ᲝᲒᲣᲠᲐᲤᲐᲚ ᲡᲢᲐᲢᲘᲐ 40
„ბრელიშ სიმართლეშახ მიმაჸუნაფალეფ“
„ბრელიშ სიმართლეშახ მიმაჸუნაფალეფ მურიცხეფცალო გოსინთანა სადღამუშოთ, მარადიულო“ (ᲓᲐᲜ. 12:3).
ᲝᲑᲘᲠᲔᲨᲘ 151 ღორონთ დიძახენს
ᲨᲘᲜᲐᲐᲠᲡ *
1. მუ სარკო მოვლენეფ მელნა ქრისტეშ 1 000 წანიან მართველობაშ პერიოდის?
ᲛᲣ ᲓᲘᲓᲔᲑᲣᲚ დრო იჸუაფ, მუჟამსით დედამიწას ქრისტეშ 1 000 წანიან მეფობაშ პერიოდის ღურელეფიშ გათელება ქიდიჭყაფუ! არძა, მიდგას საჸოროფო ადამიანეფ აფჷ ღურელ, კინ ქოძირუნს თინეფს. იეჰოვა ხოლო მთელ გურით ელჷ თე დროს (იობ. 14:15). წერმიდგინით, მუშმადიდა ხიოლ იჸუაფ მთელ დედამიწას, მუჟამსით მონატრებულ ადამიანეფ ართმაჟიას ქეშეხვადნა. მუჭოთ წოხოლენ სტატიაშე ბძირით, „მართალეფ“, მიდგაშ სახელეფ ინოჭარ სიცოცხლეშ წიგნის, გეთელებნა „სიცოცხლეშ მიოღებელო“ (საქ. 24:15; იოან. 5:29). შილებე თინეფწკუმა ართო ბრელ ჩქინ საჸოროფო ადამიანქ არმაგედონიშ უკულ ხეთეშე გეთელას. * თეს გეძინელ, „უმართლოეფ“, მუნერეფით რენა თინეფ, მიდგას ღურაშახ ვა უღდეს დასაბაღ საშვალება, გეჩინებაფესკო იეჰოვა ვარდა ემსახურესკო თის, გეთელებნა „გასასამართლებერო“.
2, 3. ა) მუჭოთ ესაიაშ 11:9, 10-შე იძირე, მუს დიგურუანა დიდებულ საგანმანათლებლო პროგრამაშ დროს დო მუშენ? ბ) მუ იჸუაფ გარჩიებულ თე სტატიას?
2 არძა გათელებურქ ოკო დიგურუას (ეს. 26:9; 61:11). ათეშ გურშენ, საჭირო იჸუაფ, არძაშ უმოს დიდ საგანმანათლებლო პროგრამა, მუნერით ისტორიას ვა შჷ (წეკითხით ესაიაშ 11:9, 10). მუშენ იჸუაფ თენა საჭირო? ართ მიზეზ თინა რე, ნამდა გათელებურ „უმართლოეფქ“ ოკო დიგურუან იესო ქრისტეშ, სამეფო მართველობაშ, გიშაჸიდირალიშ დო თიშ გურშენ, მუსხით მნიშვნელოვან რე იეჰოვაშ სახელ დო თიშ უზენაესობა. თეს გეძინელ, გათელებურ „მართალეფქ“ ოკო ქიგეგან, მუჭო უცხადენდჷ იეჰოვა მუშ ხალხის ჭიე-ჭიეთ დედამიწაწკუმა დაკავშირებით მუშ განზრახვას. იეჰოვაშ ბრელ მსახურქ მთლიან ბიბლიაშ ჭარუაშახ ბრელ ხანით ადრე ღურჷ. თაშ ნამდა, უმართლოეფს დო მართალეფს ბრელ აჸინა დაგურაფალ.
3 თე სტატიას გუვარჩიენთ კითხვეფს: მუჭო შისრულებ თე დიდებულ საგანმანათლებლო პროგრამა? მუჭო იმოქმედენს თენა სიცოცხლეშ წიგნის სახელეფიშ სამუდამოთ ენოჭარუაშა? თე კითხვეფიშ პასუხეფ ამდღა ჩქინო მნიშვნელოვან რე. მუჭოთ ბძირუნთ, ნამთინე სარკო წინასწარმეტყველება, ნამუთ დანიელიშ დო გამოცხადებაშ წიგნეფს რე ენოჭარილ, მიმეხვარებნა, უჯგუშო ქიგებგათ, მუ მოხვადუ ღურელეფიშ გათელებაშ დროს. მორთ პირველ რიგის გუვარჩუათ დანიელიშ 12:1, 2-ს ნაწინასწარმეტყველებ სარკო მოვლენეფ.
„ᲛᲘᲓᲒᲐᲡ ᲓᲘᲮᲐᲨ ᲒᲣᲠᲡ ᲚᲣᲠᲡ, ᲒᲝᲙᲣᲠᲪᲮᲣ“
4, 5. მუს ბგებულენთ დანიელიშ 12:1-შე აღსასრულიშ გურშენ?
4 წეკითხით დანიელიშ 12:1. დანიელიშ წიგნ ართიანიშ მეჸუნელო ეჭარუნს მოვლენეფს, ნამუთ აღსასრულიშ დროს მოხვადუ. მაგალთო, დანიელიშ 12:1-ს ბკითხულენთ, ნამდა მიქაელ, ნამუთ იესო ქრისტე რე, „[ღორონთიშ] ხალხიშ გვერდით გერე“. წინასწარმეტყველებაშ თე ნაწილიშ შესრულებაქ 1914 წანას დიჭყჷ, მუჟამსით იესოქ ღორონთიშ ზეციერ სამეფოშ მეფეთ გინირთჷ.
5 მარა დანიელ თის ხოლო იჩიებ, ნამდა იესო „მოქმედებას ქიდიჭყანს“ თიმწკუმა, მუჟამსით „თიცალ გასაჭირ იჸუაფ, მუნერით ვა ჸოფე ერიშ გოჭყაფაშ დროშე თი დროშახ“. თაქ მოშინაფილ გასაჭირ ნიშნენს „დიდ გასაჭირს“, ნამდგაშ გურშენ მათეშ 24:21-ის ჭარჷ. იესო მოქმედებას გასაჭირიშ ბოლოს, არმაგედონიშ დროს, ქიდიჭყანს ღორონთიშ ხალხიშ დაცვებელო. თინეფს გამოცხადებაშ წიგნ მიშინუანს, მუჭოთ ანაყუ ხალხის, მიდგაქ „დიდ გასაჭირ მიკორთეს“ (გამოცხ. 7:9, 14).
6. მუ მოხვადუ თიშ უკულ, მუთ ანაყუ ხალხ გეგნიღანს დიდ გასაჭირს? გენწყით. (თეს გეძინელ, თე ჟურნალს ქოძირით „კითხვა დო პასუხ“, ნამუთ დედამიწას ღურელეფიშ გათელებას ოხუ).
6 წეკითხით დანიელიშ 12:2. მუ მოხვადუ თიშ უკულ, მუთ ანაყუ ხალხ გეგნიღანს გასაჭირს? თე წინასწარმეტყველება ვეჩიებ, ბოლო დღალეფიშ პერიოდის სიმბოლურ გათელებაშ, ღორონთიშ მსახურეფიშ სულიერ გიშაცოცხალებაშ, გურშენ, მუჭოთ ადრე მიმორჩქუდეს. * სინამდვილეს თაქ თი გათელებაშ გურშენ მეურს ჩიება, ნამუთ ახალ ქვეყნიერებას მოხვადუ. მუშენ მიმორჩქნა თაშ? სიტყვა „დიხა“ გიმორნაფილ რე იობიშ 17:16-ის ხოლო დო იგივე მნიშვნელობა უღჷ, მუთ სიტყვას „სამარე“. თავრეშე იძირე, ნამდა დანიელიშ 12:2-ს ჩიება მეურს პირდაპირ გაგებათ გათელებაშ გურშენ, ნამუთ მოხვადუ არმაგედონიშ ომიშ უკულ.
7. ა) მუ გაგებათ გეთელებ ნამთინე „მარადიულ სიცოცხლეშო“? ბ) მუშენ რე თენა „უჯგუშ გათელება“?
7 მუს ნიშნენს დანიელიშ 12:2-ს მოშინაფილ სიტყვეფ, ნამდა ნამთინე გეთელებ „მარადიულ სიცოცხლეშო“? თი გათელებურეფ, მით ქიდიჭყანა ვარდა გაგრძელენა იეჰოვაშ დო იესოშ გაჩინებაფას დო დემორჩილებნა თინეფს 1 000 წანაშ დინახალე, საბოლათ მიღენა მარადიულ სიცოცხლეს (იოან. 17:3). თენა ულირს მოხვალამირ გათელებეფიშ გინაწონს, „უჯგუშ გათელება“ იჸუაფ (ებრ. 11:35). მუშენ იფჩიებუთ თეს? ულირს გათელებურ არასრულყოფილ ადამიანეფქ კინ დოღურეს.
8. მუჭო გეთელებ ნამთინე „შეურაცხყოფაშო დო მარადიულ გოჯოგაფაშო“?
8 მარა არძა გათელებურ ვემიაჸუნუ იეჰოვაშ საგანმანათლებლო პროგრამას. დანიელიშ წინასწარმეტყველება იჩიებ, ნამდა ნამთინე გეთელებუ „შეურაცხყოფაშო დო მარადიულ გოჯოგაფაშო“. დაუმორჩილებლობაშ გურშენ თინეფიშ სახელეფ ვენიჭარუ სიცოცხლეშ წიგნის დო მარადიულ სიცოცხლეს ვარინ, „მარადიულ გოჯოგაფას“ დო განადგურებას მიღენა. თაშ ნამდა, დანიელიშ 12:2 იჩიებ, მუს მიღენს საბოლათ არძა გათელებურ, მუთ დამოკიდებულ იჸუაფ გათელებაშ უკულ თინეფიშ მოქმედებაშა * (გამოცხ. 20:12). ნამთინე მიღენს მარადიულ სიცოცხლეს დო ნამთინე — ვარ.
„ᲑᲠᲔᲚᲘᲨ ᲡᲘᲛᲐᲠᲗᲚᲔᲨᲐᲮ ᲛᲘᲛᲐᲸᲣᲜᲐᲤᲐᲚᲔᲤ“
9, 10. ხოლო მუ მოხვადუ დიდ გასაჭირიშ უკულ დო მი რენა თინეფ, მით „ცაშ სინთეცალო გოსინთანა“?
9 წეკითხით დანიელიშ 12:3. ხოლო მუ მოხვადუ „გასაჭირიშ“ უკულ? მასმა მუხლშე ხოლო შხვა მუდგარენს ბგებულენთ თიშ გურშენ, მუდგაქ დიდ გასაჭირიშ უკულ ოკო მოხვადას.
10 მი რენა თინეფ, მით „ცაშ სინთეცალო გოსინთანა“? თეშ გაგებას მოხვარნა იესოშ სიტყვეფ, ნამუთ ენოჭარილ რე მათეშ 13:43-ს: „თი დროს მართალეფ მუნეფიშ მუმაშ სამეფოს ჩხანაცალო გოსინთანა“. თე კონტექსტის იესო იჩიებ „სამეფოშ ქომოლსქუალეფიშ“ — ცხებულ ჯიმალეფიშ — გურშენ, მით მუწკუმა ართო იმსახურენა ზეციერ სამეფოს (მათ. 13:38). თაშ ნამდა, დანიელიშ 12:3-ს ოკო იგულისხმებდას ცხებულეფ დო თი საქმე, მუდგას თინეფ ანთას წანაშ დინახალე გაკეთენა.
144 000 მანგარ ხოლოს ითანამშრომლენს იესო ქრისტეწკუმა, ნამდა ქუხემძღვანელან საგანმანათლებლო საქმეს, ნამუთ 1 000 წანაშ დინახალე იჸუაფ (ქოძირით აბზაც 11)
11, 12. მუ საქმეს შეასრულენს 144 000 ანთას წანაშ დინახალე?
11 მუჭო იჸუაფნა ცხებულეფ „ბრელიშ სიმართლეშახ მიმაჸუნაფალეფ“? ცხებულეფ მანგარ ხოლოს ითანამშრომლენა იესო ქრისტეწკუმა, ნამდა უხემძღვანელან თი საგანმანათლებლო პროგრამას, ნამუთ ანთას წანაშ დინახალე დედამიწას იჸუაფ. 144 000 ვეჸუაფ ხვალე მეფე, თინეფ მღვდელეფ ხოლო იჸუაფნა (გამოცხ. 1:6; 5:10; 20:6). იესოშ თანამართველეფ ქიმეხვარებნა ხალხის სქილიდაფას — ჭიე-ჭიეთ სრულყოფილებაშ დორთინაფას (გამოცხ. 22:1, 2; ეზეკ. 47:12). თენა ცხებულეფს მანგარ დიდ ხიოლს ქუმუღანს.
12 მი იჸუაფ თი „ბრელ“ შქას, მიდგას სიმართლეშახ მიჸუნანა? თინეფ შქას იჸუაფნა გათელებურეფ, არმაგედონ გინოღალირეფ დო თი ბაღანეფ, მიდგაქ შილებე ახალ ქვეყნიერებას ერჩქინდას. 1 000 წანაშ ბოლოს დედამიწაშ არძა მახორუ სრულყოფილ იჸუაფ. მუჟამ ენიჭარუაფ თინეფიშ სახელეფ სიცოცხლეშ წიგნის სამუდამოთ, თაშ ქოფთქუათინ, პასტათ დო ვართ ხოლო ფანქარით?
ᲡᲐᲑᲝᲚᲐ ᲒᲐᲛᲝᲪᲓᲐ
13, 14. მუ ოკო დამტკიცან დედამიწას მახორუ სრულყოფილ ადამიანეფქ, ნამდა მარადიულ სიცოცხლე მიღან?
13 ჩქი ოკო ფშუდან, ნამდა სრულყოფილება ვა ნიშნენს მარადიულ სიცოცხლეშ ავტომატურო მეღებას. დეფიფქრათ ადამ დო ევაშე. თინეფ სრულყოფილეფ რდეს, მარა იეჰოვაშ მორჩილება ოკო გეგმირჩქინესკო მარადიულ სიცოცხლეშ მიოღებელო. სანარღოთ, თინეფქ ვა დემორჩილეს ღორონთის (რომ. 5:12).
14 მუ მდგომარეობა აღვენუნა დედამიწაშ მახორუეფს ანთას წანაშ ბოლოს? თინეფ ქიმიოჭირინუანა სრულყოფილებას. არძა სრულყოფილ ადამიან ირიათო სრულას ქუდუკინენსო ხუჯის იეჰოვაშ მართველობას დოვარ ნამთინე, ადამ დო ევაცალო, სრულყოფილებაშ უმკუჯინუო, ოჭიშის ქურთინუანს ღორონთის? თე კითხვას ოკო ქუპასუხათ, მარა მუჭო?
15, 16. ა) მუჟამ მიაჩამუ არძა ადამიანს თიშ საშვალება, დუმტკიცას იეჰოვას მარდულობა? ბ) მუ საბოლა შედეგ მაჸუნუ თე გამოცდას?
15 სატანა ანთას წანაშ დინახალე ხვილირ იჸუაფ დო ვეშიალებე მითინ შეცდომაშა გემშეჸუნას. მარა ანთას წანაშ ბოლოს გეთავისფალებ დო მინდომენს, მიოჩილითუას სრულყოფილ ადამიანეფ. თე გამოცდაშ დროს დედამიწას არძა სრულყოფილ ადამიანს აღვენუ საშვალება, არგამათ ქაძირუას, ნამ მხარეს გერე, ქუკინენს დო ვარ ხუჯის ღორონთიშ სახელს დო უზენაესობას (გამოცხ. 20:7—10). სატანაშ მოქმედებაშ მიმართ თითოულიშ დამოკიდებულებათ გეგნოჭყორდუ, ქენიჭარას დო ვარ თინეფიშ სახელეფქ სიცოცხლეშ წიგნის სამუდამოთ.
16 ბიბლია მირაგადნა, ნამდა ნამთინე, მიდგაშ რაოდენობა ვამჩქუნა, ვარიას ქოთქუანს იეჰოვაშ მართველობაშე. მუ ელნა თინეფს? გამოცხადებაშ 20:15-ის ჭარჷ: „დაჩხირიშ ტბაშა თინეფქ ხოლო იჸუეს ინორღვაფილქ, მით სიცოცხლეშ წიგნის ვა რდჷ ენოჭარილ“. თე აბუნტებულეფ სამუდამოთ გენადგურებნა, მარა სრულყოფილ ადამიანეფიშ უმენტაშ ჩაბარენს საბოლა გამოცდას. თინეფიშ სახელეფ სამუდამოთ ქენიჭარუ სიცოცხლეშ წიგნის.
„ᲑᲝᲚᲝ ᲓᲠᲝᲨ“ ᲓᲘᲜᲐᲮᲐᲚᲔ
17. მუ უწუეს დანიელს, მუდგაქ ჩქინ დროს ოკო მოხვადკო? (დან. 12:4, 8—10)
17 მართალო სარკო მოვლენეფ მელნა წოხოლე! დანიელქ ხოლო მირჩქილუ მუსხირენ მნიშვნელოვან ინფორმაცია ანგელოზშე, ნამუთ ოხუ ჩქინ დროს, „ბოლო დროს“ (წეკითხით დანიელიშ 12:4, 8—10; 2 ტიმ. 3:1—5). ანგელოზიქ უწუ დანიელს: „ქიმიძინანს ჭეშმარიტ რჩქინა“. დანიელიშ წიგნის მოჩამილ წინასწარმეტყველურ სიტყვეფს ღორონთიშ ხალხ უმოს სრულას ქინანჭუდ. ანგელოზიქ გეუძინ, ნამდა ბოლო დღალეფს „უბადოეფ კინ უბადოთ [მიქციებდეს]; ნამთინ უბადო [ვენანჭუდ] თე სიტყვეფს“.
18. მუ აღოლენა მალას უბადოეფს?
18 ამდღარ გინაჯინუშე თეშ იძირე, ნამდა უბადოეფს მუნეფიშ უბადო საქციელიშ გურშენ პასუხ ვემეთხიებნა (მალ. 3:14, 15). მარა მალას იესო გასამართლენს „თხაცალ“ ადამიანეფს დო გეგშართუნს თინეფს „შხურცალ“ ხალხშე (მათ. 25:31—33). თე უბადოეფ ვეგნასქიდნა „დიდ გასაჭირს“ დო ვართ ახალ ქვეყნიერებას გეთელებნა. თინეფიშ სახელეფ ვეჸუაფ ენოჭარილ მალაქიაშ 3:16-ის მოშინაფილ „გასაშინე წიგნის“.
19. მუ ოკო ვაკეთათ ასე დო მუშენ? (მალ. 3:16—18)
19 ასე ზუსტას თიშ დამტკიცებაშ დრო რე, ნამდა ვა ვორეთ უბადოეფ შქას (წეკითხით მალაქიაშ 3:16—18). იეჰოვა აკოშაყარანს თინეფს, მიდგას მუშ „საკუთრებათ“ მირჩქინანს, მით ძვირფასეფ რენა მუშ თოლს. მუშო ოკო რაგად, მოკონა, თინეფ შქას ვორდათ.
მუ სახიოლო იჸუაფ თიშ ძირაფა, მუჭო მიღენა დანიელ, ჩქინ საჸოროფო ადამიანეფ დო შხვა ბრელ გათელებურ მუნეფიშ წილს ახალ ქვეყნიერებას (ქოძირით აბზაც 20)
20. ბოლოს მუ დუნაპირებ მიღჷ დანიელქ დო მუშენ ელუთ თე დუნაპირებუშ შესრულებას?
20 მართალო მანგარ საინტერესო დროს ფცხოვრენთ, მარა მალას უმოს საინტერესო მოვლენეფ ქუმოხვადუ. ქობძირუნთ, მუჭო გენადგურებ არძა უბადო დო თეშ უკულ მუჭო შისრულებ იეჰოვაშ დუნაპირებ, ნამუთ დანიელს უწუ: „გეთელებუქ დღალეფიშ ბოლოს სქან წილიშ მიოღებელო“ (დან. 12:13). ქელუთო თი დროს, მუჟამსით დანიელ დო თქვან საჸოროფო ადამიანეფ გეთელებნა? თაშ ქორენ-და, ირფელ გაკეთით ამდღა ღორონთშა ართგურობაშ დამტკიცებელო. თეშ შედეგო, შეგალებენა დარწმუნებულ რდათ, ნამდა თქვან სახელეფ ვეშელასუ იეჰოვაშ სიცოცხლეშ წიგნშე.
ᲝᲑᲘᲠᲔᲨᲘ 80 „ქოძირით, მუ ჯგირ რე იეჰოვა“
^ თე სტატიას გუვარჩიენთ ახალ გაგებას დიდებულ საგანმანათლებლო პროგრამაშ გურშენ, ნამუთ დანიელიშ 12:2, 3-ს რე ეჭარილ. გუვარჩიენთ, მუჟამ ჩეტარებ თინა დო მი მიღენს მონაწილებას. თეწკუმა ართო, თის ხოლო ქიგებგენთ, მუჭო მამზადენს თე საგანმანათლებლო პროგრამა დედამიწას მახორუ ხალხის საბოლა გამოცდაშო, ნამუთ ქრისტეშ 1 000 წანიან მართველობაშ ბოლოს იჸუაფ.
^ გათელებაქ შილებე დიჭყას თინეფშე, მით ბოლო დღალეფს ღურაშახ ართგურეფ რდეს. უკულ თინეფიშ წოხოლეიან ნაღურეფუეფქ გეთელან დო თაშ გეგრძელას თაობაშე თაობაშახ. თაშ ქუმოხვად-და, თითოულ თაობას აღვენუ საშვალება, ქუდოხვადან თინეფქ, მიდგას პირადო იჩინენდეს. მუდგანერო ვა რდასინ, ბიბლია ზეციერ გათელებაშ გურშენ იჩიებ, ნამდა თინა მუშ „წეს დო რიგით“ იჸუაფ, ათეშენ შემლებნა ბჯერდან, მიწიერ გათელება ხოლო თაშ მოხვადუ (1 კორ. 14:33; 15:23).
^ თე ენწყუმათ დითირ ჩქინ ჯვეშ გაგებაქ, ნამუთ მოჩამილ რე წიგნის „ქიგეგონეთ დანიელიშ წინასწარმეტყველება!“, დუდ 17 [ქორთ.] დო 1987 წანაშ 1 კვირკვეშ „გინაჯინალ კოშკის“, გვ. 17—21 [რუს.].
^ საქმეეფიშ 24:15-ის, სოდეთ მოშინაფილ რენა „მართალეფ“ დო „უმართლოეფ“, დო იოანეშ 5:29-ს, სოდეთ მოშინაფილ რენა თინეფ, მით „ჯგირს ორთუდ“ დო მით „გლახას ორთუდ“, ჩიება მეურს გათელებურეფიშ საქმეეფიშ გურშენ, ნამდგას ღურაშახ ორთუდეს.
