1, 2. მუჭოთ მათეშ 5:11-ის ჭარჷ, მუჭო ოკო ვუჯინედათ განსაცდელეფს?

იესოქ პირობა მეჩჷ მუშ მიმაჸუნალეფს, ნამდა ნამდვილო ბედნერეფ იჸუაფდეს. თეწკუმა ართო, გაფრთხილ თინეფ, მიდგას თინა უჸორდჷ, ნამდა განსაცდელეფს ქეშეხვადუდეს (მათ. 10:22, 23; ლუკ. 6:20—23). ჩქი მოხიოლნა, ქრისტეშ მოწაფეეფ ვორეთინ. მარა, მუჭო ბგინაფლენთ დუდის, ჩქინ ოჯახ ქუმოწინააღმდეგნა, ხელისუფლება ქოფთხოზუნა ვარდა თანაკლასელეფ დოვარ თანამშრომლეფ გლახაშ კეთებას ქუმანძალენან-და? ვა რე გასაკვირ, ბწუხენდათ, მუჟამსით თეშე ფიფქრენთ.

² ადამიანეფიშ უმენტაშიშ აზრით გამორიცხულ რე, თხოზინქ ხიოლ მოუღას კოჩის. მარა ღორონთიშ სიტყვა შხვანერო იჩიებ. მაგალთო, მოწაფე იაკობიქ ჭარჷ, ნამდა განსაცდელეფიშ დროს მანგარო იბწუხათინ თიშ მანგიორო, ხიოლით ქეშეფხვადათ თის (იაკ. 1:2, 12). მუჭოთ იესოქ თქუ, თხოზინიშ უმკუჯინუო შეიოლებერ რე, ვორდათ ბედნერ (წეკითხით მათეშ 5:11). მუჭო შემლებნა ვა ვოდინუათ ხიოლ განსაცდელეფიშ დროს? ბრელ მუდგარენიშ გურაფა შილებე ნამთინე აზრიშ გარჩიებაშე, ნამუთ იაკობიქ პირველ ქრისტიანეფს მეჭარ. მორთ პირველ რიგის, გუვარჩუათ თი სირთულეეფ, ნამდგას თე ქრისტიანეფ შეხვადუდეს.

3. მუქ მოხვად ჭიჭე ხანშა, მუთ იაკობიქ იესოშ მოწაფეთ გინირთჷ?

³ ჭიჭე ხანშა, მუთ იესოშ ჯიმაჸონერ იაკობიქ თიშ მოწაფეთ გინირთჷ, იერუსალიმს ქრისტიანეფიშ თხოზინქ ქიდიჭყჷ (საქ. 1:14; 5:17, 18). მუჟამსით მოწაფე სტეფანე დოჸვილეს, ბრელ ქრისტიანქ ქიდიტუ ქალაქ დო „იუდეა დო სამარიაშა მიდართჷ“. საბოლათ თინეფქ შორშა, კვიპროს დო  ანტიოქიაშა, გეგნორთეს (საქ. 7:58—8:1; 11:19). ხვალე წარმოდგენა შემლებნა თიშ, მუ სირთულეეფს შეხვადეს მოწაფეეფქ. მარა თინეფ, სოდგა ვა რდესკონ, ირდიხას დუდგინოდვალირო ქადაგენდეს სახიოლო ამბეს დო ხე შეუნწყის მთელ რომიშ იმპერიას კრებეფიშ ჩამოყალიბებას (1 პეტ. 1:1). ხვალე თენა ვარინ, პირველ ქრისტიანეფს ხოლო უმოს სირთულეეფ ელდეს წოხოლე.

4. ხოლო მუ განსაცდელეფშა აფდეს პირველ ქრისტიანეფს გარზებელ?

⁴ პირველ ქრისტიანეფს ბრელნერ განსაცდელშა აჸუეს გარზებელქ. მაგალთო, სოდგარენ ახ. წ. 50 წანას რომაელ იმპერატორ კლავდიუსიქ ზოჯჷ, ნამდა არძა იუდეველს ქუდუტებუდკო რომი. ათეშენ, ქრისტიანობა მიღესინ თი იუდეველეფ, იძულებურ რდეს მუნეფიშ ჸუდეეფ ქიდიტესკო დო შხვადო გინილესკო ოცხოვრებშა (საქ. 18:1—3). სოდგარენ ახ. წ. 61 წანას პავლე მოციქულქ ჭარჷ, ნამდა თიშ თანაქრისტიანეფს სახალხოთ ამცირენდეს, ციხეს ოხუნუანდეს დო საკუთრებას მიდუღანდეს (ებრ. 10:32—34). თეს გეძინელ შხვეფცალო, ქრისტიანეფს ხოლო აწუხენდჷ ლახალა დო უღონობა (რომ. 15:26; ფილ. 2:25—27).

5. ნამ კითხვეფს ვუპასუხენთ?

⁵ მუჟამსით ახ. წ. 62 წანაშახ იაკობიქ მუშ წერილ ჭარჷ, თის ჯგირო უჩქუდ, მუ განსაცდელეფს ხვადუდეს და დო ჯიმალეფ. იეჰოვაქ თიშ გურშენ ოჭარაფუ იაკობის წერილ თე ქრისტიანეფშა, ნამდა პრაქტიკულ რჩევა ქიმუჩამუდკო, ნამუთ მეხვარებუდ თინეფს, სირთულეეფიშ უმკუჯინუო ხიოლ ვადინუესკო. მორთ გუვარჩუათ იაკობიშ წერილ დო ვუპასუხათ კითხვეფს: მუს ნიშნენს ხიოლ, მუდგაშ გურშენ იაკობი ჭარუნდჷ? მუქ შილებე ქრისტიანს თე ხიოლ მეუდინუას? მუჭო შეულებ სიბრძნეს, რწმენას დო გაბედულებას მიმეხვარან, ვა ვოდინუათ ხიოლ განსაცდელეფიშ უმკუჯინუო?

6. მუჭოთ ლუკაშ 6:22, 23-ს ჭარჷ, მუშენ შილებე ქრისტიან ბედნერ რდას სირთულეეფიშ დროს?

⁶ ადამიანეფ შილებე ფიქრენდან, ნამდა ბედნერეფ ხვალე თი შემთხვევას იჸუაფნა ჯგირ ჯამრთელობა, ბრელ ფარა დო მშვიდობიან ოჯახურ ურთიერთობა ქაღვენუნა-და. მარა თი ხიოლ, მუდგაშ გურშენ იაკობი ჭარუნდჷ, ღორონთიშ წმინდა შურიშ ნაყოფ რე დო პიროვნებაშ მდგომარეობაშა ვა რე დამოკიდებულ (გალ. 5:22). ქრისტიანშა ხიოლ დო ნამდვილ ბედნერობა თიშ რჩქინას მოუღ, ნამდა იეჰოვას უხარენს გურს დო მეჸუნს იესოშ მაგალითის (წეკითხით ლუკაშ 6:22, 23; კოლ. 1:10, 11). მუჭოთ ლამპას დინახლეშე ონტუ დაჩხირ დო თინა დაცულ რე, ნამდა ბორია დო ჭვემაქ ვა შქირიტას, თეშნერო თე ხიოლ ქრისტიანიშ გურს ალარზჷ. თინა ვერკენს, მუჟამსით ჯამრთელობაშ ვარდა მატერიალურ პრობლემა რჩქინდუ. თე ხიოლ ვა შქირტუ გეძიცაშ ვარდა ოჯახიშ წევრეფშე დო შხვეფშე წინააღმდეგობაშ უმკუჯინუო. პირიქით, წინააღმდეგობეფიშ დროს თის ხოლო უმოსო აძინუ. განსაცდელეფ, მუდგას ჩქინ რწმენაშ გურშენ ფხვადუთ, ამტკიცენს, ნამდა ქრისტეშ ნამდვილ მოწაფეეფ ვორეთ (მათ. 10:22; 24:9; იოან. 15:20). ზუსტას თეშ გურშენ ჭარჷ იაკობიქ თე სიტყვეფ: „ჩქიმ ჯიმალეფ, არძანერ განსაცდელს ხიოლით ქეშეხვადით“ (იაკ. 1:2).

7, 8. მუ სარგებელ მოუღ განსაცდელეფს ჩქინ რწმენაშა?

⁷ იაკობიქ ხოლო შხვა მიზეზ მიშინუ, მუშენ რენა ქრისტიანეფ მზათ, ქუგურზან განსაცდელეფს. თიქ თქუ: „თაშ გიმნაცადებ რწმენა მიგეხვარებნა მოთვინებაშ გავითარებას“ (იაკ. 1:3). განსაცდელეფ შილებე შევადარათ დაჩხირს, ნამდგას რკინაშ დამუშებელო გიმირინუანა. მუჟამსით გოფურაფილ რკინას ორგილუანა, თინა უმოს მანგარო გინირთუ. თეცალო, განსაცდელეფიშ გინოღალა ჩქინ რწმენას უმოსო ამანგარენს. თეშ გურშენ ჭარჷ იაკობიქ: „მოთვინებას გათებაფეთ მუშ საქმე, ნამდა რდათ სრულყოფილეფ, მუთუნნერ ბრალ ვეგიდვინენ ფერეფ დო მუთუნ ვა გორკუდან“ (იაკ. 1:4). მუჟამსით ვორწყეთ, ნამდა განსაცდელეფ ჩქინ რწმენას ამანგარენს, შემალებენა ხიოლით გივორჯგინათ თინეფს.

⁸ თე წერილს იაკობიქ ხოლო ნამთინე მხარე მიშინუ, ნამდგას შეულებ ხიოლ მემდინუან. მუ რე თე სირთულეეფ დო მუჭო შემლებნა თინეფიშ გერჯგინა?

9. მუშენ მოსაჭირნა სიბრძნე?

⁹ სირთულე: მუჟამსით ვა მიჩქნა, მუჭო მიფქცუათ. განსაცდელეფიშ დროს მოკონა, იეჰოვაქ მიმეხვარან, ნამდა თიცალ გადაწყვეტილება მიბღათ, ნამუთ გურს გუხარენს თის, ჯგირობუას მოუღანს და დო ჯიმალეფს დო მიმეხვარებნა, ქუდოფსქიდათ ართგურეფქ (იერ. 10:23). სიბრძნე მოსაჭირნა, ქიგებგათ მუჭო მიფქცუათ დო მუ ვუწუათ  თინეფს, მით მოწინააღმდეგნა. მუჭო მიფქცუათინ თინა ვა მიჩქუნან-და, შილებე გურქ გომტირხან დო ხიოლქ ხეთეშე მემდინან.

10. მუჭოთ იაკობიშ 1:5-ის ჭარჷ, მუ ოკო ვაკეთათ სიბრძნეშ მიოღებელო?

¹⁰ გამოსავალ: იეჰოვას ქოთხით სიბრძნე. ქუმოკონა, განსაცდელეფს ხიოლით გივორჯგინათ-და, პირველ რიგის იეჰოვას ოკო ქოფთხუათ ლოცვას სიბრძნე, ნამუთ სწორ გადაწყვეტილებეფიშ მიოღებელო მოსაჭირნა (წეკითხით იაკობიშ 1:5). მუჭო ოკო მიფქცუათ ლოცვაშე პასუხის ხეთეშე ვა ვორწყეთ-და? იაკობი იჩიებ: „ირიათო თხუას“ ღორონთის. მუჟამსით იეჰოვას ირიათო ფთხინთ სიბრძნეს, ნამდა გივორჯგინათ განსაცდელეფს, თინა ვეღიზიანებ, თეშ მანგიორო, ჩქინ ზეციერ მუმა ხვეიანო მარზენა თის (ფსალმ. 25:12, 13). თინა ორწყე ჩქინ განსაცდელეფს, არჩქილე ჩქინ მდგომარეობა დო მანგარო ოკო, მიმეხვარან. მუშო ოკო რაგად, თეს ხიოლ მოუღ ჩქინდა! მარა მუჭო მარზენა იეჰოვა სიბრძნეს?

11. ხოლო მუ ოკო ვაკეთათ სიბრძნეშ მიოღებელო?

¹¹ იეჰოვა მუშ სიტყვაშ საშვალებათ მარზენა სიბრძნეს (იგავ. 2:6). თე სიბრძნეშ მიოღებელო ოკო იბგურუათ ღორონთიშ სიტყვა დო თიშა გერსხილ პუბლიკაციეფ. მარა უმოს მეტიშ კეთება რე საჭირო, ვინემ ხვალე რჩქინაშ მეღება. ცხოვრებას ოკო გეგმიბრინუათ თი რჩევეფ, ნამდგას ღორონთ მარზენა. იაკობიქ ჭარჷ: „რდათ სიტყვაშ შემსრულებერეფ დო ვართ ხვალე მარჩქილეეფ“ (იაკ. 1:22). მუჟამსით ღორონთიშ რჩევას ქიმვაჸუნუთ, უმოს მშვიდობიანეფ, გონიერეფ დო მოჭყოლოფეეფ იპჸუაფუთ (იაკ. 3:17). თე თვისებეფ მოხვარნა, ხიოლ ვა ვოდინუათინ თეშ, გივორჯგინათ ნებისმიერ სირთულეს.

12. მუშენ რე მნიშვნელოვან, ჯგირო მიჩქუდან ბიბლია?

¹² ღორონთიშ სიტყვა სარკეცალ რე, ნამუთ მოხვარნა, ქობძირათ, მუ მაფნა გიშასწორებელ დო მუჭო შემლებნა თეშ კეთება (იაკ. 1:23—25). მაგალთო, ღორონთიშ  სიტყვაშ გურაფაშ უკულ შილებე ქიმეფხვადათ, ნამდა მოსაჭირნა, ვაკონტროლათ ჩქინ ემოციეფ. იეჰოვაშ მოხვარათ, ბგურაფლენთ, მუჭო შილებე გიმიფრჩქინათ ლიბ ხასიათ, მუჟამსით ადამიანეფ ვარდა პრობლემეფ მაღიზიანენა. თე თვისება მოხვარნა, უჯგუშო მიფქცუათ, გაღიზიანებულეფ ვორეთინ თიმწკუმა. თეშნერო შემალებენა სწორ აზროვნება მიღდან დო უჯგუშ გადაწყვეტილებეფ მიბღათ (იაკ. 3:13). მუზმათ მნიშვნელოვან რე, ჯგირო მიჩქუდან ბიბლია!

13. მუშენ ოკო იბგურუათ ბიბლიურ პერსონაჟეფიშ მაგალითეფშე?

¹³ მინშა მეფჩირთუთინ უკულ მეფხვადუთ, მუშ კეთებას ოკო ევუჩილითუათ დუდ. მარა თეშნერ გურაფა ვა რე ადვილ. სიბრძნეშ მიოღებელო უჯგუშ საშვალება რე შხვეფიშ მუჭოთ ჯგირ მაგალითეფშე, თეშ შეცდომეფშე გურაფა. ათეშენ ელამჩანა იაკობ, ნამდა დევეკვირათ ბიბლიურ პერსონაჟეფიშ მაგალითეფს, მუნერით რე აბრაამი, რახაბი, იობი დო ელია (იაკ. 2:21—26; 5:10, 11, 17, 18). იეჰოვაშ თე ართგურ მსახურეფქ გიორჯგინეს თიცალ განსაცდელეფს, ნამდგას შეულებუდ ხიოლ მიდუღალუდკო თინეფშა. მოთვინებაშ თე მაგალითეფ ოძირანს, ნამდა იეჰოვაშ მოხვარათ ჩქი ხოლო შემლებნა იგივეშ კეთება.

14, 15. მუშენ ოკო მივაქცუათ ყურადღება ჩქინ ეჭვეფს?

¹⁴ სირთულე: მუჟამსით ჩქინ რწმენაშ გურშენ ეჭვეფ მიღნა. მინშა შილებე ბიბლიაშე მუდგარენიშ გაგებაქ გამჭირდან ვარდა იეჰოვაქ ჩქინ ლოცვეფს თეშ ვა უპასუხას, მუჭოთ ველუდით. თექ შილებე ეჭვეფ გომრჩქინან. თეს ყურადღებას ვემვაქციენთ-და, რწმენას დამსუსტენა დო იეჰოვაწკუმა ურთიერთობას გილამლუანა (იაკ. 1:7, 8). ეჭვეფქ შილებე მომავალიშ გურშენ ჩქინ იმენდ ხოლო მემდინუან.

¹⁵ მოციქულ პავლექ მომავალიშ გურშენ ჩქინ იმენდ ღუზას შეადარ (ებრ. 6:19). ღუზა ქარბორიაშ დროს გემიშ წონასწორობას იცვენს დო ოხვარ წყარქ კირდეეფჸურე ვეჸუნას თინა. მარა ღუზა ხვალე თიმწკუმა გიმოდირთუ, მუჟამსით ჯაჭვ, ნამდგათ თინა გემს მიკობ, ვა გოხორცქუ. მუჭოთ ღანჯ ასუსტენს ღუზაშ ჯაჭვის, თეშ ეჭვეფ ასუსტენს ჩქინ რწმენას. წინააღმდეგობაშ დროს პიროვნებაქ, მიდგას ეჭვეფ უღჷ, შილებე მიოდინუას თიშ რწმენა, ნამდა იეჰოვა შეასრულენს მუშ დუნაპირებუეფს. რწმენას მივოდინუანთ-და, იმენდ ხოლო მემდინუნა. მუჭოთ იაკობ იჩიებ, „ეჭვიან კოჩ ქოგჷ ზღვაშ ტალღას, ნამდგას ბორია ქიხვამლუანს დო იშო-აშო გილუღ“ (იაკ. 1:6). თეცალ პიროვნებას ალბათ დღას ვაღვენუ ხიოლ!

16. მუ ოკო ვაკეთათ ეჭვეფ ქომღუნან-და?

¹⁶ გამოსავალ: ჩეთხინეთ ეჭვეფ; გემანგარით რწმენა. დრო ვეღათინ თეშ, გეგნოჭყვიდით. წინასწარმეტყველ ელიაშ დროს იეჰოვაშ ხალხის ეჭვეფქ გურჩქინდჷ მუნეფიშ რწმენაწკუმა დაკავშირებით. ელიაქ თინეფს უწუ: „სოიშახ ოკო ქულანდათ ჟირხოლო კუჩხით?! ჭეშმარიტ ღორონთ იეჰოვა ქორენ-და, თის ქეკაჸუნით დო ბაალი ქორენ-და, თის ქეკაჸუნით!“ (1 მეფ. 18:21). თე სიტყვეფ ჩქი ხოლო მოხუნა. გიმორკვიება მოსაჭირნა, თიშა დარწმუნებელო, ნამდა იეჰოვა რე ღორონთ, ბიბლია — თიშ სიტყვა დო იეჰოვაშ მოწმეეფ — თიშ ხალხ (1 თეს. 5:21). თე ირფელ ჩამთხინუანა ეჭვეფს დო გამმანგარენა რწმენას. ეჭვეფიშ ჩათხინაფალო მოხვარა ქუმოსაჭირნან-და, შემლებნა უხუცესეფს ფთხუათ. ჩქი ხეთეშე ოკო იმოფქმედათ დო თაშ შემალებენა ვა ვოდინუათ ხიოლ იეჰოვაშ მსახურებას!

17. მუ მოხვადუ, გაბედულებაქ მემდინეს-და?

¹⁷ სირთულე: მუჟამსით გურ მიტირხუნა. ღორონთიშ სიტყვა იჩიებ: „გაჭირებაშ დროს გურქ გოიტირხ-და, ძალა ქეშგელიებ“ (იგავ. 24:10). ებრაულ სიტყვა, ნამუთ თარგმნილ რე, მუჭოთ გურიშგოტახუა, შილებე ნიშნენდას გაბედულებაშ დინაფას. გაბედულებაქ მეიდინ-და, ხიოლს ხოლო ხეთეშე მიოდინუანქ.

18. მუს ნიშნენს მოთვინება?

¹⁸ გამოსავალ: მიენდით იეჰოვას დო რჯერდან, ნამდა თინა მერჩანა გაბედულებას გარზებელო.  გაბედულება მოსაჭირნა, მუჟამსით სირთულეეფს ვობრძოლუთ (იაკ. 5:11). სიტყვა, ნამუთ იაკობიქ გიმირინუ დო ითარგმნჷ, მუჭოთ „მოთვინება“, ნიშნენს მდგომარეობას, მუჟამსით მიდგარენ მტკიცაშე გერე მუშ პოზიციას. შემლებნა წერმიბდგინათ ჯარიშკოჩ, ნამუთ მუშ ადგილს გაბედულო გერე, თიშ წინააღმდეგ ნტერ მუდგა უდუნდებუო ვემიშასინ, თინა უკახლე ვეკინანს.

19. მუშ გურაფა შემლებნა მოციქულ პავლეშ მაგალითშე?

¹⁹ მოციქულ პავლექ გაბედულება დო მოთვინებაშ მანგარ ჯგირ მაგალით მუჩეს. მინშა თინა სუსტას გინაფლენდჷ დუდის, მარა ითვინენდჷ, მუშენდა იეჰოვაშა რდუ მენდებულ დო ჯერდჷ, ნამდა თინა ქიმეჩანდჷ საჭირო ძალას (2 კორ. 12:8—10; ფილ. 4:13). იეჰოვაშ მოხვარა მოსაჭირნან თის, თანდაბლურო ქუვაღიარენთ-და, ჩქი ხოლო შემლებნა მიღდან თეცალ ძალა დო გაბედულება (იაკ. 4:10).

20, 21. მუშა შემლებნა ვორდათ დარწმუნებულ?

²⁰ ჩქი შემლებნა დარწმუნებულ ვორდათ, ნამდა სირთულეეფ, ნამდგას შეფხვადუთ, სასჯელ ვა რე იეჰოვაშე. იაკობ მარწმუნენა: „გაჭირებაშ დროს მითინქ ვა თქუას, ღორონთ გიმოფცადუნსია. შეიოლებერ ვა რე ღორონთიშ გიმოცადუა უბადობათ დო ვართ მუ გიმოცადუნს მითინს“ (იაკ. 1:13). მუჟამსით თეს დარწმუნებულ ვორეთ, უმოსო დევეახლოვებუთ ჩქინ ზეციერ მუმას (იაკ. 4:8).

²¹ იეჰოვა დღას ვეთირუ (იაკ. 1:17). თინა ხუჯის უკინენდჷ პირველ საუკუნეშ ქრისტიანეფს გასაჭირიშ დროს დო ამდღა ჩქი, თითოულს, ხოლო მიმეხვარებნა. ირიათო თხით იეჰოვას, ქიმერჩან სიბრძნე, რწმენა დო გაბედულება. თინა ქუპასუხენს თქვან ლოცვეფს. თეშ უკულ შეგალებენა დარწმუნებულ რდათ, ნამდა ქიმგეხვარებნა, ვადინუათ ხიოლ განსაცდელეფიშ დროს!