მა დებაბდჷ 1983 წანას. ჩქიმ ცხოვრებაშ პირველ წანეფს ჯანმრთელ ბაღანა ვორდჷ, მარა ვით წანას ქიმვოჭირნენ, მთელ სხეულს ქუდმაჭყჷ მანგარ ჭუეფქ. ჟირ წანაშ უკულ, ართ ოჭმარეს, გობკურცხჷ დო დოქანცაფა ვეშემლებუდ. ირნერო ვოცადუდ კუჩხეფს ქუდუქანცეკო, მარა ვეშმალებუ. თი დღაშ უკულ ვეგლამრთუმ. ჩქიმ ლახალაშ გურშენ რდუალა ხოლო მივოტე. ამდღა ბაღანაცალო ჭიჭე ვორექ.

იეჰოვაშ მოწმეეფქ მორთესინ, ლახალაშ გურშენ ჸუდეშე მუსხირენ თუთაშ გიმნალ ვა ვორდჷ. სტუმარეფ მიშესინ, მა იბტყობუდ, მარა თიმ დღას თე ოსურეფს ქიმეფჩჷ საშვალება, ქუდომრაგადუესკო. მუჟამსით სამოთხეშ გურშენ მეჩუეს, ქუგმაშინ მუ მაფუდ თიშ გურშენ გუნაგებ, სოდგარენ ხუთ წანერ ვორდინ. თი დროს ართ მისიონერ, ჯეთრო, ნამუთ სურინამს ცხოვრენდჷ, თუთაშე ართშა მიშჷ ჩქინ სოფელშა დო ჩქიმ მუმას ბიბლიას ოგურუანდჷ. ჯეთრო ჯგირო მოქცუდ დო მანგარო მიჸორდჷ თინა. თეს გეძინელ, ჩქიმ ბებ დო ბაბუქ იეჰოვაშ მოწმეეფიშ მუსხირენ შეხვალამაშა მიდამიჸონეს, ნამუთ ჩქინ სოფელს იტარებუდ. ათეშენ, მუჟამსით ფლორენსიქ, ჩქიმდა მორთესინ თინეფშე ართ-ართიქ, ბკითხჷ, ხომ ვა მოკოდ მეტიშ გაგება, მა ვუწი, ნამდა მოკოდ.

ფლორენსიქ უკულიან მოულას მუშ ქომონჯ იუსტუსწკუმა ართო მორთჷ დო თინეფქ ბიბლიაშ გურაფა ქუდომჭყეს. მუჟამსით ქოძირეს, კითხირ ვა მიჩქუდუნ, ქიმმეხვარეს, ნამდა ქუდომგურუაფუდკო თინა. ჭიჭე ხანშა უკვე ჩქიმით ბკითხულენდჷ. ართ დღას თე წყვილქ მიწუ, ნამდა თინეფ სურინამს დანიშნეს დო თექ ოკო იმსახურესკო. სანარღოთ, ორელას მითინ ვა რდუ თიცალ, მით ბიბლიაშ გურაფას გამგრძელენდჷ. მარა, საბედნეროთ, იეჰოვაქ ვა გომჭყოლიდუ.

თეშ უკულ ბრელ ხანს ვემკურთუმ, მუჟამსით ართ პიონერ და ფლოიდიქ, ქოხეფს მსახურებაშ დროს ქეშეფხვად. ბიბლიაშ გურაფაშ გურშენ რაგად ქუდომიჭყუნ, ქელმაძიცინ. თიქ ბკითხჷ: „მუ გოძიც?“ მა ვუწი, ნამდა უკვე თებულ მაფუდ ბიბლიაშ გურაფა ბროშურათ „მუს ითხინს ღორონთ ჩქინდე?“ დო დოჭყაფილ მაფუდ წიგნით „მარადიულ სიცოცხლეშა მიმაუნაფალ შემეცნება“. * გევუნწყჷ, მუშენ მაფუდ ბიბლიაშ გურაფა მეტებულ. ფლოიდიქ ბოლოშა გემკომუნ „შემეცნებაშ“ წიგნიშ დოსქილადირ დუდეფ, მარა უკულ თინა ხოლო შხვადო დანიშნეს. კინ ბიბლიაშ მასწავლებერიშ უმშო ქუდოფსქიდ.

 მარა 2004 წანას ჟირ სპეციალურ პიონერ, გრანვილ დო ჯოშუა, დანიშნეს ორელას. ქოხეფს მსახურებაშ დროს მა ქეშეფხვადეს. მუჟამსით ბკითხეს, ბიბლიაშ გურაფა ხომ ვა მოკოდ, ქელმაძიცინ. მა ვუწი, ნამდა გურაფა ქუდომჭყესკო წიგნით „შემეცნება“ პირველ დუდშე. თიშ გაგება მოკოდ, იგივეს ქუდმოგურუანდეს დო ვარ, მუთ ჯვეშ მასწავლებერეფქ დუმოგურეს. გრანვილქ მიწუ, ნამდა სოფელს შეხვალამეფ იტარებუდ. მართალ რე, სოდგარენ ვით წანას ჸუდეშე ვა ვორდჷ გიმნაულა, მარა თექ ულა მოკოდ. ათეშენ გრანვილქ მიკომლუ, კალიასკას ქინმოხუნუ დო იეჰოვაშ მოწმეეფიშ დარბაზშა მიდამიონ.

ჭიჭე ხანშა გრანვილქ ელამიჩ თეოკრატიულ მსახურებაშ სკოლას ქენიბჭარკო დუდ. თიქ მიწუ: „სი ფიზიკურო რექ შეზღუდულ, მარა რაგად შეილებ. აკა დღას საჯარო მოხსენებას წეკითხენქ. თეს სი მართალო გაკეთენქ“. თიშ გურიშემაკინალ სიტყვეფქ უმოს თავდაჯერებულო გინმოშქვჷ.

გრანვილწკუმა ართო ქადაგებაშ საქმეს მონაწილებაშ მეღება ქიდიბჭყ. მარა სოფელიშ აკოტახილ შარეფ კალიასკაშო უხუჯურ რდუ. ათეშენ გრანვილს ფთხი, ნამდა კაჭკას ქინმოხუნუკო დო თით გილამიონკო. თექ უჯგუშიქ იჸუ. 2005 წანაშ აპრილს დიბნათ. ჭიჭე ხანიშ უკულ ჯიმალეფქ ქუდმოგურუეს, მუჭო მიკვოჯინკო კრებაშ ლიტერატურას დო აპარატურას.

სანარღოთ, 2007 წანას ჩქიმ მუმაქ ზღვას უბედურ შემთხვევას ქუმოხვად დო დოღურ. ჩქინ ოჯახ მანგარ დამწუხრებულ რდუ. გრანვილ ჩქინწკუმა ართო ლოცულენდჷ დო ბიბლიაშე გურიშემაქექაფალ მონაკვეთეფს ეშამკითხანდეს. ჟირ წანაშ უკულ ხოლო ართ ტრაგედიაქ ქიგმოტირხეს დუდის — გრანვილიშ ნავქ დინწყუ დო თიქ ხოლო დოღურ.

ჩქინ ჭიჭე კრებაქ, ნამუთ თე ამბეშენ მანგარო წუხენდჷ, უხუცესიშ უმშო ქუდოსქიდ, სოდეთ ხვალე ართ მომსახურე რდუ. გრანვილიშ ღურაქ მართალო მანგარ დიდ ჭუა მომღეს; თინა ნამდვილ მეგობარ რდუ, მუშენდა შურდოგურით ზრუნენდჷ ჩქიმ სულიერ დო ფიზიკურ საჭიროებეფშო. თიშ ღურაშ მაჟია მარას კრებას „გინაჯინალ კოშკიშ“ შეხვალამას აბზაცეფ მაფუდ ოკითხე. პირველ ჟირ აბზაც წებკითხჷ, მარა უკულ ნგარაქ გემიოლ დო დუდიქ ვეშმაკავებუ. ათეშენ სცენაშე გიმაულარქ მაჸუ.

დუდ უჯგუშო იბგინ, მუჟამსით ჯიმალეფქ შხვა კრებაშე ჩქინ მახვარებშა ქუმორთეს. თეს გეძინელ, ფილიალქ ჩქინწკუმა დანიშნჷ სპეციალურ პიონერ, ჯიმა კოჯო. მანგარო მახიოლ, მუჟამსით დიაჩქიმქ დო ჩქიმ უკლაშ ჯიმაქ ბიბლიაშ გურაფა ქიდიჭყეს დო დინათეს. თეშ უკულ, 2015 წანაშ მარტის მომსახურეთ დებნიშნჷ. ჭიჭე ხანშა, პირველ საჯარო მოხსენება გუვაკეთ. თიმ დღას ქუგმაშინ, მუ მიწუ გრანვილქ წანეფიშ წოხოლე: „აკა დღას საჯარო მოხსენებას წეკითხენქ. თეს სი მართალო გაკეთენქ“. თიშ დიდ მარდულ ვორდჷ დო ათეშენ თოლეფშე ხიოლიშ ჩილამურეფქ მოლართჷ.

JW მაუწყებლობაშ^® პროგრამაშე თი და დო ჯიმალეფიშ გურშენ გებგჷ, მით ჩქიმცალ მდგომარეობას რდეს. თიშ უმკუჯინუო, ნამდა შეზღუდულ შესაძლებლობეფ უღნა, თინეფ ბრელ მუდგარენს ორთნა დო ბედნერეფ რენა. მა ხოლო შემლებ მუდგარენეფიშ კეთება. მოკოდ, მუთ შემლებუდუნ, ირფელ გუვაკეთკო იეჰოვაშო დო თექ აღბძრჷ, ნამდა სრულ დროთ პიონერო მსახურება ქუდომჭყაფუდკო. 2019 წანაშ სექტემბერს, შურო ვეველუდინ თეშ, ჯგირ ამბე ქიგებგჷ! ჩქინ კრებას, სოდეთ სოდგარენ 40 მაუწყებელ რე, უხუცესო დებნიშნჷ.

მანგარ მარდულ ვორექ თი და დო ჯიმალეფიშ, მით მოგურუანდეს დო მოხვარდეს, ნამდა შევასრულკო ჩქიმ მსახურება. მუთ არძაშ უმოს მთავარ რე, ღორონთიშ დიდო მარდულ ვორექ, მუშენდა იეჰოვას ირიათო ფშუქ.