1. მუჟამ შილებე რთულ რდას იეჰოვაშ მსახურება?

მუჭო ფიქრენთ, მუჟამ რე არძაშ უმოს რთულ იეჰოვაშ მსახურება — მუჟამსით პრობლემეფ გიღნა დოვარ, მუჟამსით თქვან ცხოვრებას ირფელ ჯგირო რე? სირთულეეფიშ დროს უმოს ადვილ რე, იეჰოვას მივენდათ. მარა, მუჭო იფქციებუთ, მუჟამსით ჩქინ ცხოვრებას ირფელ ჯგირო მეურს? თე დროს იეჰოვაშ მსახურებაშე შხვა მუდგარენშა ხომ ვეგნომიღნა ყურადღება? იეჰოვაქ ისრაელეფ გაფრთხილ, ნამდა შილებედ თექ ქუმოხვადკო (კან. 6:10—12).

2. მუ მაგალით მუჩეს მეფე ასაქ?

² მეფე ასაქ ჯგირ მაგალით მუჩეს. თინა სრულაშო ონდუდ იეჰოვას დო თეშნერო ჭკვერულო მოქმედენდჷ. თინა იეჰოვას ხვალე რთულ დროს ვარინ, მშვიდობიან დროს ხოლო ომსახურუდ. ახალგაზრდობაშე „ასა მთელ გურით რდუ იეჰოვაწკუმა“ (1 მეფ. 15:14). ასაქ იუდა გასუფთჷ ტყურა თაყვანიშმცემლობაშე დო თეშნერო დამტკიც, ნამდა მთელ გურით ომსახურუდ იეჰოვას. ბიბლია იჩიებ, ნამდა „თიქ მოსპჷ უცხო სამსხვერპლოეფ დო ემაღალია ადგილეფ, აკოტახ წმინდა სვეტეფ დო წმინდა ბოძეფ“ (2 მატ. 14:3, 5). ხვალე თენა ვარინ, ასაქ მუშ ბების, მააქას მიდუღ დედოფლობა, მუშენდა თინა კერპეფიშ თაყვანიშცემას უნწყუნდჷ ხეს (1 მეფ. 15:11—13).

3. მუს გუვარჩიენთ თე სტატიას?

³ ასაქ ხვალე ტყურა თაყვანიშცემა ვა მოსპუნ, თიქ ხე შეუნწყუ წმინდა თაყვანიშცემას დო მეხვარ იუდაშ სამეფოს,  დართუკო იეჰოვას. ათეშენ იეჰოვაქ ასა დო იუდაშ ხალხ მშვიდობიან დროთ აკურთხჷ. * ასაშ მართველობაშ „დროს ვით წანას მოსვანჯელ რდუ ქიანა“ (2 მატ. 14:1, 4, 6). თე სტატიას გუვარჩიენთ, მუჭო გიმირინუ ასაქ მშვიდობიან დრო. უკულ გუვარჩიენთ, მუჭო გიმირინუეს პირველ საუკუნეშ ქრისტიანეფქ ასაცალო მშვიდობიან დრო. ბოლოს ქუპასუხენთ კითხვას: თაყვანიშცემაშ თავისუფლება რენ ფერ ქიანას ქოცხოვრენთ-და, მუჭო შეილებნა ჭკვერულო გიმირინუათ თე მშვიდობიან დრო?

4. მუჭოთ 2 მატიანეშ 14:2, 6, 7-ის ჭარჷ, მუჭო გიმირინუ ასაქ მშვიდობიან დრო?

⁴ წეკითხით 2 მატიანეშ 14:2, 6, 7. ასაქ ხალხის უწუ, ნამდა იეჰოვა არზენდჷ თინეფს „მშვიდობას ირ კუნთხუშე“. ასას ვა უფიქრებ, ნამდა თენა მოსვანჯაშ დრო რდუ. თეშ მანგიორო, თიქ ქიდიჭყჷ ქალაქეფიშ, კიდალეფიშ, კოშკეფიშ დო კარმინოლეფიშ შენება. თიქ უწუ იუდაშ ხალხის: „ჩქინ რე თე დიხა“. მუშ რაგად ოკოდ თეთ ასას? თინა გულისხმენდჷ, ნამდა ღორონთშე მოჩამილ თე დიხას ხალხშა ნტერეფს ვაცილებედეს დო ათეშენ თავისფალო შეულებდეს გადაადგილება დო მშენებლობა. ასაქ ელუჩ ხალხის, ჭკვერულო გეგმირინესკო მშვიდობაშ დრო.

5. მუშენ გამანგარ ასაქ სამხედრო ძალა?

⁵ თეს გეძინელ, ასაქ მშვიდობიან დრო სამხედრო ძალაშ გამანგარებელო გეგმირინუ (2 მატ. 14:8). ნიშნენსო თენა თის, ნამდა ასა ვანდუდ იეჰოვას? მუშო ოკო რაგად, ვარ. ასას უჩქუდ, ნამდა მუშ, მუჭოთ მეფეშ მოვალეობა რდუ, ხალხ თი სირთულეეფშო მამზადკო, ნამდგას შილებედ მომავალს შეხვადესკო. ასას უჩქუდ, ნამდა  მშვიდობაშ დრო, ნამუთ თი დროს იუდას უღუდ, ირო ვეგეგრძელებუდ დო თექ ქოთ თაშ ქუმოხვად.

6. მუჭო გიმირინუეს პირველ საუკუნეშ ქრისტიანეფქ მშვიდობიან დრო?

⁶ მართალ რე, ხშირას პირველ საუკუნეშ ქრისტიანეფს თხოზუდეს, მარა თინეფს მშვიდობიან დრო ხოლო უღდეს. მუჭო გიმირინუეს მოწაფეეფქ თე დრო? თე ართგურ ქომოლკათა დო ოსურკათა მთელ მონდომათ ქადაგენდჷ სახიოლო ამბეს. წიგნ „საქმეეფს“ ჭარჷ, ნამდა თინეფ „იეჰოვაშ შიშით“ მოქმედენდეს. თე ქრისტიანეფ აგრძელენდეს სახიოლო ამბეშ ქადაგებას დო შედეგო, „თინეფიშ რიცხვ ირდღას იძინანდჷ“. არგამა რე, იეჰოვაქ აკურთხჷ თინეფიშ მონდომა, ნამუთ მშვიდობიან დროს გიმირჩქინეს (საქ. 9:26—31).

7, 8. მუჭო გიმირინუეს პავლექ დო შხვეფქ ქადაგებაშ შესაძლებლობა? გენწყით.

⁷ პირველ საუკუნეშ მოწაფეეფ სახიოლო ამბეშ ქადაგებაშ არძა საშვალებას გიმირინუანდეს. მაგალთო, მუჟამსით პავლე მოციქულქ ქიმეხვად, ნამდა ქადაგებაშ ფართო კარქ განწყჷ ეფესოს, თე დრო ქადაგება დო მოწაფეეფიშ მომზადებაშ საქმეშო გეგმირინუ (1 კორ. 16:8, 9).

⁸ პავლეს დო შხვა ქრისტიანეფს სახიოლო ამბეშ გავრცელებაშ ხოლო ართ საშვალებაქ მიაჩეს, მუჟამსით ახ. წ. 49 წანას წინადაცვეთაშ საკითხიქ გეგნოჭყორდჷ (საქ. 15:23—29). თიშ უკულ, მუთ თე გადაწყვეტილება არძა კრებას გეგნოჩეს, მოწაფეეფ მთელ მონდომათ ქადაგენდეს „სახიოლო ამბეს იეჰოვაშ სიტყვაშ გურშენ“ (საქ. 15:30—35). მუ რდუ თეშ შედეგ? ბიბლიას ჭარჷ, ნამდა „კრებეფ რწმენას იმანგარებუდ დო თინეფიშ რიცხვ ირდღას იძინანდჷ“ (საქ. 16:4, 5).

9. მუნერ სიტუაცია რე ბრელ ქიანას დო მუ ოკო ბკითხათ ჩქინ დუდის?

⁹ ამდღა ბრელ ქიანას თავისფალო ფქადაგენთ სახიოლო ამბეს. თიცალ ქიანას ცხოვრენთო, სოდეთ თავისფალო შეილებნა იეჰოვაშ თაყვანიშცემა? თაშ ქორენ-და, ქოკითხით თქვან დუდის: მუჭო იბრინუანქ თე თავისუფლებას? ბოლო დღალეფ განსაკუთრებულ რე იეჰოვაშ ხალხშო, მუშენდა თინეფ მთელ მსოფლიოს მონაწილენა ქადაგებაშ დო გურაფაშ დიდებულ საქმეს, მუნერით დღას ვა ჸოფე (მარ. 13:10). იეჰოვაშ ხალხის ბრელ მუდგარენიშ კეთება შეულებ თე საქმეს!

10. მუს ელამჩანა 2 ტიმოთეშ 4:2?

¹⁰ მუჭო შეილებნა, ჭკვერულო გეგმირინუათ მშვიდობიან დრო? (წეკითხით 2 ტიმოთეშ 4:2). ჯგირ იჸუაფ, ქიგნაჯინათ თქვან მდგომარეობას დო ქოძირათ, თქვა ვარდა თქვან ოჯახიშ წევრის ხომ ვეშეილებნა, მეტ მონაწილება მიღათ ქადაგებაშ საქმეს, მაგალთო პიონერო იმსახურათ? ასე ქონება დო მატერიალურ ნივთეფიშ შაყარუაშ დრო ვა რე, მუშენდა თე ირფელ დიდ გასაჭირს გენადგურებ (იგავ. 11:4; მათ. 6:31—33; 1 იოან. 2:15—17).

11. მუ აკეთ ნამთინექ, ნამდა, მუთ შილებენ მეტ ადამიანს უქადაგას სახიოლო ამბე?

¹¹ ბრელ მაუწყებელქ ახალ ნინა ქიდიგურუ, ნამდა შხვეფს მეხვარას იეჰოვაშ გურშენ მეტიშ გაგებას. ღორონთიშ ორგანიზაცია თეცალ და დო ჯიმალეფს ოხვარ დო ბიბლიაშა გერსხილ მასალას უმოს დო უმოს მეტ ნინაშა გიშაშქვანს. მაგალთო, 2010 წანას ჩქინ პუბლიკაციეფ სოდგარენ 500 ნინაშა რდუ ხეშამალაფარ. მარა, ამდღა თე რიცხვიქ 1 000-ის გემკაჩირთჷ!

12. მუჭო მოქმედენს ხალხშა ჭეშმარიტებაშ მშობლიურ ნინაშა მორჩქილაფა? ქიმიჸონით მაგალით.

¹² მუ რეაქცია უღჷ ხალხის, მუჟამსით  მშობლიურ ნინაშა ირჩქილუაფ ჭეშმარიტებას? ქობძირათ ართ დაშ შემთხვევა, ნამდგაქ რეგიონულ კონგრესის დესწრჷ შეერთებულ შტატეფს. თე კონგრესიქ ჩეტარ კინიარუანდა ნინაშა, ნამუთ მთავარ ნინა რე რუანდას, კონგოს (კინშასა) დო უგანდას. კონგრესიშ უკულ თე დაქ, ნამუთ კინიარუანდა ნინაშა იჩიებ, თქუ: „17 წანა რე, მუთ შეერთებულ შტატეფშა გინოფრთჷ ოცხოვრებშა დო თენა პირველ შემთხვევა რდუ, მუჟამსით სულიერ პროგრამაშე ირფელ ქიგებგჷ“. ფაქტ რე, სულიერ პროგრამაშ მშობლიურ ნინაშა მორჩქილაფაქ, თე დაშა მანგარო იმოქმედ. მდგომარეობა ხეს ქოინწყუნან-და, შეილებნანო ახალ ნინა ქიდიგურუათ, ნამდა ქიმეხვარათ შხვეფს? უჯგუშო ხომ ვა მოირჩქილუანა თქვან ტერიტორიას მახორუ ხალხ, მუნეფიშ ნინაშა ქუქადაგენთ-და? თქვან მონდომას აუცილებერო მაჸუნუ შედეგ.

13. მუჭო გიმირინუეს რუს და დო ჯიმალეფქ მშვიდობიან დრო?

¹³ ნამთინე ქიანას, ჩქინ და დო ჯიმალეფს ვა უღნა თავისფალო ქადაგებაშ საშვალება, მუშენდა ხელისუფლებაშე ვარიებულ რე ჩქინ საქმიანობა. მაგალთო, გუვარჩუათ, მუ მდგომარეობას რენა ჩქინ და დო ჯიმალეფ რუსეთის. ვითობით წანას თხოზინიშ უკულ, 1991 წანაშ მარტის და დო ჯიმალეფს ხელისუფლებაქ თავისფალო თაყვანიშცემაშ უფლება ქიმეჩ. თე დროს, რუსეთის სოდგარენ 16 000 იეჰოვაშ მოწმე რდუ. მარა ეჩ წანაშ უკულ, თე რიცხვიქ 160 000-ის გეგნაჩირთჷ! არგამა რე, ჩქინ და დო ჯიმალეფქ ჭკვერულო გეგმირინეს თავისფალო ქადაგებაშ საშვალება. მარა ართ დღას მშვიდობიან დროქ გეთუ. სიტუაციაშ თირუაშ უმკუჯინუო, თინეფ მთელ მონდომათ ომსახურნა იეჰოვას დო თეშო ირნერ საშვალებას გიმირინუანა, მუთ უღნა.

14, 15. მუჭო გიმირინუ იეჰოვაქ მუშ ძალა ასაშ საჯგირობუოთ?

¹⁴ საბოლათ, ასაშ დროს მშვიდობიან დროქ დესრულ. იუდას ეთიოპიაშე მილიონიან ჯარქ ქუმადირთჷ. თიშ მეთაურ, ზერახ დარწმუნებულ რდუ, ნამდა მუშ ჯარით იუდას დამარცხენდჷ. მარა მეფე ასა იეჰოვას ონდუდ. თიქ ლოცვას თქუ: „ქიმმეხვარით, იეჰოვა, ჩქინ ღორონთ, მუშენდა სქანდა ვორეთ მენდებულ დო სქან სახელით გიშაფრთით თე ბრბოშ წინააღმდეგ!“ (2 მატ. 14:11).

¹⁵ მართალ რე, ეთიოპეფიშ ჯარ დახე ჟირ თისხი რდუ ვინემ იუდაშ ჯარ, მარა ასას ჯგირო არჩქილედ, მუნერ ძალიერ რდუ იეჰოვა დო ჯერდჷ, ნამდა ღორონთ მუშ ხალხიშ საჯგირობუოთ იმოქმედენდჷ. იეჰოვაქ ასას იმენდ ვა გუმტყუნ; ეთიოპეფიშ ჯარქ სასტიკო დემარცხჷ (2 მატ. 14:8—13).

16. სოვრეშე მიჩქნა, ნამდა მშვიდობიან დრო ირო ვეჸუაფ?

¹⁶ მართალ რე, კილ-კილშა ვა მიჩქნა, მუ მელნა მომავალს, მარა მიჩქნა, ნამდა მშვიდობიან დრო, ნამუთ შილებე ამდღა ღორონთიშ ხალხის უღდას, ირო ვეჸუაფ. ვაგმოჭყორდან, ნამდა იესოქ იწინასწარმეტყველ: „არძა ხალხ გოიჯოგუანა ჩქიმ სახელიშ გურშენ“ (მათ. 24:9). პავლე მოციქულქ ხოლო თქუ: „არძას, მიდგას ღორონთიშ ართგურობათ ოკო ცხოვრება ქრისტე იესოს, თხოზუდან იჸი“ (2 ტიმ. 3:12). სატანა „მანგარ გაჟღამებულ“ რე, ათეშენ ოკო ვეფიფქრათ, ნამდა თიშ რისხუაშა დუდ ემაჩილითენა (გამოცხ. 12:12).

17. მუჭო შილებე ჩქინ ართგურობაქ გიმიცადას?

¹⁷ მალას არძა შეფხვადუთ ართგურობაშ გამოცდეფს დო ქიდიჭყაფუ „დიდ გასაჭირ, მუნერით ვა ჸოფე ქიანაშ დაჭყაფშე ამდღარშახ დო ვართ იჸუაფ“ (მათ. 24:21). თი დროს შილებე, ოჯახიშ წევრეფქ მოლართან ჩქინ წინააღმდეგ დო ჩქინ საქმიანობაქ ხოლო ვარიებულქ იჸუას (მათ. 10:35, 36). პირადო ჩქი, ასაცალო ქიმვენდებუთო იეჰოვას დო ქიპჸითო დარწმუნებულ, ნამდა თინა მიმეხვარებნა დო დამცვენა?

18. მუჭოთ ებრაელეფიშ 10:38, 39-ს ჭარჷ, მუ მიმეხვარებნა, მივემზადათ თი დროშო, მუჟამსით მშვიდობა ვეჸუაფ?

¹⁸ იეჰოვა ამდღარშე მამზადენა თიშო, მუთ წოხლე მელნა. თინა „ართგურ დო გონიერ მონას“ ხემძღვანელენს, „ნამდა დროულო  ქიმეჩას საზრდო მუშ შინაურეფს“, მუთ მიმეხვარებნა მტკიცე რწმენა მიღდან (მათ. 24:45). მარა ჩქინ ოკეთებელ ოკო გუვაკეთათ დო ძალიერ რწმენა გუვავითარათ იეჰოვაშ მიმართ (წეკითხით ებრაელეფიშ 10:38, 39).

19, 20. პირველ მატიანეშ 28:9-ს გეფთვალისწინენთ-და, მუ ოკო ბკითხათ ჩქინ დუდის დო მუშენ?

¹⁹ მეფე ასაცალო, ჩქი ხოლო ოკო ბგორათ იეჰოვა (2 მატ. 14:4; 15:1, 2). ჩქი იეჰოვაშ გორუა თიმწკუმა დიბჭყით, მუჟამსით გეფჩინებაფეთ თინა დო დიბნათით. ჩქი არძა საშვალებას გიმიბრინუანთ, ნამდა ხოლო უმოსო ქიპჸოროფუათ იეჰოვა. თიშ გაგებელო, მუჭო ვორთუთ თეს, შემლებნა, ჩქინ დუდის ბკითხათ: რეგულარულო ქუვოსწრუქო კრებაშ შეხვალამეფს? მუჟამსით ვოსწრუთ შეხვალამეფს, ნამდგას იეჰოვაშ ორგანიზაცია ხემძღვანელენს, თენა ძალეფით ემოფშანა დო თანაქრისტიანეფ გურშა ელამკინანა (მათ. 11:28). თეს გეძინელ, შემლებნა, ჩქინ დუდის ბკითხათ: „ქომღუნო ბიბლიაშ გიმორკვიებაშ ჯგირ ჩვევა?“. ოჯახწკუმა ართო ქოცხოვრენქ-და, ირ მარას ქუთმენქო დროს ოჯახურ თაყვანიშცემას? ხვალე ქოცხოვრენქ-და, ქუგმურთუნქო დროს ბიბლიაშ პირად გურაფას? სრულას ქოღებულენქო მონაწილებას ქადაგება დო მოწაფეეფიშ მომზადებაშ საქმეს?

²⁰ მუშენ ოკო ბკითხათ ჩქინ დუდის თე ირფელ? ბიბლია მირაგადნა, ნამდა იეჰოვა გიმირკვიენს ჩქინ ფიქრეფს დო გურს, ათეშენ ჩქი ხოლო თაშ ოკო მიფქცუათ (წეკითხით 1 მატიანეშ 28:9). ქუვორწყეთ, ნამდა ჩქინ მიზნეფს, დამოკიდებულებას ვარდა აზროვნებას, მუდგარენეფიშ თირუა მოსაჭირნან-და, იეჰოვას ოკო ქოფთხუათ, ქიმმეხვარან. ასე რე დრო, მივემზადათ თი გამოცდეფშო, ნამუთ წოხლე მელნა. მორთ მუთუნს ვემეფჩათ საშვალება, მეცილან მშვიდობიან დროშ ჭკვერულო გიმორნაფას!