1. მაგალითიშ საშვალებათ გენწყით, მუშენ ოკო მივაჸუნათ იეჰოვაშ ხემძღვანელობას.

 ᲬᲔᲠᲛᲘᲓᲒᲘᲜᲘᲗ, ნამდა ტყას მედინით. მანგარო გოშქურუნა, მუშენდა თექიანობა გოფშა რე ტყარ ცხოველეფით დო შხამიან მცენარეეფით; ირფელშა ძიგირ დო კაკლარს აფჷ მინოლუაფირ დო ვაიჩქუნა, ნამ რობუს ალანთხუთ. ალბათ მილიონ გიღირუდან იჸი თიცალ კოჩ, მიდგას ჯგირო უჩქჷ თექიან გითოლ-მითოლ, ქეწკაჸუნუნა დო გეგშაიჸუნანა. ზუსტას თეცალ ტყას მოგენს თე ქვეყნიერება, სოდეთ ირ ნაბიჯის შეფხვადუთ საფრთხეეფს, ნამუთ იეჰოვაწკუმა ურთიერთობას გილამლუანა. მარა ჩქი მშვიდას ვორეთ, მუშენდა ეწოპჸუნა იეჰოვა, დიდებულ ხემძღვანელ. თის არძაშ უჯგუშო შეულებ ქიმმეხვარან, გეგშვაგათ თე „ოშქურანჯ ტყაშე“ დო გენომიჸუნან ახალ ქვეყნიერებაშა, სოდეთ მარადიულ ცხოვრებათ გეფხარენთ.

2. მუჭო ფხემძღვანელენა იეჰოვა?

² მუჭო ფხემძღვანელენა იეჰოვა? არძაშე მთავარ, მუდგას თეშო ირინუანს, რე მუშ სიტყვა, ბიბლია. მარა, თეწკუმა ართო, თის ადამიანეფ ხოლო აფჷ დორინაფილ ხემძღვანელობაშო. მაგალთო, „ართგურ დო გონიერ მონაშ“ ხეთ მარზენა სულიერ საზრდოს, ნამუთ ჭკვერულ გადაწყვეტილებეფიშ მეღებას მოხვარუნა (მათ. 24:45). მუშ ხალხიშ ხემძღვანელობაშო თინა ირინუანს შხვა ჯიმალეფს ხოლო, მაგალთო, რაიონულ ზედამხედველეფს დო უხუცესეფს. თე ჯიმალეფ ზრუნენა ჩქინდე დო თინეფშე მეღებულ მითითებეფ მოხვარუნა რთულ სიტუაციეფიშ გინოღალას. მართალო, მუ მარდულ ვაფუთ იეჰოვას, ნამდა თეცალ რთულ დროს ხემძღვანელობაშ უმშო ვამტენა! თინა ირნერო მოხვარუნა, ვა ვოდინუათ თიშ მოწონა დო ვეგნურთათ მარადიულ ცხოვრებაშა მიმაჸუნაფალ შარას.

3. მუს გუარჩიენთ თე სტატიას?

³ მარა მინშა შილებე გამჭირდან იეჰოვაშ ხემძღვანელობაშ მეჸუნაქ, განსაკუთრებულო თიმწკუმა, მუჟამსით მითითებეფს  არასრულყოფილ ადამიანეფ მარზენა. მუშენ შილებე თაშ მოხვადას? მუშენდა მეღებულ მითითება შილებე ვა მობწონდან ვარდა თიცალ არალოგიკურ მაძირედან, ნამდა იფიფქრათ, თენა ღორონთშე ვეჸუაფუდ. თეცალ დროს განსაკუთრებულო მოსაჭირუნა, ბჯერდან, ნამდა იეჰოვა ხემძღვანელენს მუშ ხალხის დო თიშ ხემძღვანელობაშ მეჸუნას ირიათო ჯგირობუა მოუღ ჩქინდა. თე სტატიას გუარჩიენთ: 1) მუჭო ხემძღვანელენდჷ იეჰოვა მუშ ხალხის ულირს, 2) მუჭო ხემძღვანელენს ამდღა დო 3) მუ ჯგირობუა მოუღ თიშ ხემძღვანელობაშ მეჸუნას. თე ირფელიშ გარჩიება უმოსო გამიმანგარენა იეჰოვაშ მიმართ ნდობას.

ᲛᲣᲭᲝ ᲮᲔᲛᲫᲦᲕᲐᲜᲔᲚᲔᲜᲓᲷ ᲘᲔᲰᲝᲕᲐ ᲘᲡᲠᲐᲔᲚᲡ

4, 5. მუჭო ოძირუ იეჰოვაქ ისრაელეფს, ნამდა მოსეშ საშვალებათ ხემძღვანელენდჷ თინეფს? (ქოძირით სურათ).

⁴ იეჰოვაქ მოსე გიორინუ ისრაელეფიშ წინამძღოლო, ნამდა დერსხუკო თინეფ ეგვიპტელეფიშ ხეშე. იეჰოვა დღაშით მუნაფაშ სვეტით დო სერით დაჩხირიშ სვეტით ეწოჸუნდჷ თინეფს, მუდგათ არგამათ ოძირანდჷ, ნამდა სინამდვილეს, მუ ხემძღვანელენდჷ მუშ ხალხის (გამ. 13:21). მოსე ეკოჸუნდჷ თე სვეტის, მუდგაქ თინეფ ჭითა ზღვაშა ქიმიჸუნ. ისრაელეფქ მანგარო დოშქურდეს, მუშენდა სოთინ ვა უღუდეს ონტებელ — წოხოლე ჭითა ზღვა ეწუძუდეს დო უკახალე ეგვიპტელეფიშ ჯარ მოთხოზუდეს. ათეშენ იფიქრეს, ნამდა მოსექ მანგარო მეჩირთჷ, მუჟამსით თინეფ ჭითა ზღვაშა მიჸუნ. მარა სინამდვილეს, თენა ვა რდჷ შეცდომა, მუშენდა ისრაელეფ თექ მოსექ ვარინ, იეჰოვაქ მიჸუნ (გამ. 14:2). ღორონთიქ სასწაულით დერსხჷ ისრაელეფ (გამ. 14:26—28).

⁵ თე შემთხვევაშ უკულ ხოლო მოსე 40 წანას ეკოჸუნდჷ თე სვეტის, მუდგათ იეჰოვა ხემძღვანელენდჷ მუშ ხალხის უდაბნოს. a მინშა იეჰოვა თე სვეტის მოსეშ კარავშა გიმიჸონანდჷ დო აჩერენდჷ, მუდგას მთელ ისრაელ ორწყედ (გამ. 33:7, 9, 10). თე სვეტშე იეჰოვა მოსეს მითითებეფს არზენდჷ, მუდგას უკულ მოსე ხალხის გინოჩანდჷ (ფსალმ. 99:7). თეშნერო ისრაელეფ არგამათ ორწყედეს, ნამდა იეჰოვა მოსეს ირინუანდჷ მუშ ხალხშა ოხემძღვანელებერო.

6. მუ დამოკიდებულება უღუდეს ისრაელეფს იეჰოვაშ ხემძღვანელობაშ მიმართ? (რიცხ. 14:2, 10, 11).

⁶ თეცალ არგამა მტკიცებულებაშ უმკუჯინუო, ისრაელეფიშ უმენტაშის იშენ ვა ჯერდჷ, ნამდა მოსე იეჰოვაშე რდჷ დორინაფილ, მუდგას მუნეფიშ სიტყვეფით დო საქმეეფით ირიათო ოძირანდეს (წეკითხით რიცხვეფიშ 14:2, 10, 11). შედეგო, ისრაელეფიშ თე თაობას ვემნართინ დუნაპირებ დიხაშა (რიცხ. 14:30).

7. ქიმიჸუნით თინეფიშ მაგალითეფ, მით მეჸუნდეს იეჰოვაშ ხემძღვანელობას (რიცხ. 14:24; ქოძირით სურათ).

⁷ მარა ისრაელეფ შქას რდესჷ თიცალეფ ხოლო, მით მეჸუნდეს იეჰოვაშ ხემძღვანელობას. მაგალთო, ქალებ იეფუნეშ სქუა, მიდგაშეთ იეჰოვაქ თქუ: „ღურაშახ ჩქიმ ართგურ რდჷ“ (წეკითხით რიცხვეფიშ 14:24). ღორონთიქ აკურთხჷ თინა დო თიშ პატი ხოლო მეჩჷ, ნამდა დუნაპირებ დიხას მუშით გეგშეგორუკო ოცხოვრებელ ადგილ (იეს. 14:12—14). თი თაობა ხოლო, ნამდგას დუნაპირებ დიხაშა მინულაშ ნებაქ მიაჩ, მეჸუნდჷ იეჰოვაშ ხემძღვანელობას. თიშ უკულ, მუთ მოსეშ მანგიორო იესო ნავეშ სქუაქ გაგრძელ ისრაელ ერიშ ხემძღვანელობა, თინეფ ღურაშახ მანგარ პატის ცენდეს თის (იეს. 4:14). შედეგო იეჰოვაქ აკურთხჷ თინეფ დო გემნიჸუნ დუნაპირებ დიხაშა (იეს. 21:43, 44).

8. მუჭო ხემძღვანელენდჷ იეჰოვა ისრაელეფს მეფეეფიშ პერიოდის? (ქოძირით სურათ).

⁸ წანეფიშ უკულ იეჰოვაქ მუშ ხალხის ხემძღვანელო მსაჯულეფ ქიგურინუ. უკულ, მეფეეფიშ მართველობაშ პერიოდის, იეჰოვაქ ოხემძღვანელებერო წინასწარმეტყველეფ დანიშნჷ დო ართგურ მეფეეფ მეჸუნდეს თის, მუდგას წინასწარმეტყველეფ ელუჩანდეს. მაგალთო, მეფე დავით თანდაბლურო ურჩქილედ  წინასწარმეტყველ ნათანს, მუჟამსით თინა რჩევეფს არზენდჷ (2 სამ. 12:7, 13; 1 მატ. 17:3, 4). მეფე იეჰოშაფატიქ მიაჸუნ წინასწარმეტყველ იახაზიელიშ რჩევეფს დო ხალხის ხოლო ელუჩ, ქურჩქილესკო ღორონთიშ წინასწარმეტყველეფს (2 მატ. 20:14, 15, 20). მუჟამსით მეფე ხიზკია მანგარ რთულ მდგომარეობას რდჷ, წინასწარმეტყველ ესაიას ქოთხუ მოხვარა (ეს. 37:1—6). ირო, მუჟამსით მეფეეფ მეჸუნდეს იეჰოვაშ ხემძღვანელობას, კურთხევას ღებულენდეს ღორონთშე დო ხალხ ხოლო თხილერ რდჷ (2 მატ. 20:29, 30; 32:22). წესით ირ კოჩშო არგამა ოკო რდუკო, ნამდა იეჰოვა ირინუანდჷ წინასწარმეტყველეფს მუშ ხალხიშ ოხემძღვანელებერო, მარა მეფეეფიშ დო ხალხიშ უმენტაშ იშენით ვა ურჩქილედ თინეფს (იერ. 35:12—15).

ᲛᲣᲭᲝ ᲮᲔᲛᲫᲦᲕᲐᲜᲔᲚᲔᲜᲓᲷ ᲘᲔᲰᲝᲕᲐ ᲞᲘᲠᲕᲔᲚ ᲡᲐᲣᲙᲣᲜᲔᲨ ᲥᲠᲘᲡᲢᲘᲐᲜᲣᲚ ᲙᲠᲔᲑᲐᲡ

9. მის ირინუანდჷ იეჰოვა პირველ საუკუნეშ ქრისტიანულ კრებაშ ოხემძღვანელებერო? (ქოძირით სურათ).

⁹ ახ. წ. პირველ საუკუნეს იეჰოვაქ მუშ მსახურეფ ქრისტიანულ კრებას აკოშაყარუ. მუჭო ხემძღვანელენდჷ თინა პირველ ქრისტიანეფს? თიქ კრებაშ დუდო იესო ქუდარინუ (ეფეს. 5:23). მარა იესო თითო-კაკალო ვარზენდჷ მითითებეფს კრებაშ წევრეფს. თინა ხემძღვანელობაშო მოციქულეფს დო უხუცესეფს ირინუანდჷ, მით იერუსალიმს რდესჷ (საქ. 15:1, 2). უხუცესეფ თითოულ კრებას ხოლო რდესჷ დანიშნულ (1 თეს. 5:12; ტიტ. 1:5).

10. ა) ქიმეჸუნდესო პირველ საუკუნეშ ქრისტიანეფ ხემძღვანელობას? (საქ. 15:30, 31). ბ) მუშენ ვემეჸუნდჷ ნამთინე იეჰოვაშ დორინაფილ კათაშ ხემძღვანელობას? (ქოძირით ჩარჩო „მუშენ ვა ჯერდჷ ნამთინეს ღორონთიშ დორინაფილ ხემძღვანელეფიშ?“).

¹⁰ ქიმეჸუნდესო პირველ საუკუნეშ ქრისტიანეფ ხემძღვანელობას? ბიბლიაშე ბგებულენთ, ნამდა თინეფს მანგარო ოხიოლუდეს მითითებეფიშ მეღება დო მზათ რდესჷ, მიაჸუნესკო ხემძღვანელობას (წეკითხით საქმეეფიშ 15:30, 31). მორთით, ასე უმოს აშოიან დროშა გინიბლათ დო ქობძირათ, მუჭო ხემძღვანელენს იეჰოვა მუშ ხალხის თანამედროვე დროს.

ᲛᲣᲭᲝ ᲤᲮᲔᲛᲫᲦᲕᲐᲜᲔᲚᲔᲜᲐ ᲘᲔᲰᲝᲕᲐ ᲐᲛᲓᲦᲐ

11. ქიმიჸუნით მაგალით, სოვრეშეთ იძირე, ნამდა იეჰოვა ხემძღვანელენდჷ მუშ ხალხის.

¹¹ იეჰოვა ამდღა ხოლო აგრძელენს მუშ ხალხიშ ხემძღვანელობას მუშ სიტყვაშ დო მუშ სქუაშ, კრებაშ დუდიშ, საშვალებათ. ქუვორწყეთო  თიშ მტკიცებულებეფს, ნამდა იეჰოვა ადამიანეფს ხოლო ირინუანს? თეს არგამათ ვორწყეთ. მაგალთო, დეფიფქრათ, მუქ მოხვად 1870 წანაშ უკულ. ჩარლზ ტეიზ რასელ დო თიშ მეგობრეფქ ბიბლიურ წინასწარმეტყველებეფიშ გიმორკვიებათ ქიმერთეს თი დასკვნაშა, ნამდა 1914 წანა მნიშვნელოვან წანა იჸუაფუდ ღორონთიშ სამეფოწკუმა დაკავშირებულ წინასწარმეტყველებაშ შესრულებაშო (დან. 4:25, 26). იეჰოვა ხემძღვანელენდუო თე საქმეს? არგამა რე, ქო, მუშენდა 1914 წანას მოხვალამირ მოვლენეფშე იძირედ, ნამდა ღორონთიშ სამეფოქ მართველობა ქიდიჭყჷ. მუჭოთ მიჩქუნა, თე წანას მოხვად პირველ მსოფლიო ომქ, მუდგას მაჸუნ ეპიდემიეფქ, დიხანწალუეფქ დო ოჭკუმალიშ სინაკლებექ (ლუკ. 21:10, 11). იეჰოვაქ თე ალალგურიშ ბიბლიაშ მარკვიებელეფ გიმირინუ, ნამდა ქიმეხვარუკო მუშ ხალხის.

12, 13. მუ აკეთეს ხემძღვანელ ჯიმალეფქ მაჟია მსოფლიო ომიშ უკულ ქადაგებაშ საქმეშო?

¹² დეფიფქრათ თიშე ხოლო, მუდგაქ მაჟია მსოფლიო ომიშ დროს მოხვად. მთავარ სამართველოშ ხემძღვანელ ჯიმალეფქ გამოცხადებაშ 17:8-შ გიმორკვიებაშ უკულ ქიმეხვადეს, ნამდა მაჟია მსოფლიო ომს არმაგედონ ვარინ, მშვიდობიან პერიოდ მაჸუნუდ, ნამუთ საშვალებას ქიმეჩანდჷ ღორონთიშ ხალხის, უმოს ადამიანს ქუქადაგესკო. თე მიზანიშ მიოჭირინაფალო, ართგურ დო გონიერ მონაქ არძა კრებას ქიმეჩ მითითება, ქიდიჭყესკო „თეოკრატიულ მსახურებაშ კურსიშ“ b ჩატარება, მუთ მაუწყებელეფს მეხვარებუდ, გაუჯგუშესკო მსახურებაშ დო გურაფაშ უნარეფ. თეს გეძინელ, ხემძღვანელ ჯიმალეფქ გეგნოჭყვიდეს, «„გინაჯინალ კოშკიშ“ ბიბლიურ ინსტიტუტ „გალაადის“» c ქიდიჭყესკო მისიონერეფიშ მომზადება, მით მსოფლიოშ შხვადოშხვა კუნთხუს იქადაგენდეს დო ხალხის იეჰოვაშ გაჩინებაფას მეხვარებუდეს. მართალ რე, ომიშ პერიოდის მისიონერეფიშ მომზადება დო ოქადაგებშა გოტება ართ მეჯინათ ჭკვერულო ვეძირედ, მარა იეჰოვა თე საშვალებეფით ამზადენდჷ მუშ ხალხის ქადაგებაშ საქმეშო.

¹³ ულირს გინვოჯინეთინ, არგამათ ვორწყეთ, ნამდა თე რთულ პერიოდის იეჰოვა ხემძღვანელენდჷ მუშ ხალხის. მაჟია მსოფლიო ომშე მოჸუნაფილ იეჰოვაშ მოწმეეფ თავისფალო ქადაგენა შხვადოშხვა ქიანას, მუდგაშ შედეგო ბრელქ გეჩინებაფუ იეჰოვა.

14. მუშენ შემლებუნა ვენდათ იეჰოვაშ ორგანიზაციაშ დო წმინდა შურით დანიშნულ ჯიმალეფიშ ხემძღვანელობას? (გამოცხ. 2:1; ქოძირით სურათ).

¹⁴ ამდღა ხოლო ხემძღვანელ საბჭოშ ჯიმალეფ ქრისტეშ ხემძღვანელობას მეჸუნა. თინეფს ოკონა, ნამდა თი მითითებეფშე, ნამდგას და დო ჯიმალეფს არზენა, იძირედას იეჰოვაშ დო იესოშ აზროვნება შხვადოშხვა საკითხეფშენ. კრებეფიშ ოხემძღვანელებერო თინეფ რაიონულ ზედამხედველეფს დო უხუცესეფს ირინუანა. d ცხებულ უხუცესეფ დო თინეფწკუმა ართო, შხვა უხუცესეფ ხოლო იესოს „უკინებ მარძგვან ხეს“ (წეკითხით გამოცხადებაშ 2:1). მოსე, იესო ნავეშ სქუა დო მოციქულეფცალო თე უხუცესეფ ხოლო არასრულყოფილეფ რენა დო მინშა ჩირთუნა (რიცხ. 20:12; იეს. 9:14, 15; რომ. 3:23). მარა არგამა რე, ნამდა იესო ყურადღებათ ოკვირ დო ხემძღვანელენს ართგურ დო გონიერ მონას დო წმინდა შურით დანიშნულ უხუცესეფს დო თაშ გაკეთენს „თე ქვეყნიერებაშ ბოლოშახ“ (მათ. 28:20). თაშ ნამდა, შემლებუნა ვენდათ დო მივაჸუნათ თი მითითებეფს, ნამდგას იესო ხემძღვანელობაშო დორინაფილ ჯიმალეფიშ საშვალებათ მარზენა.

ᲘᲔᲰᲝᲕᲐᲨ ᲮᲔᲛᲫᲦᲕᲐᲜᲔᲚᲝᲑᲐᲨ ᲛᲔᲸᲣᲜᲐᲡ ᲩᲥᲘᲜᲓᲐ ᲯᲒᲘᲠᲝᲑᲣᲐ ᲛᲝᲣᲦ

15, 16. მუ დიგურეთ თინეფიშ შემთხვევეფშე, მით მეჸუნდჷ იეჰოვაშ ხემძღვანელობას?

¹⁵ იეჰოვაშ ხემძღვანელობაშ მეჸუნას ამდღარშე მოუღ ჩქინდა ჯგირობუა. მაგალთო, ართ ჩილ დო ქომონჯიქ, ენდიქ დო როზაქ, e მიაჸუნეს გონიერ მონაშ რჩევას დო გემარტივეს ცხოვრება (ებრ. 13:5). თექ საშვალება ქიმეჩ თინეფს, მონაწილება მიღესკო თეოკრატიულ სამშენებლო პროექტეფს. როზა იჩიებ: „მინშა აკაბცხა ოთახის მიხვადუდეს ცხოვრება, ნამდგას კუხნა ხოლო ვა უღუდ. თეწკუმა ართო, გუმაჩამალქ მაჸუ ტექნიკაქ, ნამდგას ფოტოგრაფიაშო იბრინუანდჷ. ვარინ თე საქმე თეშ მიჸორდჷ, გუმოფჩანდინ, თოლს ჩილამურ ელაპჸუნდჷ. მარა აბრაამიშ ოსურ სარაცალო, გინობჭყვიდ, წიმი იბჯინიკო დო ვეკვანარღიკო თის, მუდგაშე ვარია ფთქვი“ (ებრ. 11:15). მუ ჯგირობუა მოუღ თე ჩილ დო ქომონჯის მეღებულ გადაწყვეტილებაქ? როზა იჩიებ: „ჩქინდა ბედნერობა მოუღ თიშ რჩქინას, ნამდა ნამ შემლებუნან ირფელს ვორთუთ იეჰოვაშო. შხვადოშხვა თეოკრატიულ დავალებაშ შესრულება მოხვარუნა, წერმიბდგინათ, მუნერ იჸუაფ ცხოვრება ახალ ქვეყნიერებას“. ენდი ხოლო ოთანხმ მეუღლეს დო იჩიებ: „მანგარო  მოხიოლუნა, ნამდა მთელ დრო დო ენერგიას ღორონთიშ საქმეშ ხუჯიშდაკინებელო იბრინუანთ“.

¹⁶ ხოლო მუ ჯგირობუა მოუღ იეჰოვაშ ხემძღვანელობაშ მეჸუნას? ორგანიზაცია ხშირას ელუჩანს ახალგაზრდეფს, კარიერათ იეჰოვაშ მსახურება გინიშქვან. ართ ახალგაზრდას, სახელო მარსიას, ოკოდ, გეთვალისწინუკო თე რჩევა დო სკოლაშ თებაშ უკულ პიონერობა ქიდიჭყუკო (მათ. 6:33; რომ. 12:11). თინა იჩიებ: „უნივერსიტეტშე შემოთავაზება მიღუდ, ნამდა ოთხ წანას შემალებედ უფასოთ იბგურეკო. მარა მა მოკოდ, იეჰოვაშო უმოს ვაკეთიკო. ათეშენ პროფესიაშ დოგურაფა გინობჭყვიდ, ნამდა ქოთ პიონერო ქიმსახურიკო დო დუდიშ ეჯუმალაქ ხოლო ქეშმალებუკო. ცხოვრებას თეშ უჯგუშ მუთუნ ვა მაკეთებედ. თეწკუმა ართო, სამუშა საშვალებას მარზენს, ბეთელს ქიმვეხვარე დო შხვა საქმეეფს ხოლო მიბღე მონაწილება“.

17. ხოლო მუ კურთხევეფ მოუღ ჩქინდა იეჰოვაშ ხემძღვანელობაშ მეჸუნას? (ეს. 48:17, 18).

¹⁷ მინშა ორგანიზაციაშე თიცალ რჩევეფს ხოლო ბღებულენთ, ნამუთ ფთხილანა მატერიალიზმშე დო თიცალ მუდგარენიშ კეთებაშე, მუთ ღორონთიშ კანონეფშე გინმორთაფუანდეს. თეცალ რჩევეფიშ მეჸუნას ჯგირობუაშ მეტ გლახა მუთუნ ვა მოუღ ჩქინდა, მიღუნა სუფთა სინდის დო ქიანა ოწუხებელს ეიფჩილითუანთ (1 ტიმ. 6:9, 10). შედეგო, შემლებუნა მთელ გურით ვემსახურათ იეჰოვას. თეშე უმოს დიდ ხიოლ, სიმშვიდე დო კმაყოფილება მუთუნს ვა მაღინე (წეკითხით ესაიაშ 48:17, 18).

18. მუშენ გაფუნა გინოჭყვიდილ, მიაჸუნათ იეჰოვაშ ხემძღვანელობას?

¹⁸ იეჰოვა დიდ გაჭირებაშ დო ანთასწანიან მართველობაშ დროს ხოლო გეგმირინუანს ადამიანეფს ჩქინ ოხემძღვანელებერო (ფსალმ. 45:16). თიმწკუმა ხოლო ქიმვაჸუნუთო ხემძღვანელობას, მუჟამსით თეშო მუდგაინ მაჸინა დათმებელ? თეშ კეთებაქ მომავალს ქეშმალებუანინ, თეს ამდღარშე ოკო ვორთუდათ. მორთჷ, ირიათო ქიმვაჸუნათ იეჰოვაშ ხემძღვანელობას, თინეფ შქას თი მითითებეფს ხოლო, მუდგას დანიშნულ ჯიმალეფშე ბღებულენთ (ეს. 32:1, 2; ებრ. 13:17). შემლებუნა ბოლოშა მივენდათ ჩქინ ხემძღვანელს, იეჰოვას, ნამუთ ეწოპჸუნა, ნამდა უსაფრთხოთ გენომიჸონან ჩქინ დანიშნულებაშ ადგილშა, ახალ ქვეყნიერებაშა.