დებაბდჷ 1941 წანას საფრანგეთის, პარიზის, ართ უბრალო ოჯახის. მა მიჸორდჷ გურაფა, ათეშენ მანგარო მეწყინ, მუჟამსით ვით წანერ ვორდინ თეშ ტუბერკულოზით დებლახ დო სკოლას გურაფაქ მიოტებელქ მაჸუ. ექიმეფ ელამჩანდეს, ნამდა ფილტვეფშო უჯგუშ იჸუაფუდ ხშირას დონჯირა დო მოსვანჯა. თაშ ნამდა, მუსხირენ თუთას დრო ლექსიკონიშ კითხირით მემღუდ დო ურჩქილედ პარიზიშ „სორბონიშ უნივერსიტეტიშ“ რადიომაუწყებლობას. მანგარო მახიოლ, მუჟამსით ჩქიმ ექიმქ მიწუ, ნამდა სქილადირ ვორდჷ დო შემლებუდ სკოლაშა გილულა. ჩქიმ დუდის უწი: „ექიმეფ მანგარ ჯგირ საქმეს ორთნა“. თეშ უკულ ოცნება ქიდიბჭყჷ, ხალხ ლახალაშე დომსქილიდუაფუდკო. მუჟამსით ჩქიმ მუმა მოკითხუდ, მუ პროფესიაშ გიშაგორუა მილამუდ, ჩქიმ პასუხ ირო ართ რდჷ: „მა ექიმობა მოკო“. თაშ ქიდეკინ მედიცინაქ ჩქიმ ცხოვრებას პირველ ადგილ.

ჩქი ოჯახით კათოლიკეეფ ვორდით, მარა მა ბრელ მუთუნ ვა მიჩქუდ ღორონთიშ გურშენ დო ბრელ კითხვაშე ხოლო ვამღუდ პასუხ. თიშ უკულ, მუთ სამედიცინო უნივერსიტეტის დიბჭყჷ გურაფა, თი დასკვნაშა ქიმეფრთჷ, ნამდა სიცოცხლე მუშით ვა გორჩქინე.

ფშჷ, მუჟამსით პირველო დევეკვირ მიკროსკოპით ტიტაშ უჯრედეფს, მანგარო გუმაკვირ თიშ ძირაფაქ, მუჭო რეაგირენს თიშ უჯრედეფ ჩხე დო ჸინ ტემპერატურაშე. თეს გეძინელ, დევეკვირ, მუჭო აჭიჭარენს ციტოპლაზმას (ნივთიერება, ნამუთ უჯრედიშ დინახალე რე) ჯიმ დო მუჭო აფართოვენს სუფთა წყარს. თე დო შხვა რეაქციეფ ორგანიზმის ოხვარ, ქიმიარჩქვანას გარემოშ თირუას. თიშე დაკვირვებაქ, მუ სარკოთ რე ენწყილ თითოულ უჯრედ,  დუმარწმუნ, ნამდა სიცოცხლე მუშით ვა გორჩქინე.

გურაფაშ მაჟია კურსის ხოლო უმოსო დებრწმუნ ღორონთიშ არსებობაშა. ანატომიაშ ლექციეფს ქიდიბგურე, მუჭო ოხვარ კილეშ ნაწილ, ნამუთ დუჸიშე მაჯაშახ რე, კითეფს მოკიჩუას დო გონწყუმას. კუნთეფ, იოგეფ დო მყესეფ თეშ რე გენწყილ, ნამდა შემლებნა თის საინჟინრო შედევრ გივოდვათ. მაგალთო, ქიგებგჷ, ნამდა მყესეფ, ნამუთ აკავშირენს კილეშ დუჸიშე მაჯაშახიან ნაწილიშ ართ-ართ კუნთის კითეფიშ მაჟია ძვალწკუმა, ჟირო ირთუ დო რჩქინდუ ხიდეშნერ გინაულარეფ. თეშ ჭყოლოფათ, თინეფიშ თუდო თავისფალო მოძრავენა თი მყესეფ, ნამუთ კითეფიშ პირველ ძვალს მიკიმარგებ. მუჭოთ თაშინ, მყესეფ მკვრივ ბოჭკოეფით მიკიმარგებ კითიშ ძვალეფს. თეცალ მექანიზმ ვა რდას გენწყილინ, კითეფიშ მოკიჩუა შეიოლებერ ვეჸიდ. არგამათ ქობძირ, ნამდა ადამიანიშ სხეულ დიდებულ ინტელექტის აფჷ გოჭყაფილ.

გუმაჭყაფალიშ მიმართ ხოლო უმოს მოწიწებაშ გრძნობაქ ქუმაშუ თიშ უკულ, მუთ ბაღანაშ დაბადებაშ პროცეს გეგმიბრკვი. ქიგებგჷ, ნამდა დიდაშ ქვარას ჟანგბადის ბაღანა ჭიპლარიშ საშვალებათ ღებულენს. ათეშენ ქვარას რენ თი პერიოდის თიშ ალვეოლეფ (ბრონქეფიშ ბოლოეფს რენ თი ჭიფანა ბუშტუკეფ) ვა მუშენს. მშობიარობაშ მონჭაფაწკუმა ართო ალვეოლეფ დინახალეშე იფორუ სპეციალურ ნივთიერებათ, სურფაქტანტით. ახალდაბადებულ ბაღანაშ პირველ შურიშ ღალას გასაკვირ ცვლილებეფ მოჸუნს; თიშ გურიშ რხვილ იკილუ დო ზისხირ ფილტვეფჸურე მეურს. თე მნიშვნელოვან მომენტის, მუჟამსით ფილტვეფ ჰაერით იფშაფუ, სურფაქტანტ ალვეოლეფს ართიანიშ მიკოჭაბუაშე იცვენს დო ბაღანა მუშით იჭყანს შურიშ ღალას.

მოკოდ, გეფჩინებაფეკო თე სარკო მუდგარენეფიშ გუმაჭყაფალ, ათეშენ მთელ გურით ქიდიბჭყჷ ბიბლიაშ კითხირ. მანგარო მობწონდჷ ჰიგიენაწკუმა დაკავშირებულ კანონეფ, ნამუთ ღორონთის 3 000 წანაშე მეტ ხანიშ წოხოლე აფუდ ისრაელეფშა მეჩამილ. ღორონთიშ მითითებათ, თინეფქ ოკო დონთხორესკო მუნეფიშ განავალ, რეგულარულო გიბონესკო დო კარანტინს ჸუნდესკო, მიდგას გინიდვალუნ ფერ ლახალა ოჭირუდ (ლევ. 13:50; 15:11; კან. 23:13). ბიბლიაშე იძირე, მუჭო გინიდვალუ ლახალა, ნამდგას მეცნიერეფქ ხვალე ულირ საუკუნეს მეხვადეს. თეს გეძინელ, წიგნ „ლევიანეფს“ მოჩამილ რე კანონეფ ინტიმურ ჰიგიენაწკუმა დაკავშირებით, მუთ მთელ ერიშ ჯამრთელობას უნწყუნდჷ ხეს (ლევ. 12:1—6; 15:16—24). ქიმეფხვად, ნამდა ღორონთიქ თე კანონეფ ისრაელეფს მუნეფიშ საჯგირობუოთ მეჩჷ დო თის ქიდეცვენდეს-და, კურთხევეფს მიღენდეს. დებრწმუნ, ნამდა ბიბლია ღორონთშე რე შთაგონებულ — ღორონთშე, ნამდგაშ სახელ თიმ დროს ვამჩქუდ.

დიო ხოლო უნივერსიტეტის ბგურაფლენდჷ, მუჟამსით გეფჩინებაფე ლიდი. ჩქი ართიანქ ქიმეჸოროფეს დო 1965 წანას დეფქორწინით. თიმ დროს გურაფა დიო ხოლო ვა მაფუდ თებულ. 1971 წანას მა დო ლიდის ჩქინ ამშვ სქუაშე სუმ უკვე პჸუნდეს. ლიდი ირფელს ორთუდ, ნამდა სამუშას მუთუნ ვა ფცილებუდკო დო ოჯახშე ხოლო ჯგირო ზრუნენდჷ.

საავადმყოფოს სუმ წანიან მუშობაშ უკულ ჩქიმ კლინიკა გომნწყჷ. თინა ახალ გონწყუმილ მაფუდ, მუჟამსით დაჭყაფუს მოშინაფილ ჩილ დო ქომონჯიქ შეფხვად. ქომონჯის რეცეპტის  გიშუჭარუნდინ, თიშ ოსურქ ფთხუ, თიცალ პრეპარატ ვეგშამჭარუდკო, ნამდგაშა ზისხირ მიშეშ. მა გაკვირვებულო ბკითხჷ: „მართალოვო? მუშენ?“. თიქ მიპასუხ: „ჩქი იეჰოვაშ მოწმეეფ ვორეთ“. იეჰოვაშ მოწმეეფშენ დღას მუთუნ ვა მაფუდ გუნაგონ დო ვართ ზისხირიშ გურშენ თინეფიშ შეხედულება მიჩქუდ. თე ოსურკოჩიქ ჩანთაშე ბიბლია გეშეღ დო ბიბლიურ მუხლეფით გემინწყჷ იეჰოვაშ მოწმეეფიშ პოზიცია ზისხირწკუმა დაკავშირებით (საქ. 15:28, 29). უკულ თინეფქ ღორონთიშ სამეფოშ გურშენ ქიმეჩუეს დო გემინწყეს, ნამდა თინა მოსპუნს ტანჯებას, ლახალას დო ღურას (გამოცხ. 21:3, 4). თე დროს წიმიბძახ სიტყვეფ, ნამუთ დაჭყაფუს მიფშინე: „თქვა მუდგას მირაგადუთუნ, თენა ჩქიმ ბაღანობაშ ოცნება რე. ექიმობა თიშენ გინობჭყვიდ, ნამდა ხალხშა ტანჯება ემქექუაფუდკო“. თექ თიცალო იმოქმედ, ნამდა საათ დო გვერდის იფჩიებუდით. მუჟამსით თინეფქ მიდართეს, ქიმეფხვად, ნამდა უკვე ვა მოკოდ, კათოლიკე ვორდიკო. თინა ხოლო ქიგებგჷ, მუ ნოჯოხობუე გუმაჭყაფალს, ნამდგაქ თეცალ მოწიწებაშ გრძნობა გომრჩქინ. თინა იეჰოვა ჸოფე!

თე ჩილ დო ქომონჯის ხოლო სუმშა შეფხვად ჩქიმ კლინიკას დო ირ შეხვალამას საათშე მეტ ხანს იფჩიებუდით. უკულ ჸუდეშა ქუდვაპატიჟ, ნამდა ბიბლიურ საკითხეფშე უმოს მეტ ქომჩიებინდესკო. დუდშე ლიდის ხოლო ვარია ვა უთქუალ ბიბლიაშ გურაფაშე, მარა ნამთინე კათოლიკურ გურაფა არაბიბლიურ რდუნ თეს, მუთუნით ვაღიარენდჷ. ათეშენ ართ ონჯუას მღვდელ ქუდვაპატიჟ ჸუდეშა დო გვიანშახ იფჩიებუდით ეკლესიურ გურაფეფიშ გურშენ დო ხვალე ბიბლიას იბრინუანდით. თე ჩიებაქ ლიდი დარწმუნ, ნამდა იეჰოვაშ მოწმეეფ ჭეშმარიტებას ოგურუანა. თეშ უკულ ხოლო უმოსო ქიმეჸოროფეს იეჰოვაქ დო 1974 წანას ჟირხოლოქ დიმნათით.

თიშ უკულ, მუთ კაცობრიობაწკუმა დაკავშირებით ღორონთიშ განზრახვაშ გურშენ ქიგებგჷ, ჩქიმ ფასეულობეფქ დითირ. ჩქიმ დო ლიდიშ ცხოვრებას იეჰოვაშ მსახურებაქ მთავარ ადგილ ქიდეკინ. ჩქი გინოჭყვიდილ მაფდეს, სქუალეფ ბიბლიურ პრინციპეფით მობრდითკო. თინეფს ვოგურუანდით ღორონთიშ დო ხალხიშ ჸოროფას, მუდგაქ ჩქინ ოჯახ ხოლო უმოსო დაახლოვ ართიანწკუმა (მათ. 22:37—39).

ულირს იფშინანთინ, მა დო ლიდის მინშა მაძიცინენა თიშე, მუნერ რეაქცია უღდეს ჩქინ სქუალეფს, მუჟამსით ჩქინ ართობას ორწყედეს. თინეფს უჩქუდეს, ნამდა ჩქინ ოჯახის კანონ რდჷ იესოშ სიტყვეფ: «თქვან „ქო“ ქო რდას დო „ვარ“ — ვარ» (მათ. 5:37). მაგალთო, ჩქინ  ცირასქუას, ნამუთ თი დროს 17 წანერ რდჷ, ლიდიქ უფლება ვემეჩ, მუშ მახანეფწკუმა ართო სოდგარენ მიდურთუმუდკო. თინეფშე ართ-ართიქ ჩქინ ძღაბის უწუ: „დიდა ვაიტენს-და, მუმას ქოთხი, გოიტუას“. თიქ უპასუხ: „აზრ ვა უღჷ, თინეფ ირო ართნერო ფიქრენა“. ჩქინ ამშვხოლო სქუა ორწყედ, ნამდა მუჟამსით საქმე ბიბლიურ პრინციპეფს ოხუდ, ჟირხოლოს ართნერ დამოკიდებულება მიღდეს. იეჰოვაშ მარდულ ვორეთ, ნამდა ამდღა ჩქინ დიდ ოჯახ გაერთიანებულო ომსახურ თის.

მართალ რე, ჭეშმარიტებაქ დოთირუ ჩქიმ ფასეულობეფ, მარა მოკოდ, ჩქიმ სამედიცინო განათლება ღორონთიშ ხალხიშ მახვარებელო გეგმიბრინეკო. ათეშენ გეგნობჭყვიდ, ჩქიმ პროფესია გეგმომრინუაფუდკო დიო პარიზიშ დო უკულ ლუვიეშ ბეთელიშ ოჯახიშ წევრეფიშ მახვარებელო. დახე 50 წანა რე, მუთ ბეთელწკუმა თეშნერო ფთანამშრომლენქ. თე დროშ დინახალე ბეთელს ბრელს დევემეგობრჷ. თინეფშე ნამთინე უკვე 90 წანას რე გინოჩილათირ. ჩქიმო მანგარ სიურპრიზ რდჷ, მუჟამსით ართ ახალგაზრდა ბეთელელ გეფჩინებაფე დო რაგადის გიშუღით, ნამდა 20 წანაშ წოხოლე თიშ დიდა მა ვამშობიარ.

წანეფიშ დინახალე თიშ ძირაფაქ, მუჭო ზრუნენს იეჰოვა მუშ ხალხშე დო მუჭო ხემძღვანელენს თინეფს მუშ ორგანიზაციაშ საშვალებათ, ხოლო უმოსო ქომიჸოროფუ თიშ დუდ. 1980-იან წანეფიშ დაჭყაფუს ხემძღვანელ საბჭოქ ქიმწიჭყჷ სპეციალურ პროგრამა, ნამუთ შეერთებულ შტატეფს იეჰოვაშ მოწმეეფ დო სამედიცინო პერსონალ შქას ჯგირ კომუნიკაციას შეუნწყუნდჷ ხეს.

1988 წანას ხემძღვანელ საბჭოქ ბეთელს გონწყჷ ახალ განყოფილება, „სამედიცინო მომსახურებაშ საინფორმაციო ცენტრ“. დუდშე თე განყოფილება ხემძღვანელენდჷ „საავადმყოფოეფწკუმა თანამშრომლობაშ კომიტეტეფს“ (სთკ), ნამდგაშ მიზან რდჷ შეერთებულ შტატეფს ქუმუხვარებუდკო იეჰოვაშ მოწმე პაციენტეფშა მკურნალობაშ კურსიშ მიკულას. უმოს გვიანო თე კომიტეტეფწკუმა თანამშრომლობაქ შხვა ქიანეფს ხოლო იჸუ შეიოლებერქ, თინეფ შქას საფრანგეთის. მაკვირენს თიშ ძირაფა, მუჭო ზრუნენს იეჰოვაშ ორგანიზაცია თი და დო ჯიმალეფშე, მიდგას სამედიცინო მოხვარა ოსაჭირნა!

მედიცინას ჩქიმ ცხოვრებას მთავარ ადგილ უკინებუდ, მარა ქიმეფხვად, ნამდა არძაშ უმოს მნიშვნელოვან რე, ქიმვეხვარე ხალხის სულიერო სქილადას — სიცოცხლეშ წყაროშ, იეჰოვა ღორონთიშ გაჩინებაფას დო თიშ მსახურებაშ დოჭყაფას. პენსიაშა გიშულაშ უკულ მა დო ლიდი პიონერეფო ვმსახურენდით დო ქადაგებაშ საქმეს უმოს მეტ დროს უთმენდით. ჩქი ამდღა ხოლო ირფელს ვორთუთ, ნამდა უმოს მეტ დრო დუთმათ თე სასიცოცხლოთ მნიშვნელოვან საქმეს.

ამდღარშა ვოცადუქ, ქიმვეხვარე დალახებურ ადამიანეფს, მარა მარჩქილე, ნამდა არძაშ უჯგუშ ექიმს ხოლო ვეშულებ ხალხ არძა ლახალაშე დასქილიდუას დო მოსპას ღურა. თაშ ნამდა, ველუქ დროს, მუჟამსით ვეჸუაფ ჭუა, ლახალა დო ღურა. ახალ ქვეყნიერებას, ნამუთ მალას ქუდოდირთუ, მთელ მარადიულობა მაღვენუ თიშო, ნამდა უმოს მეტ ქიგებგე ღორონთიშ გუნაჭყეფუშ, თინეფ შქას ჩქინ სარკო სხეულიშ, გურშენ. ბაღანობაშ ოცნებაშ მუდგარენ ნაწილქ უკვე გემირთჷ, მარა ბჯერს, ნამდა თინა ბოლოშა შისრულებ!