1, 2. მუ განსხვავება რდჷ ახაბი დო მენაშეშ შქას დო მუ კითხვეფს გუვარჩიენთ?

მორთ გუვარჩუათ ჯვეშო მახორუ ჟირ მეფეშ შემთხვევა. ართ მეფე ისრაელიშ ვითტომიან სამეფოს მართუნდჷ, მაჟია — იუდაშ ჟირტომიან სამეფოს. მართალ რე, თინეფ შხვადოშხვა დროს ცხოვრენდეს, მარა ბრელ საერთო უღდეს. თე მეფეეფქ იეჰოვაშ წინააღმდეგ მიდართეს დო თიშ ხალხ გლახა საქმეეფშა გეიჸუნუეს, თეს გეძინელ, კერპთაყვანიშმცემელეფ დო მაჸვილარეფ რდეს. მარა თინეფ შქას განსხვავება ხოლო რდჷ. ართიქ ცხოვრებაშ ბოლოშახ ვემიოტუ უბადობაშ კეთება, მარა მაჟიაქ მინანუ დო იეჰოვაქ ქაპატუ მუშ ნაკეთებ საქმეეფ. მი რდეს თინეფ?

² თინეფ რდეს ისრაელიშ მეფე ახაბი დო იუდაშ მეფე მენაშე. თე ჟირ პიროვნებაშ შქას განსხვავებას შეულებ ბრელ მუდგარენ დუმოგურუან მნიშვნელოვან საკითხიშ, მონანიებაშ, გურშენ (საქ. 17:30; რომ. 3:23). მუ რე მონანიება დო სოვრეშე იძირე, ნამდა პიროვნება დასურო ინანიენს? თეშ რჩქინა მნიშვნელოვან რე, მუშენდა მოკონა, იეჰოვაქ მაპატუან, მუჟამსით ფცოდენთ. თე კითხვეფშე პასუხ მიბღათინ, გუვარჩუათ თე ჟირ მეფეშ ცხოვრება დო ქობძირათ, მუშ გურაფა შემლებნა თინეფიშ მაგალითეფშე. ბოლოს გუვარჩიენთ, მუს ოგურუანდჷ იესო ადამიანეფს მონანიებაშ გურშენ.

3. მუნერ მეფე რდჷ ახაბი?

³ ახაბი ისრაელიშ ვითტომიან სამეფოშ მაშქვითა მეფე რდჷ. თიქ დექორწინ იზებელშა, ნამუთ მდიდარ ქიანაშ, სიდონიშ, მეფეშ ოსურსქუა რდჷ. თე ქორწინებაქ ისრაელეფს შილებე სიმდიდრე მოუღ, მარა იეჰოვაწკუმა გილულუ ურთიერთობა. იზებელი ბაალიშ თაყვანიშმცემელ რდჷ დო  თიქ ახაბი ხოლო გეიჸუნუ, ნამდა ხუჯ ქუდუკინკო თე საზიზღარ რელიგიას, ნამდგაშა მიშეშ გარყვნილება ტაძარს დო ბაღანეფიშ შეწირუა. იზებელიშ დედოფლობაშ პერიოდის იეჰოვაშ არძა წინასწარმეტყველიშ სიცოცხლე საფრთხეშ თუდო გერდჷ (1 მეფ. 18:13). ახაბი „არძა მუშ წოხლეიან მეფეშე უფრაშო იქციებუდ . . . იეჰოვაშ თოლს“ (1 მეფ. 16:30). ახაბიშ დო იზებელიშ უბადო საქმეეფშენ ღორონთის თოლ ვა უწკურ, თინა ირფელს ორწყედ. იეჰოვაქ ჭყოლოფა გეგმირჩქინ დო გოუტუ წინასწარმეტყველ ელია, მუშ ხალხიშ გაფრთხილებშა, ნამდა დითირესკო, სოიშახ თენა მანგარ გვიან ვეჸუაფუდ. მარა ახაბი დო იზებელქ ვა მურჩქილუეს თის.

4. მუ განაჩენ გიშუღ იეჰოვაქ ახაბის დო მუ რეაქცია უღუდ თის?

⁴ იეჰოვაქ გეგნოჭყვიდ, მეტ ვემითვინკო. თიქ ახაბი დო იზებელს ელიაშ პიჯით გეგნოჩ განაჩენ, ნამდა მთელ თინეფიშ საგვარეულო ხაზ გეშაჭყორდუდ. ელიაშ ცნობაქ ახაბი მანგარო დამწუხრჷ. მართალო გასაკვირ რე, ნამდა თე ამაყ კოჩიქ „დუდ დემდაბალ“ (1 მეფ. 21:19—29).

5, 6. სოვრეშე იძირე, ნამდა ახაბი მთელ გურით ვა ნარღენდჷ?

⁵ მართალ რე, ახაბიქ თე სიტუაციაშ დროს დუდ დემდაბალ, მარა თიშ უკულიან საქციელშე ქიძირ, ნამდა სინამდვილეს ვა ნარღენდჷ. თის ვა მუნდომებ მუშ სამეფოს ბაალიშ თაყვანიშცემაშ მოსპუალა დო ხუჯის ვა უკინენდჷ იეჰოვაშ თაყვანიშცემას. თიშ შხვა მოქმედებეფშე ხოლო ქიძირ, ნამდა მთელ გურით ვა ნარღენდჷ მუშ საქციელს.

⁶ უმოს გვიანო, მუჟამსით ახაბიქ იუდაშ ჯგირ მეფე იეჰოშაფატის თხუ, ნამდა მუწკუმა ართო გეგშურთუმუდკო სირიაშ წინააღმდეგ, იეჰოშაფატიქ ელუჩ, დიო იეჰოვაშ წინასწარმეტყველშა ქელუკითხირალდესკო. ახაბიქ თე აზრ ვა მიწონუ. თიქ იეჰოშაფატის უწუ: „რე ხოლო ართ კოჩ, ნამდგაშ საშვალებათ შილებე ელვაკითხუათ იეჰოვას, მარა ბჯოგ თინა, მუშენდა ჯგირს მუთუნს ვამრაგად, ირო გლახას წინასწარმეტყველენს ჩქიმ გურშენ“. თე სიტყვეფიშ უმკუჯინუო თინეფქ რჩევა იშენით ქოთხის წინასწარმეტყველ მიქაიას. იეჰოვაშ წინასწარმეტყველქ დასურო გლახა ამბე იწინასწარმეტყველ ახაბიშ გურშენ. თიშ მანგიორო, ნამდა მინანუკო დო იეჰოვას პატიება ქოთხუკო, უბადო ახაბიქ მიქაია ციხეს ქიმთახუნუ (1 მეფ. 22:7—9, 23, 27). მარა იეჰოვაშ წინასწარმეტყველიშ ციხეს დოხუნაფათ ახაბის ვეშიალებედ წინასწარმეტყველებაშ შესრულებას ქეცილკო. მუჭოთ ღორონთის აფუდ რაგადებულ, მეფე ახაბი დოჸვილეს სირიაწკუმა ბრძოლაშ დროს (1 მეფ. 22:34—38).

7. მუჭო ეჭარ იეჰოვაქ ახაბი თიშ ღურაშ უკულ?

⁷ ახაბიშ ღურაშ უკულ იეჰოვაქ გაცხად, მუშ თოლს მუნერ რდჷ თე კოჩ. მუჟამსით ჯგირ მეფე იეჰოშაფატიქ დირთჷ ჸუდეშა, იეჰოვაქ მუშ წინასწარმეტყველ იეჰუ ქიმიაშქვჷ თიშა, ნამდა საყვედურ ქუთქუალუდკო, ახაბიშ მოხვარაშ გურშენ. წინასწარმეტყველქ თქუ: „უბადოეფს ოკო ოხვარუდე დო იეჰოვა ჯოგუნ ფერეფ ოკო გიჸორდასო?!“ (2 მატ. 19:1, 2). დეფიფქრათ: ახაბი ნამდვილო ქონარღენდკონ, წინასწარმეტყველ ვა თქუანდჷ, ნამდა თინა უბადო დო იეჰოვა ჯოგუნ ფერ რდჷ. არგამა რე, ნამდა ახაბიქ ჭიჭეთ დენარღჷ, მარა ბოლოშა დღას ვა მუნანიებ.

8. მუს ბგურაფლენთ მონანიებაშ გურშენ ახაბიშ მაგალითშე?

⁸ მუს ბგურაფლენთ ახაბიშ მაგალითშე? მუჟამსით თიქ ელიაშე მირჩქილუ მუშ საგვარეულოწკუმა დაკავშირებულ განაჩენ, დუდ დემდაბალ. თენა ჯგირ დაჭყაფ რდჷ. მარა თიშ უკულიან საქმეეფშე ქიძირ, ნამდა მთელ გურით ვა ნარღენდჷ. თაშ ნამდა, მონანიება უბრალოთ წუხებაშე მეტის ნიშნენს. მორთ შხვა მაგალით გუვარჩუათ, ნამუთ ქიმმეხვარებნა, ქიგებგათ, მუ მიშურს ნამდვილ მონანიებაშა.

9. მუნერ მეფე რდჷ მენაშე?

⁹ სოდგარენ ჟირ საუკუნეშ უკულ მენაშექ იუდაშ მეფეთ გინირთჷ. თინა შილებე ახაბიშ უარეს მეფე ჸოფედკო! ბიბლიას ბკითხულენთ: „დიდ უბადობას ორთუდ თინა იეჰოვაშ თოლს დო შეურაცხყოფას მიორინუანდჷ თის“ (2 მატ. 33:1—9). მენაშექ ტყურა ღორონთეფშო სამსხვერპლოეფ აშენ დო იეჰოვაშ ტაძარს წმინდა ბოძეფ ხოლო გაკეთ, მუთ შილებე სექსუალურ უზნეობაშ თაყვანიშცემაშ სიმბოლო ჸოფედკო! თინა მეჸუნდჷ ჯადოქრობას, მკითხაობას დო მარჩიელობას დო „უდანაშაულო ზისხირ ხოლო ბრელ დაბჷ“. მენაშეშ საშინელ მკვლელობეფშა თინა ხოლო მიშეშ, ნამდა ტყურა ღორონთეფიშ შესაწირო „დაჩხირს დოჭვჷ მუშ ქომოლსქუალეფ“ (2 მეფ. 21:6, 7, 10, 11, 16).

10. მუჭო დასაჯ იეჰოვაქ მენაშე, დო მუ რეაქცია უღუდ თის?

¹⁰ ახაბცალო მენაშე ხოლო მუთუნით ვა ღებულენდჷ იეჰოვაშ გაფრთხილებეფს, ნამდგას წინასწარმეტყველეფიშ საშვალებათ ირჩქილედ. ბოლოს „იეჰოვაქ [იუდაშ] წინააღმდეგ ასურეთიშ მეფეშ ჯარიშ დუდკოჩეფ გეგშეჸონ. ოჭოფეს მენაშე კაღუეფით, სპილენძიშ ბორკილეფ ქიგედვეს დო ბაბილონშა მიდეჸონეს“. უცხო ქიანას პატიმრობაშ დროს, მუჭოთ იძირე, მენაშექ სერიოზულო დეფიქრჷ დო „მანგარო დემდაბალ დუდ მუშ ჯვეშეფიშ ღორონთიშ წოხოლე“. თიქ ხოლო უმოს გაკეთ დო „ჭყოლოფა ქოთხუ იეჰოვას, მუშ ღორონთის“. მუჭოთ ბიბლიაშე იძირე: „მენაშე ლოცვათ თხულენდჷ ღორონთის“. თე უბადო კოჩ ითირუდ. თიქ იეჰოვა მუშ ღორონთო მირჩქინ დო ირიათო ლოცულენდჷ (2 მატ. 33:10—13).

11. მუჭოთ 2 მატიანეშ 33:15, 16-ის ჭარჷ, მუჭო ოძირუ მენაშექ, ნამდა მთელ გურით ინანიენდჷ?

¹¹ დროშ მიკულაშ უკულ იეჰოვაქ ქუპასუხ მენაშეშ ლოცვეფს. თიქ ქოძირ, მუჭო ითირუდ თე პიროვნებაშ გურ, მუთ თიშ ლოცვეფშე რჩქუდ. მენაშეშ მთელ გურით რაგადებულ ლოცვეფქ იეჰოვა აღძრჷ, მეფობა დურთინუკო თის. თე მეფექ მუთ შეულებუდუნ ირფელ გაკეთ, მუდგათ ქაძირუ, ნამდა მთელ გურით ინანიენდჷ. თიქ დოთირუ მუშ საქმეეფ, მუთ ახაბის დღას ვა უკეთებ. თინა მთელ მონდომათ ოწინააღმდეგუდ ტყურა თაყვანიშმცემლობას დო ხუჯის უკინენდჷ ჭეშმარიტ თაყვანიშმცემლობას (წეკითხით 2 მატიანეშ 33:15, 16). თეს დასურო ოსაჭირუდ გაბედულება დო რწმენა, მუშენდა მენაშეშ მაგალით წანეფიშ დინახალე გლახათ მოქმედენდჷ მუშ ოჯახშა, სახელმწიფო მოხელეეფშა დო ხალხშა. მარა ასე, ბოლო წანეფს, თინა ოცადუდ, გეგშასწორკო ნამთინე გლახა საქმე, მუთ თეიშახ აფუდ ნაკეთებ. საეგებიოთ თიშ მაგალით ჯგირო იმოქმედენდჷ მუშ მოთა იოშიაშა, ნამდგაქ უმოს გვიანო ჯგირ მეფექ იჸუ (2 მეფ. 22:1, 2).

12. მუშ გურაფა შემლებნა მონანიებაშ გურშენ მენაშეშ მაგალითშე?

¹² მუშ გურაფა შემლებნა მენაშეშ მაგალითშე?  თიქ დუდ დემდაბალ დო ხვალე თეს ვეგეჯერდუნ, ლოცულენდჷ დო ჭყოლოფას ითხინდჷ; თეს გეძინელ, დითირუ ცხოვრებაშ წეს. მენაშე ბრელს ხანდენდჷ თიშო, ნამდა გეგშასწორკო მუშ გლახა საქციელიშ საზიანო შედეგეფ დო ირფელს ორთუდ, ნამდა თაყვან უცემუდკო იეჰოვაშა, მუდგაშ კეთებას შხვეფს ხოლო ოხვარუდ. მენაშეშ მაგალით თინეფს ხოლო არზენს იმენდის, მიდგას მანგარ სერიოზულ ცოდვა აფჷ ჩადენილ. თიშ მაგალით ამტკიცენს, ნამდა იეჰოვა „ჯგირ დო მპატიებელ“ ღორონთ რე (ფსალმ. 86:5). იეჰოვა აპატიენს თინეფს, მით მთელ გურით ინანიენს.

13. ქიმიჸონით მაგალით, ნამუთ მონანიებაშ გურშენ მნიშვნელოვან მუდგარენიშ გაგებას მიმეხვარებნა.

¹³ მენაშექ უბრალოთ დანარღებაშე უმოს მეტ აკეთ. თენა მონანიებაშ გურშენ მნიშვნელოვან მუდგარენს მოგურუანა. დეფიფქრათ თეცალ მაგალითშე: მაღაზიაშა მეურთ ტორტიშ ოჸიდირშა, მარა ტორტიშ მანგიორო კვერცხის გარზენა. ქიჸუაფუდითო კმაყოფილ? მუშო ოკო რაგად, ვარ! თქვანო ვართ თიშ ენწყუმა იჸუაფუდ დასაბაღ, ნამდა კვერცხ ტორტიშ მთავარ ინგრედიენტ რე. თეშნერო იეჰოვა შემცოდველშე მონანიებას ითხინს. ჯგირ რე, მუჟამსით შემცოდველ წუხენს მუშ ცოდვაშენ, მუშენდა წუხება მონანიებაშ მნიშვნელოვან „ინგრედიენტ“ რე, მარა თენა ვა რე დასაბაღ. ხოლო მუ რე საჭირო? ჩქი ბრელ მუთუნს ბგურაფლენთ იესოშ მოჸუნაფილ იგავშე.

14. მუ რდჷ შარასეჩილათირ სქუაშ მონანიებაშ პირველ ნიშან?

¹⁴ იესოქ გურიშემაკინალ იგავ მიჸონ შარასეჩილათირ სქუაშ გურშენ, ნამუთ ლუკაშ 15:11—32-ს ენოჭარ. ახალგაზრდა ქომოლსქუაქ მუმას წეკინდჷ, ქიდიტუ ჸუდე დო „შორ ქიანაშა მიდართჷ“, სოდეთ უზნეო ცხოვრებას ქიმიაჸუნ. მუჟამსით რთულ პერიოდიქ ქუდუდირთჷ, თიქ სერიოზულო დეფიქრჷ თიშე, მუთ აკეთ. ქუგაშინ, მუზმათ უჯგუშო რდჷ მუმაშ ჸუდეს. მუჭოთ იესოქ თქუ, თე ახალგაზრდაქ აზრშა ქუმორთჷ. თიქ ჸუდეშა დორთა დო მუმაშა პატიებაშ თხუალა გინოჭყვიდ. მნიშვნელოვან რდჷ, ნამდა თიქ ქიმეხვად, მუზმა აფუდ დაშებულ. მარა თენა ვა რდჷ დასაბაღ. მოქმედება ხოლო რდჷ საჭირო!

15. მუჭო ოძირუ შარასეჩილათირ სქუაქ, ნამდა გულწრფელო ინანიენდჷ?

¹⁵ შარასეჩილათირ სქუაქ გულწრფელ მონანიება გიმირჩქინ. თიქ შორ შარა მიკორთჷ ჸუდეშა დართინალო. მუმას ქეშეხვადუნ, უწუ: „შებცოდ ზეცაშ წოხოლე დო სქან წოხოლე. მეტო ვა ვორექ ღირს, სქან ქომოლსქუა ბჯოხოდას“ (ლუკ. 15:21). თე გულწრფელ აღიარებათ, თიქ ქაძირუ, ნამდა ოკოდ იეჰოვაწკუმა ურთიერთობაშ გიშასწორება. თე ახალგაზრდას თინა ხოლო არჩქილედ, ნამდა მუშ საქციელით მუმას ხოლო ქალაჭუ გურ. თინა მზათ რდჷ, მუმაშე მოწონებაშ დართინაფალო ბრელ იხანდუკო დო ვართ თიშე უთქუალ  ვარია, მუმაშ დაქირებულ მუშა ჸოფედკო (ლუკ. 15:19). თე იგავ უბრალოთ გურიშემაკინალ ამბე ვა რე. თექ მოჩამილ პრინციპეფ მანგარო ოხვარ უხუცესეფს, მუჟამსით არჩიენა გულწრფელო ქინანიენს დო ვარ შემცოდველ.

16. მუშენ შილებე გაუჭირდან უხუცესეფს თიშ გაგებაქ, მუზმათ ინანიენს შემცოდველ?

¹⁶ უხუცესეფშო ვა რე ადვილ, გეგშეჩინან, დასურო ქინანიენს დო ვარ შემცოდველ, მუშენდა თინეფს ვეშულებნა, ქოძირან, მუ ხვადუ კოჩიშ გურს. ათეშენ დამოკიდებულ რენა თი გარეგნულ მტკიცებულებეფშა, სოვრეშეთ იძირე, ნამდა პიროვნებაქ დითირუ ცოდვაშ მიმართ მუშ დამოკიდებულება. ნამთინე შემთხვევას შილებე ადამიანქ თიცალო შეცოდას, ნამდა ირკოჩშო მანგარ გასაკვირქ იჸუას, ათეშენ თიწკუმა შეხვალამაშ დროს უხუცესეფ შილებე ვა რდან დარწმუნებულ, დასურო ქინანიენს დო ვარ თინა.

17. ა) ნამ მაგალით ოძირანს თის, ნამდა წუხებაშ გიმოხანტუა ვა რე დასაბაღ გულწრფელ მონანიებაშო? ბ) მუჭოთ 2 კორინთელეფიშ 7:11-ის რე მოჩამილ, მუს ელნა პიროვნებაშე, მით გულწრფელო ინანიენს?

¹⁷ გუვარჩუათ მაგალით. პიროვნება წანეფიშ დინახალე მრუშენს. მოხვარა ქითხუასინ თიშ მანგიორო, მუშ საქციელს უფულუნს მეუღლეს, მეგობრეფს დო უხუცესეფს. საბოლათ თეშ გურშენ უხუცესეფ გებულენა. მუჟამსით თინეფ შემცოდველს ფაქტიშ წოხოლე ქიგიორინუანა, თინა აღიარენს მუშ დაშებულს დო მანგარ დამწუხრებულო იძირე. მარა ქორენო თენა დასაბაღ? უხუცესეფს, უმოს მეტ ოსაჭირნა, ვინემ ხვალე თიშ ძირაფა, ნამდა შემცოდველ წუხენს. თენა უბრალოთ ართშა დაშვებულ შეცდომა ვარინ, წანეფიშ დინახალე იგრძელებუდუნ ფერ სერიოზულ ცოდვა რდჷ. შემცოდველს მუშით ვა მუნდომებ აღიარება, თინა ამხილეს. თაშ ნამდა, უხუცესეფს ოსაჭირნა თიშ მტკიცებულებეფ, ნამდა პიროვნება გულწრფელო ინანიენს დო ითირანს აზროვნებას, გრძნობეფს დო საქმეეფს (წეკითხით 2 კორინთელეფიშ 7:11). შემცოდველს შილებე დიდ დროქ დესაჭირას საჭირო ცვლილებეფშო. თინა ალბათ გარკვეულ პერიოდის ქრისტიანულ კრებაშე გერიცხებ (1 კორ. 5:11—13; 6:9, 10).

18. მუჭო შეულებ გარიცხულ პიროვნებას გულწრფელ მონანიებაშ გიმორჩქინა დო მუ იჸუაფ თეშ შედეგ?

¹⁸ თიშ ოძირაფალო, ნამდა გარიცხულ პიროვნება გულწრფელო ინანიენს, თიქ რეგულარულო ოკო დესწრას შეხვალამეფს დო მიაჸუნას უხუცესეფიშ რჩევას, ნამდა ირიათო ილოცას დო იგურუას ბიბლია. თეს გეძინელ, თიქ ირნერო ოკო ეიჩილითუას თიცალ სიტუაციეფ, მუთ კინ ქიმიჸონანს ცოდვაშა. იეჰოვაწკუმა ურთიერთობაშ გიშასწორებას ირნერო ქაცადუნ-და, შეულებ დარწმუნებულ რდას, ნამდა ღორონთ სრულას აპატიენს დო უხუცესეფ ხოლო აღადგინენა კრებას. მუშო ოკო რაგად, მუჟამსით უხუცესეფ ოცადნა, ქიგეგან,  პიროვნება დასურო ქინანიენს დო ვარ, ითვალისწინენა, ნამდა არძაშ სიტუაცია შხვადოშხვანერ რე დო დუდის ურიდანა მკაცრას გასამართლებას.

19. მუ მიშურს ნამდვილ მონანიებაშა? (ეზეკ. 33:14—16)

¹⁹ მუჭოთ უკვე ბძირით, ნამდვილ მონანიებაშ გიმორჩქინა თიშ რაგადშე მეტის ნიშნენს, ნამდა შემცოდველ წუხენს მუშ დუნაშებშენ. თიქ გულწრფელო ოკო დოთირუას მუშ აზროვნება დო გურ, მუთ აღძრენს, გაკეთას ჯგირ საქმეეფ. თეშა მიშურს გლახა საქმეეფიშ მეტება დო კინ იეჰოვაშ ნორმეფით ცხოვრება (წეკითხით ეზეკიელიშ 33:14—16). შემცოდველიშ მთავარ ოფიქრებელ ოკო რდას, იეჰოვაწკუმა გილალუაფირ ურთიერთობაშ გიშასწორება.

20, 21. მუჭო შემლებნა მივეხვარათ თის, მიდგაქ სერიოზულო შეცოდ?

²⁰ იესოქ მუშ მსახურებაშ მნიშვნელოვან მხარე ენწყჷ, მუჟამსით თქუ: „მა . . . ცოდვილეფიშ მახვარებშა მოფრთჷ, ნამდა მინანუან“ (ლუკ. 5:32). თენა ჩქინ მიზან ხოლო ოკო რდას. წერმიდგინით, ნამდა თქვან ხოლოშიან მეგობარქ სერიოზულო შეცოდ. მუ ოკო აკეთათ თე დროს?

²¹ მეგობარიშ ცოდვაშ ფულუათ, ჩქი ხვალე ზიანიშ მერინაფა შემლებნა თიშა. თენა ირიათო იშენ ვა მაფულენა, მუშენდა იეჰოვა ირფელს ორწყე (იგავ. 5:21, 22; 28:13). თქვა შეილებნა მეგობარს ქუგაშინათ, ნამდა უხუცესეფს ოკონა თიშ მოხვარა. უხუცესეფწკუმა ჩიება ვაკონ-და, თენა თქვა ოკო გაკეთათ, თეშნერო ქაძირანთ, ნამდა მართალო გოკონა თიშ მოხვარა, მუშენდა შილებე თიქ იეჰოვაწკუმა მეგობრობა მიოდინუას!

22. მუს გუვარჩიენთ ანწიან სტატიას?

²² მუშ რაგად შილებე თიმწკუმა, მუჟამსით პიროვნება ბრელ ხან რე, სერიოზულო ცოდენს, მუდგაშ შედეგო უხუცესეფ თიშ გარიცხვას გინოჭყვიდნა? ნიშნენსო თენა, ნამდა უხუცესეფქ თიშ მიმართ ჭყოლოფა ვეგმირჩქინეს? ანწიან სტატიას გარჩიებულ იჸუაფ, მუჭო გიმირჩქინანს იეჰოვა აღმზრდელობით ზომეფიშ გატარებაშ დროს ჭყოლოფას შემცოდველიშ მიმართ დო მუჭო შემლებნა მივაჸუნათ თიშ მაგალითის.