1. მუჭო უჯინე იეჰოვა თანდაბალ ხალხის? გენწყით.

იეჰოვას უჸორს თანდაბალ ხალხი. თიწკუმა ჯგირ დო ხოლოშიან ურთიერთობა ხვალე თინეფს უღნა, მით გურით თანდაბალეფ რენა, მარა ღორონთ „ამაყ კათას ხვალე შორშე იჩინენს“ (ფსალმ. 138:6). არძას მოკონა ვასიამოვნათ ღორონთის დო ჩქინ დუდშა გეგმოფცადათ თიშ ჸოროფა. თაშ ნამდა, ჯგირ მიზეზეფ მიღნა, ქიდიბგურუათ, მუჭო გუვავითარათ თანდაბლობა.

2. მუს გუვარჩიენთ თე სტატიას?

² თე სტატიას პასუხის ქიმეფჩანთ სუმ კითხვას: 1) მუ რე თანდაბლობა? 2) მუშენ ოკო გუვავითარათ თე თვისება? 3) მუ რთულ სიტუაციეფიშ დროს შილებე გიმიცადას ჩქინ თანდაბლობაქ? თეს გეძინელ, ქობძირუნთ, ნამდა თანდაბლობაშ გავითარებათ გურს გავუხარენთ იეჰოვას დო ბრელ კურთხევეფს მიბღენთ (იგავ. 27:11; ეს. 48:17).

3. მუ რე თანდაბლობა?

³ თანდაბლობა ნიშნენს ვეფიფქრათ, ნამდა შხვეფშე უმოს მნიშვნელოვან ვორეთ დო ვეგმიფრჩქინათ სიამაყე. მუჭოთ ბიბლია იჩიებ, თანდაბალ პიროვნებას არჩქილე, ნამდა იეჰოვა თიშე ბრელით უმოს დიდებულ რე. თეს გეძინელ, თანდაბალ ადამიანს უჩქჷ, ნამდა შხვეფ მუდგარენ საკითხის, თიშე უმოს უჯგუშეფ რენა (ფილ. 2:3, 4).

4, 5. მუშენ შემლებნა ფთქუათ, ნამდა თინეფ, მით თანდაბალო იძირენა, შილებე ვა რდან თეცალეფ?

⁴ ნამთინე პიროვნება ართ მეჯინათ თანდაბალო იძირე, მუშენდა მშვიდ დო მორდებუან ხასიათიშ რე. ნამთინე შხვეფიშ პატიცემას დო ზრდილობას თიშენ გიმირჩქინანს, ნამდა თაშ რე რდილ. მარა სინამდვილეს, თეცალ პიროვნებეფ შილებე ამაყეფ რდან.  თაშ ქორენ-და, მუ ამდღა მუ ჭუმან, თინეფიშ გურიშ მდგომარეობა გეგმიარგამებ (ლუკ. 6:45).

⁵ შილებე პიროვნება თეშ იძირედას, ნამდა მუშ დუდშა მანგარ დარწმუნებულ რე. ვარდა შილებე მუდგას ფიქრენსინ თის იჩიებდას. მარა თენა იშენდოიშენ ვა ნიშნენს, თეცალ კოჩჷ ამაყ რენ (იოან. 1:46, 47). უნარიან კათა ფრთხილას ოკო რდან, ნამდა ზედმეტო ვა უღდან დუდიშ იმენდ დო ვეგეამაყან. ვა უღჷ მნიშვნელობა, მუნერ ხასიათიშ ვორეთ, არძაქ ოკო გუვავითარათ თანდაბლობა.

6. მუჭოთ 1 კორინთელეფიშ 15:10-შე იძირე, მუშ გურაფა შემლებნა მოციქულ პავლეშ მაგალითშე?

⁶ გუვარჩუათ პავლე მოციქულიშ მაგალით. თის იეჰოვა გიმირინუანდჷ, ნამდა შხვადოშხვა ქალაქეფს ართიანიშ მეჸუნელო, ახალ კრებეფ ჩამოაყალიბკო. შილებე, თიქ მსახურებას იესოშ არძა მოწაფეშე უმოს აკეთ, მარა პავლეს მუშ დუდ შხვა ჯიმალეფშე უმოს მნიშვნელოვან პიროვნებათ ვემიორჩქუდ. თიქ თანდაბლურო თქუ: „მოციქულეფ შკას არძაშ უნაკლებაშ ვორექ დო ღირს ხოლო ვა ვორექ, მოციქულ ბჯოხოდას, მუშენდა ღორონთიშ კრებას ფთხოზუდ“ (1 კორ. 15:9). მუჭოთ პავლექ თეშ უკულ თქუნ, თის იეჰოვაწკუმა ჯგირ ურთიერთობა თიშენ უღუდ, ნამდა იეჰოვაქ გიმირჩქინ ჭყოლოფა დო ვართ ხოლო თიშენ, ნამდა პავლე რდუ განსაკუთრებულ პიროვნება ვარდა ბრელ მუდგარენ აფუდ კეთებულ (წეკითხით 1 კორინთელები 15:10). თანდაბლობაშ გიმორჩქინაშ მუშმაჯგირა მაგალით მუჩეს პავლექ, მუჟამსით კორინთელეფ წერილ მეჭარ. მართალ რე, თი პერიოდის კორინთიშ კრებაშ ნამთინე წევრ მუნეფიშ დუდის პავლეშე უმოს მაღალას გიორინუანდჷ, მარა თიქ თანდაბლობა გეგმირჩქინ დო მუშ დუდიშ ცქვაფა ვა დუჭყაფ (2 კორ. 10:10).

7. მუჭო გიმირჩქინ თანამედროვე დროს ნამთინე ცნობილ ჯიმაქ თანდაბლობა? ქიმიჸონით მაგალით.

⁷ თანდაბლობაშ გიმორჩქინაშ ჯგირ მაგალით მუჩეს ჯიმა კარლ კლეინქ, ნამუთ ხემძღვანელ საბჭოშ წევრო მსახურენდჷ. თიქ გურიშ ემაკინალ ბიოგრაფია ჭარჷ, სოდეთ ალალას იჩიებუდ თი სისუსტეეფიშ დო პრობლემეფიშ  გურშენ, ნამდგას ცხოვრებას შეხვად. მაგალთო, 1922 წანას თიქ პირველო იდჷ კარდოკარ მსახურებაშა, მუდგაქ თიშო რთულქ იჸუ დო თეშ უკულ კარდოკარ ჟირ წანას ვა ულინ. უმოს გვიანო, ბეთელს მსახურენდუნ თი წანეფს, ართშა რჩევა ქიმეჩეს, მუდგაქ მანგარო ეწყინ დო თენა გურშა ქელეტუ. თეს გეძინელ, სტრესიშ გურშენ ემოციურ პრობლემეფ უღუდ, მარა საბოლათ გიშელ მდგომარეობაშე. მართალ რე პრობლემეფ უღუდ, მარა თეწკუმა ართო, ბრელ მნიშვნელოვან პასუხიშმგებლობა ოვალუდ. უბრალოთ დეფიქრით, მუშმადიდა თანდაბლობა დესაჭირებუდ თეცალ ცნობილ პიროვნებას, ნამდა ალალას ქოთქუკო მუშ სისუსტეეფიშ გურშენ. ბრელ და დო ჯიმა დიდ ჸოროფათ იშინანს ჯიმა კარლ კლეინს დო თიშ გურიშ ემაკინალ ბიოგრაფიას. *

8. მუჭო იძირე 1 პეტრეშ 5:6-შე, ნამდა თანდაბლობაშ გიმორჩქინათ იეჰოვას გურს გავუხარენთ?

⁸ თანდაბლობაშ გიმორჩქინაშ არძაშ უმოს მნიშვნელოვან მიზეზ თინა რე, ნამდა თეთ იეჰოვას ვასიამოვნენთ. თენა პეტრე მოციქულქ ხოლო მიშინუ (წეკითხით 1 პეტრე 5:6). პეტრეშ თე სიტყვეფიშ გურშენ ჩქინ ართ-ართ პუბლიკაციას თეცალ აზრ ჭარუდ: „სიამაყე შხამცალ რე. თენა რე თვისება, ნამდგაქ შილებე არძაშ უმოს უნარიან კოჩ თიცალ პიროვნებათ გინაშკვას, მით ღორონთის მუთუნშო ვეგმადირთუ. მარა თანდაბლობაქ შილებე არძაშ უმოს უბრალო კოჩ თიცალ პიროვნებათ გინაშკვას, მით ღორონთის გიმადირთუ . . . ღორონთ თქვა ხოლო გაკურთხენა თანდაბლობაშ გიმორჩქინაშენ“. * მართალო, მუ ოკო რდას თიშ უმოს დიდ ბედნერობა, ნამდა გურ გავუხარათ იეჰოვას? (იგავ. 23:15).

9. მუშენ შემლებნა თიშ რაგად, ნამდა შხვეფს ჩქინწკუმა ურთიერთობაშ სურვილქ აღვენუნა, მუჟამსით თანდაბლობას გეგმიფრჩქინანთ?

⁹ თანდაბლობაშ გიმორჩქინათ ქოთ იეჰოვას გავუხარენთ გურს დო ქოთ ჩქი მიბღენთ კურთხევეფს. თე თვისებას გეგმიფრჩქინანთ-და, შხვეფს ჩქინწკუმა ხოლოშიან ურთიერთობაშ სურვილ აღვენუნა. მუშენ შემლებნა თეშ რაგად? დეფიქრით, თქვა მუნერ კათაწკუმა გოსიამოვნუნა ურთიერთობა? (მათ. 7:12). ჩქი ნაკლებო მოსიამოვნუნა თიცალ ხალხწკუმა ურთიერთობა, მით ირიათო მუშის იჩემენს დო შხვაშ აზრიშ მორჩქილაფა ვაკო. მარა არძას ელამკინანა გურშა თანაქრისტიანეფწკუმა ურთიერთობა, მუჟამსით თინეფ ჯიმალურ ჸოროფას გიმირჩქინანა, გურშა მეუღნა ჩქინ გაჭირება დო თეწკუმა ართო, თანდაბალეფ რენა (1 პეტ. 3:8). ზუსტას თაშ ვუჯინეთ თანდაბალ ხალხის დო თინეფშო ხოლო სასიამოვნო იჸუაფ ჩქინწკუმა ურთიერთობა, მუჟამსით თე თვისებას გეგმიფრჩქინანთ.

10. მუჭო მიადვილენა ცხოვრებას თანდაბლობა?

¹⁰ თანდაბლობა ცხოვრებას მიადვილენა. სინამდვილეს,  მინშა შეფხვადუთ დო ვორწყეთ თიცალ მუდგარენეფს, მუთ უსამართლობათ მიმორჩქუნა. ბრძენ მეფე სოლომონქ თქუ: „ცხენს გეხედუნ ფერ მსახურეფ ხოლო მიძირ დო მსახურცალო კუჩხით გილეშუნ ფერ მთავრეფ ხოლო“ (ეკლ. 10:7). უნარიან კათას ირიათო ვაფასენა დო პატის ვაცენა. მარა უმოს ნაკლებ უნარ უღნან ფერ პიროვნებეფს, მინშა დიდ პატის გედვანა. მეფე სოლომონქ ქიმეხვად, ნამდა ვა ღირჷ გლახა მხარეეფშა ზედმეტ ყურადღებაშ მექციება დო გონივრულ რე, პროტესტ ვეგმოფხანტათ დო თიცალო მიბღათ ცხოვრება, მუნერით რე (ეკლ. 6:9). თანდაბალეფ ქუვორეთ-და, უმოსო გემეადვილებნა ზედმეტო ვეფიფქრათ თი უსამართლობაშე, მუდგას ცხოვრებას ვორწყეთ.

11. მუჭო ოკო მიფქცუათ, მუჟამსით რჩევას მარზენა?

¹¹ ირდღას თანდაბლობაშ გიმორჩქინაშ შხვადოშხვა საშვალებეფ მიღნა. გუვარჩუათ მუსხირენ სიტუაცია. პირველ, მუჟამსით რჩევას მარზენა. ჯგირ იჸუაფ ქოფშუდან, მითინქ ინიციატივა გეგმირჩქინ დო რჩევა ქომჩეს-და, შილებე თიშე უმოს მაფდან დაშებულ, ვინემ ჩქი ფიფქრენთ. თეცალ დროს, შილებე ხეთეშე ვემიფრჩქილუათ რჩევა. შილებე გუვაკრიტიკათ თი პიროვნება, მიდგაქ რჩევა მუჩეს ვარდა ფთქუათ, ნამდა თიქ ჯგირო ვა თქუ ორაგადე. მარა თანდაბალეფ ქუვორეთ-და, ირნერო ქივეცადებუთ სიტუაცია სწორაშე შევაფასათ.

12. მუჭოთ იგავეფიშ 27:5, 6-ის ჭარჷ, მუშენ ოკო დუვაფასათ თინა, მით რჩევას მარზენა? ქიმიჸონით მაგალით.

¹² თანდაბალ პიროვნება აფასენს რჩევას. ქიმიპჸონათ თეცალ მაგალით: წერმიდგინით, სამეფო დარბაზის რეთ დო თანაქრისტიანეფწკუმა იჩიებუთ. თე დროს, თინეფშე ართ-ართიქ ცალკე გემკოიჭანუეს დო გიწის, ნამდა კიბირს ოჭკუმალიშ ფუჩხა ქელარსკილადნა. მუშო ოკო რაგად, დუდის უხერხულო იგინანთ. მარა ხომ ქიჸუაფუდით თანაქრისტიანიშ მარდულ, თენა გიწისინ თიშენ? შილებე იფიქრათ, ნამდა ჯგირ იჸუაფუდ თენა მიდგაინს აიშახ ხოლო ქუთქუალუდკო. თეშნერო, ჩქი ხოლო ოკო დუვაფასათ თანაქრისტიანიშ გიმორჩქინელ გაბედულება, მუჟამსით მოსაჭირნან ფერ რჩევას მარზენა. თეცალ პიროვნება ჩქინ მეგობარო მიმორჩქუნა დო ვართ ხოლო ნტერო (წეკითხით იგავები 27:5, 6; გალ. 4:16).

13. მუჭო შემლებნა თანდაბლობაშ გიმორჩქინა, მუჟამსით პასუხიშმგებლობეფს შხვეფ ღებულენა?

¹³ მუჟამსით კრებას პასუხიშმგებლობეფს შხვეფ ღებულენა. ართ უხუცეს აღიარენს: „მუჟამსით ვორწყექ, ნამდა პასუხიშმგებლობეფს შხვეფ ღებულენა, მინშა ფიფქრენქ, მა მუშენ ვამჩეს თენა?“. ქოიფიქრებნანო თქვა ხოლო თეშნერო? არასწორ ვა რე, მუჟამსით პასუხიშმგებლობეფიშ „მენჭირნაფას“ ვოცადუთ (1 ტიმ. 3:1). მარა ოკო დოფთხილუათ ჩქინ აზროვნება, მუშენდა ფრთხილას ვეპჸუაფუთ-და, ჩქინ გურს სიამაყე გევითარებ. მაგალთო, ქრისტიან  ჯიმაქ შილებე იფიქრას, ნამდა ხვალე თის შეულებ მუდგაინ პასუხიშმგებლობაშ მეღება. ვარდა ქრისტიანიშ ოსურქ შილებე იფიქრას: „ჩქიმ ქომონჯ უმოს უჯგუშო შეასრულენდჷ თე პასუხიშმგებლობას, ვინემ თე ჯიმა!“. მარა, გურით თანდაბალ ქუვორეთ-და, თეცალ ფიქრეფს ვევაჸუნუთ.

14. მუშ გურაფა შემლებნა მოსეშ მაგალითშე?

¹⁴ ჩქი შემლებნა დიბგურუათ მოსეშ მაგალითშე, მუჭო იქციებუდ თინა, მუჟამსით შხვეფ ღებულენდეს პასუხიშმგებლობეფს. მოსე ისრაელ ერიშ ხემძღვანელ რდუ დო თე პასუხიშმგებლობას აფასენდჷ. მარა მუნერ რეაქცია უღუდ თის, მუჟამსით იეჰოვაქ შხვეფს ხოლო ქიმეჩჷ თიშ შესაძლებლობა, შეასრულესკო თი დავალება, მუდგას მოსე ორთუდ? მოსე ვარდჷ მენჯარიშ (რიცხ. 11:24—29). თინა თანდაბალ რდუ დო შხვეფს ხოლო არზენდჷ საშვალებას, ქიმეხვარესკო თის, მუჟამსით საქმე ოხუდ ხალხშა სამართლიან განაჩენიშ გიშაღალას (გამ. 18:13—24). თეშნერო, ისრაელეფს უკვე ბრელ კოჩ ომსახურუდ დო თინეფს ბრელ ხანიშ ჯინა ვასაჭირდეს, ნამდა მუნეფიშ საქმე მსაჯულეფს ქუმურჩქილუაფდესკო. თავრეშე ირწყებე, ნამდა მოსე შხვეფიშ მოხვარაშე უმოსო ფიქრენდჷ, ვინემ მუშ მდგომარეობაშე, ნამუთ ისრაელ ერიშ შქას უღუდ. მუ ჯგირ მაგალით რე თენა ჩქინო! ირიათო ფშუდან, ქუმოკონა იეჰოვაქ მუშ საქმეშ ოკეთებელო გეგმომრინუან-და, საჭირო რე თანდაბლობაშ გიმორჩქინა დო ვართ ხოლო განსაკუთრებულ უნარეფ. მართალ რე, იეჰოვა „დიდებულ რე . . . მარა ორწყე თანდაბლეფს“ (ფსალმ. 138:6).

15. მუჭო დათირ ნამთინე და დო ჯიმას დანიშნულებეფქ?

¹⁵ მუჟამსით ახალ პასუხიშმგებლობეფს ბღებულენთ. ბოლო წანეფს, ბრელ და დო ჯიმაქ, მით იეჰოვას წანეფიშ დინახალე ომსახურდეს, ახალ პასუხიშმგებლობეფ მიღეს. მაგალთო, 2014 წანას საოლქო ზედამხედველეფ დო თინეფიშ ოსურეფს პასუხიშმგებლობაქ დათირეს დო შხვა ფორმათ გაგრძელეს სრულ დროთ მსახურება. თი წანაშე მოჸუნაფილ, ორგანიზაციაქ გინოჭყვიდ, რაიონულ ზედამხედველეფქ ვა გაგრძელესკო თე ფორმათ მსახურება, მუჟამსით 70 წანერო გინირთუდეს. თეწკუმა ართო, თი ჯიმალეფქ, მით 80 წანერო გინირთუდეს დო კრებას უხუცესეფიშ საბჭოშ  კოორდინატორო მსახურენდეს, შხვეფს ოკო გეგნაბარესკო თე პასუხიშმგებლობა. თეს გეძინელ, ბოლო წანეფს, ბრელქ, მით ბეთელს მსახურენდჷ, ახალ დანიშნულება მიღეს დო პიონერო მსახურება გაგრძელეს. შხვეფს, ჯამრთელობაშ პრობლემეფიშ, ოჯახურ მდგომარეობაშ ვარდა შხვა მიზეზეფიშ გურშენ, მიოტებელქ აჸუეს სპეციალურ სრულ დროთ მსახურებაქ.

16. მუჭო გიმირჩქინანა თანდაბლობას ჩქინ და დო ჯიმალეფ, მუჟამსით დანიშნულებეფ ათირუნა?

¹⁶ თე და დო ჯიმალეფშო რთულ რდუ თეცალ ცვლილებეფიშ მერჩქვანა. მუშო ოკო რაგად, თინეფს მანგარო უჸორდეს მუნეფიშ ჯვეშ დანიშნულებეფ, მუდგას წანეფიშ დინახალე ასრულენდეს. მინშა თინეფ მანგარო გენიცადენდეს თეს. მარა იეჰოვაშ ჸოროფათ, დრო ხანიშ უკულ ქიმიარჩქვანეს თე ცვლილებეფს. თინეფს ჯგირო არჩქილედეს, ნამდა იეჰოვაშ მსახურებას მეუძღვინეს დუდ დო ვართ ხოლო დანიშნულებას, პასუხიშმგებლობას ვარდა მუდგაინ სტატუსის (კოლ. 3:23). თე და დო ჯიმალეფ ხიოლით აგრძელენა იეჰოვაშ მსახურებას დო თანდაბლურო ასრულენა მუნეფიშ დანიშნულებეფს. თინეფქ „არძა ოწუხებელ“ ღორონთის მიანდეს დო დარწმუნებულ რენა, ნამდა იეჰოვა ზრუნენს თინეფშო (1 პეტ. 5:6, 7).

17. მუშენ ოკო ვორდათ მარდულეფ, ნამდა ღორონთიშ სიტყვა თანდაბლობაშ გავითარებას მოხვარნა?

¹⁷ ჩქი მარდულეფ ვორეთ, ნამდა ღორონთიშ სიტყვა თანდაბლობაშ გავითარებას მოხვარნა. თე ძვირფას თვისებაშ გავითარება, მუჭოთ ჩქინდა, თეშ შხვეფშა ხოლო მოუღ ჯგირობუა. თეს გეძინელ, თანდაბლობა მოხვარნა მივერუათ პრობლემეფს დო მუთ არძაშ უმოს მნიშვნელოვან რე, თე თვისება მოხვარნა უმოსო დევეახლოვათ ჩქინ ზეციერ მუმას. ბედნერეფ ვორეთ, ნამდა მიჩქნა, იეჰოვა, არძაშე უმოს „დიდებულ დო აღმატებულ“ ღორონთ, ზრუნენს მუშ თანდაბალ მსახურეფშე (ეს. 57:15).