ოგურაფალ სტატია 38
„ქუმორთით ჩქიმდა . . . დო მა ჭყანაშა ქუმოიჸონანთ“
„ქუმორთით ჩქიმდა, თქვა, მით მანგარო ხანდენთ დო მონკა ოღალ მეიღნა, დო მა ჭყანაშა ქუმოიჸონანთ“ (მათ. 11:28)
ობირეში 17 „მზათ ვორექ“
შინაარსი *
1. მუჭოთ მათეშ 11:28—30-ის ჭარჷ, მუშ პირობა დოდვჷ იესოქ?
იესოქ გურიშემაკინალ პირობა მეჩჷ მუშ მარჩქილეეფს. თიქ თქუ: „ქუმორთით ჩქიმდა . . . დო მა ჭყანაშა ქუმოიჸონანთ“ (წეკითხით მათე 11:28—30). თენა ტყურა დუნაპირებ ვარდჷ. ქიგიშინით, მუჭო მიქცუ იესოქ, მუჟამსით ქოძირ ართ ოსურკოჩ, ნამუთ საშინელ ლახალათ იტანჯებუდ.
2. მუ აკეთ იესოქ ლეხ ოსურკოჩშო?
2 ოსურკოჩის მანგარო ოსაჭირუდ მოხვარა. თინა ბრელ ექიმშა რდუ მეულირ თი იმენდით, ნამდა დასკილიდუანდეს. მარა 12 წანიან ტანჯებაშ უკულ, თიშ მდგომარეობაქ ვეგეუჯგუშ. მუჭოთ მოსეშ კანონს ჭარუდ, თინა უწმინდურო ითვალუდ (ლევ. 15:25). ართშა თიქ ქიგეგ, ნამდა იესოს შეულებუდ დასკილიდუკო თინეფ, მით იტანჯებუდ დო ათეშენ, მიდართჷ თიშ ოგორშა. მუჟამსით ქოძირ, თიშ გინაქუნალს ქიმეთხჷ ხე დო ხეთეშე დოსკიდ ლახალაშე! იესოქ დასკილიდუ თინა დო თეს გეძინელ, მუშ საქციელით დო სიტყვათ ქაგინებაფუ, ნამდა უჸორდჷ დო პატის ცენდჷ. მაგალთო, მუჟამსით იესო თე ოსურკოჩის ურაგადუდ, თიქ ჸოროფა გეგმოხანტჷ დო გემუანო უწუ: „სქუა“. მუშო ოკო რაგად, თე ოსურკოჩის თეცალ საქციელ გურშა ელუკინანდჷ (ლუკ. 8:43—48).
3. მუ კითხვეფს გუვარჩიენთ?
3 ყურადღება ქიმიაქცით თი ფაქტის, ნამდა თე ოსურკოჩიქ ინიციატივა გეგმირჩქინ დო იშო მერთჷ იესოშა. ამდღა ხოლო თაშ რე, ჩქი ხოლო ოკო ეპჭოფათ ჩქინ დუდშა ინიციატივა, ნამდა ქიმეფრთათ იესოშა. მართალ რე, ამდღარ დროს, იესო სასწაულებრივო ვა დასკილიდუანს ლახალაშე თინეფს, მით თიშა მეურს, მარა თინა იშენით არძას მომწოდენა: „ქუმორთით ჩქიმდა . . . დო მა ჭყანაშა ქუმოიჸონანთ“. თე სტატიას პასუხ ქიმიაჩამუ ხუთ კითხვას: მუ ოკო ვაკეთათ, ნამდა მიბღათ იესოშ მოწვევა? მუს ნიშნენს იესოშ სიტყვეფ: „ქიგიდგით ჩქიმ უღუ“? მუს ბგურაფლენთ იესოშე? მუშენ შეულებ იესოშ დავალებურ საქმეს ჩქინდა ძალეფიშ მოჩამა? დო მუ ოკო ვაკეთათ, ნამდა იესოშ უღუქ ძალეფ ქომჩან?
„ქუმორთით ჩქიმდა“
4, 5. მუ საშვალებეფით შემლებნა მეფრთათ იესოშა?
4 იესოშა მეულაშ ართ-ართ საშვალება რე, მუთ შემლებნან მეტ ქიდიბგურუათ იესოშ საქციელშე დო სიტყვეფშე (ლუკ. 1:1—4). თენა ჩქინ მანგიორო შხვას მითინს ვაკეთებე. ჩქინ პირად პასუხიშმგებლობა რე, ქიდიბგურუათ თი ირფელ, მუდგას ბიბლია მირაგადნა იესოშ გურშენ. თეს გეძინელ, იესოშა თი გაგებათ ხოლო მევურთ, ნამდა იბნათუთ დო თიშ მიმაჸუნალო გინმიფრთუთ.
5 იესოშა „მეულაშ“ ხოლო ართ საშვალება რე, მოხვარა ქოფთხუათ კრებაშ უხუცესეფს, მუჟამსით თენა მოსაჭირნა. იესო პასუხიშმგებელ ჯიმალეფს გიმირინუანს, ნამდა ქიმკაჯინას მუშ შხურს (ეფეს. 4:7, 8, 11; იოან. 21:16; 1 პეტ. 5:1—3). ჩქი ინიციატივა ოკო გეპჭოფათ დო მოხვარა ქოფთხუათ თინეფს. ჩქი ოკო ვეველუდათ, ნამდა თინეფ ჩქინ აზრეფს წეკიხენა დო ქიმეხვადუნა მუ მოსაჭირნა. ართ ჯიმა, სახელო ჯულიენ იჩიებ: „ჯამრთელობაშ პრობლემეფიშ გურშენ ბეთელს მსახურებაქ მიოტებელქ მაჸუ. ჩქიმ ართ მეგობარქ ელამიჩ, უხუცესეფშა ქომთხუდკო, ჩქიმდა ქუმორთესკო დო გურშა ელამკინესკო. დუდშე ფიფქრენდჷ, თენა ვა მოსაჭირუდ. მარა უმოს გვიანო, მოხვარა ქიფთხი დო თინეფიშ მოულაქ, ჩქიმო ართ-ართ საუკეთესო საჩუქარქ იჸუ, მუთ დღას მემღებ“. ართგურ უხუცესეფს, მუნერით თი ჯიმალეფ რდეს, მიდგაქ ჯულიენს მიაკითხეს, შეულებნა მიმეხვარან, ქინვანჭათ „ქრისტეშ გონებას“. შხვა სიტყვეფით ქოფთქუათინ, ქინვანჭათ იესოშ აზროვნებას დო თეშ იფიფქრათ, მუჭოთ თინა ფიქრენდჷ (1 კორ. 2:16; 1 პეტ. 2:21). მუჟამსით ჯიმალეფ თაშ მოხვარნა, თენა ართ-ართ არძაშ უჯგუშ საჩუქარ რე, ნამდგაშ მოჩამა თინეფს შეულებნა.
„ქიგიდგით ჩქიმ უღუ“
6. მუს გულისხმენდჷ იესო, მუჟამსით თქუ: „ქიგიდგით ჩქიმ უღუ“?
6 იესოქ, მუშ სიტყვეფს, „ქიგიდგით ჩქიმ უღუ“, შილებე იგულისხმჷ, ნამდა დემორჩილესკო თის, მუჭოთ მართველს. ვარდა შილებე გულიხმენდკო: „ჩქიმწკუმა ართო ქიგიდგით უღუ დო ართო იფხანდათ იეჰოვაშო“. ირნერ შემთხვევას, უღუშ გედგუმა ხანდაწკუმა რე დაკავშირებულ.
7. მუჭოთ მათეშ 28:18—20-ის ჭარჷ, მუ საქმეშ კეთება მოვალნა დო მუშა შემლებნა ვორდათ დარწმუნებულ?
7 ჩქი იესოშ მოწვევას ბღებულენთ, მუჟამსით დუდის ვუძღვინენთ იეჰოვას დო იბნათუთ. თე მოწვევა არძას ოხუ. ათეშენ იესო მიღენს არძას, მიდგას მთელ გურით ოკო ემსახურას ღორონთის (იოან. 6:37, 38). ქრისტეშ არძა მიმაჸუნალს უღჷ პატი, თი საქმეს მიღას მონაწილება, მუთ იეჰოვაქ იესოს დავალ. შემლებნა დარწმუნებულ ვორდათ, ნამდა იესო ირიათო მიმეხვარებნა თე საქმეშ კეთებას (წეკითხით მათე 28:18—20).
„ქიდიგურეთ ჩქიმდე“
იესოცალო გურშა ელუკინით შხვეფს (ქოძირით აბზაცეფი 8—11) *
8, 9. მუშენ მეურს იესოშა ხვალე თანდაბალ ხალხ დო მუ კითხვეფ ოკო დუსვათ ჩქინ დუდის?
8 იესოშა ხვალე თანდაბალ ხალხ მეურს (მათ. 19:13, 14; ლუკ. 7:37, 38). მუშენ შემლებნა თეშ რაგად? დეფიქრით, მუშმადიდა სხვაობა რდუ იესო დო ფარისეველეფ შკას. თე რელიგიურ წინამძღოლეფ ჸოროფას ვეგმირჩქინანდეს დო ამაყეფ რდეს (მათ. 12:9—14). თინეფიშ გინაწონს, იესო თანდაბალ დო მოჸოროფე რდუ. ფარისეველეფს ოამაყუდეს მუნეფიშ მაღალ მდგომარეობა დო ხოლო უმოსიშ მეჭირნაფა ოკოდეს. იესო ვამართლენდჷ თეცალ აზროვნებას დო მუშ მოწაფეეფს ოგურუანდჷ, ნამდა თანდაბალეფ ჸოფედეკსო დო შხვეფს მემსახურესკო (მათ. 23:2, 6—11). ფარისეველეფს უჩქუდეს, ნამდა ხალხის თინეფშა ოშკურუდ, ათეშენ ძალაუფლებას არასწორო გიმირინუანდეს (იოან. 9:13, 22). მარა იესო შხვანერო იქციებუდ დო გურშა ელუკინანდჷ ხალხის, მუშ ჯგირ საქმეეფით დო გემუან სიტყვეფით.
9 ქოიცადებნანო მიაჸუნითკო იესოშ მაგალითის? ქოკითხით თქვან დუდის: ქომჩინენანო შხვეფ თანდაბალ დო ლიბ ხასიათიშ პიროვნებათ? ქომღუნო თიშ სურვილ, უბრალო საქმეეფიშ კეთებათ მივემსახურე შხვეფს? ქუვოქცუქო შხვეფს ჯგირო?
10. მუნერ გარემოს უქმნენდჷ იესო მუშ მოწაფეეფს?
10 იესო მშვიდ დო სასიამოვნო გარემოს უქმნენდჷ მუშ მოწაფეეფს დო სიამოვნებით ოგურუანდჷ თინეფს (ლუკ. 10:1, 19—21). თეცალ დამოკიდებულებაშ ჭყოლოფათ, მოწაფეეფ დუდის ჯგირო გინაფლენდეს დო შეულებდეს თავისფალო დასვესკო კითხვეფ. თეს გეძინელ, იესოს ოკოდ თინეფიშ აზრიშ გაგება (მათ. 16:13—16). მუჟამსით მცენარე სათბურს ირდუ, თინა დაცულ რე ირნერ ზიანშე დო ათეშენ, ჯგირო ფალუნს. ათეშნერო, იესო ხოლო თიცალ გარემოს უქმნენდჷ მოწაფეეფს, სოდეთ დუდის ჯგირო გინაფლენდეს. თინეფ ინანჭუდეს იესოშ გურაფეფს დო შედეგო, ჯგირ ნაყოფ გიმუღუდეს, შხვა სიტყვეფით ქოფთქუათინ, ჯგირ საქმეეფს ორთუდეს.
რდათ მეგობრულ დო ქეცადით, შხვეფს თქვანდა თავისფალო მულაქ ვა გუჭირდან
რდათ აქტიურ დო გურგედვალირ
რდათ თანდაბალ დო იმსახურით მონდომებათ *
11. მუ კითხვეფ ოკო დუსვათ ჩქინ დუდის?
11 ხომ ვა გოვალნა შხვეფიშ ზედამხედველობა? თაშ ქორენ-და, ქოკითხით თქვან დუდის: მუნერ გარემოშ შექმნას ვოცადუქ სამუშას ვარდა ჸუდეს? ქოვუნწყუნქო ხეს მშვიდ დო სასიამოვნო გარემოს? ქოვუქმნენქო შხვეფს თიცალ გარემოს, ნამდა თავისფალო დამსვან კითხვეფ? ქუვორექო მზათ ქიმიფრჩქილუე შხვეფიშ აზრი? ჩქი ვა მოკონა ვაგურათ ფარისეველეფს, მიდგას ვასიამოვნუდეს, მუჟამსით შხვეფ კითხვეფს უსვენდეს. თინეფ ასაჯენდეს თი ხალხის, მით საწინააღმდეგო აზრის გიმოხანტუნდჷ (მარ. 3:1—6; იოან. 9:29—34).
„ჭყანა ქუმგაკათუნა“
12—14. მუშენ შილებე თიშ რაგად, ნამდა იესოშ დავალებურ საქმეს შეულებ ძალეფ მუჩან?
12 მუშენ შეულებ იესოშ დავალებურ საქმეს ჩქინდა ძალეფიშ მოჩამა? თეშ ბრელ მიზეზ არსებენს, მარა მორთ მუსხირენ გუვარჩუათ.
13 ჩქი პჸუნა არძაშ უჯგუშ ზედამხედველეფ. ჩქინ უზენაეს ზედამხედველ, იეჰოვა, ვა რე უბადო მართველცალო, ნამუთ მარდულობას ვეგმირჩქინანს. თინა აფასენს ჩქინ კეთებულ საქმეს (ებრ. 6:10). თეს გეძინელ, ძალას მარზენა, შევასრულათ ჩქინ პასუხიშმგებლობეფ (2 კორ. 4:7; გალ. 6:5). იესო, ჩქინ მეფე, მარზენა თიშ მაგალითის, მუჭო მივექცუათ შხვეფს (იოან. 13:15). უხუცესეფ, მით ჩქინ ჭყიშეფ რენა, ოცადნა მიაჸუნან იესოშ, „დიდებულ ჭყიშიშ“ მაგალითის (ებრ. 13:20; 1 პეტ. 5:2). თინეფ ოცადნა, რდან კეთილეფ, გურშა ელამკინან დო გეგმირჩინან გაბედულება, მუჟამსით მოგურუანა დო მიცვენა.
14 ჩქი არძაშ უჯგუშ მეგობრეფ პჸუნა. მითინ ვართჷ თიცალ მნიშვნელოვან საქმეს, მუდგას ჩქი ვორთუთ დო ვართ მითინს ჸუნს თიცალ მოჸოროფე მეგობრეფ, მუნერით ჩქი პჸუნა. უბრალოთ დეფიქრით: ჩქი მიღნა პატი, იფთანამშრომლათ თინეფწკუმა, მით მაღალზნეობრივ ნორმეფით ცხოვრენს დო ვა ფიქრენს, ნამდა შხვეფშე უჯგუშ რე. თინეფ უნარიანეფ, მარა მოკრძალებურეფ რენა დო შხვეფ მუნეფიშ უჯგუშო მიორჩქნა. თინეფშო ჩქი ხვალე თანამშრომლეფ ვარინ, მეგობრეფ ვორეთ დო თეშ ვუჸორთ, ნამდა მზათ რენა ჩქინიშ გურშენ დოღურან!
15. მუჭო ოკო ვუჯინედათ თი საქმეს, მუდგას ვორთუთ?
15 ჩქი ვორთუთ არძაშ უჯგუშ საქმეს. ჩქი ხალხის ჭეშმარიტებას ვოგურუანთ იეჰოვაშ გურშენ დო ვაარგამენთ თი ტყურეფს, ნამდგას სატანა იჩიებ (იოან. 8:44). სატანა თიცალ ოღალს გიოდვანს ხალხის, ნამდგაშ ღალა ვეშულებნა. მაგალთო, თის ოკო დუმაჯერან, ნამდა იეჰოვა ვეგიჭყოლიდუანს ჩქინ ცოდვეფს დო დღას ვა მიოჸოფუანა. თენა მართალო საშინელ ტყურა რე, ნამუთ ხალხის გურს უტახუნს. მუჟამსით იესოშა მევურთ, ჩქინ ცოდვეფ მეპატიებნა. სიმართლე თინა რე, ნამდა იეჰოვას არძა მანგარო ვუჸორთ (რომ. 8:32, 38, 39). მოხიოლნა, მუჟამსით ხალხის ვოხვარუთ, ქიდიგურუან იეჰოვაშა მენდება დო ვორწყეთ, მუჭო აუჯგუშენა მუნეფიშ ცხოვრებას!
ირფელ გაკეთით, ნამდა იესოშ უღუქ ძალეფ ქიმერჩან
16. მუთ გენესხვავებ თი ოღალ, ნამდგაშ ღალას იესო ფთხინა არძა თი ოღალშე, ნამუთ გილამღუნა?
16 თი ოღალ, ნამდგაშ ღალას იესო ფთხინა, არძა თი ოღალშე გენესხვავებ, ნამუთ ოკო გილებღათ. მაგალთო, სამუშაშ ბოლოს, შულადირეფ ვორეთ დო კმაყოფილებაშ გრძნობა ხოლო ვამღუნა. თეშ გინაწონს, მუჟამსით იეჰოვაშ მსახურებას დროს ვუთმენთ, დიდ კმაყოფილებას ბგინაფლენთ. სამუშა დღაშ ბოლოს შილებე შულადირეფ ვორდათ დო დუდის ვანძალენდათ ონჯუას კრებაშ შეხვალამაშა ულას. მარა ხშირას კრებაშ შეხვალამეფშე გაახალებურ ძალეფით იფრთუთ. თენა თაშ რე თიმწკუმა ხოლო, მუჟამსით ოქადაგეფშა მევურთ დო ბიბლიაშ პირად გურაფა მიღნა. თე ირფელიშ შედეგო, მუდგა ძალეფს ვახარჯენთინ, თიშე ბრელით უმოს დადებით ენერგიას ბღებულენთ!
17. მუ ოკო მარჩქილედან დო მუ ოკო გინობჭყვიდათ გონივრულო?
17 ჩქი ოკო მარჩქილედან, ნამდა ირფელ ართათ ვა მაკეთებენა. ათეშენ, გონივრულო ოკო გინობჭყვიდათ მუს მიკვახარჯენთ ჩქინ ძალეფს. მაგალთო, შილებე ჩქინ ერენგია მატერიალურ ნივთეფიშ შაყარუას დავუთმათ. დეკვირით, მუჭო უპასუხ იესოქ ახალგაზრდა კოჩის, მიდგაქ თეცალ კითხვა დუსვჷ: „მუ ოკო ვაკეთე, ნამდა მარადიულ სიცოცხლე მიბღე?“. თე ახალგაზრდა იცვენდჷ მოსეშ კანონს. თინა ჯგირ კოჩ რდუ, მუშენდა მუჭოთ მარკოზიშ სახარებას ჭარჷ, იესოს „ქეჸოროფ თიქ“. იესოქ თე ახალგაზრდას მოუწოდ, თიშ მიმაჸუნალ ჸოფედკო დო უწუ: „მეუ, გეგმოჩ ირფელ, მუთ გიღჷ . . . უკულ ქუმორთ დო ქეკმაჸუნი“. თე ახალგაზრდას ოკოდ იესოშ მიმაჸუნალ ჸოფედკო, მარა მუჭოთ იძირენ, თიქ ვამასქიდ მუშ ქონებას (მარ. 10:17—22). შედეგო, ვარია ქოთქუ, ქიგიდგუკო იესოშ უღუ დო სიმდიდრეშ მონობა გაგრძელ (მათ. 6:24). თქვა მუჭო მიქციებუდით?
18. მუ ოკო ვაკეთათ მინშა დო მუშენ?
18 ჯგირ იჸუაფ მინშა ქიგნვოჯინათ, მუ გემრენა ცხოვრებას პირველ ადგილს, მუშენდა დებრწმუნათ, ნამდა ჩქინ ძალეფს გონივრულო გიმიბრინუანთ. დეკვირით, მუს იჩიებ ართ ახალგაზრდა სახელო მარკი: „წანეფიშ დინახალე მიმორჩქუდ, ნამდა უბრალო ცხოვრებათ ფცხოვრენდჷ. პიონერო ვმსახურენდჷ, მარა ბრელ დროს დო ენერგიას ვუთმენდჷ ფარაშ შიბას, მუშენდა მოკოდ კომფორტულ ცხოვრება მიღუდკო. ვოცადუდ ქიგებგიკო, მუშენ გემერთულ ცხოვრებაქ. ჭიჭე ხანშა ქიმეფხვად, ნამდა პირველ ადგილშა ჩქიმ ინტერესეფ გემირდჷ დო იეჰოვაშ მსახურებას გინოსკილადირ დრო დო ენერგიას ვუთმენდჷ“. მარკიქ გეგშასწორ მუშ აზროვნება დო თეშ დოთირუ ცხოვრებაშ წეს, ნამდა ქეშიალებუკო იეჰოვაშ მსახურებას უმოსიშ კეთებაქ. თინა იჩიებ: „მინშა ფარაშ გურშენ მნერვიანენქ, მარა იეჰოვაშ დო იესოშ მოხვარათ, შემლებ მთელ ყურადღება მსახურებაშა მაფდას გინოღალირ“.
19. მუშენ რე მნიშვნელოვან მიღდან სწორ თვალსაზრის?
19 იესოშ უღუ ძალეფს თიმწკუმა მუჩანა, მუჟამსით სუმ მუდგარენს გუვაკეთენთ. პირველ, მიღუდან სწორ თვალსაზრის. ჩქი იეჰოვაშ საქმეს ვორთუთ, ათეშენ თინა თეშ ოკო ვაკეთათ, მუჭოთ იეჰოვას ოკო. ჩქი მუშეფ ვორეთ დო იეჰოვა ბატონ რე (ლუკ. 17:10). ღორონთიშ საქმეს ჩქინობრათ ქუვორთუთ-და, მანგარო გამჭირდუნა თეშ კეთება. უღუ მინოდგუნ ფერ ძალიერ ხოჯ ხოლო დოშურდუ, მუჟამსით ირიათო ეცადებ, შხვა მიმართულებათ მიდართას დო ვა დაჸუნას მუშ მინჯეს. მუჟამსით იეჰოვაშ საქმეს ზუსტას თეშ შევასრულენთ, მუჭოთ თენა თის ოკო, შემალებენა თიცალ მუდგარენეფ ხოლო გუვაკეთათ დო თიცალ პრობლემეფს გივორჯგინანთ, მუდგაშე ფიფქრენდით, ნამდა ვა მაკეთებედეს. დღას ვაგგოჭყორდან, იეჰოვაშ ნებაშ შესრულებაშა მითინს ვეწარნე! (რომ. 8:31; 1 იოან. 4:4).
20. მუნერ მოტივეფ ოკო მიღდან, ღორონთიშ მსახურება ქუმოკონან-და?
20 მაჟია, ვიმსახურათ სწორ მოტივეფით. ჩქინ მიზან რე განვადიდათ ჩქინ მოჸოროფე მუმა, იეჰოვა. პირველ საუკუნეს, თინეფქ, მით ჰარამ ვარდა ეგოისტეფ რდეს, მალას მიოდინეს ხიოლ დო მიოტეს იესოშ უღუ (იოან. 6:25—27, 51, 60, 66; ფილ. 3:18, 19). თეშ გინაწონს, თინეფ, მიდგას მართალო უჸორდჷ ღორონთ დო მოყვას, ბედნერეფ რდეს დო ხიოლით ომსახურდეს ღორონთის, ონდო დედამიწას ცხოვრენდეს დო იმენდ უღდეს, ნამდა ქრისტეწკუმა ართო იმეფენდეს ზეცას. თინეფცალო, ჩქი ხოლო ბედნერეფ იპჸუაფუთ, მუჟამსით სწორ მოტივეფით ვემსახურებუთ ღორონთის.
21. მუჭოთ მათეშ 6:31—33-ს ჭარჷ, მუს ოკო ველდათ იეჰოვაშე?
21 მასმა, ვა ვოდინუათ რწმენა. ჩქი გიშებგორით თიცალ ცხოვრება, ნამუთ ჩქინდე დუდგინოდვალირობას დო მონდომებულო მუშობას ითხინს. მუჭოთ იესოქ გუმაფრხილეს, თხოზინს შეფხვადუდით. მარა შემლებნა ბჯერდან, იეჰოვა ქომჩანა ძალას, გავურზათ ირნერ განსაცდელს. მუთ უმოსის მიფთვინენთ, თით უმოსო გუვავითარენთ თიცალ თვისებეფს, ნამუთ მიმეხვარებნა განსაცდელეფიშ გარზებას (იაკ. 1:2—4). თეს გეძინელ, შემლებნა ბჯერდან, იეჰოვა, მუთ მოსაჭირნან ირფელს ქომჩანა, იესო იჸუაფ ჩქინ ჭყიშ დო ჩქინ და დო ჯიმალეფ გურშა ელამკინანა (წეკითხით მათე 6:31—33; იოან. 10:14; 1 თეს. 5:11). თეშ უმოს მუ ოკო მოსაჭირდან?
22. მუშ გურშენ ოკო ვორდათ მარდულეფ?
22 თი ოსურკოჩის, მიდგა იესოქ დასკილიდუ, თიმ დღაშე დართჷ ძალეფქ დო გურშა მანგარო ელაკინ. მარა მარადიულო თაშ ხვალე თიმწკუმა იგინანდჷ დუდის, მუჟამსით იესოშ ართგურ მოწაფეთ გინირთუდ. მუჭო ფიქრენთ, მუნერ არჩევან აკეთ თიქ? წერმიდგინით, თინა იესოშ ართგურ მოწაფეთ გინირთუდ-და, ქრისტეწკუმა ართო ზეცას იჸუაფუდ! ირფელ, მუდგას თინა დათმენდჷ, თიშო ნამდა იესოშ მოწაფეთ გინირთკო, მუთუნ ვეჸუაფუდ თი კურთხვეფწკუმა შედარებით, ნამდგას თინა მიღენდჷ. ვა უღჷ მნიშვნელობა, ზეცას ცხოვრებაშ იმენდ მიღნან დო ვარ დედამიწას, მუნერ მარდულეფ ოკო ვორდათ, ნამდა იესოშე მიბღით მოწვევა: „ქუმორთით ჩქიმდა!“.
ობირეში 13 ქრისტე — ჩქინ მაგალითი
^ აბზ. 5 იესო მომწოდენა ქიმეფრთათ თიშა. მუჭო შემლებნა მიბღათ თე მოწვევა? თე სტატია პასუხის ქიმეჩანს თე კითხვას დო ხოლო ართშა ქუგმოშინანა, მუჭო მარზენა ძალეფს იესოწკუმა ართო თანამშრომლობა.
