1. მუ რთულ პასუხიშმგებლობა მიღეს იეჰოაშიქ, უზიაქ დო იოშიაქ?

 ᲬᲔᲠᲛᲘᲓᲒᲘᲜᲘᲗ, ნამდა ბაღანობას ვარდა მოზარდობას ღორონთიშ ხალხიშ მეფეთ გიგორინუეს. მუჭო გიმირინუანდით თქვან ძალაუფლებას? ბიბლიას მოჩამილ რე მუსხირენ ახალგაზრდაშ შემთხვევა, მით იუდაშ მეფეთ გიორინეს. მაგალთო, იეჰოაშ გვალო 7 წანერ რდჷ, მუჟამსით მეფეთ გინირთჷ. უზია — 16 დო იოშია — 8. წერმიდგინით, მუშმადიდა პასუხიშმგებლობაქ მიაჩეს თინეფს. მუშო ოკო რაგად, ადვილ ვეჸუაფუდ თეცალ ჭიჭე ასაკის მეფეშ პასუხიშმგებლობეფიშ შესრულება, მარა თე ახალგაზრდეფ იეჰოვაშე დო შხვეფშე საჭირო მოხვარას ღებულენდეს, მუთ ოხვარუდ თინეფს, გიორჯგინესკო სირთულეეფს დო ჸოფედესკო წარმატებულ.

2. მუშენ ოკო დეფიფქრათ იეჰოაშიშ, უზიაშ დო იოშიაშ მაგალითეფშე?

² მართალ რე, ამდღა თეცალ პასუხიშმგებლობეფ ვა მიღნა, მარა ბიბლიას მოჩამილ თე სუმ პიროვნებაშე ბრელ მუდგარენიშ გურაფა შემლებნა. მუჟამსით მეფეეფ რდეს, თინეფქ მიღეს, მუჭოთ სწორ, თეშ არასწორ გადაწყვეტილებეფ ხოლო. თინეფიშ მაგალითეფშე ქობძირუნთ, მუშენ რე საჭირო, გიშებგორათ ჯგირ მეგობრეფ, ვა ვოდინუათ თანდაბლობა დო ბგორათ იეჰოვაშ ხემძღვანელობა.

3. მუჭო მეხვარ მღვდელმთავარ იეჰოიადაქ მეფე იეჰოაშის, მიღკო სწორ გადაწყვეტილებეფ?

³ დიგურეთ იეჰოაშიშ მეღებულ სწორ გადაწყვეტილებეფშე. მეფე იეჰოაშ გვალო ბაღანა რდჷ, მუჟამსით მუმაქ უღურ. თეშ უკულ, თის, ღორონთიშ ართგურ მღვდელმთავარ იეჰოიადა რდუნდჷ. თის იეჰოაშ სქუაცალო ჸუნდჷ, ბრელ მუდგარენს ოგურუანდჷ იეჰოვაშ გურშენ დო გიოწურუანდჷ. იეჰოაშ ირიათო მეჸუნდჷ იეჰოიადაშე მეღებულ რჩევეფს დო მითითებეფს. თიშო იეჰოიადა ღორონთიშ ართგურო მსახურებაშ ჯგირ მაგალით რდჷ, ათეშენ თიქ ბრძნულ გადაწყვეტილება მიღჷ დო გეგნოჭყვიდ, მუქ ხოლო ემსახურკო იეჰოვას დო ხალხის ხოლო ქიმეხვარკო თეშ კეთებას. თეს გეძინელ, იეჰოაშიქ ირფელ გაკეთ, ნამდა აღადგინკო იეჰოვაშ დიდებულ ტაძარ (2 მატ. 24:​1, 2, 4, 13, 14).

4. მუ ჯგირობუას მომღანა იეჰოვაშ მიმართ ჸოროფა დო თიშ მორჩილება? (იგავ. 2:1, 10—12).

 ⁴ ბაღანობას იეჰოვა ქოიჸოროფუეს დო თიშ ნორმეფით ცხოვრება ქუდგოგურეს-და, ძვირფას ძღვინ მეიღებნა (წეკითხით იგავეფიშ 2:1, 10—12). მშობლეფს მართალო ბრელ მუდგარენიშ დოგურაფა შეულებნა თქვანდა. მორთ გუვარჩუათ, მუჭო ოხვარუდ ართ დას, კატიას, მუამუშ სწორ გადაწყვეტილებაშ მეღებას. თის ირდღას სკოლაშა გილაჸუნდჷ კატია დო შარას ართო არჩიენდეს ირდღაშიან მუხლის. კატია იჩიებ: „თენა მოხვარუდ, გივორჯგინკო თი სირთულეეფს, ნამდგას სკოლას დღაშ დინახალე ფხვადუდ“. მინშა შილებე თეშ გაძირედან, ნამდა მითითებეფ, ნამდგას მშობლეფ ბიბლიაშე გარზენა, თავისუფლებას მიდმაიღანა. მუ მიგეხვარებნა, თე დროს ხოლო დემორჩილათ თინეფს? ართ და, ანასტასია, მირაგადნა, მუქ მეხვარ თეშ კეთებას. თინა იშინანს, ნამდა მშობლეფ დროს გიმურთუნდეს თიშ ენწყუმას, მუშენ ითხინდეს თიშე კონკრეტულ წესიშ მეჸუნას. ანასტასია იჩიებ: „თექ მიმეხვარ, ქიმეფხვადკო, ნამდა მშობლეფ, მუდგარენ წესიშ მეჸუნას თავისუფლება მიდამღესკონ თიშენ ვა ფთხინდეს, ვარინ თიშენ, ნამდა ვუჸორდჷ თინეფს დო ოკოდეს, თხილერ ვორდკო“.

5. მუს იგინანა თქვან მშობლეფ დო იეჰოვა, მუჟამსით გეგმირინუანთ ბიბლიურ რჩევეფს? (იგავ. 22:6; 23:15, 24, 25).

⁵ მუჟამსით გეგმირინუანთ თი რჩევეფს, ნამდგას მშობლეფ ბიბლიაშე გარზენა, თინეფიშ გურს გახარენთ დო მუთ არძაშ უმოს მნიშვნელოვან რე, გურს გუხარენთ თქვან ზეციერ მუმას იეჰოვას დო ხოლო უმოსო გამანგარენთ თიწკუმა მეგობრობას (წეკითხით იგავეფიშ 22:6; 23:15, 24, 25). თაშ ნამდა, მუჭოთ ბძირით, ახალგაზრდა იეჰოაშიშ მაგალითიშ მეჸუნა ჯგირობუას მოიღანა.

6. მუ აკეთ იეჰოაშიქ იეჰოიადაშ ღურაშ უკულ დო მუ მიღჷ შედეგო? (2 მატ. 24:​17, 18).

⁶ დიგურეთ იეჰოაშიშ მეღებულ არასწორ გადაწყვეტილებეფშე. იეჰოიადაშ ღურაშ უკულ იეჰოაშიქ გლახა საზოგადოებას ქაკათ (წეკითხით 2 მატიანეშ 24:17, 18). თიქ დემეგობრჷ დო ურჩქილედ იუდაშ მთავრეფს, მიდგას ვა უჸორდეს იეჰოვა. ალბათ თქვა ხოლო ფიქრენთ, ნამდა უჯგუშ იჸუაფუდ, იეჰოაშიქ დუდ შორს დეკინკო თინეფშე, მარა თაშ ვა მოხვალამე (იგავ. 1:10). თეშ მანგიორო, თინა ირფელს დოჸუნდჷ მუშ ითამ მეგობრეფს დო თი დონეშა ქიმერთჷ, ნამდა მუშ მამდასქუა, ზაქარია, დაჸვილაფუ, მით ოცადუდ, თინა სწორ შარას ქიგიორინუკო (2 მატ. 24:​20, 21; მათ. 23:35). წერმიდგინით, სოიშახ მერთჷ იეჰოაშიქ. დუდშე თინა იეჰოვაშ ართგურ მეფე რდჷ, მარა უკულ, სანარღოთ, განდგომილო დო კოჩიშ მაჸვილარო გინირთჷ დო ბოლოს მუშ მსახურეფქ დოჸვილეს (2 მატ. 24:​22—25). იეჰოაშის კინ იეჰოვაშა დო თიშ ართგურ მსახურეფშა ქუმურჩქილუაფუდკო, თიშ ცხოვრება გვალო შხვანერო მიდეშ. მუშ გურაფა შემლებნა თე შემთხვევაშე?

7. მი ოკო გიშებგორათ მეგობრეფო? (ქოძირით სურათ).

⁷ იეჰოაშიშ მეღებულ გლახა გადაწყვეტილებაშე, ართ-ართ, მუდგას ბგურაფლენთ თინა რე, ნამდა გიშებგორათ თიცალ მეგობრეფ, მით ჯგირო იმოქმედენა ჩქინდა. თიცალეფ, მიდგას უჸორა იეჰოვა დო ოკონა თიშ გურიშ გახარება. ვამკონა, მეგობრეფო ხვალე ჩქინ მახანეფ  პჸუნდან. ქიგიშინით, ნამდა იეჰოაშ ბრელით უკლაშ რდჷ მუშ მეგობარ იეჰოიადაშე. ჯგირ იჸუაფ, ჩქინ დუდის თეცალ მუდგარენეფ ბკითხათ: „ქუმოხვარნანო ჩქიმ მეგობრეფ იეჰოვაშ მიმართ რწმენაშ გამანგარებას? აღბძრენანო, იფცხოვრე ღორონთიშ ნორმეფიშ თანახმას? ქოუჸორანო იეჰოვაშე დო ჭეშმარიტებაშე ჩიება? ქაფასენანო ღორონთიშ ნორმეფს? ხვალე თის მირაგადნანო, მუდგაშ მორჩქილაფა მოკო დო ვარ უღნა თიშ გაბედულება, რჩევა ქომჩან, მუჟამსით თენა მოსაჭირ?“ (იგავ. 27:​5, 6, 17). ალალას ქოფთქუათინ, მუთუნ ჯგირობუას ვა მომღანა თიცალ მეგობრეფ, მიდგას ვა უჸორა იეჰოვა. მარა თინეფ, მიდგას იეჰოვა უჸორა, თქვანო ჯგირ მეგობრეფ იჸუაფნა დო ირიათო მიგეხვარებნა (იგავ. 13:20).

8. მუშე ოკო დეფიფქრათ სოციალურ მედიას ქიბრინუანთ-და?

⁸ სოციალურ მედია ჯგირ საშვალება რე, ნამდა ურთიერთობა მიღდან ოჯახიშ წევრეფ დო მეგობრეფწკუმა. მარა ამდღა ბრელ თე საშვალებეფს თიშო ირინუანს, ნამდა შხვეფს დუდ მუწონუას. მაგალთო, თიცალ სურათეფს დო ვიდეოეფს გედვანა, მუდგათ შხვეფს ოძირანა მუნეფიშ ქონებას დო ირფელს, მუთ უღნა. სოციალურ მედიას ქირინუანთ-და, თქვან დუდის ქოკითხით: „მუ მოტივეფ მიღჷ? ჩქიმ პოსტეფით შხვეფშა დუდიშ მოწონაფას ვოცადუქო? პოსტეფს თიშ გურშენ გებდვანქო, ნამდა მოკო, მუდგარენ სასიამოვნო გაუზიარე შხვეფს დოვარ თიშენ, ნამდა ჩქიმ დუდშა იფცქუე? სოციალურ მედიას შხვეფს ხომ ვა ვარზენქ საშვალებას, უარყოფითო იმოქმედან ჩქიმ ფიქრეფშა, ჩიებაშა დო საქციელშა?“. ჯიმა ნეითან ნორქ, მით ხემძღვანელ საბჭოს მსახურენდჷ, თეცალ მუდგარენ თქუ: „ვეცადათ, ადამიანს მუწონუათ დუდ, არძაშ გურ საბოლათ იშენით ვამგაგებენა. ეცადით, იეჰოვას მუწონუათ დუდ დო თინეფიშ მოსაწონეფ ხოლო იჸუაფუთ, მიდგას უჸორს თინა“.

9. მუშ კეთებაქ შეიალებუ უზიას იეჰოვაშ მოხვარათ? (2 მატ. 26:1—5).

⁹ დიგურეთ უზიაშ მეღებულ სწორ გადაწყვეტილებეფშე. ახალგაზრდობას მეფე უზია თანდაბალ პიროვნება რდჷ. თის ღორონთიშ შიშ გურშა ბაღანობაშე ენუდვეს დო მუშ სიცოცხლეშ უმენტაშ წანეფს იეჰოვა კურთხევეფს ვარკენდჷ თის (წეკითხით 2 მატიანეშ 26:1—5). თიქ ბრელშა გიორჯგინ ნტერეფს დო გამანგარ იერუსალიმ (2 მატ. 26:​6—15). მუშო ოკო რაგად, უზია ბედნერ იჸუაფუდ თიშ გურშენ, ნამდა ღორონთ ელურდჷ დო ოხვარუდ თის (ეკლ. 3:​12, 13).

10. მუ აკეთ უზიაქ დო მუ მიღჷ შედეგო?

¹⁰ დიგურეთ უზიაშ მეღებულ არასწორ გადაწყვეტილებეფშე. უზია, მუჭოთ მეფე, მერჩქვანელ რდჷ შხვეფშა მითითებეფიშ მეჩამას დო ხალხშა თიშ კარნახის, მუ მუჭო ოკო აკეთესკო. შილებე ზუსტას ათეშენ მეჩჷ ართშა მუშ დუდის თიშე უმოსიშ კეთებაშ უფლება, ვინემ სინამდვილეს უღუდ. თიქ ართ დღას იეჰოვაშ ტაძარშა გემნორთჷ დო სამსხვერპლოს საკმელიშ ჭუალა მინდომ, მუდგაშ უფლება მეფეეფს ვა უღდეს (2 მატ. 26:​16—18). მღვდელმთავარ აზარიაქ ირნერო ეცად, ვა გაკეთებაფუკო თენა, მარა მეფექ მანგარო გერისხჷ. სანარღოთ, თეცალ საქციელით უზიაქ ხაზ გეგნუსვჷ თი ხოლოშიან ურთიერთობას, ნამუთ იეჰოვაწკუმა წანეფიშ დინახალე უღუდ დო მიოდინუ თიშ მიმართ ართგურობა. თე ირფელიშ გურშენ იეჰოვაქ დასაჯ, მუდგაშ შედეგო მეფე უზია ღურაშახ კეთროვან რდჷ (2 მატ. 26:​19—21). უზიას თანდაბლობა ვა უდინუაფუდკონ, თიშ ცხოვრება თაშ ვეშჷ დო ბრელით უჯგუშ იჸუაფუდ.

11. მუ მოხვარნა, ვა ვოდინუათ თანდაბლობა? (ქოძირით სურათ).

¹¹ მუჟამსით უზიაქ წარმატებულო გინირთჷ, გაჭყორდჷ, ნამდა თე ირფელიშ უკახალე იეჰოვა მიკორდჷ დო ირფელს თიშ ჭყოლოფათ მიოჭირინუ. მუს ბგურაფლენთ თავრეშე? ჩქინ დუდის ირიათო ოკო ქუგვოშინათ, ნამდა თი ირფელ, მუდგას იეჰოვაშ მსახურებას მივოჭირინეთ დო კურთხევეფ, ნამუთ მიღნა, იეჰოვაშ ჭყოლოფა რე დო ვართ ხოლო ჩქინ. თიშ მანგიორო, ნამდა იფცქუათ თით, მუდგას მივოჭირინეთ, მთელ დიდება იეჰოვას ოკო ვუძღვინათ დო თიშ მიმართ გეგმოფხანტათ მარდულობა b (1 კორ. 4:7). თანდაბლურო  ოკო ვაღიარათ, ნამდა არასრულყოფილეფ ვორეთ დო მინშა მუდგარენიშ გიშასწორება მოსაჭირნა. ართ ჯიმა, მით 60 წანას რე გინოჩილათირ, თეცალ მუდგარენს იჩიებ: „ქიდიბგურე, ნამდა ოკო ვემეწყინას დო გურქ ვა მომრთას, მუჟამსით შხვეფ ჩქიმ შეცდომეფს ორწყენა დო რჩევას მარზენა. მინშა გვალო ბორულს მეფჩირთუქ, მუდგაშ გურშენ რჩევას მარზენა. თე დროს ირნერო ვოცადუქ, გეგმიბრინუე თე რჩევა დო კინ მუთ შემლებუნ ირფელ გუვაკეთე იეჰოვაშო“. არგამა რე, იეჰოვაშ მიმართ ჯანსაღ შიშ ქუმაღვენუნა დო თანდაბალეფ ქიპჸუაფუთ-და, ბედნერ ცხოვრება მაღვენუნა (იგავ. 22:4).

12. მუჭო ოძირუ იოშიაქ ახალგაზრდობას, ნამდა გორუნდჷ იეჰოვას? (2 მატ. 34:1—3).

¹² დიგურეთ იოშიაშ მეღებულ სწორ გადაწყვეტილებეფშე. იოშია მოზარდ რდჷ, მუჟამსით იეჰოვაწკუმა დაახლოება დიჭყჷ. თის ოკოდ, უმოსო გეჩინებაფუკო ღორონთ დო შეასრულკო თიშ ნება. მარა თე ახალგაზრდაშო იეჰოვაშ ნებაშ შესრულება ვა რდჷ ადვილ, მუშენდა თიშ მეფობაშ დროს ხალხიშ უმენტაშ ტყურა ღორონთეფს ცენდჷ თაყვანს. ათეშენ, თის გაბედულება დესაჭირებუდ, ნამდა მტკიცას ქიგედირთკო წმინდა თაყვანიშმცემლობას მხარეს დო ხალხის მიოტებაფუკო ტყურა ღორონთეფიშ თაყვანიშცემა. იოშია 20 წანერ ხოლო ვა რდჷ, მუჟამსით მუშ ქიანას ტყურა ღორონთეფიშ თაყვანიშცემაშ მოსპუალა დიჭყჷ (წეკითხით 2 მატიანეშ 34:1—3).

13. მუჭო იმოქმედენს თქვან ცხოვრებაშა იეჰოვაშა დუდიშ მეძღვინუა?

¹³ ახალგაზრდეფ, მნიშვნელობა ვა უღჷ, მუ ასაკიშ რეთ შეილებნა მიაჸუნათ იოშიაშ მაგალითის თით, ნამდა უმოს გეგათ იეჰოვაშე დო თიშ სარკო თვისებეფშენ. მუჟამსით თეს გაკეთენთ სურვილ გოირჩქინდუნა, დუდ მეუძღვინათ ღორონთის. მუჭო იმოქმედენს თქვან ცხოვრებაშა იეჰოვაშა დუდიშ მეძღვინუა? ლუკაქ, მით 14 წანერ რდჷ, მუჟამსით ინათ, იეჰოვაშა დუდიშ მეძღვინუაშ დღას თეცალ მუდგარენ თქუ: „ამდღარშე იეჰოვაშ მსახურებას ჩქიმ ცხოვრებას პირველ ადგილს გივორინუანქ დო ირნერო ვეცადებუქ, გურ გუხარე თის“ (მარ. 12:30). თქვა ხოლო, ლუკაცალო, თეცალ ცხოვრებაშ კურსის გეგშეგორუნთ-და, დღას ვედენარღენთ.

14. მუჭო მეჸუნს ნამთინე ახალგაზრდა მეფე იოშიაშ მაგალითის? ქიმიჸონით მაგალითეფ.

¹⁴ მუ სირთულეეფს შილებე შეხვადან ახალგაზრდეფქ, მით იეჰოვას ომსახურნა? იოჰან, მიდგაქ 12 წანერ რდუნ თეშ ინათ, იჩიებ, ნამდა მუშ კლასელეფ ელექტრონულ სიგარეტიშ შუმას ანძალენა. თე ზეწოლას გურზასინ თიშენ იოჰან მუშ დუდის გაშინანს, მუჭო იმოქმედენს თეშ კეთება, მუჭოთ მუშ ჯამრთელობაშა თეშ იეჰოვაწკუმა ურთიერთობაშა. ხოლო ართ ახალგაზრდა  რეიჩელ, მიდგაქ 14 წანერ რდუნ თეშ ინათ, მირაგადნა, მუ ოხვარ გურზას თი სირთულეეფს, ნამდგას სკოლას ხვადუ. თინა იჩიებ: „სკოლას ირიათო ვოცადუქ, სულიერშე იფიფქრე. მაგალთო, ისტორიაშ გაკვეთილს იფშინანქ ბიბლიურ მონაკვეთის ვარდა წინასწარმეტყველებას, ნამუთ გარჩიებელ მასალაწკუმა რე დაკავშირებულ. თეს გეძინელ, შხვეფწკუმა ჩიებაშ დროს, ვოცადუქ, ქიგიფშინე თიცალ ბიბლიურ მუხლ, მუთ თინეფშო საინტერესო იჸუაფ“. შილებე თქვან სირთულეეფ გენესხვავებდას თი სირთულეეფშე, ნამდგას მეფე იოშია ხვადუდ, მარა შეილებნა იოშიაცალო გეგმირჩქინათ გონიერება დო რდათ ბოლოშა იეჰოვაშ ართგურეფ. თი სირთულეეფ, ნამდგას ამდღა ხვადუთ მუგამზადენა მომავალ სირთულეეფშო.

15. მუ ოხვარუდ იოშიას, ემსახურკო იეჰოვას ართგურო? (2 მატ. 34:14, 18—21).

¹⁵ მეფე იოშია 26 წანერ რდჷ, მუჟამსით იეჰოვაშ ტაძარიშ აღდგენაშ საქმეს ქეშუდირთჷ. თე დროს მღვდელმთავარ ხილკიაქ ქოძირ იეჰოვაშ კანონიშ წიგნ, ნამუთ მოსექ ისრაელეფს მეჩჷ. მუჟამსით მეფექ თექ ენოჭარილ სიტყვეფ ქიმირჩქილუ, ხეთეშე გინოჭყვიდ, გაკეთკო ირფელ, მუთ საჭირო რდჷ დო კილ-კილშა მიაჸუნკო თის, მუთ კანონიშ წიგნის ინოჭარუდ (წეკითხით 2 მატიანეშ 34:14, 18—21). ქოიღნანო ბიბლიაშ რეგულარულო კითხირიშ სურვილ? თეს ქართუთ-და, ქუმორწონანო თე პროცეს? ქიმკიწონენთო თი ბიბლიურ მუხლის, ნამდგაქ შილებე პირადო თქვა მიგეხვარან? ლუკა, ნამუთ ჟიშე მიფშინეთ, ბიბლიაშ კითხირიშ დროს ბლოკნოტის ინიჭარანს მუშო საინტერესო აზრეფს. თქვა ხოლო თქვანო საინტერესო აზრეფს დო ბიბლიურ მუხლეფს ქინკიწონენთ დო სოდგაინ ქინიჭარანთ-და, თენა მიგეხვარებნა თინეფიშ დამახსოვრებას. მუთ უმოსის გეგენთ ბიბლიაშე დო ქიჸოროფუანთ თის, თით უმოსო გაღვენუნა სურვილ, ემსახურათ იეჰოვას. თეს გეძინელ, მეფე იოშიაცალო ირფელს გაკეთენთ, ნამდა ცხოვრებას გეგმირინუათ თი ირფელ, მუდგას ღორონთიშ სიტყვაშე გურაფლენთ.

16. მუ რდჷ თიშ მიზეზ, ნამდა იოშიაქ სერიოზულო მეჩირთჷ დო მუს ბგურაფლენთ თავრეშე?

¹⁶ დიგურეთ იოშიაშ მეღებულ არასწორ გადაწყვეტილებაშე. მუჟამსით იოშია 39 წანერ რდჷ, თიცალ შეცდომა დუშვჷ, მუდგათ ღურა ქუმუღ მუშ დუდის. თიშ მანგიორო, ნამდა იეჰოვას ქოთხუკო  ხემძღვანელობა, მუშ დუდის მიენდჷ (2 მატ. 35:20—25). მუს ბგურაფლენთ თავრეშე? ვა უღჷ მნიშვნელობა, მუ ასაკის ვორეთ დო მუსხი წანა რე, ბიბლიას იბრკვიენთ, ირიათო იეჰოვა ოკო ბგორათ დო თიშა ვორდათ დაიმენდებულ. თეშო საჭირო რე, იეჰოვას რეგულარულო ფთხუათ ლოცვას ხემძღვანელობა, გეგმიბრკვიათ თიშ სიტყვა დო გეფთვალისწინათ რჩევეფ, ნამდგას მოწიფულ თანაქრისტიანეფ მარზენა. თეს გუვაკეთენთ-და, ბედნერეფ იპჸუაფუთ დო ნაკლებ იჸი თიშ შანს, ნამდა მუდგაინს სერიოზულო მეფჩირთათ (იაკ. 1:25).

17. მუ დიბგურეთ იეჰოაშიშ, უზიაშ დო იოშიაშ შემთხვევეფშე?

¹⁷ ახალგაზრდობას ბრელ მუდგარენიშ კეთება შეილებნა. იეჰოაშიშ, უზიაშ დო იოშიაშ შემთხვევეფშე ჯგირო ქიძირ, ნამდა ახალგაზრდეფს შეულებნა მიღან ბრძნულ გადაწყვეტილებეფ დო ღორონთიშ მოსაწონო იცხოვრან. მუჭოთ გუვარჩით, სუმხოლო მეფექ მუდგარენეფს მეჩირთეს დო გლახა შედეგეფ მიღეს, მარა შეილებნა მიაჸუნათ თინეფიშ ჯგირ მაგალითის დო დუდ აურიდათ თიცალ შეცდომეფს, მუნერით თინეფს მურთეს. თაშ ქიმიქციებუთ-და, ბედნერ ცხოვრება გაღვენუნა.

18. ნამ ბიბლიურ მაგალითეფშე იძირე, ნამდა შეილებნა გიღდან ბედნერ ცხოვრება? (ქოძირით სურათ).

¹⁸ ბიბლიას მოჩამილ რე შხვა ახალგაზრდეფიშ შემთხვევეფ ხოლო, მიდგაქ დეახლოვეს იეჰოვას, მიღეს თიშ მოწონა დო უღდეს კმაყოფილებათ ეფშა ცხოვრება. მაგალთო, ართ-ართ თეცალ რდჷ დავით. თიქ ბაღანობაშე გინოჭყვიდ, ღორონთიშ მსახურ ჸოფედკო დო ქოთ მიქცუ თაშ. თინა იეჰოვაშ ართგურ მეფე რდჷ. მართალ რე, უმოს გვიანო, მუსხირენშა მეჩირთჷ, მარა იეჰოვაშ თოლს იშენით ართგურ პიროვნება რდჷ დო იწონუანდჷ თის (1 მეფ. 3:6; 9:​4, 5; 14:8). დავითიშ ცხოვრებაშ გიმორკვიება უმოსო გაიმანგარენა სურვილს, ართგურო ემსახურათ იეჰოვას. შეილებნა პირად გურაფაშ დროს მარკოზიშ დო ტიმოთეშ შემთხვევეფ ხოლო გიმირკვიათ. თინეფ ხოლო ახალგაზრდობაშე ომსახურდეს იეჰოვას დო მთელ ცხოვრება თიშ ართგურეფ რდეს, მუდგაშ ჭყოლოფათ ბედნერ დო კმაყოფილებათ ეფშა ცხოვრება უღდეს.

19. მუნერ ცხოვრება შეილებნა გიღდან?

¹⁹ თქვან მომავალ თიშა რე დამოკიდებულ, მუნერ გადაწყვეტილებეფს ღებულენთ ამდღა. თქვან დუდიშ მანგიორო იეჰოვას მიენდებუთ დო ხემძღვანელობას თის ქოთხინთ-და, რჯერდან, იეჰოვა მიგეხვარებნა მიღათ, ბრძნულ გადაწყვეტილებეფ (იგავ. 20:24). თქვა შეილებნა გიღდან ბედნერ დო კურთხევეფით ეფშა ცხოვრება. რშუდან, იეჰოვა აფასენს ირფელს, მუდგას თიშო ორთუთ. ჩქინ მოჸოროფე ზეციერ მუმაშ მსახურება არძაშ უჯგუშ მუდგარენ რე. თეშე უჯგუშ გადაწყვეტილება ცხოვრებას დღას ვემმაღებენა!