1. მუ მიზეზეფით შილებე რჩევა მიბღათ დო მუშენ მოსაჭირნა თინა?

რჩევა არძას მოსაჭირნა. მინშა შილებე თენა ჩქი იფთხუათ თინეფშე, მიდგას პატის ფცენთ. მარა შხვა შემთხვევას შილებე შხვაქ გინოჭყვიდას, ქომჩან რჩევა, ნამდა „არასწორ ნაბიჯ ვეგნობდგათ“ (გალ. 6:1). ვარდა რჩევა თიშ უკულ მიბღათ, მუთ ქუდვაშეთ. რჩევას მუდგა მიზეზით ვა მარზენდანინ, ოკო ურჩქილათ. თენა ჩქინო იჸუაფ ჯგირ დო შილებე ჩქინ სიცოცხლე ხოლო დერსხას (იგავ. 6:23).

2. მუჭოთ იგავეფიშ 12:15-შე იძირე, მუშენ ოკო ურჩქილათ რჩევას?

² თე სტატიაშ მთავარ მუხლ ელამჩანა, „შურ დო გურით ქუმურჩქილე ბრძენიშ ნარაგადის“ (იგავ. 22:17). ვა არსებენს ირფელ უჩქუნ ფერ ადამიან, ირო შილებე რდას თიცალ მიდგარენ, მიდგას ჩქინ უმოს რჩქინა დო გამოცდილება უღჷ (წეკითხით იგავეფიშ 12:15). თაშ ნამდა, რჩევაშ მორჩქილაფათ თანდაბლობას გიმიფრჩქინანთ. ჩქი მარჩქილენა, ნამდა ირფელს ვენვანჭუთ დო მიზნეფს ქიმვოჭირინუათინ, მოხვარა მოსაჭირნა. ბრძენ მეფე სოლომონქ ღორონთიშ შთაგონებათ ჭარჷ: „ბრელ ელმაჩამალ რენ თექ საქმე იკეთებ“ (იგავ. 15:22).

3. მუ დო მუნერო შილებე მიბღათ რჩევა?

³ ჩქი შილებე მიბღათ არაპირდაპირ დო პირდაპირ რჩევა. მუს ნიშნენს არაპირდაპირ რჩევა? შილებე ბიბლიაშ ვარდა ბიბლიაშა გერსხილ პუბლიკაციეფიშ კითხირიშ დროს დეფიფქრათ ჩქინ საქმეეფშე დო გეგნობჭყვიდათ მუდგარენეფიშ თირუა (ებრ. 4:12). თენა რე არაპირდაპირ რჩევა. მუს ნიშნენს პირდაპირ რჩევა?  უხუცესიქ ვარდა შხვა გამოცდილ ჯიმაქ, შილებე ქომწუან, მუ მაფნა გიშასწორებელ. თენა რე პირდაპირ რჩევა. მუჟამსით მიდგარენს თიზმათ უჸორთ, ნამდა ბიბლიურ რჩევას მარზენა, ჩქი ოკო დუვაფასათ თენა მორჩქილაფათ დო რჩევაშ გიმორნაფათ.

4. მუჭოთ ეკლესიასტეშ 7:9-ს ჭარჷ, მუ ოკო ვა ვაკეთათ, მუჟამსით რჩევას მარზენა?

⁴ სინამდვილეს, შილებე გამჭირდან პირდაპირ რჩევაშ მეღებაქ დო ნაწყენქ ხოლო ქუდოფსქიდათ. მუშო ოკო რაგად, ჩქი ვებჩიებუთ, ნამდა უჩილათ ვორეთ, მარა რჩევაშ მეღება შილებე იშენით მიჭირდან, მუჟამსით მიდგარენ ჩქინ კონკრეტულ შეცდომაშ გურშენ მირაგადნა (წეკითხით ეკლესიასტეშ 7:9). შილებე დუდ გემაფრთლათ, ვემმეწონან რჩევაშ მოჩამაშ ფორმაქ ვარდა რჩევაშ მუმაჩამალიშ მოტივეფშა გემშებღათ ეჭვ. შილებე თიშ კილშა გეგნიბღათ ყურადღება დო ფთქუათ: „მუ უფლებათ მარზენს რჩევას? მუშ დუდის მიკაჯინას“. რჩევა ვა მობწონან-და, შილებე თინა ვეგმიბრინუათ ვარდა შხვას ქელვაკითხუათ თიშ იმენდით, ნამდა თინა ქომწინა თიცალ მუდგარენს, მუთ ჩქი მონწყუნა.

5. მუ იჸუაფ თე სტატიას გარჩიებულ?

⁵ თე სტატიას გუვარჩიენთ თიცალ ბიბლიურ პერსონაჟეფიშ მაგალითეფს, მიდგაქ ვემიღეს რჩევა დო თიცალეფიშის ხოლო — მიდგაქ მიღეს. მუ მიმეხვარებნა რჩევაშ მეღებას დო მუ ჯგირობუას მიბღენთ შედეგო?

6. მუს ბგურაფლენთ რობოამიშ მაგალითშე?

⁶ გუვარჩუათ რობოამიშ მაგალით. მეფეთ გინირთუნ თიმწკუმა ხალხიქ თის თხუ, გეუქექუკო სოლომონიშ დაწესებულ მონკა ოღალ. რობოამქ ხანიერ ქომოლკათას ქელაკითხუ რჩევა დო თინეფქ უწის, ნამდა ქუმუხუჯუკო თე ხალხის, მუდგაშ შედეგო თინეფ ირიათო თიშ მსახურეფ იჸუაფდეს (1 მეფ. 12:3—7). მუჭოთ იძირენ, რობოამს ვემეწონ თე რჩევაქ, ათეშენ მუშ მახანეფს ქოკითხჷ მუჭო მიქცუკო. თე ქომოლკათა სოდგარენ 40 წანერეფ ქორდეს, თაშ ნამდა, მუდგარენ ცხოვრებისეულ გამოცდილება უღდეს (2 მატ. 12:13). თეშ უმკუჯინუო, თინეფქ გლახა რჩევა ქიმეჩეს რობოამს დო ელუჩეს, ნამდა ხოლო ქიგუძინკო ხალხიშ ოღალს (1 მეფ. 12:8—11). რობოამქ ჟირ შხვადოშხვანერ რჩევა მიღჷ. თის შეულებუდ ლოცვათ იეჰოვას ქოკითხკო, ნამ გიმირინუკო. მარა თაშ ვემიქცუ დო მიაჸუნ მუშ მახანეფიშ რჩევას, ნამუთ უმოსო მოწონდჷ. თე გადაწყვეტილებაქ გლახა შედეგ მოუღ ქოთ რობოამს დო ქოთ ისრაელ ხალხის. ჩქი ხოლო შილებე თიცალ რჩევა ქომჩან, ნამუთ ვა მობწონა, მარა თინა ღორონთიშ სიტყვაშა ქორე გერსხილ-და, ოკო გეგმიბრინუათ.

7. მუს ბგურაფლენთ მეფე უზიაშ მაგალითშე?

⁷მეფე უზიაქ ვემიღ რჩევა. თიქ მინილ იეჰოვაშ ტაძარიშ თი ადგილშა, სოდეთ ხვალე მღვდელეფს უღდეს მინულაშ უფლება დო საკმელიშ ჭუალა მინდომ. იეჰოვაშ მღვდელეფქ თის უწის: „უზია, სქან საქმე ვა რე იეჰოვაშო საკმელიშ ჭუალა, თენა მღვდელეფიშ, აარონიშ გამნარყიშ, საქმე რე“. მუ რეაქცია უღუდ უზიას? თის თანდაბლურო მეუღებუდკო რჩევა დო ტაძარ ხეთეშე ქუდუტებუდკონ, შილებე იეჰოვაქ ქაპატუკო, მარა, თეშ მანგიორო, „გერისხჷ უზიაქ“. მუშენ ვემიღ თიქ რჩევა? მუჭოთ იძირენ თის მიორჩქუდ, ნამდა მეფე რდუნ თიშენ ირფელიშ კეთებაშ უფლება უღუდ, მარა იეჰოვა თაშ ვა ფიქრენდჷ. დაუმორჩილებლობაშ  გურშენ „უზია ღურაშახ კეთროვან რდჷ“ (2 მატ. 26:16—21). უზიაშ მაგალით მოძირანა, ნამდა ვა უღჷ მნიშვნელობა, მი ვორეთ, ბიბლიაშა გერსხილ რჩევას ვემიბღენთ-და, მივოდინუათ იეჰოვაშ მოწონას.

8. მუნერ რეაქცია უღუდ იობის რჩევაშე?

⁸ ბიბლიას მოჩამილ რე თინეფიშ ჯგირ მაგალითეფ ხოლო, მიდგაქ მიაჸუნ რჩევას დო ათეშენ კურთხევეფ მიღჷ. გუვარჩუათ იობიშ მაგალით. მართალ რე, იობის უჸორდჷ ღორონთ დო ოკოდ, გურ გუხარკო თის, მარა თინა სრულყოფილ ვა რდჷ. პრობლემეფიშ დროს თიქ მუსხირენ არასწორ აზრ თქუ. ათეშენ ელიჰუ დო იეჰოვაქ პირდაპირ რჩევა მეჩეს. თიქ თანდაბლურო მიღჷ რჩევა დო თქუ: „იფჩიებუდ, მარა ვა მარჩქილედ. იფრთინუანქ ჩქიმ სიტყვეფს დო ტვერ დო ტუტას იმნანიენქ“. იეჰოვაქ აკურთხჷ იობ თეცალ თანდაბლობაშ გურშენ (იობ. 42:3—6, 12—17).

9. რჩევაშ მეღებაშ მუ ჯგირ მაგალით დომტეს მოსექ?

⁹მოსექ ჯგირ მაგალით მუჩეს, მუშენდა თიქ ქიმიაჸუნ რჩევას, ნამუთ დაშებაშ უკულ მიღჷ. ართშა თიქ თიშმანწარას გერისხჷ, ნამდა იეჰოვაშ უპატიცემლობა გეგმირჩქინ. ათეშენ აღთქმულ ქიანაშა ენულაშ პატი მიოდინუ (რიცხ. 20:1—13). მუჟამსით მოსექ იეჰოვას გადაწყვეტილებაშ თირუა თხუ, თიქ უპასუხ: „გობაღ, მეტო ვემეჩუა თეშ გურშენ!“ (კან. 3:23—27). თეშ უმკუჯინუო, მოსეს გურ ვა მორთუმ. თიქ ქუდაჸუნ ღორონთის დო იეჰოვაქ ხოლო გაგრძელ თიშ გიმორნაფა ისრაელ ერიშ ოხემძღვანელებერო (კან. 4:1). იობ დო მოსე რჩევაშ მეღებაშ ჯგირ მაგალითის მარზენა. იობის დუდ ვა გუმართლებ დო დითირუ აზროვნება. მოსექ იეჰოვაშე რჩევა მიღუნ თით ოძირუ, ნამდა ღორონთიშ ართგურ რდჷ თიშ უკულ ხოლო, მუთ ძვირფას პატი მიოდინუ.

10. ა) მუ კურთხევეფ მოჸუნს რჩევაშ მეღებას, მუჭოთ თენა იგავეფიშ 4:10—13-ს მოჩამილ სიტყვეფშე იძირე? ბ) მუ ჯგირ დამოკიდებულება გიმირჩქინ ნამთინექ რჩევაშ მიმართ?

¹⁰ ჩქინდა ჯგირობუა მოუღ თიცალ ართგურ მსახურეფიშ მაგალითეფიშ მეჸუნას, მუნერით რდეს იობ დო მოსე (წეკითხით იგავეფიშ 4:10—13). რჩევაშ მეღებაშ ჯგირ მაგალითის და დო ჯიმალეფ ხოლო მარზენა. ყურადღება ქიმვაქცუათ, მუს იჩიებ კონგოს მახორუ ჯიმა ემანუელ თი გაფრთხილებაშე, ნამუთ მეჩეს: „კრებას ჯიმალეფქ ქოძირეს, ნამდა იეჰოვაწკუმა ურთიერთობა გილმელებუდ, ათეშენ ჩქიმ მახვარებშა ქუმორთეს. მა ქიმვაჸუნ თინეფიშ რჩევას დო ბრელ პრობლემას ეუჩილითე დუდ.“ * ართ პიონერ და, ნამუთ კანადაშე რე, რჩევაშ გურშენ იჩიებ: „მართალ რე ვა მოკოდ თიშ რჩქილა, მუდგას მირაგადდეს, მარა თენა მოსაჭირუდ“. ხორვატიელ ჯიმა მარკო იჩიებ: „პასუხიშმგებლობა მივოდინე, მარა რჩევაშ მეღებაქ მიმეხვარ, დიფრთინეკო სულიერ წონასწორობა“.

11. მუ თქუ ჯიმა კარლ კლაინქ რჩევაშ მეჸუნაშ გურშენ?

¹¹ ქობძირათ ჯიმა კარლ კლაინიშ შემთხვევა, ნამუთ ხემძღვანელ საბჭოშ წევრ რდჷ. თიშ მაგალითშე იძირე, მუ ჯგირობუა მოჸუნს რჩევაშ მეღებას. თიქ მუშ ბიოგრაფიას მიშინუ, ნამდა ჯიმა რუტერფორდიქ, ნამდგაწკუმა მეგობრენდჷ, ართშა პირდაპირ რჩევა მეჩჷ, მუდგაქ დუდშე ეწყინ. ჯიმა  კარლიქ თქუ: «უმოს გვიანო, მუჟამსით რუტერფორდიქ ქობძირ, გემუანო მიწუ, „გამარჯობა კარლ“. თიშე ნაწყენ ვორდინ თიშ გურშენ, გამარჯობა მიკოსურებულო უწი. რუტერფორდიქ მიპასუხ: „კარლ, ფრთხილას რდა, ეშმაკიქ ვემგოჩილითუას“. გაკვირებულო უწი: „მა მუთუნ ვა მოწყინ, ჯიმა რუტერფორდ“. მარა თის გვალო ჯგირო უჩქუდ, ნამდა ნაწყენ ვორდჷ, ათეშენ კინ გამმეორ: „გვალო ჯგირ, მარა იშენით ფრთხილას რდა, ეშმაკიქ ვემგოჩილითუას“. თინა მართალ რდჷ, მუჟამსით გურშა თი ჯიმაშ წყენას ქელეპტენთ, მიდგაქ სწორ რჩევა მუჩეს . . . ეშმაკიშ მახეს ქინობლუთ» * (ეფეს. 4:25—27). ჯიმა კლაინქ ქიმიაჸუნ რუტერფორდის რჩევას დო თინეფქ კინ ხოლოშიან მეგობრეფო ქუდოსქიდეს.

12. მუჭო მიმეხვარებნა თანდაბლობა რჩევაშ მეღებას? (ფსალმ. 141:5)

¹² საჭირო რე გეგმიფრჩქინათ თანდაბლობა დო ფშუდან, ნამდა არასრულყოფილეფ ვორეთ დო მინშა უგუნურ გადაწყვეტილებეფს ბღებულენთ. იობიქ დითირუ აზროვნება დო თანდაბლობაშ გურშენ იეჰოვაქ ხოლო აკურთხჷ თინა. თიქ თანდაბლობა თით ოძირუ, ნამდა რჩევა მიღჷ ელიჰუშე, ნამუთ მუშე ბრელით უკლაშ რდჷ (იობ. 32:6, 7). იობცალო თანდაბლობა მიმეხვარებნა, მიბღათ თიცალ რჩევეფ ხოლო, ნამდგას ჩქინ აზრით ვემსახურენთ ვარდა ბრელით უმოს ახალგაზრდა მარზენა. ართ კანადელ უხუცეს იჩიებ: „შხვეფ მორწყენან თეშ ჩქინ დუდის ვა ვორწყეთ, დო თინეფქ რჩევეფ ვა მუჩეს-და, მუჭო ოკო იბდათ სულიერო წიმი?“. ჩქი არძას მოსაჭირნა უმოსო გუვავითარათ შურიშ ნაყოფ დო უჯგუშ მასწავლებერეფ დო მაქადაგებელეფ ვორდათ (წეკითხით ფსალმუნიშ 141:5).

13. მუჭო ოკო უჯინათ რჩევას?

¹³რჩევა ღორონთშე ჸოროფაშ გიმოხანტუათ მირჩქინით. იეჰოვას ჩქინო არძაშ უჯგუშ ოკო (იგავ. 4:20—22). ღორონთ ჩქინ მიმართ ჸოროფას გიმოხანტუნს, მუჟამსით ბიბლიაშ, ბიბლიაშა გერსხილ პუბლიკაცეფიშ ვარდა მოწიფულ თანამორწმუნეეფიშ საშვალებათ მარზენა რჩევეფს. ებრაელეფიშ 12:9, 10-ის ბკითხულენთ: „ღორონთ თეს ჩქინ საჯგირობუოთ ორთჷ“.

14. მუშა ოკო გინიბღათ ყურადღება, მუჟამსით რჩევას მარზენა?

¹⁴ყურადღება რჩევაშა გეგნიბღათ დო ვართ ხოლო თიშა, მუჭო რე თე რჩევა მოჩამილ. მინშა შილებე ვემმეწონან, მუჭო იჸუ რჩევაქ მოჩამილ. მუშო ოკო რაგად,  რჩევაშ მუმაჩამალქ ოკო ეცადას, თეშ ქომჩან რჩევა, ნამდა ადვილქ მაჸუან თიშ მეღებაქ * (გალ. 6:1). მარა, მუჟამსით რჩევას მარზენა, ჯგირ იჸუაფ, ყურადღება თიშა გეგნიბღათ, მუს მირაგადნა დო ვართ ხოლო თიშა, მუჭო მირაგადნა. შემლებნა ჩქინ დუდის ქობკითხათ: „თიმ დროს ხოლო, მუჟამსით ვა მობწონს, მუჭო მუჩეს რჩევა, ხომ ვა რე თიცალ მუთუნ, მუდგაშ გურაფა შემლებ თე რჩევაშე? ქეშემლებნო რჩევაშ მუმაჩამალიშ არასრულყოფილებაშა ვეგნიბღე ყურადღება დო თიშ რჩევაშე მიბღე სარგებელ?“ ჭკვერულ იჸუაფ, ნებისმიერ რჩევაშე მიბღათ სარგებელ (იგავ. 15:31).

15. მუშენ ოკო ელვაკითხუათ შხვას რჩევა?

¹⁵ ბიბლია მირაგადნა, ნამდა რჩევა ქიფთხუათ. იგავეფიშ 13:10-ის ჭარჷ: „მით რჩევას გორუნს, ბრძენ რე“. თენა მართალო თაშ რე. სულიერო წიმი უმოსო თინეფ ულა, მით რჩევას ელაკითხანა შხვეფს, ვინემ თინეფ, მით შხვეფს უჯინენა, მუჟამ გინოჭყვიდნა რჩევაშ მოჩამას. თაშ ნამდა, ვა უჯინათ შხვეფს დო რჩევა თქვა ქითხით.

16. მუ შემთხვევეფიშ დროს შემლებნა რჩევა ელვაკითხუათ შხვეფს?

¹⁶ მუჟამ შილებე შხვას რჩევა ელვაკითხუათ? დეფიფქრათ სუმ შემთხვევაშე: 1) და გამოცდილ მაუწყებელს თხინს, მიდაჸუნას ბიბლიაშ გურაფაშა დო უკულ რჩევას ელაკითხანს, ნამდა გაუჯგუშას გურაფაშ მეთოდეფ. 2) დაუქორწინებელ და აზრის ელაკითხანს სულიერო მოწიფულ დას ბარგიშ ჸიდირიშ დროს. 3) ჯიმა, ნამდგაქ პირველო ოკო აკეთას საჯარო მოხსენება, გამოცდილ მომხსენებელს თხინს, ნამდა ქურჩქილას თის დო რჩევა ქიმეჩას. თიმ დროს ხოლო, მუჟამსით ჯიმა წანეფ რე მოხსენებეფით გიშურს, ჯგირ იჸუაფ, თიქ გამოცდილ მომხსენებელს ქელაკითხუას რჩევა დო გეგმირინუას.

17. მუჭო შემლებნა რჩევაშე სარგებელიშ მეღება?

¹⁷ ჩქი არძა მიბღენთ რჩევეფს, იჸინო თენა პირდაპირ დოვარ არაპირდაპირ. თეცალ შემთხვევეფიშ დროს შემლებნა ქიგიფშინათ, მუთ გუვარჩით თე სტატიას. ვა ვოდინუათ თანდაბლობა, ყურადღება რჩევაშა გეგნიბღათ დო ვართ ხოლო თიშა, მუჭო იჸუ თიქ მოჩამილქ დო გეგმიბრინუათ, მუდგას ელამჩანა. რჩევას ქუმურჩქილუანთ დო დარიგებას ქიგებგონუანთ-და, ბიბლია მოპირნა, ნამდა სიბრძნეს მიბღენთ (იგავ. 19:20).