1. მუჭო ოძირუ ართ ბაღანაქ, ნამდა უღუდ გათელებაშ იმენდ?

 ᲐᲠᲗ ბაღანას, სახელო მეთიუს, სერიოზულ ლახალა უღჷ, მუდგაშ გურშენ ბრელ ოპერაციაქ აჸუ ოკეთებელქ. ართშა თინა მუშ ოჯახწკუმა ართო უჯინედ JW მაუწყებლობაშ ირთუთიან პროგრამას. პროგრამაშ ბოლოს ძირაფილ რდჷ მუსიკალურ ვიდეოკლიპ, სოდეთ ეჭარილ რდჷ, მუჭო შეხვადუდეს ახალ ქვეყნიერებას გათელებურეფს. b მეთიუ თიმწკუმა შქვით წანერ რდჷ. პროგრამაშ ჯინა გათუესინ, მუშ მშობლეფს ხე ქუმოთხჷ დო თეცალ მუდგარენ უწუ: „დე, მა, ქარწყეთო დობღურენ ხოლო გეფთელებუქ, თქვა ქომჯინით, ვენერვიანათ კინ ართო იპჸით“. წერმიდგინით, მუნერ ბედნერეფ იჸუაფდეს მეთიუშ მშობლეფ, მუჟამსით ქოძირუნდეს, მუსხით რეალურ რდჷ მუნეფიშ ჭიჭე ბოშშო გათელებაშ იმენდ.

2, 3. მუშენ რე ჯგირ დეფიფქრათ გათელებაშ იმენდიშ გურშენ?

² ჯგირ იჸუაფ, მინშა დეფიფქრათ გათელებაშ იმენდიშ გურშენ, ნამდგას ღორონთ მოპირნა (იოან. 5:28, 29). მუშენდა შილებე სერიოზულო დებლახათ ვარდა საჸოროფო ადამიანქ დომღურან (ეკლ. 9:11; იაკ. 4:13, 14). გათელებაშ იმენდ მოხვარნა, გავურზათ თე სირთულეეფს (1 თეს. 4:13). წმინდა წერილეფ მარწმუნენა, ნამდა ჩქინ ზეციერ მუმა ჯგირო მიჩინენა დო თის მანგარო ვუჸორთ (ლუკ. 12:7). დეფიქრით, იეჰოვა თითოულს თიზმათ მიჩინენა, ნამდა შეულებ ირფელამო კინ თიცალ გუმათელან, მუნერით ღურაშახ ვორდით დო დომრთინუან თი მოგონებეფ, ნამუთ მიღდეს. წერმიდგინით, ჩქინ მიმართ თიშ ჸოროფა თიცალ ძალიერ რე, ნამდა მარადიულ ცხოვრებაშ საშვალებას მარზენა დო დობღურათინ ხოლო გუმათელენა.

³ თე სტატიას პირველ რიგის ქობძირუნთ, მუშენ შემლებნა ბჯერდან, ნამდა იჸუაფ ღურელეფიშ გათელება. უკულ გუვარჩიენთ, ბიბლიას ინოჭარილ რწმენაშ გუმამანგარებელ ართ შემთხვევას, სოდეთ მოჩამილ რე თე სტატიაშ მთავარ მუხლ: „გეთელებ სქან ჯიმა!“ (იოან. 11:23). ბოლოს თის ხოლო ქიგებგენთ,  მუჭო გინვაშქვათ გათელებაშ იმენდ ჩქინო უმოს რეალურო.

4. მიდგარენიშ დუნაპირებ დებჯერათინ, მუშა ოკო დებრწმუნათ? ქიმიჸონით მაგალით.

⁴ მიდგარენიშ დუნაპირებ დებჯერათინ, საჭირო რე, თიშა დებრწმუნათ, ნამდა თის ქოთ სურვილ უღჷ დო ქოთ ძალა, შეასრულას მუშ სიტყვა. წერმიდგინით თეცალ სიტუაცია: ძალიერ ქარბორიაქ თქვან ჸუდე სერიოზულო დაზიან, მარა სქან მეგობარ მოურს დო გირაგად: „მა მიგეხვარებუქ, ნამდა სქან ჸუდექ კინ ჯვეშობურ მდგომარეობას დართას“. თინა შურდოგურით გირაგადნა თეს დო თქვა ხოლო რჯერა, ნამდა მართალო ოკო მოხვარა. თეს გეძინელ, თინა გამოცდილ მშენებელ ქორე დო საჭირო ხელსაწყოეფ ქუღუნ-და, ხოლო უმოსო რეთ დარწმუნებულ, ნამდა შეულებ თქვან მოხვარა. თაშ ნამდა რჯერა თიშ სიტყვაშ. მუშ რაგად შემლებნა ღორონთიშ დუნაპირებ გათელებაშ იმენდიშ გურშენ? ქოუღუნო თის სურვილ დო ძალა, ნამდა შეასრულას მუშ დუნაპირებ?

5, 6. მუშენ შემლებნა თიშ რაგად, ნამდა იეჰოვას უღჷ სურვილ, გათელას ღურელეფ?

⁵ ქუღუნო იეჰოვას თიშ სურვილ, გათელას ღურელეფ? მუშო ოკო რაგად, ქო. თიქ ბიბლიაშ მუსხირენ მაჭარალს, მუშ სიტყვას ენაჭარაფუ გათელებაშ გურშენ, ნამუთ მომავალს იჸუაფ (ეს. 26:19; ოს. 13:14; გამოცხ. 20:11—13). იეჰოვა ირიათო ასრულენს მუშ დოდვალირ პირობას (იეს. 23:14). მუშო ოკო რაგად, თის მანგარო ოკო, ნამდა სიცოცხლე დურთინუას ღურელეფს. მუშენ იფჩიებუთ თეს?

⁶ დეფიფქრათ პატრიარქ იობიშ სიტყვეფშე. თინა დარწმუნებულ რდჷ, ნამდა დოღურუდ-და, იეჰოვას მენატრებუდ დო კინ მაკორნედ თიშ ძირაფა (იობ. 14:14, 15). იეჰოვა ვათირე. თის ზუსტას თეცალ გრძნობეფ უღჷ მუშ არძა მსახურიშ მიმართ, მიდგას ღურაშ ლურით ლურს დო მანგარო ოკო, არძას დურთინუას სიცოცხლე, ნამდა რდან ჯამრთელეფ დო ბედნერეფ. მუშ რაგად შემლებნა თი მილიარდობით ადამიანშე, მიდგას ონდო ცოცხალეფ რდეს, ვემიაჩეს საშვალებაქ, გეჩინებაფესკო იეჰოვა? ჩქინ მოჸოროფე ღორონთის ოკო, თინეფს ხოლო დურთინუას სიცოცხლე (საქ. 24:15). თის უღჷ სურვილ, თინეფს ხოლო მიაჩან შესაძლებლობაქ, გინირთან თიშ მეგობრეფო დო მარადიულო იცხოვრან დედამიწას (იოან. 3:16). არგამა რე, იეჰოვას მთელ გურით ოკო, გათელას ღურელეფ.

7, 8. მუშენ შემლებნა ბჯერდან, ნამდა იეჰოვას უღჷ ძალა, გათელას ღურელეფ?

⁷ იეჰოვას უღჷ ძალა გათელას ღურელეფ, მუშენდა ბიბლიას თიშ გურშენ ბკითხულენთ, ნამდა „ირფელიშშემალებე“ რე (გამოცხ. 1:8). თაშ ნამდა, თის დასაბაღ ძალა უღჷ, გიორჯგინას ჩქინ ნებისმიერ ნტერს, თინეფ შქას ღურას ხოლო (1 კორ. 15:26). თეშ რჩქინა მამანგარენა დო გურშა ემქექუანა. გუვარჩუათ და ემა არნოლდიშ შემთხვევა. თიქ დო მუშ ოჯახიქ ქიანაშ რწმენაშ გამოცდეფს შეხვადეს მაჟია მსოფლიო ომიშ დროს. თინეფს საკონცენტრაციო ბანაკეფს საჸოროფო პიროვნებეფქ დუღურეს. ემაქ მუშ ძღაბის გურშა ეუქექუკონ თიშენ, თეცალ სიტყვეფ უწუ: „მით ღურნან თინეფ სიცოცხლეს კინ ვადართუნან-და, გიშურს, ნამდა ჩქინ ნტერ, ღურა, ღორონთშე უმოს ძალიერ ჸოფე. მარა თენა თაშ ვა რე“. მუშო ოკო რაგად, მითინ დო მუთუნ ვა რე იეჰოვაშე უმოს ძალიერ! ირფელიშშემალებე ღორონთის, მიდგაქ სიცოცხლე გაჭყჷ, შეულებ კინ დურთინუას სიცოცხლე თინეფს, მით ღურელეფ რენა.

⁸ ხოლო ართ მიზეზ, მუდგაშ გურშენ ბჯერა, ნამდა ღორონთის შეულებ სიცოცხლე დურთინუას ღურელეფს თინა რე, ნამდა თის ირფელ კილ-კილშა შჷ დო მუთუნ ვაჭყორდუ. დეფიქრით, თის ქიანაშ მურიცხ აფჷ გოჭყაფილ მარა, მუჭოთ ბიბლიაშე ბგებულენთ, არძა მურიცხის სახელით უძახ (ეს. 40:26). თეს გეძინელ, იეჰოვას შჷ თითოულ ადამიან, მით ღურელ რე (იობ. 14:13; ლუკ. 20:37, 38). თის შეულებ ხეთეშე ქიგიშინას არძა დეტალ თი პიროვნებაშ გურშენ, მიდგას გათელენს, იჸუაფ თენა გენეტიკურ კოდ, ულირ ცხოვრება დოვარ მოგონებეფ.

9. მუშენ რჯერა იეჰოვაშ დუნაპირებუშ გათელებაშ გურშენ?

 ⁹ არგამა რე, შემლებნა ბჯერდან, ნამდა იეჰოვა შეასრულენს მუშ დუნაპირებუს დო გათელენს ღურელეფს. მიჩქნა, თის ქოთ ძალა უღჷ დო ქოთ სურვილ, გაკეთას თენა. ხოლო ართ მიზეზ, მუდგაშ გურშენ შემლებნა ბჯერდან ღორონთიშ დუნაპირებ ღურელეფიშ გათელებაშ გურშენ თინა რე, ნამდა იეჰოვაქ ულირს ბრელშა აკეთ თენა. ბიბლიურ დროს იეჰოვაქ მუშ ნამთინე ართგურ მსახურს, თინეფ შქას იესოს ხოლო, ღურელეფიშ გათელებაშ ძალა მეჩჷ. გუვარჩუათ თეშ ართ-ართ შემთხვევა, ნამუთ ენოჭარილ რე იოანეშ მა-11 დუდის.

10. მუ ხვადუ, მუჟამსით იესო იორდანეშ მაჟია მხარეს ქადაგენს დო მუს ორთჷ თინა? (იოან. 11:1—3).

¹⁰ წეკითხით იოანეშ 11:1—3. წერმიდგინით ახ. წ. 32 წანაშ ბოლო რე. ლაზარე, ნამუთ მუშ დალეფწკუმა, მართა დო მარიამწკუმა, ართო ბეთანიას ცხოვრენს, გლახათ გინმირთუ (ლუკ. 10:38—42). თინეფ მანგარო ნერვიანენა მუნეფიშ ჯიმაშე დო ოკონა, იესოს გაგებაფუან თე ამბე, ნამუთ თი დროს იორდანეშ მაჟია მხარეს რე. თევრეშე ბეთანიაშახ ჟირ დღაშ ოულარ შარა მეძჷ (იოან. 10:40). სანარღოთ, თი დროს მუჟამსით ამბეშ მიმაღალარ იესოშა მეურს, ლაზარე ღურუ. თიშ უმკუჯინუო, ნამდა იესოს თე ირფელ უკვე უჩქჷ, იშენით ჟირ დღას სქიდუ თექ დო უკულ მეურს ბეთანიაშა. მუჟამსით ბეთანიაშა ენმურს, ლაზარე უკვე ოთხ დღერ ნაღურა რე. მარა იესოს ულამ თიცალ მუდგარენ გაკეთას, მუთ მუშ მეგობრეფს ჯგირობუას მოუღანს დო განადიდენს ღორონთის (იოან. 11:4, 6, 11, 17).

11. მუს ბგურაფლენთ თე შემთხვევაშე მეგობრობაშ გურშენ?

¹¹ თე შემთხვევაშე ბრელ მუდგარენს ბგებულენთ მეგობრობაშ გურშენ. დეფიქრით, მუჟამსით მართა დო მარიამქ იესოს ლაზარეშ ამბე გაგებაფუეს, თინეფს ვაუთხუნა, ბეთანიაშა ქუმურთუმუდკო, უბრალოთ უწის, ნამდა თიშ საჸოროფო მეგობარ გლახათ რდჷ (იოან. 11:3). ხვალე თენა ვარინ, მუჟამსით ლაზარექ ღურ იესოს შეულებუდ ვედკო ბეთანიაშა დო სოდეთ რდუნ თევრეშე გათელკო თინა, მარა ისხუნუ ქელუდირთკო მუშ მეგობრეფს, მართა დო მარიამს. თქვანდე მუს თქუანთ? ქორჸუნანო თიცალ მეგობარ, მით თქვანწკუმა უცფას გორჩქინდუ, მუჟამსით მოხვარა დეგესაჭირებნა? თაშ ქორენ-და, ნებისმიერ გაჭირებაშ დროს შეილებნა გიღდან თიშ იმენდ (იგავ. 17:17). მორთ გინოჭყვიდილ მაფდან ვორდათ თიცალ მეგობარ, მუნერით იესო რდჷ. ასე კინ ლაზარეშ შემთხვევას დუვართათ დო ქობძირათ, მუ ხვადუ უკულ.

12. მუ დეპირ იესოქ მართას დო მუშენ ჯერდჷ თის იესოშ? (იოან. 11:23—26).

¹² წეკითხით იოანეშ 11:23—26. ასე წერმიდგინით, მართა გებულენს, ნამდა იესო ბეთანიაშა მონჭაფილ რე. თინა იესოს ეწაზადუ დო ურაგად: „უფალ, სი თაქ ქოჸოფედკონ, ვა ღურუდ ჩქიმ ჯიმა“ (იოან. 11:21). მართალ რე, იესოს შეულებუდ ლაზარეშ სქილიდაფა, მარა უმოს დიდ მუდგარენიშ კეთება ულამ დო ათეშენ მართას ოპირ: „გეთელებ სქან ჯიმა!“. თინა მიზეზის ხოლო ურაგად, მუშენ შეულებ ჯერდას თე სიტყვეფიშ: „მა ვორექ გათელება დო სიცოცხლე.“ მართალო თაშ რე, იესოს ღორონთშე უღჷ ძალა, გათელას ღურელეფ. თეიშახ იესოს უკვე გათელებურ აფუდ ახალგაზრდა ძღაბ დო ახალგაზრდა ბოშ ხოლო, საეგებიოთ, ღურუნ თიმ დღას (ლუკ. 7:11—15; 8:49—55). მარა ქეშულებუდუო  თის გათელკო ოთხ დღერ ღურელ, ნამდგაშ სხეულს ჸორადუა უკვე დოჭყაფილ აფუდ?

13. მუჭოთ იოანეშ 11:32—35-შე იძირე, მუ რეაქცია უღუდ იესოს, მუჟამსით მარიამიშ დო ხალხიშ ნგარა ქოძირ? (ქოძირით სურათ).

¹³ წეკითხით იოანეშ 11:32—35. ქიგებგათ, მუ ხვადუ უკულ. ლაზარეშ და მარიამ, იესოშ შეიოხვამლაფშა მეურს დო ზუსტას თი სიტყვეფს ურაგად, მუთ მართაქ უწუ: „უფალ, თაქ ქორდიკონ, ჩქიმ ჯიმა ვა ღურუდ“. მარიამ დო თიწკუმა ართო რენან თინეფ, გურაკოჭირებულეფ რენა დო ინგარა. თე ირფელიშ მიმაჯინუ იესო ნგარას იჭყანს, მუშენდა გურშა მეუღ მუშ მეგობრეფიშ გაჭირება. თის არჩქილე, მუშმანწარა ჭუა მოჸუნს საჸოროფო პიროვნებაშ ღურას, ათეშენ მთელ გურით ოკო, ქიმეხვარას თინეფს დო ეუქექუას.

14. მუს ბგურაფლენთ იესოშ რეაქციაშე იეჰოვაშ გურშენ?

¹⁴ მარიამიშ ნგარაშენ იესოშ რეაქცია მოგებაფუანა, მუნერ თვისებეფ უღჷ იეჰოვას. თინა შხვეფიშ გაჭირებაშ გურშა მიმაღალარ ღორონთ რე. მუშენ შემლებნა თეშ რაგად? მუჭოთ წოხოლენ სტატიას გუვარჩით, იესოს თიცალ აზროვნება დო გრძნობეფ უღჷ, მუნერით იეჰოვას. თინა სრულყოფილო მეჸუნს მუამუშიშ მაგალითის (იოან. 12:45). წერმიდგინით, იესოქ თიშმანწარას მიღჷ მუშ მეგობრეფიშ გაჭირება გურშა, ნამდა ქანგარინ. თე ირფელიშ კითხირ დო თიშე დაფიქრება, მარწმუნენა, ნამდა იეჰოვაშა მანგარო მოქმედენს, მუჟამსით ჩქინ ჩილამურეფს ორწყე (ფსალმ. 56:8). თეშ გაგება სურვილს მირჩქინანა, უმოსო დევეახლოვათ ჩქინ ღორონთის, ნამდგას გურშა მეუღ შხვეფიშ გაჭირება.

15. მუჭოთ იოანეშ 11:41—44-ის რე ეჭარილ, მუქ მოხვად თი ადგილს, სოდეთ ლაზარე რდჷ დოსვანჯაფილ? (ქოძირით სურათ).

¹⁵ წეკითხით იოანეშ 11:41—44. იესო მეურს თი ადგილშა, სოდეთ ლაზარე რე დოსვანჯაფილ დო ითხინს, თი ადგილს დიდ ქუა ჩუთხინუან. მარა მართას ვა უსხუნ თეშ კეთება, მუშენდა ლაზარე ოთხ დღერ ნაღურა რე დო უკვე შურ ხოლო აღვენუდ. იესო თის ურაგად: „ხომ ქოიწი, ქირწმუნენქ-და, ღორონთიშ დიდებას ქოძირუნქ-მაქ?!“ (იოან. 11:39, 40). თეშ უკულ, იესო ცაშა ეიჯინე დო არძაშ ოძირაფალო ლოცვას იჭყანს, მუშენდა ოკო, იეჰოვას უძღვინან დიდება თიშე, მუდგას ასე გაკეთენს. თინა ხონარმაღალო იძახ: „ლაზარე გეგმორთ!“. უკულ სასწაულ მუდგარენ ხვადუ — ლაზარე მუშ კუჩხით გიმურს თი ადგილშე, სოდეთ სვანჯუდ. იესოქ თიცალ  მუდგარენ აკეთ, მუთ ბრელს გასაკვირო მიორჩქუდ (ქოძირით 2008 წანაშ 1 იანარიშ „გინაჯინალ კოშკის“ მოჩამილ სტატია: „მუშენ მერთჷ იესოქ მანთხა დღას თი ადგილშა, სოდეთ ლაზარე სვანჯუდ?“ [ქორთ.]).

16. მუჭო მიმანგარენა იოანეშ მავითაართა დუდის ენოჭარილ შემთხვევა, გათელებაშ იმენდიშ მიმართ რწმენას?

¹⁶ იოანეშ მავითაართა დუდის მოჩამილ შემთხვევა მიმანგარენა რწმენას გათელებაშ იმენდიშ მიმართ. მუშენ იფჩიებუთ თეს? ქიგიფშინათ მართაშა მეჩამილ იესოშ დუნაპირებ: „გეთელებ სქან ჯიმა!“ (იოან. 11:23). მუშ მუმაცალო, იესოს ქოთ სურვილ უღჷ დო ქოთ ძალა, შეასრულას თე დუნაპირებ დო სიცოცხლე დურთინუას ღურელეფს. იესოშ ჩილამურეფ თის ამტკიცენს, ნამდა თის შურ ოლჷ, მუჟამ გათელენს ღურელეფს დო მუჟამ ჩამთხინუანა თი გურჭუას, ნამუთ საჸოროფო პიროვნებაშ ღურას მოჸუნს. ლაზარეშ გათელება ხოლო ართშა მარწმუნენა, ნამდა იესოს უღჷ ძალა, სიცოცხლე დურთინუას ღურელეფს. თეს გეძინელ დეფიქრით, მართაშა რაგადებულ იესოშ სიტყვეფშე: „ხომ ქოიწი, ქირწმუნენქ-და, ღორონთიშ დიდებას ქოძირუნქ-მაქ?!“ (იოან. 11:40). ჩქი ბრელ მიზეზ მიღნა ბჯერდან, ღორონთ შეასრულენს მუშ დუნაპირებუს დო გათელენს ღურელეფს. მარა მუშ კეთება შემლებნა, თე იმენდიქ ჩქინო უმოს რეალურო გინირთასინ?

17. მუშა ოკო გუვამახვილათ ყურადღება, მუჟამსით ბიბლიას გათელებაშ შემთხვევეფიშ გურშენ ბკითხულენთ?

¹⁷ წეკითხით დო დეფიქრით გათელებაშ თი შემთხვევეფშე, ნამუთ ბიბლიას რე ენოჭარილ. წმინდა წერილეფს მოჩამილ რე ღურელეფიშ გათელებაშ ბრუო შემთხვევა. c ყურადღებათ გეგმირკვით თითოულ შემთხვევა დო რშუდან, გათელებურ კოჩეფ, ოსურეფ დო ბაღანეფ, რეალურ პიროვნებეფ რდეს. გიმორკვიებაშ დროს ქიდეკვირით, მუშ გურაფა შეილებნა დო დეფიქრით, მუჭო იძირე თითოულ შემთხვევაშე, ნამდა ღორონთის, ქოთ სურვილ უღჷ დო ქოთ ძალა, სიცოცხლე დურთინუას  ღურელეფს. მუთ მთავარ რე, დეფიქრით იესოშ გათელებაშე. თენა რე არძაშ უმოს მნიშვნელოვან გათელება, მუთ დღას მოხვალამე. თი ფაქტ, ნამდა იესოშ გათელებას ოშობით მოწმე ჸუნდჷ, მიმანგარენა რწმენას გათელებაშ იმენდიშ მიმართ (1 კორ. 15:3—6, 20—22).

18. მუჭო გაიმანგარენა ჩქინ ობირეშეფ გათელებაშ იმენდიშ რწმენას? (ქოძირით სქოლიო).

¹⁸ ქურჩქილით ჩქინ ობირეშეფს, სოდეთ ღურელეფიშ გათელება რე ეჭარილ, დეფიქრით თინეფიშ ტექსტშე დო ქიბირით d (ეფეს. 5:19). თე ობირეშეფ მიმეხვარებნა, გათელება ჩქინო უმოს რეალურ რდას დო გამმანგარენა თე ძვირფას იმენდიშ რწმენას. ქურჩქილით თინეფს, ქიბირით დო ოჯახურ თაყვანიშცემაშ დროს გარჩით თინეფიშ შინაარს. ქეცადით თე ობირეშეფიშ ტექსტიშ დამახსოვრებას დო თინეფშე ჯგირო დაფიქრებას. თენა თქვან გურს შეხებ დო რწმენას გაიმანგარენა. მომავალს თქვან სიცოცხლე საფრთხეშ თუდო ქიგედირთუ ვარდა საჸოროფო ადამიანს მიოდინუანთ-და, იეჰოვა მუშ წმინდა შურით ქუგგოშინანა თე ობირეშეფს, მუთ გურშა ეიქექუანა დო რწმენას გაიმანგარენა.

19. მუ შილებე წერმიბდგინათ, მუჟამსით გათელებაშ გურშენ ფიფქრენთ? (ქოძირით ჩარჩო:  „მუს კითხენთ თინეფს?“).

¹⁹ გეგმირინეთ წარმოსახვაშ უნარ. იეჰოვაშ მოჩამილ თე უნარიშ ჭყოლოფათ, შემლებნა წერმიბდგინათ ჩქინ დუდ ახალ ქვეყნიერებას. ართ და იჩიებ: „ახალ ქვეყნიერებაშე ფიქრის თისხი დროს გიმურთუნქ დო თიზმა მუდგარენს წერმიბდგინენქ, ნამდა მინშა, სამოთხეს პეულერ ვარდიშ შურს ხოლო ბგინაფლენქ“. წერმიდგინით, მუჭო შეხვადუთ ბიბლიურ დროს მახორუ ღორონთიშ ართგურ მსახურეფს. არძაშ უმოსო მის გოკონა შეხვადათ? მუს კითხენთ თის? წერმიდგინით თი მომენტ, მუჟამსით კინ ქეშეხვადუთ თქვან საჸოროფო კათას, მით ღურაქ მიდაიღეს. დეფიქრით, მუს უწინთ, მუჭო ახუტოლუთ, მუნერ ბედნერ იჸით თი მომენტის, ალბათ თოლს ხიოლიშ ჩილამურ ხოლო ქელგაჸუნუნა.

20. მუ ოკო მაფდან გინოჭყვიდილ?

²⁰ გურ სიმარდულით მაფნა ეფშა თი იმენდიშ გურშენ, მუთ იეჰოვაქ მუჩეს. შემლებნა დარწმუნებულ ვორდათ, ნამდა თინა აუცილებერო შეასრულენს მუშ დუნაპირებუს დო გათელენს ღურელეფს, მუშენდა თის თეშ კეთებაშ ქოთ სურვილ უღჷ დო ქოთ ძალა. მორთ, გინოჭყვიდილ მაფდან, უმოსო გუვამანგარათ რწმენა თე ძვირფას იმენდიშ მიმართ. თეშ კეთება მიმეხვარებნა, უმოსო დევეახლოვათ ღორონთის, მით თითოულს თეცალ მუდგარენს მოპირნა: „გეთელებ სქან საჸოროფო პიროვნება!“.