„თე კოჩ ჩქიმ გიშნაგორა რე თიშო, ნამდა ჩქიმ სახელ გუცხადას შხვაშთურეფს დო მეფეეფს“ (საქ. 9:15). უფალ იესოქ თე სიტყვეფი თქუ ახალ გაქრისტიანებულ ებრაელ ქომოლკოჩიშ გურშენ, ნამუსით პავლე მოციქულო იბჩინენთ.

თე მეფეეფშე ართ-ართ რომიშ იმპერატორ ნერონ რდუ. მუჭო იგინანდით დუდს, თქვა ქუგაფუდესკო დაცვებელ რწმენა თეცალ მართველიშ წოხოლე? ბიბლიაშე იძირე, ნამდა ქრისტიანეფქ პავლე მოციქულიშ მაგალითის ოკო მიაჸუნან (1 კორ. 11:1). პავლეშ მაგალითიშ ართ-ართ მხარე, ნამუსით შემლებუნა მივაჸუნათ, რე თიშ დამოკიდებულება სასამართლო სისტემაწკუმა.

მოსეშ კანონი მთელ ისრაელს მოქმედენდ, მარა შხვადო მახორუ ღორონთიშ მოშიშ ებრაელეფი ხოლო იცვენდეს თის. ახალ წანაკოროცხუათ 33 წანაშ ჟარნეჩდომავითა დღაშ აღნიშნებაშ უკულ ღორონთიშ მსახურეფს ვემეთხიებუდეს მოსეშ კანონიშ დაცვება (საქ. 15:28, 29; გალ. 4:9—11). მარა თეშ უმკუჯინუო, პავლე დო შხვა მოციქულეფი მოსეშ კანონს უპატიცემულოთ ვემიშინანდეს; ათეშგურშენ თინეფქ ხექ ვეშეშალესინ თეშ იქადაგეს იუდეველეფ ოხორანდეს ფერ ადგილეფს (1 კორ. 9:20). ფაქტ თინა რე, პავლე ხშირას გილეშ სინაგოგეფშა, სოდეთ იქადაქენდ თი ხალხწკუმა, მიდგას უღუდ რჩქინა აბრაამიშ ღორონთიშ გურშენ დო იმსჯელენდ წმინდა წერილეფშე (საქ. 9:19, 20; 13:5, 14—16; 14:1; 17:1, 2).

მოციქულეფი იერუსალიმშე ხემძღვანელენდეს ქადაქებაშ საქმეს. თინეფ ტაძარს ხოლო ოგურუანდეს (საქ. 1:4; 2:46; 5:20). კანკალეშა პავლე ხოლო გილეშ იერუსალიმშა, სოდეთ თინა ართშა ოჭოფეს დო ციხეს ქუდახუნუეს. თეს სასამართლო პროცესიქ ქუმაჸუნ დო საბოლათ პავლექ რომს ქუმოხვად.

მუ აზრიშ რდეს რომიშ მართველეფი თიშე, მუდგას პავლე ქადაქენდ? თე კითხვაშ პასუხი მიბღათინ თიშენ, ოკო ქიგებგათ, მუნერო უჯინედეს რომაელეფი ზოგადო რელიგიეფს. თინეფ ვაიძულენდეს რომიშ იმპერიას მახორუ შხვადოშხვა რჯულიშ ხალხის, ვარია ქუთქუალდესკონ მუნეფიშ რელიგიაშა.

რომაელეფქ შხვეფშე მეტ უფლებეფ მეჩეს მუნეფიშ იმპერიას მახორუ იუდეველეფს. ართ წიგნის ჭარ:  „იუდაიზმის დიდ პრივილეგია უღუდ რომიშ იმპერიას . . . იუდეველეფს რელიგიაშ თავისუფლება უღუდეს დო ვემეთხიებუდეს რომაელეფიშ ღორონთეფიშ თაყვანიშცემა. თინეფს მუნეფიშ კანონეფით შეულებუდეს საქმეშ მოგვარება ართიანწკუმა“ (Backgrounds of Early Christianity). იუდეველეფ ჯარშე ხოლო თავისუფალ რდეს. * მუჟამსით პავლე რომიშ მართველეფიშ წოხოლე ქრისტიანობას იცვენდუნ, თიქ გიმირინუ უფლებეფ, ნამუსით რომიშ კანონი არზენდ იუდეველეფს რწმენაშ დაცვებელო.

პავლეშ ნტერეფი ირნერო ოცადუდეს, აუხნარებდესკო თიშ წინააღმდეგ უბრალო ხალხი დო რომიშ მართველეფი (საქ. 13:50; 14:2, 19; 18:12, 13). ქობძირათ ართ მაგალით. იერუსალიმს ქრისტიანულ კრებაშ უხუცესეფქ ქიგეგეს, ნამდა იუდეველეფ გილეჩიებუდეს, ითამ პავლე მოსეშე განშე ულას ქადაქენდ. თეცალ ჭორეფიშ გურშენ ნამთინე ახალ გაქრისტიანებულ იუდეველქ შილებედ იფიქრუკონ, ნამდა პავლე პატის ვაცენდ თის, მუთ ღორონთშე რდუ დოდგინელ. თეშ გარდა, სინედრიონს შილებედ გეგმუცხადებუდკო, ნამდა ქრისტიანეფქ იუდაიზმის ეურთეს. თენა თაშ ქუმოხვალამედკონ, იუდეველეფს ვეიოჩირთუდეს დასაჯება. თინეფს ვემეჩანდეს ვართ საზოგადოებაწკუმა ურთიერთობაშ დო ვართ ტაძარს დო სინაგოგეფს ქადაქებაშ უფლებას. ათეშგურშენ კრებაშ უხუცესეფქ პავლეს ელუჩეს, მიდურთუმუდკო ტაძარშა დო გუკეთებუდკო თინა, მუდგას ღორონთი ვეთხინდ, მარა ვართ დანაშაულ იჸიდ დო თეთ მეჭყორდუდ ჭორეფ (საქ. 21:18—27).

უხუცესეფიშ მორჩქილაფაქ ბრელშა მეხვარ პავლეს, კანონით დუცვებუდკო სახიოლო ამბე (ფილ. 1:7). ტაძარს იუდეველეფქ ართ ამბე გეტახეს დო პავლეშ ჸვილუა მინდომეს. ათეშგურშენ რომაელეფიშ ჯარიშ ანთასკოჩიან ნაწილიშ უნჩაშიქ თინა დაპატიმრუ. მუჟამსით ზღვინდუა მუნდომესინ, პავლეს ვაუფულ, ნამდა რომიშ მოქალაქე რდუ. თინა კესარიაშა მიდეჸუნეს, სოვრეშეთ რომაელეფ იუდეას მართველენდეს. თაქ პავლეს ქიმიაჩ საშვალებაქ, რომაელ უნჩაშეფიშ წოხოლე გაბედულო ქუქადაქებუდკო. თეშ ჭყოლოფუათ, თი კათაქ, მიდგას ქრისტიანობაშენ ბრელ მუთუნ ვა უჩქუდუნ, უმოს ქიგეგეს.

საქმეეფიშ 24 დუდის ეჭარილ რე, მუჭო გერე პავლე სასამართლოს იუდეაშ რომაელ გამგებელ, ფელიქსიშ წოხოლე, ნამუსით ჭიჭე მუთუნ გაგებულ აფუდ ქრისტიანეფიშ რწმენაშ გურშენ. იუდეველეფ პავლეს აბრალუაფდეს, ნამდა თიქ არძაშ უნაკლებაშ სუმშა გინურთ რომიშ კანონს. თინეფ იჩიებუდეს, ნამდა მთელ იმპერიას პავლე იუდეველეფს ახნარენდ, ბუნტი გეუტახუდესკო, თის ხოლო აბრალუაფდეს, ნამდა საშიშ სექტაშ უნჩაშ რდუ დო ოცადუდ პატი გეუჸოთუკო ტაძარს, ნამუსით რომიშ იმპერია იცვენდ (საქ. 24:5, 6). თეცალ ბრალდებეფიშ გურშენ შილებედ პავლე ღურა ქიმუსაჯებდესკო.

ამდღა ქრისტიანეფშო საინტერესო რე, მუჭო უპასუხ პავლექ თე ბრალდებეფს. თინა მშვიდას რდუ დო პატიცემათ იჩიებუდ, მიშინუ კანონი დო წინასწარმეტყველეფი დო თქუ, ნამდა უღუდ უფლება თაყვან უცემუდკო მუშ ჯვეშეფიშ ღორონთშა. რომიშ კანონით თე უფლებაშ გიმორინაფა არძა იუდეველს შეულებუდ (საქ. 24:14). უმოს გვიანო პავლექ დეცვუ მუშ რწმენა დო ქეჩუ თიშ გურშენ უკულიან გამგებელ პორციუს ფესტუსს დო მეფე ჰეროდე აგრიპას.

სასამართლოქ მიკერძოებულქ ვეჸუკონ თიშენ, პავლექ დიძახ: „კეისარწკუმა ვასაჩივრენქ“. კეისარ თი დროს არძაშ უმოს ძალიერ მართველ რდუ (საქ. 25:11).

„სი კეისარიშ სასამართლოშ წოხოლე ოკო ქიგედირთე“, — უწუ ანგელოზიქ პავლეს (საქ. 27:24). რომაელ იმპერატორ ნერონს, მართველობა დიჭყუნ თი დროს, რაგადებულ აფუდ, ნამდა არძა სასამართლო საქმეს მუ ვა გარჩიენდ. მართველობაშ პირველ ბრუო წანაშ დინახალე სასამართლო საქმეეფიშ გარჩიებას უმენტაშ შემთხვევას შხვეფს ავალენდ. ართ წიგნის ჭარ, ნამდა მუჟამსით ნერონ, გეგნოჭყვიდუნდ მუქ მითინ გასამართლუკონ, თე საქმეს მუშ დოხორეს მირჩქილუანდ რჩქინელ დო გავლენა უღუდეს ფერ ელმაჩამალეფწკუმა ართო (The Life and Epistles of Saint).

 ბიბლია ვეჩიებ, ნერონქ პირადო მირჩქილუ პავლეშ საქმე დო გასამართლუ თინა, დო ვარ შხვეფს დავალ თე საქმე. თაშიო თეშიო, პავლე ალბათ გეუნწყუნდ მოსამართლეს, ნამდა თინა თაყვანს ცენდ იუდეველეფიშ ღორონთის დო ირკოც უზუკოლუნდ, ხელისუფლებას პატი ცესკონ (რომ. 13:1—7; ტიტ. 3:1, 2). სასამართლოშ წოხოლე სახიოლო ამბეშ დაცვებას ჯგირ შედეგიქ მაჸუნ — კეისარიშ სასამართლოქ პავლე გათავისუფლუ (ფილ. 2:24; ფლმ. 22).

ქრისტექ მუშ მიმაჸუნალეფს უწუ: „მიდაიჸონანა გამგებელეფშა დო მეფეეფშა ჩქიმ გურშენ, ნამდა დუმოწმათ თინეფს დო შხვაშთურეფს “ (მათ. 10:18). ჩქინო დიდ პატი რე, დუვამოწმათ იესოშ გურშენ. ჩქინ მონდომას, ნამდა დეფცვათ სახიოლო ამბე, შილებე იურიდიულ საქმეეფიშ მოგებაქ ქუმაჸუნას. მუშო ოკო რაგად, არასრულყოფილ კათაქ მუდგა ვეგნოჭყვიდანი, სახიოლო ამბეშ ქადაქებაშ უფლებას იეჰოვა მარზენა. ხვალე ღორონთიშ სამეფო გუმათავისუფლენა საბოლათ ჩაგრება დო უსამართლობაშე (ეკლ. 8:9; იერ. 10:23).

ამდღა ხოლო, მუჟამსით ქრისტიანეფ მუნეფიშ რწმენას იცვენან, თეთ იეჰოვაშ სახელს განადიდენა. პავლეცალო ჩქი ხოლო მშვიდეფი, გურგონწყუმილეფი დო დუდშა დაჯერებულეფი ოკო ვორდათ. იესოქ მუშ მიმაჸუნალეფს უწუ: „წინასწარ ვეფიქრათ დო ვემემზადათ, მუჭო დეცვათ დუდი, მუშენდა მა ქიმერჩანთ სიბრძნეს ორაგადეთ, ნამუშათ, არძაქ ართო გედირთან ხოლო, თქვან მოწინააღმდეგეფს მანგიორ ვარაგადენა“ (ლუკ. 21:14, 15; 2 ტიმ. 3:12; 1 პეტ. 3:15).

მუჟამსით ქრისტიანეფ მუნეფიშ რწმენას მეფეეფიშ, მთავრობაშ წარმომადგენელეფიშ დო თანამდებობაშ კათაშ წოხოლე იცვენან, თინეფ უქადაქენა თიცალ ხალხის, მიდგაწკუმა თეშ საშვალებაქ შხვა დროს შილებე ვემიაჩესკონ. სასამართლოქ ნამთინე საქმე ჩქინ საჯგირობუოთ გინოჭყვიდ. თეს ბრელ მუთუნიშ თირუაქ მაჸუნ კანონს; თექ სიტყვაშ დო თაყვანიშცემაშ თავისუფლებაშ დაცვებას მემსახურ. მარა თე სასამართლო საქმეეფს მუდგანერ შედეგიქ ვამაჸუნასინ, იეჰოვას გურს უხარენს მუშ მსახურეფიშ გაბედულება.