ომწკუმა ვარდა ეკოლოგიურ კატასტროფაწკუმა აკავშირენს. მარა ბიბლია იჩიებ, ნამდა თე მოვლენას ჯგირობუა მაჸუნუ დო ხიოლიშ მიზეზ მაღვენუნა (გამოცხ. 1:3). არმაგედონ კაცობრიობაშ მოსპუალას ვარინ, რსხებას ნიშნენს. მორთ ქობძირათ, მუჭო მოხვადუ თენა.

² მუჭოთ ბიბლიაშე ბგებულენთ, არმაგედონს მისპუ ადამიანურ მართველობა დო თენა დერსხენს ხალხის. თე ბრძოლას გენადგურებნა უბადოეფ დო ალალგურიშ კათა გინასკიდუ. თეს გეძინელ, არმაგედონიშ ბრძოლას მისპუნა თინეფ, მით ანადგურენა დედამიწას დო თენა ხალხის რსხებას მოუღანს (გამოცხ. 11:18). თე მოვლენაშ გურშენ უმოს მეტ ქიგებგათინ, მორთ გუვარჩუათ ოთხ კითხვა: მუ რე არმაგედონ? მუ მოვლენეფ მოხვადუ თიშ დოჭყაფაშახ? მუ ოკო ვაკეთათ, ნამდა თინეფ შკას ქიპჸუათ, მით არმაგედონს გინასკიდუ? მუჭო შემლებნა დოფსკიდათ ართგურეფქ თე ბოლო დროს?

3. ა) მუს ნიშნენს სიტყვა „არმაგედონი“? ბ) მუჭო იძირე გამოცხადებაშ 16:14 დო 16-შე, ნამდა არმაგედონი პირდაპირ გაგებათ მუდგარენ ადგილს ვა ნიშნენს?

³ წეკითხით გამოცხადება 16:14, 16. სიტყვა „არმაგედონ“ ბიბლიას ხვალე ართშა რე მოშინაფილ. თე ებრაულ სიტყვა ნიშნენს „მეგიდოშ გვალას“ (გამოცხ. 16:16). ჯვეშო მეგიდო ისრაელიშ ართ-ართ ქალაქის ჯოხოდ (იეს. 17:11). არმაგედონ პირდაპირ გაგებათ, მუდგარენ ადგილს ვა ნიშნენს. სინამდვილეს, არმაგედონს იგულისხმებ თი დროშ მონაკვეთ, მუჟამსით „მთელ მსოფლიოშ მეფეეფ“ აკიშაყარუნა იეჰოვაშ წინააღმდეგ (გამოცხ. 16:14). თეს გეძინელ, თე სტატიას ჩქი სიტყვა „არმაგედონს“ გიმიბრინუანთ თი ბრძოლაწკუმა  დაკავშირებით, ნამუთ ხეთეშე მაჸუნუ „მთელ მსოფლიოშ მეფეეფიშ“ აკოშაყარუას. სოვრეშე მიჩქნა, ნამდა არმაგედონს სიმბოლურ მნიშვნელობა უღჷ დო კონკრეტულ ადგილ ვეგულისხმებ? პირველ, ვა არსებენს გვალა, ნამდგას მეგიდო ჯოხო. მაჟია, თი ტერიტიორია, სოდეთ ჯვეშო ქალაქ მეგიდო არსებენდჷ, ნაბეტან ჭიჭე რე თიშო, ნამდა ქიგინტირინუას „მთელ მსოფლიოშ მეფეეფ“ მუნეფიშ ჯარით დო ოჩხუპებელ იარაღეფით. მასმა, მუჭოთ თე სტატიაშე გებგენთ, არმაგედონიშ ბრძოლა თიმწკუმა დიჭყაფუ, მუჟამსით „მეფეეფ“ ღორონთიშ ხალხის დუდის ქიგიანთხუნა მთელ მსოფლიო მაშტაბით.

4. მუშენ დაკავშირ იეჰოვაქ საბოლოო ბრძოლა მეგიდოწკუმა?

⁴ მუშენ დაკავშირ იეჰოვაქ საბოლოო ბრძოლა მეგიდოწკუმა? ბიბლიურ დროს მეგიდოს დო იზრეელიშ ველიშ გოხოლუას, ბრელ ბრძოლეფ ხვადუდ. მინშა იეჰოვა ხოლო ღებულენდჷ მონაწილებას თე ბრძოლეფს დო ოხვარუდ მუშ ხალხის. მაგალთო, „მეგიდოშ წყარწკუმა“ ღორონთიქ მეხვარ ისრაელიშ მსაჯულ ბარაკის, გიორჯინკო ქანაანელეფიშ ჯარიშ მეთაურ სისერას. ბარაკიქ დო წინასწარმეტველ ოსურქ, სახელო დებორაქ, ღორონთის მადლობა გინუგეს თე სასწაულებრივ გამარჯვებაშ გურშენ. თინეფ იბირდეს: „ცაშე მურიცხეფ ბრძოლენდეს . . . სისერას ობრძოლდეს. კიშონიშ ხევქ მიდეღ თინეფ“ (მსაჯ. 5:19—21).

5. მუ მნიშვნელოვან განსხვავება რე ბარაკიშ დროს მოხვალამირ ბრძოლაშ დო არმაგედონიშ ბრძოლაშ შკას?

⁵ ბარაკი დო დებორაქ ბირა თეცალ სიტყვეფით ათეს: „იეჰოვა, ათაშ დოღურედას არძა სქან ნტერ; სი უჸორქინ თი კათა, ეშმაულარ ჩხანაცალ დიდებულო ჸოფედას“ (მსაჯ. 5:31). არმაგედონიშ ბრძოლაშ დროს ღორონთიშ ნტერეფ ხოლო თაშ გენადგურებნა დო თინეფ, მიდგას ღორონთ უჸორს, გინასკიდუნა. მარა თე ბრძოლაშ დო არმაგედონიშ ბრძოლაშ შკას, ართ მნიშვნელოვან განსხვავება რე. არმაგედონს ღორონთიშ ხალხ ვემიღენს მონაწილებას. თინეფს იარაღ ხოლო ვაღვენუნა! თინეფიშ „ძალა მშვიდას რინას დო [იეჰოვაშ დო თიშ ზეციერ ჯარშა] მენდებას იჸუაფ“ (ეს. 30:15; გამოცხ. 19:11—15).

6. მუჭო განადგურენს იეჰოვა მუშ ნტერეფს არმაგედონიშ ბრძოლას?

⁶ მუჭო განადგურენს იეჰოვა მუშ ნტერეფს არმაგედონიშ ბრძოლას? თიქ შილებე ბრელ შხვადოშხვა საშვალება გიმირინუას, მუნერით რე: მიწისძვრეფ, კირცხი, ვალ დო გურგინ (იობ. 38:22, 23; ეზეკ. 38:19—22). შილებე მუშ ნტერეფ ართიანს დუპირისპირას (2 მატ. 20:17, 22, 23). ვარდა ანგელოზეფიშ ხეთ განადგურას უბადო კათა (ეს. 37:36). მუდგა საშვალება ვეგმირინუასინ, ღორონთ აუცილებერო გემარჯვენს დო მუშ არძა ნტერს გიორჯგინანს. თეს გეძინელ, არძა ალალგურიშ კათა გინასკიდუ (იგავ. 3:25, 26).

7, 8. ა) მუჭოთ 1 თესალონიკელეფიშ 5:1—6-ის ჭარჷ, მუ განცხადებას გაკეთენა პოლიტიკურ ლიდერეფ? ბ) მუშენ რე თე ტყურა განცხადება განსაკუთრებულო ოშკურანჯ?

⁷ „იეჰოვაშ დღაშ“ მოულაშახ „მშვიდობა დო უსაფრთხოებას“ გეგმაცხადენა (წეკითხით 1 თესალონიკელები 5:1—6). 1 თესალონიკელეფიშ 5:2-ს „იეჰოვაშ დღა“ დაკავშირებულ რე „დიდ გასაჭირწკუმა“ (გამოცხ. 7:14). მუჭო შემლებნა თიშ გაგება, მუჟამ დიჭყაფუ დიდ გასაჭირ? მუჭოთ ბიბლია მირაგადნან, პოლიტიკურ ლიდერეფ გეგმაცხადენა „მშვიდობა დო უსაფრთხოებას“ დო თენა მიმოხვამლუანა, ნამდა დიდ გასაჭირ მალას დიჭყაფუ.

⁸ მუშენ გაკეთენა პოლიტიკურ ლიდერეფ თეცალ განცხადებას? თენა ზუსტას ვა მარაგადენა. რელიგიურ ლიდერეფ ხოლო მიღენანო მონაწილებას თე განცხადებაშ კეთებას? შილებე თაშ ხოლო ქუმოხვადას. მარა ჩქი მიჩქნა, ნამდა პოლიტიკურ ლიდერეფიშ თე განცხადება რე ტყურა, ნამუთ სინამდვილეს დემონეფშე მოურს. თეცალ ტყურა განცხადება განსაკუთრებულო ოშკურანჯ რე, მუშენდა ხალხის უსაფრთხოებაშ უსაფუძვლო იმენდის არზენს; ვარინ თე დროს კაცობრიობაშ ისტორიას არძაშ უდიდაშ გასაჭირქ ოკო დიჭყას. თინეფს „დუდის ქიგიოტირხუნა განადგურება, მუჭოთ  ორსულ ოსურს მშობიარობაშ ჭუეფ, დო დუდ ვეიაჩილითენა“. მუ მდგომარეობას იჸუაფნა იეჰოვაშ ართგურ მსახურეფ? ზუსტას ვა მიჩქნა მუჟამ დიჭყაფ დიდ გასაჭირ დო ათეშენ, იეჰოვაშ ხალხშო თექ შილებე მოულოდნელქ იჸუას, მარა თეშ უმკუჯინუო, თინეფ იშენით მზათ იჸუაფნა.

9. მუნერ თანმიმდევრობათ განადგურენს იეჰოვა სატანაშ ქიანას?

⁹ იეჰოვა სატანაშ ქიანას ართ უცბას ვა მოსპუნს, მუჭოთ თენა ნოეშ დროს აკეთ. ღორონთ დიო ეშმაკიშ ქიანაშ ართ ნაწილს განადგურენს დო უკულ შხვა დანარჩენეფს. დუდშე იეჰოვა დიდ ბაბილონს, ტყურა რეგილიას განადგურენს. უკულ არმაგედონიშ ბრძოლაშ დროს თინა სატანაშ ქიანაშ დოსკილადირ ნაწილს მუღენს ბოლოს, ნამდგაშა მიშურს პოლიტიკურ, სამხედრო დო კომერციულ სისტემეფ. მორთ დეტალურო გუვარჩუათ თე მოვლენეფ.

10. მუჭოთ გამოცხადებაშ 17:1, 6-ის დო 18:24-ის ჭარჷ, მუშენ განადგურენს იეჰოვა დიდ ბაბილონს?

¹⁰ „დიდ მეძავიშ სასამართლო“ (წეკითხით გამოცხადება 17:1, 6; 18:24). დიდ ბაბილონქ ბრელშა მიორინუ შეურაცხყოფა ღორონთიშ სახელს. თინა ღორონთიშ გურშენ ტყურას ოგურუანდჷ ხალხის. უზნეო ოსურცალო, დიდ ბაბილონ ვარდჷ იეჰოვაშ ართგურ, მუშენდა ადამიანურ მართველობას უკინენდჷ ხუჯის. თინა აჩაგრენდჷ მუშ წევრეფს დო ფარას მიდმუღანდჷ თინეფს. თიქ ბრელ კოჩიშ ზისხირ დაბჷ; თინეფ შკას, ღორონთიშ მსახურეფიშ ზისხირ ხოლო (გამოცხ. 19:2). მუჭო განადგურენს იეჰოვა დიდ ბაბილონს?

11. მუშ სიმბოლო რე „ალიშფერ მხეც“ დო მუჭო გიმირინუანს თის იეჰოვა დიდ ბაბილონიშ წინააღმდეგ?

¹¹ იეჰოვა „ალიშფერ მხეციშ“ დო „ვით რქაშ“ საშვალებათ განადგურენს „დიდ მეძავს“. თე მხეცი გაერთიანებულ ერეფიშ ორგანიზაციაშ სიმბოლო რე. „ვით რქა“ თი პოლიტიკურ ძალეფიშ სიმბოლო რე, ნამუთ ხუჯის უკინენს თე ორგანიზაციას. ღორონთიშ დანიშნულ დროს პოლიტიკურ ძალეფ დუდის ქიგიანთხუნა ბაბილონს. თინეფ „აწიოკენა დო ბარგის გემკანწყუნა“ დიდ ბაბილონს, მუთ თის ნიშნენს, ნამდა მთელ სიმდიდრეს მიდუღანა დო თიშ უბადობას გეგმაარგამენა (გამოცხ. 17:3, 16). თეცალ უცბაშიან განადგურება, მანგარ მოულოდნელ იჸუაფ თინეფშო, მით ხუჯის უკინენს თის, მუშენდა დიდ ბაბილონ ხშირას დუდშა იცქვანდჷ დო იჩიებუდ: „დედოფალო ვოხექ, ქომონჯნაღურა  ოსურ ვა ვორექ დო გლოვას დღას ვა ბძირუნქ“ (გამოცხ. 18:7, 8).

12. მუშ კეთებაშ ნებას ვემეჩანს ღორონთ ერეფს დო მუშენ?

¹² ღორონთ ვემეჩანს ერეფს თიშ საშვალებას, ნამდა განადგურან მუშ ხალხ. ღორონთიშ მსახურეფს ოამაყნა თიშ სახელიშ გაცხადება. თინეფქ დემორჩილეს თიშ მითითებას, ქიდიტესკო დიდ ბაბილონი (საქ. 15:16, 17; გამოცხ. 18:4). ღორონთიშ მსახურეფქ ბრელ იხანდეს დო შხვეფს ხოლო ქიმეხვარეს დიდ ბაბილონიშ დოტებას. თაშ ნამდა, იეჰოვაშ მსახურეფ ვემიღენა „თიშ წყლულეფს“. მართალ რე, იეჰოვაშ მსახურეფ თხილერ იჸუაფნა მუჟამსით დიდ ბაბილონ გენადგურებ, მარა თინეფს იშენით ოსაჭირნა მანგარ რწმენა, ნამდა გაურზან რწმენაშ გამოცდეფს, მუდგას თი დროს შეხვადნა.

13. ა) მი რე „გოგი მაგოგიშ დიხაშე“? ბ) მუჭოთ ეზეკიელიშ 38:2, 8 დო 9-ს ჭარჷ, მუჟამ მეურს „გოგი“ სიმბოლურ გაგებათ თი ადგილშა, ნამდგას არმაგედონ ჯოხო?

¹³ გოგიშ თავდასხმა (წეკითხით ეზეკიელი 38:2, 8, 9). ტყურაშ გუმავრცელებერ რელიგიურ ორგანიზაციეფიშ განადგურებაშ უკულ, დედამიწას ხვალე იეჰოვაშ მოწმეეფიშ რელიგია იარსებენს. მუშო ოკო რაგად, სატანა გარისხებულ იჸუაფ. თინა მუშ რისხუას თიმწკუმა გეგმოხანტუნს, მუჟამსით დემონურ პროპაგანდაშ საშვალებათ, მუდგას ბიბლია „შთაგონებულ უწმინდურ სიტყვათ“ ხოლო მიშინუანს, დოშაყარანს კოალიციას, ნამდგაშა არძა ერი მიშურს დო იეჰოვაშ ხალხიშ წინააღმდეგ გეგშიჸონანს (გამოცხ. 16:13, 14). თე კოალიციას ბიბლია მიშინუანს სახელით, „გოგი მაგოგიშ დიხაშე“. თი დროშო, მუჟამსით ერეფიშ კოალიცია მუშ თავდასხმას დიჭყანს, თინეფ სიმბოლურ გაგებათ ქიმულა თი ადგილშა, ნამდგას არმაგედონ ჯოხო (გამოცხ. 16:16).

14. მუს მეხვადუ „გოგი მაგოგიშ დიხაშე“?

¹⁴ „გოგის“ მუშ „ხორციელ ძალაშ“ იმენდ უღჷ, შხვა სიტყვეფით ქოფთქუათინ, მუშ ჯარიშ იმენდ (2 მატ. 32:8). მარა ჩქი იეჰოვაშ, ჩქინ ღორონთიშ იმენდ მაღვენუნა დო თენა, ერეფიშ თოლს უგუნურება იჸუაფ; მუშენდა თე დროშო, მუშ თოლით აფუდან იჸი ნაძირეფ, მუჭო განადგურ „ვით რქაქ“ დო „ალიშფერ მხეციქ“ დიდ ბაბილონ, ნამდგაშა მუშ ღორონთეფს მუთუნქ ვა მახვარებეს (გამოცხ. 17:16). თე მიზეზით, ერეფ იფიქრენა, ნამდა ღორონთიშ ხალხის ხოლო ადვილო განადგურენა. მუჟამსით „გოგი“  იეჰოვაშ ხალხის ქიგიანთხუ, „მუნაფაცალო დოფორუნს დიხას“ (ეზეკ. 38:16). მარა ერეფ მალას ქიმეხვადნა, ნამდა განადგურებაშე დუდ ვა დარსხებენა. ფარაონცალო, ნამუთ ჭითა ზღვაწკუმა რდუ, თინეფ ხოლო ქიმეხვადუნა, ნამდა იეჰოვას ობრძოლნა (გამ. 14:1—4; ეზეკ. 38:3, 4, 18, 21—23).

15. მუს აკეთენს იესო არმაგედონიშ ბრძოლაშ დროს?

¹⁵ იესო მუშ ზეციერ ჯარწკუმა ართო დეცვენს ღორონთიშ ხალხის დო განადგურენს ღორონთიშ არძა ნტერს (გამოცხ. 19:11, 14, 15). მარა მუ აღოლე იეჰოვაშ მთავარ ნტერს, სატანას, მიდგაქ შეცდომაშა მიშეჸონ ერეფ დო ღორონთიშ ხალხიშ წინააღმდეგ გეგშეჸონ თინეფ? იესო თის მუშ დემონეფწკუმა ართო უფსკრულს ქინაჸათანს, სოდეთ ანთას წანას იჸუაფნა ხვილირ (გამოცხ. 20:1—3).

16. ა) მუჭო შემლებნა ვოძირათ, ნამდა „იფჩინენთ ღორონთის“? ბ) მუ ჯგირობუა ელჷ არმაგედონიშ ბრძოლაშ დროს თი ხალხის, მით იჩინენს ღორონთის?

¹⁶ ვა უღჷ მნიშვნელობა ჭეშმარიტება ახალ გაგებულ მაფნა დო ვარ ბრელ ხან რე ღორონთის ვომსახურუთ, არმაგედონს გინვოსკიდათინ, ოკო ვოძირუათ, ნამდა „იფჩინენთ ღორონთის“ დო ვომორჩილუთ „სახიოლო ამბეს ჩქინ უფალ იესოშ გურშენ“ (2 თეს. 1:7—9). ღორონთის თიმწკუმა იფჩინენთ, მუჟამსით მიჩქნა თიშ ნორმეფ დო თინა ხოლო მუ მოწონს დო მუ ვა მოწონს თის. თეს გეძინელ, მუჟამსით გიმიფრჩქინანთ იეჰოვაშ ჸოროფას, ვომორჩილუთ ღორონთის დო ხვალე თის ფცენთ თაყვანს, ვოძირანთ, ნამდა იფჩინენთ თის (1 იოან. 2:3—5; 5:3). თე ირფელს გუვაკეთენთ-და, ღორონთიშ მოწონებას მიბღენთ (1 კორ. 8:3). შედეგო, გეგნიბღანთ არმაგედონიშ ბრძოლას.

17. მუ მიშურს „ჩქინ უფალ იესოშ გურშენ“ სახიოლო ამბეშა?

¹⁷ „ჩქინ უფალ იესოშ გურშენ“ სახიოლო ამბეშა მიშურს იესოშ არძა გურაფა, ნამუთ ღორონთიშ სიტყვას ინოჭარ. მუჟამსით თე ირფელს ცხოვრებას გიმიბრინუანთ, სახიოლო ამბეს ვომორჩილუთ. თე მორჩილებაშა მიშურს სამეფოშ ინტერესეფიშ პირველ ადგილს გერინაფა, ღორონთიშ სამართლიან ნორმეფიშ გათვალისწინება დო ღორონთიშ სამეფოშ გურშენ ქადაგება (მათ. 6:33; 24:14). თეს გეძინელ, თეშა მიშურს ქრისტეშ ცხებულ ჯიმალეფიშ მოხვარა  ხოლო სახიოლო ამბეშ ქადაგებაშ დო მოწაფეეფიშ მომზადებაშ საქმეს (მათ. 25:31—40).

18. მუჭო გინუგანა ჯგირობუათ ღორონთიშ ცხებულ მსახურეფ მალას „შხვა შხურიშ“ კათას?

¹⁸ ღორონთიშ ცხებულ მსახურეფ მალას ჯგირობუათ გინუგანა „შხვა შხურიშ“ კათას თი ირფელშო, მუთ თინეფშო აკეთეს (იოან. 10:16). მუჭო მოხვადუ თენა? არმაგედონიშ ბრძოლაშ დოჭყაფაშახ, 144 000-იშ დოსკილადირ ნაწილ ზეცაშა იჸუაფ ეშაჸონაფილ, მუჭოთ სულიერ ქმნილებეფ დო უკვდავებაშ ძღვინს მიღენა. თეშ უკულ, არძა ცხებულ თი ზეციურ ჯარიშ ნაწილ იჸუაფ, მიდგა განადგურენს „გოგის“ დო დეცვენს იეჰოვაშ ხალხის (გამოცხ. 2:26, 27; 7:9, 10). მართალო, „ანაყუ ხალხ“ ბედნერ იჸუაფ, მუშენდა ხუჯის უკინენდეს იეჰოვაშ ცხებულ მსახურეფს, მუჟამსით თინეფ დედამიწას ცხოვრენდეს.

19, 20. პრობლემეფიშ უმკუჯინუო, მუჭო შემლებნა დოფსკიდათ ართგურეფქ თე ბოლო დროს?

¹⁹ თე ბოლო დღალეფს, იეჰოვაშ ბრელ მსახურ განსაცდელეფს შეფხვადუთ. თეშ უმკუჯინუო, ჩქი იშენით შემლებნა ვა ვოდინუათ ხიოლ (იაკ. 1:2—4). ართ-ართ საშვალება, მუთ მანგარო მიმეხვარებნა, რე ლოცვა (ლუკ. 21:36). მარა ხვალე ლოცვა ვა რე დასაბაღ. საჭირო რე ბიბლიაშ ირდღაშიან კითხირ დო ნაკითხერშე ფიქრ. თეწკუმა ართო თი წინასწარმეტყველებეფშე ფიქრ ხოლო, ნამუთ მალას მოხვადუ (ფსალმ. 77:12). მუჟამსით თე ირფელს ვორთუთ დო მსახურებას მაქსიმალურო ბღებულენთ მონაწილებას, რწმენა დო მომავალიშ იმენდ უმოსო მემანგარებნა.

²⁰ წერმიდგინით, მუნერ ბედნერ იჸუაფუთ, მუჟამსით დიდ ბაბილონ გენადგურებ დო არმაგედონიშ ბრძოლა გეთებუ! წერმიდგინით, მუნერ ბედნერო იგინანთ დუდის, მუჟამსით არძა დაფასენს ღორონთიშ სახელს დო თიშ მართველობას (ეზეკ. 38:23). მართალო, არმაგედონ ჯგირობუას მოუღანს თინეფს, მით იჩინენს ღორონთის, ომორჩილ თიშ სქუას დო ბოლოშა გიმირჩქინანს მოთვინებას (მათ. 24:13).