1. მუქ შილებე იმოქმედას ქომოლკათაშ დამოკიდებულებაშა მეთაურობაშ პრინციპწკუმა დაკავშირებით?

მუს ნიშნენს სიტყვა „მეთაურობა“ თქვანო? ნამთინე ქომოლკოჩ საშვალებას არზენს ტრადიციას, კულტურას ვარდა წარმომავლობას, იმოქმედას თიშა, მუჭო მექციებ მუშ ჩილ დო სქუას. ქიდეკვირით, მუს იჩიებ ართ და, იანიტა, ნამუთ ევროპას ცხოვრენს: „მა ფცხოვრენქინ თექ, თიცალ აზროვნება რე დამკვიდრებულ, ნამდა ოსურკათას ქომოლკათაშე უმოს დაბალ მდგომარეობა უკინებნა დო თინეფს, მუჭოთ მსახურეფს, თეშ ოკო უჯინედან“. ართ ჯიმა, ლუკა, ნამუთ შეერთებულ შტატეფს ცხოვრენს, იჩიებ: „ნამთინე მუმა მუშ ქომოლსქუას ოგურუანს, ნამდა ოსურკათაშ აზრ ვა რე მნიშვნელოვან დო ქომოლკათაქ მუთუნს ოკო ვემიაქცუან ყურადღება, მუდგას თინეფ იჩიებნა“. მარა იეჰოვას ვაკო, ქომოლკათაქ მუნეფიშ მეთაურობა თეშნერო გიმირინუან (ქეშუდარით მარკოზიშ 7:13). იმწკუმა, მუჭო შეულებ ქომოლკოჩის რდას ჯგირ ოჯახიშ დუდ?

2. მუ ოკო უჩქუდას ოჯახიშ დუდის დო მუშენ?

² ჯგირ ოჯახიშ დუდ ქორდასინ, ქომოლკოჩიქ პირველ რიგის ოკო ქიგეგას, მუს ითხინს იეჰოვა თიშე. თინა ხოლო ოკო უჩქუდას, მუშენ გიონწყუ იეჰოვაქ მეთაურობაშ პრინციპ დო კონკრეტულო, მუჭო შეულებ მიაჸუნას იეჰოვა დო იესოშ მაგალითის. მუშენ რე ქომოლკოჩშო მნიშვნელოვან თე ირფელიშ რჩქინა? მუშენდა იეჰოვაქ ოჯახიშ დუდეფს მეჩჷ გარკვეულ ძალაუფლება დო თინეფშე ელჷ, ნამდა თის სწორას გეგმირინუანა (ლუკ. 12:48ბ).

3. მუს ბგურაფლენთ მეთაურობაშ გურშენ პირველ კორინთელეფიშ 11:3-ს ინოჭარილ სიტყვეფშე?

³ წეკითხით 1 კორინთელეფიშ 11:3. თე მუხლ ენწყუნს, მუჭო აფჷ იეჰოვას გენწყილ მუშ ოჯახ ქოთ ზეცას დო ქოთ დედამიწას. მეთაურობაშ პრინციპ ჟირ ნაწილშე შითმოდირთუ — ძალაუფლებაშე დო პასუხიშმგებლობაშე. იეჰოვა რე  „ირფელიშ დუდ“ დო არძაშ უმოს ძალაუფლება უღჷ, ათეშენ თიშ სქუალეფ, ანგელოზეფ დო ადამიანეფ, ანგარიშვალდებულ რენა იეჰოვაშ წოხოლე (რომ. 14:10; ეფეს. 3:14, 15). იეჰოვაქ იესოს მეჩჷ ძალაუფლება კრებას, მარა მუჭო მიმექციებნან თიშ გურშენ, ანგარიშ ოკო ჩაბარას მუშ მუმას (1 კორ. 15:27). იეჰოვაქ ქომონჯის ხოლო მეჩჷ ძალაუფლება ჩილ დო სქუაშ მიმართ, მარა ოჯახის მუჭო მექციებუნ თიშ გურშენ, ანგარიშ ოკო ჩაბარას ქოთ იეჰოვას დო ქოთ იესოს (1 პეტ. 3:7).

4. მუ ძალაუფლება უღნა იეჰოვა დო იესოს?

⁴ იეჰოვა მუშ დიდ ოჯახიშ დუდ რე, ათეშენ თის უღჷ ძალაუფლება, მეჩას წესეფ მუშ სქუალეფს დო მითხუას თინეფშე მორჩილება (ეს. 33:22). იესოს ხოლო, მუჭოთ ქრისტიანულ კრებაშ დუდის, უღჷ უფლება, დადგინას წესეფ დო მითხუას თინეფიშ მორჩილება (გალ. 6:2; კოლ. 1:18—20).

5. მუ ძალაუფლება უღჷ ქრისტიანულ ოჯახიშ დუდის, მარა მუჭო იზღუდეფ თე ძალაუფლება?

⁵ იეჰოვა დო იესოცალო ოჯახიშ დუდის უღჷ ძალაუფლება მუშ ოჯახის გადაწყვეტილებეფ მიღას (რომ. 7:2; ეფეს. 6:4). მარა თე ძალაუფლება შეზღუდულ რე. მაგალთო, თიშ მოთხოვნეფ გერსხილ ოკო რდას ღორონთიშ სიტყვას მოჩამილ პრინციპეფშა (იგავ. 3:5, 6). ოჯახიშ დუდის ვა უღჷ უფლება წესეფ დუდგინას თინეფს, მით ვა რე მუშ ოჯახიშ წევრ (რომ. 14:4). თეწკუმა ართო, მუჟამსით სქუალეფ მირდუნა დო ოცხოვრებშა ცალკე გეგნულა, თინეფ პატის ცენდან იჸი მუმას, მარა თინა ვეჸუაფ თინეფიშ მეთაურ (მათ. 19:5).

6. მუშენ გიონწყუ იეჰოვაქ მეთაურობაშ პრინციპ?

⁶ იეჰოვაქ გიონწყუ მეთაურობაშ პრინციპ, მუშენდა უჸორს მუშ ოჯახ. თენა ძღვინ რე თიშე. მეთაურობაშ პრინციპ საშვალებას არზენს იეჰოვაშ ოჯახის, რდას მშვიდ დო მოწესრიგებულ (1 კორ. 14:33, 40). თე პრინციპიშ რჩქინაშ უმშო იეჰოვაშ ოჯახ ვეჸუაფუდ ორგანიზებულ დო ბედნერ. მაგალთო, მითინს ვარჩქვენუდ, მიქ ოკო მიღკო გადაწყვეტილება დო მიქ ოკო შეასრულკო თინა.

7. მუჭოთ ეფესოელეფიშ 5:25, 28-ს ჭარჷ, ოკოდუო იეჰოვას, ნამდა ქომოლკათას დაუმცირებდესკო ოსურეფ?

⁷ ღორონთიშ გენწყილ მეთაურობაშ პრინციპ ჯგირ ქორენ-და, იმწკუმა, მუშენ ამცირენს ამდღა ბრელ ოსურს ქომონჯ? თიშენ, ნამდა ბრელ ქომოლკოჩ ვეთვალისწინენს იეჰოვაშ ნორმეფს, ნამუთ ოჯახის ოხუ დო, თეშ მანგიორო, უსხუნ, ადგილობრივ ტრადიციეფს დო ადათ-წესეფს მიაჸუნას. თინეფ შილებე თიშენ ოქცუდან გლახათ მუნეფიშ ოსურეფს, ნამდა ეგოისტურ სურვილეფ დეკმაყოფილან. მაგალთო, ქომონჯის შილებე ოკოდას, დუდ უმოს მნიშვნელოვანო იგინას ვარდა შხვეფს დუმტკიცას, „ნამდვილ კოჩ“ რენ დო ათეშენ ამცირენდას ოსურს. შილებე ფიქრენდას, მართალ რე, ვა დანძალებე ოსურშა ჸოროფა, მარა შეულებ თეშ მიქცუას, ნამდა მეუღლეს თიშა ოშქურდას. თე შიშ თიქ შილებე ოსურიშ ოკონტროლებერო გიმირინუას. * თეშნერ ფიქრიშ დო საქციელიშ შედეგო, ოსურკათას ვაღვენუნა თიცალ პატიცემა დო დაფასება, მუნერით ოკუთვნუნა. თენა პირდაპირ ოწინააღმდეგ იეჰოვაშ ნებას (წეკითხით ეფესოელეფიშ 5:25, 28).

8. მუჭო შეულებ ქომოლკოჩის რდას ჯგირ ოჯახიშ დუდ?

⁸ ქომოლკოჩის შეულებ რდას ჯგირ ოჯახიშ დუდ იეჰოვაშ დო იესოშ მეთაურობაშ მაგალითიშ მეჸუნათ. დეფიქრით თინეფიშ გიმორჩქინელ ჟირ თვისებაშე დო ქიდეკვირით, მუჭო შეულებ ოჯახიშ დუდის გიმირჩქინას თე თვისებეფ ჩილ დო სქუაწკუმა.

9. მუჭო გიმირჩქინანს იეჰოვა თანდაბლობას?

 ⁹ თანდაბლობა. იეჰოვა არძაშე უმოს ბრძენ პიროვნება რე; მარა თინა მუშ მსახურეფიშ შეხედულებეფს ურჩქილე (დაბ. 18:23, 24, 32). თეწკუმა ართო, მუშ ძალაუფლებაშ თუდო რენან, თინეფს არზენს უფლებას, აზრ გეგმოხანტან (1 მეფ. 22:19—22). იეჰოვა სრულყოფილ რე, მარა ჩქინდე იგივეს ველჷ. თეშ მანგიორო, თინა არასრულყოფილ ადამიანეფს, მით თის ომსახურნა, ოხვარ, წარმატებულეფ რდან (ფსალმ. 113:6, 7). ბიბლია ეჭარუნს იეჰოვას, მუჭოთ „მოხვარეს“ (ფსალმ. 27:9; ებრ. 13:6). მეფე დავითი ხოლო აღიარენდჷ, ნამდა მუშა მენდებულ დიდებულ საქმეშ კეთებაქ იეჰოვაშ თანდაბლობაშ ჭყოლოფათ შეიალებუ (2 სამ. 22:36).

10. მუჭო გიმირჩქინ იესოქ თანდაბლობა?

¹⁰ დეფიქრით იესოშ მაგალითშე. თიშ უმკუჯინუო, ნამდა იესო უფალ დო მასწავლებერ რდუ, თიქ მუშ მოწაფეეფს კუჩხეფ უბონ. მუ რე ართ-ართ მიზეზ, მუდგაშ გურშენ იეჰოვაქ თე შემთხვევა ბიბლიას ინაჭარ? მუშო ოკო რაგად, თეთ არძას, თინეფ შქას ოჯახიშ დუდეფს, ქაძირუ მაგალით, ნამდა მიაჸუნესკო თის. იესოქ თქუ: „თეთ მაგალით მერჩით, ნამდა, მუთ მა გიკეთით, თქვა ხოლო იგივე აკეთათ“ (იოან. 13:12—17). მართალ რე, თის უღუდ დიდ ძალაუფლება, მარა ველუდ, ნამდა აშო მემსახურებდეს, პირიქით იშო ომსახურუდ შხვეფს (მათ. 20:28).

11. მუშ გურაფა შეულებ ოჯახიშ დუდის თანდაბლობაშ გურშენ იეჰოვა დო იესოშ მაგალითშე?

¹¹ ჩქი მუს ბგურაფლენთ? ოჯახიშ დუდის ბრელნერო შეულებ, თანდაბლობა გიმირჩქინას. მაგალთო, თინა სრულყოფილებას ველჷ მუშ ჩილ დო სქუაშე. ურჩქილე ოჯახიშ წევრეფიშ აზრის, თიმწკუმა ხოლო, მუჟამსით ვათანხმუნა თის. მარლი, ნამუთ შეერთებულ შტატეფს ცხოვრენს, იჩიებ: „ჩქიმ ქომონჯის დო მა მინშა შხვადოშხვანერ აზრ მიღნა. მარა ბგინაფლენქ, ნამდა თინა მაფასენს დო პატის ფცენს, მუშენდა გადაწყვეტილებაშ მეღებაშახ აზრის მოკითხ დო ფიქრენს თიშე.“ თეწკუმა ართო, თანდაბალ ქომონჯ მზათ რე, გაკეთას ჸუდეშ საქმეეფ, თიშ უმკუჯინუო, ნამდა შილებე თი ტერიტორიას თეცალ საქმეეფ ოსურიშ ოკეთებელო მიორჩქუდან. თეშ კეთება შილებე ადვილ ვა რდას. მუშენ იფჩიებუთ თეს? ართ და, რახელი, იჩიებ: «თი ადგილს, სოვრეშეთ მა ვორექ, ქომონჯ ოსურს ქიმეხვარებ სენეფიშ რჩხუალას ვარდა ჸუდეშ დონწყუალას-და, მეზობელეფ დო ნათესეეფ იფიქრენა, ნამდა თინა ვა რე „ნამდვილ  კოჩ“ დო ვეშულებ ეუნჩაშას ოსურს». თქვა ცხოვრენთინ თექ ხოლო, თაშ ქოფიქრენან-და, ვაგგოჭყორდან, იესოქ კუჩხეფ უბონ მუშ მოწაფეეფს, თიშ უმკუჯინუო, ნამდა თენა მონაშ ოკეთებელ საქმეთ მიორჩქუდეს. ჯგირ ოჯახიშ დუდ თით რე დაინტერესებულ, ნამდა მუშ ჩილ დო სქუა ბედნერო გინაფლენდან დუდის დო ვართ ხოლო თით, ნამდა შხვეფიშ თოლს ჯგირო მიკორჩქინდას. თანდაბლობაწკუმა ართო, ხოლო მუ თვისება ოკო უღდას ჯგირ ოჯახიშ დუდის?

12. მუშ კეთებაშა აღძრენს იეჰოვა დო იესოს ჸოროფა?

¹² ჸოროფა. იეჰოვა ირფელს ჸოროფათ ორთჷ (1 იოან. 4:7, 8). თინა ჸოროფათ ზრუნენს ჩქინ სულიერ საჭიროებეფშო მუშ წერილობით სიტყვაშ, ბიბლიაშ, დო მუშ ორგანიზაციაშ საშვალებათ. თინა მარწმუნენა, ნამდა ვუჸორთ დო თაშ ზრუნენს ჩქინ ემოციურ საჭიროებეფშო. მუშ რაგად შემლებნა ჩქინ მატერიალურ საჭიროებეფშო? იეჰოვა „ჩქინ საჯგირობუოთ ირფელს ხვეიანო მარზენა“ (1 ტიმ. 6:17). მუჟამსით შეცდომას ვუშვენთ, თინა მისწორენა, მარა ვამჯოგუანა. იეჰოვაქ ჸოროფათ გიშაჸიდირალ მსხვერპლ გინიგ ჩქინო. იესოს ხოლო თიცალო ვუჸორთ, ნამდა მუშ სიცოცხლე დათმჷ ჩქინ გურშენ (იოან. 3:16; 15:13). მუთუნს ვეშულებ თი ჸოროფაშ დინაფა, ნამდგას იეჰოვა დო იესო გინაფლენა ართგურ მსახურეფიშ მიმართ (იოან. 13:1; რომ. 8:35, 38, 39).

13. მუშენ რე მნიშვნელოვან, ოჯახიშ დუდიქ ქაძირუას მუშ ოჯახის, ნამდა უჸორს თინეფ? (ქოძირით ჩარჩო  „მუჭო შეულებ ახალდაქორწინებულ ქომოლკოჩის, დემსახურას ოსურიშ პატიცემა?“).

¹³ ჩქი მუს ბგურაფლენთ? ოჯახიშ დუდ ირფელს ჸოროფათ ოკო ორთუდას. მუშენ რე თენა მნიშვნელოვან? თე კითხვას მოციქულ იოანე არზენს პასუხის: „მიდგას მუშ ჯიმა [ვარდა ოჯახ] ვა უჸორს, ნამდგას ორწყე, ვეშიალებე უჸორდას ღორონთ, ნამდგას ვარწყე“ (1 იოან. 4:11, 20). ქომოლკოჩ, ნამდგას უჸორს მუშ ოჯახ დო ოკო მიაჸუნას იეჰოვა დო იესოშ მაგალითის, იზრუნენს მუშ ოჯახიშ სულიერ, ემოციურ დო მატერიალურ საჭიროებეფშო (1 ტიმ. 5:8). თინა ქუდაგურუანს დო ქიგიოწურუანს მუშ სქუალეფს. გაგრძელენს გურაფას, ნამდა მიღას გადაწყვეტილებეფ, ნამუთ განადიდენს  იეჰოვას დო მუშ ოჯახის ჯგირობუას მოუღანს. მორთ გუვარჩუათ თითოულ მოთხოვნა დო ქობძირათ, მუჭო შეულებ ოჯახიშ დუდის იეჰოვა დო იესოშ მაგალითიშ მეჸუნა.

14. მუჭო ოკო იზრუნას ოჯახიშ დუდიქ მუშ ოჯახიშ სულიერ საჭიროებეფშო?

¹⁴ იზრუნას მუშ ოჯახიშ სულიერ საჭიროებეფშო. იესო მეჸუნდჷ მუშ მუმაშ მაგალითის დო ფიქრენდჷ მუშ მიმაჸუნალეფიშ სულიერ მდგომარეობაშე (მათ. 5:3, 6; მარ. 6:34). თეშნერო, ოჯახიშ დუდიქ პირველ რიგის ოკო იზრუნას მუშ ოჯახიშ სულიერ საჭიროებეფშო (კან. 6:6—9). თეშ ოკეთებელო თიქ ოკო დერწმუნას, ნამდა მუ დო მუშ ოჯახიშ წევრეფ კითხულენა დო გურაფლენა ღორონთიშ სიტყვას, ოსწრუნა შეხვალამეფს, ქადაგენა სახიოლო ამბეს დო სქიდუნა იეჰოვაშ მეგობრეფო.

15. მუ რე ართ-ართ მხარე, მუდგათ ოჯახიშ დუდის შეულებ იზრუნას მუშ ოჯახიშ ემოციურ საჭიროებეფშო?

¹⁵ იზრუნას მუშ ოჯახიშ ემოციურ საჭიროებეფშო. იეჰოვაქ არგამათ გიმოხანტჷ ჸოროფა იესოშ მიმართ (მათ. 3:17). იესო ხოლო თავისფალო გიმოხანტუნდჷ ჸოროფას მუშ მიმაჸუნალეფიშ მიმართ ქოთ საქმეთ დო ქოთ სიტყვათ. მუნეფიშ მხარეშე, თინეფ ხოლო გიმოხანტუნდეს თიშ ჸოროფას (იოან. 15:9, 12, 13; 21:16). ოჯახიშ დუდის შეულებ მუშ ჩილ დო სქუას ჸოროფა საქმეეფით ოძირას. მაგალთო, ბიბლია თინეფწკუმა ართო იგურუას. თეს გეძინელ, შეულებ, უწუას ოჯახიშ წევრეფს, ნამდა უჸორს დო აფასენს დო, მუჟამსით თეშ საშვალება ქაში, შხვეფწკუმა ხოლო ქაცქუას თინეფ (იგავ. 31:28, 29).

16. ხოლო მუ ოკო აკეთას ოჯახიშ დუდიქ დო მუჭო შეულებ გაწონასწორებულ რდას?

¹⁶ იზრუნას მუშ ოჯახიშ მატერიალურ საჭიროებეფშო. იეჰოვა ზრუნენდჷ ისრაელეფიშ ძირითად საჭიროებეფშო, თიმწკუმა ხოლო, მუჟამსით თინეფ დაუმორჩილებლობაშ გურშენ დასჯილეფ რდეს (კან. 2:7; 29:5). თინა ამდღა ხოლო ზრუნენს ჩქინ ძირითად საჭიროებეფშო (მათ. 6:31—33; 7:11). თეშნერო იესოქ ხოლო იზრუნ, მუშ მიმაჸუნალეფს ოჭკუმალ ქუღდესკო (მათ. 14:17—20). თიქ ბრელ დასქილიდუ ფიზიკურ ლახალაშე (მათ. 4:24). იეჰოვას ქასიამოვნასინ, ოჯახიშ დუდიქ ოკო იზრუნას მუშ ოჯახიშ მატერიალურ საჭიროებეფშო. მარა თინა თე საკითხის გაწონასწორებულ ოკო რდას. თიქ თიცალო ოკო ვეგნაჸუნას სამუშას, ნამდა ვეშიალებუას, მუჭოთ საჭირო რე თეშ, იზრუნას მუშ ოჯახიშ საჭიროებეფშო.

17. მუჭო მოგურუანა დო გიმოწურუანა იეჰოვა დო იესო?

¹⁷ ქუდაგურუას. იეჰოვა მოგურუანა დო გიმოწურუანა ჩქინ საჯგირობუოთ (ებრ. 12:7—9). მუშ მუმაცალო, იესო ხოლო ჸოროფათ ოგურუანს, თინეფს, მით მუშ ძალაუფლებაშ თუდო რე (იოან. 15:14, 15). თინა რე მტკიცე, მარა, თეწკუმა ართო — კეთილ (მათ. 20:24—28). თის არჩქილე, ნამდა არასრულყოფილეფ ვორეთ დო ხშირას ფჩირთუთ (მათ. 26:41).

18. მუ არჩქილე ჯგირ ოჯახიშ დუდის?

 ¹⁸ ოჯახიშ დუდის, ნამუთ იეჰოვა დო იესოშ მაგალითის მეჸუნს, არჩქილე, ნამდა მუშ ოჯახიშ წევრეფ არასრულყოფილეფ რენა. თინა უხეშო ვაქცუ მუშ ჩილ დო სქუას (კოლ. 3:19). თეშ მანგიორო, გიმირინუანს გალატელეფიშ 6:1-ს მოჩამილ პრინციპის დო ოცად, გემუანო ქიმუდირთას დო თეშ გეგშასწორას თინეფ. თის შჷ, მუ ხოლო არასრულყოფილ რენ. იესოცალო, თის ხოლო უჩქჷ, ნამდა არძაშ უჯგუშ საშვალება დაგურაფალო პირად მაგალითიშ მეჩამა რე (1 პეტ. 2:21).

19, 20. მუჭო შეულებ ოჯახიშ დუდის, მიაჸუნას იეჰოვაშ დო იესოშ მაგალითის გადაწყვეტილებეფიშ მეღებაშ დროს?

¹⁹ გადაწყვეტილებეფიშ მიღებაშ დროს ხვალე მუშ დუდშო ვეფიქრას. იეჰოვა ღებულენს გადაწყვეტილებეფს, ნამდგას შხვეფშო ჯგირობუა მოუღ. მაგალთო, მუჟამსით თიქ გინოჭყვიდ, გარჩქინკო სიცოცხლე, თის თენა მუშ დუდშო ვა უკეთებ, თიშენ აკეთ, ნამდა ჩქი გეფხარითკო სიცოცხლეთ. მითინს ვა დანძალებედ თიშა, ნამდა მუშ სქუა ჩქინ ცოდვეფშო შეწირკო. თიქ მუშ ნებათ შეწირ თინა ჩქინ საჯგირობუოთ. იესო ხოლო ღებულენდჷ თიშნერ გადაწყვეტილებეფს, ნამდგას შხვეფშო მოუღუდ ჯგირობუა (რომ. 15:3). მაგალთო, თიქ გინოჭყვიდ, ხალხის დაგურუკო, მუჟამსით თინა შულადირ რდუ დო მოსვანჯა ოსაჭირუდ (მარ. 6:31—34).

²⁰ ჯგირ ოჯახიშ დუდის უჩქჷ, ნამდა არძაშ უმოს რთულ რე, მიღას გონივრულ გადაწყვეტილებეფ დო თე პასუხიშმგებლობას სერიოზულო უჯინე. თინა ოცად, დუდ ეუჩილითუას მუშობურ ვარდა ემოციეფშა გერსხილ გადაწყვეტილებეფიშ მეღებას. თეშ მანგიორო, იეჰოვას არზენს საშვალებას, ქუდაგურუას თის * (იგავ. 2:6, 7). თეშნერო თინა შხვეფიშ საჯგირობუოთ იფიქრენს დო ვართ ხოლო მუშ დუდიშ (ფილ. 2:4).

21. მუს გუვარჩიენთ უკულიან სტატიას?

²¹ იეჰოვაქ ოჯახიშ დუდეფს მეჩჷ თე რთულ დანიშნულება დო თინა ელჷ, ნამდა ირფელს გაკეთენა თიშ ჯგირო შეიოსრულებერო. ქომონჯ ქაცად, იეჰოვა დო იესოშ მაგალითის მიაჸუნას-და, თინა ჯგირ ოჯახიშ დუდ იჸუაფ. ოსურ ხოლო მუშ პასუხიშმგებლობას ქასრულენს-და, თინეფს ბედნერ ქორწინება აღვენუნა. მუჭო ოკო უჯინედას ოსურ მეთაურობაშ პრინციპის დო მუ სირთულეეფს შილებე შეხვადუდას თინა? უკულიან სტატია თე კითხვეფს ქიმეჩანს პასუხის.