1, 2. მუშენ შილებე გეუნჭირანდან ამდღა ახალგაზრდა იეჰოვაშ მსახურეფს, მარა მუ საშვალებეფი მეხვარებ თინეფს თე დროს?

„მანგარ გასაკვირ რე, სქანცალ ჭკვერ ძღაბის ღორონთ წანდასინ“ — უწუ ამხანაგიქ ართ ჩქინ ახალგაზრდა დას, ნამუთ ბრიტანეთის ცხოვრენს. გერმანიას ცხოვრენსინ ფერ ჯიმაქ თქუ: „ჩქიმ მასწავლებელეფს, მუსით ბიბლია ღორონთიშ გუნაჭყეფშენ იჩიებუნ, მოგონილო მიორჩქუნა დო ფიქრენა, ნამდა სტუდენტეფს ევოლუციაშ ოკო ჯერდან“. ახალგაზრდა და, ნამუთ საფრანგეთის ცხოვრენსინ, იჩიებ: „ჩქიმ სკოლაშ მასწავლებელეფს უკვენა, მუჟამსით გებულენა, ნამდა დიო ხოლო რენა თიცალ მოწაფეეფი, მიდგასით ბიბლიაშ ჯერს“.

² ახალგაზრდეფი, მით იეჰოვაშ მსახურეფ რეთ დო თქვა, მით ბიბლიას გურაფლენთ, ხომ ვეგეინჭირანა, ნამდა გუმაჭყაფალიშ მანგიორო თიცალ პოპულარულ თეორია ქიდეჯერათ, მუნერით ევოლუცია რე? თაშ ქორენ-და, არსებენს მუსხირენ საშვალება, ნამუთ გაიმანგარენს რწმენას დო შეგალებე თიშ დაცვება. ართ-ართ საშვალება, ღორონთშე მოჩამილ ფიქრიშ უნარ რე. თენა დაიცვენს ქვეყნიურ ფილოსოფიეფშე, ნამუსით შეულებ მეიდინუას რწმენა (წეკითხით იგავეფიშ 2:10—12).

3. მუს გენიფხილენთ თე სტატიას?

³ ნამდვილ რწმენა გერსხილ რე ღორონთიშ გურშენ ზუსტ რჩქინაშა (1 ტიმ. 2:4). ათეშგურშენ ღორონთიშ სიტყვა დო ჩქინ პუბლიკაციეფ ზერელეთ დღას ვეკითხა. გეგმირინე ფიქრიშ უნარი,  ნამდა ქენანჭე ნაკითხირს (მათ. 13:23). ქობძირათ, მუჭო მიგეხვარებ, თენა გემანგარე გუმაჭყაფალ ღორონთიშ დო ბიბლიაშ რწმენა. ღორონთიშ არსებობაშა დო ბიბლიაშ სანდოობაშა მარწმუნენანფერ მტკიცებულებეფი ბრელ მიღუნა (ებრ. 11:1).

4. ღორონთი ბწანან დო ვარ ევოლუციაშ, მუშენ რე საჭირო რწმენა ჟირ ხოლო შემთხვევას დო ჩქი მუ ოკო ვაკეთათ?

⁴ დღას ქოუთქუალნანო სქანდა, ნამდა ევოლუციაშ თიშენ ჯერა, თინა მეცნიერებაშა რე გერსხილ დო ღორონთიშ არსებობა ხვალე რწმენაშა? ბრელ ფიქრენს თაშ. მარა ფშუდან, ნამდა ვა უღუ მნიშვნელობა ღორონთ ბწანან დო ვარ ევოლუციაშ ბჯერა, ჟირხოლო შემთხვევას რწმენა რე საჭირო. მუშენ? ნამთინს ვა მაფნა დღას ნაძირეფ ღორონთი დო ვართ თინა, მუჭო გორჩქინდ მუთუნქ (იოან. 1:18). კოცს ვაფუ ნაძირეფ დო ვართ მეცნიერეფს უძირუნა, მუჭო გორჩქინდ ართ სახეობაშე მაჟია სახეობაქ. დღას ვაფუ მითინს ნაძირეფ, გვერშე ვარდა ტინტილაშე თუნთიქ ვარდა ჯილოქ გორჩქინდკონ (იობ. 38:1, 4). თაშ ნამდა, სწორ დასკვნა გუვაკეთათინ, გეგმიბრკუათ ოკო თე მტკიცებულებეფი დო გეგმიბრინუათ ფიქრიშ უნარი. ღორონთიშ გუნაჭყეფუშ გურშენ პავლე მოციქულ იჩიებ: „[ღორონთიშ] თიშ უძირაფ თვისებეფი — მარადიულ ძალიერება დო ღორონთიერება — კარაკანო რჩქუ ქიანაშ გოჭყაფაშე, მუშენდა თე ირფელ გუნაჭყეფშე იძირე, თაშ ნამდა, თინეფს გამართლება ვა უღუნა“ (რომ. 1:20).

5. მუ საშვალებეფ უღუ ღორონთიშ ხალხის, ნამდა ქენანჭან შხვადოშხვა საკითხეფს?

⁵ „მეხვალამა“ ნიშნენს თიშ აღიარებას, მუთ შილებე ართუცფას თოლით ვეძირედას ვარდა ვარჩქუდას (ებრ. 11:3). მეხვალამირ კათა, ხვალე მუნეფიშ თოლეფს დო ჸუჯეფს ვარინ, მუნეფიშ გონებას ხოლო გიმირინუანა. იეჰოვაშ ორგანიზაციას გიშაშკუმალირ აფუ ბრელ პუბლიკაცია, სოდეთ ჯგირო გიმორკვიებულ ინფორმაცია რე მოჩამილ, ნამუთ მოხვარუნა ჩქინ გუმაჭყაფალ რწმენაშ თოლეფით ქობძირათ (ებრ. 11:27). თეცალ მასალაშა მიშურს ვიდეოფილმი „სარკო ქმნილებეფშე ღორონთიშ დიდება იძირე“, ბროშურეფ „მუშით გორჩქინდუო სიცოცხლექ?“, „სიცოცხლეშ გოჭყაფა — ხუთ კითხვა, ნამდგაშეთ ღირ დაფიქრება“ დო წიგნი „არსებენსო მზრუნველ გუმაჭყაფალ?“. ჩქინ ჟურნალეფს მოჩამილ რე ნოყიერ სულიერ ოჭკუმალ, ნამუთ ფიქრის მოხვარუნა. ჟურნალ  „გამოიღვიძეთ“-ის იბეშტუ მეცნიერეფწკუმა დო შხვადოშხვა პროფესიაშ კათაწკუმა ეჭოფილ ინტერვიუეფი, მით იჩიებუნა, მუშენ დეჯერეს თინეფქ ღორონთიშ არსებობა. რუბრიკაშე „მიქ გაჭყუ?“, ბგებულენთ თი სარკო ქმნილებეფშენ, ნამუსით ბუნებას შეფხვადუთ. მეცნიერეფ ოკვირუნა თე ქმნილებეფს დო გიმირინუანა მუნეფიშ იდეეფიშ რეალიზებაშო.

6. მუ ჯგირობუა მოუღ თი საშვალებეფიშ გიმორინაფას, ნამუსით ჩქინ ორგანიზაცია მარზენა დო პირადო სი მუჭო გოხვარ თე ირფელ?

⁶ ჟიშე მოშინაფილ ჟირ ბროშურაშ გურშენ ართ 19 წანერ ჯიმა, ნამუთ ამერიკას ცხოვრენს, იჩიებ: „მანგარო მიმეხვარ თე ბროშურეფქ. არძაშ უნაკლებაშ ვითშა ქუმაფ თინეფ კითხირებულ“. საფრანგეთის ცხოვრენსინ ფერ ართ დაქ თქუ: «მანგარო მობწონს სტატიეფი „მიქ გაჭყუ?“. თე სტატიეფშე იძირე, ნამდა არძაშ უმოს ჭკვერ ინჟინერეფს შეულებნა ქიმიოგურუან ბუნებას ასრებენან თი ქმნილებეფს დო თეშ გაკეთან მუდგაინ, მარა თინეფს დღას ვეშიალებენა რთულ ქმნილებეფიშ ზუსტი ანალოგიშ გოჭყაფა». სამხრეთ აფრიკას მახორუ 15 წანერ ახალგაზრდაშ მშობლეფი იჩიებუნა: «პირველ რიგის, ჩქინ ძღაბ ჟურნალ „გამოიღვიძეთ-შე“ კითხულენს და დო ჯიმალეფიშ ინტერვიუეფს». ქიგმირინუანქო თე საშვალებეფს? თენა გაიმანგარენს რწმენას დო სქან რწმენა იჸუაფ მანგარ ჯინჯამ ჯაცალ, ნამუთ ურზუ ქარბორიას. თეგვარო, შეგალებე დუდი დეცვე ტყურა გურაფეფშე (იერ. 17:5—8).

7. მუშენ ოკო ღორონთის, გეგმირინუე ფიქრიშ უნარი?

⁷ მუთუნ გლახა ვარე ბიბლიაშ გურშენ კითხვეფი ქოიღუნ-და. იეჰოვა ღორონთის ოკო, გააზრებულ გაფუდას ჭეშმარიტება დო ხვალე შხვეფს წანან თიშ გურშენ ვა რწანდას თინა. თაშ ნამდა, გეგმირინე ფიქრიშ უნარი დო მიღი ზუსტი რჩქინა, ნამუთ ნამდვილ რწმენას ავითარენს (წეკითხით რომაელეფიშ 12:1, 2; 1 ტიმოთეშ 2:4). შხვადოშხვა საკითხიშ გიმორკვიება მიგეხვარებ, მიღე თეცალ რჩქინა.

8, 9. ა) მუნერ საკითხეფიშ გიმორკვიება ოინტერეს ნამთინეს? ბ) მუჭო მეხვარ ნამთინეს დაფიქრებულო კითხირქ?

⁸ ნამთინე ირკვიენს ბიბლიურ წინასწარმეტყველებეფს დო თიშ დამამტკიცებელ ფაქტეფს, ნამდა ბიბლია ისტორიულო, არქეოლოგიურო დო მეცნიერულო ზუსტ რე. ართ-ართ მნიშვნელოვან წინასწარმეტყველება მოჩამილ რე დაბადებაშ 3:15-ის. თე მუხლშე იძირე, ნამდა ბიბლიაშ მთავარ თემა რე სამეფოშ საშვალებათ ღორონთიშ უზენაესობაშ დამტკიცება დო თიშ სახელიშ განწმენდა. თე მუხლის სიმბოლურ ნინათ ეჭარილ რე, მუჭო მუღენს ბოლოს იეჰოვა ირნერ ტანჯებას, ნამუქით ედემიშ ბაღის დიჭყუ. მუჭო შეილებუნა დაბადებაშ 3:15-ის ინოჭარილ წინასწარმეტყველებაშ გიმორკვიება? შეილებუნა გეგმირკუათ თი ბიბლიურ მუხლეფი, სოვრეშეთ იძირე, მუჭო ამჟღავნენდ ღორონთი ჭიჭე-ჭიჭეთ დაბადებაშ 3:15-ის ინოჭარილ წინასწარმეტყველებას დო მუშ განზრახვას. თე მუხლეფიშ ჰარმონიულობა დუგარწმუნენს, ნამდა წინასწარმეტყველეფს დო ბიბლიაშ მაჭარალეფს ღორონთიშ წმინდა შურ ხემძღვანელენდ (2 პეტ. 1:21).

⁹ გერმანელ ჯიმაქ თქუ: „სამეფოშ თემა მთელ ბიბლიას ჭითა ხაზო გოჸუნს. თენა მართალო თაშ რე, თიშ უმკუჯინუო, ნამდა ბიბლია 40-შახ ქომოლკოჩიქ ჭარუ. თინეფიშ უმენტაშ შხვადოშხვა დროს ცხოვრენდ დო ართიანს ვეჩინენდ“. ართ ავსტრალიელ დას მანგარო მეწონ 2013 წანაშ 15 დეკემბერიშ „საგუშაგო კოშკის“ ბეშტელ სტატიაქ, სოდეთ პასექიშ მნიშვნელობა რდუ ენწყილ. თე მნიშვნელოვან ღონისძიება ოხუ დაბადებაშ 3:15-ის ინოჭარილ წინასწარმეტყველებას დო მესიაშ მოულას. და იჩიებ: „თე სტატიაშე ქიგებგი, მუ სარკო ღორონთ რე იეჰოვა. მანგარო იმოქმედ თიშ გაგებაქ, ნამდა პასექიქ, ნამუთ ისრაელეფშო  რდუ მოფიქრებულ, უმოს გვიანო კილკილშა შესრულ იესოშა. პირდაპირ გაგებათ გაბჩერდ დო დეფიფქრი, მუშმადიდა წინასწარმეტყველურ მნიშვნელობა უღუდ პასექიშ ოსერშეს“. მუშენ იმოქმედ დაწკუმა თე სტატიაქ თეშმამწარათ? მუშენდა თიქ კითხირიშ დროს ტომბაშო დეფიქრ დო ქენანჭ თის. თექ რწმენა გუმანგარ დო დაახლოვ იეჰოვას (მათ. 13:23).

10. მუჭო მიმანგარენა ბიბლიაშა რწმენას თიშ მაჭარალეფიშ პატიოსნება?

¹⁰ რწმენას მიმანგარენა თი გაბედულ დო პატიოსან კათაშე ფიქრი, მიდგაქ ბიბლია ჭარუ. ჯვეშო მაჭარალეფიშ უმენტაშ მუნეფიშ ლიდერეფშენ ხვალე ჯგირს ჭარუნდეს დო განადიდენდეს თინეფიშ სამეფოეფს. მარა იეჰოვაშ წინასწარმეტყველეფ ირიათო მართალს იჩიებუდეს. თინეფ ხვალე მუნეფიშ ხალხიშ ვარინ, მეფეეფიშ შეცდომეფს ხოლო ვაფულუნდეს (2 მატ. 16:9, 10; 24:18—22). ბიბლიაშ მაჭარალეფი ქოთ მუნეფიშ შეცდომეფს აღიარენდეს დო ქოთ ღორონთიშ შხვა მსახურეფიშ (2 სამ. 12:1—14; მარ. 14:50). „მართალ ქოთქუენ, თეცალ მუდგარენ მანგარ იშვიათ რე. თენა უმოსო მარწმუნენა, ნამდა ბიბლია მართალო იეჰოვაშ მოჩამილ რე“,— იჩიებ ართ ახალგაზრდა ჯიმა, ნამუთ ბრიტანეთის ცხოვრენს.

11. მუჭო შეულებუნა ახალგაზრდეფს, უმოსო დაფასან ბიბლიურ პრინციპეფ?

¹¹ ბრელქ დერწმუნ, ნამდა ბიბლია ღორონთიშ შურით რე ჭარილ, მუშენდა ბიბლიაშ ხემძღვანელობაშ მეჸუნას ჯგირობუა მოუღ (წეკითხით ფსალმუნიშ 19:7—11). ართ ახალგაზრდა და, ნამუთ იაპონიას ცხოვრენს, იჩიებ: „მუჟამსით ჩქინ ოჯახი ბიბლიურ პრინციპეფს მეჸუნდუნ, თე დროს მართალო ბედნერეფ ვორდით. ოჯახის მშვიდობა, ართობა დო ჸოროფა მიღუდეს“. ბიბლიურ პრინციპეფი მოხვარუნა, მუთუნ საერთო ვამღუდან ცრუ თაყვანიშცემა დო ცრურწმენაწკუმა, ნამუსით ბრელ აფუ დამონებულ (ფსალმ. 115:3—8). ქეშულებნანო ხალხიშ ცხოვრება გაუჯგუშან ფილოსოფოსეფს, მით აცხადენს, ნამდა ღორონთი ვა არსებენს? ევოლუციაშ თეორია ღორონთიშ ძალას ბუნებას მიოჭარანს, მუთ სინამდვილეს ღორონთის ოკუთვნუ. ღორონთიშ არსებობა ვაჯერან თი კათა ამტკიცენს, ნამდა ჩქინ მომავალ მთლიანო ჩქინ ხეს რე. მარა თინეფს უჯგუშ მომავალიშ იმენდ ვამაჩინენა (ფსალმ. 146:3, 4).

12, 13. მუჭო შეილებ იმსჯელე თანაკლასელეფწკუმა, მასწავლებელეფწკუმა ვარდა შხვეფწკუმა გუმაჭყაფალიშ არსებობაშენ ვარდა ბიბლიაშ გურშენ?

¹² მუჭო შეილებუ შხვეფწკუმა იმსჯელე გუნაჭყეფშენ დო ბიბლიაშენ თეშ ნამდა, ჯგირ შედეგიქ ქუმაჸუნას? პირველ რიგის, უცფას ვეფიქრა, ნამდა გიჩქუ მუ წანა შხვეფს. კანკალე, შილებე იჩიებუდას, ნამდა ჯერს ევოლუციაშ, მარა ვარე გამორიცხულ ღორონთიშ არსებობაშ ხოლო წანდას, მუშენდა თინეფიშ აზრით, ღორონთიქ ევოლუციათ გაჭყუ სიცოცხლეშ შხვადოშხვა ფორმა. მინ იჩიებ, ნამდა ევოლუცია სწორ ვარდასინ, თის სკოლას ვაგურუანდან იჸი; ათეშგურშენ ჯერს თიშ. მინს ხოლო ვა წანს ღორონთი, მუშენდა რელიგიაქ გურ გოუტახ. თაშ ნამდა, მუჟამსით მითინწკუმა სიცოცხლეშ გოჭყაფაშენ მსჯელენქინ, ჯგირ იჸი, პირველ რიგის, კითხვეფი ქუდასვე დო ქიგეგე, მუ წანს პიროვნებას. თაშ ნამდა, შურდოგურით ქურჩქილექინ, შილებე სი ხოლო ქუმოირჩქილუან (ტიტ. 3:2).

¹³ გუმაჭყაფალ რწანსინ თიშ გურშენ მითინ ქუგონირზუნ-და, შეილებ ტაქტიანო ქოთხუე, გეინწყას, მუჭო გორჩქინდ თიშ აზრით სიცოცხლექ გუმაჭყაფალიშ უმშო. სიცოცხლეშ პირველ ფორმას არსებობა გუგრძელებუდკონ, თის მუშ ასლიშ წარმოქმნაშ უნარი ოკო უღუდკო. ართ პროფესორქ ქიმიაშ დარგის თქუ, ნამდა თეშო საჭირო იჸიდ: 1) იცვენსინფერ მემბრანა, 2) ენერგიაშ გამოყოფა დო ხარჯებაშ უნარი, 3) გენეტიკურ ინფორმაცია დო 4) გენეტიკურ ინფორმაციაშ ასლიშ წარმოქმნაშ უნარი. თე  პროფესორი იჩიებ: „სიცოცხლეშ არძაშ უმოს მარტივ ფორმა ხოლო რთულ აგებულებაშ რე“.

14. მუ ოკო აკეთე, ვა რექ მომზადებულ, ქიმსჯელე ევოლუციაშენ დო გუნაჭყეფუშ გურშენ-და?

¹⁴ ქოფიქრენქ, ნამდა ვა რექ მზათ, ევოლუციაშენ დო გუმაჭყაფალიშ გურშენ შხვეფწკუმა ქიმსჯელე-და, შეილებ ქუმუჸონენ უბრალო მაგალით, ნამუთ პავლექ გიმირინუ. თიქ თქუ: „ირ ჸუდე მიდგარენიშ აშენებულ რე, ირფელიშ მაშენებელ ღორონთი რე“ (ებრ. 3:4). თეცალ ლოგიკურ მსჯელობა ნამდვილო ეფექტურ რე, მუშენდა ნამთინ რთულ კონსტრუქცია უმაღლეს ინტელექტიშ უმშო ვაგორჩქინდუდ. შეილებუნა გეგმირინუათ თე საკითხის ოხუნ ფერ პუბლიკაციეფ ხოლო. ართ დაქ ახალგაზრდა ქომოლკოჩწკუმა მსჯელობაშ დროს, გიმირინუ ჟიშე მოშინაფილ ჟირ ბროშურა დო ბოლოს ქუდუტუ. თის ევოლუციაშ ჯერდ დო ვა წანდ ღორონთიშ არსებობა, მარა სოდგარენ ჟირ მარაშა, მუჟამსით თე ბროშურეფ წეკითხუნ, თიქ თქუ: „ასე უკვე ბწანს ღორონთი“. თე ახალგაზრდაქ ბიბლიაშ გურაფა ქიდიჭყუ დო ამდღა იეჰოვაშ მოწმე რე.

15, 16. მუჭო შეილებ იმსჯელე შხვეფწკუმა ბიბლიაშ გურშენ დო მუ ოკო რდას სქან მიზანი?

¹⁵ შეილებ თეცალ პრინციპეფიშ გიმორინაფა, თინეფწკუმა ხოლო, მიდგას საეჭოთ მიორჩქუ ბიბლია. ქიგეგი, სინამდვილეს, მუ წანს პიროვნებას დო მუ საკითხეფ ოინტერეს (იგავ. 18:13). მეცნიერულ საკითხეფ ოინტერესუნ თიქ, შილებე ქუმოირჩქილუას, მუჟამსით ქუმუჸუნანქ თიშ ფაქტეფს, ნამდა ბიბლია მეცნიერულო ზუსტ რე. შხვეფშო შილებე საინტერესოქ იჸუას თი მაგალითეფიშ ძირაფაქ, სოვრეშეთ იძირე, ნამდა ბიბლიურ წინასწარმეტყველებეფ კილკილშა ისრულებუაფ დო თინა ისტორიულო ზუსტ რე. შეილებ მიშინუე ბიბლიურ პრინციპეფი, ნამუთ პრაქტიკულ რე დო აუჯგუშენს ცხოვრებას. მაგალთო, შეილებ ქუმუჸუნე თი პრინციპეფი, ნამუშ გურშენ იესოქ გვალას ქადაქებაშ დროს იჩუ.

¹⁶ ქორშუდას, სქან მიზან რე, მუდგას ქადაქენქინ თიქ კოჩიშ გურს ოკო შეხუას დო ვართ ხოლო მითინწკუმა ინირზენ. თაშ ნამდა, რდა ჯგირ მარჩქილე. ქუდასვი კითხვეფი, გეგმოხანტ სქან აზრი ლიბას დო პატიცემათ, განსაკუთრებულო, მუჟამსით სქანდე უნჩაშეფს ურაგადუქ. თაშ ქიმიქციებუქ-და, შილებე თინეფქ უმოსო დაფასან სქან აზრი. თეშ გარდა, თის ხოლო ქოძირუნა, ნამდა სქან რწმენა გერსხილ რე რჩქინაშა. ამდღა ბრელ ახალგაზრდა თაშ ვექციებ. მარა მუშო ოკო რაგად, ვა რექ ვალდებულ უპასუხე თინეფს, მიდგა სქან რწმენას აკრიტიკენს ვარდა გიაძაცანს (იგავ. 26:4).

17, 18. ა) მუჭო შეილებ გურშა გენიღე ჭეშმარიტება? ბ) მუს გენიფხილენთ ანწიან სტატიას?

¹⁷ შილებე მიჩქუდან ბიბლიაშ მთავარ გურაფეფი, მარა მანგარ რწმენაშო უმოს მეტ რე საჭირო. განძის გორუნდენ თეშ, ღორონთიშ სიტყვა ხოლო ტომბაშო გეგმირკვი (იგავ. 2:3—6). გეგმირინე შხვადოშხვა საშვალება, ნამუთ ხეშამალაფარ რე სქან ნინაშა, მაგალთო, საგუშაგო კოშკიშ ბიბლიოთეკა, ონლაინ ბიბლიოთეკა, „საგუშაგო კოშკიშ პუბლიკაციეფიშ ოგორალ“ დო „საკვლევი სახელმძღვანელო“. მიზანო გიღუდას, ბიბლია დუდშე ბოლოშა ართ წანაშა წეკითხე, მუშენდა ღორონთიშ სიტყვაშ კითხირ არძაშ უჯგუშ საშვალება რე რწმენაშ გამანგარებელო. ართ სარაიონო ზედამხედველ იშინანს, მუჭო მეხვარ ღორონთწკუმა დაახლოებას ბიბლიაშ კითხირქ ახალგაზრდობას. თინა იჩიებ: „ბიბლიაშ დუდშე ბოლოშა კითხირქ დუმარწმუნ, ნამდა თინა ნამდვილო ღორონთიშ სიტყვა რე დო ჭიჭენობას ნაგურეფ ბიბლიურ ისტორიეფს ბოლოშა ქინვანჭი. თექ მანგარო მიმეხვარ, სულიერო მიბრდიკონ“.

¹⁸ მშობლეფი, თქვან ხეს რე თქვან სქუალეფიშ სულიერ რდუალა. მუჭო შეილებუნა ქიმეხვარათ თინეფს, უღუდან მანგარ რწმენა? თე საკითხის ანწიან სტატიას გუვარჩიენთ.