ქობძირათ მუჭო პასუხენს ბიბლია თე კითხვას.

საქმეეფიშ 24:15 მირაგადნა, ნამდა „იჸუაფ ღურელეფიშ გათელება, ქოთ მართალეფიშ დო ქოთ უმართლოეფიშ“. „მართალეფ“ თინეფ რენა, მით ღურაშახ ომორჩილდეს ღორონთის. ათეშენ თინეფიშ სახელეფ ენოჭარილ რე „სიცოცხლეშ წიგნის“ (მალ. 3:16). „უმართლოეფშა“ მიშულა თინეფ, მიდგას დასაბაღ შესაძლებლობეფ ვა უღდეს, გეჩინებაფესკო იეჰოვა, ათეშენ თინეფიშ სახელეფ ვა რე ენოჭარილ „სიცოცხლეშ წიგნის“.

იოანეშ 5:28, 29-ს ხოლო თი ჟირ ჯგუფ რე მოშინაფილ, ნამდგაშ გურშენ საქმეეფიშ 24:15-ის ბკითხულენთ. იესოქ თქუ, ნამდა თინეფ, „მით ჯგირს ორთუდ“ გეთელებნა „სიცოცხლეშ მიოღებელო“, დო თინეფ, „მით გლახას ორთუდ — გასასამართლებერო“. მართალეფ ღურაშახ ჯგირ საქმეეფს ორთუდეს დო სიცოცხლეშო გეთელებნა, მუშენდა თინეფიშ სახელეფ ენოჭარილ რე „სიცოცხლეშ წიგნის“. მარა უმართლოეფ ღურაშახ გლახა საქმეეფს ორთუდეს, ათეშენ თინეფ გასასამართლებერო გეთელებნა. მუშენდა თინეფიშ სახელეფ დიო ხოლო ვა რე ენოჭარილ „სიცოცხლეშ წიგნის“. თე დროშ დინახალე თინეფ გეგმიცადებნა. თე პერიოდის თინეფს მიაჩამნა იეჰოვაშ გაჩინებაფაშ დო თიშ საშვალება, ნამდა მუნეფიშ სახელეფქ ქენიჭარას წიგნის.

გამოცხადება 20:12, 13 ენწყუნს, ნამდა არძა გათელებურქ ოკო დემორჩილას „გრაგნილეფს“ ენოჭარილს. თენა იჸუაფ ახალ კანონეფ, ნამდგას იეჰოვა ახალ ქვეყნიერებას მუჩანა. მით თეს ვა დემორჩილებ, გენადგურებ (ეს. 65:20).

დანიელიშ 12:2-ს ნაწინასწარმეტყველებ რე, ნამდა ნამთინე, მიდგას ღურაშ ლურით ლურს, გეთელებ „მარადიულ სიცოცხლეშო დო ნამთინე — შეურაცხყოფაშო დო მარადიულ გოჯოგაფაშო“. თე მუხლ გათელებურეფიშ საბოლა გასამართლებაშენ იჩიებ. თინეფ მიღენა თე ჟირშე ართ-ართის: „მარადიულ სიცოცხლეს“ ვარდა „მარადიულ გოჯოგაფას“. თაშ ნამდა, 1 000 წანაშ ბოლოს გათელებურეფშე ნამთინე მიღენს მარადიულ სიცოცხლეს დო დანარჩენეფ სამუდამოთ გენადგურებნა (გამოცხ. 20:15; 21:3, 4).

დეფიქრით თეცალ მაგალითშე: გათელებურეფიშ თე ჟირ ჯგუფ შემლებნა შევადარათ თი უცხოელეფს, მიდგას შხვა ქიანას ცხოვრება ოკონა. მართალეფ რენა თინეფ, მიდგაქ მიღეს სამუშა ვიზა ვარდა თექიან ცხოვრებაშ უფლება, მუდგაშ გურშენ თინეფს გარკვეულ უფლებეფ დო თავისუფლება უღნა. თეშ გინაწონს, უმართლოეფ რენა თინეფ, მიდგას უღნა ტურისტულ ვარდა დროებით ცხოვრებაშ ვიზა. თინეფქ ოკო დამტკიცან, ნამდა იმსახურენა თე ახალ ქიანას ცხოვრებაშ უფლებას. თეშნერო, გათელებურ უმართლოეფქ ოკო მიაჸუნან იეჰოვაშ კანონეფს დო სამოთხეს ქუდოსქიდანინ, ოკო დამტკიცან, ნამდა რენა მართალეფ. ვა უღჷ მნიშვნელობა, უცხოელეფქ ნამ ვიზათ მიშართეს ახალ ქიანაშა, თინეფ საბოლათ ვარდა მოქალაქეობას მიღენა ვარდა დეპორტის. თენა გინოჭყორდუ თე ქიანაშ მიმართ თინეფიშ დამოკიდებულებაშ დო თექ თინეფიშ საქმიანობაშ მიხედვით. თეშნერო, არძა გათელებურ ახალ ქვეყნიერებას მუნეფიშ ართგურობაშ დო საქმეეფიშ მიხედვით გესამართლებ.

იეჰოვა ხვალე ჸოროფაშ ვარინ, სამართლიანობაშ ღორონთ ხოლო რე (კან. 32:4; ფსალმ. 33:5). თინა ჸოროფას თით გიმირჩქინანს, ნამდა გათელენს ქოთ მართალეფს დო ქოთ უმართლოეფს. თეწკუმა ართო, თითოულშე მითხინს, მიაჸუნან მუშ მაღალზნეობრივ ნორმეფს. ხვალე თინეფ გაგრძელენა ახალ ქვეყნიერებას ცხოვრებას, მით იჸოროფუანა ღორონთის დო მიაჸუნუნა თიშ ნორმეფს.