ოგურაფალ სტატია 7
მეთაურობაშ პრინციპ კრებას
„ქრისტე რე კრებაშ დუდ, თე სხეულიშ მარსხებელ“ (ეფეს. 5:23).
ობირეში 137 ართგურ ქრისტიან დალეფი
შინაარსი *
1. მუ რე თიშ ართ-ართ მიზეზ, ნამდა იეჰოვაშ ოჯახ გაერთიანებულ რე?
ჩქი მოხიოლნა, იეჰოვაშ ოჯახიშ ნაწილ ვორეთინ. მუშენ რე ჩქინ ოჯახ თეცალ მშვიდობიან დო გაერთიანებულ? ართ-ართ მიზეზ თინა რე, ნამდა თითოულ პატის ფცენთ მეთაურობაშ პრინციპის, ნამუთ იეჰოვაქ გიონწყუ. მუთ უმოს უჯგუშო ინვანჭუთ მეთაურობაშ პრინციპის, თით უმოსო მაღვენუნა ართობა.
2. მუ კითხვეფს მიაჩამუ პასუხ თე სტატიას?
2 თე სტატიას გუვარჩიენთ, მუს ნიშნენს მეთაურობაშ პრინციპ კრებას. შხვა საკითხეფწკუმა ართო პასუხის ქიმეფჩანთ კითხვეფს: მუ პასუხიშმგებლობა უღნა დალეფს? მართალ რენო, ნამდა არძა ჯიმა რე არძა დაშ მეთაურ? უხუცესეფს იგივე ძალაუფლება უღნანო და დო ჯიმალეფიშ მიმართ, მუნერით ოჯახიშ დუდის უღჷ მუშ ჩილ დო სქუაწკუმა? მორთ დუდშე გუვარჩუათ, მუნერ დამოკიდებულება ოკო მიღდან დალეფიშ მიმართ.
მუნერ დამოკიდებულება ოკო მიღდან დალეფიშ მიმართ?
3. მუჭო შემლებნა უმოსო დუვაფასათ ჩქინ მოხანდე დალეფ?
3 ჩქი ვაფასენთ დალეფს, მით ბრელს ხანდენა, ნამდა იზრუნან ოჯახშო, იქადაგან სახიოლო ამბე დო ქელუდირთან კრებას. ხოლო უმოსო დუვაფასენთ თინეფს, მუჟამსით თიშე დეფიფქრებუთ, მუნერ დამოკიდებულება უღნა იეჰოვა დო იესოს ჩქინ დალეფიშ მიმართ. ჩქი თიშე დაკვირება ხოლო ქიმმეხვარებნა, მუჭო ოქცუდ მოციქულ პავლე ოსურკათას.
4. მუჭო ოძირანს ბიბლია, ნამდა იეჰოვა ოსურკათას ხოლო თეშ აფასენს, მუჭოთ ქომოლკათას?
4 ბიბლიაშე იძირე, ნამდა იეჰოვა ოსურკათას ხოლო თეშ აფასენს, მუჭოთ ქომოლკათას. მაგალთო, თინა იჩიებ, ნამდა პირველ საუკუნეს იეჰოვაქ წმინდა შურ მუჭოთ კოჩეფს, თეშ ოსურეფს ხოლო მეჩჷ. თინეფს შეულებდეს თიცალ სასწაულეფ აკეთესკო, მუნერით რდუ შხვადოშხვა ნინაშა ჩიება (საქ. 2:1—4, 15—18). ქოთ ქომოლკათა დო ქოთ ოსურკათა ღებულენდეს წმინდა შურს დო გინირთუდეს ცხებულეფო, ნამდა იესოწკუმა ართო იჸუესკო მართველეფქ (გალ. 3:26—29). ოსურკათა, მუჭოთ ქომოლკათან თეშ, მიღენა დედამიწას მარადიულო ცხოვრებაშ ჯილდოს (გამოცხ. 7:9, 10, 13—15). თინეფ, დანიშნულ რენა, ნამდა იქადაგან დო ოგურუან სახიოლო ამბე (მათ. 28:19, 20). მაგალთო წიგნ „საქმეეფი“ იჩიებ ართ დაშ, პრისკილაშ, გურშენ, ნამუთ მუშ ქომონჯ აკვილაწკუმა ართო, ოხვარუდ რჩქინელ კოჩის, აპოლოსის, უმოს სწორას ქინანჭუკო ჭეშმარიტებას (საქ. 18:24—26).
5. მუჭო იძირე ლუკაშ 10:38, 39, 42-შე, ნამდა იესო პატის ცენდჷ ოსურკათას?
5 იესო პატის ცენდჷ ოსურკათას. თინა ვა ფიქრენდჷ ფარისეველეფცალო, მით ოსურკათას ნაკლებ მნიშვნელოვანო თვალუნდეს დო ათეშენ ვართ ხალხწკუმა ურაგადდეს დო ვართ წმინდა წერილეფს ოგურუანდეს. თეშ მანგიორო, მუჟამსით იესო მუშ შხვა მოწაფეეფწკუმა ართო არჩიენდჷ მნიშვნელოვან სულიერ საკითხეფს, თე მსჯელობას ოსურკათა ხოლო ღებულენდჷ მონაწილებას * (წეკითხით ლუკაშ 10:38, 39, 42). თეს გეძინელ, თიქ ოსურკათას თიშ უფლება ხოლო მეჩჷ, ნამდა მუწკუმა ართო რდესკო, მუჟამსით ოქადაგებშა გილეშ (ლუკ. 8:1—3). ხვალე თენა ვარინ, იესოქ თიშ პატი ხოლო მეჩჷ ოსურკათას, ნამდა მოციქულეფშა ქუთქუალდესკო მუშ გათელებაშ ამბე (იოან. 20:16—18).
6. მუჭო ოძირუ მოციქულ პავლექ, ნამდა პატის ცენდჷ ოსურკათას?
6 მოციქულ პავლექ გაშინ ტიმოთეს, პატიცემათ მექცუკო ოსურკათას. თიქ უწუ, ნამდა „ხანით უნჩაშ ოსურკოჩის — მუჭოთ დიდას დო ახალგაზრდა ოსურკოჩის, მუჭოთ დას“ თეშ მექცუკო (1 ტიმ. 5:1, 2). პავლექ მანგარო მეხვარ ტიმოთეს მოწიფულ ქრისტიანო გინორთას, მარა არჩქილედ, ნამდა თის პირველო მუშ დიდა დო ბებიქ დაგურეს წმინდა წერილეფ (2 ტიმ. 1:5; 3:14, 15). პავლექ რომაელეფშა მეჭარილ წერილს კონკრეტულო მიშინუ დალეფ სახელეფით. თინა ხვალე დალეფიშ ნაკეთებ საქმეეფს ვარწყედუნ, მარდულობას ხოლო გიმოხანტუნდჷ თინეფიშ, მუჭოთ ქრისტიან მსახურეფიშ, მიმართ (რომ. 16:1—4, 6, 12; ფილ. 4:3).
7. მუ კითხვეფს გუვარჩიენთ?
7 მუჭოთ წოხოლენ აბზაცეფშე იძირე, ბიბლიაშე ვა მოურს თი აზრ, ნამდა დალეფს ჯიმალეფშე დაბალ მდგომარეობა უკინებნა. ჩქინ მოჸოროფე დო ხეგოფაჩილ დალეფ ბრელ ჯგირ საქმეს ორთნა დო თინეფიშ მოხვარათ უხუცესეფს შეულებნა ვადინუან მშვიდობა დო ართობა კრებას. მარა ნამთინე კითხვას პასუხ ოკო ქიმეფჩათ. მაგალთო: მუშენ ითხინს იეჰოვა დაშე დუდშა გეფორაფას ნამთინე სიტუაციაშ დროს? უხუცესეფო დო მომსახურეეფო ხვალე ჯიმალეფ ინიშნებნან თენა, თის ხომ ვა ნიშნენს, ნამდა კრებას არძა ჯიმა რე არძა დაშ მეთაურ?
არძა ჯიმა რენო არძა დაშ მეთაურ?
8. მუჭოთ ეფესოელეფიშ 5:23-შე იძირე, არძა ჯიმა რენო არძა დაშ მეთაურ? გენწყით.
8 თე კითხვაშ მოკლე პასუხ რე ვარ! მუშენდა კრებას არძა დაშ მეთაურ ჯიმა ვარინ, ქრისტე რე (წეკითხით ეფესოელეფიშ 5:23). ოჯახის ქომონჯ რე ოსურიშ დუდ დო ნათილ ქომოლსქუა ვა რე მუშ დიდაშ მეთაურ (ეფეს. 6:1, 2). უხუცესეფს ხოლო კრებას შეზღუდულ ძალაუფლება უღნა და დო ჯიმალეფიშ წოხოლე (1 თეს. 5:12; ებრ. 13:17). დაუქორწინებელ და, ნამუთ მშობლეფწკუმა ვა ცხოვრენს, კინ გიმირჩქინანს მშობლეფიშ დო უხუცესეფიშ პატიცემას, მარა ჯიმალეფცალო, თიშ მეთაურ ხოლო ხვალე ქრისტე რე.
დაუქორწინებელეფ, მით ვა ცხოვრენა მშობლეფწკუმა, იესოშ მეთაურობაშ თუდო რენა (ქოძირით აბზაც 8)
9. მუშენ ოკო გიფორას მინშა დაქ დუდშა?
9 იეჰოვაქ ქომოლკათა გიშეგორ, ნამდა უხემძღვანელან კრებას დო თის ოსურკათაშა ვემუჩამ იგივე ძალაუფლება (1 ტიმ. 2:12). მუშენ აკეთ თაშ? იგივე მიზეზით, მუდგაშ გურშენ იესო გიორინუ ქომოლკათაშ დუდო — ნამდა წესრიგ ჸოფედკო მუშ ოჯახის. ნამთინე სიტუაციაშ დროს დას თიცალ მუდგარენქ ქაჸუ ოკეთებელქ, ნამუთ ჯიმაშ საქმე რენ-და, იეჰოვა ითხინს თიშე, დუდშა ქიგიფორას * (1 კორ. 11:4—7). იეჰოვა თეს თიშ გურშენ ვა თხულენს დალეფშე, ნამდა დამცირას თინეფ. თეშნერო თინა საშვალებას არზენს, პატიცემა გიმირჩქინან მეთაურობაშ პრინციპიშ მიმართ, ნამუთ მუქ გიონწყუ. თე ირფელიშ უკულ, მორთ პასუხ ქიმეფჩათ კითხვას: მუ ძალაუფლება უღნა ოჯახიშ დუდეფს დო უხუცესეფს?
ოჯახიშ დუდეფიშ დო უხუცესეფიშ პასუხიშმგებლობეფ
10. მუშენ შილებე უხუცესის კრებას წესეფიშ დადგენა ოკოდას?
10 უხუცესეფს უჸორა ქრისტე დო „შხურ“, ნამდგაშა ზრუნვა იეჰოვა დო იესოქ დავალეს (იოან. 21:15—17). ჯგირ განზრახვეფით უხუცესის შილებე მიორჩქუდას, ნამდა კრებაშო მუმაცალ რე დო შილებე ფიქრენდას: ოჯახიშ დუდის მუშ ოჯახიშ დაცვებელო წესეფიშ დადგენაშ უფლება ქუღუნ-და, უხუცესის ხოლო შეულებ დადგინას თიცალ წესეფ, ნამუთ მუშ აზრით დეცვენს ღორონთიშ შხურს. ნამთინე და დო ჯიმა შილებე უხუცესეფშე თხულენდას, კონკრეტულო გეგნუჭყვიდან მუდგარენ დო მიქცუან, მუჭოთ სულიერ მეთაურეფქ. მარა ართნერ ძალაუფლება უღნანო ოჯახიშ დუდეფს დო კრებას უხუცესეფს?
უხუცესეფ ზრუნენა კრებაშ სულიერ დო ემოციურ საჭიროებეფშო. იეჰოვაქ თინეფს მეჩჷ პასუხიშმგებლობა, ნამდა კრებას ზნეობრივ სიწმინდე დეცვან (ქოძირით აბზაცეფ 11, 12)
11. მუთ გჷ ართიანს უხუცესეფიშ დო ოჯახიშ დუდეფიშ პასუხიშმგებლობეფ?
11 მოციქულ პავლექ თქუ, ნამდა ოჯახიშ დუდიშ დო უხუცესიშ პასუხიშმგებლობეფ მუდგარენეფით გჷ ართიანს (1 ტიმ. 3:4, 5). მაგალთო, იეჰოვას ოკო, ოჯახიშ წევრეფქ ოჯახიშ დუდის დემორჩილან (კოლ. 3:20). კრებას რენან თინეფქ უხუცესეფს დემორჩილან. იეჰოვა ელჷ ქოთ ოჯახიშ დუდეფშე დო ქოთ უხუცესეფშე, ნამდა ქიმკაჯინენა თინეფიშ სულიერ ჯამრთელობას, მით მუნეფიშ მზრუნველობაშ თუდო რენა. თეწკუმა ართო, თინეფიშ ემოციურ საჭიროებეფშო ხოლო ოკო ქიზრუნან. ჯგირ ოჯახიშ დუდცალო, უხუცესეფქ დერწმუნან ოკო, ნამდა და დო ჯიმალეფ რთულ სიტუაციეფიშ დროს ღებულენა დროულ მოხვარას (იაკ. 2:15—17). თეს გეძინელ, იეჰოვა ელჷ უხუცესეფშე დო ოჯახიშ დუდეფშე, ნამდა ვეგნურთანა ბიბლიას ჭარილს დო ქიმეხვარებნა შხვეფს, დემორჩილან ღორონთიშ ნორმეფს (1 კორ. 4:6).
ოჯახიშ დუდეფს იეჰოვაქ მეჩჷ ძალაუფლება, ნამდა ქუხემძღვანელან მუნეფიშ ოჯახეფს. მოჸოროფე ოჯახიშ დუდ აზრის ოკითხ მუშ ოსურს, სოიშახ მუთუნს გინოჭყვიდუნდას (ქოძირით აბზაც 13)
12, 13. მუჭოთ რომაელეფიშ 7:2-შე იძირე, მუ განსხვავება რე ოჯახიშ დუდიშ დო უხუცესიშ პასუხიშმგებლობეფ შქას?
12 ოჯახიშ დუდიშ დო უხუცესიშ პასუხიშმგებლობეფ შქას მნიშვნელოვან განსხვავებეფ ხოლო რე. მაგალთო, იეჰოვაქ უხუცესეფს გასამართლებაშ უფლება დო თიშ პასუხიშმგებლობა მეჩჷ, ნამდა კრებაშე გარიცხან, ვენანიენსინ ფერ შემცოდველ (1 კორ. 5:11—13).
13 მარა იეჰოვაქ ოჯახიშ დუდეფს მეჩჷ ნამთინე ძალაუფლება, ნამუთ უხუცესეფშა ვემუჩამ. მაგალთო, თიქ უფლება მეჩჷ ოჯახიშ დუდეფს, დადგინან წესეფ დო მითხუან თინეფიშ მორჩილება (წეკითხით რომაელეფიშ 7:2). თის შეულებ სქუალეფს გინუჭყვიდას, სერით მუ დროს დირთან ჸუდეშა. თეს გეძინელ, შეულებ დასაჯას სქუალეფ თე წესის ვა დემორჩილეს-და (ეფეს. 6:1). მუშო ოკო რაგად, მოჸოროფე ოჯახიშ დუდ აზრის ოკითხ მუშ ოსურს, სოიშახ მუთუნს გინოჭყვიდუნდას, მუშენდა თინეფ „ართ ხორც რენა“ * (მათ. 19:6).
პატი ცით ქრისტეს, მუჭოთ კრებაშ დუდის
იესო, იეჰოვაშ მეთაურობათ, ხემძღვანელენს ქრისტიანულ კრებას (ქოძირით აბზაც 14)
14. ა) მუჭოთ მარკოზიშ 10:45-შე იძირე, მუშენ რე სამართლიან, ნამდა იეჰოვაქ კრებაშ დუდო იესო გიორინუ? ბ) მუ პასუხიშმგებლობა უღჷ ხემძღვანელ საბჭოს? (ქოძირით ჩარჩო „ხემძღვანელ საბჭოშ პასუხიშმგებლობეფ“).
14 იესოშ შეწირუათ იეჰოვაქ კრებას თითოულიშ სიცოცხლე გეგშეჸიდ დო, თეწკუმა ართო, თინეფიშ ხოლო, მით იესოშ რწმენას გიმირჩქინანა (წეკითხით მარკოზიშ 10:45; საქ. 20:28; 1 კორ. 15:21, 22). სამართლიან რე, ნამდა იეჰოვაქ კრებაშ დუდო იესო გიორინუ, მიდგაქ სიცოცხლე დათმჷ ჩქინ გიშაიდირალო. მუჭოთ ჩქინ მეთაურს, თის უღჷ ძალაუფლება, დადგინას წესეფ დო თინეფიშ მორჩილება მოთხუას ცალკეულ პიროვნებეფს, ოჯახეფს დო მთელ კრებას (გალ. 6:2). მარა იესო წესეფიშ დადგენაშე უმოსის ორთჷ. თის ვუჸორთ თითოულ დო ზრუნენს ჩქინდე (ეფეს. 5:29).
15, 16. მუს გურაფლენთ და მარლიშ დო ჯიმა ბენიამინიშ სიტყვეფშე?
15 დალეფ გიმირჩქინანა ქრისტეშ პატიცემას, მუჟამსით მეჸუნა თი ქომოლკათაშ ხემძღვანელობას, მით იესოქ დანიშნჷ, ნამდა იზრუნან თინეფშო. ბრელ და ოთანხმ მარლიშ სიტყვეფს, ნამუთ შეერთებულ შტატეფს ცხოვრენს. თე და იჩიებ: „მანგარო ვაფასენქ ჩქიმ ადგილს ოჯახის, მუჭოთ ოსურ დო კრებას, მუჭოთ და. მა ირიათო ოკო ვავითარენდე სწორ დამოკიდებულებას იეჰოვაშ მეთაურობაშ პრინციპიშ მიმართ. ჩქიმ ქომონჯ დო კრებას ჯიმალეფ მიადვილენა თეშ კეთებას, მუშენდა თინეფ პატის ფცენა დო მარდულობას გიმირჩქინანა თი საქმეშე, მუდგას მა ვორთუქ“.
16 ჯიმალეფ მეთაურობაშ პრინციპის ინანჭუნან თეს, თით ოძირანა, ნამდა პატის ცენა დალეფს. ართ ჯიმა, ბენიამინი, ნამუთ ინგლისის ცხოვრენს, იჩიებ: „ბრელ მუდგარენ დიბგურე კრებას დალეფიშ კომენტარეფშე დო ნარაგადშე, თიშ გურშენ, მუჭო იფქადაგე დო ვოგურუე უჯგუშო. ჩქიმ აზრით, თინეფ მანგარ მნიშვნელოვან საქმეს ორთნა“.
17. მუშენ ოკო გიმიფრჩქინათ პატიცემა მეთაურობაშ პრინციპიშ მიმართ?
17 მუჟამსით კრებას არძა — ქომოლკოჩეფ, ოსურკოჩეფ, ოჯახიშ დუდეფ დო უხუცესეფ — ინანჭუნა დო პატის ცენა მეთაურობაშ პრინციპის, კრება მშვიდობათ ხარენს. მუთ უმოს მთავარ რენ, ვადიდენთ ჩქინ მოჸოროფე ზეციერ მუმა იეჰოვას (ფსალმ. 150:6).
ობირეში 123 ართგურო მივაჸუნათ ღორონთიშ მართველობას
^ აბზ. 5 მუ პასუხიშმგებლობა უღნა დალეფს კრებას? არძა ჯიმა რენო არძა დაშ მეთაურ? ართნერ ძალაუფლება უღნანო უხუცესეფს დო ოჯახიშ დუდეფს? თე კითხვეფს ღორონთიშ სიტყვას მოჩამილ მაგალითეფით გუვარჩიენთ.
^ აბზ. 5 ქოძირით 2020 წანაშ სექტემბერიშ „გინაჯინალ კოშკის“ მოჩამილ სტატიაშ „ხუჯ ქუდუკინით ქრისტიან დალეფს“ მა-6 აბზაც.
^ აბზ. 9 ქოძირით ჩარჩო „მუჟამ ოკო გიფორას დაქ დუდშა?“
^ აბზ. 13 თიშ გაგებელო, მიშ გინაჭყვიდირალ რე, ოჯახ ნამ კრებას იმსახურენსინ, ქოძირით 2020 წანაშ არგუსოშ „გინაჯინალ კოშკის“ მოჩამილ სტატიაშ „დაფასით შხვეფიშ ადგილ კრებას“ 17—19 აბზაცეფ.
^ აბზ. 59 თე საკითხშე უმოს მეტ ინფორმაცია მოჩამილ რე ჩქინ ართ-ართ პუბლიკაციას („დარჩით ღვთის სიყვარულში“, გვ. 209—212).
^ აბზ. 64 ხემძღვანელ საბჭოშ პასუხიშმგებლობეფიშ გურშენ მეტ ინფორმაციაშ მიოღებელო ქოძირით 2013 წანაშ 15 კვირკვეშ „გინაჯინალ კოშკი“, გვ. 20—25.
