1. მუშენ რე ხალხ აბორჯებულ?

ამდღა ბრელ რელიგიას მუშ დუდშა ქრისტიან უჯოხო დო აცხადენს, ნამდა ღორონთის თიშ მოსაწონო ცენს თაყვანს. ათეშენ ხალხ აბორჯებულ რე! თინეფს ოინტერესნა, „ხვალე ართ რელიგია რენო ჭეშმარიტ დოვარ არძა მოწონს ღორონთის?“ მტკიცაშე ქუვორეთო დარწმუნებულ, ნამდა მუდგას ბგურაფლენთ, ჭეშმარიტება რე დო თაყვანიშცემაშ მაგალით, მუდგას იეჰოვაშ მოწმეეფ მეჸუნა, მისაღებ რე ღორონთშო? ქორენო შეიოლებერ, თეცალ საკითხეფს დარწმუნებულ ვორდათ? მორთ გუვარჩუათ მტკიცებულებეფ.

2. მუშენ რდჷ პავლე დარწმუნებულ ჭეშმარიტებას? (1 თეს. 1:5)

² მოციქულ პავლე მტკიცაშე რდჷ დარწმუნებულ ჭეშმარიტებას (წეკითხით 1 თესალონიკელეფიშ 1:5). მარა თენა ემოციეფშა ვა რდჷ გერსხილ. პავლე გურგედვალირო გურაფლენდჷ ღორონთიშ სიტყვას. თის ჯერდჷ, ნამდა „მთელ წმინდა წერილ ღორონთშე რე შთაგონებულ“ (2 ტიმ. 3:16). მუ გეგჷ თიქ ბიბლიაშ გურაფაშ დროს? წმინდა წერილეფს პავლექ ძირჷ მტკიცებულებეფ, ნამდა იესო რდჷ დუნაპირებ მესია, თე მტკიცებულებეფს იუდეველ რელიგიურ ლიდერეფქ ყურადღება ვემიაქცუეს. თინეფ აცხადენდეს, ნამდა ხალხის ღორონთის ოჩინებაფუანდეს, მარა თიცალ საქმეეფს ორთუდეს, მუთ ღორონთის ჯოგუდ (ტიტ. 1:16). პავლე ვა გუდჷ თე რელიგიურ ლიდერეფს. თის ვეგშუგორ, მუს ირწმუნენდჷ ღორონთიშ სიტყვაშე. თეშ მანგიორო, მზათ რდჷ, დაგურუკო „ღორონთიშ არძა განზრახვაშ გურშენ“ დო მიაჸუნკო თინეფს (საქ. 20:27).

3. ჩქინ არძა კითხვაშე ოკო მიბღათო პასუხ, ნამდა დებრწმუნათ, ჭეშმარიტებას ქიმვოგორეთ? (ქოძირით ჩარჩო  „იეჰოვაშ საქმეეფ დო განზრახვეფ ვეკოროცხე“)

³ ნამთინე ფიქრენს, ნამდა ჭეშმარიტ რელიგიას ოკო  შეიალებუას არძა კითხვაშა პასუხიშ მეჩამაქ, თიცალ კითხვეფშა ხოლო, ნამდგაშ პასუხ ბიბლიას ვა რე მოჩამილ. ქორენო თენა შეიოლებერ? დეფიფქრათ პავლეშ მაგალითშე. თიქ ელუჩ თანამორწმუნეეფს: „ირფელ შეამოწმით“, მარა თინა ხოლო გეუძინ, ნამდა ბრელ მუდგარენ ვარჩქილედ (1 თეს. 5:21). თიქ ჭარჷ: „ასე ონდეთ ვორწყეთ, ითამ ლითონიშ სარკეს ინვოჯინედათ . . . ასე ნაწილობრივ რჩქინა მიღჷ“ (1 კორ. 13:9, 12). ჩქინცალო პავლეს ხოლო ბრელ მუდგარენ ვარჩქილედ, მარა ინანჭუდ ძირითად ჭეშმარიტებას იეჰოვაშ გურშენ. თე რჩქინა დასაბაღ რდჷ თიშა დარწმუნებელო, ნამდა ჭეშმარიტებას ქიმიოგორუ!

4. მუ დუმარწმუნენა, ნამდა ჭეშმარიტებას ქიმვოგორეთ დო მუს გუვარჩიენთ ჭეშმარიტ ქრისტიანეფიშ გურშენ?

⁴ ართ-ართ საშვალება, მუთ დუმარწმუნენა, ნამდა ჭეშმარიტებას ქიმვოგორეთ, რე იესოშ დოტებულ თაყვანიშცემაშ მაგალითიშ დო იეჰოვაშ მოწმეეფიშ საქციელიშ შედარება. თე სტატიას ჩქი ქობძირუნთ, ნამდა ჭეშმარიტ ქრისტიანეფ 1) ვარიას იჩიებნა კერპეფიშ თაყვანიშცემაშე, 2) განადიდენა იეჰოვაშ სახელს, 3) უჸორა ჭეშმარიტება დო 4) მთელ გურით უჸორა ართიან.

5. მუს ბგურაფლენთ იესოშე ღორონთიშ თაყვანიშცემაშ გურშენ დო მუჭო შემლებნა გიმიბრინუათ თინა, მუდგას იესო ოგურუანდჷ?

⁵ იესოს ჸოროფა აღძრენდჷ, ხვალე იეჰოვაშა უცემუდკო თაყვან ქოთ ზეცას დო ქოთ დედამიწას (ლუკ. 4:8). თიქ მუშ მოწაფეეფს ხოლო თენა დაგურუ. იესო დო ართგურ მოწაფეეფ გამოსახულებეფს ვერინუანდეს თაყვანიშცემაშო. ღორონთის სულიერ სხეულ უღჷ, ათეშენ მითინს ვაკეთებე თიცალ გამოსახულება, მუთ თის მოგენს (ეს. 46:5). მარა მუშ რაგად შილებე „წმინდანეფიშ“ გამოსახულებეფშენ დო თინეფიშ მიმართ ლოცვაშენ? ვით მცნებაშე მაჟია იჩიებ: „ვეკეთა ქანდაკება დო ვართ მუთუნ თიჯგურა, მუთ ჟი რე ცას, მუთ თუდო რე დიხას . . . თაყვან ვაცა თინეფს“ (გამ. 20:4, 5). თე სიტყვეფ არგამა რე თინეფშო, მიდგას გინოჭყვიდილ აფჷ ღორონთის მოსაწონო ცხოვრება.

6. თაყვანიშცემაშ ნამ მაგალითის მეჸუნა ამდღა იეჰოვაშ მოწმეეფ?

 ⁶ ისტორიკოსეფ იჩიებნა, ნამდა პირველ ქრისტიანეფ ხვალე ღორონთის ცენდეს თაყვანს. მაგალთო, წიგნის „ქრისტიანულ ეკლესიაშ ისტორია“ ენოჭარ, ნამდა პირველ ქრისტიანეფს თიშა ხოლო „ოშქურდეს“, გამოსახულება უღდესკო თაყვანიშცემაშ ადგილეფს. ამდღა იეჰოვაშ მოწმეეფ მეჸუნა პირველ საუკუნეშ ქრისტიანეფიშ მაგალითის. ჩქი ვა ბლოცულენთ „წმინდანეფიშ“ გამოსახულებეფიშ წოხოლე დო ვართ ანგელოზეფს დო იესოს ვეჩიებუთ ლოცვათ. თეს გეძინელ, თიცალ საქმეეფს ხოლო ვა ვორთუთ, მუდგათ შილებე სახელმწიფო სიმბოლოეფიშ თაყვანიშცემაქ გეგშამრთან. მუდგაქ ვა მოხვადასინ, გინოჭყვიდილ მაფნა, დევემორჩილათ იესოშ სიტყვეფს: „იეჰოვას, სქან ღორონთის ქოცჷ თაყვან“ (მათ. 4:10).

7. მუ არგამა განსხვავებეფ რე იეჰოვაშ მოწმეეფ დო შხვა რელიგიეფ შქას?

⁷ ამდღა ბრელს თიცალ რელიგიურ ლიდერეფ მოწონს, მიდგას ირკოჩ იჩინენს. თე მოწონება ნამთინე შემთხვევას თინეფიშ თაყვანიშცემაშა გინალენა. ხალხ გილურს თინეფიშ ეკლესიეფშა, ჸიდულენს თინეფიშ წიგნეფს დო ბრელ ფარას წირენს, ნამდა ხუჯ ქუდუკინას. თე ხალხის თეცალ ლიდერეფიშ არძა სიტყვაშ ჯერს დო თინეფიშ ძირაფა თეშ ოხიოლ, მუჭოთ იესოშ ძირაფა ახიოლედ! თეშ გინაწონს, იეჰოვაშ ჭეშმარიტ თაყვანიშმცემელეფ ადამიანიშ მიმაჸუნალეფ ვა რენა. მართალ რე, ჩქი პატიცემას გიმიფრჩქინანთ ხემძღვანელ ჯიმალეფიშ მიმართ, მარა მეპჸუნთ იესოშ არგამა მითითებას: „თქვა არძა ჯიმალეფ რეთ“ (მათ. 23:8—10). ჩქი თაყვანს ვა ფცენთ ადამიანეფს რელიგიურ ლიდერეფ იჸინანო დოვარ პოლიტიკურ. თეწკუმა ართო ხუჯის ვა ვუკინენთ თინეფიშ საქმიანობას, იფცვენთ ნეიტრალიტეტის დო გიშართილ ვორეთ თე ქვეყნიერებაშე. თეშნერო, ვა ბგუთ შხვა რელიგიურ ჯგუფეფს, მით იჩიებნა, ნამდა ქრისტიანეფ რენა (იოან. 18:36).

8. სოვრეშე მიჩქნა, ნამდა იეჰოვას ოკო, მუშ სახელ განდიდებულ რდას დო ირკოჩის უჩქუდას?

⁸ ართშა იესოქ ლოცვაშ დროს თეცალ სიტყვეფ უწუ იეჰოვას: „მუმა, განადიდ სქან სახელ!“. იეჰოვაქ თიშ ლოცვას ზეცაშე ხონარმაღალო უპასუხ დო პირობა მეჩჷ, ნამდა თეს გაკეთენდჷ (იოან. 12:28). მუშ მსახურებათ იესოქ ხოლო განადიდ მუმაშ სახელ (იოან. 17:26). ათეშენ, ჭეშმარიტ ქრისტიანეფს ოკო ოამაყდან ღორონთიშ სახელიშ გიმორნაფა დო თიშ შხვეფშა გოჩინებაფა.

9. მუჭო დამტკიცეს პირველ საუკუნეშ ქრისტიანეფქ, ნამდა განადიდენდეს ღორონთიშ სახელს?

⁹ ახ. წ. პირველ საუკუნეს, თიშ უკულ ხეთეშე, მუთ ქრისტიანულ კრებაქ ჩემეყალიბ, „ქუმკაჯინ ღორონთიქ პირველო უცხოტომელეფს დო . . . გიშაგორ თინეფშე ხალხ, ნამდა მუშ სახელ ჯოხოდესკო“ (საქ. 15:14). თე ქრისტიანეფს ოამაყდეს ღორონთიშ სახელიშ გიმორნაფა დო თიშ შხვეფშა გოჩინებაფა. თინეფ ღორონთიშ სახელს ირინუანდეს ქოთ მსახურებას დო ქოთ მუნეფიშ წერილეფს. * თეშნერო დამტკიცეს, ნამდა ღორონთიშ სახელ ჯოხოდესკონ, თიშო რდეს გიშაგორილეფ (საქ. 2:14, 21).

10. მუ ამტკიცენს, ნამდა იეჰოვაშ მოწმეეფ ღორონთიშ სახელ ჯოხოდანინ, თიშო რენა გიშაგორილ?

¹⁰ ქორენანო იეჰოვაშ მოწმეეფ თიშო „გიშაგორილ“, ნამდა ღორონთიშ სახელ  ჯოხოდან? მორთ გუვარჩუათ თეშ მტკიცებულება. რელიგიურ ლიდერეფქ მუთ შეულებდესინ ირფელ გაკეთეს, ნამდა დოფულესკო ღორონთიშ სახელ. თინეფქ გეგშეღეს თინა მუნეფიშ ნათარგმნა ბიბლიეფშე დო ნამთინექ თიშ გიმორნაფა რელიგიურ მსახურებაშ დროს ხოლო აკრძალ. * არგამა რე, ნამდა ხვალე იეჰოვაშ მოწმეეფ გიმირჩქინანა ღორონთიშ სახელიშ მიმართ თიცალ პატიცემას, მუნერსით თინა იმსახურენს. ჩქი ღორონთიშ სახელს მუთ შილებე მეტ ადამიანს ვოგებაფუანთ, მუდგას ჩქინცალო ნამთინ რელიგიურ ჯგუფ ვართ! თეშნერო, მუთ შემლებნან ირფელს ვორთუთ, ნამდა თეშ იფცხოვრათ, მუჭოთ ჩქინ სახელს, იეჰოვაშ მოწმეეფს, მეურე (ეს. 43:10—12). ჩქი „წმინდა წერილეფიშ ახალ ქვეყნიერებაშ თარგმანიშ“ 240 მილიონშე მეტ ეგზემპლარ მაფნა გიშაშქუმალირ, ნამუთ იეჰოვაშ სახელს არძა თი ადგილს ირინუანს, სოდეთ შხვა მათარგმნალეფქ გეშეღეს. თეს გეძინელ, ჩქი გიშვაშქვანთ ბიბლიაშა გერსხილ პუბლიკაციეფს, სოდეთ იეჰოვაშ სახელ 1 000-შე მეტ ნინაშა გიმირინუაფ!

11. მუჭო გიმირჩქინეს პირველ ქრისტიანეფქ ჭეშმარიტებაშ ჸოროფა?

¹¹ იესოს უჸორდჷ ჭეშმარიტება ღორონთიშ დო თიშ განზრახვეფიშ გურშენ. თეწკუმა ართო, თინა ჭეშმარიტებაშ თანახმას ცხოვრენდჷ, ნამუთ ირკოჩის გაჩინებაფუ (იოან. 18:37). იესოშ ნამდვილ მიმაჸუნალეფს ხოლო მანგარო უჸორდეს ჭეშმარიტება (იოან. 4:23, 24). მოციქულ  პეტრექ ქრისტიანობა მიშინუ, მუჭოთ „ჭეშმარიტებაშ შარა“ (2 პეტ. 2:2). პირველ ქრისტიანეფს ჭეშმარიტებაშ ძალიერ ჸოროფა უღდეს, ათეშენ თინეფ ვათანხმუდეს თიცალ რელიგიურ აზრეფს, ტრადიციეფს დო პირად შეხედულებეფს, ნამუთ ოწინააღმდეგუდ ჭეშმარიტებას (კოლ. 2:8). თეშნერო, ამდღა ხოლო ნამდვილ ქრისტიანეფ ირნერო ოცადნა, „ჭეშმარიტებაშ შარათ“ გილართან; თინეფ მუნეფიშ რწმენას დო ცხოვრებაშ წესის იეჰოვაშ სიტყვაშა გიორსხუანა (3 იოან. 3, 4).

12. მუს ორთჷ ხემძღვანელ საბჭო, მუჟამსით მეხვადუ, ნამდა მუდგარენ საკითხიშ გაგება ოთირალ მაფნა დო მუშენ?

¹² ღორონთიშ ხალხ ვეჩიებ, ნამდა ჭეშმარიტებაშ სრულყოფილ რჩქინა უღჷ. მინშა თინეფ ჩირთუნა ბიბლიურ გურაფეფიშ ენწყუმაშ დო კრებაშ ხემძღვანელობაშ საკითხეფს. მარა თექ ოკო ვა გამკვირდან. წმინდა წერილეფ არგამათ იჩიებ, ნამდა ზუსტ რჩქინა დროშ მიკულაწკუმა ართო ირდუ (კოლ. 1:9, 10). იეჰოვა ჭეშმარიტებას ჭიჭე-ჭიჭეთ აარგამენს დო მზათ ოკო ვორდათ, მოთვინებათ ქუჯინათ ჭეშმარიტებაშ სინთეშ უმოსო გოსინთაფას (იგავ. 4:18). მუჟამსით ხემძღვანელ საბჭო მეხვადუ, ნამდა მუდგარენ საკითხიშ გაგება ოთირალ მაფნა, თეს ხეთეშე ორთჷ. ამდღა ეკლესიეფ, მიდგას დუდ ქრისტიანო მეუღნა, გურაფეფს თიშენ თირანა, ნამდა ქასიამოვნან მუნეფიშ მიმაჸუნალეფს ვარდა უმოსო ქუმუხუჯუან ქვეყნიერებაშ ნორმეფს. თეშ გინაწონს, იეჰოვაშ მოწმეეფ მუდგარენეფს თიშენ ფთირანთ, ნამდა უმოსო დევეახლოვათ ღორონთის დო მივაჸუნათ იესოშ დოტებულ თაყვანიშცემაშ ნიმუშის (იაკ. 4:4). ჩქინ ცვლილებეფიშ საფუძველ თანამედროვე აზროვნება ვარდა ადამიანეფიშ დამოკიდებულებეფიშ თირუა ვარინ, წმინდა წერილეფიშ უჯგუშო ენონჭაფა რე. ჩქი მიჸორა ჭეშმარიტება! (1 თეს. 2:3, 4).

13. მუ რე არძაშ უმოს მნიშვნელოვან თვისება, მუთ ჭეშმარიტ ქრისტიანეფქ გიმირჩქინეს დო ამდღა მუჭო გიმირჩქინანა თის იეჰოვაშ მოწმეეფ?

¹³ თი ჯგირ თვისებეფშე, მუთ პირველ საუკუნეშ ქრისტიანეფს უღდეს, არძაშ უმოს მნიშვნელოვან ჸოროფა რდჷ. იესოქ თქუ: „ჩქიმ მოწაფეეფ რეთინ, თით გეგენა, ნამდა ართიან შქას ჸოროფა გაღვენუნა.“ (იოან. 13:34, 35). ამდღა იეჰოვაშ მოწმეეფ მთელ მსოფლიოს ხარენა ნამდვილ ჸოროფათ დო ართობათ. შხვა რელიგიეფშე განსხვავებით, ჩქი მტკიცაშე გაერთიანებულ საჯიმალო მიღნა თიშ უმკუჯინუო, ნამდა შხვადოშხვა ქიანაშე დო კულტურაშე ვორეთ. ჩქინ კრებეფს დო კონგრესეფს ნამდვილ ჸოროფაშ მტკიცებულებას ვორწყეთ, მუთ უმოსო მარწმუნენა, ნამდა ჩქინ თაყვანიშცემაშ ფორმა იეჰოვაშო მოსაწონ რე.

14. მუჭოთ კოლოსელეფიშ 3:12—14-ის ჭარჷ, მუ რე ართ-ართ მნიშვნელოვან საშვალება, მუდგათ შემლებნა გიმიფრჩქინათ ჸოროფა?

¹⁴ წმინდა წერილეფ ელამჩანა: „მთელ გურით გიჸორდან ართიან“ (1 პეტ. 4:8). თეცალ ჸოროფაშ გიმორჩქინაშ ართ-ართ საშვალება რე, ქუვაპატუათ ართიანს დო მიფთვინათ ართიანიშ არასრულყოფილება. თეს გეძინელ, ჩქი ბგორუნთ შესაძლებლობეფს, ნამდა გურხვეობა დო სტუმარიშ ჸოროფა კრებას არძაშ მიმართ გეგმიფრჩქინათ, თინეფიშ მიმართ ხოლო, მიდგაქ შილებე მოწყინებაფეს (წეკითხით კოლოსელეფიშ 3:12—14). თეცალ ძალიერ ჸოროფა რე თიშ მთავარ ნიშან, ნამდა ჭეშმარიტ ქრისტიანეფ ვორეთ.

15. ხოლო მუ მხარეეფით მეპჸუნთ პირველ საუკუნეშ ქრისტიანეფიშ დოტებულ თაყვანიშცემაშ ნიმუშის?

¹⁵ ჩქი პირველ საუკუნეშ ქრისტიანეფიშ დოტებულ თაყვანიშცემაშ ნიმუშის შხვანერო ხოლო მეპჸუნთ. მაგალთო, ჩქინ ორგანიზაციულ სტრუქტურა, მუდგაშა  მიშურს გილმალ ზედამხედველეფ, უხუცესეფ დო მომსახურეეფ, თეშ რე გენწყილ, მუჭოთ თენა პირველ საუკუნეს, მოციქულეფიშ დროს (ფილ. 1:1; ტიტ. 1:5). ჩქინ შეხედულება სექს დო ქორწინებაწკუმა დაკავშირებით, დამოკიდებულება ზისხირიშ სიწმინდეშ მიმართ დო სურვილ, ნამდა დოფთხილუათ კრება მოუნანიებელ შემცოდველშე, გერსხილ რე პირველ საუკუნეშ ქრისტიანეფიშ დოტებულ ნიმუშშა (საქ. 15:28, 29; 1 კორ. 5:11—13; 6:9, 10; ებრ. 13:4).

16. მუს ბგურაფლენთ ეფესოელეფიშ 4:4—6-ის ენოჭარილ სიტყვეფშე?

¹⁶ იესოქ თქუ, ნამდა ბრელ აცხადენდკონ იჸიდ დუდის თიშ მოწაფეთ, მარა არძა ვეჸიდ გულწრფელ (მათ. 7:21—23). თეს გეძინელ, წმინდა წერილეფქ თიშენ ხოლო გუმაფრთხილეს, ნამდა ბოლო დროს ბრელ ხვალე გარეგნულო იჸუაფუდ ღორონთიშმოშიშ (2 ტიმ. 3:1, 5). მარა ბიბლია არგამათ იჩიებ, ნამდა „ართ რე რწმენა“, ნამდგას ღორონთ იწონუანს (წეკითხით ეფესოელეფიშ 4:4—6).

17. მი მეჸუნს ამდღა იესოს დო მის უღჷ ნამდვილ რწმენა?

¹⁷ მის უღჷ ამდღა ნამდვილ რწმენა? ჩქი ქობძირით თეშ მტკიცებულება. გუვარჩით თაყვანიშცემაშ ნიმუშ, ნამდგაშ გურშენ იესო ოგურუანდჷ დო მუდგაშ მაგალით პირველ საუკუნეშ ქრისტიანეფქ დომტუეს. ათეშენ არგამათ შემლებნა ფთქუათ, ნამდა ამდღა ნამდვილ რწმენა იეჰოვაშ მოწმეეფს უღნა. მუშმადიდა პატი რე, ვორდათ ღორონთიშ ხალხ შქას დო მიჩქუდან ჭეშმარიტება იეჰოვაშ დო თიშ განზრახვეფიშ გურშენ! მორთ ირიათო უმოსო დო უმოსო დებრწმუნათ ჭეშმარიტებაშა!