1, 2. მუშენ რე კინ ჩქინო საჯგირობუო, ნამდა ჯგირიშ კეთებას უმოს ხიოლ მოუღ, ვინემ მეღებას?

 ᲘᲔᲰᲝᲕᲐᲡ თეშ ვაფუთ გოჭყაფილ, ნამდა ჩქინდა უმოს მეტ ხიოლ შხვეფშა ჯგირიშ კეთებას მოუღ, ვინემ თის, ნამდა აშო მიკეთენა ჯგირს (საქ. 20:35). მუშო ოკო რაგად, თენა თის ვა ნიშნენს, ნამდა ჯგირს მიკეთენან, შურო ვა მოხიოლუნა. ვარ, აშ ვა რე, არძას მოხიოლუნა, მუჟამსით მუდგაინს მაჩუქენა. მარა უმოს ხიოლ თიმწკუმა მიღუნა, მუჟამსით შხვას უკეთენთ ჯგირს. იეჰოვას თეშნერო ვაფუთ გოჭყაფილინ თენა, კინ ჩქინო რე ჯგირ. მუშენ იფჩიებუთ თეს?

² თაშ ვორეთ გოჭყაფილინ თეშ ჭყოლოფათ, ბედნერეფ იპჸუაფუთ დო ვარინ თენა, შემლებუნა ფთქუათ, ნამდა ჩქინ ხეს რე. ბედნერეფ ვორდათინ ქუმოკონან-და, ჯგირ ოკო უკეთათ შხვეფს. მართალო, მუ სასწაულო ვაფუთ იეჰოვას გოჭყაფილ?! (ფსალმ. 139:14).

3. მუშენ ვა რე გასაკვირ, ნამდა ბიბლია იეჰოვას „ბედნერ ღორონთო“ მიშინუანს?

³ რახანს ღორონთიშ სიტყვას ჭარჷ, ნამდა შხვეფშა ჯგირიშ კეთებას ხიოლ მოუღ, ვა რე გასაკვირ, მუშენ რე რაგადებულ ბიბლიას იეჰოვაშ გურშენ, ნამდა თინა „ბედნერ ღორონთ“ რე (1 ტიმ. 1:11). არძაშ უმოს პირველო იეჰოვაქ დიჭყჷ შხვეფშა ჯგირიშ კეთება დო თინა ორთჷ შხვეფშონ თისხის, მითინ ვართჷ. მოციქულ პავლექ თქუნჷ თეშ, „ჩქი თიშით ვორეთ, თიშით გილურთ დო თიშით მიდგუნა შურ“ (საქ. 17:28). დასურო, „ირნერ ჯგირ დო სრულყოფილ ძღვინ“ იეჰოვაშე მიღუნა (იაკ. 1:17).

4. მუ მიმეხვარებუნა, ხიოლ გეგმოფცადათ?

⁴ ალბათ, არძას მოკონა, გეგმოფცადათ თი დიდ ხიოლ,  ნამუთ შხვეფშა ჯგირიშ კეთებას მოუღ. თეს იეჰოვაშ ხეგოფაჩილობაშ მაგალითიშ მეჸუნა მიმეხვარებუნა (ეფეს. 5:1). ათეშენ, ზუსტას თენა იჸუაფ ართ-ართ მხარე, მუდგას თე სტატიას გუვარჩიენთ. თეწკუმა ართო, ქობძირუნთ, მუ ოკო ვაკეთათ, მუჟამსით ჩქინ სიკეთეს ვაფასენა. თე აზრეფიშ გარჩიება ქიმმეხვარებუნა, ვემვოტუათ შხვეფშა ჯგირიშ კეთება დო თექ დიდ ბედნერობა ქუმომღან.

ᲠᲓᲐᲗᲷ ᲘᲔᲰᲝᲕᲐᲪᲐᲚ ᲮᲔᲒᲝᲤᲐᲩᲘᲚ

5. მუ მიღუნა იეჰოვაშ ჭყოლოფათ?

⁵ დეფიფქრათ მუსხირენ მხარეშე, სოვრეშეთ იეჰოვაშ ხეგოფაჩილობა იძირე. მაგალთო, იეჰოვა ზრუნენს ჩქინ ფიზიკურ საჭიროებეფშო. შილებე არძას გინაცუმალო ვა მიღუდან, მარა იეჰოვაშ ჭყოლოფათ, აუცილებერ ვა მორკუნა. მაგალთო, თიშით მიღუნა ოჭკუმალ, მიკაქუნალ დო დუდიშგითაფორაფალ (ფსალმ. 4:8; მათ. 6:31—33; 1 ტიმ. 6:6—8). ვალდებულებაშ გურშენ ორთუნო იეჰოვა თეს? მუშო ოკო რაგად, ვარ. აბა, მუშენ ზრუნენს იეჰოვა ჩქინდე?

6. მუს ბგურაფლენთ მათეშ 6:25, 26-შე?

⁶ იეჰოვა თიშენ ზრუნენს ჩქინდე, ნამდა მანგარო უჸორთ. თენა ჯგირო იძირე მათეშ 6:25, 26-ის ინოჭარილ იესოშ სიტყვეფშე (წეკითხით). თაქ იესო მარჩქილეეფს ურაგად, ნამდა ქიდეკვირან იეჰოვაშ გოჭყაფილ ჩიტეფს. თინა იჩიებ: „თინეფ ვართ თასუნა, ვართ მოსავალს ეჭოფუნა დო ვართ მაღაზეფს ჩუანა“. დეკვირით, უკულ მუს ურაგად: „მარა თქვან ზეციერ მუმა ოდიარუანს თინეფს“. ბოლოს იესო ოკითხ: „თქვა თინეფშე ბრელით უმოს ძვირფასეფ ვა რეთო?!“. მუშ რაგად ოკოდ თის თე მაგალითით? იეჰოვაშო მუშ მსახურეფ ცხოველეფშე დო ფრინველეფშე ბრელით უმოს ძვირფასეფ რენა, მუშენდა ჩქი თიშ ოჯახიშ წევრეფ ვორეთ. იეჰოვა თინეფშო ქოზრუნენს-და, მუშ მსახურეფს მიარკენსო აუცილებერს?! ათეშენ, მუჭოთ მოჸოროფე მუმა ზრუნენს დო მუთუნს ვარკენს მუშ ოჯახის, თეშ იეჰოვა ხოლო ჸოროფათ ზრუნენს ჩქინდე (ფსალმ. 145:16; მათ. 6:32).

7. მუ რე ართ-ართ საშვალება, მუდგათ შემლებუნა იეჰოვაცალ ხეგოფაჩილ ვორდათ? (ქოძირით სურათ).

⁷ იეჰოვაცალო, ჩქი ხოლო შემლებუნა ქიბზრუნათ და დო ჯიმალეფიშ საჭიროებეფშო, მუშენდა მიჸორა თინეფ. მაგალთო, დეფიქრით, ხომ ვეჩინენთ თიცალ თანაქრისტიანს, მიდგას ოჭკუმალ ვარდა მიკაქუნალ ოსაჭირ? შილებე იეჰოვაქ გვალო თქვა გეგმოირინუან თიშ მახვარებელო. ღორონთიშ ხალხის განსაკუთრებულო თიმწკუმა უჩქჷ ართიანიშ ელარნა, მუჟამსით მუდგაინ უბედრობა ხვადუ. მაგალთო, კოვიდ-19 პანდემიაშ დროს ჩქინ და დო ჯიმალეფ ართმაჟიას ურთუნდეს ოჭკუმალს, აუცილებერ ნივთეფს, არზენდეს მიკაქუნალს დო ზრუნენდეს ართიანიშ  საჭიროებეფშე. ბრელ ხოლო შესაწირავს ორთუდ მსოფლიო საქმეშო, მუდგაშ ჭყოლოფათ, უჭირდუნ თი და დო ჯიმალეფიშ მოხვარა ხვადუდ. თე ხეგოფაჩილ და დო ჯიმალეფ მეჸუნდეს ებრაელეფიშ 13:16-ის ინოჭარილ სიტყვეფს: „ვემვოტუათ ჯგირიშ კეთება დო შხვას ხოლო გურთათ თინა, მუთ ჩქი მიღუნა, მუშენდა ღორონთის მანგარო მოწონს თეცალ მსხვერპლ“.

8. ნამ სიტუაციეფს მარზენა იეჰოვა მუშ ძალას? (ფილ. 2:13).

⁸ იეჰოვა ძალას მარზენა. იეჰოვა ხიოლით არზენს მუშ ულიებ ძალას ართგურ მსახურეფს (წეკითხით ფილიპელეფიშ 2:13). ქიგიშინით, დღას ხომ ვაილოცებუნა, ნამდა იეჰოვაქ ძალა ქიმერჩესკო ცდუნებაშ გარზებელო ვარდა მუდგაინ განსაცდელიშ გინაღალარო? ვარდა ხომ ვაითხუნა იეჰოვაშა, გუგამანგარესკო, მუჟამსით ძალააშალიებურ დო გინოშულადირ რდითჷ? თეცალ ლოცვაშ უკულ იეჰოვაშ ძალას ქიგინანდითინ, ალბათ მოციქულ პავლეცალო თქვა ხოლო თქუანდით: „ირფელშო მარზენს ძალას ღორონთ, ჩქიმ გუმამანგარებელ“ (ფილ. 4:13).

9. მუჭო შემლებუნა იეჰოვაცალო შხვეფიშ მახვარებელო გეგმიბრინუათ ჩქინ ძალა? (ქოძირით სურათ).

⁹ ჩქი იეჰოვაცალო ულიებ ძალა ვა მიღუნა დო ვართ შხვეფშა მიმაჩინენა ჩქინ ძალა. მარა იშენით შემლებუნა ზეციერ მუმაშ მაგალითის ქიმვაჸუნათ თით, ნამდა ჩქინ ძალა დო ენერგია შხვეფიშ მახვარებელო გეგმიბრინუათ. მაგალთო, შემლებუნა ხანშამიშულირ ვარდა დალახებურ თანაქრისტიანს ქიმვეხვარათ ჸუდეშ მიკოლუაფას ვარდა ხოლო მუდგარენეფიშ ჸიდირს. თეწკუმა ართო, სიტუაცია ხეს ქომინწყუნან-და, შემლებუნა მონაწილება მიბღათ დარბაზიშ დონწყუალაშ დო მიკოლუაფაშ საქმეს. ჩქინ ძალაშ თე დო შხვა თეცალ საქმეეფშო გიმორნაფათ, შემლებუნა ბრელ ჯგირ უკეთათ და დო ჯიმალეფს.

10. მუჭო შემლებუნა ჩქინ სიტყვეფით ძალა ქიმეფჩათ შხვეფს?

¹⁰ ვაგგოჭყორდან, ნამდა სიტყვეფს ხოლო მანგარ ძალა უღჷ. ათეშენ დეფიქრით: მიდგაინს ხომ ვემეხვარებუდ თქვანდე ცქვაფა? ვარდა მიდგაინშო შურიშ მეჭიშაფა ხომ ვეჸიდ თქვანდე გურიშ ექექაფა? თაშ ქორენ-და, ქაგინაფეთ თე პიროვნებას, ნამდა ძვირფას რე თქვანო. შეილებუნა ქიმიაკითხუათ, დურეკათ ვარდა ქიმეჭარათ. ვეფიქრათ, ნამდა იშენდოიშენ მუდგაინ განსაკუთრებულ ოკო უწუათ. შილებე მთელ გურით რაგადებულ ართ დო ჟირ სიტყვათ ხოლო შურ მოუდგათ დო ძალეფით ეიოფშათ თანაქრისტიან (იგავ. 12:25; ეფეს. 4:29).

11. მუჭო ირზენს იეჰოვა სიბრძნეს?

¹¹ იეჰოვა სიბრძნეს მარზენა. მოციქულ იაკობიქ ჭარჷ: „თქვანდე ნამდგაინს სიბრძნე ქარკუნ-და, ირიათო თხუას ღორონთის, დო ღორონთ, ნამუთ არძაწკუმა გურხვე რე დო მითინს ვეგიორაგადანს, ქიმეჩანს თის სიბრძნეს“  (იაკ. 1:5; სქოლიო). მუჭოთ თე სიტყვეფშე იძირე, იეჰოვა მუშო ვეჩუანს სიბრძნეს. თინა თის გურხვეთ გინოჩანს შხვეფს. ქიდეკვირით თის ხოლო, ნამდა „გერაგადიშ უმშო“ ორთჷ თეს. იეჰოვა მუთუნით ვა გამდღანენა, მუჟამსით ხელმძღვანელობას ფთხინთჷ; პირიქით, აშო მოხვეწუნა, ნამდა თიშე იბგურუათ (იგავ. 2:1—6).

12. მუჭო შემლებუნა შხვეფს გეგნოფჩათ ჩქინ სიბრძნე დო გამოცდილება?

¹² ჩქი მუჭო შემლებუნა იეჰოვაცალო გეგნოფჩათ შხვეფს ჩქინ სიბრძნე დო გამოცდილება? (ფსალმ. 32:8). თეშ კეთება ბრელნერო შილებე. მაგალთო, შემლებუნა ქიმვეხვარათ ახალ მაუწყებელეფს, ქადაგება ქიდიგურუან. უხუცესეფს შეულებუნა მოთვინებათ ქიმეხვარან მომსახურეეფს დო შხვა ჯიმალეფს კრებაშ შხვადოშხვა საქმეშ დოგურაფას. თინეფს, მიდგას მშენებლობაშ დო შენობეფიშ მიკოლუაფაშ გამოცდილება უღუნა, შეულებუნა ქუდაგურუან შხვეფს, მუჭო იმუშუან თეოკრატიულ შენობეფს.

13. მუჭო შემლებუნა მივაჸუნათ იეჰოვაშ მაგალითის, მუჟამსით შხვეფს ვოგურუანთ?

¹³ თინეფქ, მით შხვეფს ოგურუანა, იეჰოვაცალო გურხვეთ ოკო გინოჩან მუნეფიშ რჩქინა დო გამოცდილება თინეფს. ჩქი დუდის ვა ურიდანთ შხვეფშა გურაფას თიშ შიშით, ნამდა შილებე ართ დღასით ჩქინ საქმე თიქ გაგრძელას, მიდგას ვოგურეთ. ვართ თეცალ ფიქრ იჸუაფუდ სწორ: „ჩქიმდა კოჩის მუთუნ ვა დუგურუაფ, ეცადას დუდის დო მუშით დიგურუას!“. თეცალ აზროვნება ღორონთიშ ხალხის ოკო ვა უღუდას. პირიქით, მზათ ვორეთ, ხვალე ჩქინ რჩქინა ვარინ, „ჩქინ დუდ“ ხოლო გეგნოფჩათ თინეფს, მიდგას ვოგურუანთ (1 თეს. 2:8). ჩქი მოკონა, თინეფქ, მიდგას ვოგურეთ, თიცალ ჯგირო ქიჸუან მომზადებულქ, ნამდა მუნეფს ხოლო შეიალებუან შხვეფშა გურაფაქ (2 ტიმ. 2:1, 2). თაშ ნამდა, თე პროცეს ვა ჩერდუ. ჩქი მზათ ვორეთ, ვოგურუათ შხვეფს დო თეს დიდ ხიოლ მოუღ ჩქინდა. უკულ ჩქი დუვოგურეთინ თინა ხოლო, შხვას ოგურუანს დო თეს თიშა ხოლო ხიოლ დო ბედნერობა მოუღ დო თაშ იგრძელებ ირიათო.

ᲛᲣ ᲤᲥᲘᲛᲘᲜᲐᲗ, ᲛᲣᲟᲐᲛᲡᲘᲗ ᲤᲘᲤᲥᲠᲔᲜᲗ, ᲜᲐᲛᲓᲐ ᲕᲐᲤᲐᲡᲔᲜᲐ ᲩᲥᲘᲜ ᲯᲒᲘᲠ ᲡᲐᲥᲛᲔᲔᲤᲡ

14. მუ რეაქცია უღუნა შხვეფს უმენტაშო, მუჟამსით ჯგირს ურთუთ?

¹⁴ მუჟამსით შხვეფს, განსაკუთრებულო, და დო ჯიმალეფს, ჯგირს ურთუთ, ბგინაფლენთ, ნამდა მარდულეფ რენა. მინშა თინეფ თეს წერილეფით ვარდა შხვანერო გიმოხანტუნა (კოლ. 3:15). ხიოლ მაძინუნა, მუჟამსით ვორწყეთ, ნამდა შხვეფ აფასენა ჩქინ კეთებულ ჯგირ საქმეეფს.

15. მუ ოკო ფშუდან, მუჟამსით თეშ იძირე, ნამდა მითინ ვაფასენს ჩქინ კეთებულ ჯგირ საქმეს?

¹⁵ მინშა შილებე შხვეფშა მოხვარას ჩქინ დრო, ენერგია დო ფარა ქიმკვახარჯათ, მარა კოჩ ვამრაგადუდან თეშ მადლობას დო თეშ იძირედას, ნამდა მითინს ვაინტერეს, მუ ვაკეთით თინეფშო. მუ მიმეხვარებუნა, თე დროს ხიოლქ ვამდინან დო გურქ ვა მომირთან? ქიგიშინით თე სტატიაშ მთავარ მუხლ, საქმეეფიშ 20:35. მუჭოთ თევრეშე იძირე, ხიოლ ჯგირიშ კეთებას მოუღ დო ვართ ხოლო თის, დამფასენა დო ვარ მიდგაინ ჩქინ კეთებულ საქმეს. ათეშენ, მადლობას მითინ ვამრაგადუდანინ ხოლო, გინოჭყვიდილ მაფუდან, ვემვოტუათ შხვეფშა ხიოლით ჯგირიშ კეთება. მორთ გუვარჩუათ მუსხირენ მხარე, მუთ თეს მიმეხვარებუნა.

16. მუ ოკო ფშუდან, მუჟამსით ჯგირს ვორთუთ?

¹⁶ რშუდან, მუჟამსით შხვეფს ჯგირს ურთუთ, იეჰოვაშ მაგალითის მეჸუნთ. იეჰოვა ირკოჩის ურთჷ ჯგირს, ვა უღჷ მნიშვნელობა, უფასენა თეს დო ვარ (მათ. 5:43—48). თინა მოპირუნა, ნამდა მუცალო ქიმიფქციებუთ დო „უკახალე დორთინაფაშ იმენდიშ“ უმშო გუკეთენთ შხვეფს ჯგირს-და, „მიბღენთ დიდ ჯილდოს“ (ლუკ. 6:35). თაშ ნამდა, ადამიანეფ მადლობას ირო ვაიწინან-და, გურქ ვა გოიტირხან. ვაგგოჭყორდან, იეჰოვა ხვამას ვამგარკენა  თიშ გურშენ, ნამდა ოხვარუთ შხვეფს დო ხიოლით ორთუთ ჯგირს (იგავ. 19:17; 2 კორ. 9:7).

17. ხოლო მუჭო შემლებუნა მივაჸუნათ იეჰოვაშ მაგალითის? (ლუკ. 14:12—14).

¹⁷ იეჰოვაშ მაგალითის თიმწკუმა ხოლო მეპჸუნთ, მუჟამსით ლუკაშ 14:12—14-ის ინოჭარილ იესოშ სიტყვეფიშ თანახმას იფქციებუთ (წეკითხით). მუშო ოკო რაგად, მუთუნ გლახა ვა რე, ჸუდეშა დუვაპატიჟათ ვარდა ჯგირ უკეთათ თინეფს, მიდგას აშო ხოლო შეულებ ჩქინდა თეშ კეთება. მარა, მუჭო ოკო მიფქცუათ, მუჟამსით ვატყუაფუთ, ნამდა უმენტაშო, თიცალ კათას ურთუთ ჯგირს, მიდგაშეთ აშო ხოლო ველუთ მუდგაინს? ოკო მივაჸუნათ იესოშ რჩევას დო თიცალეფწკუმა ხოლო ვორდათ ხეგოფაჩილ, მიდგაშ გურშენ მიჩქუნა, ნამდა აშო იგივე ვაკეთებე ჩქინდა. თაშ ქიმიფქციებუთ-და, მანგარ ხიოლს ქიბგინანთ, მუშენდა თეთ იეჰოვაშ მაგალითის მეპჸუნთ. თეწკუმა ართო, მუჟამსით ჩქინ კეთებულ ჯგირ საქმეეფშო მანგიორს ვეველუთ, თენა მიმეხვარებუნა, თიმწკუმა ხოლო ვა ვოდინუათ ხიოლ, მუჟამსით შხვეფ მადლობას ვამრაგადუნა ჩქინ სიკეთეშენ.

18. მუ მიმეხვარებუნა, ვემვოტუათ შხვეფშა ჯგირიშ კეთება?

¹⁸ ეჭვიშ თოლით ვა უჯინათ შხვეფს (1 კორ. 13:7). მიდგაინ ჩქინ კეთებულ ჯგირ საქმეშენ მადლობას ვამრაგადუნან-და, შემლებუნა დეფიფქრათ: მართალო ვაფასენსო ჩქიმ სიკეთეს დოვარ უბრალოთ, გურ გიშუჸუნუ მადლობაშ რაგადის? შილებე მადლობას ვამრაგადუნან თეს შხვა მიზეზეფ ხოლო უღუდას. მაგალთო, მიდგაინ შილებე მთელ გურით აფასენდას ჩქინ კეთებულ საქმეს, მარა უჭირდას თეშ გიმოხანტუა; შილებე თიშ გურშენ, ნამდა ოონჯღორ მოხვარაშ მეღება, განსაკუთრებულო, ულირს მუ ქახვარუდ იშო შხვეფს-და. ვა უღჷ მნიშვნელობა, მუ რე მიზეზ, მადლობა ვამწისინ, და დო ჯიმალეფ მართალო ქომიჸორან-და, ეჭვიშ თოლით ვა უჯინეთ თინეფს დო ხიოლით გუვაგრძელენთ ჯგირიშ კეთებას (ეფეს. 4:2).

19, 20. მუშენ რე მნიშვნელოვან, ხეთეშე ვეველუდათ მადლობაშ რაგადის? (ქოძირით სურათ).

¹⁹ უცფას ველუდათ მადლობას. ჯგირიშ კეთებაშ გურშენ მეფე სოლომონქ თეცალ მუდგარენ ჭარჷ: „წყარს ქუჸუნე სქან ქობალ დო  ბრელ დღაშ უკულ ქოძირუნქ თის“ (ეკლ. 11:1). თე სიტყვეფშე იძირე, ნამდა ნამთინექ შილებე ქიანაშ ხანიშ უკულ ქომწუან მადლობა ჩქინ კეთებულ საქმეშენ. ქობძირათ ართ შემთხვევა, ნამუთ ოძირანს თე სიტყვეფიშ ჭეშმარიტებას.

²⁰ წანეფიშ წოხოლე ართ რაიონულ ზედამხედველიშ მეუღლექ ახალ ნათილ დას ჭიჭე წერილ ქიმეჭარ, სოდეთ ელუჩ, ნამდა ბოლოშა იეჰოვაშ ართგურქ ქუდოსქიდუკო. სოდგარენ, ბრუო წანაშ უკულ თე დაქ ხოლო ქიმეჭარ თის წერილ, სოდეთ ჭარუნდჷ: „ვეშემლებუდ, ვა მორჭარიკო დო ვაიწიკო, მუჭო მიმეხვარ სქან წერილქ თე წანეფიშ დინახალე, სი შურო აზრის ვა რდინჷ თეშ. წერილს მანგარ გემუან სიტყვეფ რდჷ, მარა ირფელიშ უმოსო ჩქიმდა თი ბიბლიურ მუხლიქ იმოქმედ, ნამუთ თექ გიჭარუდ. ამდღარ დღაშახ ფშჷ თე მუხლ“. a წერილს თე დაქ გეუნწყჷ რაიონულ ზედამხედველიშ მეუღლეს, მუ სირთულეეფქ აჸუ მიკაულარქ დო უკულ უწუ: „მინშა თეშ ვორდჷ, ნამდა მუთუნ ვა მოკოდ, ვართ იეჰოვაშ მსახურება, მარა სქან მუნაჭარა მუხლ ქუგმაშინედუნ, ძალა მუმაჩამუდ, იეჰოვაშ ართგურქ ქუდოფსქიდიკო. შემლებ გიწუე, ნამდა თე მუხლიქ მომიჸუნ ამდღარ დღაშახ“. წერმიდგინით, მუ ბედნერ იჸუაფუდ რაიონულ ზედამხედველიშ მეუღლე, მუჟამსით „ბრელ დღაშ უკულ“ თე წერილს მიღენდჷ. მინშა შილებე ჩქი ხოლო ბრელ ხანიშ მიკულაშ უკულ ქომწუან მადლობა თი სიკეთეშო, მუთ ართ დროს უკეთით მიდგაინს.

21. მუშენ გაფუნა გინოჭყვიდილ, იეჰოვაცალ ხეგოფაჩილ რდათჷ?

²¹ მუშო ოკო რაგად, მოხიოლუნა, მუჟამსით მიდგაინ ჯგირს მიკეთენა. მარა, მუჭოთ დაჭყაფუს მიფშინეთ, იეჰოვაქ თეშ გუმოჭყეს, ნამდა ჩქინდა უმოს ხიოლ შხვეფშა ჯგირიშ კეთებას მოუღ. მოხიოლუნა, და დო ჯიმალეფშა მოხვარაშ საშვალება მიღუნან. თიმწკუმა ხოლო ბღებულენთ ხიოლს, მუჟამსით თეშ გურშენ მადლობას მირაგადუნა. მარა მადლობა ვამწუანინ ხოლო, ჩქი იშენით მიღუნა ხიოლიშ მიზეზ, მუშენდა მიჩქუნა, სწორას იფქციებუთ, ჯგირს ვორთუთინ. დღას ოკო ვაგმოჭყორდან, ნამდა შხვეფს მუდგაზმა ვა უკეთათინ, „იეჰოვას ბრელით უმოსიშ მოჩამა“ შეულებ ჩქინდა (2 მატ. 25:9). თინა ჩქინო ორთუნ თიზმა, დღას ვა მაკეთებენა იშო შხვეფშა. არძაშ უმოს დიდ ხიოლ იეჰოვაშე ჯილდოშ მეღებას მოუღ. ათეშენ მორთ გინოჭყვიდილ მაფუდან, მივაჸუნათ ჩქინ გურხვე ზეციერ მუმაშ, იეჰოვაშ, მაგალითის.