15 წანერ ვორდინ თეშ იმნათ. ამშვ თუთაშა დამხმარე პიონერო ქიდიბჭყი მსახურება დო ართ წანაშ უკულ ხოლო პიონერო. სკოლა გუვათენ, სარაიონო ზედამხედველს ვუწი, ნამდა მსახურება მოკოდ თექ, სოდეთ მაქადაქებელეფიშ მეტ საჭიროება რდუ. ბებწკუმა ფცხოვრენდ, ნამუთ ვარდ იეჰოვაშ მოწმე, ათეშგურშენ შხვა ქალაქშა მოკოდ გინოფრთკონ ოცხოვრებშა. მარა სარაიონო ზედამხედველქ მიწუ, ნამდა საჭიროება ზუსტად თი ქალაქის რდუ, სოდეთ მა ფცხოვრენდ. თექ მანგარ გლახა ხასიათის ქიგმორინუ. ვოცადუდ, ვამძირაფუდკო, მუჭო ბგინაფლენდ დუდს. დუდგუმოკინელო მოლაფრთ დო თიშ სიტყვეფშენ დეფიფქრი. თეშ უკულ ართ ჩქინ დას, მიდგაწკუმა ართო მსახურენდინ, ვუწი: „ჩქიმ აზრით, იონაცალო იფქციებუქ. მარა იონაქ ხომ ბოლოს იშენით მიდართ ნინევეშა. თაშ ნამდა, მა ხოლო თექ იმსახურებუქ, სოდეთ დამნიშნეს“.

ოთხ წანა რე ჩქიმ ქალაქის პიონერო მსახურენქ დო ვორწყექ, მუ ჭკვერულ რდუ თი ხემძღვანელობაშ მეჸუნა, ნამუთ სარაიონო ზედამხედველქ მუჩ. მთავარ პრობლემა ჩქიმ უარყოფით განწყობა რდუ. ასე მანგარ ხიოლი მიღუ მსახურებას. ართ თუთაშა 24 ბიბლიაშ გურაფა დიბჭყი. მადლობა იეჰოვას, ბიბლიაშ გურაფა ჩქიმ ბებწკუმა ხოლო ქიდიბჭყი, ნამუთ ადრე მოწინააღმდეგუდ.

ართ ოსურპატინს, ნამუთ ბიბლიას გურაფლენდ, გინაჭყვიდირალ აფუდ, ვარდა კონგრესშა იდუკო ოკო დო ვარდა მუშ ქომონჯის ოკო აჸუნუკო ნათესეშ დაბადებაშ დღაშა. ქომონჯიქ გოუტუ კონგრესშა დო ოსურქ უწუ, ნამდა კონგრესიშ უკულ თინა ხოლო ქიმიშ დაბადებაშ დღაშა. მარა, მუჟამსით კონგრესშე ჸუდეშა ირთუდუნ, დეფიქრ, ნამდა უჯგუშ იჸიდ, ვენუჸოთამუდკო დუდ თიცალ სიტუაციაშა, ნამუთ მუშ სულიერობას ეცილებუდ. ათეშგურშენ გინოჭყვიდ, ვაულინუდკო თევრე.

თე დროს, ქომონჯიქ მუშ ნათესეფს უწუ, ნამდა მუშ ოსურ „მოწმეეფიშ კრებას“ ქიდესწრებუდ დო უკულ ქიმიშ დაბადებაშ დღაშა. მარა ნათესეფქ, უწუეს: „თინა ვამურს. იეჰოვაშ მოწმეეფი დაბადებაშ დღალეფშა ვეგლულა!“ *

ქომონჯი მანგარ კმაყოფილ რდუ, მუშენდა მუშ ოსურქ დეცუ მუშ რწმენა დო სინდის. თეცალ საქციელით ოსურს ქიმიაჩ საშვალებაქ, ქოუქადაგუკო ქომონჯის დო ქოთ შხვეფს. თეშ შედეგ თინა, რდუ ნამდა ქომონჯიქ ქიდიჭყუ ბიბლიაშ გურაფა დო მუშ ოსურწკუმა ართო ოსწრუ კრებეფს.