1, 2. მუ ჯგირობუას მომღანა სამსონიშ ისტორიაშ გიმორკვიება?

 ᲛᲣᲟᲐᲛᲡᲘᲗ სამსონიშ სახელ გარჩქილენა, ალბათ პირველო გონებაშა თიშ დიდ ძალა მუგალენა. ნამთინეს შილებე გაშინედას თი გლახა შედეგეფ, მუთ სამსონს მუშ არასწორ გადაწყვეტილებაქ მოუღ. მარა თე არასწორ გადაწყვეტილებაშ უმკუჯინუო, იეჰოვაქ თინა იშენით ართგურ პიროვნებათ მირჩქინ დო თიშ ისტორია ბიბლიას ინაჭარაფუ, ნამდა დიბგურეთკო თიშე.

² იეჰოვაქ ბრელშა გიმირინუ სამსონ დო ოკეთებაფუ სარკო საქმეეფ მუშ გიშაგორილ ხალხიშ, ისრაელეფიშ, მახვარებელო. სამსონიშ ღურაშე საუკუნეეფიშ უკულ, იეჰოვაქ მოციქულ პავლეს თიშ სახელ თი ქომოლკათაშ შქას ინაჭარაფუ, მიდგას ღორონთიშ ძალიერ რწმენა უღდეს (ებრ. 11:​32—34). სამსონიშ მაგალითშე ბრელ მუდგარენს ბგურაფლენთ. თინა მანგარ რთულ სიტუაციას ხოლო იეჰოვაშა რდჷ მენდებულ. მორთ გუვარჩუათ, მუშ გურაფა შემლებნა სამსონშე დო მუჭო შეულებ თიშ ისტორიას ჩქინ გურიშელაკინა.

3. მუ დავალება მიღჷ სამსონქ?

³ მუჟამსით სამსონქ დებად ისრაელ ფილისტიმელეფიშ ხეს რდჷ აშალაფირ (მსაჯ. 13:1). თინეფ მანგარო იტანჯებდეს, მუშენდა ფილისტიმელეფ აჩაგრენდეს დო მანგარ გლახათ ოქცუდეს. ფილისტიმელეფიშ ხეშე მუშ ხალხიშ დარსხებელო იეჰოვაქ სამსონ გიშეგორ (მსაჯ. 13:5). თენა მანგარ რთულ დავალება რდჷ, ათეშენ თიშ შეიოსრულებერო სამსონქ ოკო მიენდკო ღორონთის.

4. მუჭო მეხვარ იეჰოვაქ სამსონს, ნამდა დერსხკო დუდ ფილისტიმელეფშე? (მსაჯ. 15:​14—16).

⁴ გუვარჩუათ ართ შემთხვევა, სოვრეშეთ ჯგირო იძირ, ნამდა სამსონ ონდუდ იეჰოვას დო ჯერდჷ, ნამდა ირიათო ელუდირთუდ. ართშა თის ფილისტიმელეფქ დუდის ქიგიანთხეს თი ადგილს,  ნამდგას ლეხ ჯოხოდ დო ნამუთ, საეგებიოთ, იუდაშ ტერიტორიას რდჷ. იუდეველ ქომოლკოჩეფს მანგარო აშქურნეს დო გეგნოჭყვიდეს, სამსონ ნტერეფს გეგნოჩესკო. თაშ ნამდა, სამსონს კინ მუშიანეფქ ჟირ ახალ თოკით ხელეფ დუკირეს დო ფილისტიმელეფს ქიმუჸუნეს (მსაჯ. 15:​9—13). მარა იეჰოვაშ წმინდა შურქ სამსონს სასწაულ ძალა ქიმეჩ, მუდგაშ ჭყოლოფათ თიქ თოკეფ გოსოფ დო დუდ დერსხჷ. უკულ ვირიშ მარჭვა ქოძირ, უცფას ქიხვამილუ დო ანთას ფილისტიმელ დოჸვილ (წეკითხით მსაჯულეფიშ 15:​14—16).

5. მუჭო ოძირუ სამსონქ, ნამდა ონდუდ იეჰოვას?

⁵ მუშენ გიმირინუ სამსონქ ვირიშ მარჭვა, მუჟამსით თინა ვა რდჷ ობრძოლებერ იარაღ დო ვართ მითინ ირინუანდჷ ბრძოლაშ დროს? მუშო ოკო რაგად, სამსონს ჯგირო უჩქუდ, ნამდა იარაღიშ ჭყოლოფათ ვარინ, ხვალე იეჰოვაშ მოხვარათ შეიალებედ გიორჯგინკო ფილისტიმელეფს. ათეშენ, თე ართგურ კოჩიქ იეჰოვაშ ნებაშ შეიოსრულებერო გეგმირინუ თინა, მუთ თი მომენტის ხეშამალაფარ რდჷ. შედეგო, თიქ გიორჯგინ ფილისტიმელეფს, მუშენდა ბოლოშა მიენდჷ იეჰოვას.

6. მუშ გურაფა შემლებნა სამსონიშ შემთხვევაშე?

⁶ იეჰოვა ჩქი ხოლო ქომჩანა ძალას, შევასრულათ ჩქინდა მოჩამილ თიცალ დავალებეფ, ნამდგაშ კეთება ართ მეჯინათ შეიოლებერო ვეძირე. შილებე ღორონთიქ თიცალ საშვალებათ ქიმმეხვარან, ნამდგაშეთ დღას ვეფიფქრენდით. რჯერდან, ნამდა იეჰოვა, მიდგაქ გამანგარ სამსონ, თქვა ხოლო ქიმგეხვარებნა მუშ ნებაშ შესრულებას, მუჟამსით ბოლოშა მიენდებუთ თის (იგავ. 16:3).

7. ნამ შემთხვევაშე იძირე, მუსხით მნიშვნელოვან რე, ნამდა ბგორათ იეჰოვაშ ხემძღვანელობა?

⁷ ბრელ ჩქინ და დო ჯიმაქ, მით მონაწილებას ღებულენა თეოკრატიულ სამშენებლო პროექტეფს ოძირანა, ნამდა ონდუნა იეჰოვა ღორონთის. მაგალთო, ულირს, მუჭოთ წეს თინეფ აპროექტენდეს დო აშენენდეს დარბაზეფს დო შხვა თეოკრატიულ შენობეფს, მარა უკულ მუდგარენ ცვლილებეფიშ კეთებაქ იჸუ საჭიროქ, მუშენდა იეჰოვაშ ორგანიზაციას ირდღას უმოსო დო უმოსო აძინუ ხალხ. ათეშენ, ჯიმალეფქ ლოცვას იეჰოვას ხემძღვანელობა თხის დო ქოცადეს ახალ მეთოდ, მუდგაშა მიშეშ აშენებულ შენობაშ ჸიდირ დო თიშ გინოკეთება. ართ ჯიმა სახელო რობერტ, მით ბოლო წანეფს მთელ მსოფლიოს საპროექტო-სამშენებლო საქმეს ღებულენდჷ მონაწილებას, თეცალ მუდგარენს იჩიებ: „თე ახალ მეთოდ, მანგარ  განსხვავებულ რდჷ თიშე, მუდგას წანეფიშ დინახალე ვორთუდით. ასე ირფელ გვალო შხვანერო მაფდეს ოკეთებელ, ათეშენ დუდშე ნამთინეს გუჭირდჷ თე ირფელიშ მეღებაქ დო თიშა მერჩქვანაქ. მარა საბოლათ თინეფქ ქუდუხუჯეს ახალ მეთოდის დო არგამათ ქიძირ, ნამდა იეჰოვაქ ხოლო აკურთხჷ თე ცვლილება“. თე შემთხვევაშე ჯგირო ქიძირ, მუჭო ხემძღვანელენს იეჰოვა მუშ ხალხის მუშ ნებაშ შეიოსრულებერო. მინშა ჯგირ იჸუაფ, ქობკითხათ ჩქინ დუდის: „ქობგორუნქო იეჰოვაშ ხემძღვანელობას დო მზათ ვორექო, ქუდუხუჯუე ცვლილებეფს?“.

8. მუ აკეთ სამსონქ, მუჟამსით მანგარო მაჸუმენ?

⁸ შილებე ბიბლიას წაიკითხირნა სამსონიშ კეთებულ შხვა სარკო საქმეეფიშ გურშენ ხოლო. მაგალთო, ართშა თიქ ცარიელ ხელეფით ებრძოლ ლომს დო შქას გოსოფ თინა. უმოს გვიანო, 30 ფილისტიმელ ქომოლკოჩ ხოლო დოჸვილ ქალაქ აშკელონს (მსაჯ. 14:​5, 6, 19). სამსონს ჯგირო უჩქუდ, ნამდა თე ირფელიშ კეთება იეჰოვაშ მოხვარაშ უმშო, მუშით ვეშიალებედ. თექ ჯგირო იძირ ართ შემთხვევაშე. თიშ უკულ, მუთ სამსონქ 1 000 ფილისტიმელ დოჸვილ, მანგარო მაჸუმენ დო თიშ მანგიორო, ნამდა მუშით ეცადკო წყარიშ გორუას იეჰოვას ქოთხუ მოხვარა (მსაჯ. 15:18).

9. მუჭო უპასუხ იეჰოვაქ, სამსონიშ ოთხუალს? (მსაჯ. 15:19).

⁹ იეჰოვაქ შეუსრულ სამსონს ოთხუალ დო თი ადგილს სასწაულებრივო გარჩქინ ორკე, სოვრეშეთ წყარქ მოლართჷ. მუჟამსით სამსონქ გეშვჷ თინა „შურქ მადგჷ დო გეგშეცოცხალ“ (წეკითხით მსაჯულეფიშ 15:19). მუჭოთ იძირე, თე ორკე წანეფიშ უკულ ხოლო არსებენდჷ, მუჟამსით სამუელ, ღორონთიშ შთაგონებათ, ბიბლიაშ წიგნ „მსაჯულეფს“ ჭარუნდჷ. თე ორკეშ ძირაფა ისრაელეფს ხოლო ართშა ქუგაშინანდჷ, ნამდა იეჰოვას ქიმიენდებდეს-და, შეულებდეს დარწმუნებულეფ ჸოფედესკო, ნამდა ღორონთ საჭირო დროს აუცილებერო მეხვარებუდ მუშ ართგურ მსახურეფს.

10. მუ ოკო ვაკეთათ, იეჰოვაშე მოხვარაშ მიოღებელო? (ქოძირით სურათ).

¹⁰ მნიშვნელობა ვა უღჷ, მუშ უნარ დო ნიჭ მიღნა ვარდა მუს მივოჭირინეთ იეჰოვაშ მსახურებას. საჭირო რე, ირიათო იეჰოვას ფთხუათ მოხვარა დო თიშა ვორდათ დაიმენდებულ. ჩქი ოკო გიმიფრჩქინანდათ მოკრძალებას დო ჯგირო ოკო მარჩქილედან, ნამდა ნამდვილ წარმატებაშ მენჭირნაფა ხვალე იეჰოვაშა მენდებათ რე შეიოლებერ. მუჭოთ სამსონ გიშაცოცხალ იეჰოვაშ მეჩამილ წყარქ, თეშნერო ჩქი ხოლო სულიერო გემამნგარებუთ, თაშ ქოფთქუათინ გეგშეფცოცხალებუთ, მუჟამსით მიბღენთ ირნერ საშვალებას, მუდგათ იეჰოვა მოხვარნა (მათ. 11:28).

11. მუჭო შემლებნა იეჰოვაშე მოხვარაშ მეღება? ქიმიჸონით მაგალით.

¹¹ გუვარჩუათ რუსეთის მახორუ ართ ჯიმაშ, ალექსეიშ, შემთხვევა, მით სერიოზულ თხოზინს ხვადუ. მუ ოხვარ თის თეცალ რთულ სიტუაციაშ გარზებას? ალექსეის დო თიშ ოსურს, ჯგირ სულიერ განრიგ უღნა. თინა იჩიებ: „ირიათო მიღჷ პირად გურაფა დო ირდღას ბკითხულენქ ბიბლიას. თეს გეძინელ, ირ ოჭმარეს მა დო ჩქიმ ოსურ ართო ვარჩიენთ ირდღაშიან მუხლის დო ართო ბლოცულენთ“. მუს ბგურაფლენთ ალექსეიშ მაგალითშე? საჭირო რე, ჩქინ დუდის ვარინ იეჰოვას მივენდათ. მარა მუჭო შემლებნა თეშ კეთება? თეშ ოკეთებელო საჭირო რე, რწმენაშ გამანგარება, მუდგაშა მიშურს ბიბლიაშ რეგულარულ გიმორკვიება დო სულიერ საქმეეფს მონაწილებაშ მეღება. იეჰოვა აუცილებერო აკურთხენს ჩქინ მონდომას. თიქ გამანგარ სამსონ დო დარწმუნებულ ვორეთ, ჩქი ხოლო გუმამანგარენა.

12. მუ გლახა გადაწყვეტილება მიღჷ სამსონქ დო მუ გაგებათ რდჷ თინა განსხვავებულ შხვა შემთხვევეფშე?

¹² სამსონ ჩქინცალო არასრულყოფილ ადამიან რდჷ დო ათეშენ, კანკალეშა შეცდომეფ მალედ. მაგალთო, ართშა თიცალ გადაწყვეტილება  მიღჷ, მუდგაქ გლახა შედეგეფ მოუღ. სამსონ გვარიან ხანიშ მსაჯულ რდჷ, მუჟამსით ართ ოსურქ, სახელო დალილაქ ქეჸოროფ, მით სორეკიშ ხევშე რდჷ (მსაჯ. 16:4). თიშახ სამსონ ართ ფილისტიმელ ოსურშა რდჷ დანიშნულ, მარა თექ ღორონთიშ ნებათ მოხვად, მუშენდა, მუჭოთ ბიბლიაშე ბგებულენთ, იეჰოვა „მოხუჯურ დროს უჯინედ“, ნამდა სამსონქ ფილისტიმელეფიშ წინააღმდეგ გეგშართკო ობრძოლებშა. უმოს გვიანო, სამსონქ ფილისტინაშ ქალაქ ღაზას ართ მეძავ ოსურიშ ჸუდეს ქუდოსქიდ. თექ ხოლო იეჰოვაშ ნებათ მოხვად. თიქ სამსონს თიშ ძალა ქიმეჩ, ნამდა გეგლანწყკო ქალაქიშ კარმინოლეფ, მუდგაშ შედეგო თე ქალაქ მეტო ვეჸუაფუდ თხილერ ნტერეფშე (მსაჯ. 14:​1—4; 16:​1—3). მარა დალილაშ შემთხვევას საქმე შხვანერო რდჷ. საეგებიოთ, თინა ებრაელ რდჷ დო ვართ ხოლო ფილისტიმელ. თიწკუმა ურთიერთობაშ დოჭყაფა სამსონქ მუშით გინოჭყვიდ დო ვა ჸოფე იეჰოვაშ ნება.

13. მუ გლახა შედეგშა მიჸონ დალილაქ სამსონ?

¹³ დალილაქ ფილისტიმელეფშე ქიანაშ ფარა ეჭოფ დო მანგიორო თინეფწკუმა ოკო გეგმოჩკო სამსონ. სამსონს მანგარო უჸორდჷ დალილა დო ონდუდ თის, ათეშენ თეშით ხოლო ვემშუღალ თიშა ეჭვ დო ვემეხვალამე, მუშ კეთება ულამუდ თის. დალილას შურ აფუდ ეშაღალირ სამსონშა დო ირიათო ოკითხუდ, სოვრეშე უღუდ თეშმადიდა ძალა. ართ დღასით სამსონქ ეძულ დო ქოთ გუცხად სიმართლე. სანარღოთ, ირფელქ თეშ მიდართჷ, ნამდა სამსონქ მიოდინუ მუშ ძალა დო მუდგარენ პერიოდით იეჰოვაშ მოწონა ხოლო (მსაჯ. 16:​16—20).

14. მუ მიკინდუ სამსონქ მუშ დუდშა, დალილას მიენდუნ თიშენ?

¹⁴ სამსონქ იეჰოვაშ მანგიორო დალილას მიენდუნ თიშენ, გლახა ქიმიკინდუ მუშ დუდშა. ფილისტიმელეფქ თინა ოჭოფეს დო თოლეფ გელუღეს. უკულ ტყვეთ მიდეჸონეს ღაზაშა. თაშ ნამდა, ქალაქის, ნამდგას  ულირს კარმინოლეფ გეგლანწყჷ, სამსონ ასე უბრალო მონა რდჷ დო თექიან მახორუეფ მარცვლეულს ოქუაფუანდეს. ფილისტიმელეფ ირნერ შესაძლებლობას გორუნდეს, ნამდა დამცირესკო სამსონ. მაგალთო, ართშა დღესასწაულ მანწყის, სოდეთ მსხვერპლ შეწირეს მუნეფიშ ტყურა ღორონთის, დაგონს, მუშენდა მიორჩქუდეს, ნამდა ზუსტას თიქ ეშუჸოთ ხეშა თინეფს სამსონ, მუნეფიშ ნტერ. თე დღესასწაულიშ დროს ციხეშე სამსონ ქუმაჸონებაფეს, ნამდა გაძიცესკო თის, მუდგათ მანგარო დამცირეს თინა (მსაჯ. 16:​21—25).

15. მუჭო ოძირუ სამსონქ, ნამდა კინ ონდუდ იეჰოვას? (მსაჯ. 16:​28—30; ქოძირით სურათ გალენ გვერდის).

¹⁵ მართალ რე, სამსონქ მანგარო მეჩირთჷ, მარა მუშ შეცდომაშა დუდ ვემუდვალ დო იშენით ოცადუდ, შეასრულკო იეჰოვაშ ნება. თინა ირნერ შესაძლებლობას გორუნდჷ, ნამდა შეასრულკო იეჰოვაშე მეღებულ დავალება დო იბრძოლკო ფილისტიმელეფიშ წინააღმდეგ (წეკითხით მსაჯულეფიშ 16:​28—30). თიქ იეჰოვას თხუ: „ქომუჩ ძალა, ღორონთ, ნამდა მანგიორ გინუგე ფილისტიმელეფს“. ჭეშმარიტ ღორონთიქ ქიმირჩქილუ სამსონიშ ოთხუალ დო კინ ქიმეჩ განსაკუთრებულ ძალა. შედეგო სამსონქ თეშ გემანგარ, ნამდა თე შემთხვევას თიშე უმოს მეტ ფილისტიმელ ჸვილ, ვინემ თეიშახ უჸვილ.

16. მუშ გურაფა შემლებნა სამსონშე?

¹⁶ მართალ რე, სამსონქ დაშებულიშ გურშენ გლახა შედეგეფ მიღჷ, მარა იშენით ვემუტებ იეჰოვაშ ნებაშ შესრულება. თენა ჩქინო ხოლო მაგალით რე. მუდგაინ შეცდომა მუმალენა დო თეშ გურშენ შეგონებას მიბღენთ ვარდა პასუხიშმგებლობას მივოდინუანთ-და, ჩქი ხოლო სამსონცალო ოკო მიფქცუათ დო ვემვოტუათ იეჰოვაშ ნებაშ შესრულება. რშუდან, ჩქინ მოჸოროფე ღორონთ ირიათო მზათ რე, მაპატუან (ფსალმ. 103:​8—10). შეცდომეფიშ უმკუჯინუო, იეჰოვა კინ ქომჩანა ძალას თიშ ნებაშ შეიოსრულებერო, მუჭოთ თენა სამსონიშ შემთხვევას აკეთ.

17, 18. მუქ ელაიკინეს გურშა მაიკლიშ შემთხვევაშე? (ქოძირით სურათ).

¹⁷ გუვარჩუათ ართ ახალგაზრდა ჯიმაშ, მაიკლიშ, მაგალით. თინა იეჰოვაშ მსახურებას ბრელ მუდგარენს ორთუდ. მაგალთო, კრებას მომსახურეთ დო სრულ დროთ პიონერო მსახურენდჷ. თინა თეოკრატიულ საქმეეფს აქტიურო ღებულენდჷ მონაწილებას, მარა მუსხირენ ხანიშ უკულ, მუდგარენს სერიოზულო მეჩირთჷ დო კრებას პასუხიშმგებლობეფ მიოდინუ. თინა იჩიებ: „იეჰოვაშ მსახურებას დუდის ვა ბზოგენდჷ დო მთელ მონდომათ ბღებულენდჷ მონაწილებას თეოკრატიულ საქმეეფს, მარა უცფას დუდ თეშ იბგინ, ითამ ანწ მუთუნიშ კეთება ვეშემლებუდ იეჰოვაშო.  ართ წუთით ხოლო ვამფიქრებ, ნამდა იეჰოვა მიმოტენდჷ, მარა თიშე მაფიქრუაფუდ, კინ თიცალ ურთიერთობა ქუმაღვენუდუო თიწკუმა, მუნერით აიშახ მიღუდ დო კინ თიზმა გუმაკეთებედუო კრებაშო, მუსხისით აიშახ ვორთუდ“.

¹⁸ მაიკლიქ თე ირფელს დუდ ვემუდვჷ დო იმოქმედ. თინა აგრძელენს: „ირნერო ვოცადუდ, იეჰოვაწკუმა ხოლოშიან ურთიერთობა დიფრთინეკო. თეშო ბრელს ბლოცულენდჷ, იბრკვიენდჷ ღორონთიშ სიტყვას დო ფიფქრენდჷ ნაკითხირშე“. მუსხირენ ხანშა, მაიკლიქ დირთინუ პასუხიშმგებლობეფ. ასე თინა უხუცეს დო სრულ დროთ პიონერ რე. თინა გეუძინანს: „და დო ჯიმალეფ, დო განსაკუთრებულო უხუცესეფ, ელამრდეს დო გურშა ელამკინანდეს, მუდგაქ მიმეხვარ, დებრწმუნკო, ნამდა იეჰოვას კინ ვუჸორქ. ასე სუფთა სინდისით ვასრულენქ ჩქიმ პასუხიშმგებლობეფს კრებას. მოხვალამირქ ართ მუდგარენ დუმოგურუ — იეჰოვა აუცილებერო აპატიენს თის, მით ალალას დო მთელ გურით ნარღენს დაშებულს“. ჩქი ხოლო სერიოზულო მეფჩირთუთ დო შეცდომა ქუმმალენა, მარა თიშ გიშასწორებას ირნერო ვეცადებუთ დო კინ იეჰოვას ქიმვენდებუთ-და, შემლებნა დარწმუნებულ ვორდათ, ნამდა თინა გეგმომრინუანა მუშ ნებაშ შეიოსრულებერო დო მაკურთხენა (ფსალმ. 86:5; იგავ. 28:13).

19. მუჭო გუგამანგარეს სამსონიშ მაგალითიქ?

¹⁹ თე სტატიას სამსონიშ ცხოვრებაშე მუსხირენ შემთხვევა გუვარჩით, მუთ ჩქინო ხოლო საინტერესო რე. თინა ვა რდჷ სრულყოფილ, მარა თიშ უკულ, მუთ სერიოზულო მეჩირთჷ იეჰოვაშ წოხოლე, დუდ ვემუდვალ მუშ შეცდომაშა დო ვემუტებ თიშ ნებაშ შესრულება. ვართ იეჰოვას ურთინუაფ ოჭიშ სამსონშა დო თიშ უკულ, მუთ მეჩირთჷ, ხოლო ართშა გეგმირინუ მუშ ნებაშ შეიოსრულებერო. იეჰოვაშ თოლს თინა კინ თიცალ პიროვნება რდჷ, მიდგას ძალიერ რწმენა უღუდ, მუდგაქ თევრეშე იძირ, ნამდა ებრაელეფიშ მა-11 დუდის, თინა მუშ ართგურ ქომოლკათა შქას მიშინუ. მუ ბედნერობა რე თიშ რჩქინა, ნამდა ვომსახურუთ თეცალ მოჸოროფე ზეციერ მუმას, მით ირიათო მზათ რე, გუმამანგარან, განსაკუთრებულო თიმწკუმა, მუჟამსით სირთულეეფ მიღნა. თაშ ნამდა, სამსონცალო, მორთ ჩქი ხოლო ქოფთხუათ იეჰოვას: „ქუგომშინ, რთხინქ, . . . ქომუჩ ძალა“ (მსაჯ. 16:28).