1. მუჭო შილებე იმოქმედას ნამთინეშა საჸოროფო ადამიანიშ გარიცხვაქ?

 დღას გარიცხებენო თქვან საჸოროფო ადამიან კრებაშე? თენა გურიშ გუმატახალ იჸუაფუდ! ართ და, სახელო ჰილდა, * იჩიებ: „41 წანაშ ქორწინებაშ უკულ ჩქიმ ართგურ ქომონჯიქ დომღურუნ, ფიფქრენდჷ, ნამდა თენა რდჷ არძაშ უარეს, მუთ შემლებუდ, დღას გიმოფცადკო, მარა, მუჟამსით ჩქიმ ქომოლსქუაქ ქიდიტუ კრება დო მუშ ჩილ დო სქუა, თენა ჩქიმო ბრელით, ბრელით უფრაშ რდჷ“.

2, 3. მუჭოთ ფსალმუნიშ 78:40, 41-შე იძირე, მუს გინაფლენს იეჰოვა, მუჟამსით მუშ მსახურ იტენს თის?

² დეფიქრით, მუჭო გუტახუნდჷ იეჰოვას გურს, მუჟამსით ნამთინე ანგელოზიქ, მით ოჯახიშ წევრ აფუდ, ოჭიშ ქურთინუ თის! (იუდ. 6). წერმიდგინით, მუ ჭუას მიორინუანდჷ იეჰოვას თიშ ძირაფა, მუჭო იდეს ბრელშა მუშ წინააღმდეგ ისრაელეფქ, მით მანგარო უჸორდჷ (წეკითხით ფსალმუნიშ 78:40, 41). დარწმუნებულ რდათ, ნამდა იეჰოვას, ჩქინ მოჸოროფე ზეციერ მუმას, გურს უჭუანს, მუჟამსით ჩქინ საჸოროფო პიროვნება იტენს თის. ღორონთის არჩქილე, მუს გინაფლენთ. თინა თქვა გაიგენა დო ქიმერჩანა საჭირო გურიშ ელაკინას დო ელარნას.

³ თე სტატიას გუვარჩიენთ, მუშ კეთება შემლებნა, ნამდა მიბღათ იეჰოვაშე მოხვარა, მუჟამსით ჩქინ საჸოროფო ადამიან იტენს ღორონთის. თის ხოლო ქობძირუნთ, მუჭო მივეხვარათ კრებას თინეფს, მით თეცალ სირთულეშ წოხოლე გერენა. მორთ დიო ქიფჩუათ, მუნერ აზროვნებას ოკო ევუჩილითუათ დუდ.

4. მუჭო გინაფლენს დუდის ბრელ მშობელ, მუჟამსით მუნეფიშ სქუა იტენს იეჰოვას?

⁴ მუჟამსით სქუა იტენს იეჰოვას, მშობლეფ ხშირას ფიქრენა, ნამდა თიქ ჭეშმარიტებას ქუდოსქიდკონ, უმოს მეტ აფდეს ოკეთებელ. ჯიმა ლუკი, ნამდგაშ ქომოლსქუაქ გერიცხჷ, იჩიებ: „ჩქიმ დუდის ვადანაშაულენდჷ. კოშმარეფ ვა მოსვანჯუანდჷ. მინშა იმნგარდჷ დო გურჭუა მიღუდ“. ელიზაბეტი ხოლო, ნამდგას თეჯგურა სიტუაცია უღუდ, ხშირას ფიქრენდჷ: „მუჭოთ დიდაქ, მუ ვაკეთ არასწორო? ალბათ, საჭირო რდუნ თეშ ვენომდვალ ჩქიმ სქუაშ გურშა იეჰოვაშ ჸოროფა“.

5. მი რე პასუხიშმგებელ, მუჟამსით პიროვნება იტენს იეჰოვას?

⁵ ვაგმოჭყორდან, იეჰოვაქ არძას ნებაშ თავისუფლებაშ ძღვინ მუჩეს. თენა ნიშნენს, ნამდა ჩქი შემლებნა გინობჭყვიდათ, დევემორჩილებუთ დო ვარ თის. ნამთინე ახალგაზრდას მშობლეფ ვარზენდეს ჯგირ მაგალითის, მარა მუნეფიშით გინოჭყვიდეს ღორონთის ემსახურესკო დო ქოთ რენა თიშ ართგურეფ. შხვეფქ, მიდგაშ მშობლეფ ირფელს ორთუდეს, ნამდა ბიბლიურ პრინციპეფით მორდესკო, დროშ მიკულაშ უკულ ოჭიშ ქურთინეს ჭეშმარიტებას. თაშ ნამდა, ჩქი პირადო ოკო გინობჭყვიდათ იეჰოვაშ მსახურება (იეს. 24:15). მშობლეფ, ნამუთ წუხენთ თიშ გურშენ, ნამდა თქვან სქუაქ მიოტუ ჭეშმარიტება, ვეფიქრათ, თენა თქვან ბრალ რენ!

6. მუჭო მოქმედენს ახალგაზრდაშა, მუჟამსით მშობელ იტენს ღორონთის?

⁶ მინშა მშობელ იტენს ჭეშმარიტებას დო ოჯახის ხოლო (ფსალმ. 27:10). თექ შილებე მანგარ ემოციურ ჭუა მიორინუას სქუალეფს, მიდგაშო მშობელ მაგალით რე. ესთერ, მიდგაშ მუმაქ გერიცხჷ, იჩიებ: „ხშირას იმნგარდჷ, მუშენდა, თინა უბრალოთ ჭეშმარიტებას ვეჩილათენ, შეგნებულო დიტუ იეჰოვა. მა მიჸორს ჩქიმ მუმა, ათეშენ, მუჟამსით თიქ გერიცხჷ, ირიათო ბნერვიანენდჷ თიშე. თეშ გურშენ პანიკურ შეტევეფ ხოლო მიღუდ“.

7. მუს გინაფლენს იეჰოვა თი ახალგაზრდეფიშ მიმართ, მიდგაშ მშობელქ გერიცხჷ?

⁷ ახალგაზრდეფ, გარიცხულ მშობელ ქორჸუნან-და, გიჩქუდან, ნამდა ჩქი მანგარო ბწუხენთ თქვანდე! რთხინთ, დარწმუნებულ რდათ, ნამდა იეჰოვას ჯგირო არჩქილე თქვან გურჭუა. თის უჸორთ დო აფასენს თქვან ართგურობას, თიწკუმა ართო ჩქი ხოლო — თქვან და დო ჯიმალეფ. თინა ხოლო რშუდან, ნამდა თქვა ვა რეთ პასუხიშმგებელ თქვან მშობელიშ გადაწყვეტილებეფშე. მუჭოთ ჟიშე მიფშინეთ, იეჰოვაქ არძას მეჩჷ არჩევანიშ უფლება. არძა მეძღვინელ დო ნათილ პიროვნებას „მუშ ოღალ გილუღ“ (გალ. 6:5).

8. მუშ კეთება შეულებნა ოჯახიშ ართგურ წევრეფს, ონდო ელნა მუნეფიშ საჸოროფო პიროვნებაშ იეჰოვაშა დორთას? (ქოძირით ჩარჩო  „დართ იეჰოვას“)

⁸ მუჟამსით თქვან საჸოროფო პიროვნება იტენს იეჰოვას, მუშო ოკო რაგად, იმენდ გიღნა, ნამდა თინა დართუ ღორონთის. მუ ოკო აკეთათ თე პერიოდის? შეილებნა თქვან სულიერ ჯამრთელობას ქიმკაჯინათ. თეშნერო ჯგირ მაგალითის ქიმეჩანთ ოჯახიშ შხვა წევრეფს დო შილებე გარიცხულს ხოლო. თეს გეძინელ, მიღენთ საჭირო ძალას, ნამდა ქუგურზათ ემოციურ ჭუას. მორთ გუვარჩუათ მუსხირენ პრაქტიკულ ნაბიჯ.

9. მუ საშვალებეფით შემლებნა იეჰოვაშე ძალაშ მეღება? (ქოძირით ჩარჩო  „ბიბლიურ მუხლეფ, ნამუთ გურშა ელაიკინანა, მუჟამსით თქვან საჸოროფო ადამიან იეჰოვას იტენს“)

⁹ მიაჸუნით ჯგირ სულიერ განრიგის. მნიშვნელოვან რე, გაგრძელათ თქვან დუდიშ დო ოჯახიშ გამანგარება. მუჭო შეილებნა თეშ კეთება? იეჰოვაშე მიღით ძალა თიშ სიტყვაშ რეგულარულო კითხირით, ნაკითხირშე ფიქრით დო ქრისტიანულ შეხვალამეფიშ დასწრებათ. ჯოანა, ნამდგაშ მუმა დო დაქ ჭეშმარიტება დიტეს, იჩიებ: „ბგინაფლენქ, მუჭო მამშვიდენს თიცალ ბიბლიურ პერსონაჟეფიშ გურშენ კითხირ, მუნერით რე აბიგაილი, ესთერი, იობი, იოსები დო იესო. თინეფიშ მაგალითეფ ჩქიმ გურს დო გონებას დადებით ფიქრეფით ეიოფშანს დო გურჭუას ემქექუანს. თეწკუმა ართო, ჩქინ ობირეშეფ ხოლო მანგარო ელამკინანს გურშა“.

10. მუჭოთ ფსალმუნიშ 32:6—8-ს ჭარჷ, მუჭო ოკო გაურზათ გურჭუას?

¹⁰ ქეჩით იეჰოვას თქვან ოწუხებელიშ გურშენ. მუჟამსით დუდის გლახათ გინაფლენთ, ვემიოტუათ ლოცვა. ქოთხით ჩქინ მოჸოროფე ღორონთის, თქვან სიტუაციას თიშ თოლით ქუჯინათ, ქიმერჩან ინონჭაფაშ უნარ დო ქიგგოწურუან შარას, ნამდგას ოკო გიაჸუნათ (წეკითხით ფსალმუნიშ 32:6—8). მუშო ოკო რაგად, შილებე ძნელ რდას, იეჰოვას ქეჩუათ, მუს გინაფლენთ სინამდვილეს. მარა თის ჯგირო არჩქილე, მუ ჭუა ალაძ თქვან გურს. იეჰოვას მანგარო უჸორთ დო ოკო, ნამდა გურ გეგნუფაჩათ თის (გამ. 34:6; ფსალმ. 62:7, 8).

11. მუჭოთ ებრაელეფიშ 12:11-შე იძირე, მუშენ ოკო ვენდათ ჸოროფათ მეღებულ იეჰოვაშ აღმზრდელობით ზომეფს? (ქოძირით ჩარჩო  „გარიცხვა ჸოროფათ მეღებულ იეჰოვაშ აღმზრდელობით ზომას ომსახურ“)

¹¹ ხუჯ ქუდუკინით უხუცესეფიშ გადაწყვეტილებას. გარიცხვა რე ართ-ართ საშვალება, მუდგათ იეჰოვა ჸოროფათ გიშასწორენს პიროვნებას. თეს ჯგირობუა მოუღ  შხვეფშა დო შემცოდველს ხოლო ოხვარ (წეკითხით ებრაელეფიშ 12:11). კრებას ნამთინექ შილებე უარყოფითო იჩუას უხუცესეფიშ მეღებულ თე გადაწყვეტილებაშენ. თინეფს, მით თეცალ ჩიებას წიმიჭყანა, უმენტაშ შემთხვევას ვაკონა შემცოდველშე თიცალ მუდგარენ თქუან, მუთ ოძირანს, ნამდა თინა დამნაშავე რე. ჩქი არძა ფაქტ ვა მიჩქუნა, ათეშენ ჭკვერულ იჸუაფ, ვენდათ უხუცესეფს, მით ირფელს ორთნა, ნამდა სამართლებრივ საქმეეფ ბიბლიურ პრინციპეფიშ მიხედვით მიდეჸონან დო გასამართლან „იეჰოვაშ სახელით“ (2 მატ. 19:6).

12. მუ ჯგირობუა მოუღ ნამთინეს თიქ, ნამდა ხუჯ ქუდუკინეს იეჰოვაშ აღმზრდელობით ზომეფს?

¹² გარიცხვაწკუმა დაკავშირებულ უხუცესეფიშ გადაწყვეტილებაშ ხუჯიშ დოკინათ, შილებე თქვან საჸოროფო ადამიანს ქიმეხვარათ იეჰოვაშა დორთას. ჟიშე მოშინაფილ ელიზაბეტი იჩიებ: „სრულწლოვან სქუაწკუმა ურთიერთობაშ მეტებაქ მანგარო გამჭირდჷ. მარა იეჰოვაშა დორთაშ უკულ თიქ თქუ, ნამდა გარიცხვა სწორ გადაწყვეტილება რდჷ დო მარდულობას გიმოხანტუნდჷ თი ირფელშე, მუთ თიშ შედეგო დიგურუ. მა ხოლო ქიდიბგურე, ნამდა იეჰოვაშ აღმზრდელობით ზომეფ ირო სწორ რე“. ელიზაბეტიშ ქომონჯ, მარკი, გეუძინანს: „ბრელ ხანიშ უკულ ჩქინ ბოშიქ მიწუ, ნამდა ჩქი ირფელ გუვაკეთით, მუთ ოკეთებელ მაფდეს დო ზუსტას ათეშენ ოკოდ დორთა. მანგარ ბედნერ ვორექ, ნამდა იეჰოვაქ მიმეხვარეს მორჩილებას“.

13. მუს შეულებ მიგეხვარან, გიორჯგინათ ემოციურ ჭუას?

¹³ ქეჩით თქვან გრძნობეფიშ გურშენ თიცალ მეგობრეფს, ნამდგას არჩქილე თქვან. ურთიერთობა გიღდან მოწიფულ ქრისტიანეფწკუმა, მიდგას შეულებ მიგეხვარან, ვადინუათ დადებით განწყობა (იგავ. 12:25; 17:17). ჯოანა, ნამუთ ჟიშე მიფშინეთ, იჩიებ: „დუდის ხვალახეთ ბგინაფლენდჷ, მარა სანდო მეგობრეფწკუმა ჩიებაქ მიმეხვარ თეშ გერჯგინას“. მუ ოკო აკეთე თიმწკუმა, მუჟამსით კრებას ნამთინე თიცალ მუდგარენს ქოიწინს, მუთ დუდის უფრაშო გოგინაფუანს?

14. მუშენ ოკო მუთვინათ დო ვაპატუათ ართიანს მთელ გურით?

¹⁴ მუთვინით თქვან და დო ჯიმალეფს. სინამდვილეს, ჩქი ვეველუთ, ნამდა არძა სწორას თქუანს ორაგადეს (იაკ. 3:2). არძა არასრულყოფილეფ ვორეთ, ათეშენ ოკო ვამკვენდან, მუჟამსით თიცალ მუდგარენს ქომწინა, მუთ გურს მიწყუნუანა. რშუდან პავლე მოციქულიშ სიტყვეფ: „მუთვინით დო მთელ გურით ქაპატით ართიანს თიმწკუმა ხოლო, მუჟამსით მიდგაინიშ მიმართ ჩიულიშ მიზეზ გიღნა“ (კოლ. 3:13). ართ და, ნამდგაშ ოჯახიშ წევრ გარიცხულ რდჷ, ენწყუნს: „იეჰოვაქ მიმეხვარ, ქუვაპატიკო თინეფს, მით ჯგირ საქმეშ კეთებას ოცადუდეს, მარა უმოსო მიწყუნუანდეს გურს“. მუშ კეთება შეულებ კრებას, ნამდა ქიმეხვარას ოჯახიშ ართგურ წევრეფს?

15. მუქ შილებე მეხვარას თინეფს, მიდგაშ საჸოროფო ადამიანქ ამარდე გერიცხჷ?

¹⁵ რდათ კეთილეფ დო მეგობრულეფ გარიცხულიშ ოჯახიშ ართგურ წევრეფიშ მიმართ. ართ და, სახელო მირიამი, იშინანს, ნამდა მუშ ჯიმაშ გარიცხვაშ უკულ კრებაშა ულას მანგარო გენიცადენდჷ. თინა  იჩიებ: „მოშქურუდ თიშა, მუს მიწინდეს კრებას. მარა თექ რდეს ძვირფას მეგობრეფ, ნამდგაქ ჩქიმ მდგომარეობაშა მიშელეს დო თენა თეშ აკეთეს, ნამდა უარყოფით გრძნობეფ ვეგმუხანტნა ჩქიმ გარიცხულ ჯიმაშ მიმართ. თინეფიშ ჭყოლოფათ ჩქიმ ოწუხებელწკუმა ხვალე ვა დოფსქილადექ“. ხოლო ართ და იშინანს: „ჩქინ სქუაშ გარიცხვაშ უკულ, მეგობრეფქ გურიშელაკინშა ქუმორთეს. ნამთინე მირაგადუდ, ნამდა ვა უჩქუდ, მუ მიწუკო. თინეფ ჩქიმწკუმა ართო ინგარდეს ვარდა წერილეფს ბჭარუნდეს. თინეფიშ მოქმედებაქ მანგარო მიმეხვარ!“.

16. მუჭო შეულებ კრებას ვემიოტუას გარიცხულიშ ოჯახიშ წევრეფიშ ელარნა?

¹⁶ ვემიოტუათ გარიცხულიშ ოჯახიშ ართგურ წევრეფიშ ელარნა. თინეფს არძაშ უმოსო ასე ოსაჭირნა თქვან ჸოროფა დო გურიშელაკინა (ებრ. 10:24, 25). მინშა გარიცხულიშ ოჯახიშ წევრეფ ხოლო შილებე დუდის თეშ გინაფლენდან, ნამდა კრებას ნამთინე მუნეფს ხოლო გარიცხულცალო ოქცუ. ქეცადით თექ ვა მოხვადას! თი ახალგაზრდეფს, მიდგაშ მშობლეფქ ჭეშმარიტება ქიდიტუეს, განსაკუთრებულო ოსაჭირნა ცქვაფა დო გურიშელაკინა. მარია, ნამდგაშ ქომონჯიქ გერიცხჷ დო ოჯახ ხოლო ქიდიტუ, იჩიებ: „ჩქიმ მეგობრეფშე ნამთინე მიშჷ ჩქიმ ჸუდეშა, მოხვარუდ ოჭკუმალიშ კეთებას დო ოჯახურ თაყვანიშცემაშ ჩატარებას. თინეფს გურიშ ხოლოშა მეუღდეს ჩქიმ ჭუა დო ჩქიმწკუმა ართო ინგარდეს; მიცვენდეს, მუჟამსით შხვეფ ტყურეფს ავრცელენდეს ჩქიმ გურშენ. თე მეგობრეფქ მანგარო ემქექუეს გურშა“ (რომ. 12:13, 15).

17. მუშ კეთება შეულებნა უხუცესეფს, ნამდა გურშა ეუქექუან გარიცხულიშ ოჯახიშ წევრეფს?

¹⁷ უხუცესეფ, გამანგარათ გარიცხულიშ ოჯახიშ ართგურ წევრეფ. თქვა გიღნა განსაკუთრებულ პასუხიშმგებლობა, გურშა ეუქექუათ თი თანაქრისტიანეფს, მიდგაშ საჸოროფო ადამიანეფქ იეჰოვა ქიდიტუეს (1 თეს. 5:14). ინიციატივა გეგმირჩქინით, ნამდა კრებაშ დოჭყაფაშახ დო თებაშ უკულ გურშა ელუკინათ თინეფს. ქიძირეთ დო ქილოცით თინეფწკუმა ართო. ქიმსახურით თე და დო ჯიმალეფწკუმა ვარდა ქუდაპატიჟით თქვან ოჯახურ თაყვანიშცემაშა. სულიერ ჭყიშეფქ იეჰოვაშ დამწუხრებულ შხურს ოკო ქაძირუან, ნამდა მიშულა თინეფიშ  მდგომარეობაშა, უჸორა დო გიმირჩქინანა საჭირო ყურადღებას (1 თეს. 2:7, 8).

18. მუჭოთ 2 პეტრეშ 3:9-შე იძირე, მუ ოკო ღორონთის შემცოდველწკუმა დაკავშირებით?

¹⁸ იეჰოვას „ვაკო, მითინქ დოღურას; თის ოკო, არძაქ მინანუას“ (წეკითხით 2 პეტრეშ 3:9). მართალ რე, პიროვნებაქ შილებე სერიოზულო შეცოდას, მარა იეჰოვაშო თიშ სიცოცხლე იშენით ძვირფას რე. დეფიქრით თი დიდ საფასურშე — საჸოროფო სქუაშ სიცოცხლეშე — ნამუთ იეჰოვაქ გინიგ ცოდვილეფიშ გიშაჸიდირალო. იეჰოვა ჸოროფათ ოცად, ქიმეხვარას თეცალეფს, დართან მუს. თის იმენდ უღჷ, ნამდა თინეფ თაშ ქიმიქციებნა, მუჭოთ თეს დინაფილ სქუაშ გურშენ იესოშ იგავშე ვორწყეთ (ლუკ. 15:11—32). ბრელქ, მიდგაქ ჭეშმარიტება დიტუ, უმოს გვიანო დირთჷ მუშ ზეციერ მუმაშა. კრებაქ თინეფ ხიოლით მიღჷ. ჟიშე მოშინაფილ ელიზაბეტიქ გიმოცად თი დიდ ხიოლ, ნამუთ ოჯახიშ წევრიშ იეჰოვაშა დორთას მოჸუნს. ულირს იშინანსინ, თინა იჩიებ: „მანგარო ვაფასენქ თინეფს, მით ელამჩანდეს, ვამდინუაფდესკო იმენდ“.

19. მუშენ შემლებნა ირიათო ვენდათ იეჰოვას?

¹⁹ ჩქი შემლებნა ირიათო ვენდათ იეჰოვას. თინა დღას ვამჩანა საზიანო მითითებას. ჩქინ ღორონთ ხეგოფაჩილ მუმა რე დო მიშურს შხვეფიშ მდგომარეობაშა. თის მანგარო უჸორს მუშ მოჸოროფე მსახურეფ. დარწმუნებულ რდათ, იეჰოვა ვემგოტენა, მუჟამსით იტანჯებუთ (ებრ. 13:5, 6). მარკი იჩიებ: „იეჰოვას დღას ვემუტებუთ. თინა ირიათო ჩქინწკუმა რდჷ, მუჟამსით მიჭირდეს“. იეჰოვა ვემიოტენს ჩქინდა თი ძალაშ მოჩამას, ნამუთ „ჩვეულებრივშე უმოს რე“ (2 კორ. 4:7). თაშ რე, თქვა შეილებნა ვადინუათ ართგურობა დო იმენდ, მუჟამსით თქვან საჸოროფო ადამიან იტენს იეჰოვას.