1. მუ რე იეჰოვაშ ნება?

 ᲦᲝᲠᲝᲜᲗᲘᲨ ნება რე, სამეფოშ გურშენ სახიოლო ამბექ მთელ მსოფლიოს იჸუას ქადაგებულქ (მარკ. 13:10; 1 ტიმ. 2:3, 4). თენა იეჰოვაშ საქმე რე, ნამუთ თიცალ მნიშვნელოვან რე, ნამდა თიშ ხემძღვანელო მუშ საჸოროფო სქუა გიშეგორ. ჩქი დარწმუნებულ ვორეთ, იესოშ ჯგირ ხემძღვანელობათ ქადაგებაშ საქმე აღსასრულშახ თეშ შისრულებ, მუჭოთ თენა იეჰოვას ოკო (მათ. 24:14).

2. მუს გუვარჩიენთ თე სტატიას?

² თე სტატიაშე ქობძირუნთ, მუჭო ირინუანს იესო ართგურ დო გონიერ მონას სულიერ საზრდოშ მამზადებელო დო მუჭო ხემძღვანელენს თიშ საშვალებათ მუშ მიმაჸუნალეფს, ნამდა შეასრულან ისტორიას არძაშ უმოს დიდ სამქადაგებლო საქმე (მათ. 24:45). თეს გეძინელ, ქიგებგენთ, მუშ კეთება შემლებნა თითოულს, ნამდა ხუჯ ქუდუკინათ იესოს დო ართგურ დო გონიერ მონას.

3. მუ ძალაუფლება რე მეჩამილ იესოშა?

³ იესო ხემძღვანელენს სამქადაგებლო საქმეს. მუშენ შემლებნა ბჯერდან თეშ? ზეცაშა ულაშახ ჭიჭე ხანით ადრე იესოქ მუშ ართგურ მოწაფეეფს გალილეაშ გვალას შეხვად. თიქ თეცალ სიტყვეფ უწუ: „მთელ ძალაუფლება, ზეცას დო დედამიწას, ჩქიმდა რე მოჩამილ“. ქიდეკვირით, უკულ მუს გეუძინანს თინა: „ათეშენ მეუთ არძა ერიშ ხალხშა დო ჩქიმ მოწაფეეფო მამზადით თინეფ“ (მათ. 28:18, 19). თაშ ნამდა, შხვა ირფელწკუმა ართო, იესოშა მეჩამილ რე ძალაუფლება, უხემძღვანელას სამქადაგებლო საქმეს.

4. მუშენ შემლებნა ბჯერდან, ნამდა იესო ამდღარშახ ხემძღვანელენს სამქადაგებლო საქმეს?

⁴ მუჭოთ იესოქ თქუ, ქადაგებაშ დო მოწაფეეფიშ მომზადებაშ საქმე „მთელ მსოფლიოს“ შისრულებუდ დო პირობა  დოდვჷ, ნამდა მუშ მიმაჸუნალეფწკუმა იჸუაფუდ „ირდღას თე ქიანაშ მოსპუალაშახ“ (მათ. 28:20). თე სიტყვეფ არგამათ ოძირანს, მი უხემძღვანელენდჷ ამდღარშახ სამქადაგებლო საქმეს. თენა იესო რე.

5. მუჭო უნწყუნთ ხეს ფსალმუნიშ 110:3-ს მოჩამილ წინასწარმეტყველებაშ შესრულებას?

⁵ იესო ვა წუხენდჷ თიშე, ნამდა ბოლო დღალეფიშ დროს დასაბაღ მაქადაგებელეფ ვეჸიდეს, მუშენდა უჩქუდ, შისრულებუდ ფსალმუნს ენოჭარილ წინასწარმეტყველება: „სქან ხალხ მზადყოფნათ ქეგკაჸუნუ, მუჟამსით სქან ჯარ ობრძოლეფშა გეგშურს“ (ფსალმ. 110:3). სამქადაგებლო საქმეს მონაწილებას ქოღებულენთ-და, ხუჯის უკინენთ იესოს დო ართგურ დო გონიერ მონას დო, თეს გეძინელ, თე წინასწარმეტყველებაშ შესრულებას ხოლო უნწყუნთ ხეს. თე საქმე ირიათო იგრძელებ, მარა სირთულეეფ ხოლო ირჩქინანს დუდის.

6. მუ რე ართ-ართ სირთულე, მუდგას ამდღა მაქადაგებელეფ ხვადუნა?

⁶ ართ-ართ სირთულე, მუდგას მაქადაგებელეფ ხვადუნა, რე წინააღმდეგობა. განდგომილეფ, რელიგიურ ლიდერეფ დო პოლიტიკოსეფ ჩქინიშ გურშენ ტყურა ინფორმაციას ავრცელენა. ჩქინ ნათესეეფქ, ნაჩინებუეფქ დო თანამშრომელეფქ თე ინფორმაციათ დეღორეს-და, შილებე მინდომან, მიმოტებაფუან იეჰოვაშა მსახურება დო ქადაგება. ნამთინე ქიანას მოწინააღმდეგეეფ ჩქინ და დო ჯიმალეფს ორცქინანა, თხოზუნა, ჭოფნა დო ციხეს ხოლო მითახუნუანა. ჩქი თენა ვამკვენა, მუშენდა იესოქ თეცალ მუდგარენ იწინასწარმეტყველ: „არძა ხალხ გოიჯოგუანა ჩქიმ სახელიშ გურშენ“ (მათ. 24:9). ხალხის თაშ ბჯოგუთინ, თენა ამტკიცენს, ნამდა მეპჸუნთ იესოშ მაგალითის დო მიღნა იეჰოვაშე მოწონა (მათ. 5:11, 12). თე წინააღმდეგობეფიშ უკახალე სატანა ეშმაკ გერე. მარა, მუჭოთ მიჩქნა, იესო თიშე ბრელით უმოს ძალიერ რე! ათეშენ, თიშ მოხვარათ, სახიოლო ამბე არძა ეროვნებაშ ხალხიშ ჸუჯშა მეურს. მორთ გუვარჩუათ თეშ მტკიცებულება.

7. მუ გარწმუნენა, ნამდა გამოცხადებას 14:6, 7-ის ინოჭარილ სიტყვეფ ისრულებ?

⁷ ხოლო ართ სირთულე თინა რე, ნამდა ადამიანეფ შხვადოშხვა ნინაშა იფჩიებუთ. იესოქ მოციქულ იოანეშა ძირაფილ ხილუათ იწინასწარმეტყველ, ნამდა სახიოლო ამბე ჩქინ დროს თე სირთულეს ხოლო გიორჯგინანდჷ (წეკითხით გამოცხადებაშ 14:6, 7). ჩქი ირნერო ვოცადუთ, მუთ შილებე მეტ ადამიანს გეგნოფჩათ სამეფოშ გურშენ სახიოლო ამბე. ამდღა მთელ მსოფლიოს მახორუ არძა ადამიანს ჩქინ ვებგვერდის jw.org შეულებ 1 000-შე მეტ ნინაშა წეკითხას ბიბლიაშა გერსხილ ინფორმაცია. ხემძღვანელ საბჭოქ მოწაფეეფიშ მამზადებელო ჩქინ მთავარ ოგურაფალ საშვალებაშ, წიგნიშ „მარადიულო გეხარით ცხოვრებათ!“, თარგმნუაშ ნებართვა 700-შე მეტ ნინას მეჩჷ. აუდიო-ვიდეო მასალაშ დო ბრაილიშ შრიფტით ბეშტელ პუბლიკაციეფიშ საშვალებათ სულიერ საზრდოს ღებულენა თიცალ ადამიანეფ ხოლო, მით ჸუჯის ვერჩქილე დო თოლს ვარწყე. ჩქინ თოლით ვორწყეთ, მუჭო ისრულებ ბიბლიურ წინასწარმეტყველებეფ. ადამიანეფ „არძა ნინაშ ხალხშე“ გურაფლენა, მუჭო იჩუან ბიბლიურ ჭეშმარიტებაშ სუფთა ნინაშა (ზაქ. 8:23; სოფ. 3:9). თე ირფელ იესო ქრისტეშ ჯგირ ხემძღვანელობაშ ჭყოლოფათ ხვადუ.

8. მუ შედეგეფ მოუღ ამდღარშახ სამქადაგებლო საქმეს?

⁸ ამდღა იეჰოვაშ ორგანიზაციას 240 ქიანას 8 000 000-შე მეტ ადამიან მსახურენს დო ირ წანას თინეფიშ რიცხვის ვით ანთასობით ნათილ ქრისტიან აძინუ. მარა არძაშ უმოს მნიშვნელოვან თე ციფრეფ ვარინ, თინა რე, ნამდა თე ახალ მოწაფეეფ „ახალ პიროვნებათ“ ითირუნა დო სულიერ თვისებეფს ავითარენა (კოლ. 3:8—10). ბრელქ მიოტუ უზნეო ცხოვრება დო  ძალადობა, ჩეთხინუ წინასწარ შექმნილ აზრ დო პატრიოტულ დამოკიდებულება. თეშნერო ისრულებ ესაიაშ 2:4-ის მოჩამილ წინასწარმეტყველება, სოდეთ ჭარჷ: „ვედიგურუანა ჩხუპის“. მუჟამსით ირნერო ვოცადუთ, დიფთირათ ახალ პიროვნებათ, ვოხვარუთ ხალხის, ქუმორთან იეჰოვაშ ორგანიზაციაშა დო ვამტკიცენთ, ნამდა მეპჸუნთ იესო ქრისტეშ ხემძღვანელობას (იოან. 13:35; 1 პეტ. 2:12). თე ირფელ შემთხვევით ვა ხვადუ; თე საქმეშ კეთებას იესო მოხვარნა.

9. მუჭოთ მათეშ 24:45—47-ის ჭარჷ, მუ იწინასწარმეტყველ იესოქ ბოლო დღალეფწკუმა დაკავშირებით?

⁹ წეკითხით მათეშ 24:45—47. იესოქ იწინასწარმეტყველ, ნამდა ბოლო დღალეფს დანიშნენდჷ „ართგურ დო გონიერ მონას“, ნამუთ მამზადენდჷ ბიბლიაშა გერსხილ სულიერ საზრდოს. ათეშენ ველუთ, ნამდა ართგურ დო გონიერ მონა დუდის ვა დაზოგენს თე საქმეშო, მუთ ქოთ თაშ ხვადუ. ჩქინ ხემძღვანელ, იესო ქრისტე, ირინუანს ცხებულ ქომოლკათაშ ჭიჭე ჯგუფის, ნამდა ღორონთიშ ხალხის დო დაინტერესებულეფს სულიერ საზრდო დროულო ქიმეჩას. თე ქომოლკათა ვა ბატონენა და დო ჯიმალეფიშ რწმენაშა (2 კორ. 1:24). თეშ მანგიორო, თინეფს არჩქილენა, ნამდა იესო ქრისტე რე მუშ ხალხიშ „ხემძღვანელ დო მეთაურ“ (ეს. 55:4).

10. სურათის მოჩამილ პუბლიკაციეფშე ნამუქ მიგეხვარეს, ქიგიოდირთითკო მარადიულ სიცოცხლეშ შარას?

¹⁰ 1919 წანაშე მოჸუნაფილ ართგურ დო გონიერ მონა გიშაშქვანს შხვადოშხვა პუბლიკაციას, მუდგაშ საშვალებათ ახალ დაინტერესებულეფ იჭყანა ბიბლიურ ჭეშმარიტებაშ გურაფას. 1921 წანას თინეფქ გეგშაშქვეს წიგნ „ღორონთიშ ქნარ“, ნამდა ქიმეხვარესკო დაინტერესებულეფს, ქიგეგესკო ბიბლიაშ ძირითად გურაფეფ. დროშ ულაწკუმა ართო, ოგურაფალ პუბლიკაციეფ  ითირუდ. თქვა ნამ პუბლიკაციათ გეჩინებაფეთ დო იჸოროფეთ ზეციურ მუმა? შილებე თენა რდუკო „მართალ რდას ღორონთ“, „მარადიულ სიცოცხლეშა მიმაჸუნაფალ ჭეშმარიტება“, „სი შეილებ მარადიულო იცხოვრე სამოთხეს დედამიწას“, „მარადიულ სიცოცხლეშა მიმაჸუნაფალ შემეცნება“, „მუს მოგურუანა ბიბლია სინამდვილეს?“, „მუს მოგურუანა ბიბლია?“ ვარდა ჩქინ ახალ პუბლიკაცია „მარადიულო გეხარით ცხოვრებათ!“. თე გიმოკოროცხილ პუბლიკაციეფ თეშ რდჷ მომზადებულ, მუჭოთ თინეფიშ გიშაშკუმალაშ დროს იჸუაფუდ პრაქტიკულ მოწაფეეფიშ მამზადებელო.

11. მუშენ რე მნიშვნელოვან, არძაქ მიბღათ სულიერ საზრდო?

¹¹ მანგარ სულიერ ოჭკუმალ ხვალე ახალ დაინტერესებულეფს ვარინ, არძას მოსაჭირნა. მოციქულ პავლექ ჭარჷ: „მანგარ ოჭკუმალ მოწიფულეფშო რე“, უკულ თინა გეუძინანს, ნამდა ბიბლიაშე ნაგურეფუშ გიმორნაფა მიმეხვარებნა „ჯგირ დო ფურიშ“ გარჩიებას (ებრ. 5:14). თე რთულ დროს, მუჟამსით უზნეობა მანგარო რე გავრცელებურ, შილებე გამჭირდან იეჰოვაშ მაღალზნეობრივ ნორმეფიშ მეჸუნაქ. მარა იესო ირნერო მოხვარნა, სულიერ საზრდოშ ჭყოლოფათ ვა ვოდინუათ ძალიერ რწმენა. თე სულიერ საზრდო ღორონთიშ სიტყვაშა, ბიბლიაშა, რე გერსხილ. ართგურ დო გონიერ მონა ქრისტეშ ხემძღვანელობაშ მეჸუნათ ამზადენს დო მარზენა თის.

12. მუჭო განვადიდენთ ღორონთიშ სახელს იესოცალო?

¹² იესოცალო, ჩქი ხოლო განვადიდენთ ღორონთიშ სახელს თეშ, მუჭოთ თინა იმსახურენს (იოან. 17:6, 26). მაგალთო 1931 წანაშე ჩქი ბიბლიურ სახელქ, იეჰოვაშ მოწმეეფქ, ქიგმადვეს. თეშნერო ვოძირეთ, ნამდა ღორონთიშ სახელ ჩქინო მანგარ მნიშვნელოვან რე დო მოკონა, თიშ სახელით მიჩინენდან. 1931 წანაშ ოქტომბერშე მოჸუნაფილ ღორონთიშ სახელ გეჭარ „გინაჯინალ კოშკიშ“ არძა ნომერიშ გალენ  გვერდის (ეს. 43:10—12). თეწკუმა ართო, „წმინდა წერილეფიშ ახალ ქვეყნიერებაშ თარგმანს“ ღორონთიშ სახელქ თიცალ ადგილეფს იჸუ გეძინელქ, სოვრეშეთ თინა ეშაღალირ რდჷ. თეშ გინაწონს, ქრისტიანულ ეკლესიეფქ ღორონთიშ სახელ, იეჰოვა, ბიბლიაშ ბრელ თარგმანშე გეშეღეს.

13. მუ გარწმუნენა, ნამდა ამდღა იესო „ართგურ დო გონიერ მონას“ ირინუანს? (იოან. 6:68)

¹³ „ართგურ დო გონიერ მონაშ“ საშვალებათ, წმინდა თაყვანიშმცემლობაშ ხუჯიშდაკინებელო, იესოქ მუშ მიმაჸუნალეფ ართ ორგანიზაციას გაერთიან. თქვა მუს ფიქრენთ თე ორგანიზაციაშე? შილებე თქვა ხოლო პეტრე მოციქულცალ დამოკიდებულება გიღდან, მიდგაქ იესოს უწუ: „მიშა იბდათ? სი გიღჷ მარადიულ სიცოცხლეშ სიტყვეფ“ (იოან. 6:68). იეჰოვაშ ორგანიზაციას ვა ვორდითკონ, მის უჩქჷ ამდღა სო იპჸიდით. თიშ საშვალებათ იესო მუთ საჭირო რენ ირფელს მარზენა, ნამდა სულიერო მუთუნქ ვამმოკორდან, დო მოგურუანა, მუჭო ვორდათ ეფექტურ მაქადაგებელეფ. თეწკუმა ართო, მოხვარნა, დიფთირათ „ახალ პიროვნებათ“, ნამდა მიღდან იეჰოვაშ მოწონა (ეფეს. 4:24).

14. მუ ჯგირობუა მოიღეს იეჰოვაშ ორგანიზაციაშე მეღებულ მითითებეფქ კოვიდ-19 პანდემიაშ დროს?

¹⁴ იესო რთულ მდგომარეობაშ დროს ხოლო მარზენა გონივრულ მითითებეფს. კოვიდ-19 პანდემიაშ დოჭყაფაშ დროს არგამათ ქობძირით, მუ ჯგირობუა მოუღ თიშ მითითებეფს. თი დროს, მუჟამსით მსოფლიოშ უმენტაშ გაურკვევლობას რდჷ დო ვა უჩქუდეს, მუ ქიმნესკო, იესოქ კონკრეტულ მითითებეფ მუჩეს დუდიშ დაცვებელო. მაგალთო გალე გიმულაშ დროს ოკო გიბკეთითკო პირბადე დო დეფცვითკო ფიზიკურ დისტანცია. უხუცესეფქ მიღეს მითითებეფ, ნამდა კრებელეფწკუმა ირიათო უღდესკო კონტაქტ, მუშენდა უჩქუდესკო  თინეფიშ ფიზიკურ დო სულიერ მდგომარეობა (ეს. 32:1, 2). ხემძღვანელ საბჭოშ ანგარიშეფშე შხვა მითითებეფს ხოლო ბღებულენდით დო თე ანგარიშეფ მანგარო ელამკინანდეს გურშა.

15. მუ მითითებეფ მიბღით პანდემიაშ დროს კრებაშ შეხვალამეფ დო ქადაგებაწკუმა დაკავშირებით დო მუქ მაჸუნ თეს შედეგო?

¹⁵ პანდემიაშ დროს თიშე ხოლო მიბღით კონკრეტულ მითითებეფ, მუჭო ჩუვატარითკო კრებაშ შეხვალამეფ დო მუჭო მიბღითკო მონაწილება ქადაგებაშ საქმეს. ხეთე ქიდიბჭყით ჩქინ ქრისტიანულ შეხვალამეფშა დო კონგრესეფშა ვიდეოკონფერენციათ დასწრება. თეს გეძინელ, უმენტაშო წერილეფით დო ტელეფონით მსახურებაშა გეგნოფრთით. არგამა რე, იეჰოვაქ აკურთხჷ ჩქინ მონდომა. მუჭოთ ბრელ ფილიალიშ ანგარიშიქ ოძირუ, მაუწყებელეფიშ რიცხვიქ მანგარო მიძინ. თე პანდემიაშ დროს ჩქინ და დო ჯიმალეფს ბრელ გურიშემაკინალ შემთხვევა ხოლო უღდეს (ქოძირით ჩარჩო  „იეჰოვა კურთხევას ვარკენს სამქადაგებლო საქმეს“).

16. მუშა შემლებნა ვორდათ დარწმუნებულ?

¹⁶ ნამთინე შილებე ფიფქრენდით, ნამდა თე პანდემიაწკუმა დაკავშირებით ორგანიზაცია ნაბეტან სიფრთხილეს გიმირჩქინანდჷ. მარა დროშ ულაწკუმა ართო გემკორჩქინდჷ, ნამდა თი მითითებეფ, ნამდგას ორგანიზაციაშე ბღებულენდით, გონივრულ რდჷ (მათ. 11:19). მუჟამსით ფიფქრენთ, მუჭო ხემძღვანელენს იესო ჸოროფათ მუშ ხალხის, უმოსო იბრწმუნებუთ, ნამდა ჭუმან დო გეღან მუდგაქ ვა მოხვადასინ, იეჰოვა დო თიშ საჸოროფო სქუა, იესო, დღას ვემმოტენა (წეკითხით ებრაელეფიშ 13:5, 6).

17. მუს ფიქრენთ იესო ქრისტეშ ხემძღვანელობაშ გურშენ?

¹⁷ მუშმადიდა კურთხევა რე, ვორთუდათ თი საქმეს, ნამდგას იესო ხემძღვანელენს! ვოკუთვნუთ ორგანიზაციას, სოდეთ შხვადოშხვა ეროვნებაშ, კულტურაშ დო ნინაშ ხალხ რე გაერთიანებულ. ჩქი ირიათო ბღებულენთ სულიერ საზრდოს დო მითითებეფს, ნამუთ სამქადაგებლო საქმეს მოხვარნა. თითოულ ბგურაფლენთ, მუჭო დიფთირათ ახალ პიროვნებათ დო მუჭო გიმიფრჩქინათ ართიანიშ ჸოროფა. მართალო, ირნერ მიზეზ მიღნა, მოამაყდან, ნამდა იესო ჩქინ ხემძღვანელ რე.