1, 2. ა) მუ სირთულეშ წოხოლე გერენა მშობლეფი დო მუჭო შეულებუნა მერუან თის? ბ) ნამ ოთხ მხარეს გენიფხილენთ თე სტატიას?

„ჩქი ბწანა იეჰოვან თენა თის ვა ნიშნენს, ნამდა ჩქინ ბაღანეფს ხოლო ავტომატურო აღვენუნა იეჰოვაშ რწმენა“,— იჩიებ საფრანგეთის მახორუ ართ ჩილ დო ქომონჯი. თინეფ აგრძელენა: „რწმენა მემკვიდრეობათ მითინს ვემემღებუნა. ბაღანეფს ხოლო დრო ოსაჭირუნა, ქაშუან რწმენაქ“. ართ ავსტრალიელ ჯიმაქ თქუ: „მშობლეფშო არძაშ უმოს რთულ თინა რე, ნამდა ბაღანეფს გურშა გენუღან რწმენა. თეშო საჭირო რე, შხვადოშხვანერ საშვალებაშ გიმორინაფა. შილებე ფიქრენდათ, ნამდა ქუპასუხით ბაღანაშ კითხვას დო თეთ დაკმაყოფილით თინა. მარა მუჭო ირდუნ თეშ, კინ გიმეორენა თე კითხვას. პასუხეფქ, ნამუსით ამდღა არზენთინ, შილებე ჭუმან ვადაკმაყოფილას. ათეშგურშენ ართ დო იგივე კითხვაშა ბრელშა გაჸინა ოპასუხებელ“.

² მშობლეფი, მინშა ხომ ვა ფიქრენთ, ნამდა ვეშქალებენა ქაგურუათ დო მორდათ თქვან ბაღანეფი თეშ, ღორონთიშ რწმენა დიდობას ხოლო უღუდან? მუშო ოკო რაგად, ხვალე მუშ ძალეფით თენა მითინს ვეშიალებე (იერ. 10:23). მარა თეს ღორონთიშ ხემძღვანელობაშ მეჸუნა შეგოლებაფუანა. ქობძირათ ოთხ მხარე, ნამუთ მიგეხვარებუნა, ბაღანეფს რწმენა განუვითარათ: 1) ჯგირო გეჩინებაფეთ ბაღანეფ, 2) მთელ შურ დო გურით ოგურეთ, 3) გეგმირინეთ საინტერესო  მაგალითეფ, 4) გიღუდან მოთვინება დო ილოცით.

3. მუჭო შეულებუნა მშობლეფს, გურაფაშ დროს ქიმიაჸუნან იესოშ მაგალითის?

³ იესო ოკითხუდ მუშ მიმაჸუნალეფს, მუ წანდეს თინეფს (მათ. 16:13—15). ქიმიაჸუნით თიშ მაგალითის დო თავისუფალ დროს, ართო ისვენენთინ ვარდა მუთუნს ორთუთინ, ქოკითხით, მუს ფიქრენა სინამდვილეს მუნეფიშ რწმენაშ გურშენ. ქიგეგით, მუთუნ კითხვეფი ხომ ვაწუხენა. 15 წანერ ავსტრალიელ ჯიმა იჩიებ: «ჩქიმ მუმა ხშირას მეჩიებ რწმენაშ გურშენ დო მოხვარ მსჯელობას. მაგალთო მოკითხ: „მუს იჩიებ ბიბლია? ქორჯერსო მუდგას თინა იჩიებ? მუშენ რჯერს“? თის ოკო ჩქიმ სიტყვეფით ვუპასუხე დო ვართ ხოლო უბრალოთ გემიობრე მუშ ვარდა დიაჩქიმიშ სიტყვეფი. მუჭო იბრდუდინ თეშ, უმოს გააზრებულო პაპსუხენდ».

4. მუშენ ოკო მიღათ ბაღანაშ კითხვეფი სერიოზულო? ქიმიჸონით მაგალითი.

⁴ ბაღანას ნამდგაინ ბიბლიურ საკითხი ბოლოშა ვარჩქილენ-და, გენჭირელო ვეჩუათ თის დო ვედიჭყათ დუდიშ დაცვება. მოთვინება გეგმირჩქინით დო ქიმეხვარით ბაღანას, ქიმსჯელას თე საკითხშე. „სერიოზულო ქიმუდირთით ბაღანაშ კითხვეფს“ — იჩიებ ართ მშობელი. „უმნიშვნელოთ ვემირჩქინათ ბაღანაშ კითხვა დო დუდ ვარიდათ თე თემაშენ ჩიებას უბრალოთ თიშ გურშენ, ნამდა უხერხულობას ვენოლათ“. სინამდვილეს, ბაღანაშ კითხვეფი თიშ ნიშანო ქიმირჩქინით, ნამდა ოინტერეს დო ოკო მეტიშ გაგება. იესოს 12 წანერ რდუნ თეშ სერიოზულ კითხვეფი უღუდ (წეკითხით ლუკაშ 2:46). „მუჟამსით მშობლეფს ქეშვეკითხ, სინამდვილეს ჭეშმარიტ რელიგიას ქიმეპჸუნდით დო ვარინ, თინეფ ვაგახანგებენა, თიშ უმკუჯინუო, ნამდა შილებე თე კითხვაქ ვეხუჯესკონ. მშობლეფქ ჩქიმ არძა კითხვას ბიბლიაშე ქუპასუხეს“, — იჩიებ დანიას მახორუ 15 წანერ ახალგაზრდა.

5. მუ ოკო ვეფიქრან მშობლეფქ დო მუჭო ოკო მიქცუან თინეფქ?

⁵ გეჩინებაფეთ თქვან ბაღანეფი ჯგირო. ქიგეგით, მუს ფიქრენა დო მუ აწუხენა თინეფს. დღას ვეფიქრათ, ნამდა კრებეფშა ქიგლულა დო თქვანწკუმა ართო ქოქადაქენან-და, თინეფს რწმენა უღუნა. ირდღაშიან საქმეეფიშ კეთებაშ დროს ეჩით სულიერ საკითხეფშენ. ილოცით ბაღანეფიშ გურშენ თინეფწკუმა ართო ხოლო. ეცადით, რდათ საქმეშ კურსის, რწმენაშ მუნერ გამოცდეფს შეხვადუნა ბაღანეფი დო ქიმეხვარით, მერუან თე პრობლემეფს.

6. მუ მეხვარებ მშობლეფს, უჯგუშო ქაგურუან სქუალეფს?

⁶ იესო მუშ გურაფათ ხალხიშ გურს ოხუდ, მუშენდა თის უჸორდ იეჰოვა, ღორონთიშ სიტყვა დო ხალხი (ლუკ. 24:32; იოან. 7:46). მშობლეფს ხოლო ჸოროფაშ გიმორჩქინა მეხვარებ მუნეფიშ ბაღანეფიშ გურს შეხუანინ (წეკითხით კანონიშ 6:5—8; ლუკაშ 6:45). თაშ ნამდა, მშობლეფი, ჯგირო გეგმირკვით ბიბლია დო ოგურაფალ პუბლიკაციეფი. ქიგეგით მეტ ღორონთიშ გუნაჭყეფშენ დო გეგმირკვით სტატიეფი, ნამუთ თე საკითხის ოხუ (მათ. 6:26, 28). თეგვარო მეტ რჩქინას მიღენთ, უმოს მარდულეფ იჸით იეჰოვაშ დო შეგალებენა უჯგუშო ქაგურუათ სქუალეფს (ლუკ. 6:40).

7, 8. მუ შედეგ მოჸუნს, მუჟამსით მშობლეფს გურ ჭეშმარიტებათ აფუნა ეფშა? ქიმიჸონით მაგალითეფი.

⁷ მუჟამსით გურ ეფშა გაფუნა ჭეშმარიტებათ, სურვილ გირჩქინდუნა ოჯახიშ წევრეფკუმა ხოლო იჩუათ თიშ გურშენ. ეჩით თინეფს სულიერ საკითხეფშე ხვალე კრებაშო მომზადებაშ ვარდა ოჯახურ თაყვანიშცემაშ დროს ვარინ, შხვა დროს ხოლო. თე საკითხეფშე დანძალებურო ვარინ, ბუნებრივო ოკო იჩუათ, თეშ მუჭოთ ირდღაშიან ურთიერთობეფიშ დროს იჩიებუთ. ამერიკას ცხოვრენსინ ფერ ჩილ დო ქომონჯ მუნეფიშ ბაღანეფს ღორონთიშ გურშენ ეჩიებ, მუჟამსით ბუნებას რენა ვარდა ჭკომუაშ დროს. თინეფ იჩიებუნა: „თე დროს ბაღანეფს გუვოშინანთ, მუშმადიდა ჸოროფა რჩქუ ირფელს, მუთ იეჰოვაქ გაჭყუ ჩქინო“. სამხრეთ აფრიკას  მახორუ ჩილ დო ქომონჯ, მუჟამსით ეზოს მუთუნს თასუნან, მუნეფიშ ჟირ ძღაბის ეჩიებუნა ბუნებაშ სარკო პროცესეფშენ, მაგალთო მუჭო ღვიღვონდუ თასი დიხას დო უკულ მუჭო ეფალუნს მცენარე. „ჩქი ვოხვარუთ ბაღანეფს, დაფასან სიცოცხლე დო ქიმეხვადან მუშმართულა დო მუ სარკო რე თინა“, — იჩიებუნა თინეფ.

⁸ ავსტრალიას მუმაქ ვით წანერ ბაღანა ბოშ სპეციალურო მუზეუმშა მიდეჸონ, ნამდა გუმაჭყაფალ ღორონთიშ რწმენა გუმანგარუკონ. თინა იჩიებ: „ჩქი თექ ბძირით ზღვაშ უჯვეშაშ ცხოველეფიშ ნაშთეფი — ამონიტეფი დო ტრილობიტეფი. გაკვირვებულ ვორდით თე გინოშენებულ ცხოველეფიშ ძირაფათ. თე სქვამ დო რთულ სტრუქტურაშ ცხოველეფი მუთუნით ვარდეს ამდღა არსებენან თი ზღვაშ ცხოველეფშე უნაკლებაშ. თაშ ნამდა, სიცოცხლექ მარტივ ფორმაშე უმოს რთულ ფორმეფშა გეგნორთ-და, იმწკუმა მუშენ უღუდეს თი დროს ზღვაშ უჯვეშაშ ცხოველეფს თეცალ რთულ სტრუქტურა? თაქ ნაძირებუქ მანგარო იმოქმედ ჩქიმწკუმა დო თენა ბაღანას ხოლო ქივეჩი“.

9. მუშენ რე ჯგირ მაგალითეფიშ გიმორინაფა დო მუჭო გიმირინუ თენა ართ დიდაქ?

⁹ იესო ხშირას გიმირინუანდ თიცალ მაგალითეფს, ნამუთ კოჩის ფიქრის დაჭყაფუანდ, გურს შეხებუდ დო ადვილო ვაგაჭყორდუდ (მათ. 13:34, 35). ბაღანეფს ჯგირ ფანტაზიაშ უნარ უღუნა. თაშ ნამდა, მშობლეფი, გეგმირინეთ მაგალითეფი გურაფაშ დროს. ზუსტას თაშ იქციებუდ იაპონიას ართ დიდა. თინა მუშ ბრუო დო ვით წანერ ბოშეფს ეუნწყუნდ დედამიწაშ ატმოსფეროშენ დო თიშ გურშენ, მუჭო გიმირჩქინ იეჰოვაქ მზრუნველობა თიშ გოჭყაფაშ დროს. თე საკითხი უჯგუშო გეუნწყუკონ თიშენ, თიქ ბაღანეფს ქიმეჩ ბჟა, შანქარ, ყავა დო ქოთხუ, ყავა ქომფუნეთია. თინა იჩიებ: „ბაღანეფქ დიდ ამბეთ ქიდიჭყეს ყავაშ ფუნაფა. მუჟამსით ქოპკითხი, თეცალ მონდომებულო მუშენ ოფუნუანთ მაქინ, მიწუეს, ნამდა სი გიორსინ ფერ მოკონა გიკეთათ. თეშ უკულ ბაღანეფს გეუნწყი, ნამდა ღორონთიქ სიცოცხლე ქომღუდესკონ თიშენ, თეშნერ მონდომებულო შეურუ აირეფი ართიანს“. თეცალ ასაკიშ ბაღანეფშო თე მაგალით ადვილ გასაგებ რდუ დო გურაფაშ დროს თინეფ აქტიურენდეს. მუშო ოკო რაგად თე გაკვეთილ თინეფს დღას ვაგაჭყორდუდეს.

10, 11. ა) ნამ მაგალითეფ შეილებუნა მოუჸონათ ბაღანას, ღორონთიშ რწმენაქ გენვითარას თიშო? (ქოძირით სურათი 28-ო გვერდის) ბ) თქვა მუნერ მაგალითეფს გიმირინუანთ?

¹⁰ ბაღანეფს ღორონთიშ რწმენა გაუმანგარათ თიშენ, შეილებუნა ქუმუჸონათ მაგალითო ნამცხვარიშ ჭუალაშ რეცეპტი. ნამცხვარს დოჭუნთუნ უკულ, გეუნწყით ბაღანეფს, მუ როლი უღუ რეცეპტის. თეშ უკულ ქიმეჩით ბაღანას ნამდგაინ ხილ მაგალთო, უშკურ დო ქოკითხით: „ქოიჩქუდუო, ნამდა თე უშკურს ხოლო მუშ რეცეპტი უღუ?“. თეშ უკულ შქას გოჭკირით დო წკა ბაღანას ქიმეჩით. გეუნწყით თის, ნამდა უშკურიშ რეცეპტი წკას ინოჭარ, მარა უმოს რთულ ნინაშა, ვინემ ნამცხვარიშ რეცეპტი. ქოკითხით: „ნამცხვარიშ რეცეპტის ქოჸუნს მაჭარალ-და, იმწკუმა უშკურიშ, ბრელით უმოს რთულ რეცეპტ,  მიქ ჭარ?“. უმოს მორდილ ბაღანას შეილებუნა თინა ხოლო გეუნწყათ, ნამდა უშკურიშ რეცეპტი ხვალე თე ართ ხილშო ვარინ, მთლიანო უშკურიშ ჯაშო რდუ ინოჭარილ თიშ დნმ-ს. შეილებუნა ქიგნაჯინათ მაგალითეფს, ნამუთ მოჩამილ რე ბროშურას „სიცოცხლეშ გოჭყაფა — ხუთ კითხვა, ნამდგაშეთ ღირ დაფიქრება“, გვერდეფი 10 —20 (ქორთულ ნინაშა).

¹¹ ბრელ მშობელი ბაღანეფწკუმა ართო გენიხილენს სტატიეფს ჟურნალ „გამოიღვიძეთ!“-ის მოჩამილ რუბრიკაშე „მიქ გაჭყუ?“, ნამთინე ხოლო თექ მოჩამილ მაგალითეფს მარტივო ეუნწყუნს უმოს ჭიჭე ბაღანეფს. მაგალთო, დანიას ართ წყვილქ თვითმფრინავიშ მაგალით მოუჸუნ ბაღანას: „თვითმფრინავეფი ჩიტეფს გუნა, მარა ქეშულებნანო თვითმფრინავეფს კვერცხეფიშ დოდვალა დო ჭიჭე თვითმფრინავეფიშ გიშაჸუნაფა? ქასაჭირუნანო ჩიტეფს დაფურინალო სპეციალურ შარა? ქოგუნო თვითმფრინავიშ ხონარ ჩიტიშ ღურჭულს? მი რე უმოს ჭკვერ — თვითმფრინავეფიშ გიშმაშკუმალარ დო ვარ ჩიტეფიშ გუმაჭყაფალ?“ თეცალ მსჯელობა დო ჯგირო მოფიქრებულ კითხვეფი მეხვარებ ბაღანეფს, გენვითარან ფიქრიშ უნარი დო გემანგარან ღორონთიშ რწმენა (იგავ. 2:10—12).

12. მუჭო უვითარენს მაგალითეფ ბაღანეფს ბიბლიაშა რწმენას?

¹² ეფექტურ მაგალითეფიშ მოჸუნაფა უმანგარენს ბაღანეფს თიშ რწმენას, ნამდა ბიბლია ზუსტ რე. მაგალთო, გენიფხილათ იობიშ 26:7 (წეკითხით). მუჭო შეილებუნა ქაძირუათ, ნამდა თე სიტყვეფ ღორონთიშ შთაგონებულო რე ჭარილ? მუშო ოკო რაგად, შილებე ბაღანას ფაქტეფი ქუმუჸონათ, მარა თეს ვა უჯგუნო, ქიმეხვარათ თის, გეგმირინუას ფანტაზიაშ უნარი? ქოუწით, ნამდა იობიშ დროს ვა არსებენდ ტელესკოპი დო კოსმოსურ ხომალდი. ბაღანაქ ოკო ქუგოძირუან, მუ რთულ იჸუაფუდ თიშ დაჯერება, ნამდა თიშმადიდა მუდგარენ, მუნერით დედამიწა რე, მუთუნს ვემკობუდ. ბაღანას შეულებ ბურთი ვარდა ქუა გეგმირინუას თიშ ოძირაფალო, ნამდა წონა უღუნ ფერ ობიექტეფი ჰაერს მუდგარენს ოკო უმარგუდას. თეცალ მაგალითით ბაღანა დერწმუნებ, ნამდა იეჰოვაშ ხემძღვანელობათ ბიბლიას ბრელ ხანიშ წოხოლე რდუ ინოჭარილ შხვადოშხვა ფაქტეფი, ონდო თეს კოჩ მეხვადუდ (ნეემ. 9:6).

13, 14. მუჭო შეულებუნა მშობლეფს, ქიმეხვარან ბაღანეფს, დაფასან ბიბლიურ პრინციპეფი?

¹³ განსაკუთრებულო მნიშვნელოვან რე, ქიმეხვარათ ბაღანეფს, დაფასან ბიბლიურ პრინციპეფი (წეკითხით ფსალმუნიშ 1:1—3). თეშო ბრელ საშვალება არსებენს. მაგალთო, ქოუწით ბაღანას, წერმიდგინას, ითამ სოდგარენ შორ კუნძულშა ოკო გინორთას დო მუსხირენ კოჩ ოკო გეგშაგორას, მიდგაწკუმა ართო აპირენს თექ ცხოვრებას. უკულ ქოკითხით: „მუნერ თვისებეფი ოკო უღუდას თითოულს, ნამდა მშვიდობიანო ქიცხოვრათ?“. შეილებუნა ქორაგადუათ ბაღანეფწკუმა გალატელეფიშ 5:19—23-ს მოჩამილ თვისებეფშენ.

¹⁴ თე მაგალითშე ბაღანეფი ჟირ მნიშვნელოვან მუდგარენს გურაფლენა. პირველ თინა რე, ნამდა ღორონთიშ პრინციპეფი ნამდვილ მშვიდობა დო ართობას უნწყუნს ხეს. მაჟია, იეჰოვა ახალ ქიანაშ მაცხოვრებელო მამზადენა (ეს. 54:13; იოან. 17:3). შეილებუნა ჩქინ პუბლიკაციეფშე და-დო ჯიმალეფიშ შემთხვევეფი ხოლო ქუმუჸონათ, მაგალთო, „საგუშაგო კოშკის“ მოჩამილ სტატიეფი რუბრიკაშე „ბიბლია ხალხიშ ცხოვრებას თირანს“. ქუდაპეჯით ჸუჩა თიცალ და ვარდა ჯიმა, მიდგაქ მთლიანო დოთირუ მუშ ცხოვრება დო ამდღა იეჰოვას ომსახურ დო ქოთხით, ქიგეჩუან მუშ ისტორია. თეცალ მაგალითეფშე იძირე, მუშმადიდა ძალა უღუ ბიბლიურ პრინციპეფიშ გიმორინაფას (ებრ. 4:12).

15. მუ ოკო რდას თქვან მთავარ მიზან, მუჟამსით ოგურუანთ ბაღანეფს?

¹⁵ მუჟამსით ბაღანეფს ოგურუანთინ, ვენოდოხოდათ  ჩარჩოეფს. გეგმირინეთ ფანტაზიაშ უნარი. გეთვალისწინით ბაღანაშ ხანი დო ქიმიორჩქვანეთ ფიქრის. ბაღანეფს თეშ ქიმუდირთით, ნამდა ოხიოლუდან გურაფა დო თაშ უმოსო დეახლოებუნა იეჰოვას. „დღას ვაშურდათ დო ქეცადით, ახალ-ახალ მეთოდეფით დო საინტერესოთ გეუნწყათ ბაღანეფს ნაჩინებ საკითხეფი“,— იჩიებ ართ მშობელი.

16. მუშენ რე მოთვინება საჭირო, მუჟამსით ბაღანეფს ოგურუანთ? ქიმიჸონით მაგალით.

¹⁶ ღორონთიშ შური ოხვარ ბაღანეფს, გენვითარან მანგარ რწმენა (გალ. 5:22, 23). მუჭოთ მცენარეს ოსაჭირ დრო რდუალაშო, თეშ რწმენაშ გამანგარებს ხოლო დრო ოკო. თაშ ნამდა, გეგმირჩქინით მოთვინება დო დუდ ვადანებათ ბაღანეფიშ გურაფას. ჟირ ბაღანაშ მუმა, ნამუთ იაპონიაშე რე, იჩიებ: „მა დო ჩქიმ ოჯახობა ყურადღებას ვა ვარკენდით ბაღანეფს. მუჟამსით ჭიჭელეფ რდესინ, ირ დღას კრებაშ დღალეფიშ გარდა 15 წუთის ვოგურუანდით. 15 წუთ ვართ ჩქინო რდუ ბრელ დო ვართ თინეფშო“. ართ რაიონულ ზედამხედველქ თქუ: „მარდუ ვორდინ თიმწკუმა, ბრელ მუთუნშა ვა ვორდ დარწმუნებულ დო კითხვეფ ხოლო მიღუდ, მარა თეს ხონარ მაღალო დღას ვებჩიებუდ. მუჭო დრო მიკიშუნ თეშ, ჭიჭე-ჭიჭეთ ბღებულენდ ჩქიმ კითხვეფშა პასუხეფს კრებაშ შეხვალამეფს, ოჯახურ თაყვანიშცემაშ დო პირად გურაფაშ დროს. ათეშგურშენ მნიშვნელოვან რე, მშობლეფქ გურაფა ვემუტუან ბაღანეფს“.

17. მუშენ რე მნიშვნელოვან მშობლეფიშ მაგალით დო მუჭო არზენს მუნეფიშ სქუალეფს ართ წყვილი ჯგირ მაგალითის?

¹⁷ მუშო ოკო რაგადი, თქვან რწმენაშ მაგალით მანგარ მნიშვნელოვან რე. ბაღანეფი გოკვირუნა, მუჭო გიმირჩქინანთ რწმენას დო თენა თინეფს ხოლო გინადვალუ. თაშ ნამდა, მშობლეფი, ვემიოტუათ თქვან რწმენაშ გამანგარება. ქაძირეთ ბაღანეფს, ნამდა იეჰოვა რეალურ რე თქვანო. ბერმუდაშ კუნძულეფს ართ ოჯახი, მუჟამსით სირთულეეფი უღუნ, ბაღანეფწკუმა ართო თხულენს იეჰოვას ხემძღვანელობას დო თეგვარო ბაღანეფს ოგურუანა, ნამდა მუნეფქ ხოლო ილოცან. «ჩქინ უნჩაშ ძღაბის ურაგადუთ: „მთლიანო მიენდ იეჰოვას, პირველ ადგილს მსახურება ქიგიორინე დო ბრელ მუთუნშე ვეწუხა“. მუჟამსით შედეგის მუშ თოლო ორწყენ, უმოსო ირწმუნებ თიშა, ნამდა იეჰოვა მოხვარუნა. თენა მანგარო უმანგარენს ღორონთიშ დო ბიბლიაშ რწმენას».

18. მუ მნიშვნელოვან ფაქტორ ოკო გეთვალისწინან მშობლეფქ?

¹⁸ მუშო ოკო რაგად, საბოლათ, ბაღანეფქ მუნეფიშით ოკო გენვითარან ღორონთიშ რწმენა. მშობლეფი, თქვა შეილებუნა დორგათ დო წყარ ელუბათ, მარა ხვალე ღორონთის შეულებ რდუალა (1 კორ. 3:6). ათეშგურშენ, ქოთხით ღორონთის წმინდა შური, ქიმგეხვარან ბაღანეფიშ გურაფას, მუშენდა თაშ იეჰოვას არზენთ საშვალებას, აკურთხას თქვან ხანდა (ეფეს. 6:4).