1, 2. მუს მოუღ ღორონთიშ ხალხშა ბედნერობა? (იაკ. 1:22—25).

 ᲘᲔᲰᲝᲕᲐᲡ დო იესოს მანგარო ოკონა, ბედნერეფ ვორდათ. 119-ა ფსალმუნიშ მა-2 მუხლის პკითხულენთ: „ბედნერეფ რენა თინეფ, მით მეჸუნა თიშ მითითებეფს დო მთელ გურით გორუნა თის“. იესოქ ხოლო თქუ, ნამდა „ბედნერ თინა რე, მით ირჩქილე ღორონთიშ სიტყვას დო მეჸუნს თის“ (ლუკ. 11:28).

² იეჰოვაშ მსახურეფ ბედნერ ხალხ ვორეთ. ჩქი თეშო ქიანაშ მიზეზ მიღუნა, მარა ართ-ართ, მუდგაშ გურშენ ბედნერეფ ვორეთინ თინა რე, ნამდა ირდღას პკითხულენთ ღორონთიშ სიტყვას დო ირნერო ვოცადუთ, გეგმიბრინუათ, მუდგას თევრეშე ბგურაფლენთ (წეკითხით იაკობიშ 1:22—25).

 3. მუ ჯგირ შედეგეფ მოუღ ღორონთიშ სიტყვაშ მეჸუნას?

³ მუჟამსით საქმეთ ვოძირანთ, ნამდა მეპჸუნთ ღორონთიშ სიტყვას, ბრელ ჯგირ შედეგის ბღებულენთ. მაგალთო, ართ თინა რე, ნამდა გურს უხარენთ იეჰოვას, მუდგაშ რჩქინას ჩქინდა ხოლო ბედნერობა მოუღ (ეკლ. 12:13). თეს გეძინელ, მუჟამსით იბრინუანთ ღორონთიშ სიტყვაშე ნაგურეფუს, ბედნერ ოჯახეფ დო უმოს ჯგირ ურთიერთობა მიღუნა თანაქრისტიანეფწკუმა. თენა თაშ რენ თეს ალბათ არძა ვორწყეთ ჩქინ ცხოვრებას. თეს გეძინელ, ეიფჩილითუანთ ბრელ თიცალ პრობლემას, ნამუთ შხვეფს უღუნა ღორონთიშ კანონეფს ვემეჸუნან თიშ გურშენ. თაშ ნამდა, მთელ გურით ვოთანხმუთ მეფე დავითიშ სიტყვეფს, ნამდგაქ იეჰოვაშ კანონიშ, ბრძანებეფიშ დო სამართალიშ გურშენ თქუ: „დიდ რე ჯილდო თინეფიშ დაცვებაშენ“ (ფსალმ. 19:7—11).

 4. მუშენ ვა რე ირო ადვილ ღორონთიშ სიტყვაშ კითხირ დო ნაგურეფუშ გიმორნაფა?

⁴ ალალას ქოფთქუათინ, ირო ვა რე ადვილ ღორონთიშ სიტყვაშ  კითხირ დო ნაგურეფუშ გიმორნაფა, მუშენდა ოშ მუდგარენ მისოფუანა დო მინშა ძნელ რე დროშ გორუა ბიბლიაშ კითხირშო დო გიმორკვიებაშო, ნამდა ქინვანჭათ, მუშ დოგურაფა ოკო იეჰოვას ჩქინდა. ათეშენ, თე სტატიას გარჩიებულ რჩევეფ ქიმმეხვარებუნა, ირდღას წეპკითხათ ბიბლია დო, ხვალე თენა ვარინ, ქიფიფქრათ ნაკითხირშე დო ქობძირათ, მუჭო შემლებუნა ნაგურეფუშ ცხოვრებას გიმორნაფა.

ᲬᲘᲜᲐᲡᲬᲐᲠ ᲒᲐᲤᲣᲓᲐᲜ ᲛᲝᲤᲘᲥᲠᲔᲑᲣᲚ, ᲛᲣ ᲓᲠᲝᲡ ᲘᲙᲘᲗᲮᲔᲜᲗ ᲑᲘᲑᲚᲘᲐᲡ

 5. მუ პასუხიშმგებლობეფ მიღუნა ქრისტიანეფს?

⁵ ღორონთიშ მსახურეფს ბრელ მნიშვნელოვან საქმე მაფუნა ოკეთებელ, მუდგას ბიბლია მავალენა. მაგალთო, ჩქინდე ბრელ მუფშენთ, ნამდა ეიბჯუმუათ ჩქინ დუდ დო ოჯახ (1 ტიმ. 5:8). ბრელ ქრისტიან დალახებურ ვარდა მოხუცებულ ოჯახიშ წევრის ულუანს. თეს გეძინელ, არძას მაფუნა მიკაჯინალ ჩქინ ჯანმრთელობაშა. თეს ხოლო ხომ ქაკო დრო?! თე პასუხიშმგებლობეფწკუმა ართო, ბრელს ორგანიზაციას ხოლო მიღუნა შხვადოშხვა დავალება. არძაშ უმოს მთავარ დავალება, ნამუთ თითოულს მიღუნა, სახიოლო ამბეშ მთელ მონდომათ ქადაგება რე. სინამდვილეს ვა რე ადვილ, თეზმა ამბეწკუმა ართო, ირდღას დრო დობგორათ ბიბლიაშ კითხირშო, ნაკითხირშე ფიქრშო დო ნაგურეფუშ გიმორნაფაშო. ათეშენ, მორთ ქიფჩუათ, მუ მიმეხვარებუნა თეშ კეთებას.

 6. მუშ კეთება შემლებუნა, ნამდა ბიბლიაშ კითხირქ ვა გომჩირთან? (ქოძირით სურათ).

⁶ ქრისტიანეფშო ართ-ართ არძაშ უმოს მთავარ მუდგარენ ბიბლიაშ კითხირ რე, ათეშენ სერიოზულო ოკო მეუდირთათ თე საკითხის (ფილ. 1:10). ბიბლიაშ კითხირ მუსხით მნიშვნელოვან რენ თენა ჯგირო იძირე პირველ ფსალმუნშე, სოდეთ პკითხულენთ: „ბედნერ რე კოჩ . . . [მიდგას] იეჰოვაშ კანონ ოჰამ დო კითხულენს თის დღაშ დო სერით“ (ფსალმ. 1:1, 2). მუ დროს რე არძაშ უჯგუშ ბიბლიაშ კითხირ? შილებე არძას შხვადოშხვა დროს უსხუნუდას თეშ კეთება, მარა მთავარ რე, ირდღას მაფუდან დრო გიშართილ ბიბლიაშ ოკითხეთ. დეკვირით, მუს იჩიებ ართ ჯიმა, ვიქტორ: „ბიბლიაშ კითხირ უმოსო ოჭმარეს მისხუნ. მართალ რე, ადრე ედგინა ვა მიჸორს, მარა ოჭმარეს ბრელ მუთუნშე ვა მაფჷ ოფიქრებელ დო შემლებ მთელ ყურადღება ბიბლიაშ კითხირშა მაფუდას გინოღალირ“. შილებე  თქვა ხოლო ოჭმარეს გაჸუან მოხუჯურქ ბიბლიაშ კითხირქ. ქოკითხით თქვან დუდის: ჩქიმო მუ დრო იჸუაფ არძაშ უჯგუშ ბიბლიაშ ოკითხეთ?

ᲓᲔᲤᲘᲥᲠᲘᲗ ᲜᲐᲙᲘᲗᲮᲘᲠᲨᲔ

7, 8. მუშ გურშენ შილებე მინშა სარგებელქ ვემმაღებუან ბიბლიაშ კითხირშე? ქიმიჸუნით მაგალით.

⁷ შილებე გეგნოდგით პირველ ნაბიჯ დო დაგეგმილ გაფუნა დრო ბიბლიაშ ოკითხეთ; თენა მანგარ ჯგირ რე. შილებე მიზანო გიღუნა, ირდღას მუსხირენ დუდ წეკითხათ ბიბლიაშე. ეს მუ უჯგჷ?! ოცქვაფალ რეთჷ თეშ გურშენ, მუშენდა, მუჭოთ ბიბლია მირაგადუნა ქრისტიანეფს, ოკო მიღუდან მიზნეფ დო ირნერო ვოცადუდათ თინეფიშ მენჭირნაფას (1 კორ. 9:26). მარა ხვალე კითხირ ქორენო დასაბაღ? ართ წუთის დეფიქრით: ვა ნორღვენანო თიცალ სიტუაცია, მუჟამსით მუდგარენ წეკითხით დო მაჟია წუთის გვერდო ვა რშუდეს ნაკითხირ? ალბათ არძას ბღოლამუნა თენა. შილებე ზუსტას თაშ ქუმოხვადას ბიბლიაშ კითხირიშ დროს ხოლო. შილებე ირდღას თიზმას პკითხულენდათ, ნამდა გააზრება ვა მაჭიშედან. ღორონთიშ სიტყვაშე სარგებელ მიბღათინ, ხვალე კითხირ ვა ბაღჷ.

⁸ ქიმიპჸუნათ თეცალ შედარება: მუჭოთ მიჩქუნა, მცენარეს, ვა ხუმასინ თიშენ, წყარ ოსაჭირ, მარა ნაბეტანო დოჭვემ-და, დიხა გვალო გოჟვიჟონდუ დო თეზმა წყარ მცენარეშო მორგე ვარინ, მოცილე იჸუაფ. უჯგუშ რე, მუჟამსით გითოჸუნელო ჭვენსჷ, მუშენდა დიხა ჭიშუ ნაჭვემურ წყარიშ შუმას დო თენა ხეს უნწყუნს მცენარეშ რდუალას. თეშნერო, ბიბლია ოკო ვეპკითხათ თიშმაჩქარას, ნამდა ვა მაჭიშუან გააზრებაქ, დამახსოვრებაქ დო ნაკითხირიშ ცხოვრებას გიმორნაფაქ (იაკ. 1:24).

 9. მუ ოკო ვაკეთათ, ბიბლიას გინორულერო ქოპკითხულენთ-და?

⁹ დღას ქიგეიჭოფაფუნანო თქვან დუდ თიშა, ნამდა ბიბლიას გინორულერო კითხულენთ? მუ ოკო აკეთათ თე დროს? ჭიჭე ქუგუწყნარეთ. ეცადით, გააზრებულო წეკითხათ დო კითხირს გათენთინ უკულ დეფიქრათ ნაკითხირშე. თენა ვეკეთებენ ფერ ამბე ვა რე. თეშო შილებე საჭიროქ გაჸუან, უმოს ბრელ ხან გეგმურთათ ბიბლიაშ გიმორკვიებას ვარდა მურკათ ოკითხე მასალას, ნამდა ფიქრშო დროქ ქუდგოსქიდან. ჟიშე მოშინაფილ ვიქტორ იჩიებ: „ბრელს ვა პკითხულენქ, შილებე გვალო ართ დუდ წეპკითხე. რახანს ბიბლიას ოჭმარეს პკითხულენქ,  შემლებ მთელ დღას იფიფქრე ნაკითხირშე“. თქვან გინაჭყვიდირალ რე, მუზმას წეკითხენთ. მთავარ რე, ვეჩქარათ, ნამდა საშვალებაქ ქუმგაჩან, ქინანჭათ ნაკითხირს (ფსალმ. 119:97; ქოძირით ჩარჩო  „კითხვეფ, ნამუთ ფიქრის მიგეხვარებ“).

10. მაგალითიშ საშვალებათ გენწყით, მუჭო შეილებუნა ნაკითხირიშ ცხოვრებას გიმორნაფა (1 თეს. 5:17, 18).

¹⁰ ვა უღჷ მნიშვნელობა, მუჟამ წეკითხენთ დო მუზმას. ირო ქეცადით, ქიფიქრათ, მუჭო გიმირინუათ ნაგურეფ ცხოვრებას. ბიბლიურ მონაკვეთიშ კითხირიშ დროს დეფიქრით: მუჭო შემლებ თე აზრ გიმიბრინუე ასე ვარდა ხოლოჟამო? მაგალთო, წერმიდგინით, ნამდა ბიბლიას კითხულენთ დო ქიმიოდირთით 1 თესალონიკელეფიშ 5-იშ 17 დო 18-ს (წეკითხით). ქეცადით, თე ჟირ მუხლიშ კითხირიშ უკულ გაჩენდათ დო დეფიქრათ, მუზმათ ხშირას დო მთელ გურით ლოცულენთ. შეილებუნა დეფიქრათ თიშე ხოლო, მუშ გურშენ აფუთ ღორონთის მარდულ. მაგალთო, შილებე გეგნოჭყვიდათ, ნამდგაინ სუმ საკითხიშ გურშენ უწუათ მადლობა იეჰოვას. ნაკითხირშე ფიქრის მუსხირენ წუთის ვარა გეგმურთუნთ-და, თენა მიგეხვარებუნა, რდათჷ ღორონთიშ სიტყვაშ მარჩქილეეფ დო საქმეთ ხოლო ქაძირუათ, ნამდა მეჸუნთ თის. თეს ირდღას გაკეთენთ დო ბიბლიაშე ნაკითხირს ირდღას გეგმირინუანთ-და, სულიერო მირდუთ დო უმოს მოწონა გაღვენუნა იეჰოვაშ თოლს. მარა მორთ ასე ქიგებგათ, მუ ოკო აკეთათ, მუჟამსით ფიქრენთ, ნამდა თეზმა მუდგარენიშ ართო კეთებას ვა განჭუთ?

ᲒᲘᲦᲣᲓᲐᲜ ᲒᲝᲜᲘᲕᲠᲣᲚ ᲛᲘᲖᲜᲔᲤ

11. მუშენ შილებე მინშა გურქ გოიტირხან? ქიმიჸუნით მაგალით.

¹¹ ბიბლიაშ კითხირიშ დროს მინშა შილებე გურქ გომტირხან, მუშენდა ქიმეფხვადათ, ნამდა ბრელ მუდგარენ მაფუნა გაუჯგუშებელ. დეფიქრით თეცალ სიტუაციაშე: წერმიდგინით, ნამდა თქვან ბიბლიაშ კითხირიშ გეგმას მეჸუნთ დო თუთაშხა დღას კითხირიშ დროს აუხვადუთ რჩევას, ნამდა ოკო ვეგმირჩქინანდათ გიშაკერძაფას (იაკ. 2:1—8). კითხირიშ უკულ ქიმეხვადით, ნამდა თე საკითხ თქვა ხოლო გაუჯგუშებელ გაფუნა დო გინოჭყვიდუნთ, უჯგუშო მექცუათ შხვეფს. ეს მუ უჯგჷ?! თახაშხას თიცალ მონაკვეთის კითხულენთ, სოდეთ ენწყუმილ რე, მუსხით მნიშვნელოვან რე, მუს მუჭო იფჩიებუთ (იაკ. 3:1—12). უკულ გურს უჩანთ, ნამდა მინშა უარყოფით ჩიება გიჩქუნა შხვადოშხვა საკითხშე დო ხვადუთ, მუდგარენ გაფუნა ოთირალ, ნამდა თქვან ჩიება უმოს გურიშ ემაკინალ რდასჷ შხვეფშო. ჯუმაშხას კითხულენთ თიცალ ბიბლიურ მუხლეფს, სოდეთ ენწყუმილ რე, ნამდა ქვეყნიერებაწკუმა მეგობრობას ჯგირ მუთუნ ვა მოუღ (იაკ. 4:4—12). ოკვირუთინ, თე საკითხის ხოლო გოსაჭირუნა გაუჯგუშება, ნამდა გართობაშ გიშაგორუაშ დროს უმოს ფრთხილას რდათჷ. ქიმერთით ცააშხაშახ დო თიზმა ოთირალქ აგკაშაყარეს, ნამდა ირფელს ართათ ვა განჭუთ დო გურ გიტირხუნა.

12. მუშენ ოკო ვა გოიტირხან გურქ, მუჟამსით ბიბლიაშ კითხირიშ დროს ქოძირუნთ, ნამდა მუდგარენეფ ოთირალ გაფუნა? (ქოძირით სქოლიო).

 ¹² ბრელ მუდგარენ გაფუნა ოთირალინ თეს ქოფიქრენთ-და, გურქ ვა გოიტირხან. თენა ნიშნენს, ნამდა თანდაბალ პიროვნება რეთჷ დო გოკონა, უმოსო გეუჯგუშათ. თანდაბალ დო ალალგურიშ კოჩ ბიბლიაშ კითხირიშ დროს ოკვირ, მუშ თირუა ვარდა გაუჯგუშება ოსაჭირ. a ვაგგოჭყორდან, ახალ პიროვნებათ გინორთა ართუცფას ვა ხვადუ. თინა ირიათო იგრძელებ (კოლ. 3:10). მუ მიგეხვარებუნა, გურ ვეგიტახათ დო ირიათო ოძირუათ საქმეთ, ნამდა მეჸუნთ ღორონთიშ სიტყვას?

13. მუშ კეთება შეილებუნა, ნამდა გეგმირინუათ ბიბლიაშე ნაკითხირ? (ქოძირით სურათ).

¹³ ვეცადათ, ირფელ ართათ დოთირუათ. თეშ მანგიორო, ნაკითხირშე გეგშაგორით ართ ვარდა ჟირ საკითხ, ნამდგას გოკონა, გეუჯგუშათ (იგავ. 11:2). შეილებუნა თაშ გაკეთათ: გეგმოჭარით, მუშ თირუა გოკონა. უკულ თინეფშე ართ ვარდა ჟირ მიზან გეგშაგორით, ნამდგაშე პირველ რიგის გოკონა იმუშუათ, დო შხვეფ უკულიანშო გეგნოდვით. მუ მიგეხვარებუნა თიშ გინოჭყვიდუას, ნამ საკითხიშ გაუჯგუშებათ დიჭყათ?

14. მუჭო შეილებუნა გინოჭყვიდათ, ნამ საკითხშე მუშობათ დიჭყანთ?

¹⁴ შეილებუნა დუდშე თი მიზან გეგშეგორათ, ნამუთ უმოს ეფ მიოჭირნაფალ გაჸინა ვარდა თი საკითხით ქიდიჭყათ, ნამდგაშეთ ფიქრენთ, ნამდა არძაშ უმოსო გოსაჭირუნა გაუჯგუშება. მუჟამსით გეგნოჭყვიდუნთ, ნამ საკითხით დიჭყანთ, უმოს ქიგეგით, მუ ჭარჷ ჩქინ პუბლიკაციეფს თიშ გურშენ. თეშო შეილებუნა გეგმირინუათ „გინაჯინალ კოშკიშ პუბლიკაციეფიშ საძიებელ“ ვარდა „იეჰოვაშ მოწმეეფიშ ორკვიებელ სახელმძღვანელო“. თეწკუმა ართო, იეჰოვას ლოცვას ქოთხით, ნამდა თქვან მიზანიშ მიოჭირნაფალო ქიმერჩან ქოთ სურვილ  დო ქოთ ძალა (ფილ. 2:13). თე ირფელიშ უკულ, ქეცადით, გეგმირინუათ თინა, მუთ გიმორკვიებულ გაფუნა. მუჟამსით ქიმიოჭირინუანთ თქვან მიზანს, დოთირანთ, მუთ ოთირალ გაფუდეს, დო ნამდგაინ ქრისტიანულ მხარეს გეუჯგუშებუთ, უმოს მონდომა გაღვენუნა დო უმოს ადვილ გაჸინა შხვა მხარეეფიშ თირუა ხოლო.

ᲥᲘᲛᲔᲩᲘᲗ ᲦᲝᲠᲝᲜᲗᲘᲨ ᲡᲘᲢᲧᲕᲐᲡ ᲡᲐᲨᲕᲐᲚᲔᲑᲐ, ᲘᲛᲝᲥᲛᲔᲓᲐᲡ ᲗᲥᲕᲐᲜᲓᲐ

15. მუ განსხვავება რე იეჰოვაშ ხალხ დო თინეფ შქას, მით იჩიებუნა, ნამდა ბრელშა აფუნა ნაკითხირ ბიბლია? (1 თეს. 2:13).

¹⁵ ამდღა ქვეყნიერებას ნამთინე იჩიებ, ნამდა ბრელშა აფჷ ბიბლია კითხირებულ, მარა საინტერესო რე, სინამდვილეს ქოწანანო თი ადამიანეფს თიშ, მუდგას კითხულენა? ქირინუანანო ნაკითხირს დო ქარზენანო ღორონთიშ სიტყვას საშვალებას, დოთირუას თინეფიშ ცხოვრება? ვარ. თე ადამიანეფიშ უმენტაშ ვემეჸუნს ბიბლიურ რჩევეფს. თინეფიშ გინაწონს, იეჰოვაშ ხალხ ბიბლიას საშვალებას არზენს, იმოქმედას თინეფიშ ცხოვრებაშა. პირველ საუკუნეს მახორუ ქრისტიანეფცალო, ჩქი ხოლო ბიბლიას უჯინეთ, მუჭოთ „ღორონთიშ სიტყვას“ დო ირნერო ვოცადუთ, ცხოვრებას გეგმიბრინუათ თექ მოჩამილ რჩევეფ (წეკითხით 1 თესალონიკელეფიშ 2:13).

16. მუ მიმეხვარებუნა, საქმეეფით ვოძირუათ, ნამდა მეპჸუნთ ღორონთიშ სიტყვას?

¹⁶ ირო ვა რე ადვილ, წეპკითხათ ღორონთიშ სიტყვა დო ცხოვრებას გეგმიბრინუათ ნაგურეფ. მინშა შილებე დრო ვა მიღუდან ბიბლიაშ ოკითხეთ ვარდა თიშმაჩქარას პკითხულენდათ, ნამდა ვა მაჭიშედან ნაკითხირშე დაფიქრება. მინშა შილებე გურქ ხოლო გომტირხან, მუშენდა კითხირიშ დროს ქიმეფხვადით, ნამდა ბრელ მუდგარენ პჸოფუნა ოთირალ. გიმოკოროცხილ სირთულეეფშე ნამდგაინ ქოიღუნან-და, თენა ვეგშისწორებენ ფერ ამბე ვა რე. იეჰოვაშ მოხვარათ შეგალებენა გიორჯგინათ თის. ათეშენ მიღით თიშე მოხვარა. მორთ გინოჭყვიდილ მაფუდან, საქმეეფით ვოძირუათ, ნამდა მეპჸუნთ ღორონთიშ სიტყვას დო ვა ვაგურათ თიცალ კოჩის, ნამდგას ხეთეშე ოჭყორდუ მორჩქილაფირ. ბჯერა, ნამდა მუთ უმოსო წეპკითხენთ ღორონთიშ სიტყვას დო გეგმიბრინუანთ ნაკითხირს, თით უმოს ბედნერ ცხოვრება მაღვენუნა (იაკ. 1:25).