ᲝᲒᲣᲠᲐᲤᲐᲚ ᲡᲢᲐᲢᲘᲐ 19
გემანგარით რწმენა ღორონთიშ დუნაპირებ ახალ ქვეყნიერებაშ მიმართ
„ღორონთ ადამიან ვა რე, ნამდა . . . თქუას დო ვა გაკეთას“ (ᲠᲘᲪᲮ. 23:19).
ᲝᲑᲘᲠᲔᲨᲘ 142 ვა ვოდინუათ ჩქინ იმენდი
ᲨᲘᲜᲐᲐᲠᲡ a
1, 2. მუშ კეთება მოსაჭირნა, ონდო ახალ ქვეყნიერებას ველუთ?
ᲩᲥᲘ მანგარ მარდულეფ ვორეთ იეჰოვაშ, მუშენდა მოპირნა, ნამდა ამდღარ მსოფლიოს დოთირანს ახალ ქვეყნიერებათ, „სოდეთ დამკვიდრებულ იჸუაფ სიმართლე“ (2 პეტ. 3:13). მართალ რე, ვა მიჩქნა ზუსტ დრო, მუჟამ შისრულებ თე დუნაპირებ, მარა ამდღარ ქვეყნიერებას ხვადუნ თი მოვლენეფს გეგნვოჯინეთ-და, თი დასკვნაშა მეურთ, ნამდა გვალო ბრელ ხოლო ვა მაფნა ოჯინე (მათ. 24:32—34, 36; საქ. 1:7).
2 მნიშვნელობა ვა უღჷ, მუზმა ხან რე ჭეშმარიტება მიჩქნა, არძას მოსაჭირნა რწმენაშ გამანგარება თე დუნაპირებუშ მიმართ. მუშენ რე თეშ კეთება საჭირო? მუშენდა მუსხით ძალიერ რწმენა ვა მიღდანინ, დროშ მიკულაწკუმა ართო შილებე თიქ დესუსტას. მოციქულ პავლექ რწმენაშ ნაკლებობა მიშინუ, „მუჭოთ ცოდვა, ნამუთ ხეშა ადვილო ეშამჭოფანა“ (ებრ. 12:1). რწმენაქ ვედმესუსტანინ, საჭირო რე, რეგულარულო დეფიფქრათ თი მტკიცებულებეფშე, მუთ ოძირანს, ნამდა ღორონთიშ დუნაპირებ ახალ ქვეყნიერება მალას დოდირთუ (ებრ. 11:1).
3. მუს გუვარჩიენთ თე სტატიას?
3 თე სტატიას გუვარჩიენთ სუმ საშვალებას, ნამუთ მიმეხვარებნა, გუვამანგარათ რწმენა იეჰოვაშ დუნაპირებ ახალ ქვეყნიერებაშ მიმართ: 1) გიშაჸიდირალშე ფიქრ, 2) ღორონთიშ ძალაშე ფიქრ დო 3) სულიერ საქმეეფს აქტიურო მონაწილებაშ მეღება. უკულ ქობძირუნთ, მუჭო მიმანგარენა ამდღა რწმენას აბაკუმშა რაგადებულ იეჰოვაშ სიტყვეფ. მორთ პირველო გუვარჩუათ ნამთინე სიტუაცია, სოდეთ მოსაჭირნა ძალიერ რწმენაშ გიმორჩქინა ღორონთიშ დუნაპირებუშ მიმართ.
ᲡᲘᲢᲣᲐᲪᲘᲔᲤ, ᲛᲣᲟᲐᲛᲡᲘᲗ ᲫᲐᲚᲘᲔᲠ ᲠᲬᲛᲔᲜᲐ ᲛᲝᲡᲐᲭᲘᲠᲜᲐ
4. ნამ გადაწყვეტილებეფიშ მეღებაშ დროს მოსაჭირნა ძალიერ რწმენა?
4 ჩქი ირდღას ბღებულენთ თიცალ გადაწყვეტილებეფს, სოდეთ ძალიერ რწმენაშ გიმორჩქინა რე საჭირო. მაგალთო, გინმობჭყვიდუნთ, მუნერ საზოგადოებაწკუმა მიღდან ურთიერთობა, მუ განათლება მიბღათ, დეფქორწინათ დო ვარ, პჸუნდან დო ვარ სქუალეფ დო მუნერ გართობა დო სამუშა გიშებგორათ. ჯგირ იჸუაფ, თეცალ დროს ჩქინ დუდის ქობკითხათ: „ქაძირანსო ჩქიმ გადაწყვეტილებეფ, ნამდა მართალო ბჯერს თე ქვეყნიერება მალას მისპუ დო თის ღორონთ ახალ ქვეყნიერებათ დოთირანს? ხომ ვა მოქმედენს ჩქიმ გადაწყვეტილებეფშა თი ხალხიშ აზროვნება, მით ამდღარ დღათ ცხოვრენს დო ვა უღჷ მარადიულ ცხოვრებაშ იმენდ?“ (მათ. 6:19, 20; ლუკ. 12:16—21). სწორ გადაწყვეტილებეფს მიბღენთ, მუჟამსით მაღვენუნა თიშ ძალიერ რწმენა, ნამდა ღორონთიშ დუნაპირებ ახალ ქვეყნიერება მალას დოდირთუ.
5, 6. მუშენ მოსაჭირნა ძალიერ რწმენა განსაცდელეფიშ დროს? ქიმიჸონით მაგალით.
5 ძალიერ რწმენა განსაცდელეფიშ დროს ხოლო მოსაჭირნა. მაგალთო, შილებე რწმენაშ გურშენ ფთხოზუდან, ქრონიკულ ლახალა მიღდან ვარდა შხვადოშხვა მიზეზეფიშ გურშენ გურგოტახილ ვორდათ. მუჟამსით თეცალ სირთულეეფ რჩქინდუ, დუდშე შილებე მტკიცას მაფდან გინოჭყვიდილ, გივორჯგინათ თინეფს, მარა მუჟამსით ვორწყეთ, თე პრობლემეფს ბოლო ვა უღჷ, ძალიერ რწმენა მოსაჭირნა, ნამდა გავურზათ თინეფს დო ხიოლით გუვაგრძელათ იეჰოვაშ მსახურება (რომ. 12:12; 1 პეტ. 1:6, 7).
6 განსაცდელეფიშ დროს შილებე თინა ხოლო ქიფიფქრათ, ნამდა იეჰოვაშ დუნაპირებ ახალ ქვეყნიერება დღას ვა დოდირთუ. ნიშნენსო თენა თის, ნამდა სუსტ რწმენა მიღნა? მუშო ოკო რაგად, ვარ. ქიმიპჸონათ თეცალ მაგალით: ზოთონჯის შილებე თიცალო ჸინუნდას დო თიცალ ჩხურ რდას, ნამდა იფიფქრათ, დღას ვა დოტიბუ დო სინჩხეეფ დღას ვეჸი, მარა ხომ ქომიჩქნა, ნამდა ზაფხულ აუცილებერო დოდირთუ?! თეშნერო, მუჟამსით გურგოტახილ ვორეთ, შილებე იფიფქრათ, ახალ ქვეყნიერება დღას ვა დოდირთუ. მარა ძალიერ რწმენა ქომიღნან-და, დარწმუნებულ იპჸით, ნამდა ღორონთ აუცილებერო შეასრულენს მუშ დუნაპირებუეფს (ფსალმ. 94:3, 14, 15; ებრ. 6:17—19). თენა მტკიცას ქობწანან-და, შემალებენა ღორონთიშ მსახურება ჩქინ ცხოვრებას პირველ ადგილს ქიგვორინუათ.
7. მუნერ აზროვნებას ოკო ევუჩილითუათ დუდ?
7 ძალიერ რწმენაშ გიმორჩქინა სამქადაგებლო საქმეშ მონაწილებაშ დროს ხოლო მოსაჭირნა. ბრელს მიდგას „სახიოლო ამბეს“ ვუქადაგენთ ვა ჯერს, ნამდა ღორონთიშ დუნაპირებ ახალ ქვეყნიერება მართალო დოდირთუ (მათ. 24:14; ეზეკ. 33:32). ჩქი ვა მოკონა, თინეფიშ დამოკიდებულებაქ ჩქინ აზროვნებაშა იმოქმედას დო ირფელს, მუდგას იეჰოვა მოპირნა, ეჭვიშ თოლით ვუჯინათ. თექ ვა მოხვადასინ, აუცილებერ რე, გუვამანგარათ ჩქინ რწმენა. მორთ გუვარჩუათ სუმ საშვალება მუთ თეშ კეთებას მიმეხვარებნა.
ᲓᲔᲤᲘᲥᲠᲘᲗ ᲒᲘᲨᲐᲸᲘᲓᲘᲠᲐᲚᲨᲔ
8, 9. მუჭო მიმანგარენა რწმენას გიშაჸიდირალშე ფიქრ?
8 პირველ საშვალება, მუთ რწმენაშ გამანგარებას მიმეხვარებნა, გიშაჸიდირალშე ფიქრ რე, მუშენდა ზუსტას თინა მარწმუნენა, ნამდა ღორონთიშ არძა დუნაპირებ შისრულებ. მუჟამსით ფიფქრენთ, მუშენ გიშამჸიდეს ღორონთიქ დო მუშმადიდა მსხვერპლშა იდჷ თიქ, უმოსო იბრწმუნებუთ, ნამდა ულიებ სიცოცხლე დო უჯგუშ მომავალწკუმა დაკავშირებით თიშ დუნაპირებ აუცილებერო შისრულებ. მუშენ შემლებნა თეშ რაგად?
9 მუჭო გიშამჸიდეს იეჰოვაქ? თიქ მუშ საჸოროფო, ხვალეგუნაჭყეფ სქუა დო ხოლოშიან მეგობარ, ზეცაშე დედამიწაშა ქუმაშქვჷ, ნამდა დაბადებედკო, მუჭოთ სრულყოფილ ადამიან. დედამიწას ცხოვრებაშ დროს, იესოს ქიანაშ სირთულეეფშა აჸუ გარზებელქ. თინა ადამიანეფქ ატანჯეს დო ბოლოს წამებულო დოჸვილეს. წერმიდგინით, მუშმადიდა მსხვერპლშა იდჷ იეჰოვაქ ჩქინ გიშაჸიდირალო! ჩქინ მოჸოროფე ღორონთ, მუშ სქუას წამებაშო დო ტანჯებათ ღურაშო დღას ვა მასქიდუდ ხვალე თიშენ, ნამდა გვალო ჭიჭე ხანით ნობღვედესკო უჯგუშ ცხოვრება (იოან. 3:16; 1 პეტ. 1:18, 19). რახანს იეჰოვაქ თეშმადიდა მსხვერპლშა იდჷ დო მუშ ძვირფას სქუა ჩქინო გაწირ, თიშ შესაძლებლობას ხოლო ქომჩანა, ნამდა ახალ ქვეყნიერებას ულიებ სიცოცხლეთ გეფხარათ.
ᲘᲤᲘᲥᲠᲘᲗ ᲘᲔᲰᲝᲕᲐᲨ ᲫᲐᲚᲐᲨᲔᲜ
10. მუჭოთ ეფესოელეფიშ 3:20-შე იძირე, მუშ კეთება შეულებ იეჰოვას?
10 მაჟია საშვალება, მუდგათ რწმენაშ გამანგარება შემლებნა, რე ღორონთიშ ძალაშე ფიქრ. თის შეულებ შეასრულას ირფელ, მუდგას მოპირნა. ამდღა ბრელ ადამიანს ულიებ სიცოცხლე დო ახალ ქვეყნიერებას ცხოვრება წარმოუდგენელო მიორჩქ. მარა ღორონთ ხშირას მოპირნა თიცალ მუდგარენს, მუდგაშ შესრულება ადამიანეფს დღას ვეშიალებენა. თიშ კეთება ხვალე მუს შეულებ, მუშენდა ირფელიშშემალებე ღორონთ რე (იობ. 42:2; მარ. 10:27). ათეშენ ვამკვენა, მუჟამსით თინა სასწაულ დუნაპირებუეფს მარზენა (წეკითხით ეფესოელეფიშ 3:20).
11. ქიმიშინეთ ღორონთიშ მუსხირენ დუნაპირებუეფ, მუთ ართ მეჯინათ რთულ შეიოსრულებერ რდჷ (ქოძირით ჩარჩო: „შესრულებურ დუნაპირებუეფ, ნამუთ ართ მეჯინათ შეიოსრულებერო რთულ იძირედ“).
11 გუვარჩუათ მუსხირენ შემთხვევა, მუჟამსით ღორონთიქ ადამიანეფს თიცალ მუდგარენს დეპირ, მუდგაშ შესრულება ართ მეჯინათ შეიოლებერ ვა რდჷ. მაგალთო, თიქ ხანშამიშულირ აბრაამს დო სარას პირობა მეჩჷ, ნამდა სქუა აჸვენუდეს (დაბ. 17:15—17). ხვალე თენა ვარინ, ღორონთიქ აბრაამს უწუ, ნამდა თიშ გამნარყ, ქანაანიშ დიხას ქიდიხორუდ. წანეფიშ დინახალე აბრაამიშ გამნარყეფ, ისრაელეფ, ეგვიპტეს მონეფ რდეს, ათეშენ აბრაამშა მეჩამილ ღორონთიშ დუნაპირებ, ართ მეჯინათ თეშ იძირედ, ნამდა დღას ვეშისრულებუდ. მარა იეჰოვას ვეგნურთაფ მუშ სიტყვაშა დო შეასრულ თინა. უმოს გვიანო, თიქ ხანშამიშულირ ელისაბედის ხოლო უწუ, ნამდა სქუა აჸვენუდ. ხვალე თენა ვარინ, ღორონთიქ ქალწულ მარიამს ხოლო უწუ, ნამდა გეიორჩქინანდჷ ქომოლსქუას, მიდგაშ მოულაშ გურშენ იეჰოვაქ პირობა დოდვჷ, ანთასობით წანაშ წოხოლე ედემიშ ბაღის (დაბ. 3:15).
12. მუშა მარწმუნენა იესო ნავეშ ძეშ 23:14 დო ესაიაშ 55:10, 11-ის ენოჭარილ სიტყვეფ?
12 მუჟამსით ფიფქრენთ, მუჭო ასრულენდჷ იეჰოვა ულირს მუშ სიტყვას, იბრწმუნებუთ, ნამდა თის ქიანაშმადიდა ძალა უღჷ დო უმოსო მემანგარებნა თიშ რწმენა, ნამდა ახალ ქვეყნიერებაწკუმა დაკავშირებით მუშ დუნაპირებუს აუცილებერო შეასრულენს (წეკითხით იესო ნავეშ ძეშ 23:14; ესაიაშ 55:10, 11). თეშ ჭყოლოფათ უმოსო შემლებნა ქიმვეხვარათ ხალხის თიშ გაგებას, ნამდა ღორონთიშ დუნაპირებ ახალ ქვეყნიერება უბრალო ზღაპარ დო ჩქინ ფანტაზია ვა რე. თვითონ იეჰოვაქ გამცხადეს, ნამდა „ახალ ცაშ“ დო „ახალ დედამიწაშ“ გურშენ მუშ დუნაპირებ, „სარწმუნო დო ჭეშმარიტ რე“ (გამოცხ. 21:1, 5).
ᲐᲥᲢᲘᲣᲠᲝ ᲛᲘᲦᲘᲗ ᲛᲝᲜᲐᲬᲘᲚᲔᲑᲐ ᲡᲣᲚᲘᲔᲠ ᲡᲐᲥᲛᲔᲔᲤᲡ
ᲙᲠᲔᲑᲐᲨ ᲨᲔᲮᲕᲐᲚᲐᲛᲔᲤ
მუჭო მიმანგარენა რწმენას თე სულიერ საქმეეფშე თითოულ? (ქოძირით აბზაც 13)
13. მუჭო მიმანგარენა კრებაშ შეხვალამეფ რწმენას? გენწყით.
13 მასმა საშვალება, მუდგათ რწმენას იმამნგარენთ, სულიერ საქმეეფს აქტიურო მონაწილებაშ მეღება რე. გუვარჩუათ მაგალით, მუ ჯგირობუა მოუღ ჩქინდა კრებაშ შეხვალამეფს. ართ და ანა, b ნამუთ ვითობით წანა რე სრულ დროთ მსახურენს, თეცალ მუდგარენს იჩიებ: „კრებაშ შეხვალამეფ მოხვარ, ვა ვოდინუე ძალიერ რწმენა. თიმწკუმა ხოლო, მუჟამსით გიშმაულარ იშენდოიშენ ჯგირ მასწავლებერ ვა რე დო მუშ მოხსენებას მუდგარენ ახალს ვეჩიებ, იშენით შემლებ თიცალ მუდგარენ მიფრჩქილუე, მუთ მიმეხვარებ, უმოსო ქინვანჭე ბიბლიურ ჭეშმარიტებას დო გუვამანგარე ჩქიმ რწმენა“. მუშო ოკო რაგად, რწმენას მიმანგარენა კრებაშ შეხვალამეფს ჩქინ და დო ჯიმალეფიშ კომენტარეფ ხოლო (რომ. 1:11, 12; 10:17).
ᲛᲡᲐᲮᲣᲠᲔᲑᲐ
მუჭო მიმანგარენა რწმენას თე სულიერ საქმეეფშე თითოულ? (ქოძირით აბზაც 14)
14. მუჭო მოხვარნა მსახურება რწმენაშ გამანგარებას?
14 რწმენას მიმანგარენა მსახურებას მონაწილებაშ მეღება ხოლო (ებრ. 10:23). ბარბარა, ნამუთ 70 წანა რე იეჰოვას ომსახურ, თეცალ სიტყვეფს იჩიებ: „მსახურება ირიათო მოხვარ რწმენაშ გამანგარებას, მუშენდა მუთ უმოსო ვეჩიებუქ შხვეფს იეჰოვაშ სარკო დუნაპირებუეფიშ გურშენ, თით უმოს ცოცხალ დო ძალიერ რე ჩქიმ რწმენა ხოლო“.
ᲞᲘᲠᲐᲓ ᲒᲣᲠᲐᲤᲐ
მუჭო მიმანგარენა რწმენას თე სულიერ საქმეეფშე თითოულ? (ქოძირით აბზაც 15)
15. მუჭო ამანგარენს ჩქინ რწმენას პირად გურაფა? (ქოძირით სურათეფ).
15 გუვარჩუათ ხოლო ართ მუდგარენ, მუთ სულიერ საქმეეფშა მიშურს დო მოხვარნა რწმენაშ გამანგარებას, თენა რე — პირად გურაფა. მაგალთო, ჩქინ ართ დას, სიუზანს მანგარო ოხვარ პირად გურაფაშო გეგმაშ შედგენა. თინა იჩიებ: «ჟეშხას უკულიან მარაშო გარჩიებელ „გინაჯინალ კოშკის“ ვამზადენქ. თუთაშხა დო თახაშხას — შქა მარაშ შეხვალამაშო ვემზადებუქ დო შხვა დღალეფს პირად გურაფა მიღჷ». თეცალ ჯგირ გეგმა ოხვარ სიუზანს, ირიათო გემანგარას რწმენა. ხოლო ართ დას, ირენს, ნამუთ ვითობით წანა რე, მთავარ სამართველოს მსახურენს, რწმენაშ გამანგარებას ოხვარ პირად გურაფაშ დროს ბიბლიურ წინასწარმეტყველებეფიშ გიმორკვიება. თინა იჩიებ: „მანგარო მაკვირენს თიშ ძირაფა, მუჭო ისრულებ იეჰოვაშ წინასწარმეტყველებეფ კილ-კილშა“. c
„ᲐᲣᲪᲘᲚᲔᲑᲔᲠᲝ ᲨᲘᲡᲠᲣᲚᲔᲑ“
16. მუშენ უღჷ ჩქინო ხოლო მნიშვნელობა აბაკუმშა რაგადებულ იეჰოვაშ სიტყვეფს? (ებრ. 10:36, 37).
16 ნამთინე იეჰოვაშ მსახურ ბრელ ხან რე ელჷ, მუჟამ მისპუ თე ქვეყნიერება. კოჩიშ გინაჯინუშე შილებე თეშ იძირედას, ნამდა იეჰოვა ვა ჩქარენს მუშ დუნაპირებუშ შესრულებას. მარა თის ჯგირო არჩქილე მუშ მსახურეფიშ გრძნობეფ, მუთ წინასწარმეტყველ აბაკუმშა რაგადებულ თიშ სიტყვეფშე იძირე: „დრო რე მერჩქინელ თე ხილუაშ შეიოსრულებერო. შესრულებაშა ინჭუაფ დო ვეგემტყუნებ. ჭეხანს ვა მორთასინ ხოლო, ქუჯინ, მუშენდა აუცილებერო შისრულებ, ვედეგვიანებ!“ (აბაკ. 2:3). ხვალე აბაკუმ დარწმუნუო იეჰოვაქ თე სიტყვეფით, დოვარ თე სიტყვეფს ამდღა ჩქინო ხოლო უღჷ მნიშვნელობა? ღორონთიშ შთაგონებათ პავლე მოციქულქ იეჰოვაშ თე სიტყვეფ თი ქრისტიანეფს ხოლო უწუ, მიდგას შურ ოლნა ღორონთიშ დღაშ მოულაშა დო ელნა თის (წეკითხით ებრაელეფიშ 10:36, 37). თაშ ნამდა, თიმწკუმა ხოლო, მუჟამსით ფიფქრენთ, იეჰოვა ოგვიანუანს მუშ დუნაპირებუშ შესრულებას, შემლებნა დარწმუნებულ ვორდათ, „თინა აუცილებერო შისრულებ, ვედეგვიანებ!“.
17. მუჭო გიმირინუ ართ დაქ აბაკუმშა მეჩამილ იეჰოვაშ რჩევა?
17 ღორონთიშ ბრელ მსახურ ვითობით წანა რე, ითვალისწინენს აბაკუმშა რაგადებულ იეჰოვაშ რჩევას დო უჯინე თიშ დღაშ მოულას. მაგალთო, ჩქინ ართ და ლუიზა, ნამდგაქ იეჰოვაშ მსახურება 1939 წანას დიჭყჷ, თეცალ სიტყვეფს იჩიებ: „თიმ დროს ფიფქრენდჷ, ნამდა არმაგედონ თიშახ მიშჷ, ონდო მა სკოლას ვათენდჷ. მარა თაშ ვა მოხვალამე. წანეფიშ დინახალე მანგარო მიმეხვარ, ბიბლიას ღორონთიშ თი ართგურ მსახურეფიშ შემთხვევეფიშ კითხირქ, მიდგას ბრელ ხანს აჸუეს ოჯინექ, ონდო იეჰოვაშე დუნაპირებ ჯილდოს მიღენდეს. მაგალთო, მუნერეფით რდეს: ნოე, აბრაამ, იოსებ დო შხვეფ. თიშ მტკიცე რწმენა, ნამდა იეჰოვაშ დუნაპირებუეფ ირიათო ისრულებ, ქოთ მა დო ქოთ შხვა და დო ჯიმალეფს მარწმუნენა, ნამდა ახალ ქვეყნიერება ხოლოს რე“. შემლებნა ბჯერდან, ზუსტას თაშ ფიქრენა იეჰოვაშ შხვა ართგურ მსახურეფ ხოლო, მით წანეფ რე, ომსახურნა თის.
18. მუჭო მიმანგარენა შემოქმედებაშე დაკვირება თიშ რწმენას, ნამდა ახალ ქვეყნიერება იჸუაფ?
18 მართალ რე, ამდღა ახალ ქვეყნიერებას ვა ფცხოვრენთ, მარა დეფიქრით თი მუდგარენეფშე, მუთ ართ დროს ვა არსებენდჷ, მარა ასე ჩქინ თოლით ვორწყეთ, მაგალთო: მურიცხეფ, ჯალეფ, ცხოველეფ დო ადამიანეფ. თე ირფელ ამდღა თიშენ არსებენს, ნამდა ართ დროს იეჰოვაქ გაჭყჷ (დაბ. 1:1, 26, 27). თეშნერო, ჩქინ ღორონთიშ განზრახვა რე, იფცხოვრათ ახალ ქვეყნიერებას. თინა თეს მოპირნა დო ქოთ შეასრულენს! ახალ ქვეყნიერებას ადამიანეფ გეხარენა ულიებ ცხოვრებათ დო სრულყოფილ ჯამრთელობათ. ღორონთიშ მერჩქინელ დროს ახალ ქვეყნიერება ჩქინო თიცალ რეალურ იჸუაფ, მუნერით თი სამყარო რე, ნამდგას ამდღა ჩქინ თოლით ვორწყეთ (ეს. 65:17; გამოცხ. 21:3, 4).
19. მუჭო შეილებნა რწმენაშ გამანგარება?
19 ონდო თე დრო დოდირთუდას, გეგმირინეთ ირნერ შესაძლებლობა, ნამდა გემანგარათ რწმენა. უმოსო გეგმირჩქინით მარდულობა გიშაჸიდირალიშ მიმართ, იფიქრით იეჰოვაშ ძალაშე დო აქტიურო მიღით მონაწილება სულიერ საქმეეფს. თაშ ქიმიქციებუთ-და, თქვა ხოლო იჸუაფუთ თი ხალხ შქას „მით რწმენათ დო მოთვინებათ მიღენს დუნაპირებუს“ (ებრ. 6:11, 12; რომ. 5:5).
ᲝᲑᲘᲠᲔᲨᲘ 139 წერმიდგინ სქან დუდ ახალ ქიანას
a ამდღა ბრელ ადამიანს ვა ჯერს ბიბლიას მოჩამილ დუნაპირებ ახალ ქვეყნიერებაწკუმა დაკავშირებით. თინეფ ფიქრენა, ნამდა თენა უბრალოთ ზღაპარ ვარდა თიცალ მუდგარენ რე, ნამდგაშე ხვალე ოცნება შილებე. ჩქი დარწმუნებულეფ ვორეთ, ნამდა იეჰოვაშ არძა დუნაპირებუეფ შისრულებ, მარა იშენით მოსაჭირნა რწმენაშ გამანგარება. თე სტატიას გუვარჩიენთ, მუჭო შემლებნა თეშ კეთება.
b ნამთინე სახელ თირელ რე.
c ბიბლიურ წინასწარმეტყველებეფწკუმა დაკავშირებით შხვადოშხვა სტატიაშ ოძირაფალო, ქოძირით „გინაჯინალ კოშკიშ პუბლიკაციეფიშ საძიებელ“ დო დოგორით თემა „წინასწარმეტყველება“. მაგალთო, შეილებნა ქოძირათ 2008 წანაშ 1 იანარიშ „გინაჯინალ კოშკის“ მოჩამილ სტატია „იეჰოვაშ წინასწარმეტყველებეფ ისრულებ“ [ქორთ.].
