1. მუ დავალება მიღჷ პეტრექ ღურაშახ იეჰოვაშე?

 ᲛᲝᲪᲘᲥᲣᲚ პეტრე წანეფიშ დინახალე ართგურო ომსახურუდ იეჰოვას. თის უღუდ პატი, იქადაგკო იესოწკუმა ართო, სახიოლო ამბე გაგებაფუკო თინეფს, მით ვა რდეს იუდეველეფ დო იმსახურკო ხემძღვანელ საბჭოს. მარა ირფელ თეთ ვათებე. ღურაშახ იეჰოვაქ თინა ხოლო ართ დავალებაშ შეიოსრულებერო გიმირინუ. ახ. წ. 62—64 წანეფს, თიქ ღორონთიშ შთაგონებათ ქრისტიანეფს მეჭარ ჟირ წერილ, ნამუთ ამდღა ბიბლიაშ ნაწილ რე. პეტრეს იმენდ უღუდ, ნამდა მუშ ღურაშ უკულ თე წერილეფ მანგარო მეხვარებუდ ქრისტიანეფს (2 პეტ. 1:​12—15).

2. მუშენ რდჷ დროულ პეტრეშ წერილეფ პირველ საუკუნეშ ქრისტიანეფშო?

² მუჟამსით პეტრექ თე წერილეფ თანაქრისტიანეფს მეჭარ, თინეფ შხვადოშხვა განსაცდელეფს ხვადუდეს (1 პეტ. 1:6). უბადო კათა ქრისტიანულ კრებას ტყურა გურაფეფს ავრცელენდჷ დო და დო ჯიმალეფს უწმინდურ საქციელშე ახნარენდჷ (2 პეტ. 2:​1, 2, 14). თე ირფელს თინა ხოლო გიაძინუდ, ნამდა მალას რომაელეფ განადგურენდეს იერუსალიმს დო ტაძარს, მუდგას თექ მახორუ ქრისტიანეფ მუნეფიშ თოლით ქოძირუნდეს (1 პეტ. 4:7). მუშო ოკო რაგად, პეტრეშ წერილეფ მეხვარებუდ ქრისტიანეფს, გაურზესკო თი განსაცდელეფს, ნამუთ უღდეს დო მემზადესკო მომავალ სირთულეეფშო. b

3. მუ ჯგირობუას მომღანა პეტრეშ წერილეფიშ გიმორკვიება?

³ მართალ რე, პეტრექ თე წერილეფ პირველ საუკუნეშ ქრისტიანეფს მეჭარ, მარა იეჰოვაქ შეიოლებერო გინაშქვჷ, თინეფქ მუშ სიტყვას ქინიჭარკო, ნამდა ჩქი ხოლო მიბღითკო ჯგირობუა თინეფიშ კითხირით (რომ. 15:4). პირველ საუკუნეშ ქრისტიანეფცალო  ჩქი ხოლო შხვადოშხვა სირთულეეფს ფხვადუთ. მაგალთო, ფცხოვრენთ თიცალ ქვეყნიერებას, სოდეთ ადამიანეფ მუთუნო ვემირჩქინანა ზნეობრივ ნორმეფს დო უწმინდურო ცხოვრენა. თეს გეძინელ, ველუთ „დიდ გაჭირებას“, ნამუთ უმოს რთულ გარზებელ იჸუაფ, ვინემ იუდაურ სისტემაშ აღსასრულ რდჷ. პეტრეშ ჟირ წერილს მოჩამილ მნიშვნელოვან რჩევეფ მიმეხვარებნა, შურ მიმოლდან იეჰოვაშ დღაშ მოულაშა, ვემვოტუათ ქადაგება კოჩიშ შიშით დო მთელ გურით მიჸორდან და დო ჯიმალეფ. პეტრეშ წერილეფ უხუცესეფს ხოლო მეხვარებ, ჯგირო შეასრულან მუნეფშა მენდებულ პასუხიშმგებლობა, ნამდა დოჭყიშუან ღორონთიშ ოჭყიშალ.

4. მუჭოთ 2 პეტრეშ 3:​3, 4-შე იძირე, მუქ შილებე დასუსტას ჩქინ რწმენა?

⁴ ამდღა ხალხის ვა ჯერს თი ირფელიშ, მუდგას ბიბლია მომავალწკუმა დაკავშირებით იჩიებ. მოწინააღმდეგეეფქ შილებე ქუგმაძიცუან თიშ გურშენ, ნამდა წანეფ რე, მუთ აღსასრულიშ მოულაშენ ფქადაგენთ დო ველუთ თის. ნამთინე თის ხოლო ფიქრენს, ნამდა თენა დღას ვა მოხვადუ (წეკითხით 2 პეტრეშ 3:3, 4). მობინადრეეფშე, თანამშრომელეფშე ვარდა ოჯახიშ წევრეფშე თეცალ აზრეფს ხშირას ქიფრჩქილუაფუთ-და, შილებე ეჭვეფქ გომრჩქინდან დო რწმენაქ დემესუსტან. მორთ ქობძირათ, მუ რჩევას მარზენა პეტრე თეწკუმა დაკავშირებით.

5. მუ მიმეხვარებნა, სწორ დამოკიდებულება მიღდან იეჰოვაშ დღაშ მიმართ? (2 პეტ. 3:8, 9).

⁵ შილებე ნამთინე ფიქრენდას, ნამდა იეჰოვა იგვიანუანს უბადო ქვეყნიერებაშ განადგურებას. მარა პეტრეშ სიტყვეფ მოხვარნა, ჩქი სწორ დამოკიდებულება მიღდან თე საკითხიშ მიმართ დო გუმოშინანა, ნამდა ადამიანეფიშ გინაწონს, იეჰოვა დროს გვალო შხვანერო უჯინე. თიშო ანთას წანა ართ დღაცალ რე (წეკითხით 2 პეტრეშ 3:8, 9). იეჰოვა ბრელს ითვინენს დო ვაკო, მიდგაინქ გენადგურას, მარა უბადო ქვეყნიერებაშ განადგურებას ართ დღათ ხოლო ვეგნუკინანს. მუშმადიდა პატი რე, ნამდა მიღნა შესაძლებლობა, აღსასრულიშ მოულაშახ მთელ მსოფლიოს ვუქადაგათ ადამიანეფს სახიოლო ამბე.

6. მუ მიმეხვარებნა, შურ მიმოლდან იეჰოვაშ დღაშა? (2 პეტ. 3:11, 12).

⁶ პეტრე ელამჩანა, შურ მოლდან იეჰოვაშ დღაშ მოულაშა (წეკითხით 2 პეტრეშ 3:11, 12). მუჭო რე თენა შეიოლებერ? ჯგირ იჸუაფ, ქივეცადათ, ნამდა ირდღას იფიფქრათ თი კურთხევეფშე, ნამუთ მომავალს მელნა. მაგალთო, წერმიდგინით, ნამდა რეთ ახალ ქვეყნიერებას დო სუნთქენთ სუფთა ჰაერს, ჭკუმუნთ ჯანსაღ ოჭკუმალს, შეხვადუთ თქვან საჸოროფო ადამიანეფს, მით ართ დროს ღურაქ მიდაიღეს დო ასე გეთელეს. წერმიდგინით თინა ხოლო, ნამდა საუკუნეეფიშ წოხოლე მახორუ კათას ოგურუანთ, მუჭო შისრულ ბიბლიურ წინასწარმეტყველებეფქ. თე ირფელს წერმიდგინენთ-და, შურ მიგოლდან იჸი თე ბედნერ დროშ მოულაშა დო ირიათო რშუდან იჸი, ნამდა თე ქვეყნიერება, სოდეთ ფცხოვრენთ, მალას გენადგურებ. ჩქი მიჩქნა მუ მოხვადუ მომავალს, ათეშენ ვევაჸუნუთ თი კათას, მით ტყურეფს ავრცელენს (2 პეტ. 3:17).

7. მუს შილებე მეცილან კოჩიშ შიშიქ?

⁷ ჩქი მიჩქნა, ნამდა იეჰოვაშ დღა მალას მოურს. ათეშენ მოკონა, მუთ შემლებნა ირფელ გუვაკეთათ, ნამდა სახიოლო ამბე გეგნოფჩათ ადამიანეფს. მარა მინშა შილებე ადამიანეფიშ რეაქციაშა მაშქურნან დო გამჭირდან გაბედულო ქადაგებაქ. ქიგიშინით, ნამდა თექ პეტრეს ხოლო აღოლ. იესოშ ღურაშ წოხოლენ სერს თის ხალხშა აშქურინ თიშ რაგადიქ, ნამდა იესოშ მოწაფე რდჷ დო თინა ხოლო ივარუ, ნამდა იჩინენდჷ თის (მათ. 26:​69—75). უმოს გვიანო, პეტრექ გიორჯგინ კოჩიშ შიშის დო თანაქრისტიანეფს თეცალ მუდგარენ მეჭარ: „ვა გაშქურნან თიშა, მუდგაშა შხვეფს ოშქურნა, დო მშვიდას რდათ“ (1 პეტ. 3:14). თე სიტყვეფ თიშა მარწმუნენა, ნამდა პეტრეცალო ჩქი ხოლო შემალებენა გივორჯგინათ კოჩიშ შიშის.

8. მუ მიმეხვარებნა, გივორჯგინათ კოჩიშ შიშის? (1 პეტ. 3:15).

 ⁸ მუ მიმეხვარებნა, გივორჯგინათ კოჩიშ შიშის? პეტრე ელამჩანა: „წმინდა რდას ქრისტე თქვანო, მუჭოთ უფალ“ (წეკითხით 1 პეტრეშ 3:15). თენა ნიშნენს, დეფიფქრათ, მუშმადიდა ძალაუფლება დო ძალა უღჷ ჩქინ უფალ იესო ქრისტეს. ათეშენ, მიდგაინწკუმა სახიოლო ამბეშ ქადაგებაშ შესაძლებლობა ქუმგაჩამნა, მარა გაბედულება ვა დაიბაღნა დო ქუგაშქურნენან-და, წერმიდგინით ზეცას გამეფებულ ჩქინ უფალ იესო ქრისტე, მიდგას მილიონობით ანგელოზ გოურე. თქვან დუდის ქუგაშინით, ნამდა „მთელ ძალაუფლება ზეცას დოვარ დედამიწას“ თის უღჷ დო ირიათო თქვანწკუმა იჸუაფ „თე ქვეყნიერებაშ აღსასრულშახ“ (მათ. 28:​18—20). პეტრე თის ხოლო ელამჩანა, ნამდა ირიათო მზათ ვორდათ ჩქინ რწმენაშ დაცვებელო. შილებე გოკონა, იქადაგათ სამუშას, სკოლას ვარდა შხვა სიტუაციეფს, მარა გიჭირა გაბედულებაშ გიმორჩქინა. თეშ კეთებაქ შეგალებუანინ, წინასწარ დეფიქრით, ნამ სიტუაციეფს შილებე მუგაჩან ქადაგებაშ შესაძლებლობაქ დო მამზადით ორაგადე. იეჰოვას ლოცვას გაბედულება ქოთხით დო დარწმუნებულ რდათ, თინა ქიმგეხვარებნა, გიორჯგინათ კოჩიშ შიშის (საქ. 4:29).

9. მუჭო ვეშიალებუ პეტრეს ჸოროფაშ გიმორჩქინაქ ართ-ართ შემთხვევას? (ქოძირით სურათ).

⁹ პეტრექ დიგურუ, მუჭო ოკო გიმირჩქინკო ნამდვილ ჸოროფა და დო ჯიმალეფიშ მიმართ.  თიქ მუშ ჸუჯით მირჩქილუ იესოშ სიტყვეფ: „ახალ მცნებას გარზენთ: გიჸორდან ართიან! მუჭოთ მა გიჸოროფეთ, თქვა ხოლო თეშ გიჸორდან ართიან!“ (იოან. 13:34). მარა თეშ უმკუჯინუო, უმოს გვიანო, პეტრექ იუდეველ თანაქრისტიანეფიშ შიშით უცხოტომელ და დო ჯიმალეფწკუმა ჭკუმუა მიოტუ. პავლექ პეტრეშ თე საქციელს „თვალთმაქცობა“ გიოდვჷ (გალ. 2:​11—14). უმოს გვიანო, პეტრექ მიღჷ პავლეშ შენიშვნა დო გეთვალისწინ თინა, მუდგაქ მუშ ნაჭარა ჟირხოლო წერილშე იძირ, სოდეთ თინა ელამჩანა, ნამდა და დო ჯიმალეფიშ მიმართ ჸოროფას ხვალე ოკო ვა ბგინაფლენდათინ, ვარინ საქმეეფით ხოლო ოკო ვოძირანდათ, ნამდა მიჸორა თინეფ.

10. მუშ ჭყოლოფათ რე შეიოლებერ ნამდვილ ჯიმალურ ჸოროფაშ გიმორჩქინა? გენწყით (1 პეტ. 1:22).

¹⁰ პეტრე მოციქულ ელამჩანა, თანაქრისტიანეფიშ მიმართ „ნამდვილ ჯიმალურ ჸოროფა“ გიმიფრჩქინათ (წეკითხით 1 პეტრეშ 1:22). თეცალ ჸოროფაშ გიმორჩქინა „ჭეშმარიტებაშ მორჩილებათ“ რე შეიოლებერ. შხვა სიტყვეფით ქოფთქუათინ, თი ირფელიშ მეჸუნათ, მუთ ბიბლიაშე დიბგურეთ. მაგალთო, გებგით, ნამდა „ღორონთ ვეგმირჩქინანს გიშაკერძაფას“, მუთ აღბძრენა, ჩქი ხოლო მივაჸუნათ თიშ მაგალითის (საქ. 10:​34, 35). კრებას ხვალე ნამთინეშ ჸოროფა ქუმაღვენუნან-და, ვეშმალებენა მივაჸუნათ ჩქინდა მოჩამილ იესოშ მითითებას. მუშო ოკო რაგად, არძაწკუმა ართნერ ურთიერთობა ვა მაღვენუნა. იესოშ შემთხვევას ხოლო თაშ რდჷ (იოან. 13:23; 20:2). მარა მუჭოთ პეტრე მოციქულ ელამჩანა, ოკო ვოცადუდათ, თითოულ თანაქრისტიანიშ მიმართ გეგმიფრჩქინათ ნამდვილ ჸოროფა, მუშენდა თინეფ ჩქინ დიდ საჯიმალოშ წევრეფ რენა (1 პეტ. 2:17).

11. მუს ნიშნენს, მთელ გურით მიჸორდან და დო ჯიმალეფ?

¹¹ პეტრე მოციქულქ ელამჩეს, „მთელ გურით“ მიჸორდან ართიან. თენა ნიშნენს, მონდომა ვადვარკათ თის, ნამდა ჸოროფა გეგმიფრჩქინათ და დო ჯიმალეფიშ მიმართ თიმწკუმა ხოლო, მუჟამსით თენა ადვილ ვა რე. მაგალთო, მუჟამსით თანაქრისტიან გურს ქელმოჭუანა ვარდა მანგარო მოწყინუანა, შილებე მანგიორიშ გინოგაფაშ სურვილქ გომრჩქინდან დო ვართ ხოლო ჸოროფაშ გიმორჩქინაშ. ართშა იესოქ პეტრეს ოძირუ, ნამდა მანგიორიშ გინოგაფა მიუღებელ რე იეჰოვაშო (იოან. 18:​10, 11). პეტრექ თეს ჯგირო ქინანჭჷ, ათეშენ თეცალ სიტყვეფ ჭარჷ: „უბადოშ მაკეთებელეფს მანგიორ ვეგნუგათ დო მალანძღარს ლანძღუათ ვა უპასუხათ, თეშ მანგიორო, დოხვამეთ თინეფ“ (1 პეტ. 3:9). თაშ ნამდა, მთელ გურით ჸოროფა აღბძრენა, ჯგირო მივექცუათ თი თანაქრისტიანეფს ხოლო, მით მოწყინებაფუანა.

12. ა) ხოლო მუშ კეთებაშა აღბძრენა მთელ გურით ჸოროფა? ბ) მუშ კეთებას ოკო ეცადათ? (ქუჯინით ვიდეოს „ვადინუათ ართობა, ძვირფას ძღვინ“).

¹² პეტრექ მუშ პირველ წერილს ხოლო ართშა მოძირეს, მუსხით მნიშვნელოვან რე, მთელ გურით მიჸორდან ართიან დო თქუ, ნამდა თეცალ ჸოროფა ხვალე ართ დო ჟირ ცოდას ვარინ „ბრელ ცოდას გინოფორუნს“ (1 პეტ. 4:8). თე სიტყვეფიშ ჭარუაშ დროს, პეტრეს ალბათ ქუგაშინ თიქ, მუთ წანეფიშ წოხოლე იესოშე დიგურუ პატიებაშ გურშენ. ართ დროს პეტრე ფიქრენდჷ, ნამდა შხვას დაშებულს შქვითშა ქაპატიენდჷ-და, დიდ ჭყოლოფას გეგმირჩქინანდჷ. მარა იესოქ უწუ, ნამდა შქვითშა ვარინ 77-შა ოკო აპატუკო, მუთ ირიათო პატიებას ნიშნენდჷ (მათ. 18:​21, 22). თენა ჩქინო ხოლო გაკვეთილ რე. მინშა შილებე ქოძირათ, ნამდა გიჭირა თე რჩევაშ გათვალისწინება, მარა გურ ვეგიტახათ, მუშენდა ხვალე ვა რეთ. მინშა არძას მიჭირა შხვეფშა პატიება. მთავარ რე, მუთ შეილებნან ირფელ გაკეთათ, ნამდა ქაპატუათ თანაქრისტიანს დო დირთინუათ მშვიდობა. c

13. მუშენ შილებე გუჭირდან უხუცესეფს და დო ჯიმალეფშა დროშ გიშართუალაქ?

¹³ პეტრეს ალბათ დღას ვა გაჭყორდუდ, მუ დავალ თის იესოქ გათელებაშ უკულ. თიქ უწუ:  „დოჭყიშე ჩქიმ კირიბეფ“ (იოან. 21:16). იესოშ თე მითითება უხუცესეფს ხოლო ოხუნა, მარა შილებე თინეფშო ირიათო ადვილ ვა რდას, ნამდა დრო გეგმურთან და დო ჯიმალეფს, მუშენდა ბრელ საქმე უღნა. მაგალთო, პირველ რიგის ზრუნენა მუნეფიშ ოჯახიშ ფიზიკურ, ემოციურ დო სულიერ საჭიროებეფშე. თეს გეძინელ, აქტიურო ღებულენა მონაწილებას მსახურებას, ამზადენა მოხსენებეფს კონგრესეფშო დო დავალებათ გიშულა კრებაშ შეხვალამეფს. ნამთინე უხუცეს, საავადმყოფოეფწკუმა თანამშრომლობაშ კომიტეტის ვარდა ადგილობრივ საპროექტო-სამშენებლო განყოფილებას მსახურენს. თაშ ნამდა, თე ძვირფას ჯიმალეფს მართალო ბრელ მუდგარენშა აფნა მიკაჯინალ.

14. მუ მეხვარებ უხუცესეფს, იზრუნან ღორონთიშ ოჭყიშალშე? (1 პეტ. 5:1—4).

¹⁴ პეტრექ მუშ თანაუხუცესეფს ელუჩ, დოჭყიშესკო ღორონთიშ ოჭყიშალ (წეკითხით 1 პეტრეშ 5:​1—4). უხუცესეფ, ჩქი ბჯერა, ნამდა მთელ გურით გიჸორა და დო ჯიმალეფ დო გოკონა, იზრუნათ თინეფშე. მარა მინშა შილებე ბრელ საქმე გიღდან დო მანგარო გეგნოშურდათ, მუდგაშ გურშენ გაიჭირდან თქვან პასუხიშმგებლობაშ შესრულებაქ. მუშ კეთება შეილებნა თე დროს? ლოცვას, ალალას ქუდურაგადეთ იეჰოვას თქვან ოწუხებელიშ გურშენ დო ქუწით, მუს გინაფლენთ. ირიათო რშუდან პეტრეშ სიტყვეფ: „მით მსახურენს, ღორონთიშ ძალაშა დაიმენდებულქ იმსახურას“ (1 პეტ. 4:11). მინშა და დო ჯიმალეფ თიცალ პრობლემეფს ხვადუნა, მუდგაშ მოგვარება თქვა ვეშეილებნა დო ხვალე ახალ ქვეყნიერებას მიგვარებ. ათეშენ, იეჰოვა თქვანდე უბრალოთ თის ითხინს, ნამდა გიჸორდან და დო ჯიმალეფ, დოჭყიშუათ დო მაგალით რდათ თინეფშო. დარწმუნებულ რდათ, „უნჩაშ ჭყიშ“, იესო, გაკეთენს თის, მუდგაშ კეთება თქვა ვეშეილებნა დო იზრუნენს მუშ ჭყიშშა, მუჭოთ ამდღა, თეშ ახალ ქვეყნიერებას ხოლო.

15. მუჭო ზრუნენს ართ უხუცეს და დო ჯიმალეფშე? (ქოძირით სურათ).

¹⁵ ართ ჯიმას, უილიამს, მით ბრელ ხან რე უხუცესო მსახურენს, ჯგირო არჩქილე, მუსხით მნიშვნელოვან რე ღორონთიშ ოჭყიშალშე ზრუნვა. მუჟამსით ᲙᲝᲕᲘᲓ-19 პანდემიაქ დიჭყჷ, თიქ დო მუშ თანაუხუცესეფქ გეგნოჭყვიდეს, ირ მარას ქიმიკითხუესკო მუნეფიშ სამქადაგებლო ჯგუფიშ წევრეფ. უილიამ ენწყუნს, მუშენ აკეთეს თენა. თინა იჩიებ: „თიმ პერიოდის, ბრელ ჩქინ და დო ჯიმაქ ჸუდეს ხვალე ქუდოსქიდ. თე დროს ადვილო შილებე კოჩის უარყოფით ფიქრეფქ ქუმურთას დო გეიაჸუნას თინეფს“. მუჟამსით თანაქრისტიანეფ მუნეფიშ პრობლემეფიშ გურშენ ურაგადნა, უილიამ ყურადღებათ  ურჩქილე თინეფს დო ფიქრენს, მუჭო შეულებ თინეფიშ მოხვარა. თეშ უკულ, ჩქინ ვებგვერდის გორუნს პუბლიკაციეფს დო ვიდეოეფს, მუდგათ შეიალებე გურშა ელუკინას და დო ჯიმალეფს. უილიამ გეუძინანს: „ღორონთიშ ხალხშე ზრუნვა ამდღა თიშე უმოსო რე საჭირო, ვინემ თენა დღას ჸოფე. ხალხის იეჰოვა გუვოჩინებაფუათინ თის მონდომას ვა ვარკენთ-და, ხოლო უმოს მონდომა ოკო ვეგმიფრჩქინათო, ნამდა ქიბზრუნათ ღორონთიშ შხურშე დო ქიმვეხვარათ, ვეგნურთან ჭეშმარიტებაშ შარაშე?!“.

16. მუ დიბგურეთ პეტრეშ წერილეფშე?

¹⁶ თე სტატიას ხვალე მუსხირენ რჩევა გუვარჩით პეტრეშ ჟირ წერილშე დო შილებე ქობძირით, ნამდა მოკონა, მუდგარენეფს ხოლო უმოსო გებუჯგუშათ. მაგალთო, თე წერილეფიშ გარჩიებაშ დროს ქიგებგით, ნამდა მნიშვნელოვან რე, ხშირას იფიფქრათ მომავალ კურთხევეფშე, გაბედულო იფქადაგათ სკოლას, სამუშას ვარდა შხვა სიტუაციეფს, ხოლო უმოსო გეგმიფრჩქინათ ნამდვილ ჸოროფა და დო ჯიმალეფიშ მიმართ დო უხუცეს ქუვორეთ-და, ჸოროფათ დობჭყიშუათ ღორონთიშ ოჭყიშალ. თე საკითხეფშე დაფიქრებაშ უკულ შილებე ქოძირით, ნამდა ნამთინე კუნთხუს გაუჯგუშება გოსაჭირნა. თაშ ქორენ-და, გურ ვეგიტახათ, მუშენდა, მუჭოთ პეტრე მირაგადნა, „უფალ კეთილ რე“. ათეშენ, დარწმუნებულ რდათ, ნამდა თინა ქიმგეხვარებნა (1 პეტ. 2:3). თეს გეძინელ, პეტრე მარწმუნენა, ნამდა „[ღორონთ] მუშით გათენს თქვან მომზადებას. თინა გურშა ელაიკინანა, დო გუგამანგარენა“ (1 პეტ. 5:10).

17. მუს მიბღენთ შედეგო, სისუსტეეფს დუდის ვემუდვანთ დო იეჰოვას ჩქინ მომზადებას გუვოთებაფუანთ-და?

¹⁷ ართ დროს, პეტრე მუშ დუდის თიშ ღირსო ვემირჩქინანდჷ, ნამდა ღორონთიშ სქუაშ გვერდით ჸოფედკო (ლუკ. 5:8). მარა იეჰოვაშ დო იესოშ ელარნათ თიქ დუდ ვემუდვჷ მუშ სისუსტეეფს დო ბოლოშა იესოშ ართგურ მიმაჸუნალ რდჷ. შედეგო, თიქ ღორონთშე დიდებულ ჯილდო მიღჷ. პეტრეშო „ჩქინ უფალიშ დო მარსხებელიშ, იესო ქრისტეშ, მარადიულ სამეფოშ“ კარქ ფართას გინჯჷ (2 პეტ. 1:11). თქვა ხოლო, პეტრეცალო, სისუსტეეფს დუდის ვემუდვანთ დო თქვან მომზადებას იეჰოვას გათებაფუანთ-და, ღორონთშე დიდებულ ჯილდოს, მარადიულ სიცოცხლეს მიღენთ დო ქიმიოჭირინუანთ რწმენაშ საბოლა მიზანს — რსხებას (1 პეტ. 1:9).