1. მუჭო უკინენა ხუჯის ქრისტიან დალეფ ორგანიზაციას, მარა მუ სირთულეეფს შეხვადუ ბრელ? (ქოძირით სურათ გალენ გვერდის.)

ჩქი მოხიოლნა, ნამდა პჸუნა ქრისტიან დალეფ, მით ბრელს ხანდენა კრებაშო! მაგალთო, თინეფ მონაწილებას ღებულენა ქრისტიანულ შეხვალამეფს დო მსახურებას. ნამთინე სამეფო დარბაზიშ მიკოლუაფას ღებულენს მონაწილებას, შხვეფ პირად ინტერესის გიმირჩქინანა თანაქრისტიანეფიშ მიმართ. მუშო ოკო რაგად, თინეფ ბრელ პრობლემეფს შეხვადნა. ნამთინე ხანშამიშულირ მშობლეფს ულუანს. შხვეფ ოჯახიშ წევრეფშე წინააღმდეგობას შეხვადნა. ნამთინე, მით ხვალახე მშობელ რე, ირფელს ორთჷ, ნამდა იზრუნას სქუალეფშო.

2. მუშენ რე მნიშვნელოვან, ხუჯ დუკინათ ქრისტიან დალეფს?

² მუშენ რე მნიშვნელოვან, ხუჯ დუკინათ ქრისტიან დალეფს? მუშენდა ხშირას ქვეყნიერება საჭირო პატიცემას ვეგმირჩქინანს ოსურკათაშ მიმართ. თეს გეძინელ, ბიბლია ელამჩანა, ხუჯ დუკინათ თინეფს. მაგალთო, მოციქულ პავლექ რომიშ კრებას უწუ, ნამდა მთელ გურით მიღესკო ფებე დო გეუძინ: „ქიმეხვარით ირფელს, მუდგას გიგახვილნა“ (რომ. 16:1, 2). მუჭოთ იძირენ, მუჟამსით ფარისეველ რდუ, პავლეშე თი დროს გავრცელებურ აზრ მოქმედენდჷ დო ოსურკათა თის ხოლო დაბალ ფენათ მიორჩქუდ. მარა, მუჟამსით ქრისტიანო გინირთჷ, თინა იესოშ მაგალითის მეჸუნდჷ დო პატიცემათ დო ჯგირო ოქცუდ თინეფს (1 კორ. 11:1).

3. მუჭო ოქცუდ იესო ოსურკათას დო მუნერ დამოკიდებულება უღუდ ღორონთიშმოშიშ ოსურკათაშ მიმართ?

³ იესო ოსურკათას პატიცემათ ოქცუდ (იოან. 4:27). თის თიცალ დამოკიდებულება ვა უღუდ, მუნერით თი დროს იუდეველ რელიგიურ წინამძღოლეფს უღდეს. ართ ბიბლიურ წყაროს ჭარჷ: „იესოს დღას ვა უთქუალ თიცალ მუდგარენ, მუთ ოსურკათას დამცირენდჷ“. თინა განსაკუთრებულო აფასენდჷ ღორონთიშმოშიშ ოსურკათას. იესო დალეფს უძახუდ თინეფს დო თინეფ შქას მიშინუ, მით მუშ სულიერ ოჯახიშ წევრეფო მიორჩქუდ (მათ. 12:50).

4. მუს გუვარჩიენთ თე სტატიას?

 ⁴ იესო ირიათო მზათ, რდუ მეხვარკო სულიერ დალეფს. თინა აფასენდჷ დო იცვენდჷ თინეფს. მორთ გუვარჩუათ, მუჭო შემლებნა მივაჸუნათ იესოშ მაგალითის დო ვოძირათ, ნამდა ბზრუნენთ დალეფშე.

5. მუშენ შილებე ნამთინე დას გურიშემაკინალ ურთიერთობაშ საშვალება ვა უღდას?

⁵ არძას, ქრისტიან დალეფს დოვარ ჯიმალეფს, მოსაჭირნა, გურიშემაკინალ ურთიერთობა. მარა, მინშა შილებე, ქრისტიან დალეფს ვა უღდან თეცალ ურთიერთობაშ საშვალება. მუშენ შილებე, თაშ მოხვადას? ქიდეკვირით, მუს იჩიებ მუსხირენ და. „დაუქორწინებელ ვორექინ თიშენ, ხშირას მიჭირს, ჩქიმ ადგილ ქობძირე კრებას დო ფიფქრენქ, ნამდა თექ საჭირო ვა ვორექ“ — იჩიებ ართ და, ჯორდან. * ხოლო ართ და კრისტენ, ნამუთ პიონერო მსახურენს დო მსახურება გაფართოვკონ თიშენ შხვა კრებაშა გინორთჷ, იჩიებ: „მუჟამსით კრებას ახალ რექ, ხვალახეთ გინაფლენქ დუდის“. შილებე მინშა ჯიმალეფქ ხოლო იგინან თაშ დუდ. თინეფ, მით რელიგიურო გორთილ ოჯახის ცხოვრენა, შილებე მუნეფიშ ოჯახშე მეტებულო გინაფლენდან დუდის დო კრებაშე ხოლო ორკუდან ყურადღება. თინეფ, მით დალახებურ ოჯახიშ წევრის ულუანა დო ათეშენ ჸუდე ვა დატებენა, შილებე ხვალახეთ გინაფლენდან დუდის. ანეტ იჩიებ: „დიაჩქიმს უმოსო მა ვულუანდჷ, ათეშენ მეგობრულ შეხვალამეფშა დღას ვა მალნედ“.

6. მუჭოთ ლუკაშ 10:38—42-ს ინოჭარ, მუჭო მეხვარ იესოქ მართა დო მარიამს?

⁶ იესო დროს უთმენდჷ სულიერ დალეფს დო ნამდვილ მეგობარ რდუ თინეფშო. თინა მეგობრენდჷ მარიამ დო მართაწკუმა. მუჭოთ იძირენ, თინეფ დაუქორწინებელეფ რდეს (წეკითხით ლუკაშ 10:38—42). იესო მუშ სიტყვეფით დო საქმეეფით დუდის თავისფალო ოგინაფუანდჷ თინეფს. მაგალთო, მარიამ იესოშ კუჩხეფწკუმა ხედჷ, მუჭოთ მოწაფე. * მუჟამსით მართას გურქ მურთჷ, მუშენდა მარიამ ვახვარუდ, თის მორდება ვაშიბ, ქოუწუკო იესოს, მუდგას ფიქრენდჷ. თეცალ მეგობრულ გარემოს იესოქ ჟირხოლოს მნიშვნელოვან გაკვეთილ დაგურუ. იესო შხვა დროს ხოლო აკითხანდჷ მართას, მარიამს დო ლაზარეს დო თეშნერო ოძირანდჷ, ნამდა ზრუნენდჷ თინეფშე (იოან. 12:1—3). ათეშენ გასაკვირ ვა რე, ნამდა, მუჟამსით ლაზარექ დელახ, მართა დო მარიამს უჩქუდეს, ნამდა შეულებდეს იესოს მოხვარა თხისკო (იოან. 11:3, 5).

7. მუჭო შემლებნა, გურშა ელვუკინათ დალეფს?

⁷ ნამთინე დაშო ქრისტიანულ შეხვალამეფ მთავარ საშვალება რე, ნამდა თანამორწმუნეეფწკუმა რდას. ათეშენ მოკონა, თე შეხვალამეფიშ დროს მთელ გურით შეფხვადათ თინეფს, ქუდურაგადუათ დო ქუვოძირათ, ნამდა ფიფქრენთ თინეფშო. ჯორდან, ნამუთ ჟიშე მიფშინეთ, იჩიებ: „ჩქიმო ბრელს ნიშნენს, მუჟამსით შხვეფ მოცქვანა ჩქიმ კომენტარეფშო, მსახურებას მიგეგმენა ვარდა შხვანერო მოძირანა, ნამდა ყურადღებას მაქციენა“. ჩქი ოკო ვოძირათ ქრისტიან დალეფს, ნამდა მანგარ ძვირფასეფ რენა ჩქინო. ართ და, კია, იჩიებ: „კრებაშ შეხვალამაქ გომჩირთ-და, მიჩქჷ, ნამდა აუცილებერო ქუმობჭარნა დო ქიკითხენა ჩქიმ ამბეს. თავრეშე ვორწყექ, ნამდა და-დო ჯიმალეფ ზრუნენა ჩქიმდე“.

8. ხოლო მუჭო შემლებნა, მივაჸუნათ იესოშ მაგალითის?

⁸ იესოცალო შემლებნა, დრო დავუთმათ დალეფს. მაგალთო, შემლებნა ჸუდეს სადილშა ქუდვაპატიჟათ თინეფ ვარდა თავისფალ  დრო თინეფწკუმა ართო გუვატარათ. თეცალ დროს, მოკონა, ჩქინ სიტყვეფით გურშა ელვუკინათ თინეფს (რომ. 1:11, 12). ჯგირ იჸუაფ, უხუცესეფს იესოცალ დამოკიდებულება უღდან. თის უჩქუდ, ნამდა ნამთინეშო დაუქორწინებლობა სირთულეეფწკუმა იჸუაფუდ დაკავშირებულ, მარა თინა ხოლო აღნიშნჷ, ნამდა ვართ დაქორწინება დო ვართ სქუალეფ რე მთავარ შარა მარადიულ ბედნერობაშო (ლუკ. 11:27, 28). თეშ გინაწონს, მარადიულ ბედნერობა იეჰოვაშ მსახურებაშ პირველ ადგილშა გერნაფას მოუღ (მათ. 19:12).

9. მუშ კეთება შეულებნა უხუცესეფს, ნამდა ქრისტიან დალეფს ქიმეხვარან?

⁹ განსაკუთრებულო უხუცესეფქ ოკო მექცუან ქრისტიან ოსურკათას, მუჭოთ დალეფს დო დიდალეფს (1 ტიმ. 5:1, 2). ჯგირ იჸუაფ, უხუცესეფქ კრებაშ დოჭყაფაშახ დო თებაშ უკულ დრო გეგმურთან დალეფწკუმა ჩიებას. კრისტენ, ნამუთ ჟიშე მიფშინეთ, იჩიებ: „ართ უხუცესიქ ქოძირ, ნამდა მანგარ დაკავებულ ვორდჷ, მუშენდა ქოთ პიონერო ვმსახურენდჷ დო ქოთ მუფშენდჷ. თიქ დეინტერეს, მუნერ გრაფიკ მიღუდ. მანგარო დუვაფას თიშ ყურადღება“. მუჟამსით უხუცესეფ რეგურალურო გიმურთუნა დროს ქრისტიან დალეფწკუმა დორაგადაფას, თეშნერო ოძირანა, ნამდა ზრუნენა თინეფშე. *  ანეტ, ნამუთ ჟიშე მიფშინეთ, აღნიშნენს, უხუცესეფწკუმა რეგურალურო დორაგადაფაშ ართ-ართ ჯგირ მხარეს. თინა იჩიებ: „უჯგუშო გეფჩინებაფე თინეფ დო თინეფქ ხოლო ბრელ მუდგარენ ქიგეგეს ჩქიმ გურშენ. ათეშენ რთულ სიტუაციეფიშ დროს, ვამჭირს, თინეფს ელარნა ფთხუე“.

10. მუს მოუღ ხიოლ ქრისტიან დალეფშა?

¹⁰ არძას, მუჭოთ ქომოლკათას თეშ ოსურკათას, მოხიოლნა, მუჟამსით შხვეფ ორწყენა ჩქინ უნარეფს დო მირაგადნა, ნამდა მანგარო აფასენა ჩქინ შრომას. მარა, მუჟამსით ჩქინ უნარეფს დო კეთებულ საქმეს ვარწყენა, თენა გურს მიტახნა. ართ დაუქორწინებელ პიონერ და, აბიგაილ, აღნიშნენს: „ირკოჩ მიჩინენს, მუჭოთ ათე დო ათეშ და ვარდა ათე დო ათეშ სქუა. მინშა ფიფქრენქ, ნამდა მა მითინ ვა მორწყე“. მარა დეკვირით, მუს იჩიებ ართ დაუქორწინებელ და, პამი. თინა ბრელ წანას მისიონერო მსახურენდჷ. უმოს გვიანო, თიქ ჸუდეშა დირთჷ, ნამდა მუშ მშობლეფს მიკულუკო. პამი უკვე 70 წანას რე გინოჩილათირ დო ასე ხოლო პიონერო მსახურენს. პამი იჩიებ: „არძაშ უმოსო თინა მოხვარ, მუჟამსით შხვეფ მირაგადნა, ნამდა მანგარო მაფასენა“.

11. მუჭო ოძირუ იესოქ, ნამდა აფასენდჷ თი ელარნას, ნამდგას ღორონთიშმოშიშ ოსურკათაშე ღებულენდჷ?

¹¹ იესო აფასენდჷ თი ელარნას, ნამდგას ღორონთიშმოშიშ ოსურკათაშე ღებულენდჷ, მით თის „მუნეფიშ ქონებათ ომსახურდეს“ (ლუკ. 8:1—3). იესოქ თეშ პატი მეჩჷ თინეფს დო ხვალე თენა ვარინ, მნიშვნელოვან ჭეშმარიტებას ხოლო ოგურუანდჷ თე ოსურკათას. მაგალთო, თინეფს უწუ, ნამდა დოღურუდ დო გეთელებუდ (ლუკ. 24:5—8). იესოქ, მუშ მოწაფეეფცალო, თე ოსურკათა ხოლო მამზად თი განსაცდელეფშო, ნამდგას მომავალს შეხვადუდეს (მარ. 9:30—32; 10:32—34). თიქ ხოლო ოკო ქირაგადუას, ნამდა იესოშ ჭოფუაშ დროს მოწაფეეფქ ინტეს, მარა ნამთინე ოსურკათა, იესოშ ხოლოს რდუ, მუჟამსით თინა წამებაშ ბოძის ღურუდ (მათ. 26:56; მარ. 15:40, 41).

12. მუ მნიშვნელოვან საქმე მიანდჷ იესოქ ოსურკათას?

¹² იესოქ ოსურკათას მნიშვნელოვან საქმე მიანდჷ. მაგალთო, იესოშ გათელებაშ პირველ მოწმეეფ ღორონთიშმოშიშ ოსურკათა რდეს. თიქ დავალ თინეფს, ნამდა მოციქულეფშა ქუთქუალდესკო თიშ გათელებაშ ამბე (მათ. 28:5, 9, 10). ახ. წ. 33 წანაშ ჟარნეჩდომავითა დღაშ დღახუს, მუჟამსით მოწაფეეფშა წმინდა შურქ გინორთჷ, შილებე თინეფ შქას ოსურკათა ხოლო ჸოფედესკო. თენა თაშ ქორდ-და, შილებე თინეფქ ხოლო მიღესკო შხვადოშხვა ნინაშა რაგადიშ სასწაულებრივ ძღვინ დო შხვეფს ეჩუესკო „ღორონთიშ დიდებულ საქმეეფიშ გურშენ“ (საქ. 1:14; 2:2—4, 11).

13. მუ საქმეეფს ღებულენა მონაწილებას ქრისტიან დალეფ დო მუჭო შემლებნა, მარდულობა გეგმოფხანტათ თი ირფელშო, მუდგას ორთნა?

¹³ ჩქინ დალეფ ცქვაფას იმსახურენა თი ირფელშო, მუდგას იეჰოვაშ მსახურებას ორთნა. თეშა მიშურს თეოკრატიულ შენობეფიშ შენება დო მიკოლუაფა, უცხოენოვან ჯგუფეფიშ მოხვარა დო ბეთელს მოხალისეთ მსახურება. თინეფ მონაწილებას ღებულენა სტიქიურ უბედრობეფით დაზარალებურეფიშ მოხვარაშ საქმეს დო ჩქინ პუბლიკაციეფიშ თარგმნუას, თინეფ მსახურენა პიონერეფო დო მისიონერეფო. ჯიმალეფცალო, დალეფ ხოლო მიკმულა პიონერულ მსახურებაშ სკოლას, სამეფოშ მახარობელეფიშ სკოლას დო სკოლა „გალაადის“. თეს გეძინელ, დაქორწინებულ დალეფ მუნეფიშ მეუღლეეფს ოხვარნა თი რთულ პასუხიშმგებლობეფიშ შესრულებას, ნამუთ კრებას დო ორგანიზაციას უღნა. თე პასუხიშმგებელ ჯიმალეფს ვეშიალებედეს სრულას შეასრულესკო მუნეფიშ როლ, მეუღლეეფ ხუჯის ვა უკინენდანინ (ეფეს. 4:8). დეფიქრით, მუჭო შეილებნა მეხვარათ დალეფს, შეასრულან მუნეფიშ საქმე?

14. ფსალმუნიშ 68:11-იშ თანახმას, მუს ოცადნა გონიერ უხუცესეფ?

 ¹⁴ გონიერ უხუცესეფს არჩქილენა, ნამდა დალეფ „ოსურკათაშ დიდ ლაშქარ“ რენა, მით ხიოლით ასრულენა მუნეფიშ საქმეს დო თინეფ შქას ბრელ ეფექტურო ქადაგენს სახიოლო ამბეს (წეკითხით ფსალმუნიშ 68:11). ათეშენ უხუცესეფ ოცადნა, გეგმირინუან თინეფიშ გამოცდილება. აბიგაილ, ნამუთ ჟიშე მიფშინეთ, მანგარო აფასენს, მუჟამსით ჯიმალეფ ელაკითხანა, ხალხწკუმა რაგადიშ წუმოჭყაფაშ ნამ მეთოდ რე უმოს ეფექტურ თინეფიშ ტერიტორიას. აბიგაილ იჩიებ: „თენა მოხვარ თიშ ძირაფას, ნამდა იეჰოვა მნიშვნელოვან ადგილს მარზენს მუშ ორგანიზაციას“. თეს გეძინელ, უხუცესეფს არჩქილენა, ნამდა ართგურ, მოწიფულ ქრისტიან დალეფს ჯგირო გიშალენა თი ახალგაზრდა დალეფიშ მოხვარა, მიდგას სირთულეეფ უღნა (ტიტ. 2:3—5). ნამდვილო, ჩქინ დალეფ იმსახურენა, დუვაფასათ თინეფ!

15. მუჟამ შილებე ქრისტიან დალეფს დაცვება დო ელარნაქ დესაჭირან?

¹⁵ მინშა ქრისტიან დალეფს შილებე ოსაჭირდან თიცალ მიდგარენ, მით დეცვენს დო მეხვარებ გარკვეულ სირთულეეფიშ დროს (ეს. 1:17). მაგალთო, ქომონჯღურელ ვარდა განქორწინებულ დას შილებე ოსაჭირდას ელარნა დო თი საქვარეფიშ კეთებას მოხვარა, მუდგას აიშახ მუშ მეუღლე ორთუდ. ხანშამიშულირ დას შილებე ოსაჭირ მოხვარა ექიმეფწკუმა დორაგადაფას. ვარდა პიონერ დას, ნამუთ თეოკრატიულ პროექტეფს ღებულენს მონაწილებას, შილებე ოსაჭირ მიდგაინ, მით დეცვენს თის, მუჟამსით შხვეფ აკრიტიკენა თიშენ, ნამდა შხვა პიონერეფცალო ხშირას ვა რე მსახურებას. ხოლო მუჭო შემლებნა, მივეხვარათ დალეფს? მორთ კინ იესოშ მაგალითის დუვართათ.

16. მუჭოთ მარკოზიშ 14:3—9-ს იძირე, მუჭო დეცვჷ იესოქ მარიამ?

¹⁶ მუჟამსით ქრისტიან დალეფს არასწორო აფასენდეს, იესო ხეთეშე იცვენდჷ თინეფს. მაგალთო, თიქ დეცვჷ მარიამ, მუჟამსით მართაქ გაკრიტიკ თინა (ლუკ. 10:38—42). იესოქ მარიამ მაჟიაშა ხოლო დეცვჷ, მუჟამსით შხვეფქ გაკრიტიკეს თინა, მუშენდა ფიქრენდეს, ნამდა არასწორო მიქცუ (წეკითხით მარკოზიშ 14:3—9). იესოქ ქინანჭჷ მარიამიშ მოტივს, ქაცქუ თის დო თქუ: „თიქ ჯგირ საქმე მიკეთ . . . თიქ თინა აკეთ, მუთ შეულებუდ“. იესოქ თინა ხოლო იწინასწარმეტყველ, ნამდა მარიამიშ საქციელს ქიმიშინუანდეს „მთელ ქიანას, სოდეთ სახიოლო ამბეს“ იქადაგენდეს დო თე სტატია ხოლო თეშ ართ-ართ მტკიცება რე. აღსანიშნავ რე თინა, ნამდა იესოქ ქადაგებაშ მასშტაბეფშე ჩიებაშ დროს, მარიამიშ ჯგირ საქციელ ხოლო მიშინუ. ალბათ, მუჭო ელუკინანდჷ გურშა მარიამს იესოშ სიტყვეფ, მუჟამსით უსამართლოთ მექცის!

17. ქიმიჸონით მაგალით, მუ სიტუაციას შილებე დაცვებელქ მაჸუან ქრისტიან დაქ.

¹⁷ ქიცვენთო ქრისტიან დალეფს თიმწკუმა, მუჟამსით თენა ოსაჭირნა? მაგალთო, დეფიქრით თეცალ სიტუაციაშე. ნამთინე მაუწყებელ ორწყე, ნამდა ართ და, ნამდგაშ ქომონჯ ვა რე იეჰოვაშ მოწმე, ხშირას იგვიანუანს კრებაშა დო ადრე მეურს. თეწკუმა ართო, თის იშვიათო მოჸუნს ბაღანეფ კრებაშა. ათეშენ თინეფ კითხულენა, მუშენ ვა უკინებ თე დას მტკიცე პოზიცია ურწმუნო ქომონჯწკუმა დო აკრიტიკენა თის. მარა სინამდვილეს თე და, მუთ შეულებუნ ირფელს ორთჷ. თინა ხვალე ვეგნოჭყვიდუნს მუშ გრაფიკის დო ვართ ხვალე ღებულენს გადაწყვეტილებეფს სქუალეფწკუმა დაკავშირებით. მუშ კეთება შეილებნა, მუჟამსით გებულენთ, ნამდა თე დას აკრიტიკენა? თე დას ქაცქვანთ დო შხვეფს ყურადღებას თიშ ჯგირ საქმეეფშა გეგნაღალაფუანთ-და, შილებე შხვეფს თიშ გურშენ გლახაშ ჩიება მიოტებაფუათ.

18. ხოლო მუჭო შემლებნა, მივეხვარათ ქრისტიან დალეფს?

¹⁸ მუჟამსით ქრისტიან დალეფს პრაქტიკულო  ვოხვარუთ, ვოძირანთ, ნამდა ბზრუნენთ თინეფშე (1 იოან. 3:18). ანეტი, ნამუთ დალახებურ დიდას ულუანდჷ, იჩიებ: „ნამთინე ჩქიმ მეგობარ მიშჷ, ნამდა დიაჩქიმიშ მიკოლუაფას ქიმმეხვარკო, ნამთინეს ოჭკუმალ მოუღუდ. თეშნერო ჸოროფას ბგინაფლენდჷ დო ვორწყედ, ნამდა კრებაშ ნაწილ ვორდჷ“. ჯორდან, ნამდგას ართ ჯიმაქ მეხვარ, მანქანაშ მიკოლუაფა ქიდიგურუკო, იჩიებ: „სასიამოვნო რე, ნამდა ჩქიმ და დო ჯიმალეფ ზრუნენა ჩქიმ უსაფრთხოებაშე“.

19. მუჭო შეულებნა უხუცესეფს, მეხვარან ქრისტიან დალეფს?

¹⁹ უხუცესეფ ხოლო ოცადნა, ნამდა იზრუნან ქრისტიან დალეფიშ საჭიროებეფშო. თინეფს უჩქნა, ნამდა იეჰოვაშო მნიშვნელოვან რე, მუჭო ვოქცუთ დალეფს (იაკ. 1:27). ათეშენ, უხუცესეფ მეჸუნა იესოშ მაგალითის დო გონიერებას გიმირჩქინანა, ვადგინენა წესეფს, მუჟამსით თენა შეიოლებერ რე (მათ. 15:22—28). უხუცესეფ, მით ინიციატივას გიმირჩქინანა დო ოხვარნა ქრისტიან დალეფს, ოგინაფუანა, ნამდა ზრუნენა თინეფშო. მუჟამსით კიაშ ჯგუფიშ ზედამხედველქ ქიგეგ, ნამდა თინა შხვა ჸუდეშა გინიშ ოცხოვრებშა, ხეთეშე დაგეგმჷ, ნამდა თე დას ქიმეხვარესკო. კია იშინანს: „თეშნერო ნაკლებ სტრესიქ მაჸუ გინაღალარქ. გურიშემაკინალ სიტყვეფით დო პრაქტიკულ ელარნათ, უხუცესეფქ ქუმოძირეს, ნამდა კრებაშო მნიშვნელოვან ვორექ დო ხვალე ვა ვორექ რთულ სიტუაციეფიშ დროს“.

20, 21. მუჭო შემლებნა ვოძირათ, ნამდა ვაფასენთ არძა ქრისტიან დას?

²⁰ ჩქი კრებეფს პჸუნა ქიანაშ მშრომელ ქრისტიან და, მით იმსახურენს ჩქინდე ელარნას. მუჭოთ იესოშ მაგალითშე გებგით, ჩქი შემლებნა მივეხვარათ თინეფს თით, ნამდა დრო გეგმურთათ დო უჯგუშო გეფჩინებაფუათ. თეს გეძინელ, შემლებნა დუვაფასათ ირფელ, მუდგას თინეფ ღორონთიშ მსახურებას ორთნა. თეწკუმა ართო, შემლებნა დეფცვათ თინეფ, მუჟამსით თენა ოსაჭირნა.

²¹ რომაელეფშა მეჭარილ წერილიშ ბოლოს, პავლექ სახელეფით მიშინუ ჩხორო ქრისტიან ოსურკოჩ (რომ. 16:1, 3, 6, 12, 13, 15). მუშო ოკო რაგად, თე ოსურკათას გურშა ელუკინანდჷ, მუჟამსით პავლექ მიკითხჷ დო ქაცქუ თინეფს. მორთ ჩქი ხოლო ქიმვეხვარათ დალეფს ჩქინ კრებას. თეშნერო ვოძირანთ, ნამდა ვაფასენთ თინეფს, მუჭოთ ჩქინ სულიერ ოჯახიშ ნაწილს.