1. მუნერ ურთიერთობა შეულებნა უღდან ართგურ ადამიანეფს იეჰოვაწკუმა?

 იეჰოვაშ თაყვანიშმცემელეფიშ ოჯახშა მიშურს იესო, „არძა გუნაჭყეფუშახ ერჩქინელ“, დო ანაყუ ანგელოზ (კოლ. 1:15; ფსალმ. 103:20). მუჟამსით იესო დედამიწას რდჷ, ოძირუ, ნამდა ართგურ ადამიანეფს შეულებნა იეჰოვა მუმათ მირჩქინან. მოწაფეეფწკუმა ჩიებაშ დროს იესოქ იეჰოვაშ გურშენ თქუ „ჩქიმ მუმა დო თქვან მუმა“ (იოან. 20:17). მუჟამსით დუდის მევუძღვინენთ იეჰოვას დო იბნათუთ, და დო ჯიმალეფიშ მოჸოროფე ოჯახიშ წევრეფო გინიფრთუთ (მარ. 10:29, 30).

2. მუს გუვარჩიენთ თე სტატიას?

² ნამთინეს უჭირს, იეჰოვა მოჸოროფე მუმათ მირჩქინას. შხვეფს შილებე ვა უჩქუდან, მუჭო გიმირჩქინან და დო ჯიმალეფიშ ჸოროფა. თე სტატიას გუვარჩიენთ, მუჭო მოხვარნა იესო, იეჰოვა მიფრჩქინათ მოჸოროფე მუმათ, მიდგას შემლებნა დევეახლოვათ. თეს გეძინელ, იეჰოვაშ მაგალითშე ქობძირუნთ, მუჭო ოკო მივექცუათ და დო ჯიმალეფს.

3. მუჭო მოხვარნა ლოცვაშ ნიმუშ იეჰოვაწკუმა დაახლოებას?

³ იეჰოვა მოჸოროფე მუმა რე. იესოს ოკო, ნამდა იეჰოვას ვუჯინათ, მუჭოთ ადვილ დარაგადაფალ, მზრუნველ დო მოჸოროფე მშობელს, დო ვართ ხოლო ძალაუფლება უღუნ ფერ ჸინგურიშ პიროვნებას. თექ იესოშ ლოცვაშ ნიმუშშე ქიძირ. თიქ ლოცვა თეცალ სიტყვეფით დიჭყჷ: „ჩქინ ზეციერ მუმა“ (მათ. 6:9). იესოს შეულებუდ, იეჰოვაშ მიმართვა თეშნერო დუმოგურესკო „ირფელიშშემალებე“, „გუმაჭყაფალ“ ვარდა „მარადიულობაშ მეფე“. თე წოდებეფ შესაფერის იჸუაფუდ, მუშენდა ბიბლია თაშ მიშინუანს ღორონთის  (დაბ. 49:25; ეს. 45:18; 1 ტიმ. 1:17). მარა იესოქ გიმირინუ ტერმინ „მუმა“, ნამუთ მანგარ ხოლოშიან ურთიერთობას ეჭარუნს.

4. სოვრეშე მიჩქნა, ნამდა იეჰოვას ოკო, დევეახლოვათ თის?

⁴ გიჭირანო, იეჰოვა მოჸოროფე მუმათ მირჩქინათ? ნამთინეშო ძნელ ინანჭაფალ რე, მუს ნიშნენს მოჸოროფე მშობელ, მუშენდა გლახა ბაღანობა უღუდ. მუ გურიშემაქექაფალ რე თიშ რჩქინა, ნამდა იეჰოვას ბოლოშა არჩქილე, მუს ბგინაფლენთ! ღორონთის ოკო, დემეახლოვან. ათეშენ თიშ სიტყვა მეჩიებნა: „დეახლოვით ღორონთის დო თინა ხოლო დეგეახლოებნა“ (იაკ. 4:8). იეჰოვას ვუჸორთ დო მოპირნა, ნამდა არძაშ უჯგუშ მუმა იჸუაფ.

5. მუჭოთ ლუკაშ 10:22-შე იძირე, მუჭო მოხვარნა იესო იეჰოვაწკუმა დაახლოებას?

⁵ იესოს შეულებ, იეჰოვაწკუმა დაახლოებას მიმეხვარან. თინა ჯგირო იჩინენს იეჰოვას დო სრულყოფილო გიმირჩქინანს მუმაშ თვისებეფს, ათეშენ თქუ: „მიდგაქ მა ბძირჷ, თიქ მუმა ხოლო ძირჷ“ (იოან. 14:9). მუჭოთ უნჩაშ ჯიმა, იესო, მოგურუანა, მუჭო გიმიფრჩქინათ მუმაშ პატიცემა დო დევემორჩილათ; თეს გეძინელ, მუ ვაკეთათ, ნამდა ვა ვოწყინუათ დო გურ გუხარათ თის. იესოშ მიწიერ ცხოვრებაქ განსაკუთრებულო ქაძირუ, მუნერ კეთილ დო მოჸოროფე რე ღორონთ (წეკითხით ლუკაშ 10:22). მორთ გუვარჩუათ მუსხირენ მაგალით.

6. ქიმიჸონით მაგალით, მუჭო ურჩქილედ იეჰოვა იესოშ ლოცვეფს.

⁶ იეჰოვა ურჩქილე მუშ სქუალეფს. დეფიფქრათ, მუჭო ურჩქილედ იეჰოვა მუშ პირველგუნაჭყეფ სქუას. იესო დედამიწას რდუნ თიმწკუმა, მუშო ოკო რაგად, იეჰოვა ურჩქილედ თიშ ლოცვეფს (ლუკ. 5:16). თინა ურჩქილედ იესოს, თიცალ მნიშვნელოვან გადაწყვეტილებეფიშ მეღებაშ დროს, მუნერით რდჷ 12 მოციქულიშ გიშაგორუა (ლუკ. 6:12, 13). იეჰოვა თიმწკუმა ხოლო ურჩქილედ იესოშ ლოცვას, მუჟამსით თის გურ აფუდ შეჭირებულ, მაგალთო, სოიშახ ნტერეფიშ ხეს გინოჩანდესკო, იესო მთელ გურით ლოცულენდჷ თი გამოცდაშ გურშენ, მუდგას მალას შეხვადუდ. იეჰოვაქ იესოშ ლოცვას უბრალოთ ვა მურჩქილუნ, ანგელოზ ხოლო  გოუტუ მუშ საჸოროფო სქუაშ გამანგარებელო (ლუკ. 22:41—44).

7. მუჭო გოგინაფუანა დუდის თიშ რჩქინა, ნამდა იეჰოვა ირჩქილე ჩქინ ლოცვეფს?

⁷ იეჰოვა ამდღა ხოლო ურჩქილე მუშ მსახურეფიშ ლოცვეფს დო პასუხენს თინეფს საჭირო დროს, დო თეშ, მუჭოთ არძაშ უჯგუშ იჸუაფ (ფსალმ. 116:1, 2). გუვარჩუათ, მუჭო იგინ თენა ართ ინდოელ დაქ. თის ბრელნერ ემოციურ სირთულეშა აფუდ გარზებელ დო თეშენ იეჰოვას მთელ გურით თხინდჷ მოხვარას. თე და ჭარუნს: «2019 წანაშ მესიშ „JW მაუწყებლობას“ გარჩიებულ რდჷ, მუჭო ოკო გავურზათ ოწუხებელს; ზუსტას თენა მოსაჭირუდ. თენა ჩქიმ ლოცვეფიშ პასუხ რდჷ».

8. მუჭო გიმირჩქინანდჷ იეჰოვა მუშ სქუაშ ჸოროფას?

⁸ იეჰოვა ჩქინ მიმართ ჸოროფა დო მზრუნველობას გიმირჩქინანს, მუჭოთ თეს იესოშ შემთხვევას ორთუდ, მუჟამსით თინა დედამიწას რთულ დავალებას ასრულენდჷ (იოან. 5:20). იეჰოვა ზრუნენდჷ იესოშ სულიერ, ემოციურ დო ფიზიკურ საჭიროებეფშე. თეს გეძინელ, დუდ ვეშუკებ, გეგმოხანტუკო, ნამდა უჸორდჷ დო იწონუანდჷ მუშ სქუას (მათ. 3:16, 17). იესოს დღას ვა უგინაფ დუდ ხვალახეთ, მუშენდა უჩქუდ, ნამდა მუშ ზეციერ მუმა ირიათო მუწკუმა რდჷ (იოან. 8:16).

9. მუ მარწმუნენა, ნამდა იეჰოვას ვუჸორთ?

⁹ იეჰოვაშ ჸოროფა, იესოცალო, არძას მაფნა გიმოცადებულ. უბრალოთ დეფიფქრათ: იეჰოვაქ მუწკუმა დუმაახლოვეს დო ქომჩეს მოჸოროფე დო გაერთიანებულ სულიერ ოჯახ, ნამდა ქიზრუნკო ჩქინ ემოციურ საჭიროებეფშე დო ვორდითკო ბედნერეფ (იოან. 6:44). თინა ირიათო მარზენა სულიერ საზრდოს რწმენაშ გამანგარებელო. თეს გეძინელ, მოხვარნა, მიღდან ირფელ, მუთ მოსაჭირნა არსებობაშო (მათ. 6:31, 32). მუჟამსით ფიფქრენთ, მუჭო ვუჸორთ იეჰოვას, თიშ მიმართ ჩქინ ჸოროფა ხოლო უმოსო ირდუ.

10. მუჭო შემლებნა მივაჸუნათ და დო ჯიმალეფიშ მიმართ იეჰოვაშ ჸოროფაშ მაგალითის?

¹⁰ იეჰოვას უჸორს ჩქინ და დო ჯიმალეფ. მარა შილებე ჩქინო ირო ვა რდას ადვილ, ბგინაფლენდათ დო გიმოფხანტუნდათ ჸოროფას სულიერ ოჯახიშ წევრეფიშ მიმართ, მუშენდა არძა შხვადოშხვა კულტურაშე ვორეთ დო შხვადოშხვა გარემოს იბრდით. ჩქი არძა ვუშვენთ შეცდომეფს, მუდგაქ შილებე გაღიზიანას ვარდა გურ გუტახას შხვეფს. თეშ უმკუჯინუო, შემლებნა ხე ქეშუნწყუათ სულიერ ოჯახის ჸოროფაშ გამანგარებას, მუდგაშო საჭირო რე, მივაჸუნათ ზეციერ მუმაშ მაგალითის, ნამდგას უჸორს ჩქინ და დო ჯიმალეფ (ეფეს. 5:1, 2; 1 იოან. 4:19). მორთ გუვარჩუათ, მუშ გურაფა შემლებნა იეჰოვაშ მაგალითშე.

11. მუჭო ოძირუ იესოქ, ნამდა იეჰოვას „მანგარო მეუღ გურშა შხვეფიშ გაჭირება“?

¹¹ იეჰოვას „მანგარო მეუღ გურშა შხვეფიშ გაჭირება“ (ლუკ. 1:78). პიროვნება, მიდგას შხვეფიშ მდგომარეობა გურშა მეუღ, წუხენს, მუჟამსით ორწყე, მუჭო იტანჯებნა თინეფ დო ოცად, ქიმეხვარას დო გურშა ეუქექუას. ხალხიშ მიმართ იესოშ დამოკიდებულებაშე იძირედ, მუჭო უჸორდჷ იეჰოვას თინეფ (იოან. 5:19). იესო „ხალხის ორწყედუნ, გურ აჭუდ თინეფიშ გურშენ, მუშენდა უჭყიშო შხურცალო საცოდალეფ დო მიკოცუმილეფ რდეს“ (მათ. 9:36). იესოს უბრალოთ გურჭუა ვა უგინაფუნ, თიქ მოქმედება ქიდიჭყჷ თე ხალხიშ მახვარებელო. თინა ლეხეფს ოსქილიდუანდჷ დო ოპირუდ, ნამდა ჭყანაშა ქიმიჸონანდჷ მანგარ ხანდაშენ ძალაგიშალიებურეფს (მათ. 11:28—30; 14:14).

12. მაგალითიშ საშვალებათ გენწყით, მუჭო შემლებნა შხვეფიშ გაჭირებაშ გურშა მეღალა.

¹² შხვეფიშ მდგომარეობა გურშა მიბღათინ, ოკო დეფიფქრათ, მუ პრობლემეფს  ხვადუნა თინეფ. მაგალთო, შილებე დას ჯამრთელობაშ სერიოზულ პრობლემა უღდას. მართალ რე, თინა თეშ გურშენ დღას ვეჩიებ, მარა ალბათ პრაქტიკულ მოხვარას დაფასენს. ქეშულებნო თის ოჯახიშ საჭიროებეფშო იზრუნას? ქეშემლებნანო, ოჭკუმალიშ კეთებას დო ჸუდეშ დონწყუალას ქიმვეხვარათ? ვარდა შილებე ჯიმაქ სამუშა მიოდინუ. შემლებნანო თის ანონიმურო ჭიჭე ფარა ქიმუჯღონათ, ნამდა ახალ სამუშაშ შიბაშახ ქელუდირთათ?

13, 14. მუჭო შემლებნა იეჰოვაცალ ხეგოფაჩილეფ ვორდათ?

¹³ იეჰოვა ხეგოფაჩილ რე (მათ. 5:45). ჩქი თის ოკო ვა ვუჯინათ, მუჟამ ფთხინა და დო ჯიმალეფ მოხვარას, ნამდა თინეფიშ გაჭირება გურშა მიბღათ. იეჰოვაცალო, ჩქინით შემლებნა თენა ვაკეთათ. მართალ რე, ჩქი ვა ფთხინთ ღორონთის, ირდღას გეშეჸონას ჩხანა, მარა თინა იშენით ორთ თეს ჩქინო. ჩხანა არძას ოტიბუანს, დო ვართ ხოლო ხვალე თინეფს, მით მარდულობას გიმოხანტუნს თეშენ. ჩქინ საჭიროებეფშო ზრუნენსინ თენა ვაძირანსო, ნამდა იეჰოვას ვუჸორთ?! ჩქი ხოლო მანგარო მიჸორა იეჰოვა თეცალ სიკეთე დო ხეგოფაჩილობაშ გურშენ!

¹⁴ ჩქინ ბრელ და დო ჯიმაქ მიაჸუნ ზეციერ მუმაშ მაგალითის დო მუშით გეგნოჭყვიდ ხეგოფაჩილობაშ გიმორჩქინა. მაგალთო, 2013 წანას ფილიპინებს გუმანადგურებელ ქარბორია ჰაიანიქ ქიგიოტირხჷ დუდის. ბრელ ჩქინ და დო ჯიმაქ მიოდინუ ჸუდე დო ქონება. მარა თინეფიშ სულიერ ოჯახიქ მთელ მსოფლიოშე ხეთეშე ქიმეხვარ თინეფს. ბრელქ ფარა ქუდოდვჷ ვარდა მონაწილება მიღჷ დიდ სამშენებლო საქმეს, მუდგაშ შედეგო აღადგინეს ვარდა დუდშე გეიაშენეს 750-შე მეტ ჸუდე ართ წანაშე ნაკლებ დროშ დინახლე! კოვიდ-19 პანდემიაშ პერიოდის მოწმეეფ ბრელს ხანდენდეს და დო ჯიმალეფიშ მახვარებელო. მუჟამსით ხეთეშე ელურეთ ჩქინ სულიერ ოჯახის, გიმიფრჩქინანთ თიშ ჸოროფას.

15, 16. მუჭოთ ლუკაშ 6:36-ის ჭარჷ, მუ მნიშვნელოვან მხარეთ შემლებნა მივაჸუნათ ზეციერ მუმაშ მაგალითის?

¹⁵ იეჰოვა რე მოჭყოლოფე დო მპატიებელ (წეკითხით ლუკაშ 6:36). ჩქი ირდღას ბგინაფლენთ ჩქინ ზეციერ მუმაშ ჭყოლოფას  (ფსალმ. 103:10—14). იესოშ მიმაჸუნალეფ არასრულყოფილეფ რენა, მარა თიქ ჭყოლოფა დო პატიება გიმირჩქინ თინეფიშ მიმართ. თიქ მზადყოფნათ შეწირ მუშ სიცოცხლე, ნამდა ჩქინ ცოდვეფიშ პატიებაქ ქიჸუკო შეიოლებერქ (1 იოან. 2:1, 2). ვა გაახლოვენანო იეჰოვა დო იესოწკუმა თინეფიშ ჭყოლოფა დო პატიება?!

¹⁶ ართიანს მთელ გურით ქუვაპატიენთ-და, ჩქინ ჸოროფა ხოლო უმოსო გემანგარებ (ეფეს. 4:32). მუშო ოკო რაგად, მინშა შილებე შხვეფიშ პატიებაქ მანგარ ძნელქ მაჸუან, ათეშენ მანგარ ხანდა რე საჭირო. ართ დას თეშ კეთებას მეხვარ „გინაჯინალ კოშკიშ“ სტატიაქ „მთელ გურით ქაპატით ართიანს“. * თე და ჭარუნს: „თე სტატიაშ გურაფაქ მიმეხვარ, შხვანერ თოლით ქუჯინკო თე საკითხის. თექ ენწყუმილ რდჷ, ნამდა მზათ რდე პატიებაშო, ვა ნიშნენს, იწონუანდე არასწორ საქციელს ვარდა აუბრალოენდე თი ზიანს, ნამდგაქ თე საქციელს მაჸუნ. პატიება სინამდვილეს ნიშნენს, ჩეთხინუე გურიშმოულა დო ვადინუე შინაგან სიმშვიდე“. მუჟამსით მთელ გურით ვაპატიენთ და დო ჯიმალეფს, ვოძირანთ, ნამდა მიჸორა თინეფ დო მეპჸუნთ ჩქინ ზეციერ მუმაშ, იეჰოვაშ, მაგალითის.

17. მუჭოთ მათეშ 5:16-შე იძირე, მუჭო შემლებნა განვადიდათ ჩქინ ზეციერ მუმა?

¹⁷ მოჸოროფე მსოფლიო ოჯახიშ წევრობა დიდ პატი რე. ჩქი მოკონა, მუთ შილებე მეტიქ ქიდიჭყას ჩქინწკუმა ართო ჩქინ ღორონთიშ თაყვანიშცემა. ათეშენ ფრთხილას ოკო ვორდათ, ნამდა დღას ვა ვაკეთათ თიცალ მუდგარენ, მუთ ხალხის გლახას ოფიქრებაფუანს იეჰოვაშ დო და დო ჯიმალეფიშ გურშენ. თეშ გინაწონს, ვოცადუთ შხვეფს ჩქინ საქციელით ქიმვეხვარათ, მიღან სახიოლო ამბე (წეკითხით მათეშ 5:16).

18. მუ ოკო ვაკეთათ, ნამდა გაბედულო იფქადაგათ?

¹⁸ მინშა შილებე ჩქინ ზეციერ მუმას ვომორჩილუთინ თიშ გურშენ, მამცირენდან ვარდა გვალო ფთხოზუდან. მუ ოკო ფქიმნათ, მუჟამსით შხვეფწკუმა ჩქინ რწმენაშ  გურშენ ჩიებაშა მოშქურნა? შემლებნა ბჯერდან, ნამდა იეჰოვა დო თიშ სქუა ქიმმეხვარებნა. იესოქ მუშ მოწაფეეფს უწუ, ნამდა ვეწუხესკო თიშ გურშენ, მუჭო იჩისკო ვარდა მუ თქუესკო, მუშენდა თიქ ენწყჷ: „თიმწკუმა ქიგეგენთ, მუ თქუათ. ხვალე თქვანით ვეჩიებდათ იჸინ, თქვან მუმაშ შურ იჩიებდას იჸი თქვან საშვალებათ“ (მათ. 10:19, 20).

19. ქიმიჸონით გაბედულო დამოწმებაშ მაგალით.

¹⁹ გუვარჩუათ რობერტიშ მაგალით. მუსხირენ ხანიშ წოხოლე, მუჟამსით თის ახალ დოჭყაფილ აფუდ ბიბლიაშ გურაფა დო ბრელ ბიბლიურ რჩქინა ვა უღუდ, სამხრეთ აფრიკაშ სამხედრო სასამართლოშ წოხოლე აჸუ გიორინალქ. თიქ გაბედულო გენწყჷ, ნამდა ოკოდ ნეიტრალურო დოსქილადა, მუშენდა უჸორს მუშ ქრისტიან ჯიმალეფ. თინა აფასენდჷ მუშ ადგილს სულიერ ოჯახის! მოსამართლექ უცებ კითხჷ: „მი რენა სქან ჯიმალეფ?“. რობერტი ველუდ თე კითხვას, მარა ხეთეშე თიმ დღაშ მუხლიქ ქუგაშინ. თენა რდჷ მათეშ 12:50: „მით ჩქიმ ზეციერ მუმაშ ნებას ასრულენს, თინა რე ჩქიმ ჯიმათ, დათ დო დიდათ!“. თიშ უმკუჯინუო, ნამდა რობერტის ახალ დოჭყაფილ აფუდ ბიბლიაშ გურაფა, იეჰოვაშ წმინდა შურქ მეხვარ, თე დო შხვა ველუდუნ ფერ კითხვეფშა ქუპასუხებუდკო. იეჰოვას ოამაყუდკონ იჸიდ რობერტიშ საქციელ! თინა ჩქინ საქციელით ხოლო ამაყენს, მუჟამსით ვონდუთ დო გაბედულო ვამოწმენთ რთულ სიტუაციეფიშ დროს.

20. მუ ოკო მაფდან გინოჭყვიდილ? (იოან. 17:11, 15)

²⁰ მორთ ვემვოტუათ თი კურთხევაშ დაფასება, ნამდა ვორეთ მოჸოროფე სულიერ ოჯახიშ წევრეფ. ჩქი პჸუნა არძაშ უჯგუშ მუმა დო ბრელ ართგურ და დო ჯიმა. თეშ გურშენ ირიათო მარდულეფ ოკო ვორდათ. სატანა დო თიშ უბადო მიმაჸუნალეფ ოცადნა, ჩქინ ზეციერ მუმაშ ჸოროფაშა ეჭვ გენშმოღალაფუან დო ეცილან ჩქინ ართობას. იესო ჩქინო ლოცულენდჷ დო მუმას თხინდჷ, ქიმმეხვარესკო, ნამდა ვა ვოდინეთკო ართობა (წეკითხით იოანეშ 17:11, 15). იეჰოვა პასუხენს თე ლოცვას. იესოცალო, მორთ დღას ვემშებღათ ეჭვ ჩქინ ზეციერ მუმაშ ჸოროფა დო ელარნაშა. გინოჭყვიდილ მაფდან, ვემვოტუათ ჩქინ სულიერ ოჯახწკუმა დაახლოება.