ოგურაფალ სტატია 8
მუშენ ოკო გიმოფხანტათ მარდულობა?
„რდათ მარდულეფ“ (კოლ. 3:15).
ობირეში 46 სქან მარდულეფ ვორეთ, იეჰოვა
შინაარსი *
1. მუჭო გიმირჩქინ სამარიელ კოჩიქ იესოშ მარდულობა?
ვით ქომოლკოჩ უიმენდო მდგომარეობას რდუ, მუშენდა კეთრ უღდეს დო თინეფიშ ჯამრთელობა იუფრაშებუდ. ართშა დიდებულ მასწავლებერ, იესო შორშე ქოძირეს. თინეფს გუნაგონ აფდეს, ნამდა იესო ხალხის არძანერ ლახალაშე ოსქილიდუანდჷ დო დარწმუნებულ რდეს, ნამდა მუნეფს ხოლო დასქილიდუანდჷ. ათეშენ ხონარმაღალო იძახდეს: „იესო, მოძღვარ, ქომჭყოლოფეთ!“. თეშ უკულ თე ლახალაშე სრულაშე დოსქიდეს. მუშო ოკო რაგად, თინეფ მარდულეფ იჸუაფდეს იესოშ. მარა თინეფშე ხვალე ართიქ გიმირჩქინ სიტყვიერო იესოშ მარდულობა. * სქილადირ სამარიელ კოჩიქ ხონარმაღალო განადიდ ღორონთ (ლუკ. 17:12—19).
2, 3. ა) მუქ შილებე მეცილან მარდულობაშ გიმოხანტუას? ბ) მუს გუვარჩიენთ თე სტატიას?
2 სამარიელ კოჩცალო, ჩქი ხოლო მოკონა თინეფიშ მარდულობა გეგმოფხანტათ, მით ჯგირო მოქცუნა. მარა მინშა შილებე, მოჭყორდუნა სიტყვათ ვარდა საქმეთ ქუვოძირათ, ნამდა მარდულეფ ვორეთ.
3 თე სტატიას გუვარჩიენთ, მუშენ რე მნიშვნელოვან მარდულობაშ გიმოხანტუა მუჭოთ სიტყვათ, თეშ საქმეთ ხოლო. ქობძირუნთ მუსხირენ ბიბლიურ პერსონაჟიშ მაგალითის, მიდგაქ მარდულობა გიმირჩქინ დო თინეფიშ მაგალითის ხოლო, მით უმადურ რდუ. თეს გეძინელ, გუვარჩიენთ მარდულობაშ გიმოხანტუაშ კონკრეტულ საშვალებეფს.
მუშენ ოკო გიმოფხანტათ მარდულობა
4, 5. მუშენ ოკო გიმიფრჩქინათ მარდულობა?
4 მარდულობაშ გიმოხანტუაშ მაგალითის იეჰოვა მარზენა. თინა აჯილდოენს თინეფს, მით მუშ მოსაწონო იქციებ (2 სამ. 22:21; ფსალმ. 13:6; მათ. 10:40, 41). ბიბლია მომწოდენა, მივაჸუნათ ღორონთიშ მაგალითის (ეფეს. 5:1). თაშ ნამდა, ზუსტას თენა რე თიშ მთავარ მიზეზ, ნამდა გეგმოფხანტათ მარდულობა.
5 ქობძირათ ხოლო შხვა მიზეზ, მუშენ ოკო გიმოფხანტათ შხვეფიშ მარდულობა. მარდულობა შილებე შევადარათ ჯგირ ოჭკუმალს. თინა უმოს გემუან რე, მუჟამსით შხვეფწკუმა ართო ბჭკუმუნთ. ჩქი ბედნერო ბგინაფლენთ დუც, მუჟამსით შხვეფ მარდულ რენა თი საქმეშენ, მუთ თინეფშო ვაკეთით. შხვეფ ხოლო ბედნერ რენა, მუჟამსით თინეფიშ მარდულობას გიმოფხანტუნთ. თეთ ვოძირანთ, ნამდა ვაფასენთ თი პიროვნებაშ მონდომას, მიდგაქ მიმეხვარეს ვარდა მუჩეს მუდგარენ, მუთ მოსაჭირდეს. შედეგო თი პიროვნება დო ჩქინ შკას მეგობრობა იმანგარებ.
6. მუთ მოგენს მარდულობაშ სიტყვეფ ოქროშ უშკურეფს?
6 მარდულობაშ გიმოხანტუა მნიშვნელოვან რე. ბიბლიას ჭარჷ: „დროულო რაგადებულ სიტყვეფ მოგენს ოქროშ უშკურეფს ნაჭკადა ვარჩხილს“ (იგავ. 25:11). წერმიდგინით, მუშმასკვამა დო მუ ძვირფას იჸუაფ ოქროშ უშკურეფ ნაჭკადა ვარჩხილს! თეცალ მუდგარენ ქუგაჩუქანინ, ალბათ მანგარო გახიოლენა. მარდულობაშ სიტყვეფს ხოლო მანგარ ხიოლ მოუღჷ შხვეფშო. ოქროშ უშკურეფ დღას ვეგლელებ; თეგვარო, მარდულობაშ სიტყვეფ ხოლო დღას ვა გაჭყორდუ პიროვნებას დო ირიათო გაშინედას იჸი.
თინეფ მარდულობას გიმოხანტუნდეს
7. მუჭოთ ფსალმუნეფიშ 27:4-შე იძირე, მუჭო გიმოხანტეს დავითიქ დო ფსალმუნეფიშ შხვა მაჭარალეფქ ღორონთიშ მარდულობა?
7 ჯვეშ დროს ღორონთიშ ბრელ მსახურქ გიმირჩქინ მარდულობა. ართ-ართ რდუ მეფე დავით (წეკითხით ფსალმუნი 27:4). თინა მანგარო აფასენდჷ წმინდა თაყვანიშმცემლობას, მუდგას სიტყვა დო საქმეთ ამტკიცენდჷ. ტაძარიშ აშენებაშ დროს თიქ დიდ რაოდენობათ შეწირ მუშ ქონება. ასაფიშ შთამომავლობა მარდულობას გიმოხანტუნდჷ ფსალმუნეფიშ დო ღორონთიშ ოდიდებელ ობირეშეფიშ ჭარუათ. ართ-ართ ობირეშის თინეფ მადლობას ურაგადნა ღორონც დო აღფთოვანებას გიმოხანტნა თიშ სარკო საქმეეფშენ (ფსალმ. 75:1). არგამა რე, ნამდა დავით დო ასაფიშ შთამომავლეფს ოკოდეს მარდულობაშ გიმოხანტუა თი კურთხევეფშენ, მუდგას იეჰოვაშე ღებულენდეს. მუჭო შეილებნა მიაჸუნათ თინეფიშ მაგალითის?
მუს ბგურაფლენთ რომაელეფშა მეჭარილ წერილშე მარდულობაშ გიმოხანტუაშ გურშენ? (ქოძირით აბზაცი 8, 9) *
8, 9. მუჭო გიმოხანტჷ პავლე მოციქულქ და დო ჯიმალეფიშ მარდულობა დო მუ შედეგიქ შილებე მაჸუნკო თეს?
8 მოციქულ პავლე და დო ჯიმალეფიშ მარდულობას გიმოხანტუნდჷ. თინა მუშ პირად ლოცვეფს ირიათო მადლობას ურაგადუდ ღორონც თინეფშე. თეს გეძინელ, პავლე მარდულობას თიმწკუმა ხოლო ოძირანდჷ, მუჟამსით წერილეფს მეჭარუნდჷ თინეფს. მაგალთო, რომაელეფიშ მა-16 დუდიშ პირველ 15 მუხლის თიქ 27 თანაქრისტიან მიშინუ სახელით. პავლექ პრისკილა დო აკვილაშენ თქუ: „დუც საფრთხეშა ინიჸოთანდეს ჩქიმ გურშენ“. თეწკუმა ართო, და ფებე ხოლო მიშინუ, ნამუთ ბრელს ოხვარუდ, თინეფ შკას პავლეს ხოლო. პავლექ ქაცქუ თე ძვირფას და დო ჯიმალეფს, მუშენდა ბრელს ხანდენდეს (რომ. 16:1—15).
9 პავლეს უჩქუდ, ნამდა და დო ჯიმალეფ არასრულყოფილეფ რდეს, მარა რომაელეფშა მეჭარილ წერილიშ ბოლოს თინეფიშ ჯგირ თვისებეფშე გამახვილ ყურადღება. წერმიდგინით, მუჭო ელუკინანდჷ გურშა თე და დო ჯიმალეფს, მუჟამსით პავლეშ ოცქვაფურ სიტყვეფს კრებას ხონარმაღალო წეკითხენდეს. შედეგო, პავლე დო თინეფ შკას მეგობრულ ურთიერთობა უმოსო გემანგარებუდ. ქიგმოხანტუნთო ირიათო მარდულობას თი ჯგირ საქმეეფშენ, მუდგას კრებაშ წევრეფ თქვან გურშენ ორთნა?
10. მუშ გურაფა შემლებნა იესოშ მაგალითშე, მუჟამსით მუშ მიმაჸუნალეფიშ მარდულობას გიმოხანტუნდჷ?
10 მცირე აზიაშ კრებეფშა მეჭარილ წერილეფს, იესოქ მარდულობა გიმოხანტჷ მუშ მიმაჸუნალეფიშ კეთებულ საქმეეფშენ. მაგალთო, თიატირიშ კრებას თეცალ სიტყვეფ უწუ: „მიჩქჷ სქან საქმეეფ, სქან ჸოროფა, რწმენა, მსახურება, მოთვინება დო თინა, ნამდა სქან ბოლო საქმეეფ ადრე კეთებულ საქმეეფშე უმოს რე“ (გამოცხ. 2:19). იესოს ხვალე თინეფიშ საქმიანობა ვა მუშინუაფ; თიქ ქაცქუ თინეფს ჯგირ თვისებეფშენ, ნამუთ აღძრენდჷ, აკეთესკო ჯგირ საქმეეფ. მართალ რე, იესოს უჩქუდ, ნამდა თინეფს რჩევა ოსაჭირდეს, მარა ჩიებაშ დაჭყაფუს დო ბოლოს მუშ სიტყვეფით გურშა ელუკინ (გამოცხ. 2:25—28). დეფიქრით, იესოს მუჭოთ კრებაშ დუც, ძალაუფლება უღჷ არძა კრებაწკუმა. თინა ვალდებულ ვა რე მადლობა მიწუან თი საქმეეფშე, მუდგას თიშო ვორთუთ. მარა თის არჩქილე, მუშმადიდა ძალა უღჷ მარდულობაშ გიმოხანტუას. ნამდვილო, მუ ჯგირ მაგალით რე თენა უხუცესეფშო.
თინეფქ ვეგმირჩქინეს მარდულობა
11. მუჭოთ ებრაელეფიშ 12:16-შე ვორწყეთ, მუნერ დამოკიდებულება უღუდ ესავს თიშე, მუთ ღორონთიშ თოლს წმინდა რდუ?
11 სანარღოთ, ნამთინე ბიბლიურ პერსონაჟიქ ვეგმირჩქინ მარდულობა. მაგალთო, ესავქ იეჰოვაშ მორჩილ დო მოჸოროფე ოჯახის ირდჷ, მარა თინა ვაფასენდჷ თის, მუთ წმინდა რდუ ღორონთიშ თოლს (წეკითხით ებრაელები 12:16). მუჭო გიმორჩქინდჷ ესავიშ უმადურობაქ? თიქ მუშ პირმშოობა უკლაშ ჯიმას, იაკობის ოჭკუმალშა გუთირუ (დაბ. 25:30—34). უმოს გვიანო, ესავქ ინარღჷ მუშ საქციელ. მარა თიქ უმადურობა გიმირჩქინ, ათეშენ წუწუნიშ მუთუნნერ მიზეზ ვა უღუდ, მუჟამსით ვემიღ პირმშოობა.
12, 13. მუჭო გიმირჩქინეს ისრაელეფქ უმადურობა დო მუ შედეგიქ მაჸუნ თეს?
12 ისრაელეფს მარდულობაშ გიმოხანტუაშ ბრელ მიზეზ უღდეს. 10 სასჯელიშ უკულ ღორონთიქ ირსხჷ თინეფ ეგვიპტეშ მონობაშე. იეჰოვაქ ისრაელეფ თიმწკუმა ხოლო ირსხჷ, მუჟამსით ეგვიპტეშ ჯარ ჭითა ზღვაწკუმა განადგურ. თინეფქ სიმარდულით ქუბირეს იეჰოვას გამარჯვებაშ ობირეშ. მარა ქუდოსკიდესო ისრაელეფქ ბოლოშა მარდულეფქ?
13 მუჟამსით ისრაელეფქ ახალ სირთულეეფს ქეშეხვადეს, გაჭყორდეს თი ჯგირ საქმეეფ, ნამუთ ღორონთიქ თინეფშო აკეთ დო უმადურობა გეგმირჩქინეს (ფსალმ. 106:7). ბიბლიას თინეფიშ გურშენ ინოჭარ: „საყალოს ურაგადუდ ისრაელიშ მთელ კრებულ მოსეს დო აარონს უდაბნოს“. მარა სინამდვილეს თინეფ იეჰოვაშ გურშენ იჩიებდეს საყალოს (გამ. 16:2, 8). იეჰოვას გურქ ქელაჭვჷ თინეფიშ გიმორჩქინელ უმადურობაშენ. თეშ უკულ ღორონთიქ თქუ, ნამდა იესო ნავეშ სქუა დო ქალებ იეფუნეშ სქუაშ გარდა არძა დოღურუდ უდაბნოს (რიცხ. 14:22—24; 26:65). მორთ, ქობძირათ, მუჭო შემლებნა ვემიფქცუათ თინეფცალო, მიდგაქ მარდულობა ვეგმოხანტჷ დო მივაჸუნათ შხვეფიშ ჯგირ მაგალითის.
გეგმირჩქინით მარდულობა
14, 15. ა) მუჭო შეულებ დაქორწინებულ წყვილს ართიანიშ მარდულობა გიმოხანტას? ბ) მუჭო შეულებნა მშობლეფს, დაგურუან სქუალეფს მარდულობაშ გიმოხანტუა?
14 ოჯახის. მუჟამსით ოჯახიშ წევრეფ ართიანიშ მარდულობას გიმოხანტნა, თეს მთელ ოჯახშო მოუღ ჯგირობუა. მარდულობაშ გიმოხანტუა დაქორწინებულეფს უმოსო აახლოენს ართიანწკუმა. თეს გეძინელ, თინეფ ადვილო პატიენა ართიანს შეცდომეფს. ქომონჯ, ნამუთ აფასენს მუშ ოსურს, ხვალე თიშ ჯგირ საქმეეფს ვარწყენ, ოცქვანს თის თეშ გურშენ (იგავ. 31:10, 28). გონიერ ოსურ ხოლო ქომონჯის კონკრეტულო ურაგად, მუშ გურშენ აფასენს თის.
15 მშობლეფ, მუჭო შეილებნა დაგურუათ თქვან სქუალეფს, გეგმოხანტან მარდულობა? რშუდან, ნამდა სქუალეფ თქვან ჩიება დო საქციელშე ბრელ მუდგარენს გურაფლენა. ათეშენ ქიმეჩით თინეფს ჯგირ მაგალით დო ქოუწით მადლობა, მუჟამსით მუდგარენ ჯგირს გიკეთენა. თეს გეძინელ, ქუდაგურეთ სქუალეფს, მადლობა ქუწუან შხვეფს ჯგირ საქმეეფშენ. ქიმეხვარით თიშ გაგებას, ნამდა მარდულობა გურშე მოურს დო თინეფიშ სიტყვეფს ჯგირიშ კეთება შეულებ. მაგალთო, ართ ახალგაზრდა ოსურ იჩიებ: „32 წანერ რდუნ თეშ, დიაჩქიმქ ხვალე ქუდოსკიდ დო 3 სქუაქ აჸუ ორდალქ. მუჟამსით მა გინიფრთჷ 32 წანერო, ქიმეფხვად, მუნერ ძნელ აჸიდ თეშ კეთება. ათეშენ მადლობა ვუწი თი ირფელშე, მუთ ჩქიმო დო ჩქიმ ჯიმალეფშო აკეთ. თიქ ამარდე მიწუ, ნამდა ჩქიმ სიტყვეფქ მანგარო შეხუ თიშ გურს, ხშირას იშინანს თეს დო ირიათო ბედნერო გინაფლენს დუც“.
ქუდაგურეთ სქუალეფს მარდულობაშ გიმოხანტუა (ქოძირით აბზაცი 15) *
16. ქიმიჸონით მაგალით, მუჭო შილებე მარდულობაშ გიმოხანტუათ გურშა ელვუკინათ შხვეფს.
16 კრებას. და დო ჯიმალეფს გურშა ელვუკინანთ, მუჟამსით თინეფიშ მარდულობას გიმოფხანტუნთ. მაგალთო, 28 წანერ უხუცესიქ, სახელო ხორხექ სერიოზულო დელახ. ათეშენ ართ თუთას კრებაშ შეხვალამეფშა ვეშიალებუ დასწრებაქ. კრებაშა გილულა ქიდიჭყუნ უკულ ხოლო, დავალებეფ ვაკეთებედ. ხორხე იჩიებ: «დუც უღირსო ბგინაფლენდჷ, მუშენდა ლახალაშ გურშენ კრებას პასუხიშმგებლობეფ ვეშმასრულებედ. მარა ართშა კრებაშ უკულ, ართ ჯიმაქ მიწუ: „მადლობა მოკო გიწუე თი ჯგირ მაგალითშე, ნამუთ ჩქიმ ოჯახის მეჩჷ. სქან მოხსენებეფქ მანგარო მიმეხვარეს. ჩქი რწმენაქ გემემანგარეს დო სულიერო წიმი მიდაფრთით“. თე სიტყვეფქ თეშ შეხუ ჩქიმ გურს, ნამდა თოლეფქ ჩილამურეფით ემაფშჷ. თიშ სიტყვეფქ დროულქ იჸუ ჩქიმო».
17. მუჭოთ კოლოსელეფიშ 3:15-ს რე მოშინაფილ, მუჭო შემლებნა ვოძირათ, ნამდა იეჰოვაშ მარდულ ვორეთ?
17 ჩქინ ღორონთწკუმა. იეჰოვაქ ხვეიანო მუჩეს სულიერ საზრდო. მაგალთო, სასარგებლო მითითებეფს ბღებულენთ ჩქინ შეხვალამეფიშ, პუბლიკაციეფიშ დო ვებ-გვერდიშ საშვალებათ. ქოიღდესო თიცალ შემთხვევა, მუჟამსით მოხსენებაშ მორჩქილაფაშ, სტატიაშ კითხირიშ ვარდა მაუწყებლობაშ ჯინაშ უკულ გითქუალნა: „ზუსტას თენა მოსაჭირუდ“. მუჭო შემლებნა ვოძირათ, ნამდა იეჰოვაშ მარდულ ვორეთ? (წეკითხით კოლოსელები 3:15). ართ-ართ საშვალება რე ჩქინ ლოცვეფს მადლობა ვუწუათ ღორონც თეცალ ძვირფას საჩუქარშენ (იაკ. 1:17).
სამეფო დარბაზეფიშ მიკოჯინა ჯგირ საშვალება რე გეგმოფხანტათ მარდულობა (ქოძირით აბზაცი 18)
18. მუჭო შემლებნა ვოძირათ, ნამდა ვაფასენთ ჩქინ სამეფო დარბაზის?
18 იეჰოვაშ მარდულობას თით ხოლო გიმოფხანტუნთ, ნამდა სამეფო დარბაზეფს ვულუანთ. ჩქი რეგულარულო ბღებულენთ მონაწილებას ჩქინ დარბაზეფიშ მიკოლუაფას; თინეფ, მიდგას აპარატურა ობარნა, ირნერო ოცადნა ჯგირო ქიმკაჯინან თის. მუჟამსით ჩქინ დარბაზეფს ჯგირო ქიმკულუანთ, თინეფ ბრელ ხანს გარზჷ დო ხშირას ვეჸუაფ ორემონტალ. თეგვარო ფარას დაბზოგენთ, მუთ საშვალებას მუჩანა, მთელ მსოფლიოს უმოს მეტ დარბაზ ავაშენათ ვარდა გეგნვაკეთათ.
19. მუს ბგურაფლენთ რაიონულ ზედამხედველიშ დო თიშ მეუღლეშ მაგალითშე?
19 თინეფწკუმა, მით ბრელს ხანდენს ჩქინო. მარდულობაშ სიტყვეფქ შილებე დადებითო იმოქმედას პიროვნებაწკუმა, ნამუთ სირთულეეფს შეხვადუ. ქობძირათ რაიონულ ზედამხედველიშ დო თიშ მეუღლეშ მაგალით. ზოთონჯიშ ართ დღას მსახურებაშ უკულ თინეფ შულადირეფქ დირთეს ჸუდეშა. თიცალ ჩხურ რდუ, ნამდა რაიონულ ზედამხედველიშ ოსურ პალტოთ ჯანუდ. ოჭმარეს მუშ ქომონჯის უწუ, ნამდა ვეშიალებედ გილმალ მსახურებაშ გაგრძელება. უმოს გვიანო თი ოჭმარეს ფილიალშე წერილქ ქუმურთეს, ნამუთ პირადო თე დაშა რდუ მოჯღონელ. თე წერილს თის ოცქვანდეს მსახურებაშე დო მოთვინებაშე, ნამდგას გიმირჩქინანდჷ. თექ თინა ხოლო ჭარუდ, ნამდა ადვილ ვარდჷ ირ მარას ართ ოცხოვრებელშე მაჟიაშა გინულა. თიშ ქომონჯ იჩიებ: „თე სიტყვეფქ თეშ შეხუ ჩქიმ მეუღლეშ გურს, ნამდა თეშ უკულ დღას ვა უთქუალ გილმალ მსახურებაშ მეტებაშენ. პირიქით, მუსხიშა დუვაპირ მსახურებაშ მეტებან, თიქ გურშა ელამკინ“. თე წყვილ 40 წანაშე მეტ ხანს რდუ გილმალ მსახურებას.
20. მუშ კეთებას ოკო ვეცადათ ირ დღას დო მუშენ?
20 მორთ, ვეცადათ ირ დღას სიტყვათ დო საქმეთ ქუვოძირათ, ნამდა მარდულეფ ვორეთ. შურ დო გურით ნარაგადა სიტყვეფქ დო საქმეეფქ შილებე დროულქ იჸუას პიროვნებაშო, ნამუთ თე უმადურ ქვეყნიერებას შხვადოშხვა პრობლემას ობრძოლ. თეს გეძინელ, მარდულობაშ გიმოხანტუა მეგობრობაშ განმტკიცებას ხოლო ოხვარ, ნამუთ მარადიულო გეგრძელებ. მუთ არძაშ უმოს მნიშვნელოვან რე, თეგვარ საქციელით ჩქინ ზეციერ მუმაშ იეჰოვაშ მაგალითის მეპჸუნთ.
ობირეში 20 საჸოროფო სქუა მუჩით
^ აბზ. 5 მუშ გურაფა შემლებნა იეჰოვაშ, იესოშ დო სამარიელ კეთროვანიშ მაგალითეფშე მარდულობაშ გიმოხანტუაშ გურშენ? თე სტატიას გუვარჩიენთ მუსხირენ მაგალითის, სოვრეშეთ ქობძირუნთ, მუშენ რე მნიშვნელოვან მარდულობაშ გიმოხანტუა დო მუჭო შემლებნა თეშ კეთება.
^ აბზ. 1 განმარტება: მარდულობაშ გიმოხანტუა მიდგარენიშ ვარდა მუდგარენიშ მიმართ ნიშნენს, ნამდა აფასენქ თის. თე სიტყვა შურ დო გურით გრძნობეფიშ გიმოხანტუას ხოლო ნიშნენს.
