1. მუშ გურშენ შილებე ბკითხან სკოლას ვარდა სამუშას?

 ᲛᲣᲡ გინაფლენთ, მუჟამსით თანამშრომელ ვარდა თანაკლასელ თქვან მრწამსიშ გურშენ მუდგარენს გოკითხნა? თე დროს შილებე ჭიჭეთ ნერვიანენთ, მუთ ბუნებრივ რე. მარა დეფიფქრებუთ-და, თეცალ კითხვეფით შემლებნა გებგათ, მუს ფიქრენს ადამიან, მუშ წანსჷ დო თეწკუმა ართო, მერზიებნა საშვალება, სახიოლო ამბეშ გურშენ ვეჩუათ თის. მარა მინშა ნამთინე ადამიან მუდგარენს თიშენ მოკითხნა, ნამდა ვამოთანხმუნა დო ნირზიშ წუმოჭყაფა ოკო. თენა ვამკვენა, მუშენდა ამდღა მსოფლიოს ჩქინ მრწამსიშ გურშენ ბრელ არასწორ ინფორმაცია რე გავრცელებურ (საქ. 28:22). ხვალე თენა ვარინ, მუჭოთ ბიბლიაშე ბგებულენთ, „ბოლო დღალეფს“, ნამდგას ფცხოვრენთ, ადამიანეფ იჸუაფდეს „აჯამეფ“, შხვა სიტყვეფით ქოფთქუათინ, თინეფწკუმა შეიოლებერ ვეჸიდ საერთო ნინაშ გორუა დო თეს გეძინელ, იჸუაფდეს სასტიკეფ ხოლო (2 ტიმ. 3:​1, 3).

2. მუშენ ოკო გიმიფრჩქინანდათ ლიბ ხასიათის?

² შილებე გოინტერესნა, მუჭო უპასუხათ გემუანო დო ტაქტიანო თი პიროვნებას, მით თქვან რწმენაშ გურშენ ნირზის გიჭყანა. ართ სიტყვათ ქოფთქუათინ, თეს ლიბ ხასიათ მიგეხვარებნა. ლიბ ხასიათ უღუნ თი პიროვნება ადვილო ვერისხებ, მუჟამსით მიდგაინ თიშ გაღიზიანებას ოცად, დო სიმშვიდეს ვადინუანს თიმწკუმა ხოლო, მუჟამსით ზუსტას ვა უჩქჷ, მუჭო ოკო უპასუხას (იგავ. 16:32). შილებე იფიქრათ, ნამდა თენა ორაგადეთ ეფ რე, მარა ოკეთებელო — რთულ. მუჭო შეილებნა გავითარათ ლიბ ხასიათ? მუჭო შეილებნა გემუანო დო მშვიდას უპასუხათ თი პიროვნებას, მით თქვან რწმენას აკრიტიკენს? მშობლეფ, მუჭო შეილებნა დაგურუათ თქვან სქუალეფს, ნამდა შხვეფწკუმა მუნეფიშ რწმენაშ გურშენ ჩიებაშ დროს ლიბ ხასიათ დო თავაზიანობა გეგმირჩქინან? თე სტატიაშე მიბღენთ თე კითხვეფშე პასუხის.

3. მუშენ შილებე ირაგადუას, ნამდა ლიბ ხასიათ შინაგან ძალაშ მაძირაფალ რე დო ვართ ხოლო სისუსტეშ? (2 ტიმ. 2:24, 25).

³ ლიბ ხასიათ შინაგან ძალაშ მაძირაფალ რე დო ვართ ხოლო სისუსტეშ. ზუსტას შინაგან სიმტკიცე რე საჭირო, ნამდა ვა ვოდინუათ  სიმშვიდე დაძაბულ სიტუაციაშ დროს. ლიბ ხასიათ „წმინდა შურიშ ნაყოფიშ“ ართ-ართ თვისება რე (გალ. 5:22, 23). ბერძნულ სიტყვას, ნამუთ თარგმნილ რე, მუჭოთ „ლიბ ხასიათ“, მინშა გოხენდილ ცხენიშ ეიოჭარალო ირინუანდეს. მართალ რე, გოხენდუაშ უკულ ცხენ მშვიდ რე, მარა მუშ ძალას ვადინუანს დო კინ ჯვეშობურო ძალიერ რე. ჩქი მუჭო შემლებნა გუვავითარათ ლიბ ხასიათ დო ვა ვოდინუათ შინაგან სიმტკიცე? თეშ კეთება ჩქინ ძალეფით ვეშმალებენა. თეშო საჭირო რე, ღორონთის ლოცვას წმინდა შურ დო მოხვარა ქოფთხუათ თე ძვირფას თვისებაშ გავითარებელო. შხვეფიშ გამოცდილებაქ ოძირუ, ნამდა ლიბ ხასიათიშ გავითარება შეიოლებერ რე. ბრელ ჩქინ და დო ჯიმა გიმირჩქინანს ლიბ ხასიათის დო გემუანო პასუხენს თი კათას, მით თინეფიშ გაღიზიანებას ოცად. თეშ შედეგო, ხალხის იეჰოვაშ მოწმეეფშენ ჯგირ წარმოდგენა ოსქიდუ (წეკითხით 2 ტიმოთეშ 2:24, 25). მუჭო შეილებნა ხოლო უმოსო გიმირჩქინათ ლიბ ხასიათ?

4. მუს ბგურაფლენთ ლიბ ხასიათიშ გურშენ ისაკიშ მაგალითშე?

⁴ ბიბლიას მოჩამილ რე ბრელ შემთხვევა, სოვრეშეთ იძირე, მუსხით მნიშვნელოვან რე ლიბ ხასიათიშ გიმორჩქინა. ქიგიფშინათ ისაკიშ შემთხვევა. მუჟამსით თიქ ფილისტიმელეფიშ დიხას, გერარს დიხორ, მეზობელეფქ, მიდგას თიშ ონჯარდეს, აბრაამიშ ეშანთხორილ ინჭეფ დიხათ გეიოფშეს. თიშ მანგიორო, ნამდა ისაკის თე ირფელიშ გურშენ ნირზ ქუდუჭყაფუდკო, გეგნოჭყვიდ, ქიდიტუკო თექიანობა დო შხვადო ქიდიჭყჷ ინჭეფიშ ეშანთხორუა (დაბ. 26:12—18). მარა ფილისტიმელეფქ თექ ხოლო ქადირთეს ისაკის დო კინ ნირზ ქუდუჭყეს თიშ გურშენ, ნამდა წყარ, ნამუთ თი ტერიტორიას რდჷ, მუნეფს ოკუთვნუდეს. ისაკის ვართ თე შემთხვევას უდინუაფ სიმშვიდე დო პრობლემა მშვიდობიანო მაგვარ (დაბ. 26:19—25). მუქ მეხვარ თის, გეგმირჩქინკო ლიბ ხასიათ თიმწკუმა ხოლო, მუჟამსით შხვეფ გარძახ ოცადუდეს თიშ გაღიზიანებას? მუშო ოკო რაგად, თის ბრელ მუდგარენ აჸიდ დოგურაფილ მუშ მშობლეფშე — აბრაამშე, მით მშვიდობაშ მოჸოროფე რდჷ დო სარაშე, მით ირიათო გიმირჩქინანდჷ ლიბ ხასიათის დო სიმშვიდეს (1 პეტ. 3:4—6; დაბ. 21:22—34).

5. მუჭო შეულებნა მშობლეფს, დაგურუან მუნეფიშ სქუალეფს, მუსხით მნიშვნელოვან რე ლიბ ხასიათიშ გიმორჩქინა? ქიმიჸონით მაგალით.

⁵ მშობლეფ, თქვა ხოლო შეილებნა დაგურუათ სქუალეფს, მუსხით მნიშვნელოვან რე, ლიბ ხასიათიშ გიმორჩქინა. გუვარჩუათ ართ მოზარდიშ, მაქსენსიშ, შემთხვევა. თის მსახურებას დოვარ სკოლას ხშირას უხვადუდ აგრესიულ ადამიანეფწკუმა ურთიერთობა. თიშ მშობლეფ ბრელს ხანდენდეს, ნამდა თის ლიბ ხასიათიშ გავითარებას ქიმეხვარესკო. მუჭოთ თინეფ იჩიებნა, მაქსენსიქ ქიმეხვად, ნამდა დაძაბულ სიტუაციეფიშ დროს შინაგან ძალაშ მაძირაფალ, დუდშეკებაშ დო სიმშვიდეშ გიმორჩქინა რე დო ვართ ხოლო აგრესიაშ აგრესიათ პასუხ. საბედნეროთ, მაქსენსიქ ქიდიგურუ ლიბ ხასიათიშ გიმორჩქინა.

6. მუჭო შეულებ ლოცვას, მიმეხვარან ლიბ ხასიათიშ გიმორჩქინას?

⁶ მუჭო ოკო მიფქცუათ თიცალ სიტუაციას, მუჟამსით მიდგაინ ტყურას ეკაწამენს იეჰოვაშ სახელს დო არდებულო იჩიებ თიშ სიტყვაშ, ბიბლიაშ, გურშენ? თეცალ დროს იეჰოვას ლოცვას წმინდა შურ დო სიბრძნე ოკო ფთხუათ, ნამდა ქიმმეხვარან, გეგმიფრჩქინათ ლიბ ხასიათ დო შემალებუან, გემუანო ვუპასუხათ თე პიროვნებას. მარა მინშა შილებე ვეშმალებუან სიმშვიდეშ გიმორჩქინაქ დო თეშ ვამაპასუხებუან პიროვნებაშა, მუჭოთ საჭირო რე დო თეს გვიანს ქიმეფხვადათ. შემლებნა თე საკითხიშ გურშენ ხოლო იბლოცათ დო დეფიფქრათ, მუშ კეთება შემლებნა მომავალს უჯგუშო. იეჰოვა მუშ მხარეშე ირფელს გაკეთენს დო წმინდა შურს ქომჩანა, ნამდა გუვაკონტროლათ ჩქინ ემოციეფ დო გეგმიფრჩქინათ ლიბ ხასიათ.

7. მუჭო მიმეხვარებნა ბიბლიურ მუხლეფიშ დამახსოვრება ემოციეფიშ კონტროლს? (იგავ. 15:1, 18).

⁷ ნამთინე ბიბლიურ მუხლის მოჩამილ აზრეფიშ დამახსოვრება ხოლო მიმეხვარებნა, ვაკონტროლათ ჩქინ ჩიება დაძაბულ სიტუაციეფიშ დროს დო იფჩუათ მშვიდას, მუჟამსით თენა იშენდოიშენ ადვილ ვა რე. ღორონთიშ წმინდა შურს შეულებ თეცალ სიტუაციეფს ქუგმოშინან თე ბიბლიურ მუხლეფ (იოან. 14:26). მაგალთო, წიგნ „იგავეფს“ მოჩამილ პრინციპეფს შეულებ მიმეხვარან ლიბ ხასიათიშ გიმორჩქინას  (წეკითხით იგავეფიშ 15:​1, 18). თე წიგნის თიშე ხოლო მეურს ჩიება, მუ ჯგირობუა მოუღ დუდშეკებაშ გიმორჩქინას დაძაბულ სიტუაციეფიშ დროს (იგავ. 10:19; 17:27; 21:23; 25:15).

8. მუშენ ოკო დეფიფქრათ თიშე, მუ მოტივით მოკითხნა ადამიან მუდგარენს ჩქინ რწმენაშ გურშენ?

⁸ ლიბ ხასიათიშ გავითარებას გურგოჩამილობა ხოლო მოხვარნა (იგავ. 19:11). გურგოჩამილ პიროვნება ვა ჩქარენს პასუხიშ მეჩამას დო დუდშეკებას გიმირჩქინანს. დეფიქრით თეცალ მუდგარენშე: მუჟამსით აისბერგის ვუჯინეთ, ხვალე თი ჭიჭე ნაწილს ვორწყეთ, მუთ წყარიშ ჟი რე, მარა ვა ვორწყეთ თი უდიდაშ ნაწილს, ნამუთ წყარიშ თუდო რე. თეშნერო, მუჟამსით პიროვნება ჩქინ რწმენაშ გურშენ მუდგარენს მოკითხნა ხვალე თის ვორწყეთ, მუთ ართ მეჯინათ იძირე დო სინამდვილეს ვა მიჩქნა მოტივ. თაშ ნამდა, პასუხიშ მეჩამაშახ ჯგირ იჸუაფ დეფიფქრათ, მუ მოტივით მოკითხნა პიროვნება მუდგარენს (იგავ. 16:23).

9. მუჭო გიმირჩქინ გედეონქ გურგოჩამილობა დო ლიბ ხასიათ ეფრემელ ქომოლკათაწკუმა?

⁹ მორთ ქიგიფშინათ გედეონიშ ისტორია. ართშა თიშა ეფრემელ ქომოლკოჩეფქ გარისხებულეფქ ქიმერთეს დო ნირზ ქუდუჭყეს, ჩქი მუშენ ვა დომძახითია ისრაელეფიშ ნტერეფიშ წინააღმდეგ ობრძოლეფშა. მუ რდჷ თინეფიშ თეცალ გარისხებაშ მიზეზ? შილებე დუდ დამცირებულო იგინეს. მიზეზ მუდგა ვა რდუკო, გედეონქ გურგოჩამილობა გეგმირჩქინ. თიქ ირნერო ეცად, ქინანჭუკო, მუშენ რდეს ეფრემელეფ თეცალ გარისხებულეფ. თეშ უკულ, ლიბ ხასიათ გეგმირჩქინ დო გემუანო დურაგადუ თინეფს. შედეგო, მუჭოთ ბიბლიაშე ბგებულენთ, გარისხებულ ეფრემელ კოჩეფქ „დეწყნარეს“ (მსაჯ. 8:​1—3).

10. მუ მიმეხვარებნა თიშ გაგებას, მუჭო ვუპასუხათ თი პიროვნებას, მით ჩქინ რწმენაშ გურშენ მუდგარენს მოკითხნა? (1 პეტ. 3:15).

¹⁰ შილებე ჩქინ თანაკლასელ ვარდა თანამშრომელ ეჭვიშ თუდო გიორინუანს ნამდგარენ ბიბლიურ ნორმას დო თეწკუმა დაკავშირებით,  მუდგარენს მოკითხნა. მუშო ოკო რაგად, თე დროს თიშ აზრიშ მიმართ პატიცემას გეგმიფრჩქინანთ დო ირნერო ვეცადებუთ, ტაქტიანო გევუნწყათ მუშენ ბჯერა, ნამდა ბიბლიურ ნორმეფით ცხოვრება არძაშ უჯგუშ რე (წეკითხით 1 პეტრეშ 3:15). თექ შემალებუანინ ხეთეშე ოკო ვეფიფქრათ, ნამდა პიროვნება მუდგარენს თიშენ მოკითხნა, ნამდა ჩქინ გაკრიტიკება ვარდა ნირზიშ დოჭყაფა ოკო. თეშ მანგიორო, ჯგირ იჸუაფ, ქენვანჭათ პიროვნებაშ მოტივეფს დო დეფიფქრათ, მუშენ შილებე გურჩქინდკო თე კითხვაქ. თეშ კეთება მიმეხვარებნა, ტაქტიანო დო გემუანო ვუპასუხათ თის. მის უჩქჷ, ეგება თეშ უკულ პიროვნებაქ მუშ გურშა ქინიჯინას დო დეფიქრას, მუსხით სწორ რე თინა, მუდგაშ წანსჷ. თაშ ნამდა, მუჟამსით პიროვნება მუდგარენს კრიტიკულო დო უხეშო მოკითხნა, ჩქინ მიზან ოკო რდას, გემუანო დო თავაზიანო ვუპასუხათ თის (რომ. 12:17).

11, 12. ა) მუშე ოკო დეფიფქრათ, ონდო პიროვნებაშ კითხვას პასუხის მეფჩანთ? (ქოძირით სურათ). ბ) ქიმიჸონით მაგალით, მუჭო შილებე პიროვნებაშ წუმოჭკირილ კითხვაქ მეგობრულ ჩიებას შეუნწყუას ხე?

¹¹ მორთ წერმიბდგინათ თეცალ სიტუაცია: თანამშრომელ ჩქინდა მოურს დო მოკითხნა, მუშენ ვაბღნიშნენთ დაბადებაშ დღალეფს. თის სწორ პასუხ ქიმეფჩათინ პირველ რიგის ოკო დეფიფქრათ, მუშენ მოკითხნა თეს. ხომ ვა ფიქრენს, ნამდა იეჰოვაშ მოწმეეფს ვარიებულ მაფნა გართობა დო დროშ სასიამოვნოთ გატარება? ვარდა ხომ ვემიორჩქ, ნამდა ჩქინ თეცალ პოზიციათ ვოცილუთ, სამუშას რდას მეგობრულ გარემო? თეშე დაფიქრება მიმეხვარებნა, თანამშრომელს გემუანო ვუპასუხათ. მაგალთო, მადლობას გეგნუგანთ თიშო, ნამდა ირნერო ოცად, თანამშრომლეფ შქას ჯგირ ურთიერთობა რდას დო დუვარწმუნენთ, ნამდა სამუშას მეგობრულ გარემო ჩქინო ხოლო მნიშვნელოვან რე. ჩქინ გიმორჩქინელ თავაზიანობაქ შილებე დაძაბულ სიტუაცია გეგშანწყუას დო ქუმმაჩან შესაძლებლობაქ თანამშრომელს გემუანო გეუნწყათ, მუს იჩიებ ბიბლია დაბადებაშ დღალეფიშ აღნიშნებაწკუმა დაკავშირებით.

¹² ასე წერმიბდგინათ ხოლო ართ სიტუაცია: ჩქინ თანაკლასელ მირაგადნა, ნამდა იეჰოვაშ მოწმეეფქ ოკო დოთირუან მუნეფიშ შეხედულება ჰომოსექსუალიზმიშ მიმართ. თე დროს ხოლო ჯგირ იჸუაფ დეფიფქრათ, მუშენ იჩიებ თეს. არასწორო ხომ ვარჩქილე იეჰოვაშ მოწმეეფიშ პოზიცია თე საკითხიშ მიმართ? ჰომოსექსუალ მეგობარ ვარდა ნათესე ხომ ვა ჸუნს? ხომ ვა ფიქრენს, ნამდა იეჰოვაშ მოწმეეფს ბჯოგნა თი ხალხ, მიდგას თეცალ ცხოვრებაშ წეს უღჷ? თაშ ქორენ-და, ჯგირ იჸუაფ, ჩქინ თანაკლასელ პირველ რიგის დუვარწმუნათ, ნამდა არძანერ ადამიანს ვაფასენთ დო პატის ფცენთ თითოულ ადამიანიშ უფლებას, გაკეთან მუნეფიშ არჩევან b (1 პეტ. 2:17). შილებე თექ შესაძლებლობა ქომჩან, ჩქინ თანაკლასელს გევუნწყათ, მუ ჯგირობუა მოუღ ბიბლიურ ნორმეფით ცხოვრებას.

13. მუჭო შემლებნა მევუდირთათ თი პიროვნებას, მით თიშ გურშენ გუმოძიცანა, ნამდა ბწანა ღორონთიშ?

¹³ მუჟამსით პიროვნებას კატეგორიულ პოზიცია უღჷ დო ვა მოთანხმუნა, ხეთეშე ოკო ვემეფრთათ თი დასკვნაშა, ნამდა უკვე მიჩქნა, მუშ წანსჷ თის (ტიტ. 3:2). მაგალთო, თქვან კლასელ, ღორონთიშ რწანან თიშ გურშენ ქუგგაძიცანან-და, იშენდოიშენ თინა ოკო ვეფიქრათ, ნამდა ევოლუციაშ ჯერს დო ჯგირო არჩქილე თე საკითხ. შილებე ევოლუციაშ გურშენ ბრელ მუთუნ ვა უჩქუდას დო უბრალოთ თის იმეორენდას, მუთ შხვეფშე გუგონებ. ათეშენ, თიშ მანგიორო, ნამდა თიწკუმა მეცნიერებაშე დო ევოლუციაშე მსჯელობა დიჭყათ, უჯგუშ იჸუაფ, პასუხიშ მიოჩამალო შხვა შარა დოგორათ, მუთ თქვან თანაკლასელს დაფიქრენს. მაგალთო, შეილებნა ქაძირუათ, სო შეულებ ჩქინ ვებგვერდის გორას ინფორმაცია შემოქმედებაშ გურშენ. შილებე თის სურვილქ გურჩქინდას, ართო იმსჯელათ თექ მოჩამილ ნამდგაინ ვიდეოშე ვარდა სტატიაშე. თქვან გიმორჩქინელ პატიცემაქ დო ტაქტიანობაქ, შილებე ჯგირ შედეგეფ მიღას დო თქვან თანაკლასელქ დეფიქრას მუშ შეხედულებაშე.

14. მუჭო ოძირუ ნილქ ვებგვერდიშ გიმორნაფათ მუშ თანაკლასელს, ნამდა, მუდგას ნამთინე იეჰოვაშ მოწმეეფიშ გურშენ იჩიებ, ტყურა რე?

¹⁴ ართ ახალგაზრდა ჯიმაქ, სახელო ნილქ, ჩქინ  ვებგვერდ გიმირინუ თიშ ოძირაფალო, ნამდა მუდგას ნამთინე იეჰოვაშ მოწმეეფიშ გურშენ იჩიებ, ტყურა რე. ნილ იჩიებ: „ჩქიმ კლასელ ხშირას მირაგადუდ, ნამდა მეცნიერულ ფაქტეფიშ თიშენ ვა ბჯერს, ნამდა ვონდუქ ბიბლიას, ნამუთ მუშ აზრით ლეგენდეფიშ დო მითეფიშ წიგნ რე“. ნილქ ეცად, გეუნწყუკო თანაკლასელს მუშ პოზიცია, მარა მუჟამსით თეშ საშვალება ვემეჩ, თიქ ელუჩ, გემშართკო ვებგვერდშა jw.org დო ქოძირკო განყოფილება „მეცნიერულ ფაქტეფ დო ბიბლია“ [ქორთ.]. უმოს გვიანო, ნილქ გურ ქუგუჩ, ნამდა მუშ კლასელს თე განყოფილებაშე მუდგარენეფ წუკითხირ დო ასე უკვე უმოს სურვილ უღუდ, ქიჩუკო სიცოცხლეშ გოჭყაფაშ გურშენ. ნილიშ მაგალითის ქიმიაჸუნუთ-და, თქვან შემთხვევას ხოლო შილებე თაშ ქუმოხვადას.

15. მუჭო შეულებნა მშობლეფს, მეხვარან სქუალეფს, მშვიდას უპასუხან სკოლას თინეფს, მით მუნეფიშ მრწამსის ეჭვიშ თუდო გიორინუანს?

¹⁵ მშობლეფს შეულებნა დაგურუან მუნეფიშ სქუალეფს, მუჭო უპასუხან მშვიდას დო გემუანო თინეფს, მით მუნეფიშ მრწამსის ეჭვიშ თუდო გიორინუანს (იაკ. 3:13). ნამთინე მშობელ ოჯახურ თაყვანიშცემაშ დროს თეცალ სიტუაციეფშო წინასწარ ამზადენს სქუალეფს. მაგალთო, თინეფ ართო არჩიენა თი სიტუაციეფს, მუდგას შილებე სკოლას მუნეფიშ სქუალეფქ შეხვადან. უკულ ართო მსჯელენა, მუჭო შეულებნა უპასუხან სკოლას მუნეფშა დოსუმალირ კითხვეფს დო ორთნა ინსცენირებას. თეს გეძინელ, თე მშობლეფ მუნეფიშ სქუალეფს ოგურუანა, მუჭო ეჩუან გემუანო დო მშვიდას შხვეფს მუნეფიშ რწმენაშ გურშენ (ქოძირით ჩარჩო, „წინასწარ მომზადება, მეხვარებ თქვან ოჯახის“).

16, 17. მუჭო შილებე წინასწარ მომზადებაქ მეხვარას ახალგაზრდეფს?

¹⁶ წინასწარ მომზადება ახალგაზრდეფს ოხვარ, საფუძვლიანო გეუნწყან შხვეფს მუნეფიშ რწმენაშ გურშენ. თეწკუმა ართო, თეცალ მომზადება მუნეფს ხოლო მეხვარებ, ხოლო უმოსო დერწმუნან, ნამდა მუთ წანან ჭეშმარიტება რე. ოჯახურ თაყვანიშცემაშ დროს შეილებნა ძირათ ვებგვერდ jw.org-ის მოჩამილ განყოფილება „ახალგაზრდეფი“, სოდეთ მოჩამილ რე ბრელ სტატია  დო ომუშებელ ფურცელ ახალგაზრდეფშო [ქორთ.]. თექ მოჩამილ მასალაშ გარჩიება თქვან სქუალეფს მეხვარებ, გემანგარან რწმენა დო შეიალებუან მუნეფიშ სიტყვეფით გეუნწყან შხვეფს თინა, მუდგაშ წანა. თე განყოფილებას მოჩამილ მასალას ოჯახწკუმა ართო გუვარჩიენთ-და, ხვალე ჩქინ სქუალეფს ვარინ არძას მიმეხვარებნა, ჩქინ პოზიციაშ დაცვებაშ დროს გეგმიფრჩქინათ ლიბ ხასიათ დო სიმშვიდე.

¹⁷ ართ ახალგაზრდას, სახელო მეთიუს, მანგარო ოხვარ წინასწარ მომზადება. ოჯახურ თაყვანიშცემაშ დროს მეთიუ დო თიშ მშობლეფ ხშირას არჩიენა თიცალ საკითხის, მუდგაქ შილებე მეთიუს სკოლას გიმადირთას. თინა იჩიებ: „დიო ფიფქრენთ, სკოლას მუ საკითხიშ გურშენ შილებე ბკითხან მუდგარენეფ. თეშ უკულ, თე საკითხის იბრკვიენთ დო ვოცადუთ, გიმორკვიებულ მასალაშ საფუძველშა ჩქინ სიტყვეფით გემნწყათ თინა, მუდგაშ ბწანა. მუჟამსით კონკრეტულ საკითხის პირველ რიგის მა ენვანჭუქ ჯგირო, უმოსო ვორექ დუდშა დაჯერებულ დო ადვილ მაფჷ, შხვეფს მშვიდას დო გემუანო გევუნწყე ჩქიმ პოზიცია“.

18. მუჭოთ კოლოსელეფიშ 4:6-შე იძირე, მუ ოკო რდას მნიშვნელოვან ჩქინ ჩიებაშ დროს?

¹⁸ მუჭოთ ბძირით, ხვალე საფუძვლიანო დო გასაგებო ენწყუმა ვა რე დასაბაღ, ნამდა პიროვნებაქ ქიგეგას ჩქინ პოზიცია დო დემეთანხმან. თე ირფელწკუმა ართო, საჭირო რე, ტაქტიანობაშ დო ლიბ ხასიათიშ გიმორჩქინა (წეკითხით კოლოსელეფიშ 4:6). შხვეფწკუმა ჩქინ პოზიციაშ გურშენ ჩიება შილებე ბურთიშ ჸოთამას ვუგურუათ. მაგალთო, ჩქინდა რე დამოკიდებულ, მუჭო ვოჸოთანთ ბურთის, ქექაშო დოვარ მორქიებულო. მუჟამსით ბურთის ქექაშო ვოჸოთანთ, შხვეფს შეულებნა ოჭოფან თინა დო გაგრძელან ლაჸაფ. თეშნერო, მუჟამსით შხვეფს ოჩიებელს ტაქტიანო დო გემუანო გინოფჩანთ, უმოსო შილებე ხალხის ჩქინ მორჩქილაფაშ სურვილქ გურჩქინდას დო გაგრძელან ჩქინწკუმა ჩიება. მარა ირო თაშ ვა ხვადუ, მუშენდა მინშა ნამთინეს მუშ სიმართლეშ დამტკიცება ვარდა ჩქინ გეძიცა ოკო. მუშო ოკო რაგად, თეცალ დროს ჩქი ვა გუვაგრძელენთ თინეფწკუმა ჩიებას (იგავ. 26:4). მარა თეცალ სიტუაციეფ ხშირას ვა ხვადუ, უმენტაშო ხალხ მირჩქილენა.

19. მუშენ რე ჯგირ ლიბ ხასიათიშ გიმორჩქინა?

¹⁹ მუჭოთ თე სტატიაშე ბძირით ლიბ ხასიათიშ გავითარება მართალო ჯგირ მიზან რე. თე მიზანიშ მიოჭირნაფალო, იეჰოვას ლოცვას ძალა ქოთხით, ნამდა შეგალებუან ვადინუათ სიმშვიდე, მუჟამსით მუდგარენს ნირზიშ წუმაჭყაფალო გოკითხნა ვარდა უსამართლოთ გაკრიტიკენა. რშუდან, ლიბ ხასიათიშ გიმორჩქინათ დო თავაზიან პასუხით ხეს შეუნწყუნთ თის, ნამდა ჩიებაქ ნირზშა ვეგნორთას. გემუან ჩიებაშ დო პატიცემაშ გიმორჩქინაშ ჭყოლოფათ შილებე თქვან მარჩქილექ დითირუას დამოკიდებულება იეჰოვაშ მოწმეეფიშ მიმართ დო ქიმეხვადას, ნამდა, მუდგას ბიბლია ოგურუანს, ჭეშმარიტება რე. თაშ ნამდა, „ირიათო მზათ რდათ, პასუხ ქიმეჩათ თინეფს, მით თქვან [პოზიციაშ] გურშენ, ახსნა-განმარტებას რთხინა, ოღონც თენა გემუანო დო პატიცემათ აკეთით“ (1 პეტ. 3:15). არგამა რე, ლიბ ხასიათიშ გიმორჩქინა შინაგან სიმტკიცეშ მაძირაფალ რე.