1, 2. ა) მუ სიტუაცია უღუდეს ებრაელ ქრისტიანეფს, მუჟამსით თინეფს პავლექ წერილ მეჭარ? ბ) მუშენ რდჷ მოციქულიშ წერილ დროულ?

 ᲔᲑᲠᲐᲔᲚ ქრისტიანეფს, მით იერუსალიმს დო იუდეას ოხორანდეს, იესოშ ღურაშ უკულ მანგარ სირთულეეფქ აჸის მიკაულარქ. ქრისტიანულ კრებაშ ჩამოყალიბებაშე მალას ღორონთიშ ხალხიშ თხოზინქ ქიდიჭყჷ (საქ. 8:1). სოდგარენ 20 წანაშ უკულ ქრისტიანეფს ეკონომიკურო ხოლო მანგარო გაკუჭირდეს, მუდგაშ მიზეზ შილებე თი შქირენა რდუკო, ნამდგაქ თიმ დროს მთელ ქიანას იჸუ (საქ. 11:27—30). მარა ახ. წ. 61 წანაშო ებრაელ ქრისტიანეფს შურიშ მოდგუმაშ საშვალებაქ ქიმიაჩეს, მუშენდა თეშიო-თაშიო მშვიდობიან პერიოდიქ ქუდოდირთჷ თინეფშო, თი ირფელიშ კარს, მუთ წიმი ელუდეს. ზუსტას თე დროს პავლექ თინეფს მეჭარ წერილ, ნამდგაშ გურშენ შემლებუნა ფთქუათ, ნამდა მართალო დროულ რდჷ.

² ებრაელ ქრისტიანეფქ თე მშვიდობიან პერიოდით ოკო ვედეღორესკო, მუშენდა თინა ბრელ ხანს ვეგეგრძელებუდ. იესოშ ნაწინასწარმეტყველებ იუდეველეფიშ სისტემაშ ბოლო მონჭაფილ რდჷ (ლუკ. 21:20). ათეშენ, ქრისტიანეფქ ოკო მემზადესკო თი დიდ გაჭირებაშ გინაღალარო, ნამუთ წიმი ელუდეს. ზუსტას თეშ გურშენ რდჷ პავლეშ წერილ დროულ. მართალ რე, ვართ პავლეს დო ვართ იუდეას მახორუ შხვა ქრისტიანეფს ვა უჩქუდეს, ზუსტას მუჟამ მიშჷ აღსასრულ, მარა მოციქულშე მეღებულ რჩევეფ ქიმეხვარებუდ თინეფს, უმოსო გევითარესკო თიცალ თვისებეფ, მუნერით რე რწმენა დო მოთვინება, მუთ ირფელს გეგნაღალაფუანდ (ებრ. 10:25; 12:1, 2).

3. ჩქინო მუთ რე საინტერესო ებრაელეფშა მეჭარილ წერილ?

 ³ ჩქი ებრაელ ქრისტიანეფშე ბრელით უმოს დიდ გაჭირება მელუნა წიმი (მათ. 24:21; გამოცხ. 16:14, 16). ათეშენ მორთ გუვარჩუათ მუსხირენ რჩევა, ნამუთ თინეფს იეჰოვაქ პავლეშ საშვალებათ მეჩჷ დო ჩქი ხოლო მანგარო გიმმოდირთუნა.

ᲘᲛᲜᲭᲣᲐᲗ ᲫᲘᲜᲐᲗᲔᲑᲣᲚᲝᲑᲐᲨᲐ

4. მუ სირთულეეფს შეხვადეს იუდეველ ქრისტიანეფქ? (ქოძირით სურათ).

⁴ თი იუდეველეფქ, მიდგაქ ქრისტიანეფო გინირთეს, მანგარ დიდ სირთულეს ქეშეხვადეს. თინეფს დიდ ცვლილებაშა აფუდეს მიორჩქვანალ. ართ დროს იუდეველეფ იეჰოვაშ გიშაგორილ ხალხ რდესჷ. მეფეეფ, მით იერუსალიმშე მართუნდეს ქიანას, ღორონთიშ წარმომადგენელეფ რდესჷ დო თექიან ტაძარ წმინდა თაყვანიშმცემლობაშ ცენტრ რდჷ. ღორონთიშ ართგურ იუდეველეფ საუკუნეეფიშ დინახალე მეჸუნდეს მოსეშ კანონს, ნამდგას რელიგიურ წინამძღოლეფ ეუნწყუნდეს. თინეფ მეჸუნდეს წესეფს, ნამუთ ოხუდ ოჭკუმალს, წინადაცვეთას დო უცხოტომელეფწკუმა ურთიერთობას. მარა იესოშ ღურათ ირფელქ დითირ. მოსეშ კანონს ძალაქ მეუდინ დო იეჰოვა მეტო ვა თხულენდჷ თიშ მეჸუნას დო ტაძარს მსხვერპლიშ შეწირუას (ებრ. 10:1, 4, 10). თე დიდ ცვლილებეფშა მერჩქვანაქ სულიერო მოწიფულ ქრისტიანეფს ხოლო გუჭირდეს, მაგალთო, მოციქულ პეტრეს (საქ. 10:9—14; გალ. 2:11—14). სირთულე რდჷ თინა ხოლო, ნამდა ახალ რწმენაშ მეღებაშ გურშენ იუდეველ რელიგიურ წინამძღოლეფქ ქრისტიანეფს გამათხოზეს.

5. ნამ ჟირ მხარეშე ხვადუდეს წინააღმდეგობას ქრისტიანეფ?

⁵ ებრაელ ქრისტიანეფს ქოთ კრებაშ გალე დო ქოთ კრებაშ დინახალე ჸუნდეს მოწინააღმდეგეეფ. იუდეველ რელიგიურ წინამძღოლეფ თიშენ თხოზუდეს ებრაელ ქრისტიანეფს, ნამდა თინეფქ ვარია თქუეს იუდაიზმშე დო ქრისტიანობა მიღეს. ავრე, კრებაშ დინახალე, თინეფ, მით დუდის დვანდეს ქრისტიანობაშა, მოსეშ კანონიშ მეჸუნას იჩემენდეს, შილებე თიშ გურშენ, ნამდა თხოზინშა ოშქურუდეს (გალ. 6:12). მუ მეხვარებუდ თე  ქრისტიანეფს, ართგურო ქიგედირთესკო ჭეშმარიტებაშ მხარეს?

6. მუ ელუჩ პავლექ თანაქრისტიანეფს? (ებრ. 5:14—6:1).

⁶ ებრაელეფშა მეჭარილ წერილიშ ბოლოს პავლექ ელუჩ თანაქრისტიანეფს, ირიათო იგურუესკო ღორონთიშ სიტყვა დო იფიქრესკო ნაკითხირშე (წეკითხით ებრაელეფიშ 5:14—6:1). პავლექ ებრაულ წერილეფ გიმირინუ დო გეუნწყჷ და დო ჯიმალეფს, მუსხით უმოს მაღალას გერდჷ ქრისტიანობა იუდაიზმშე. a პავლექ თენა თიშენ აკეთ, ნამდა უჩქუდ, და დო ჯიმალეფ უმოს რჩქინას მიღენდეს დო ღორონთიშ სიტყვას უმოს ტომბას გეგმირკვიენდეს-და, თენა მეხვარებუდ თინეფს, გეგშეჩინესკო დო ველერჩქილუესკო ტყურა გურაფეფ, ნამუთ ჭეშმარიტებაშ შარას ეიოჩილითუანდ.

7. ებრაელ ქრისტიანეფცალო, მუ სირთულეეფს ფხვადუთ ამდღა?

⁷ ჩქი ხოლო ქიანაშ ინფორმაციას იბრჩქილუაფუთ, ნამუთ ოწინააღმდეგ იეჰოვაშ სამართლიან ნორმეფს. ჩქინ მოწინააღმდეგეეფ ხშირას მაკრიტიკენა თიშ გურშენ, ნამდა მეპჸუნთ ბიბლიაშა გერსხილ ზნეობრივ ნორმეფს. ვორწყეთ, მუჭოთ დღა მეურსუნ თეშ, ქვეყნიერებაშ აზროვნება უმოსო დო უმოსო ეთხიებ ღორონთიშ დოდგინელ ნორმეფს (იგავ. 17:15). ათეშენ მანგარ მნიშვნელოვან რე, შემლებუდან ტყურაშ დო მართალიშ ართიანშე გიშაგორუა, ნამდა მოწინააღმდეგეეფს ვეშიალებუან გურ გემიჸოთან ღორონთიშ ნორმეფით ცხოვრებაშა დო ჭეშმარიტებაშ შარას ემოჩილითუან (ებრ. 13:9).

8. მუჭო იმნჭუათ ძინათებულობაშა?

⁸ ჩქი ხოლო ოკო მივაჸუნათ ებრაელ ქრისტიანეფშა მეჩამილ პავლეშ რჩევას დო იმნჭუათ ძინათებულობაშა. თენა ნიშნენს, ჯგირო გეგმიბრკვიათ ღორონთიშ სიტყვა, ნამდა უმოსო ქინვანჭათ იეჰოვაშ აზროვნებას. თენა მეძღვინუაშ დო ნათუაშ უკულ ხოლო ოკო გუვაგრძელათ. ვა უღჷ მნიშვნელობა, მუსხი ხანიშ ქრისტიანეფ ვორეთ, არძაქ ირდღას ოკო იპკითხათ დო იბგურუათ ღორონთიშ სიტყვა (ფსალმ. 1:2). პირად გურაფა ჯგირო ქუმაფუნა გენწყილ-და, თენა ქიმმეხვარებუნა, თი თვისებაშ გავითარებას, ნამდგაშ გურშენ პავლექ ებრაელ ქრისტიანეფს უწუ, ნამდა მანგარ მნიშვნელოვან რდჷ. თენა რე რწმენა (ებრ. 11:1, 6).

ᲗᲘᲪᲐᲚᲔᲤ ᲕᲝᲠᲓᲐᲗ, ᲛᲘᲗ ᲠᲬᲛᲔᲜᲐᲗ ᲒᲘᲜᲝᲡᲥᲘᲓᲣ

9. მუშენ ოსაჭირუდეს ებრაელ ქრისტიანეფს ძალიერ რწმენა?

⁹ ებრაელ ქრისტიანეფს ძალიერ რწმენა დესაჭირებუდეს, ნამდა გინასქიდესკო თი გაჭირებას, ნამუთ მალას ქუდოდირთუდ იუდეას (ებრ. 10:37—39). იესოქ გაფრთხილ მუშ მიმაჸუნალეფ, მუჟამსით იერუსალიმს ნტერეფიშ ჯარ ქუგუდირთუ, გვალეფშა ინტითია. თე მითითება არძა ქრისტიანს ოხუდ; ქოთ იერუსალიმს დინახალე ცხოვრენდესინ თინეფს დო ქოთ თინეფს, მით ქალაქიშ გალე ოხორანდეს (ლუკ. 21:20—24). ჯვეშო ქიანას ნტერიშ ჯარ ქიგიანთხუდუნ, ხალხ გალავან უღუდუნ ფერ ქალაქეფშა მიშჷ დუდიშ გითაფორაფშა, მაგალთო, მუნერით რდჷ იერუსალიმ. ათეშენ იესოშ მითითება, გვალეფშა ინტითია, ართ მეჯინათ ლოგიკურ ვერწყებედუკონ იჸიდ დო თეშ კეთებას მანგარ დიდ რწმენა დესაჭირებუდ.

10. მუშ კეთებას მეხვარებუდ ებრაელ ქრისტიანეფს ძალიერ რწმენა? (ებრ. 13:17).

¹⁰ თეწკუმა ართო, მნიშვნელოვან რდჷ, ებრაელ ქრისტიანეფ ონდუდესკო თინეფს, მიდგაშა იესოს კრებაშ ხელმძღვანელობა აფუდ დავალებურ. ალბათ, ხელმძღვანელ ჯიმალეფ კონკრეტულ მითითებეფს ქიმეჩანდეს კრებეფს დო ქუწინდეს, მუ მომენტის ოკო ინტესკო დო მუჭო აკეთესკო თენა ორგანიზებულო (წეკითხით ებრაელეფიშ 13:17). ებრაელეფიშ 13:17-ის გიმორნაფილ ბერძნულ სიტყვა, ნამუთ თარგმნილ რე, მუჭოთ „დემორჩილით“,  ნიშნენს თიცალ მორჩილებას, მუჟამსით ბოლოშახ რჯერსჷ თი პიროვნებაშ, მით მითითებას გარზენს, დო უბრალოთ თიშენ ვამორჩილუქ, ნამდა შხვა შარა ვაიღ. ებრაელ ქრისტიანეფ თეიშახ ხოლო ოკო ონდუდესკო უხუცესეფს დო მეჸუნდესკო თინეფიშ მითითებეფს, ონდო გაჭირება დოდირთუდ. თინეფ ხელმძღვანელ ჯიმალეფიშ მითითებეფს მშვიდობიან დროს ხოლო ქიდემორჩილებუდეს-და, უმოს ადვილ აჸიდეს, რთულ დროს ხოლო გაკეთესკო თენა.

11. მუშენ რე ძალიერ რწმენა მნიშვნელოვან ქრისტიანეფშო ამდღა?

¹¹ პირველ საუკუნეშ ქრისტიანეფცალო, ჩქი ხოლო მოსაჭირუნა ძალიერ რწმენა, მუშენდა თიცალ დროს ფცხოვრენთ, მუჟამსით ადამიანეფიშ უმენტაშის ვა ჯერსჷ, ნამდა თე ქვეყნიერებაშ აღსასრულ ქუდოდირთუ. თეს ურაგადუთინ, ნამთინე გვალო გუმაციგანუნა (2 პეტ. 3:3, 4). თეს გეძინელ, მართალ რე, ბიბლია ბრელ დეტალს მოგებაფუანა დიდ გაჭირებაშ გურშენ, მარა რე ბრელ მუდგარენ, მუთ დიო ხოლო ვა მიჩქუნა. ათეშენ მოსაჭირუნა ძალიერ რწმენა, მუშენდა ბჯერდან, ნამდა იეჰოვაშ დღა ზუსტას დანიშნულ დროს ქუმურს დო თინა აუცილებერო დოფთხილანა თიმწკუმა (აბაკ. 2:3).

12. მუ გინმოტენა დიდ გაჭირებას?

¹² თეწკუმა ართო, მნიშვნელოვან რე, პწანდან, ნამდა იეჰოვა ამდღა „ართგურ დო გონიერ მონაშ“ საშვალებათ ხელმძღვანელენს მუშ ხალხის (მათ. 24:45). დიდ გაჭირება ქიდიჭყაფუნ, შილებე მიბღათ თიცალ მითითებეფ, ნამდგაშა ჩქინ გინოსქილადა იჸუაფ დამოკიდებულ, ზუსტას თეშ, მუჭოთ ებრაელ ქრისტიანეფ მიღენდეს მითითებეფს, რომიშ ჯარქ იერუსალიმს ქადირთუნ. თაშ ნამდა, ასეშე ოკო ვონდუდათ თი ჯიმალეფს, მიდგას იეჰოვაქ ხელმძღვანელობა ჩაბარ, დო ვეფიფქრათ, ნამდა თინეფიშ მითითებეფიშ მეჸუნა ასეშე ქომჭირან-და, დიდ გაჭირებაშ დროს თიმ წუთ დო ქიმვაჸუნუთ.

13. მუშენ რდჷ ებრაელეფიშ 13:5-ის ინოჭარილ რჩევაშ მეჸუნა ჭკვერულ ქრისტიანეფშო?

¹³ ონდო სიტუაცია თეშ მიდეშ, ნამდა ონტებელ აჸიდეს, ებრაელ ქრისტიანეფს ხოლო ართ მუდგარენშა აფუდეს ყურადღება მიოქციებელ — თინეფქ ფარაშ ჸოროფაშ უმშო ოკო იცხოვრესკო დო იეჰოვაშ მსახურება ცხოვრებას პირველ ადგილს ქიგიორინუესკო (წეკითხით ებრაელეფიშ 13:5). თე ქრისტიანეფშე ნამთინეს შქირენაშ დო გაჭირებაშ პერიოდ აფუდ მიკნაულა (ებრ. 10:32—34). მართალ რე, თინეფქ თიმწკუმა ქუგურზეს თე ირფელს სახიოლო ამბეშ გურშენ, მარა ასე შილებე ნამთინე ფარაშ შაყარუაშა რდუკო გინულირ თი იმენდით, ნამდა თინა დოთხილანდ. მუ ფარას დარსხებედ თინეფ იერუსალიმიშ განადგურებაშე?! (იაკ. 5:3). სინამდვილეს დარსხება ვარ, ნტებაშ დრო ქიმიშუნ, ფარა უჸორდუნ თინეფს უმოს ძნელ აჸიდეს ჸუდეშ დო ქონებაშ დოტება.

14. მუჭო მიმეხვარებუნა ძალიერ რწმენა, სწორ გადაწყვეტილებეფ მიბღათ ფარაწკუმა დაკავშირებით?

¹⁴ თე ქვეყნიერებაშ აღსასრულ მანგარ ხოლოს რენ თენა დასურო ქოპწანან-და, ვედიპჭყანთ ფარაშ დო ქონებაშ შაყარუას, მუშენდა მიჩქუნა, ნამდა დიდ გაჭირებაშ დროს ფარას მუთუნ ფას ვაღვენუ. მუჭოთ ბიბლიას ჭარჷ, „ხალხ ვარჩხილს შარას ქუმწარღვანს დო ოქრო გეჯოგებუნა“, მუშენდა თინეფ ქიმეხვადუნა, ნამდა „იეჰოვაშ რისხუაშ დღას ვართ ვარჩხილს არსხებე დო ვართ ოქროს“ (ეზეკ. 7:19). თიშ მანგიორო, ნამდა ფარაშ შაყარუას გინვაჸუნათ, უჯგუშ იჸუაფ, ხვალე თისხი მიღუდან, მუსხით ჩქინ ოჯახიშ მიკაჯინალო დო იეჰოვაშ მსახურებაშო მოსაჭირუნა. ათეშენ ოკო ვეცადათ, აუცილებერ ვა მაფუნან-და, ვეგიბდვათ ვალ დო ვართ ჩქინ ქონებაშ მიკოლუაფას გინვაჸუნათ. თიშა ხოლო გურ რე გაჩამალ, თისხით ვემეჸოროფან ჩქინ ქონებაქ, ნამდა თიშ უმშო ვეშემლებუდან (მათ. 6:19, 24). თაშ ნამდა, აღსასრულიშ მოულაშახ შილებე ჩქინ რწმენა ფარაქ დო ქონებაქ გეგმოცადას.

 ᲒᲐᲠᲖᲔᲑᲐ ᲒᲝᲡᲐᲭᲘᲠᲣᲜᲐ

15. მუშენ ოსაჭირუდეს ებრაელ ქრისტიანეფს მოთვინება?

¹⁵ იუდეას სიტუაცია ჭიე-ჭიეთ აკმოცენდჷ, ათეშენ ებრაელ ქრისტიანეფს რწმენაშ გამოცდეფშა აჸიდეს გარზებელ (ებრ. 10:36). მართალ რე, თინეფშე ნამთინეს მიკნაულა აფუდ მანგარ თხოზინ, მარა რდჷ ბრელ თიცალ ხოლო, მიდგაქ უმოს მშვიდობიან პერიოდის გეგჷ ჭეშმარიტება. ათეშენ პავლექ თინეფს ქუგაშინ, ნამდა მემზადესკო უმოს თხოზინშო დო თიშო ხოლო, ნამდა, იესოცალო, ბოლოშახ ართგურო ქუდოსქიდესკო (ებრ. 12:4). ნამთინე იუდეველს ახანგენდჷ თიშ ძირაფა, ნამდა ბრელ გებულენდჷ ჭეშმარიტებას დო ქრისტიანო გინირთუდ. პავლე ებრაელეფიშ წიგნის ჭარუნდუკონ თეიშახ მუსხირენ წანათ ადრე იუდეველეფ გაჸალ მოციქულიშ იერუსალიმს ძირაფაქ. 40-შე უმოს კოჩიქ ქიმირაგადუ დო დიფუჩუეს, ნამდა ვართ ჭკუმუნდეს დო ვართ შუნდეს, სოიშახ პავლეს ვა ჸვილუნდეს (საქ. 22:22; 23:12—14). თეშმანწარას ოწინააღმდეგუდეს დო ჯოგუდესინ თიშ უმკუჯინუო, ებრაელ ქრისტიანეფქ ოკო ვემიოტუესკო თაყვანიშცემაშო ართო აკოშაყარუა, სახიოლო ამბეშ ქადაგება დო რწმენაშ გამანგარება.

16. მუჭო მიმეხვარებუნა ებრაელეფიშ წერილ, სწორ დამოკიდებულება მიღუდან თხოზინიშ მიმართ? (ებრ. 12:7).

¹⁶ მუ მეხვარებუდ ებრაელ ქრისტიანეფს, გაურზესკო წინააღმდეგობას? პავლეს ოკოდ, ქიმეხვარუკო თინეფს, ნამდა ქოძირესკო, მუ ჯგირ შედეგეფს მოუღანდ სირთულეეფ. თიქ იუდეველ ქრისტიანეფს ეუნწყჷ, ნამდა ღორონთიქ შილებედ რწმენაშ გამოცდეფ გიმირინუკო თინეფშა დაგურაფალო დო გიოწურაფალო (წეკითხით ებრაელეფიშ 12:7). თეშ ჭყოლოფათ, თინეფ გავითარენდეს დო გაუჯგუშენდეს იეჰოვაშ მოსაწონ თვისებეფს. ებრაელ ქრისტიანეფ მთელ ყურადღებას სირთულეეფიშ ჯგირ შედეგეფშა გეგნიღანდეს-და, ვა გუჭირდუდეს გარზება (ებრ. 12:11).

17. მუშენ არაგადედ პავლეს ებრაელეფშა თამამას გარზებაშ გურშენ?

 ¹⁷ პავლექ ებრაელ ქრისტიანეფს ელუჩ, გაბედულო ქიგედირთესკო დო დუდ ვემუდვესკო სირთულეეფს. თის უღუდ თეშ რაგადიშ ოჭიშ, მუშენდა ქრისტიანო გინორთაშახ მუ ხოლო თხოზუდ ღორონთიშ ხალხის დო ჯგირო უჩქუდ, მუშ მიკულა უხვადუდეს თინეფს. პავლეს თინა ხოლო ჯგირო არჩქილედ, მუჭო შილებედ თხოზინიშ გარზება, მუშენდა ქრისტიანო გინირთუნ თიშ უკულ მუქ ხოლო შეხვად უდუნდებელ თხოზინს (2 კორ. 11:23—25). თე ირფელ აფუდ მიკნაულან თიშ გურშენ პავლეს თამამას არაგადედ თე საკითხშენ. თიქ ქუგაშინ ქრისტიანეფს, ნამდა სირთულეეფიშ გარზებელო იეჰოვაშა ოკო რდესკო მენდებულ დო ვართ ხოლო მუნეფიშ დუდშა. ზუსტას თენა არზენდჷ პავლეს გაბედულებას დო ათეშენ თქუ: „იეჰოვა ელამრე, ვა მაშქურინე“ (ებრ. 13:6).

18. მუს ოკო ველუდათ თითოულ ქრისტიან დო მუ ოკო ვაკეთათ ასეშე?

¹⁸ ამდღა ნამთინე ჩქინ და დო ჯიმას მანგარ თხოზინშა უხვადუ გარზება. შემლებუნა ირიათო იბლოცათ თინეფშო. მინშა შილებე გვალო თიშ საშვალებაქ ხოლო ქუმმაჩან, ნამდა პრაქტიკულო ქიმვეხვარათ (ებრ. 10:33). მარა ოკო ვაგმოჭყორდან, ნამდა მუ ამდღა, მუ ჭუმე, თითოულს მაჸინა გარზებელ თხოზინშა, მუშენდა, მუჭოთ ბიბლიას ჭარჷ, „არძას, მიდგას ოკო, ქრისტეშ მიმაჸუნალ დო ღორონთიშ ართგურ რდასჷ, თხოზუდან იჸი“ (2 ტიმ. 3:12). ათეშენ არძაქ ოკო მივემზადათ თი ირფელშო, მუთ წიმი მელუნა. მორთ ბოლოშა მივენდათ იეჰოვას დო ბჯერდან, ნამდა თიშ მოხვარათ, ირნერ სირთულეს გეგნიბღანთ. ბოლოშა თიშ ართგურეფ ქუდოფსქიდუთ-და, მუშ დროს იეჰოვა შურს მომიდგუნა (2 თეს. 1:7, 8).

19. მუ ოკო ვაკეთათ, ნამდა მივემზადათ დიდ გაჭირებაშო? (ქოძირით სურათ).

¹⁹ მუშო ოკო რაგად, ებრაელეფშა მეჭარილ პავლე მოციქულიშ წერილ გურშა ელუკინანდ პირველ საუკუნეს მახორუ ქრისტიანეფს დო მამზადენდ თი სირთულეეფშო, ნამუთ წიმი ელუდეს. პავლექ ელუჩ თანაქრისტიანეფს, ჯგირო გეგმირკვისკო წმინდა წერილეფ დო უჯგუშო ქინანჭესკო თის, მუთ მეხვარებუდ თინეფს, გეგშეჩინესკო დო ველერჩქილუესკო თი გურაფეფ, ნამუთ რწმენას დაუსუსტენდ. პავლექ ქრისტიანეფს რწმენაშ გამანგარება ხოლო ელუჩ, ნამდა ვა გუჭირდესკო იესოშ დო თი ჯიმალეფიშ მითითებეფიშ მეჸუნაქ, მიდგას კრებაშ ხელმძღვანელობა აფუდ დავალებურ. თეწკუმა ართო, მოციქულქ ებრაელ ქრისტიანეფს ელუჩ, სირთულეეფს უჯინესკო, მუჭოთ გეწურაფას მოჸოროფე ზეციერ მუმაშე, მუთ თინეფს გარზებას ქიმეხვარებუდ. მორთ ჩქი ხოლო გეგმიბრინუათ ებრაელეფიშ წიგნის მოჩამილ რჩევეფ, მუთ მიმეხვარებუნა, ბოლოშა ართგურო ქუგვარზათ (ებრ. 3:14).