1, 2. მუჭო რე დაკავშირებულ ეკლესიასტეშ 11:6 სამეფოშ გურშენ სახიოლო ამბეშ ქადაგებაშ საქმეწკუმა?

ნამთინე ქიანას ხალხ ჯგირო ირჩქილუაფ სახიოლო ამბეს, მუშენდა თინეფს ჭეშმარიტებაშ გაგება ოკონა. მარა რე ქიანეფ, სოდეთ ხალხის იშენდოიშენ ვაინტერეს ღორონთ დო ბიბლია. თქვანწკუმა ხოლო თაშ რენო? მუჭოდგა ვა რდასინ, იეჰოვა ჩქინდე ელჷ, ნამდა ქადაგებაშ საქმეს თეიშახ გუვაგრძელენთ, სოიშახ მუ ვა თქუანს, ნამდა თე საქმექ დესრულ.

² იეჰოვაშ დანიშნულ დროს ქადაგებაშ საქმე დესრულებ დო „ქუმურს აღსასრულ“ (მათ. 24:14, 36). მუჭო შემლებნა, თე დროშ მოულაშახ დევემორჩილათ სიტყვეფს „ვამასვანჯუა ხე“? * (წეკითხით ეკლესიასტეშ 11:6).

3. მუს გუვარჩიენთ თე სტატიას?

³ წოხლენ სტატიას გარჩიებულ რდუ ოთხ მხარე, ნამუთ მიმეხვარებნა, გინიფრთათ ადამიანეფიშ ჯგირ მებადურეფო (მათ. 4:19). თე სტატიას გუვარჩიენთ სუმ მხარეს, ნამუთ მიმეხვარებნა, მუდგაქ ვა მოხვადასინ, უმოს მტკიცას მაფდან გინოჭყვიდილ, იფქადაგათ. ჩქი ქიგებგენთ, მუშენ რე მნიშვნელოვან 1) მთელ ყურადღება ქადაგებაშ საქმეშა გეგნიბღათ, 2) გეგმიფრჩქინათ მოთვინება დო 3) ვა ვოდინუათ ძალიერ რწმენა.

4. მუშენ ოკო მაფდან მთელ ყურადღება თი საქმეშა გინოღალირ, ნამუთ იეჰოვაქ დუმავალეს?

⁴ იესოქ ბოლო დღალეფწკუმა დაკავშირებულ მოვლენეფ დო მდგომარეობა იწინასწარმეტყველ დო თინა ხოლო თქუ,  ნამდა შილებედ თე ირფელქ მუშ მიმაჸუნალეფს ეცილკო ქადაგებაშ საქმეშ შესრულებას. ათეშენ იესოქ მუშ მოწაფეეფ გაფრთხილ: „კურცხას რდათ“ (მათ. 24:42). ამდღა ჩქი ხოლო შეფხვადუთ თიცალ დაბრკოლებეფს, მუდგაქ ეცილ ნოეშ დროს მახორუ ხალხის, ყურადღება მიაქცისკო გუმაფრთხილებერ ცნობას, ნამდგას თინა ქადაგენდჷ (მათ. 24:37—39; 2 პეტ. 2:5). ათეშენ, მოკონა, მთელ ყურადღება თი საქმეშა გეგნიბღათ, ნამუთ იეჰოვაქ დუმავალეს.

5. მუჭოთ საქმეეფიშ 1:6—8-შე იძირე, მუ მაშტაბეფს მიოჭირინუანდჷ ქადაგებაშ საქმე?

⁵ განსაკუთრებით ამდღა რე საჭირო, მთელ ყურადღება ქადაგებაშ საქმეშა გეგნიბღათ. იესოქ იწინასწარმეტყველ, ნამდა თე საქმე, მუშ ღურაშ უკულ ხოლო გეგრძელებუდ დო უმოს დიდ მაშტაბეფს ქიმიოჭირნუანდჷ (იოან. 14:12). იესოშ ღურაშ უკულ, ნამთინე მოწაფექ კინ ჩხომიშ ჭოფუას დართჷ. გათელებაშ უკულ, იესოქ მუშ მოწაფეეფს სასწაულებრივო ოჭოფაფუ ბრელ ჩხომ. თე შემთხვევათ ოძირუ თინეფს, მუზმათ უმოს მნიშვნელოვან რდუ ადამიანეფიშ მებადურობა შხვა ნებისმიერ საქმეშე (იოან. 21:15—17). ონდო ზეცაშა იშჷ, იესოქ მუშ მოწაფეეფს უწუ, ნამდა დამოწმებაშ საქმე ხვალე ისრაელს ვარინ, დედამიწაშ არძა კუნთხუს ქიმიოჭირნუანდჷ (წეკითხით საქმეეფიშ 1:6—8). წანეფიშ უკულ, იესოქ მოციქულ იოანეს ხილუას ქაძირუ, მუ მოხვადუდ „უფალიშ დღას“. * შხვა ბრელ მუდგარენწკუმა ართო, იოანექ სარკო მოვლენა ძირჷ ხილუას: ანგელოზის „მარადიულ სახიოლო ამბე უღუდ, ნამდა ხიოლით გუცხადკო დედამიწაშ მახორუეფს, არძა რჯულს, ტომს, ნინას დო ხალხის“ (გამოცხ. 1:10; 14:6). არგამა რე, იეჰოვას ოკო, ნამდა მონაწილება მიბღათ თე გრანდიოზულ საქმეს, ონდო თინა დესრულებ.

6. მუ მიმეხვარებნა, მთელ ყურადღება ქადაგებაშ საქმეშა გეგნიბღათ?

⁶ მუჟამსით დეფიფქრებუთ, მუჭო მოხვარნა იეჰოვა, შემალებენა მთელ ყურადღება  ქადაგებაშ საქმეშა გეგნიბღათ. მაგალთო, თინა ვა მარკენა სულიერ საზრდოს ბეშტელ დო ელექტრონულ პუბლიკაციეფით, აუდიო დო ვიდეო პროგრამეფით დო ინტერნეტ მაუწყებლობათ. ართ წუთით დეფიქრით: ჩქინ ოფიციალურ ვებგვერდის ინფორმაცია ხეშამალაფარ რე 1 000-შე მეტ ნინაშა (მათ. 24:45—47). მთელ მსოფლიოს, ნამუთ გორთილ რე პოლიტიკურო, რელიგიურო დო ეკონომიკურო, ბრუო მილიონშე მეტ იეჰოვაშ მოწმე მსოფლიო საჯიმალოს რე გაერთიანებულ. მაგალთო, 2019 წანაშ 19 აპრილს, ობიშხა ოჭმარეს, მთელ მსოფლიოს იეჰოვაშ მოწმეეფქ ართ ირდღაშიან მუხლიშ გარჩიებაშ ვიდეოს უჯინეს. თიმ ონჯუას, 20 919 041 ადამიანქ იშაყარ იესოშ ღურაშ გოშინაშ ონჯუაშ აღნიშნებელო. თე თანამედროვე სასწაულიშ ძირაფა დო თის მონაწილება ჩქინო დიდ პატი რე დო თეშე ფიქრ მოხვარნა, მთელ ყურადღება ქადაგებაშ საქმეშა გეგნიბღათ.

7. მუჭო მიმეხვარებნა იესოშ მაგალით, მთელ ყურადღება ქადაგებაშ საქმეშა მაფდან გინოღალირ?

⁷ ხოლო ართ საშვალება, მუთ მიმეხვარებნა, მთელ ყურადღება ქადაგებაშ საქმეშა გეგნიბღათ, იესოშ მაგალითიშ მეჸუნა რე. თინა მუთუნს ვარზენდჷ საშვალებას, ჭეშმარიტებაშ დამოწმებაშ საქმეს ეცილკო (იოან. 18:37). თიქ ვა ჩირთჷ, მუჟამსით სატანაქ „მსოფლიოშ არძა სამეფო დო თინეფიშ დიდება“ მიარზუ. იესო ვართ თიმწკუმა ჩილათე, მუჟამსით შხვეფს თიშ გამეფება ოკოდეს (მათ. 4:8, 9; იოან. 6:15). იესოქ ვართ მატერიალურ სიმდიდრეშ სურვილს ეიაჸუნ დო ვართ მანგარ წინააღმდეგობაშა შქურნებ (ლუკ. 9:58; იოან. 8:59). რწმენაშ გამოცდეფიშ დროს მოციქულ პავლეშ რჩევას ქიგიფშინანთ-და, თენა მიმეხვარებნა, მთელ ყურადღება ქადაგებაშ საქმეშა გეგნიბღათ. თიქ ელუჩ ქრისტიანეფს, მიაჸუნესკო იესოშ მაგალითის, მუთ მეხვარებუდ თინეფს, ვა შურდესკო დო გურქ ვა გუტირხესკო (ებრ. 12:3).

8. მუ რე მოთვინება დო მუშენ რე განსაკუთრებულო ამდღა თინა აუცილებერ?

⁸ მოთვინება რე უნარ, მშვიდას რდე, ონდო სიტუაცია ვეთირუ. შილებე, გლახა სიტუაციაშ თირუას ვუჯინეთ ვარდა ბრელ ხან რე, მუდგარენს ველუთ, ჟირხოლო შემთხვევას მოთვინება მოსაჭირნა. მაგალთო, წინასწარმეტყველ აბაკუმ შურდოგურით ელუდ დროს, მუჟამსით ძალადობა ვეჸუაფუდ (აბაკ. 1:2). იესოშ მოწაფეეფს თიშ იმენდ უღდეს, ნამდა სამეფო „უცფას გემკორჩქინდუდ“ დო რომაელეფიშ ხეშე ირსხენდჷ თინეფს (ლუკ. 19:11). ჩქი მთელ გურით ველუთ დღას, მუჟამსით ღორონთიშ სამეფო მოსპუნს უბადობას დო სამართლიან ახალ ქვეყნიერება ქუდოდირთუ (2 პეტ. 3:13). მარა ჩქი მოთვინება ოკო გიმიფრჩქინათ დო ვუჯინათ იეჰოვაშ დანიშნულ დროს. გუვარჩუათ მუსხირენ საშვალება, ნამდგათ იეჰოვა მოთვინებას მოგურუანა.

9. სოვრეშე იძირე იეჰოვაშ მოთვინება?

⁹ იეჰოვა მოთვინებაშ სრულყოფილ მაგალითის მარზენა. თიქ ნოეს დასაბაღ დრო მეჩჷ კიდობანიშ ოშენებელო დო ოქადაგებელო (2 პეტ. 2:5; 1 პეტ. 3:20). იეჰოვაქ მოთვინებათ მურჩქილუ აბრაამს, მუჟამსით თიქ მუსხირენშა კითხჷ განადგურენდჷ დო ვარ სოდომ დო გომორას მახორუ უბადო ხალხის (დაბ. 18:20—33). იეჰოვა საუკუნეეფს უთვინენდჷ ურჩ ისრაელ ერს (ნეემ. 9:30, 31). ჩქი ამდღა ხოლო არგამათ ვორწყეთ იეჰოვაშ მოთვინებას, მუშენდა თინა დროს არზენს თითოულს, მიდგას ღორონთწკუმა მეგობრობა ოკო, ნამდა „მინანუას“ (2 პეტ. 3:9; იოან. 6:44; 1 ტიმ. 2:3, 4). იეჰოვაშ მაგალით აღბძრენა, გეგმიფრჩქინათ მოთვინება ქადაგებაშ დო გურაფაშ დროს. იეჰოვა მოთვინებას მუშ სიტყვას ინოჭარილ მაგალითეფით ხოლო მოგურუანა.

10. მუჭოთ იაკობიშ 5:7, 8-შე იძირე, მუთ რე მნიშვნელოვან დიხაშ დუმამუშებელიშ მაგალით?

¹⁰ წეკითხით იაკობიშ 5:7, 8. დიხაშ დუმამუშებელ, ნამუთ მცენარეეფს რდუნს, მოთვინებაშ  ჯგირ მაგალით რე. ნამთინე მცენარე მალას ირდუ, მარა მცენარეეფიშ უმენტაშის, განსაკუთრებულო თინეფს, ნამუთ ნაყოფის მიკიღანს, უმოს მეტ დრო ოსაჭირ ორდალო. ჯვეშო ისრაელს მცენარეშ რდუალაშ პერიოდ სოდგარენ ამშვ თუთას იგრძელებუდ. დიხაშ დუმამუშებელ თასის ადრეიან ჭვემაშ დროს, სოდგარენ შქა ოქტომბერს თასუნდჷ დო მოსავალს გვიანიშ ჭვემაშ უკულ, სოდგარენ შქა აპრილს ეჭოფუნდჷ (მარ. 4:28). ჭკვერულ იჸუაფ, დიხაშ დუმამუშებელიშ მოთვინებაშ მაგალითის ქიმვაჸუნუთ-და. მარა შილებე, თენა ირო ადვილ ვა რდას.

11. მუჭო მიმეხვარებნა მოთვინება ქადაგება დო გურაფაშ დროს?

¹¹ არასრულყოფილ ადამიანს ოკო, ხეთეშე მიღას, მუშ მონდომაშ შედეგეფ. მარა ჩქინ ბაღის მცენარეეფქ ნაყოფ გემკიღანინ ქუმოკონა-და, ირიათო ოკო მიკულუათ თის. მაგალთო, დიხა დუვამუშუათ, დობრგათ, ღვანძგილ ჩუთხინუათ დო დობწყარათ. თეშნერო, მოწაფეეფიშ მომზადება ქუმოკონან-და, ძალისხმევა მოსაჭირნა. დრო რე საჭირო, ნამდა ბიბლიაშ მაგურაფალეფს მივეხვარათ, ვა უღდან წინასწარ შექმნილ აზრ დო ვეგმირჩქინან გიშაკერძაფა. მოთვინება მიმეხვარებნა, გურქ ვა გომტირხან, მუჟამსით ხალხ ვამრჩქილენა. მოთვინება თიმწკუმა ხოლო მოსაჭირნა, მუჟამსით ნამთინე მზათ რე, ქიმირჩქილუას დო ქიდიგურუას ჭეშმარიტება. ჩქი ოკო ვა დუვანძალათ ბიბლიაშ მაგურაფალეფს რწმენაშ გავითარება. მინშა, იესოშ მოწაფეეფ ხოლო ხეთეშე ვენანჭუდეს იესოშ გურაფეფს (იოან. 14:9). ფშუდან, ნამდა ჩქი შილებე ბრგუნთ დო ბწყარუნთ, მარა ღორონთ რდუნს (1 კორ. 3:6).

12. მუჭო შემლებნა მოთვინებაშ გიმორჩქინა ნათესეეფწკუმა ქადაგებაშ დროს?

¹² მოთვინებაშ გიმორჩქინა შილებე მიჭირდან, ჩქინ ნათესეეფწკუმა ქადაგებაშ დროს. ეკლესიასტეშ 3:1, 7-ის მოჩამილ პრინციპ მიმეხვარებნა მოთვინებაშ გიმორჩქინას. თაქ ჭარჷ: „ირფელს მუშ დრო უღჷ . . . რაგადიშ დრო დო რაგადშე დუდიშ შეკებაშ დრო“.  შემლებნა, ჩქინ ჯგირ საქციელით უსიტყვოთ დუვამოწმათ, მარა, მუჟამსით საშვალება მუმაჩამნა, მზათ ვორეთ, თინეფწკუმა ჭეშმარიტებაშე იფჩუათ (1 პეტ. 3:1, 2). ჩქი მთელ მონდომათ ოკო იფქადაგათ დო ვოგურუათ ჭეშმარიტება, მარა თე დროს, მოთვინება ოკო გიმიფრჩქინათ არძაწკუმა, თინეფ შქას ოჯახიშ წევრეფწკუმა.

13, 14. მოთვინებაშ ნამ მაგალითეფს შემლებნა მივაჸუნათ?

¹³ მოთვინებას ბგურაფლენთ, მუჭოთ ბიბლიას ინოჭარილ ღორონთიშ ართგურ მსახურეფიშ, თეშ თანამედროვე მსახურეფიშ მაგალითეფშე. მაგალთო, აბაკუმ შურდოგურით ელუდ უბადობაშ მოსპუალას, მარა თინა მოთვინებას გიმირჩქინანდჷ, მუშენდა თქუ: „ჩქიმ ოყარაულებერ ადგილს გებდირთუქ“ (აბაკ. 2:1). მოციქულ პავლექ თქუ, ნამდა ოკოდ დასრულკო მუშ მსახურება დო მიღკო ზეციურ ჯილდო. მარა თინა მოთვინებათ აგრძელენდჷ სახიოლო ამბეშ ქადაგებას (საქ. 20:24).

¹⁴ გუვარჩუათ ართ დაქორწინებულ წყვილიშ მაგალით, ნამდგაქ გალაადიშ სკოლა მიკორთჷ დო დენიშნჷ ქიანას, სოდეთ მუსხირენ იეჰოვაშ მოწმე რე. თეს გეძინელ, თე ქიანაშ მთავარ რელიგია ქრისტიანობა ვა რე. ბრელ ვარდჷ თიცალ, მიდგას ბიბლიაშ გურაფა ოკოდ. მარა შხვეფ, მით თე წყვილწკუმა ართო გალაადის გურაფლენდეს დო შხვა ქიანეფს მსახურენდეს, მუნეფიშ ხიოლს უზიარენდეს დო ურაგადდეს, ნამდა ბრელ ნაყოფიერ ბიბლიაშ გურაფას ატარენდეს. თე წყვილ მოთვინებათ აგრძელენდჷ ქადაგებას თიშ უმკუჯინუო, ნამდა თე ტერიტორიას მარჩქილეეფიშ რიცხვ ონდეთ იძინანდჷ. ბრუო წანიან მსახურებაშ უკულ, ართ მეჯინათ უნაყოფო ტერიტორიას, ართ-ართ ბიბლიაშ მაგურაფალქ დინათ, მუდგაქ მანგარ ხიოლ მოუღ თე წყვილს. მუჭო მოგენს ართიანს ჯვეშ დო ჩქინ დროშ მსახურეფიშ მაგალითეფ? თე ართგურ პიროვნებეფ ვა გაზარმაცებენა, შხვა სიტყვეფით ქოფთქუათინ ხე ვა მუსვანჯუაფნა დო ათეშენ იეჰოვაქ აკურთხჷ თინეფიშ მოთვინება. მორთ მივაჸუნათ „თინეფიშ მაგალითის, მით რწმენათ დო მოთვინებათ ღებულენა არძა დუნაპირებუს“ (ებრ. 6:10—12).

15. მუ რე თი ართ მხარე, სოვრეშეთ იძირე, მუჭო მოხვარნა რწმენა ხოლო უმოსო მაფდან გინოჭყვიდილ, ვამვოსვანჯუათ ხე?

¹⁵ ჩქი ბწანა, მუდგას ფქადაგენთ, ათეშენ მთელ შურდოგურით მოკონა, მუთ შილებე მეტ ადამიანს ვუქადაგათ. ჩქი ბწანა ღორონთიშ სიტყვას ინოჭარილ დუნაპირებუეფ (ფსალმ. 119:42; ეს. 40:8). ჩქი ვორწყეთ, მუჭო ისრულებ ბიბლიურ წინასწარმეტყველებეფ. თეს გეძინელ, ჩქინ თოლო ვორწყეთ, მუჭო თირანს ხალხ მუნეფიშ ცხოვრებას, მუჟამსით თინეფ ბიბლიურ რჩევეფიშ გიმორნაფას იჭყანა. თე ირფელ ხოლო უმოსო მარწმუნენა, ნამდა სახიოლო ამბექ არძას ოკო ექადაგას.

16. ფსალმუნიშ 46:1—3-იშ თანახმას, მუჭო მოხვარნა იეჰოვა დო იესოშ მიმართ რწმენა, ნამდა ქადაგება უმოს მტკიცას მაფდან გინოჭყვიდილ?

¹⁶ თეს გეძინელ ჩქი ბწანა იეჰოვა, მიდგაშეთ მოურს თი ცნობა, ნამდგას ფქადაგენთ დო მიდგაქ იესო ზეციერ სამეფოშ მეფეთ დანიშნჷ (იოან. 14:1). მუდგაქ ვა მოხვადასინ, იეჰოვა რე ჩქინ დუდიშ გითაფორაფალ დო ძალა (წეკითხით ფსალმუნიშ 46:1—3). თეწკუმა ართო, ჩქი დარწმუნებულ ვორეთ, ნამდა იესო, იეჰოვაშე მოჩამილ ძალათ დო ძალაუფლებათ, ზეცაშე ხემძღვანელენს ქადაგებაშ საქმეს (მათ. 28:18—20).

17. მუშენ ოკო გუვაგრძელათ ქადაგება? ქიმიჸონით მაგალით.

¹⁷ რწმენა ხოლო უმოსო მიმანგარენა თიშ ნდობას, ნამდა იეჰოვა აუცილებერო მაკურთხენა მონდომაშო დო მინშა თეს შურო ვეველუთინ თიცალ შარათ გაკეთენს (ეკლ. 11:6). მაგალთო, ირდღას ანთასობით ადამიან ელულუანს ლიტერატურაშ სტოლს დო სტენდეფს. ქორენო ქადაგებაშ თე მეთოდ ეფექტურ? მუშო ოკო რაგად, ქო! 2014 წანაშ  ნოემბერიშ „ჩქინ სამეფო მსახურებაშ“ ფურცელს მოჩამილ რდუ ართ ახალგაზრდა სტუდენტიშ შემთხვევა, ნამდგას იეჰოვაშ მოწმეეფიშ გურშენ თემაშ ჭარუა ოკოდ. თიქ ვა ძირჷ სამეფო დარბაზ, მარა უნივერსიტეტიშ ტერიტორიას ქოძირ ლიტერატურაშ სტოლ დო საჭირო მასალა მუშ თემაშ ოჭარალო. საბოლათ, თიქ დინათ დო ასე პიონერო მსახურენს. თეცალ შემთხვევეფშე იძირე, ნამდა დიო ხოლო რე დოსქილადირ თიცალ კათა, მიდგას სამეფოშ ცნობაშ მორჩქილაფა ოსაჭირ დო თეშ რჩქინა აღბძრენა, გუვაგრძელათ ქადაგება.

18. მუ მარწმუნენა, ნამდა სამეფოშ გურშენ ქადაგებაშ საქმე თეშ შისრულებ, მუჭოთ იეჰოვას ოკო?

¹⁸ შემლებნა დარწმუნებულ ვორდათ, ნამდა სამეფოშ გურშენ ქადაგებაშ საქმე დანიშნულ დროს დესრულებ. ქიგიფშინათ, მუქ მოხვად ნოეშ დროს. იეჰოვაქ დამტკიც, ნამდა თინა სრულყოფილო განაგენს დროს. იეჰოვაქ წარღვნაშახ სოდგარენ 120 წანათ ადრე დანიშნჷ თიშ დოჭყაფაშ დრო. წანეფიშ უკულ, იეჰოვაქ კიდობანიშ აშენება დავალ ნოეს. წარღვნაშ დოჭყაფაშახ სოდგარენ 40—50 წანას, ნოე მთელ მონდომათ ასრულენდჷ დავალებურ საქმეს. თიშ უმკუჯინუო, ნამდა ხალხ ვა ურჩქილედ, თინა აგრძელენდჷ გუმაფრთხილებერ ცნობაშ ქადაგებას, ონდო იეჰოვაქ ვა უწუ, ნამდა ცხოველეფ კიდობანშა გემნიჸონკო. უკულ, დანიშნულ დროს „იეჰოვაქ დოკილუ კარ“ (დაბ. 6:3; 7:1, 2, 16).

19. მუ მელნა წოხლე, ხეს ვამვოსვანჯუანთ-და?

¹⁹ მალას იეჰოვა დასრულენს სამეფოშ გურშენ ქადაგებაშ საქმეს. თეშ უკულ, განადგურენს სატანაშ ქვეყნიერებას დო დამყარენს ახალ ქვეყნიერებას, ნამუთ ეფშა იჸუაფ ღორონთიშ მორჩილ კათათ. მარა თე დროშ მოულაშახ, მივაჸუნათ ნოეშ, აბაკუმიშ დო შხვა ართგურ მსახურეფიშ მაგალითის, მიდგაქ ხე ვა მასვანჯუ. მორთ მთელ ყურადღება ქადაგებაშ საქმეშა გეგნიბღათ, გეგმიფრჩქინათ მოთვინება დო ვა ვოდინუათ იეჰოვაშ დო თიშ დაპირებეფიშ ძალიერ რწმენა.