ოგურაფალ სტატია 6
ოსურიშ დუდ კოჩ რე
„ოსურიშ დუდ კოჩ [რე]“ (1 კორ. 11:3).
ობირეში 13 ქრისტე — ჩქინ მაგალითი
შინაარსი *
1. მუ ოკო კითხას დაქ მუშ დუდის, მუჟამსით კონკრეტულ პიროვნებაშა დაქორწინებაშე ფიქრენს?
არძა ქრისტიან იესოშ სრულყოფილ მეთაურობაშ თუდო რე. მარა, მუჟამსით ქრისტიან ოსურკოჩ ითხუაფ, თიშ მეთაურო არასრულყოფილ კოჩ გინირთუ. მარა თეს შილებე სირთულეეფქ ქუმაჸუნას. ათეშენ, მუჟამსით და კონკრეტულ პიროვნებაშა დაქორწინებაშე ფიქრენს, ჯგირ იჸი მუშ დუდის ქოკითხას: „მუ მარწმუნენს, ნამდა თე ჯიმა ჯგირ ოჯახიშ დუდ იჸუაფ? ქუკინებნო მნიშვნელოვან ადგილ სულიერ საქმეეფს თიშ ცხოვრებას? თაშ ვა რენ-და, სოვრეშე მიჩქჷ, ნამდა ქორწინებაშ უკულ თინა ქიმკაჯინე ჩქინ სულიერ საჭიროებეფს?“ მუშო ოკო რაგად, ჯგირ იჸუაფ თე დაქ შხვა მუდგარენ ხოლო ქოკითხას მუშ დუდის: „ქომღუნო თიცალ თვისებეფ, ნამუთ აწადირთუ ჩქინ ოჯახის? ქუვორექო მომთმენ დო ხეგოფაჩილ? ქომღუნო იეჰოვაწკუმა ჯგირ ურთიერთობა?“ (ეკლ. 4:9, 12). ქორწინებაშ უკულ ოსურ მუსხით ბედნერ იჸუაფუნ, თენა მუდგარენ დონეშა დამოკიდებულ რე თიშა, მუნერ გადაწყვეტილებეფს მიღენს ქორწინებაშახ.
2. მუს გუვარჩიენთ თე სტატიას?
2 მილიონობით ჩქინ ქრისტიან და ქომონჯიშ მორჩილებაშ მანგარ ჯგირ მაგალითის ირზენს. თინეფ ოცქვაფალ რენა! ჩქი მოხიოლნა იეჰოვაშ მსახურება თეცალ ართგურ ოსურკათაწკუმა ართო! თე სტატიას გუვარჩიენთ სუმ კითხვაშ პასუხის: 1) მუ რე თი ნამთინე სირთულე, ნამდგას ოსურეფ შეხვადნა? 2) მუშენ ისხუნუანს ოსურ ქომონჯიშ მორჩილებას? 3) მუშ გურაფა შეულებნა მორჩილებაშ გურშენ ქრისტიან ჩილ დო ქომონჯის იესოშ, აბიგაილიშ დო მარიამიშ, იესოშ დიდაშ, მაგალითშე?
მუ სირთულეეფს შეხვადნა ქრისტიან ოსურეფ?
3. მუშენ შეხვადუ არძა დაქორწინებულ წყვილ პრობლემეფს?
3 ქორწინება სრულყოფილ ძღვინ რე ღორონთშე, მარა ადამიანეფ არასრულყოფილეფ რენა (1 იოან. 1:8). ათეშენ აფრთხილენს ღორონთიშ სიტყვა დაქორწინებულ წყვილეფს, ნამდა თინეფ ქეშეხვადნა სირთულეეფს, ნამუთ მოშინაფილ რე ბიბლიას, მუჭოთ „უმოს ოწუხებელ“ (1 კორ. 7:28). ყურადღება ქიმიაქცით ნამთინე სირთულეს, ნამდგას შილებე ოსურქ შეხვადას.
4. მუშენ შილებე ქომონჯიშ მორჩილება ოსურს დამცირებულო ოგინებაფუანდას დუდის?
4 შილებე მუშ წარმომავლობაშ გურშენ ქომონჯიშ მორჩილება ოსურს დამცირებულო ოგინებაფუანდას დუდის. მერისოლი, ნამუთ შეერთებულ შტატეფს ცხოვრენს, იჩიებ: „მა იბრდინ თექ ოსურკათას ირიათო თის ოგურუანდეს, ნამდა თინეფ ირფელს ქომოლკათაშ თანაბარ ოკო რდესკო. მიჩქჷ, იეჰოვაქ გიონწყუ მეთაურობაშ პრინციპ დო თიქ მეჩჷ ოსურკათას თანდაბლურ დო საპატიცემლო პასუხიშმგებლობა. მარა ძნელ რე, ვა ვოდინუათ გაწონასწორებულ თვალსაზრის მეთაურობაშე“.
5. მუ არაბიბლიურ დამოკიდებულება უღჷ ნამთინეს ოსურკათაშ მიმართ?
5 თეს გეძინელ, ოსურკოჩ შილებე თიცალ პიროვნებაშა რდას დაქორწინებულ, მით ფიქრენს, ნამდა ოსურკათა ქომოლკათაშ გინაწონს მაჟიახარისხოვან რენა. სამხრეთ ამერიკას მახორუ ართ და, ავონი, იჩიებ: «ჩქინწკუმა დიო ქომოლკათა ჭკუმუნს ოჭკუმალს დო უკულ — ოსურკათა. ბაღანა ძღაბეფს მეთხიებნა დონწყუალა დო ოჭკუმალიშ კეთება, მარა ბაღანა ბოშეფს მუნეფიშ დიდა დო დალეფ ომსახურნა დო თინეფს ოგურუანა, ნამდა „ჸუდეშ მეფეეფ“ რენა». ართ და იაინლინი, ნამუთ აზიას ცხოვრენს, იჩიებ: „ჩქიმ ნინას უღჷ გამონათქვამ, ნამუთ ნიშნენს, ნამდა ოსურკათას ვასაჭირნა ჭკუა დო უნარეფ. თინეფიშ მოვალეობა რე არძანერ ჸუდეშ საქმეშ კეთება, მარა უფლება ვა უღნა, მუთუნნერ აზრ გეგმოხანტან მუნეფიშ ქომონჯწკუმა“. ქომონჯ, ნამდგაშათ მოქმედენს თეცალ აზროვნება, სოვრეშეთ ვეძირე ჸოროფა დო ბიბლიას ხოლო ვემურე, ცხოვრებას ურთულენს მუშ ოსურს, ვემეუნს იესოშ მაგალითის დო გურს უწყუნუანს იეჰოვას (ეფეს. 5:28, 29; 1 პეტ. 3:7).
6. მუ ოკო აკეთან ოსურეფქ, ნამდა გამანგარან იეჰოვაწკუმა პირად ურთიერთობა?
6 მუჭოთ წოხოლენ სტატიას რდუ მოჩამილ, იეჰოვა ქრისტიან ქომონჯეფშე ელჷ, ნამდა ქიზრუნენა ოჯახიშ სულიერ, ემოციურ დო მატერიალურ საჭიროებეფშო (1 ტიმ. 5:8). მარა, ქრისტიან დალეფქ მუნეფიშ დატვირთულ გრაფიკშე დრო ოკო გეგმურთან ირდღას ღორონთიშ სიტყვაშ კითხირს, თიშე ფიქრის დო ლოცვას. თენა შილებე ვა რდას ადვილ. თინეფ მანგარ დაკავებულეფ რენა, ათეშენ შილებე ფიქრენდან, ნამდა თეშ ოკეთებელო დრო დო ენერგია ვა უღნა, მარა თენა მანგარ მნიშვნელოვან რე. მუშენ იფჩიებუთ თეს? თიშენ ნამდა, იეჰოვას ოკო, თითოულქ გუვავითარათ დო ვა ვოდინუათ თიწკუმა პირად ურთიერთობა (საქ. 17:27).
7. მუ გაუადვილენს ოსურს იეჰოვაშე მეღებულ დანიშნულებაშ შესრულებას?
7 მარჩქილენა, ნამდა ოსურს შილებე უჭირდას, დემორჩილას არასრულყოფილ ქომონჯის. მარა თის იეჰოვაშე მეღებულ თე დანიშნულებაშ შესრულება უმოს ადვილ აჸი, ბიბლიას მოჩამილ მორჩილებაშ მიზეზეფ ქარჩქილე დო თინეფს ქათანხმუნ-და.
მუშენ ისხუნუანს ოსურ ქომონჯიშ მორჩილებას?
8. მუჭოთ ეფესოელეფიშ 5:22—24-ის ჭარჷ, მუშენ ისხუნუანს ქრისტიან ოსურ, დემორჩილას ქომონჯის?
8 ქრისტიან ოსურ ქომონჯიშ მორჩილებას თიშენ ისხუნუანს, ნამდა თეს იეჰოვა ითხინს თიშე (წეკითხით ეფესოელეფიშ 5:22—24). ოსურკოჩ ონდჷ მუშ ზეციერ მუმას, მუშენდა უჩქჷ, იეჰოვას უჸორს დო თიშ კეთებას თხინს, მუთ არძაშ უჯგუშ რე მუშო (კან. 6:24; 1 იოან. 5:3).
9. მუ შედეგ მოჸუნს, მუჟამსით ქრისტიან და პატის ცენს მუშ ქომონჯიშ ძალაუფლებას?
9 ქვეყნიერება ელუჩანს ოსურკათას, ნამდა ვა დემორჩილან იეჰოვაშ ნორმეფს დო მორჩილება მირჩქინან დამამცირებელო. მუშო ოკო რაგად, თინეფ, მით ხუჯის უკინენა თეცალ აზროვნებას, ვეჩინენა ჩქინ მოჸოროფე ღორონთის. იეჰოვა დღას ვემეჩანდჷ მუშ სქუალეფს თიცალ მითითებას, ნამუთ თინეფს დამცირენდჷ. და, ნამუთ მანგარო ოცად, შეასრულას იეჰოვაშ მეჩამილ პასუხიშმგებლობა, ხეს უნწყუნს, ნამდა მშვიდობა რდას მუშ ოჯახის (ფსალმ. 119:165). თეს ქოთ მუშა, ქოთ მუშ ქომონჯშა დო ქოთ სქუალეფშა მოუღ ჯგირობუა.
10. მუშ გურაფა შემლებნა კეროლიშ სიტყვეფშე?
10 ოსურ, ნამუთ მუშ არასრულყოფილ ქომონჯის ომორჩილ, ოძირანს, ნამდა პატის ცენს იეჰოვას, მიდგაქ გიონწყუ მეთაურობაშ პრინციპ დო უჸორს თინა. კეროლი, ნამუთ სამხრეთ ამერიკას ცხოვრენს, იჩიებ: „მიჩქჷ, ნამდა ჩქიმ ქომონჯ მინშა მეჩირთუ, მარა თინა ხოლო მიჩქჷ, თიშ შეცდომეფიშ დროს მუნერ რეაქცია მაღვენუნ, თენა ოძირანს, მუსხით ვაფასენქ იეჰოვაწკუმა მეგობრობას. ათეშენ ვოცადუქ, ირიათო მორჩილ ვორდე, მუშენდა მოკო, გურ გავუხარე ჩქიმ ზეციერ მუმას“.
11. მუ ოხვარ და ენისის, ნამდა ქაპატუას დო მუშ გურაფა შემლებნა თიშ სიტყვეფშე?
11 შილებე ოსურშო რთულ რდას ქომონჯიშ მორჩილება დო პატიცემა, მუჟამსით გინაფლენს, ნამდა თის ვაინტერეს მუშ გრძნობეფ დო აზრეფ. მარა ყურადღება ქიმიაქცით, მუს ორთჷ ართ დაქორწინებულ და, ენისი, თეცალ დროს. თინა იჩიებ: „ვოცადუქ, გურქ ვა მომრთას დო ირიათო ფშუ, ნამდა ჩქი არძა ფჩირთუთ. ჩქიმ მიზან რე მთელ გურით ვაპატუე თეშ, მუჭოთ თეს იეჰოვა ორთჷ. შედეგო, სიმშვიდეს იფრთინუანქ“ (ფსალმ. 86:5). მუჟამსით ოსურ ქომონჯის პატიენს, მორჩილება უმოს ადვილ აჸი.
მუშ გურაფა შემლებნა ბიბლიას მოჩამილ მაგალითეფშე?
12. მუ მაგალითეფ რე ბიბლიას მოჩამილ?
12 ნამთინე შილებე ფიქრენდას, ნამდა მორჩილ პიროვნება სუსტ რე. მარა თეცალ აზროვნება ვემურე სიმართლეს. ბიბლიას მორჩილ პიროვნებეფიშ ბრელ მაგალით რე მოჩამილ, მიდგას მანგარ მტკიცე ხასიათ უღუდ. გუვარჩუათ, მუშ გურაფა შემლებნა იესოშ, აბიგაილიშ დო მარიამიშ მაგალითეფშე.
13. მუშენ ომორჩილ იესო იეჰოვას? გენწყით.
13 იესო იეჰოვას ომორჩილ, მარა თიშენ ვარ, ნამდა თის რჩქინაშ ვარდა უნარეფიშ სინაკლებე უღჷ. ხვალე მანგარ რჩქინელ კოჩის შეულებუდ თიცალ მარტივო დო გასაგებო ოგურუკო, მუჭოთ იესო ორთუდ (იოან. 7:45, 46). იეჰოვას ჯგირო უჩქუდ იესოშ შესაძლებლობეფ დო ათეშენ მეჩჷ თის უფლება, სამყაროშ გოჭყაფაშ დროს მუშ გვერდით უმუშებუდკო (იგავ. 8:30; ებრ. 1:2—4). იესოშ გათელებაშ უკულ იეჰოვაქ თის მიანდჷ „მთელ ძალაუფლება, ზეცას დო დედამიწას“ (მათ. 28:18). თიშ უმკუჯინუო, ნამდა იესოს მანგარ დიდ შესაძლებლობეფ უღჷ, იშენით იეჰოვაშ ხემძღვანელობას მეჸუნს. მუშენ ორთჷ თეს? თიშენ, ნამდა უჸორს მუშ მუმა (იოან. 14:31).
14. მუშ გურაფა შეულებნა ქომონჯეფს ა) თევრეშე, მუჭო უჯინე იეჰოვა ოსურკათას? ბ) იგავეფიშ 31-ა დუდის ენოჭარილ სიტყვეფშე?
14 მუშ გურაფა შეულებნა ქომონჯეფს. იეჰოვა ოსურეფშე თიშენ ვეთხინს ქომონჯიშ მორჩილებას, ნამდა თინეფ ქომოლკათაშ გინაწონს მაჟიახარისხოვანო მიორჩქ. თენა თით დამტკიც, ნამდა იესოწკუმა ართო მართველეფო, მუჭოთ კოჩეფინ თეშ, ოსურეფ ხოლო გიშეგორ (გალ. 3:26—29). იეჰოვაქ იესოს ძალაუფლება მეჩუნ, თით ოძირუ, ნამდა თის ონდჷ. თეშნერო, ჭკვერ ქომონჯ გარკვეულ ძალაუფლებას მიანდენს მუშ ოსურს. ბიბლია ოსურკოჩიშ პასუხიშმგებლობაშ ეჭარუაშ დროს იჩიებ, ნამდა თის შეულებ უხემძღვანელას ჸუდეშ ნამთინე საქმეს, ქიჸიდას დო გეგმოჩას ქონება დო შემოსავალ გემნიღას ოჯახშა (წეკითხით იგავეფიშ 31:15, 16, 18). თინა ვა რე მონა, ნამდგას მუშ აზრიშ გიმოხანტუაშ უფლება ვა უღჷ. თეშ მანგიორო, ქომონჯ ონდჷ თის დო ურჩქილე, მუჟამსით მუშ აზრის იჩიებ (წეკითხით იგავეფიშ 31:11, 26, 27). კოჩ მუშ ოსურს პატიცემათ ოქცუნ თიმწკუმა, თინა ხოლო ხიოლით დემორჩილებ.
მუშ გურაფა შეულებნა გონიერ ოსურეფს თევრეშე, მუჭო ომორჩილუდ იესო იეჰოვას? (ქოძირით აბზაც 15)
15. მუშ გურაფა შეულებნა ოსურეფს იესოშ მაგალითშე?
15 მუშ გურაფა შეულებნა ოსურეფს. თიშ უმკუჯინუო, ნამდა იესოქ დიდებულ საქმეეფ აკეთ, დუდის დამცირებულო ვა გინაფლენდჷ იეჰოვაშ მეთაურობაშ მორჩილებაშ თუდო (1 კორ. 15:28; ფილ. 2:5, 6). თეშნერო, ჯგირ ოსურ, ნამუთ მეჸუნს იესოშ მაგალითის, დუდის დამცირებულო ვეგინანს მუშ ქომონჯიშ მორჩილებათ. თინა ხვალე თიშ გურშენ ვა დუკინენს ხუჯის მუშ ქომონჯის, ნამდა უჸორს თინა, პირველ რიგის თეს თიშენ აკეთენს, ნამდა უჸორს იეჰოვა დო პატის ცენს თის.
თიშ უკულ, მუთ აბიგაილქ დავითის დო თიშ ხალხის ოჭკუმალ ქიმუღ, თიქ დავითშა ქიმერთჷ. თიშ წოხოლე ბირგულ ქუდაშქვჷ დო ოხვეწუდ, მანგიორიშ გინოგაფათ შეცდომა ვა დუშვკო (ქოძირით აბზაც 16)
16. მუჭოთ პირველ სამუელიშ 25:3, 23—28-ს ჭარჷ, მუ სირთულეეფს შეხვად აბიგაილქ? (ქოძირით სურათ გალენ გვერდის).
16 აბიგაილს ჸუნდჷ ქომონჯ, ნამდგას ნაბალი ჯოხოდ. თინა რდუ ეგოისტ, ამაყ დო უმარდულ კოჩ. მარა აბიგაილს ვეგშუგორ მარტივ შარა თე ქორწინებაშე დუდიშ გათავისფალებერო. თის შეულებუდ მუთუნ ვა თქუკო დო დავითშა მეუჩამუდკო საშვალება, ნამდა დოჸვილკო მუშ ქომონჯ. მარა, თეშ მანგიორო, აბიგაილქ ირფელ გაკეთ ნაბალიშ დო მუშ ხალხიშ დაცვებელო. წერმიდგინ, მუშმადიდა გაბედულება დესაჭირებუდ აბიგაილს 400 შეიარაღებულ კოჩშა მიოჸულარო დო დავითწკუმა პრობლემაშ გურშენ პატიცემათ ოჩიებელო. თინა თიშო ხოლო მზათ რდუ, მუშ დუდშა გეუჭოფუდკო ქომონჯიშ დუნაშებ (წეკითხით 1 სამუელიშ 25:3, 23—28). დავითიქ ხეთეშე ქიმეხვად, ნამდა იეჰოვაქ თე გაბედულ ოსურკოჩ გიმირინუ მუშა საჭირო რჩევაშ მიოჩამალო, ნამდგაქ ეიოჩილითუ სერიოზულ შეცდომაშ დაშვება.
17. მუშ გურაფა შეულებნა ქომონჯეფს დავითიშ დო აბიგაილიშ მაგალითშე?
17 მუშ გურაფა შეულებნა ქომონჯეფს. აბიგაილ ჭკვერ ოსურ რდუ. დავითიქ ბრძნულო მიქცუ დო ქუმურჩქილუ თიშ რჩევას. შედეგო თიქ ეიჩილითუ უდანაშაულო ზისხირიშ დობუნა. თეშნერო, ბრძენ ქომონჯ მნიშვნელოვან გადაწყვეტილებაშ მეღებაშახ, ქიფიქრენს ოსურიშ აზრშე. შილებე თიშ შეხედულებაქ მეხვარას, ნამდა ვემიღას არასწორ გადაწყვეტილება.
18. მუშ გურაფა შეულებნა ოსურეფს აბიგაილიშ მაგალითშე?
18 მუშ გურაფა შეულებნა ოსურეფს. ოსურს, ნამდგას უჸორს იეჰოვა დო პატის ცენს თის, შეულებ ჯგირობუა მოუღას მუშ ოჯახის, თიმწკუმა ხოლო, მუჟამსით თიშ ქომონჯ ვამსახურ იეჰოვას ვარდა ვა ცხოვრენს თიშ ნორმეფით. თინა არაბიბლიურ შარათ ვეცადებ ქორწინებაშე დუდიშ გათავისფალებას. თეშ მანგიორო, პატიცემაშ გიმოხანტუათ დო მორჩილებათ, ქეცადებ, აღძრას ქომონჯ, ქიდიგურუას იეჰოვაშ გურშენ (1 პეტ. 3:1, 2). მარა, თიმწკუმა ხოლო, მუჟამსით ოსურიშ ჯგირ მაგალითის შედეგ ვა მუღჷ, იეჰოვა აფასენს ართგურობას, ნამდგას მორჩილ ოსურ გიმირჩქინანს თიშ მიმართ.
19. მუ სიტუაციეფიშ დროს ვა დემორჩილებ ოსურ მუშ ქომონჯის?
19 მარა მორჩილ ქრისტიან ოსურ ვა დუკინენს ხუჯის მუშ ქომონჯის, მუჟამსით თინა თხინსჷ ბიბლიურ კანონეფიშ ვარდა პრინციპეფიშ საწინააღმდეგოთ მოქციებას. მაგალთო, წერმიდგინ, ნამდა ჩქინ დას იეჰოვაშ მოწმე ვა რენ ფერ ქომონჯ ურაგად, ტყურა ქოთქუას, მიხირას ვარდა შხვა თიცალ მუდგარენ გაკეთას, მუთ ოწყინებაფუანს იეჰოვას. არძა ქრისტიანქ, თინეფ შქას დაქორწინებულ დაქ, პირველ რიგის იეჰოვას ოკო დემორჩილას. დას ბიბლიურ პრინციპეფიშ გინორთას ქოთხინან-და, თიქ ვარია ოკო ქოთქუას თეშე დო გემუანო, მარა მტკიცას ოკო გენწყას, მუშენ ვეშულებ თეშ კეთება (საქ. 5:29).
(ქოძირით აბზაც 20) *
20. სოვრეშე მიჩქნა, ნამდა მარიამს პირად, ხოლოშიან ურთიერთობა უღუდ იეჰოვაწკუმა?
20 მარიამს პირად, ხოლოშიან ურთიერთობა უღუდ იეჰოვაწკუმა. მუჭოთ იძირენ, თის ჯგირო უჩქუდ წმინდა წერილეფ. იოანე ნათლისმცემელიშ დიდა ელისაბედწკუმა ჩიებაშ დროს მარიამქ 20-შე მეტ ადგილ გიმირინუ ებრაულ წერილეფშე (ლუკ. 1:46—55). დეფიქრ: თიშ უმკუჯინუო, ნამდა მარიამ იოსებშა რდუ დანიშნულ, იეჰოვაშ ანგელოზიქ პირველო იოსების ვარინ, მარიამს დურაგადუ დო უწუ, ნამდა გეიორჩქინანდჷ ღორონთიშ სქუას (ლუკ. 1:26—33). იეჰოვა ჯგირო იჩინენდჷ მარიამს დო დარწმუნებულ რდუ, ნამდა თინა ქიჸოროფუანდჷ მუშ სქუას დო ქიზრუნენდჷ თიშე. მარიამს, მუშო ოკო რაგად, თიშ უკულ ხოლო უღუდ იეჰოვაწკუმა ჯგირ ურთიერთობა, მუთ იესოქ დოღურ დო ზეცას ოცხოვრებელო გეთელ (საქ. 1:14).
21. მუშ გურაფა შეულებნა ქომონჯეფს თევრეშე, მუდგას ბიბლია მარიამიშ გურშენ იჩიებ?
21 მუშ გურაფა შეულებნა ქომონჯეფს. ბრძენ ქომონჯის ოხიოლ, მუჟამსით მუშ ოსურს ჯგირო უჩქჷ ბიბლია დო ვაშქურ, ოსურ ოჯახიშ დუდიშ ადგილს ქიდეკინენსინ თიშა. ქომონჯის ჯგირო არჩქილე, ნამდა ოსურს ბიბლია დო ბიბლიურ პრინციპეფ ჯგირო ქუჩქუნ-და, ოჯახის ჯგირობუას მოუღანს. მუშო ოკო რაგად, თიმწკუმა ხოლო, მუჟამსით ოსურ უმოს გურაფილ რე, ვინემ ქომონჯ, ოჯახურ თაყვანიშცემაშ დო შხვა თეოკრატიულ საქმეეფიშ ხემძღვანელობა იშენ ქომონჯიშ პასუხიშმგებლობა რე (ეფეს. 6:4).
მუს გურაფლენა ოსურეფ მარიამიშ, იესოშ დიდაშ, მაგალითშე გურაფა დო ფიქრიშ გურშენ? (ქოძირით აბზაც 22) *
22. მუშ გურაფა შეულებნა ოსურეფს მარიამშე?
22 მუშ გურაფა შეულებნა ოსურეფს. ოსურკოჩიქ ოკო დემორჩილას მუშ ქომონჯის, მარა მუ რე პასუხიშმგებელ მუშ სულიერ მდგომარეობაშე (გალ. 6:5). თიქ დრო ოკო გეგმურთას პირად გურაფას დო ფიქრის. თენა მეხვარებ, ვადინუას ჸოროფა დო პატიცემა იეჰოვაშ მიმართ დო ხიოლით დემორჩილას მუშ ქომონჯის.
23. მუჭო ოხვარნა მორჩილ ოსურეფ მუნეფიშ დუდის, მუნეფიშ ოჯახის დო კრებას?
23 ოსურეფს, მით ქომონჯიშ მორჩილეფ სქიდუნა თიშენ, ნამდა იეჰოვა უჸორა, უმოს ხიოლ დო კმაყოფილებაშ გრძნობა აღვენუნა, ვინემ თინეფს, მით იეჰოვაშ მეთაურობაშ პრინციპიშ მეჸუნაშენ ვარიას იჩიებნა. თინეფ ჯგირ მაგალითის არზენა ქოთ ახალგაზრდა ქომოლკათას დო ქოთ ახალგაზრდა ოსურკათას დო ხეს უნწყუნა, ჯგირ გარემო რდას ხვალე ოჯახის ვარინ, კრებას ხოლო (ტიტ. 2:3—5). ამდღა იეჰოვაშ ართგურ მსახურეფიშ უმენტაშ ოსურკათა რე (ფსალმ. 68:11). ჩქინდე არძას, ქოთ კოჩის დო ქოთ ოსურს, მნიშვნელოვან პასუხიშმგებლობა მიღნა კრებას. უკულიან სტატიას გარჩიებულ იჸუაფ, მუჭო შემლებნა თითოულს თე პასუხიშმგებლობაშ შესრულება.
ობირეში 131 ოჯახ — იეჰოვაშ საჩუქარი
^ აბზ. 5 იეჰოვაქ გინოჭყვიდ, ნამდა დაქორწინებულ ოსურქ ქომონჯის დემორჩილკო. მუ მიშურს თეშა? ქრისტიან ქომონჯეფს დო ოსურეფს შეულებნა ბრელ მუდგარენ დიგურუან მორჩილებაშ დო ძალაუფლებაშ გიმორნაფაშ გურშენ იესოშ დო თი ოსურკათაშ მაგალითეფშე, ნამუთ ბიბლიას რე მოჩამილ.
