ᲩᲥᲘᲜ ვებგვერდის jw.org 2023 წანაშ 18 იანარს, ჯუმაშხა დღას, ქიგიდვჷ განცხადებაქ, სოდეთ ჭარუდ, ნამდა ჯიმა გეიჯ ფლიგლ დო ჯეფრი ვინდერ, იეჰოვაშ მოწმეეფიშ ხემძღვანელ საბჭოს იმსახურენდეს. თინეფ, ჟირხოლო, ბრელ ხან რე, მუთ იეჰოვას ართგურო ომსახურუნა.

ჯიმა გეიჯიქ ამერიკას, დასავლეთ პენსილვანიას მირდჷ. თინა ჭეშმარიტებაშ შარას ღორონთიშმოშიშ მშობლეფქ გიორინუეს. მოზარდობაშ დროს თიშ ოჯახიქ ოცხოვრებშა ჭიჭე ქალაქშა გეგნორთჷ, სოდეთ მაქადაგებელეფიშ საჭიროება რდჷ. ჭიჭე ხანშა, 1988 წანაშ 20 ნოემბერს, გეიჯიქ დინათ.

ჯიმა გეიჯის მშობლეფ ირიათო ელუჩანდეს, ნამდა სრულ დროთ მსახურება ქიდიჭყუკო. თინეფ ხშირას აპატიჟენდეს ჸუდეშა რაიონულ ზედამხედველეფს დო ბეთელელეფს. ჯიმა გეიჯ ორწყედ, მუშმადიდა ხიოლ მოუღუდ თე და დო ჯიმალეფშა სრულ დროთ მსახურებას. ათეშენ, ნათუაშე ბრელ დრო ვა უღალუნ თეშ, 1989 წანაშ 1 სექტემბერს, პიონერო მსახურება ქიდიჭყჷ. ჟირ წანაშ უკულ, 1991 წანაშ ოქტომბერს, თინა ბრუკლინიშ ბეთელშა მიწვის. თენა რდჷ ზუსტას თი მიზან, ნამუთ თის 12 წანაშე უღუდ.

ბეთელს, სტამბას 8 წანაშ მსახურებაშ უკულ თინა სამსახურებრივ განყოფილებაშა გეგნიჸონეს. თე პერიოდის მუსხირენ წანას ჯიმა გეიჯ რუსულ კრებას მსახურენდჷ. 2006 წანას თიქ დექორწინ ნადიაშა დო თე დაქ ხოლო ქიდიჭყჷ მეუღლეწკუმა ართო ბეთელს მსახურება. თინეფ ართო მსახურენდეს პორტუგალიურ კრებას დო ვით წანაშე უმოსის — ესპანურ კრებას. სამსახურებრივ განყოფილებას ბრელ წანას მსახურებაშ უკულ ჯიმა გეიჯ სასწავლო კომიტეტის დანიშნეს დო უმოს გვიანო სამსახურებრივ კომიტეტშა გეგნიჸონეს. 2022 წანაშ მარტის, თინა ხემძღვანელ საბჭოშ სამსახურებრივ კომიტეტიშ დამხმარეთ დანიშნეს.

ჯიმა ჯეფრიქ, ამერიკას, კალიფორნიაშ შტატიშ ქალაქ მურიეტას, მირდჷ. ჭეშმარიტება თის  ხოლო იეჰოვაშ მოწმე მშობლეფქ დაგურუეს დო ინათ 1986 წანაშ 29 მარტის. ნათუაშ უკულიან თუთას დამხმარე პიონერო მსახურება ქიდიჭყჷ. თეცალ მსახურებას თიშმადიდა ხიოლ მოუღუდ თიშა, ნამდა მუსხირენ თუთაშ უკულ, 1986 წანაშ 1 ოქტომბერს, პიონერო მსახურება ქიდიჭყჷ.

მოზარდობაშ დროს ჯიმა ჯეფრიქ ქიმიაკითხუ მუშ ჟირ უნჩაშ ჯიმას, მით ბეთელს მსახურენდეს. თეშ უკულ მუს ხოლო გურჩქინდჷ სურვილქ, მუჟამსით გემწირდუდ, თექ ქიმსახურუკო. 1990 წანაშ მესის თინა უოლკილიშ ბეთელშა ქიმიწვიეს.

უოლკილიშ ბეთელს ჯიმა ჯეფრი შხვადოშხვა განყოფილებას მსახურენდჷ, თინეფ შქას დასუფთავებაშ განყოფილებას, ფერმას დო ბიუროს. უკულ თიქ 1997 წანას დექორწინ ართ დაშა, ანჟელაშა, დო თინეფ ამდღარშახ ართო მსახურენა ბეთელს. 2014 წანას თინეფ უორიკშა გეგნიჸონეს, სოდეთ ჯიმა ჯეფრი მსოფლიო მთავარ სამართველოშ მშენებლობაშ პროექტის ღებულენდჷ მონაწილებას. 2016 წანას თინეფქ „გინაჯინალ კოშკიშ საგანმანათლებლო ცენტრშა“ გეგნორთეს, ნამუთ პატერსონს რე. თექ ჯიმა ჯეფრი აუდიო-ვიდეო მომსახურებაშ განყოფილებას მსახურენდჷ. ოთხ წანაშ უკულ, მუჟამსით თინეფქ კინ უორიკშა დირთეს, ჯიმა ჯეფრიქ კადრეფიშ კომიტეტის დენიშნჷ. 2022 წანაშ მარტის თიქ ხემძღვანელ საბჭოშ კადრეფიშ კომიტეტიშ დამხმარეთ ქიდიჭყჷ მსახურება.

მთელ გურით ბლოცულენთ, ნამდა ჩქინ მოჸოროფე მუმაქ აკურთხას თე ძვირფას ჯიმალეფ, მით ძღვინ რენა იეჰოვაშე, ნამდა გაგრძელან ღორონთიშ სამეფოშ საქმეშო შურ დო გურით ხანდება (ეფეს. 4:8).