„ვეგმუკინა ხელეფს“
„ვეგმუკინა ხელეფს“ (სოფ. 3:16).
ობირეშეფი: 81, 32
1, 2. ა) მუ პრობლემეფს შეფხვადუთ დო მუ რე თეშ შედეგი? ბ) მუ იმენდის მარზენა ესაიაშ 41:10, 13?
ართ პიონერ და, ნამუთ უხუცესიშ ოსურ რე, იჩიებ: „მართალ რე, ჯგირ სულიერ განრიგის მეპჸუნქ, მარა ბრელ ხან რე ვობრძოლუქ ნერვულ აშლილობას. თექ ლურ მიდამიღ დო ჯამრთელობა მემდინუ; თენა შხვეფწკუმა ურთიერთობას ხოლო მოცილ. მინშა ირფელს მოკო დუდ დუვანებე დო ჩქიმო ვორდე“.
2 ნაჩინებ რენო თე დაშ მდგომარეობა თქვანო? მუ გლახა რე, სატანაშ უბადო ქიანა ირნერო გემჭირანა, ბრელ ოწუხებელს მირჩქინანა დო გინოფშულიდუნა. თენა გუ გემიშ ღუზას, ნამუსით გემი ართ ადგილს აფუ გაჩერებულ დო ულაშ საშუალებას ვარზენს (იგავ. 12:25). მუშენ შილებე თაშ იბგინათ დუდი? თეშ მიზეზი შილებე შხვადოშხვა მუთუნ რდას, მაგალთო, საჸოროფო ადამიანი მაფუდან ღურელ, ვარდა მაწუხენდან ლახალა, მიჭირდან ოჯახიშ ეჯუმაფა დო რწმენაშ გურშენ წინააღმდეგობეფს შითმოფხვადუდათ. თეცალ პრობლემეფს მოჸუნს სტრესი, ნამუთ ჭიჭე-ჭიჭეთ ძალეფს მიდამღანა; თექ შილებე ხიოლ ხოლო მემდინუან. მარა ბჯერდან, ღორონთი მზათ რე ირო მიმეხვარან (წეკითხით ესაიაშ 41:10, 13).
3, 4. ა) მუ გაგებათ გიმირინუანს ბიბლია სიტყვა „ხელეფს“? ბ) მუქ შილებე ხელეფ გიმმოკუნაფუან?
3 ბიბლია ხშირას კოჩიშ სხეულიშ ნაწილეფს შხვადოშხვა თვისებაშ ვარდა მოქმედებაშ ეიოჭარალო გიმირინუანს. მაგალთო, ხე ოშობით ადგილს რე მოშინაფილ ბიბლიას. ხელეფიშ გამანგარებას იგულისხმებ გურიშ ელაკინა დო გამანგარება, ნამდა ართ ადგილს ვაგაჩერდე დო იმოქმედე (1 სამ. 23:16; ეზრ. 1:6). თენა შილებე მომავალს იმენდიშ თოლით დო ოპტიმისტურო უჯინათინ თის ხოლო ნიშნენდას.
4 მინშა ხელეფი გიმუკინუა, სიმბოლურო თიცალ კოჩიშ გურშენ იჩიებუნა, ნამუსით გურ აფუ გოტახილ ვარდა მუთუნიშ იმენდი ვა უღუ (2 მატ. 15:7; ებრ. 12:12). თეცალ დროს კოჩის ირფელშა გურ ეუჸოლუ. მუ მიგეხვარებუნა, მუჟამსით ფიზიკურო, ემოციურო დო სულიერო დონთხაფილ რეთინ? მუ მერჩანა ძალეფს, მითვინათ დო ვადინუათ ხიოლ?
„იეჰოვაშ ხე ვადაკუნტარებე თეშ, ნამდა ვეშიალებუას რსხებაქ“
5. ა) მუჭო შილებე მიფქცუათ პრობლემეფიშ დროს, მარა მუქ ოკო ვაგმოჭყორდან? ბ) მუს გენიფხილენთ თე სტატიას?
5 წეკითხით სოფონიაშ 3:16, 17. თიშ მანგიორო, ნამდა მაშკურინან დო გურქ გომტირხანინ, ნამუთ ხელეფიშ გიმოკინაცალ იჸი, ჩქინ ოწუხებელ მზრუნველ მუმა იეჰოვას ოკო მივანდათ (1 პეტ. 5:7). ჩქი გურშა ოკო მიბღათ თი სიტყვეფი, ნამუთ ღორონთიქ ისრაელეფს უწუ, ნამდა თიშ „ხე ვადაკუნტარებე თეშ, ნამდა ვეშიალებუას რსხებაქ“ (ეს. 59:1). თე სტატიას გუვარჩიენთ სუმ ბიბლიურ მაგალითის, სოვრეშეთ იძირე, ნამდა ღორონთის სურვილით უღუ დო ძალათ, გამანგარას მუშ ხალხი დო თინეფქ პრობლემეფიშ უმკუჯინუო შეასრულან თიშ ნება. დეფიქრით თიშე, მუჭო შეულებ თე მაგალითეფს ჩქინ გამანგარება.
6, 7. მუს ბგურაფლენთ ისრაელეფქ ამალეკელეფს დარჯგინესინ თიშე?
6 მუჟამს ისრაელეფქ მონობაშე გენთავისუფლეს დო ეგვიპტეშე მოლართესინ, ბრელ დროს ვამკურთუმუნ თეშ თინეფს ამალეკელეფქ ქიგიანთხეს. გაბედულ იესო ნავეშ სქუაქ მოსეშ ხემძღვანელობაშ თუდო ისრაელეფს ქეწაჸუნ ჩხუპიშ დროს. მოსექ, აარონქ დო ხურქ ემაღალია ადგილშა გეკორთეს, სოვრეშეთ ჯგირო იძირედ ჩხუპი. აშკურნესო თინეფს დო თიშ გურშენ ენტესო ჩხუპის? შუროთ ხოლო ვარ!
7 მოსექ თიცალ გეგმა გიმირინუ, ნამუქით მაგებაფუ ისრაელეფს. მოსეს ჭეშმარიტ ღორონთიშ კეტი უკინებუდ დო ჟი, ცაჸურე აფუდ ეკუნელ. ონდო მოსეს ხელეფი ეკუნელ აფუდუნ, იეჰოვა ამანგარენდ ისრაელეფიშ ხელეფს დო თინეფ უგენდეს ამალეკელეფს. მარა მუჟამსით, მოსეს ხელეფ დემონკებუდ დო გიმოკინას დიჭყანდუნ, ამალეკელეფ ორჯგინანდეს ისრაელეფს. მუჟამსით მოსეს ხელეფქ დემონკუნ, აარონ დო ხურქ უცფას გეჭოფეს ქუა, ქუდოდვეს დო თექ მოსექ ქუდოზოჯ. აარონს დო ხურს მოსეშ ხელეფი უკინებუდეს, ართის ართ მხარეშე, მაჟიას მაჟია მხარეშე ბჟაშ ინულაშახ. თეგვარო, ისრაელეფქ ღორონთიშ ძალიერ ხეშ ჭყოლოფუათ მიგეს (გამ. 17:8—13).
8. ა) მუჭო მიქცუ ასაქ, მუჟამსით ეთიოპელეფქ ჩხუპ ქუდუჭყეს იუდას? ბ) მუჭო შემლებუნა მივაჸუნათ ასაშ მაგალითის?
8 იეჰოვაქ ასაშ დროს ხოლო დამტკიცუ, ნამდა მუშ ხალხიშ ორსხებელო თიშ ხე ვადაკუნტარებე. ბიბლიას ბრელ ჩხუპ რე მოშინაფილ, მარა არძაშ უმოს დიდ ჯარით ეთიოპ ზერახიქ ეჩხუპ იუდას. თის ართ მილიონ ჯარიშკოჩი ჸუნდ. ეთიოპელეფიშ ჯარი დახე ჟირშე მეტ რდუ ასაშ ჯარშე. ვარდ გამორიცხულ ასაქ ადვილო დოშკურდუკო დო დუდ დანებუკო, მარა თიქ ხეთეშე იეჰოვას ქოთხუ მოხვარა. სამხედრო თოლით ქუჯინენ, შეიოლებერ ვარდ ორჯგინესკონ ეთიოპელეფს, მარა ღორონთშო ირფელ რე შეიოლებერ (მათ. 19:26). ღორონთიქ მუშ დიდ ძალა გეგმარჩქინ დო დამარცხ ეთიოპელეფ ასაშ წოხოლე, ნამუთ ღურაშახ ირიათო მთელ გურით რდუ იეჰოვაწკუმა (2 მატ. 14:8—13; 1 მეფ. 15:14).
9. ა) მუქ ვეშუშალ ხე ნეემიას იერუსალიმიშ კიდალეფიშ აღდგენას? ბ) მუჭო უპასუხ ღორონთიქ ნეემიაშ ლოცვას?
9 წერმიდგინით, მუჭო იგინანდ დუდს ნეემია, მუჟამს იერუსალიმშა მიდეშ. ქალაქ უმინჯურო რდუ დოსკილადირ დო იუდეველეფს მანგარო აფუდეს გურ გოტახილ. თინეფს აშკურნეს მოწინააღმდეგეეფშა დო უკახალე დიკინეს; ჭიჭე-ჭიჭეთ იერუსალიმიშ კიდალეფიშ აღდგენა ხოლო ქიმიოტუეს. მარა ქიმეჩუო ნეემიაქ საშვალება თე სიტუაციას, ხელეფშა გიმუკინუდკო დო საქმეშა გურქ გელაფუდკო? ვარ! მოსე, ასა დო იეჰოვაშ შხვა ართგურ მსახურეფცალო, ნეემია ხოლო ირო გიმოხანტუნდ იეჰოვაშ ნდობას ლოცვათ. თიქ ასე ხოლო თაშ მიქცუ. იუდეველეფ ფიქრენდეს, ნამდა ვეგნაღინედეს თე პრობლემეფი, მარა იეჰოვაქ ქუპასუხ ნეემიაშ ალალ ლოცვას. თიქ მუშ დიდ ძალათ დო ძალიერ ხეთ გამანგარ იუდეველეფიშ გიმოკინელ ხელეფი (წეკითხით ნეემიაშ 1:10; 2:17—20; 6:9). ქორჯერანო, ნამდა იეჰოვა ამდღა ხოლო დიდ ძალათ დო ძალიერ ხეთ უმანგარენს ხელეფს მუშ მსახურეფს?
იეჰოვა გაიმანგარენა ხელეფს
10, 11. ა) მუჭო ოცად სატანა დუმასუსტან დო გიმმოკინაფუან ხელეფშა? ბ) მუჭო მამანგარენა იეჰოვა? გ) მუ ჯგირობუა მოიღეს თეოკრატიულ გურაფაქ დო მომზადებაქ?
10 ქორჯერდან, სატანა ირიათო ეცადებ, ქიმეცილან, ვაკეთათ ღორონთიშ საქმე. თინა გიმირინუანს ტყურეფს დო რცქინაფას, ნამუთ მოურს მთავრობეფიშ, რელიგიურ უნჩაშეფიშ დო განდგომილეფიშ მხარეშე. სატანაშ მიზანი რე, დასუსტას ჩქინ ხელეფ დო მივოტუათ სახიოლო ამბეშ ქადაქება. მარა იეჰოვას უღუ სურვილი დო ძალა, გუმამანგარან მუშ წმინდა შურით (1 მატ. 29:12). ათეშგურშენ ღორონთის ქოფთხუათ ოკო წმინდა შური, ნამდა ქუგურზათ თი პრობლემეფს, ნამუსით სატანა დო თიშ უბადო ქიანა დუც გიმორაგუანა (ფსალმ. 18:39; 1 კორ. 10:13). მარდულეფ ოკო ვორდათ თიშ, ნამდა მიღუნა წმინდა შურით ჭარილ ღორონთიშ სიტყვა ბიბლია დო თიშა გერსხილ სულიერ საზრდო, ნამუსით ირ თუთას ბღებულენთ. ზაქარიაშ 8:9 დო 13-მა (წეკითხით) მუხლეფს მოჩამილ სიტყვეფქ იერუსალიმიშ ტაძარიშ აღდგენაშ დროს ირაგადუ, მარა თე სიტყვეფი ჩქი ხოლო მოხუნა.
11 ჩქი ქრისტიანულ შეხვალამეფს, კონგრესეფს დო თეოკრატიულ სკოლეფს მეღებულ რჩქინა ხოლო მამანგარენა. თენა მოხვარუნა, მიღუდან სწორ მოტივი, სულიერ მიზნეფი დო შევასრულათ ჩქინდა მენდებულ ქრისტიანულ პასუხიშმგებლობეფი (ფსალმ. 119:32). ქაცადუთო ირნერო, მიღათ თე რჩქინა დო გემანგარათ?
12. მუ ოკო ვაკეთათ სულიერო მანგარო ქუვორდათინ?
12 იეჰოვაქ ისრაელეფს მეხვარ, ორჯგინესკონ ამალეკელეფს დო ეთიოპელეფს; თიქ ნეემიას დო თიშ ხალხის ქიმეჩ ძალა, ბოლოშა ქიმუჸუნაფდესკო იერუსალიმიშ კიდალეფიშ აღდგენაშ საქმე. ღორონთი ჩქი ხოლო მუჩანა ძალას, ნამდა თხოზინიშ, ხალხიშ მხარეშე გურიშ გორგილაფაშ დო გაჭირებაშ უმკუჯინუო, შევასრულათ ქადაგებაშ საქმე (1 პეტ. 5:10). ჩქი ვეველუთ, ნამდა იეჰოვა სასწაულო ემოჩილითუანა პრობლემეფს. ჩქინ მხარეშე მოქმედება რე საჭირო. თეშა მიშურს ღორონთიშ სიტყვაშ ირ დღას კითხირ, ირ მარაშიან კრებაშ შეხვალამეფშო მომზადება დო დასწრება, პირად გურაფა, ოჯახურ თაყვანიშცემა დო ლოცვათ იეჰოვაშა მენდება. საშვალება ვემეფჩათ ოკო შხვა მუთუნს, ხე შემშალან თეშ კეთებას, მუშენდა იეჰოვა ზუსტას თეშ ჭყოლოფუათ მარზენა ძალას დო გურშა ელამკინანა. ქოფიქრენთ, ნამდა ნამთინ თე საკითხის გაუჯგუშება გოსაჭირუნან-და, ქოთხით იეჰოვას, ქიმგეხვარან. თქვა ქოძირუნთ, მუჭო მოქმედენს ღორონთიშ შურ თქვანწკუმა, ნამდა „სურვილ ხოლო გიღუდან დო ქოთ მოქმედენდათ“ (ფილ. 2:13). მუჭო შეილებუნა შხვაშ ხელეფიშ გამანგარება?
გოთინით გიმოკინელ ხელეფ
13, 14. ა) მუქ გინაღალაფუ ართ ჯიმას ოსურიშ ღურა? ბ) მუჭო შემლებუნა შხვეფიშ გამანგარება?
13 იეჰოვაქ აკობშაყარუეს მსოფლიო საჯიმალოს, სოდეთ თიშ თაყვანიშმცემლეფი ართიანს ოხვარუნა დო გურშა ელუკინანა. ქიგიფშინათ პავლე მოციქულიშ სიტყვეფი: „გოთინით გიმოკინელ ხელეფი დო დასუსტებულ ბირგულეფ, დო გასწორით თქვან კუჩხიშ ოულარ შარა“ (ებრ. 12:12, 13). პირველ საუკუნეს ბრელქ მიღუ სულიერ გამხნევება. თეცალ მდგომარეობა რე ამდღა ხოლო. ართ ჯიმა, ნამუსით ოსურქ უღურ დო შხვა რთულ პრობლემეფიშ წოხოლე ხოლო გერდუნ, იჩიბ: „თექ ქუდმოგურუ, ნამდა ჩქინდა ვა რე დამოკიდებულ, მუ პრობლემეფს შეფხვადუთ, ვართ თინა, მუ დროს მოხვადუ დო მუსხი ხანს გეგრძელებ. ლოცვა დო პირად გურაფა ჩქიმო მარსხებელ რგოლცალ რე, ნამუთ მოხვარ ვემწყვენ. სულიერ და დო ჯიმალეფიშ ელარინა მანგარო ელამქექუანს გურშა. ქიმეფხვად, ნამდა მანგარ მნიშვნელოვან რე, რთულ პრობლემეფიშ წიმოჭკირუაშახ ჯგირ ურთიერთობა მიღუდას იეჰოვაწკუმა“.
კრებაშ თითოულ წევრის შეულებ გურშა ელუკანას შხვეფს (ქოძირით აბზაცი 14)
14 აარონ დო ხური პირდაპირ გაგებათ უმანგარენდეს მოსეს ხელეფს ჩხუპიშ დროს. ჩქი ხოლო შემლებნა შხვადოშხვა შარათ ქელუდირთათ შხვეფს დო ქიმვეხვარათ, მაგალთო, ხანიერეფს, ჯამრთელობაშ პრობლემეფ უღნან თინეფს, ოჯახიშ წევრეფ თხოზუნან ფერ და დო ჯიმალეფს, ხვალახეფს დო საჸოროფო ადამიან ღურელ აფუნან თინეფს. შემლებნა ახალგაზრდეფი ხოლო გუვამანგარათ, ნამდა გურზან ზეწოლას დო ვაკეთან გლახა ვარდა ვედიჭყან წარმატებაშ გორუა თე სისტემას, თენა რენო უმაღლეს განათლება, სიმდიდრეშ შაყარუა დო ვარ კარიერა (1 თეს. 3:1—3; 5:11, 14). დეფიქრით, მუჭო შეილებუნა ყურადღება ქიმიაქცუათ შხვეფს სამეფო დარბაზის, მსახურებას, სუფრაშ მიკოხუნაშ დროს ვარდა მუჟამს ტელეფონით იჩიებუთ.
15. მუჭო მოქმედენს დადებით სიტყვეფი და დო ჯიმალეფწკუმა?
15 ასაშ გამრჯვებაშ უკულ წინასწრამეტყველ აზარიაქ გამხნევ ასა დო მუშ ხალხ თეცალ სიტყვეფით: „გამბედაობა გეგმირჩქინით დო ხელეფს ვაგმუკინათ, მუშენდა მიღენთ ჯილდოს თქვან საქმეშ გურშენ!“ (2 მატ. 15:7). თექ ასას მანგარო მეხვარ წმინდა თაყვანიშმცემლობაშ აღდგენას. თეშნერო, თქვან დადებით სიტყვეფს ხოლო შეულებ გამხნევას შხვეფ, ნამდა შურ დო გურით ემსახურან იეჰოვას (იგავ. 15:23). ვაგგოჭყორდან, კრებაშ შეხვალამეფს ხეშ ეკუნათ დო თქვან გურიშემაკინალ კომენტარეფით მანგარო ამხენევენთ დო ამანგარენთ და დო ჯიმალეფს.
16. ა) ნეემიაცალო, მუჭო უმანგარენა ხელეფს უხუცესეფი კრებაშ წევრეფს? ბ) მუჭო ელაიდირთეს პირადო თქვა თანამორწმუნეფქ?
16 იეჰოვაშ მოხვარათ, ნეემია დო მუშ ხალხიქ გემანგარეს ხელეფი. თინეფქ იერუსალიმიშ კიდალეფი 52 დღაშა აღადგინეს (ნეემ. 2:18; 6:15, 16). მართალ რე, ნეემია თე საქმეს ხემძღვანელენდ, მარა მუ ხოლო მუშენდ ფიზიკურო იერუსალიმიშ კიდალეფიშ აღდგენაშ დროს (ნეემ. 5:16). ამდღა ბრელ უხუცესი იქციებ ნეემიაცალო დო მონაწილენს თეოკრიტიულ სამშენებლო პროექტეფს დო სამეფო დარბაზეფიშ დასუფთებას. თინეფი მსახურებაშ დო მონახულებაშ დროს გურაკოჭირებულ და დო ჯიმალეფს უმანგარენა ხელეფს (წეკითხით ესაიაშ 35:3, 4).
„ვეგმუკინა ხელეფს“
17, 18. მუშ იმენდ ოკო მიღუდან პრობლემეფიშ დო გაჭირებაშ დროს?
17 და დო ჯიმალეფიშ ართმაჟიაშ ელარინელო მსახურება ხეს უნწყუნს ართობას. თე დროს ართიანს უმოსო ვეახლოებუთ დო ღორონთიშ სამეფოშ კურთხევეფიშ ნდობა ხოლო იმანგარებ. მუჟამს და დო ჯიმალეფს ხელეფს უმანგარენთინ, ვოხვარუთ თინეფს, გურზან რთულ სიტუაციეფს დო ვადინუან მომავალიშ იმენდი. შხვეფიშ ელარინა ჩქი ხოლო მოხვარუნა, ვა ვოდინუათ სულიერ წონასწორობა. თენა ხეს უნწყუნს, ჩქინო რეალურ რდას ირფელ, მუდგაშ კეთებას იეჰოვა აპირენს. ნამდვილო, შხვეფიშ ელარინა ჩქინ ხელეფს ხოლო ამანგარენს.
18 თიშ გაგება, ჯვეშო მუჭო ამანგარენდ იეჰოვა შხვადოშხვა სიტუაციას მუშ ართგურ მსახურეფს, ჩქი ხოლო მიმანგარენა ღორონთიშ რწმენას დო ნდობას. თაშ ნამდა, გაჭირებაშ დო პრობლემეფიშ დროს ვეგმუკუნათ ხელეფს! იეჰოვას მიმართით ლოცვათ დო ქიმეჩით საშვალება, მუშ ძალიერ ხეთ გუგამანგარან დო მიგოღებაფუან სამეფოშ კურთხევეფი (ფსალმ. 73:23, 24).
