1. მუნერ დამოკიდებულება უღუდეს იეჰოვაშ თაყვანიშმცემელეფს თიშ მსახურებაშ მიმართ ულირს დო ამდღა?

 ᲑᲯᲔᲠᲐ, თქვანო მანგარ ძვირფას რე იეჰოვაწკუმა ურთიერთობა. თქვანცალო, ჯვეშ დროს ხოლო ბრელ აფასენდჷ იეჰოვაშ მსახურებაშ პატის დო მზათ რდჷ თიშ გურშენ მსხვერპლშა ოულარო (ფსალმ. 104:33, 34). ზუსტას თეცალეფ რდესჷ ისრაელს მახორუ ნაზირეფ. მი რდესჷ ნაზირეფ დო მუშ გურაფა შემლებუნა თინეფშე?

2. ა) მი რდესჷ ნაზირეფ? (რიცხ. 6:1, 2). ბ) მუ გინაჭყვიდირაფუანდჷ ნამთინე ისრაელს ნაზირობას?

² ებრაულ სიტყვა, ნამუთ თარგმნილ რე, მუჭოთ ნაზირ, ნიშნენს „გიშაგორილს“, „შხვეფშე გიშართილს“ დო „მეძღვინელს“. მოსეშ კანონ საშვალებას არზენდჷ ქოთ ქომოლკოჩის და ქოთ ოსურკოჩის, იეჰოვაშ წოხოლე ქუდოდვუკო აღთქმა დო მუდგარენ პერიოდის ნაზირო იმსახურუკო a (წეკითხით რიცხვეფიშ 6:1, 2). თე დუდგინოდვალირ ისრაელეფ მზათ რდესჷ, მსხვერპლშა მიდართესკო იეჰოვაშო. თინეფქ ოკო მიაჸუნესკო თიცალ მითითებეფს, ნამდგაშ დაცვება შხვა ისრაელეფს ვემეთხიებუდეს. იმწკუმა, მუ გინაჭყვიდირაფუანდჷ ისრაელს ნაზირო გინორთას? იეჰოვაშ მიმართ ძალიერ ჸოროფა დო მარდულობა თი ირფელშო, მუთ ღორონთშე უღუდ (კან. 6:5; 16:17).

3. მუჭო გუნა ღორონთიშ ამდღარ მსახურეფ ნაზირეფს?

 ³ თიშ უკულ, მუთ მოსეშ კანონ „ქრისტეშ კანონქ“ დოთირუ, ნაზირობაქ მეჭყორდჷ (გალ. 6:2; რომ. 10:4). მარა ნაზირეფცალო, იეჰოვაშ მსახურეფს ამდღა ხოლო მანგარო ოკონა, ემსახურან იეჰოვას მთელ გურით, შურით, გონებათ დო ძალათ (მარ. 12:30). ზუსტას თეშ პირობას ვარზენთ იეჰოვას დუდიშ მეძღვინუაშ დროს. მეძღვინუაშ აღთქმაშ თანახმას ფცხოვრენთ, მუჟამსით ვასრულენთ იეჰოვაშ ნებას დო მზათ ვორეთ, მსხვერპლშა მიდაფრთათ თიშო. მორთჷ, გუარჩუათ, მუჭო ცხოვრენდეს ნაზირეფ მუნეფიშ აღთქმაშ თანახმას დო ქიგებგათ, მუშ გურაფა შემლებუნა თინეფშე b (მათ. 16:24).

ᲛᲖᲐᲗ ᲠᲓᲐᲗᲷ ᲛᲡᲮᲕᲔᲠᲞᲚᲨᲐ ᲝᲣᲚᲐᲠᲝ

4. მუჭოთ რიცხვეფიშ 6:3, 4-შე იძირე, მუ მსხვერპლშა მიშეს ნაზირეფ?

⁴ წეკითხით რიცხვეფიშ 6:3, 4. ნაზირეფქ ოკო ვა შვესკო ალკოჰოლურ ოშუმალ დო ვართ ჸურძენ დო ქიშმიშ ჭკუმესკო. მარა შხვა ისრაელეფ თე ირფელს ჩვეულებრივო ჭკუმუნდეს დო შუნდეს დო თეთ მუთუნს ვაშენდეს. ბიბლია ხოლო იჩიებ, ნამდა „ღვინ გურიშ გუმამხიარულებერ“ რე (ფსალმ. 104:14, 15). თიშ უმკუჯინუო, ნამდა ღვინიშ შუმას დო ჸურძენიშ ჭკუმუას სიამოვნება მოუღ კოჩშა, ნაზირეფ მზათ რდესჷ, ვარია ქოთქუესკო თიშე დო მსხვერპლშა მიდართესკო. c

5. მუ მსხვერპლშა იდეს მადიანა დო მარსელაქ დო მუშენ?

⁵ ნაზირეფცალო, ჩქი ხოლო მეურთ მსხვერპლშა, ნამდა იეჰოვაშო უმოსიშ კეთებაქ შემალებუან. გუარჩუათ ართ ჩილ დო ქომონჯიშ, მადიანაშ დო მარსელაშ, d მაგალით. მადიანას მაღალ ხელფას უღუდ დო თინეფ ჯგირო ცხოვრენდეს. თე ქრისტიან წყვილს ოკოდ, უმოს გაკეთუკო იეჰოვაშო. ათეშენ გეგნოჭყვიდეს, მუნეფიშ ცხოვრებას მუდგარენეფ დოთირუესკო. თინეფ იჩიებუნა: „ფარას ჯვეშობურო უგამაგეთ ვა ვახარჯენდით. უმოს ჭიჭე ბინაშა გეგნოფრთით დო მანქანა ხოლო გეგმოფჩით“. მადიანა დო მარსელას თე მსხვერპლშა ულას მითინ ვანძალენდჷ, მარა თე ირფელშე ვარია თიშენ თქუეს, ნამდა ოკოდეს, უმოს გაკეთესკო იეჰოვაშო. შედეგო, თინეფ ხიოლს დო კმაყოფილებას გინაფლენა.

6. მუშენ მეულა ქრისტიანეფ მსხვერპლშა? (ქოძირით სურათ).

 ⁶ ქრისტიანეფ მსხვერპლშა მეულა, ნამდა უმოს გაკეთან იეჰოვაშო, მუდგას ხიოლ მოუღ თინეფშა (1 კორ. 9:3—6). იეჰოვა ვა მანძალენა მსხვერპლშა ულას დო მუჭოთ ნაზირეფიშ შემთხვევას რდჷ, თი ირფელ, მუდგაშეთ ვარიას იფჩიებუთ, შილებე შუროთ ვა რდასჷ გლახა. მაგალთო, ნამთინე ვარიას იჩიებ ჯგირ ჸუდე ვარდა სამუშაშე. ნამთინე გინოჭყვიდუნს, ჭეხანს ვედექორწინას ვარდა მუდგარენ პერიოდის ვა ჸუნდას სქუალეფ. ნამთინე ხოლო მუშ ოჯახიშ წევრეფშე დო მეგობრეფშე შორს, თიცალ ადგილშა მეურს ომსახურებშა, სოდეთ მაქადაგებელეფიშ საჭიროება რე. ვა უღჷ მნიშვნელობა, მუ მსხვერპლშა მეურთ, რჯერდან, იეჰოვა თეს მანგარო აფასენს (ებრ. 6:10).

ᲠᲓᲐᲗᲷ ᲨᲮᲕᲔᲤᲨᲔ ᲒᲘᲨᲐᲠᲗᲘᲚ

7. მუშენ შილებე რთულ რდუკო ნაზირშო აღთქმაშ შესრულება? (რიცხ. 6:5; ქოძირით სურათ).

⁷ წეკითხით რიცხვეფიშ 6:5. ნაზირეფქ თუმა ოკო ვეღაჭესკო, მუდგათ ოძირანდეს, ნამდა იეჰოვაშ მორჩილეფ რდესჷ. ათეშენ ისრაელ ნაზირ ბრელ ხანს ქიჸიდ-და, თის თუმა მარდუდ დო შხვეფშო ხოლო თოლშა მალაფარ იჸიდ. მუჟამსით შხვეფ პატის ქოცენდეს დო ხუჯის ქუდუკინენდეს ნაზირიშ გადაწყვეტილებას, თის უმოს ადვილ აჸიდ მუშ აღთქმაშ მეჸუნა. მარა, სანარღოთ, ისრაელს ნაზირეფ ირო ვა რდესჷ დაფასებულ. მაგალთო, წინასწარმეტყველ ამოსიშ დროს განდგომილ ისრაელეფ ნაზირეფს ღვინს მიარზიენდეს, საეგებიოთ, თინეფ ოცადუდეს, თეშნერო გინართაფუესკო მუნეფიშ აღთქმას (ამოს. 2:12). ათეშენ ნაზირეფშო ირო ადვილ ვეჸუაფუდ, შხვეფშე გიშართილ რდესკო დო გაბედულება დესაჭირებუდეს მუნეფიშ აღთქმაშ მიოჸუნალო.

8. მუჭო ელაიკინეს გურშა ბენჟამინიშ მაგალითიქ?

⁸ მორდებუან ვორდათინ ხოლო, იეჰოვაშ მოხვარათ, შემალებენა გაბედულო დეფცვათ ჩქინ პოზიცია. თეშ ჯგირ მაგალითის მარზენა ვით წანერ ბენჟამინ, ნამუთ ნორვეგიას ცხოვრენს. თიშ სკოლას უკრაინელ ხალხიშ ხუჯიშდაკინებელო ზეიმ იტარებუდ, სოდეთ უკრაინაშ დროშაშ ფერეფს მიკოქუნელ ბაღანეფქ ოკო იბირესკო. თე ზეიმს მონაწილება ვემიღუკონ თიშენ, ბენჟამინქ თინეფშე შორს ქიგედირთჷ, მარა მასწავლებერს თოლშა ქუმუოლ თინა ცალკე გერდუნ დო ხონარმაღალო ქუდუძახ: „ბენჟამინ, ქუმორთ, არძა სი გიჯინეთ!“. ბენჟამინქ გაბედულო უპასუხ მასწავლებერს: „მა ნეიტრალიტეტის იფცვენქ, ათეშენ ვა ბღებულენქ მონაწილებას პოლიტიკურ  ღონისძიებეფს. ბრელ იეჰოვაშ მოწმე ხე ციხეს თიშ გურშენ, ნამდა ომშა ვემულა“. თეშ მორჩქილაფაშ უკულ მასწავლებერს ვა დუნძალებ თიშა ზეიმს მონაწილებაშ მეღება, მარა კლასელეფქ გითოკითხირ ქუდუჭყეს, მუშენ ვეგერდჷ დო ვებირდჷ თინეფწკუმა ართო. ბენჟამინ თეშ ნერვიანენდჷ, ნამდა ნგარაშა აკაბცხა ურკუდ, მარა მუშ კლასელეფს ხოლო გაბედულო გეუნწყჷ, მუ რდჷ თეშ მიზეზ. თეშ უკულ თიქ მუშ მშობლეფს უწუ, ნამდა იეჰოვაქ მეხვარ დო თეშნერო შეიალებუ, მუშ რწმენაშ გაბედულო დაცვებაქ.

9. მუჭო შემლებუნა გურ გუხარათ იეჰოვას?

⁹ ირნერ სიტუაციას იეჰოვაშ მორჩილებას ვოცადუთინ თიშენ, შხვეფშე გიშებგორუთ. გაბედულება მოსაჭირუნა, ნამდა სკოლას დოვარ სამუშას, თამამას ქოფთქუათ, იეჰოვაშ მოწმე ვორეთინ. მუთ უმოსო გილმელებუნა ადამიანეფ თე ქვეყნიერებას, თით უმოს ძნელ მაჸინა ბიბლიურ პრინციპეფიშ თანახმას ცხოვრება დო სახიოლო ამბეშ გაცხადება (2 ტიმ. 1:8; 3:13). მარა ოკო ვაგმოჭყორდან, ნამდა, მუჟამსით გაბედულებას გიმიფრჩქინანთ დო გიშართილ ვორეთ თინეფშე, მით ვამსახურუნა იეჰოვას, გურს უხარენთ თის (იგავ. 27:11; მალ. 3:18).

ᲗᲥᲕᲐᲜ ᲪᲮᲝᲕᲠᲔᲑᲐᲡ ᲞᲘᲠᲕᲔᲚ ᲐᲓᲒᲘᲚᲡ ᲘᲔᲰᲝᲕᲐ ᲥᲘᲒᲘᲝᲠᲘᲜᲔᲗ

10. მუშენ შილებე გაუჭირდუკო ნაზირს რიცხვეფიშ 6:6, 7-ის მოჩამილ მოთხოვნაშ მეჸუნაქ?

¹⁰ წეკითხით რიცხვეფიშ 6:6, 7. ნაზირეფს ვეშულებუდეს ღურელიშ ხოლოშა მეულა. წერმიდგინით, მუ ძნელ იჸუაფუდ თინეფშო თე მოთხოვნაშ მეჸუნა, მუჟამსით ხოლოშიან ნათესე დოუღურუდეს. ბიბლიურ დროს ტრადიციაშ ნაწილ რდჷ, ნამდა ონგარს ღურელიშ ხოლოს რდიკო (იოან. 19:39, 40; საქ. 9:36—40). მარა ნაზირს ვეშულებუდ თეშ კეთება, გოკონდა გვალო ოჯახიშ წევრ აფუდუკო ღურელ. ათეშენ თის ძალიერ რწმენა ოსაჭირუდ, ნამდა ართგურო ქიმიაჸუნუკო მუშ აღთქმას. ბჯერა, იეჰოვა ქიმეხვარებუდ მუშ დუდგინოდვალირ მსახურეფს, გეგნიღესკო თეცალ სირთულეეფ.

11. მუნერ დამოკიდებულება ოკო უღუდან ქრისტიანეფს ოჯახიშ წევრეფიშ მიმართ? (ქოძირით სურათ).

¹¹ ქრისტიანეფ მანგარ სერიოზულო უჯინეთ მეძღვინუაშ აღთქმას, მუთ ოჯახიშ მიმართ ჩქინ დამოკიდებულებაშე ხოლო იძირე. ჩქი დუდის ვა ბზოგენთ, ნამდა ქიბზრუნათ ოჯახიშ წევრეფშე. მარა, მუჟამსით თინეფ თიცალ მუდგარენს ფთხინა, მუთ იეჰოვაშ ნებას ოწინააღმდეგ, პირველ ადგილს  იეჰოვას გივორინუანთ (მათ. 10:35—37; 1 ტიმ. 5:8). ათეშენ, იეჰოვას გურ გაუხარათინ, მინშა შილებე თიცალ მუდგარენქ მაჸუან ოკეთებელქ, მუთ ჩქინ ხოლოშიანეფს იშენ დო იშენ ვახუჯუნა.

12. მუ აკეთ ალექსანდრუქ, მუჟამსით ოჯახის რთულ მდგომარეობა უღუდ?

¹² გუარჩუათ ართ ჩილ დო ქომონჯიშ, ალექსანდრუ დო დორინაშ, შემთხვევა. თინეფქ ართო დიჭყეს ბიბლიაშ გურაფა, მარა ართ წანაშა დორინაქ გეგნოჭყვიდ, მიოტუკო დო ალექსანდრუს ხოლო თეშ კეთება ელუჩ. მარა თიქ მშვიდას დო გემუანო უწუ, ნამდა მუ გაგრძელენდ გურაფას. თექ დორინას ვემეწონ დო ირნერო ოცადუდ, თეშ აძულკო თინა, ნამდა მუშით მიოტებაფუკო გურაფა. ქომონჯ ირნერო ოცადუდ, გაუგუკო თის, მუდგაშ კეთება ვა რდჷ ადვილ. მინშა დორინა თის თიცალ გლახათ ოქცუდ დო თიცალ ჸინჩას ეჩიებუდ, ნამდა ალექსანდრუქ ბიბლიაშ გურაფაშ მეტება ხოლო ქიფიქრჷ. მარა თიქ გეგნოჭყვიდ, იეჰოვა ქიგიორინუკო პირველ ადგილს დო თეწკუმა ართო, მუშ ოსურიშ მიმართ ჸოროფა დო პატიცემას გიმირჩქინანდჷ. შედეგო, თიშ ჯგირ მაგალითიქ გინაჭყვიდირაფუ დორინას, კინ ქიდიჭყუკო ბიბლიაშ გურაფა დო საბოლათ, დინათ (ვებგვერდის jw.org განყოფილებას „ჭეშმარიტება თირანს ცხოვრებას“ ქოძირით ვიდეო «ალექსანდრუ დო დორინა ვაკარეფ: „ჸოროფა ითვინენს დო ჯგირს აკეთენს“»).

13. მუჭო გიმიფრჩქინანთ ჸოროფას იეჰოვაშ დო ოჯახიშ წევრეფიშ მიმართ?

¹³ ოჯახ იეჰოვაშ გოჭყაფილ რე დო თის ოკო, ბედნერ ოჯახ მიღუდან (ეფეს. 3:14, 15). ნამდვილ ბედნერობას თიმწკუმა ქიმვოჭირინუანთ, მუჟამსით ქიმვაჸუნუთ თიშ მითითებეფს ოჯახწკუმა დაკავშირებით. იეჰოვა ორწყე, მუ მსხვერპლშა მეურთ, ნამდა ემსახურათ თის; მუჭო ოცადუთ, ქიზრუნათ ოჯახიშ წევრეფშე დო ჸოროფათ დო პატიცემათ მექცუათ. რჯერდან, თე ირფელიშ გურშენ თინა მანგარო გაფასენა (რომ. 12:10).

ᲮᲔ ᲥᲔᲨᲣᲜᲬᲧᲣᲐᲗ ᲐᲠᲗᲘᲐᲜᲡ, ᲜᲐᲛᲓᲐ ᲛᲘᲕᲐᲸᲣᲜᲐᲗ ᲜᲐᲖᲘᲠᲔᲤᲘᲨ ᲛᲐᲒᲐᲚᲘᲗᲘᲡ

14. განსაკუთრებულო მის ოკო ელუკინათ გურშა ჩქინ სიტყვეფით?

¹⁴ არძა, მიდგას იეჰოვაშ მსახურება ოკო, თიშ ჸოროფაშ გურშენ მზათ ოკო რდასჷ მსხვერპლშა ოულარო. მარა თენა ირო ვა რე ეფ ოკეთებელ. მუჭო შემლებუნა, ხე ქეშუნწყუათ ართმაჟიას? გურიშემაკინალ სიტყვეფით (იობ. 16:5). ხომ ვა რენა თქვან კრებას თიცალ და დო ჯიმალეფ, მიდგაქ მუდგარენეფშე ვარია თქუეს, ნამდა იეჰოვაშო უმოსიშ კეთებაქ შეიალებუესკო? ხომ  ვეჩინენთ თიცალ მოზარდეფს, მით სკოლას გაბედულო სქიდუნა შხვეფშე განსხვავებულ თიშ უმკუჯინუო, ნამდა თეშ კეთება ვა რე ადვილ? კრებას ხომ ვა რჸუნა თიცალ ბიბლიაშ მაგურაფალეფ ვარდა თანაქრისტიანეფ, მით ოჯახშე წინააღმდეგობაშ უმკუჯინუო, ღორონთიშ ართგურეფ რენა? მორთჷ, ნამთინ საშვალება ვა გუტუათ ხეშე, ნამდა გემუან სიტყვეფით გურშა ელუკინათ თინეფს დო ქუვოძირათ, მუჭო ვაფასენთ თი ირფელს, მუდგას იეჰოვაშო ორთუნა (ფლმ. 4, 5, 7).

15. მუჭო უნწყუნს ხეს ნამთინე სრულ დროთ მსახურეფს?

¹⁵ მინშა შილებე შემალებუან საქმეეფით ხოლო ქელუდირთათ და დო ჯიმალეფს, მით სრულ დროთ ომსახურუნა იეჰოვას (იგავ. 19:17; ებრ 13:16). ზუსტას თეშ კეთება ოკოდ შრი-ლანკას მახორუ ართ ხანშამიშულირ დას. თის მთავრობაქ პენსიაშა მოუძინ დო გეგნოჭყვიდ, თე ფარათ მსახურებაშ გაგრძელებას ქიმეხვარუკო ჟირ პიონერ დას, მიდგას ეკონომიკურო გაკუჭირდეს. თე და ირ თუთას ჭიჭე ფარას არზენდჷ თინეფს, ნამდა მუდგარენ ხარჯეფ დოფორესკო. მუშმაჯგირა რე, მუჟამსით სრულ დროთ მსახურეფს ჩქინდე ხეშენწყუალა ვარკუნა!

16. მუშ გურაფა შემლებუნა ნაზირეფიშ მაგალითშე?

¹⁶ მუჭოთ ბძირით, ნაზირეფიშ მაგალითშე მართალო ბრელ მუდგარენიშ გურაფა შემლებუნა. თე განსაკუთრებულ მსახურება, ნამდგას ნაზირეფ ასრულენდეს, ბრელს მოგურუანა იეჰოვაშ გურშენ. იეჰოვას უჩქჷ, ნამდა მოკონა თიშ გურიშ გახარება დო მეძღვინუაშ აღთქმაშ შეიოსრულებერო ირნერ მსხვერპლშა ოულარო ვორეთ მზათ. ღორონთ მუთუნიშ კეთებას ვა მანძალენა დო საშვალებას მარზენა, ჩქინით გეგნობჭყვიდათ, მუჭო გიმოფხანტუნთ თიშ ჸოროფას (იგავ. 23:15, 16; მარ. 10:28—30; 1 იოან. 4:19). ნაზირეფიშ მაგალითშე იძირე, ნამდა იეჰოვა ორწყე დო აფასენს, მუჟამსით მსხვერპლშა მეურთ. მორთჷ, გინოჭყვიდილ მაფუდან, ვემსახურათ იეჰოვას დო მზათ ვორდათ, მუთ შემლებუნა, ირფელ გუაკეთათ თიშო!