1, 2. მუწკუმა უხვადუნა იეჰოვაშ მსახურეფს ბრძოლა?

პირველ ართგურ ადამიან აბელშე დოჭყაფილ ამდღარ დღაშა ღორონთიშ თაყვანიშმცემელეფ ჩართულ რენა ბრძოლას. პავლე მოციქულქ ებრაელ ქრისტიანეფს მეჭარ, ნამდა თინეფქ იეჰოვაშ მოწონება დო კურთხევა მიღესკონ თიშენ, ბრელ ტანჯება მიკორთეს (ებრ. 10:32—34). პავლექ ქრისტიანეფიშ ბრძოლა შეადარუ სპორტცმენეფს, მით საბერძნეთის თიცალ შეჯიბრებეფს მონაწილენდეს, მუნერით რე რულა, რკინება დო კრივი (ებრ. 12:1, 4). ჩქი ამდღა სიცოცხლეშ მიოჭირინაფალო რულას ბღებულენთ მონაწილებას, მუ დროსით შეთმოფხვადუთ ჩქინ მოწინაღმდეგეფს, ნამუსით ოკონა გენკმოჸოთან, ქუდმორაგუან დო მიდამღან ხიოლ დო ჯილდო, ნამუთ წოხოლე მელუნა.

² პირველ რიგის, ჩქი ვობრძოლუთ სატანას დო თიშ უბადო ქიანას (ეფეს. 6:12). მნიშვნელოვან რე, ვეწინააღმდეგათ „თე ქიანაშ სიმანგარეეფს“; თეშა მიშურს შხვადოშხვა რელიგიურ გურაფეფი, ფილოსოფიეფი დო გლახა ცხოვრებაშ წესი, ნამუთ რე უზნეობა, თუთუმიშ შუმა, ალკოჰოლიშ დო ნარკოტიკეფიშ უბადოთ გიმორინაფა. თეშ გარდა, ირიათო ვებრძოლათ ოკო ხორციშ სისუსტეეფს დო გურიშ გოტახუას ხოლო (2 კორ. 10:3—6; კოლ. 3:5—9).

3. მუჭო მამზადენა ღორონთი, ნამდა შევებრძოლათ ნტერს?

 ³ სინამდვილეს ქორენო შეიოლებერ, ვორჯგინათ თეცალ ძალიერ მოწინააღმდეგეფს? ქივებრძოლებუთ-და, ქო. პავლექ მუშ დუდ მოკრივეს შეადარ დო თქუ: „მიზანი ვამიღუნ თეშ ვემიბრულექ დო ლიკვეფს ჰაერს ვემუვოგანქ“ (1 კორ. 9:26). მუჭოთ მოკრივე ჩხუპიშ დროს ოცად მუშ მოწინააღმდეგეს გიორჯგინასინ, თეშ ჩქი ხოლო ოკო ვებრძოლათ დო გივორჯგინათ ჩქინ მოწინააღმდეგეფს. იეჰოვა მამზადენა დო მოხვარუნა თე ბრძოლას თიშ სიტყვას ინოჭარილ სიცოცხლეშო აუცილებერ მითითებეფით. ღორონთი ბიბლიაშა გერსხილ პუბლიკაციეფით, კრებაშ შეხვალამეფით დო კონგრესეფით ხოლო მოხვარუნა. ქიგმირინუანთო ნაგურეფუს ცხოვრებას? თაშ ვართუთ-და, თეშ გიშურს, ნამდა „ლიკვეფს ჰაერს“ მიოგანთ დო ნტერს ბოლოშა ვაწინააღმდეგუთ.

4. მუჭო შემლებნა მივერუათ ბოროტებას?

⁴ ჩქინ ნტერეფქ შილებე შურო ვეველუთ დო დაუცველ ვორეთინ თი დროს ქიგმანთხან, ათეშგურშენ კურცხას ოკო ვორდათ. ბიბლია მაფრთხილენა: „ვემგერუას ბოროტებაქ, სი მერი თის სიკეთეთ“ (რომ. 12:21). სიტყვეფშე ვემმერუან ბოროტებაქ იძირე, ნამდა შემლებნა ვორჯგინათ ბოროტებას, თის ირიათო ქივებრძოლებუთ-და. მარა კურცხას ვეპჸით დო ბრძოლას ქიმვოტენთ-და, სატანა, მუშ ბოროტ ქიანა დო ჩქინ არასარულყოფილ სხეულ მიმერიებნა. დღას ვადუშვათ, ნამდა სატანაქ დუგოშკურინუან დო ხელეფშა გიმგოკუნაფუან (1 პეტ. 5:9).

5. ა) მუ მიმეხვარებუნა, ვემვოტუათ ბრძოლა დო მიბღათ ღორონთიშ კურთხევეფი? ბ) ნამ ბიბლიურ პერსონაჟეფიშ მაგალითეფს გუვარჩიენთ?

⁵ წარმატებაშ მიოჭირინაფალო შეჯიბრიშ მონაწილეფს ვა გაჭყორდან ოკო, მუშ გურშენ ბრძოლენა. ღორონთიშ მოწონებაშ დო კურთხევაშ მიოღებელო, თინეფქ გეაზრან ოკო ებრაელეფიშ 11:6-ის ინოჭარილ სიტყვეფი: „მიდგა ღორონთშა მეურსინ, ოკო წანდას, ნამდა თინა აჯილდოვენს მუშ გურგედვალირო მაგორუს“. ბერძნულ ზმნა, ნამუთ თარგმნილ რე „გურგედვალირო გორუათ“ ნიშნენს მანგარ მონდომას (საქ. 15:17). ბიბლიას მოჩამილ რე თი ოსურკათა დო ქომოლკათაშ მაგალითეფი, მით გურგედვალირო გორუნდეს იეჰოვაშ კურთხევას. იაკობის, რახელს, იოსების დო პავლეს ხოლო უღუდეს თიცალ პრობლემეფი, ნამუთ ემოციურო დო ფიზიკურო გინმოშულიდუნდ, მარა თინეფქ დამტკიცეს, ნამდა მონდომას დიდ კურთხევეფ მოუღ. მუჭო შემლებნა მივაჸუნათ თინეფიშ მაგალითის?

6. მუქ მეხვარ იაკობის, უკახალე ვეკნიკინკონ დო მუჭო დეჯილდოვ თიქ? (ქოძირით სურათი მა-8 გვერდის)

⁶ პატრიარქ იაკობი მთელ მუშ ცხოვრებას ირიათო ბრძოლენდ, მუშენდა უჸორდ იეჰოვა, აფასენდ სულიერს დო წანდ, ნამდა იეჰოვა შეასრულენდ დუნაპირებუს დო თიშ გამნარყის აკურთხენდ (დაბ. 28:3, 4). თავრეშე იძირე, ნამდა 100 წანას მეჭირინაფილ იაკობი მუთ შეულებუდუნ, ირფელს ორთუდ, ნამდა მეუღებუდკო ღორონთიშ კურთხევა; თიქ ანგელოზის ხოლო ერკინ (წეკითხით დაბადებაშ 32:24—28). ხვალე მუშ ძალათ ერკუნიო იაკობიქ თე ძალიერ ანგელოზის? მუშო ოკო რაგად, ვარ! მარა თის გინოჭყვიდილ აფუდ, უკახალე ვეკნიკინკონ დო დუდ ვადანებკონ თე ჩხუპის! დო ნამდვილო, თიშ მონდომაქ დეჯილდოვუ. ათეშგურშენ ღორონთიქ თის შესაფერის სახელ ქიგიოდვუ ისრაელი (ნიშნენს: „ღორონთწკუმა მარკინე“ [უშკურანჯი] ვარდა „ღორონთიქ ერკინ“). იაკობიქ მიღუ იეჰოვაშ მოწონა დო კურთხევა, ნამუშ გურშენ ჩქი ხოლო ბრძოლენთ.

7. ა) მუ გურიშგუმატახალ მდგომარეობა უღუდ რახელს? ბ) მუჭო აგრძელენდუ თინა ბრძოლას დო საბოლათ მუჭო აკურთხუ ღორონთიქ?

 ⁷ იაკობიშ საჸოროფო ოსურს რახელს, მანგარო ოინტერესუდ, მუჭო შეუსრულენდ იეჰოვა დუნაპირებუს მუშ ქომონჯის. მარა რდუ ართ პრობლემა, ნამუშ გინოჭკირუა რთულო იძირედ. რახელს სქუალეფ ვა ჸუნდ. თიმ დროს თენა დიდ უბედრობათ ითვალუდ. სოვრეშე აშუ რახელს ემოციურ დო ფიზიკურ ძალეფქ, ნამდა მორიებუდკო თე გურიშგუმატახალ მდგომარეობას, ნამდგაშ თირუა თის ვეშულებუდ? თის იმენდი დღას ვადინაფუ. რახელს ვემუტებ ბრძოლა დო უმოს ხშირას ლოცულენდ. იეჰოვაქ ქიმირჩქილუ რახელიშ გურშე ეკულირ ლოცვა დო ქიმეჩ სქუალეფი. ვა რე გასაკვირ, მუშენ მიოძახ ართშა რახელქ თე სიტყვეფი: „მთელ ძალათ ქივერკინ . . . დო ქოთ ვორჯგინ“! (დაბ. 30:8, 20—24).

8. მუ პრობლემეფიშ წოხოლე გედირთ იოსებიქ დო მუს ბგურაფლენთ თიშ მაგალითშე?

⁸ იაკობიშ დო რახელიშ მტკიცე მაგალითი ალბათ მანგარო ქიმეხვარებუდ თინეფიშ სქუას, იოსების, მუჟამსით თიქ რწმენაშ გამოცდეფიშ წოხოლე ქიგედირთ. იოსები 17 წანერ რდუ, მუჟამსით თიშ ცხოვრებაქ დუდგიმე გემნირთ. მენჯარიშე ჯიმალეფქ თინა მონათ გეგმოჩეს. ჭიჭე ხანიშ უკულ მუსხირენ წანას უსამართლოთ ეგვიპტეშ ციხეს ხოლო ხედ (დაბ. 37:23—28; 39:7—9, 20, 21). მარა იოსების გურ ვაგოტახუ; თის გურ ვამორთუმ დო ვართ მანგიორიშ გინოგაფაშენ უფიქრებუ, მუშენდა ირიათო იეჰოვაწკუმა ურთიერთობაშენ ფიქრენდ დო მანგარო აფასენდ თეს (ლევ. 19:18; რომ. 12:17—21). მუს მოგურუანა იოსებიშ მაგალითი? რთულ ბაღანობა ქომღუდეს ვარდა ამდღა უიმენდო მდგომარეობას ქუვორეთ-და, ბრძოლა გუვაგრძელათ ოკო დო დუდ ვადვანებათ. თაშ ქიმიფქციებუთ-და, შემლებნა დარწმუნებულ ვორდათ, ნამდა იეჰოვა მაკურთხენა (წეკითხით დაბადებაშ 39:21—23).

9. იაკობ, რახელ დო იოსებცალო მუ ოკო ვაკეთათ იეჰოვაშ კურთხევაშ მიოღებელო?

⁹ დეფიქრით თი რთულ მდგომარეობაშენ, ნამუთ შილებე თქვანო ადვილ გინაღალარ ვარდას. შილებე უსამართლოთ გოქცუდან, გიგაძიცენდან ვარდა გამცირენდან. ვარდა შილებე მენჯარიშე ხალხი ეკკაწამენდან მუდგარენს. უკახალე დიკინათინ თიშ მანგიორო, ქიგიშინით, მუქ მეხვარ იაკობის, რახელს დო იოსების იეჰოვაშ მსახურებას ხიოლ ვაუდინუაფუდესკო. იეჰოვაქ გამანგარ დო აკურთხ თინეფ, მუშენდა მანგარო აფასენდეს სულიერს. თინეფ აგრძელენდეს ბრძოლას დო მოქმედენდეს ლოცვეფიშ თანახმათ. ჩქი თე ბოროტ ქიანაშ აღსასრულიშ დროს ფცხოვრენთ, ათეშგურშენ ირნერ მიზეზ მიღუნა, ვა ვოდინუათ მომავალიშ მტკიცე იმენდი. ქართუთო ირფელს იეჰოვაშ მოსაწონქ ქიჸუათინ, თაშ ქოფთქუათი, ქორკინენთო თეშო?

10, 11. ა) მუშენ შილებე მაჸუან ობრძოლებელქ ღორონთიშ კურთხვეფიშ მიოღებელო? ბ) მუ მიმეხვარებუნა, სწორ შარაშ გიშაგორუას დო მუჭო მივერუათ გურიშგოტახუას დო უარყოფით გავლენას?

¹⁰ მუშენ შილებე მაჸუან ობრძოლებელქ ღორონთიშ კურთხვეფიშ მიოღებელო? ბრელს ხორციელ სისუსტეეფშა აფუ ობრძოლებელ. ნამთინეს დიდ მონდომა ოსაჭირ, ნამდა დადებით განწყობაქ ვაუდინას მსახურებაშ დროს. მინს შილებე გლახა ჯამრთელობა აწუხენდას ვარდა ხვალახობაწკუმა აფუდას ობრძოლებელ. თიცალეფ ხოლო რენა, ნამუსით ობრძოლებელ აფუნა, ნამდა ქაპატუან თის, მიდგაქ ოწყინებაფუ ვარდა ცოდვა ჩედინ მუნეფიშ წინააღმდეგ. ვა უღუ მნიშვნელობა, მუსხი ხან რე ვომსახურუთ იეჰოვას, ვებრძოლათ  ოკო ირფელს, მუთ ხეს შემშალენა, ვემსახურათ ღორონთის, ნამუთ მუშ ართგურებს აჯილდოვენს.

¹¹ მართალ ქოფთქუათინ, დიდ ბრძოლა რე საჭირო, ირო სწორას გინობჭყვიდათ დო გივაჸუნათ ქრისტიანულ შარას. თენა არძაშ უმოსო თიმწკუმა რე რთულ, მუჟამსით ჩქინ უდუნდებ გურს ოკო შხვა შარათ მიჸუნან (იერ. 17:9). შურო ქოფიქრენთ, თქვანწკუმა მუთუნქ უარყოფითო იმოქმედ-და, აუცილებერო ქოთხით ღორონთის წმინდა შური. ლოცვას დო წმინდა შურს შეულებ თქვან გამანგარება, ქიმიაჸუნათ თი შარას, ნამუშ სისწორეშა დარწმუნებულ რეთ დო ნამუსით იეჰოვა აკურთხენს. იმოქმედით ლოცვაშ თანახმათ. ქეცადით, წეკითხათ ბიბლია ირ დღას, გეგმურთათ დრო ბიბლიაშ პირად გურაფას დო ოჯახურ თაყვანიშცემას (წეკითხით ფსალმუნიშ 119:32).

12, 13. მუქ მეხვარ ჟირ ქრისტიანს, მერუესკონ არასწორ სურვილეფს?

¹² ჩქი ბრელ მაგალითეფ მიღუნა თიშ, მუჭო მეხვარ ქრისტიან და დო ჯიმალეფს ღორონთიშ სიტყვაქ, წმინდა შურქ დო ჩქინ პუბლიკაციეფქ არასწორ სურვილეფიშ მორიებას. ართ ახალგაზრდაქ წეკითხ სტატია „მუჭო შეილებუ მერუე არასწორ სურვილეფს?“, ნამუთ ბეშტელ რდუ 2003 წანაშ 8 დეკემბერიშ ჟურნალს „გამოიღვიძეთ!“. თინა იჩიებ: „მა ხოლო ვობრძოლუქ არასწორ სურვილეფს. მუჟამს ქიგებგ თე სტატიაშე, მუშმადიდა მონდომა გიმირჩქინეს ჩქინ და დო ჯიმალეფქ, არასწორ სურვილეფს მერუესკონ, დუდ თე საჯიმალოშ წევრო მიფრჩქინ. ქიმეფხვად,  ნამდა ხვალე მა ვამღუდ თეცალ პრობლემეფი“. თე ახალგაზრდას 2003 წანაშ 8 ოქტომბერიშ ჟურნალს „გამოიღვიძეთ!“ ჭარილ სტატიაქ ხოლო მეხვარ, ნამუშ სათაურ რე „ალტერნატიულ ცხოვრებაშ წესი — იწონენსო თის ღორონთი?“. თე სტატიაშე თიქ ქიგეგ, ნამდა ბრელშო თე ბრძოლა „სხეულს ძიგირ“ უღუდესკონ თიცალ რდუ დო შეულებუდეს მომავალს იმენდიშ თოლით უჯინესკო, ონდო აგრძელენდეს ბრძოლას, ნამდა ქიმიქცუესკო ღორონთიშ მოსაწონო (2 კორ. 12:7). თე ახალგაზრდა იჩიებ: „ათეშუგრშენ ირდღას ფიფქრენქ, ქუდობსკიდე ართგურქ. იეჰოვაშ დიდ მარდულ ვორექ, მუშენდა თინა მუშ ორგანიზაციას გიმირინუანს, ნამდა მიმეხვარან თე ბოროტ სისტემას“.

¹³ ქობძირათ ართ დაშ მაგალით ხოლო, ნამუთ შეერთებულ შტატეფს ცხოვრენს. თინა იჩიებ: «მარდულ ვორექ თქვან, მუშენდა ვა მარკენთ საზრდოს, ნამუთ მოსაჭირუნა დო დროულ რე. ბრელშა თეშ მიგინაფ დუდ, ითამ ჩქიმო იჭარკო თე სტატიეფქ. წანეფ რე ვობრძოლუქ თის, მუდგა ჯოგუ იეჰოვას. მინშა მოკო ირფელს დუდ დუვანებე დო მივოტუე ბრძოლა. მიჩქ, იეჰოვა მოწყალე დო მპატიებელ რე, მარა თე არასწორ სურვილ ბოლოშა ვა ბჯოგუ, ათეშგურშენ ფიფქრენქ, ნამდა ვა ვორექ ღირს, ქიმმეხვარას იეჰოვაქ. თე ბრძოლაქ ჩქიმ ცხოვრებაშ არძა მხარეს შეხუ. მუჟამს წეპკითხი 2013 წანაშ 15 მარტიშ „საგუშაგო კოშკის“ მოჩამილ სტატია „ქიჩინენსო თქვან გურ იეჰოვას“, ქიმეფხვად, ნამდა იეჰოვას ოკოდ ჩქიმ მოხვარა».

14. ა) მუჭო ობრძოლუდ პავლე ხორციელ სისუსტეეფს? ბ) მუჭო შემლებუნა მივერუათ ხორციელ სისუსტეეფს?

¹⁴ წეკითხით რომაელეფიშ 7:21—25. პავლეს მუშ გამოცდილებაშე უჩქუდ მუშმა ძნელა რე, ხორციელ სურვილეფ დო სისუსტეეფწკუმა ბრძოლა. მარა თინა დარწმუნებულ რდუ, ნამდა მერიებუდ ხორციელ სურვილეფს დო სისუსტეეფს იეჰოვაშა მენდებათ დო ქრისტეშ მსხვერპლშა რწმენაშ გიმორჩქინათ. ჩქი ხოლო მივერიებუთ ხორციელ სისუსტეეფს, მუჟამსით ქიმვაჸუნუთ პავლეშ მაგალითის, გეგმიფრჩქინანთ გიშაჸიდირალიშ რწმენას, ბოლოშა ქიმვენდებუთ იეჰოვას დო ვართ ხოლო ჩქინ დუც.

15. მუჭო მოხვარუნა ლოცვა, ქუდობსკიდათ ართგურქ დო გეგნიბღათ პრობლემეფი?

¹⁵ მინშა იეჰოვა უშვენს თიშნერ სიტუაციეფს, ნამდა ქოძირას, მუსხით მაწუხენა მუდგარენ საკითხი. მაგალთო, მუჭო მიფქციებუთ, მუჟამსით ჩქი (ვარდა ოჯახიშ წევრის) სერიოზულ ლახალა მიღუნა ვარდა უსამართლოთ მოქცუნა? თეცალ დროს ვოძირანთ, ნამდა ვონდუთ იეჰოვას მთლიანო, მუჟამსით ქოფთხინთ თის, ქომჩან ძალა, ართგურო ქუდობსკიდათ, ვემვოდინუათ ხიოლ დო შემნარჩუნათ სულიერ წონასწორობა (ფილ. 4:13). პავლეშ დო ჩქინ დროშიან შემთხვევეფი ამტკიცენს, ნამდა ლოცვას შეულებ ქომჩან ძალა, გუვაგრძელათ ბრძოლა.

16, 17. მუ გაფუნა გინოჭყვიდილ?

¹⁶ ეშმაკის მანგარო ახიოლე, დუც დანებენთ დო უკახალე ქიკნიკინანთ-და. მარა გინოჭყვიდილ გაფუდან, „მანგარო ქუმოკიდათ ხე, მუთ ჯგირ რენ თის“ (1 თეს. 5:21). დარწმუნებულ რდათ, თქვა მერიებუთ სატანას, თიშ ბოროტ ქიანას დო ცოდაშ მიდრეკილებეფს. თეშო საჭირო რე, ქიდეჯერათ, ნამდა ღორონთის შეულებ თქვან გამანგარება (2 კორ. 4:7—9; გალ. 6:9).

¹⁷ ირნერო ეცადით, ვემიოტუათ ბრძოლა, დუდ ვადანებათ დო უკახალე ვეკნიკინათ. დარწმუნებულ რდათ, იეჰოვა ვამგარკენა კურთხევეფს! (მალ. 3:10).