1. მუშენ ვორთუთ კომენტარეფს კრებას?

 ᲛᲣᲨᲔᲜ ვოსწრუთ კრებაშ შეხვალამეფს? მთავარ მიზეზ თინა რე, ნამდა განვადიდენთ იეჰოვას (ფსალმ. 26:12; 111:1). თეს გეძინელ, შეხვალამეფს თიშენ ვოსწრუთ, ნამდა გურშა ელვუკინათ დო გუვამანგარათ ართიან, თე ბოლო პერიოდის (1 თეს. 5:11). თაშ ნამდა, კრებას კომენტარეფიშ კეთებათ ქოთ იეჰოვას განვადიდენთ დო ქოთ გურშა ელვუკინანთ ართიანს.

2. კრებაშ შეხვალამას მუჟამ მერზიებნა შესაძლებლობა, გუვაკეთათ კომენტარ?

² ირ მარას მიღნა შესაძლებლობა, კომენტარ გუვაკეთათ კრებაშ შეხვალამეფს. მაგალთო, საბატონ ვარდა ჟეშხას შემლებნა მონაწილება მიბღათ „გინაჯინალ კოშკიშ“ გარჩიებას. თეს გეძინელ, შქა მარას შეხვალამას მერზიებნა შესაძლებლობა კომენტარ გუვაკეთათ ღორონთიშ სიტყვაშ სიტომბეეფიშ დო კრებაშ ბიბლიაშ გურაფაშ დროს. ხვალე თენა ვარინ, შემლებნა მონაწილება მიბღათ შეხვალამაშ შხვა ნაწილს, სოდეთ კითხვა-პასუხით გარჩიება რე.

3. მუ სირთულეეფს შილებე შეფხვადათ კომენტარეფიშ კეთებაწკუმა დაკავშირებით დო მუჭო მიმეხვარებნა ებრაელეფიშ 10:24, 25?

³ ჩქი არძას მოკონა, განვადიდათ იეჰოვა დო გურშა ელვუკინათ თანაქრისტიანეფს. მარა კომენტარეფიშ კეთებაწკუმა დაკავშირებით შილებე სირთულეეფს ქეშეფხვადათ. მაგალთო, შილებე მანგარო მიჭირდან კომენტარეფიშ კეთება, მუშენდა ბნერვიანენთ ვარდა ირ ხეშ ეჭოფუაშ დროს ვა ბკითხან კომენტარ. მუჭო შემლებნა გივორჯგინათ თე სირთულეეფს? თე კითხვაშ პასუხის ბგებულენთ ებრაელეფშა მეჭარილ პავლეშ წერილს. მუჟამსით თიქ ყურადღება გამახვილ, მუსხით მნიშვნელოვან რე კრებაშ შეხვალამეფს თანაქრისტიანეფწკუმა ართო დასწრება, თინა ხოლო თქუ, ნამდა ჩქი მთავარ ყურადღება ართიანიშ გურიშ ელაკინაშა ოკო მაფდან გინოღალირ  (წეკითხით ებრაელეფიშ 10:24, 25). ათეშენ, მუჟამსით მარჩქილენა, ნამდა ჩქინ კეთებულ ჭიჭე კომენტარს ხოლო შეულებ გურშა ელუკინას თანაქრისტიანს, თენა მიმეხვარებნა, გივორჯგინათ ნერვიანობას დო ქოფთქუათ კომენტარ. მარა თიმწკუმა ხოლო, მუჟამსით იზმათ ხშირას ვა მორაგადაფუანა კომენტარს, მუზმათ მოკონა, შემლებნა თე დროს ხოლო ვორდათ ბედნერეფ დო მოხიოლდან, ნამდა შხვა და დო ჯიმალეფს ხოლო ერზიებნა კომენტარეფიშ კეთებაშ საშვალება (1 პეტ. 3:8).

4. მუ იჸუაფ გარჩიებულ თე სტატიას?

⁴ თე სტატიას პირველო გუვარჩიენთ, მუჭო შემლებნა გურშა ელუკინათ ართიანს ჭიჭე კრებას, სოდეთ ბრელ მაუწყებელ ვა რე, დო უკულ თის ხოლო ქობძირუნთ, მუჭო შემლებნა თეშ კეთება დიდ კრებას, სოდეთ ბრელს ოკო კომენტარიშ რაგად დო ეთმოჭოფუნს ხეს. ბოლოს, თის ხოლო გუვარჩიენთ, მუნერ ოკო რდას ჩქინ კომენტარეფ, ნამდა მართალო გურშა ელუკინას და დო ჯიმალეფს.

5. მუშ კეთება შემლებნა ჭიჭე კრებას ქუვორეთ-და?

⁵ ჭიჭე კრებას ვარდა ჯგუფის, სოდეთ ბრელ მაუწყებელ ვა რე, შილებე ჩამტარებელს გიშაგორალო ვა ჸუნდას კომენტატორეფ. მინშა შილებე თის ოჯინექ ხოლო აჸუას თეიშახ, ონდო მიდგაინ ხეს ვეჭოფუნს. მუშ კეთება შეილებნა თეცალ სიტუაციას? ხშირას გეჭოფით ხე დო ქოთქვით კომენტარ. თეშნერ მოქციებათ შხვეფს ხოლო წახალისენთ, მონაწილება მიღან გარჩიებას.

6, 7. მუჭო შემლებნა გივორჯგინათ ნერვიანობას?

⁶ მუშ კეთება შეილებნა ნერვიანობაშ გურშენ კომენტარიშ რაგად მანგარო ქოიჭირან-და? რშუდან, ხვალე ვა რეთ! თქვან კომენტარეფით და დო ჯიმალეფს გურშა ელუკინათინ, შეილებნა გეგმირკუათ, ნამ საშვალებეფ მიგეხვარებნა, გიორჯგინათ ნერვიანობას. მუჭო შეილებნა თეშ კეთება?

⁷ შილებე მანგარო მიგეხვარან ულირ წანას გიშაშქუმალირ „გინაჯინალ კოშკის“ მოჩამილ რჩევეფქ. b მაგალთო, ართ-ართ რჩევა რე, მივემზადათ ჯგირო (იგავ. 21:5). მუჟამსით კრებას გარჩიებელ მასალა ჯგირო მარჩქილენა, უმოს ადვილ რე ჩქინო, მონაწილება მიბღათ კომენტარეფს. ხოლო ართ რჩევა, მუთ მიმეხვარებნა გივორჯგინათ ნერვიანობას თინა რე, ნამდა გუვაკეთათ მოკლე კომენტარეფ (იგავ. 15:23; 17:27). ართ ვარდა ჟირ წინადადებათ რაგადებულ ჩქინ კომენტარეფ უმოს გასაგებ იჸუაფ და დო ჯიმალეფშო ვინემ დიდ კომენტარ, სოდეთ ქიანაშ აზრ იჸუაფ მოშინაფილ. მუჟამსით თეცალ მოკლე კომენტარეფს ჩქინ სიტყვეფით იფჩიებუთ თენა ოძირანს, ნამდა ჯგირო ვორეთ მომზადებულ დო მარჩქილენა გარჩიებელ მასალა.

8. მუჭო უჯინე იეჰოვა ჩქინ მონდომას?

⁸ მუ ოკო ქიმინათ, მუჟამსით თე რჩევეფს ქიმიაჸუნით, მარა იშენით გიჭირა, ართ ვარდა ჟირ კომენტარშე უმოს გაკეთათ? დარწმუნებულ რდათ, იეჰოვა აფასენს თქვან მონდომას, ნამდა ორთუთ თის, მუთ შეილებნა (ლუკ. 21:1—4). რშუდან, მაქსიმუმიშ კეთება ვა ნიშნენს, ჩქინ დუდის თიშე უმოს მოფთხუათ, ვინემ შემლებნა, თეს ვართ იეჰოვა ელჷ ჩქინდე (ფილ. 4:5). პირველ რიგის ჯგირო დეფიქრით, მუშ კეთება შეილებნა, დაგეგმით, მუჭო მიოჭირნუანთ თის დო ქილოცით, ნამდა ვენერვიანათ დო მშვიდას რდათ. ნამთინეს შილებე მიზანო უღდას, ართ მოკლე კომენტარ გაკეთას.

9. მუ სირთულეს შილებე შეფხვადათ დიდ კრებას?

⁹ თქვან კრებას ბრელ მაუწყებელ ქორენ-და, შილებე გვალო შხვა სირთულეს ქეშეხვადათ. მაგალთო, შილებე ბრელ და დო ჯიმას ოკოდას კომენტარიშ რაგად, მუდგაშ გურშენ თქვა ხშირას ვეგერზიებდან საშვალება, გაკეთათ კომენტარ. ქიმიპჸონათ ართ დაშ,  დანიელაშ მაგალით. c თის მანგარო უჸორს შეხვალამეფს გარჩიებაშ დროს მონაწილებაშ მეღება. თის ჯგირო არჩქილე, ნამდა კომენტარეფ იეჰოვაშ თაყვანიშცემაშ ართ-ართ ნაწილ რე. თეს გეძინელ, თეთ შეულებ გურშა ელუკინას და დო ჯიმალეფს დო გემანგარას რწმენა შხვადოშხვა ბიბლიურ საკითხეფიშ მიმართ. მარა, მუჟამსით დიდ კრებაშა გეგნორთჷ იზმათ ხშირას ვერზიებუდ კომენტარიშ კეთებაშ საშვალება, მუჭოთ მუს ოკოდ. მინშა კრებაშ უკულ ჸუდეშა თეშ მიშჷ, ნამდა ართ კომენტარ ხოლო ვაფუდ რაგადებულ. თინა იჩიებ: „გურგოტახილ ვორდჷ, მუშენდა მიმორჩქუდ, ნამდა კომენტარიშ კეთებაშ პატი ვემერზიებუდ. მუჟამსით ირიათო თაშ ხვადუ, თიშე ფიქრის იჭყანქ, ნამდა ჩამტარებელს აკიბირაფილ აფუქ“.

10. მუ ოკო ვაკეთათ, უმოსო ქუმმაჩან შესაძლებლობაქ გუვაკეთათ კომენტარ?

¹⁰ დღას ქოიგინაფნანო დუდ დანიელაცალო? თაშ ქორენ-და, შილებე იფიქრათ, ნამდა უჯგჷ, შურო ვა თქუათ კომენტარ დო უბრალოთ ურჩქილათ შეხვალამას. ვაკეთათ თენა დო ვარია ვა თქუათ კომენტარეფიშ კეთებაშე. შილებე თეს მიგეხვარან კრებაშ შეხვალამაშო მუსხირენ კომენტარიშ მომზადებაქ. თეშნერო, გარჩიებაშ დროს დუდშე ვა გაპასუხებეს-და, შეგალებენა ბოლოს გაკეთათ კომენტარ. „გინაჯინალ კოშკიშ“ მომზადებაშ დროს დეფიქრით, მუჭო რე თითოულ აბზაც დაკავშირებულ სტატიაშ მთავარ თემაწკუმა. თეშნერო, გარჩიებაშ დროს ბრელ შხვადოშხვა აზრიშ მოშინაფა შეგალებენა. თეს გეძინელ, შეილებნა თი აბზაციშ კომენტარეფ მამზადათ, სოდეთ თიცალ საკითხეფ რე ენწყუმილ, ნამუთ რთულ გაგებელ რე (1 კორ. 2:10). მუშენ იჸუაფ თეშ კეთება ჯგირ? მუშენდა თეცალ საკითხეფიშ გარჩიებაშ დროს ბრელ ვეთმოჭოფუნს ხეს დო შილებე ქუმგაჩან შესაძლებლობაქ, გაკეთათ კომენტარ. მარა მუ ოკო აკეთათ თე რჩევეფიშ გიმორნაფაშ უკულ, კრებაშ შეხვალამეფს კომენტარეფიშ კეთებაშ საშვალებაქ იშენით ვემგაჩეს-და? შეილებნა შეხვალამაშ დოჭყაფაშახ ჩამტარებელს ქუდურაგადუათ დო წინასწარ ქუწუათ, ნამ კითხვას გოკონა უპასუხათ.

11. მუს ელამჩანა ფილიპელეფიშ 2:4?

¹¹ წეკითხით ფილიპელეფიშ 2:4. ღორონთიშ შთაგონებათ მოციქულ პავლექ ქრისტიანეფს ელუჩ, ნამდა ხვალე მუნეფიშ დუდშო ვეფიქრესკო. მუჭო შემლებნა თე რჩევაშ გიმორნაფა კრებაშ შეხვალამეფს? ჯგირ იჸუაფ, ირიათო ფშუდან დო ვაგმოჭყორდან, ნამდა ჩქინცალო შხვეფს ხოლო ოკონა კომენტარეფს მონაწილებაშ მეღება.

12. ხოლო მუ საშვალებათ შემლებნა გურშა ელუკინათ და დო ჯიმალეფს? (ქოძირით სურათ).

 ¹² თე საკითხ უჯგუშო ქიგებგათინ, დეფიფქრათ თეცალ მუდგარენშე. მუჟამსით მეგობრეფწკუმა ართო ვორეთ ირიათო ჩქი ვეფჩიებუთ დო შხვეფს ხოლო ვარზენთ რაგადიშ საშვალებას, მუშენდა მოკონა, თინეფქ ხოლო გეგმოხანტან მუნეფიშ აზრ. თეშნერო, მოკონა, კრებაშ შეხვალამეფს, მუთ შილებენ მეტიქ ქოთქუას კომენტარ. და დო ჯიმალეფს გურშა ელვუკინათინ თიშ ართ-ართ საშვალება თინა რე, ნამდა ქიმეფჩათ შესაძლებლობა გეგმოხანტან მუნეფიშ აზრ (1 კორ. 10:24). მორთ გუვარჩუათ, მუჭო შემლებნა თეშ კეთება.

13. ჩქი მუჭო შემლებნა ხე შევუნწყუათ თის, ნამდა კომენტარეფს შხვეფქ ხოლო მიღან მონაწილება?

¹³ მოკლე კომენტარეფს გუვაკეთენთ-და, გარჩიებას მონაწილებაშ მეღებაშ საშვალება უმოს ბრელს ქიმიაჩამუ. მოკლე კომენტარეფიშ კეთებაშ ჯგირ მაგალითის უხუცესეფ დო გამოცდილ მაუწყებელეფ ოკო ირზენდან. თიმწკუმა ხოლო, მუჟამსით მოკლე კომენტარს გაკეთენთ, ეცადით აბზაცის მოჩამილ არძა აზრ თქვა ვემიშინუათ. თეს ვა გეთვალისწინენთ-და, შილებე შხვას ვა დასქიდას ორაგადექ. მაგალთო, თე აბზაცის გარჩიებულ რე ჟირ რჩევა: პირველ, გუვაკეთათ მოკლე კომენტარეფ დო მაჟია დუდ ევუჩილითუათ აბზაცშე არძა აზრიშ მოშინაფას. თე აბზაციშ გარჩიებაშ დროს, პირველ თქვა ქორკითხეს-და, ჯგირ იჸუაფ ხვალე ართ აზრშე გამახვილათ ყურადღება.

14. მუ მიმეხვარებნა თიშ გინოჭყვიდუას, მუსხით ხშირას ოკო ებჭოფათ ხე? (ქოძირით სურათ).

¹⁴ გონიერება ოკო გიმიფრჩქინათ, მუჟამსით გინობჭყვიდუნთ მუზმათ ხშირას ებჭოფუნთ ხეს კომენტარიშ ოკეთებელო. ირიათო ჩქი ქუმაფნა ხე ეჭოფილ-და, ჩამტარებელქ შილებე დუდ ვალდებულო იგინას, ჩქი ქუმორაგადაფუან კომენტარ, თიმწკუმა ხოლო, მუჟამსით შხვეფს დიო ხოლო ვა ნოღვენა თეშ შესაძლებლობა. თექ შილებე ჩქინ და დო ჯიმალეფს გურ გუტახას დო კომენტარიშ კეთებაშ სურვილქ გვალო მეუდინან (ეკლ. 3:7).

15. ა) მუნერ რეაქცია ოკო მიღდან, მუჟამსით ჩამტარებელ ვა მოკითხნა კომენტარს? ბ) მუჭო შეულებ ჩამტარებელს ოძირას, ნამდა არძას ითვალისწინენს? (ქოძირით ჩარჩო  „რჩევეფ ჩამტარებლეფშო“).

¹⁵ მუჟამსით გარჩიებაშ დროს ბრელ მაუწყებელ  ეთმოჭოფუნს ხეს, შილებე თიზმათ ხშირას ვამოპასუხებაფუან, მუზმათ მოკონა. მინშა შილებე გარჩიებაქ თეშ გეთუას, ნამდა ჩამტარებელს ვეშიალებუას ქობკითხან კომენტარ. მართალ რე, თენა იშენდოიშენ სასიამოვნო გრძნობა ვა რე, მარა ოკო ვეფიფქრათ, ნამდა ჩამტარებელს თოლშა ვამუხეთ დო სპეციალურო ვა მოკითხნა კომენტარს (ეკლ. 7:9).

16. მუჭო შემლებნა გურშა ელუკინათ თი თანაქრისტიანეფს, მით კომენტარს ორთნა?

¹⁶ თიმწკუმა ხოლო, მუჟამსით თიზმა კომენტარს ვა მორაგადაფუანა, მუზმათ მოკოდეს, შემლებნა ყურადღებათ ქურჩქილათ და დო ჯიმალეფიშ კომენტარეფს დო შეხვალამაშ უკულ ქუვოცქუათ თინეფს. ჩქინ ცქვაფაქ ხოლო შილებე თიშნერო ელუკინას თინეფს გურშა, მუჭოთ კომენტარქ, ნამდგაშ კეთებაშ საშვალებაქ ვამმაჩეს (იგავ. 10:21). მუჟამსით და დო ჯიმალეფს ვოცქვანთ თეშნერო ხოლო ელუკინანთ გურშა.

17. ა) მუჭო შეულებნა მშობლეფს, ქიმეხვარან სქუალეფს ასაკიშ შესაფერის კომენტარიშ მომზადებას? ბ) მუჭოთ ვიდეოშე იძირე, მუ ოთხ ნაბიჯ მეხვარებ ბაღანეფს კომენტარეფიშ მომზადებაშ დროს? (ქოძირით სქოლიო).

¹⁷ ხოლო მუჭო შემლებნა კრებაშ შეხვალამეფს ართმაჟიაშ გურიშ ელაკინა? მშობელ ქორეთ-და, ქიმეხვარით თქვან სქუალეფს მუნეფიშ ასაკშო შესაფერის კომენტარეფიშ მომზადებას (მათ. 21:16). კანკალეშა კრებაშ შეხვალამეფს ვარჩიენთ თიცალ სერიოზულ საკითხეფს, მუნერით რე ოჯახურ პრობლემეფ დო ზნეობრივ საკითხეფ. მარა თე დროს  ხოლო შეილებნა თიცალ აბზაც დოგორათ, ნამდგაშა თქვან სქუალეფს ართ ვარდა ჟირ კომენტარ არაგადენა. თეს გეძინელ, ქიმეხვარით თქვა ბაღანეფს ქიგეგან, მუშენ შილებე ვა კითხას ჩამტარებელქ ირ ხეშ ეჭოფუას. თე ირფელიშ ენწყუმა ბაღანას მეხვარებ, გურ ვეგიტახას, მუჟამსით თიშ მანგიორო შხვას ქარაგადაფუანა კომენტარს (1 ტიმ. 6:18). d

18. მუჭო შემლებნა კომენტარეფიშ რაგადიშ დროს ზედმეტო ვა გუვამახვილათ ყურადღება ჩქინ დუდშა? (იგავ. 27:2).

¹⁸ არძას შემლებნა თიცალ კომენტარეფ მუვამზადათ, მუდგათ ქოთ იეჰოვას განვადიდენთ დო ქოთ თანაქრისტიანეფს ელვუკინანთ გურშა (იგავ. 25:11). მინშა შილებე, გარჩიებაშ დროს, ჩქინ პირად გამოცდილებაშე მუდგარენეფ ქიმიფშინუათ, მარა ფრთხილას ოკო ვორდათ, ნამდა ჩქინ დუდშე ბრელ ვეფჩუათ (წეკითხით იგავეფიშ 27:2; 2 კორ. 10:18). თეშ მანგიორო, ირიათო ოკო ვეცადათ, ნამდა ჩქინ კომენტარეფს მთელ ყურადღება იეჰოვაშა, თიშ სიტყვაშა დო თიშ ხალხშა გეგნიბღათ (გამოცხ. 4:11). მარა მუშო ოკო რაგად, აბზაცის თიცალ კითხვა ქორე, სოდეთ ჩქინ პირად აზრიშ გიმოხანტუას ქითხინან-და, თეშ კეთება თავისფალო შემლებნა. ზუსტას თეშ კეთებაშ საშვალება ქუმმაჩამნა მა-19 აბზაციშ მაჟია კითხვას.

19. ა) მუ მაჸუნუ შედეგო, მუჟამსით ჩქინ დუდიშ წოხოლე თანაქრისტიანეფს ქიგვორინუანთ? (რომ. 1:11, 12). ბ) პირადო თქვა მუ მორწონა თიწკუმა დაკავშირებით, ნამდა მიღნა შესაძლებლობა გუვაკეთათ კომენტარეფ?

¹⁹ მუშო ოკო რაგად, ჩქი ვა მიღნა კომენტარეფწკუმა დაკავშირებულ გიმოჭარილ მკაცრ კანონეფ, მარა ართ მუდგარენ ოკო ფშუდან: ჩქინ კომენტარეფით შემლებნა გურშა ელვუკინათ ართმაჟიას. მინშა თენა შილებე ნიშნენდას, ნამდა უმოს ხშირას მიბღათ მონაწილება კომენტარეფს, მარა მინშა შილებე თის ხოლო ნიშნენდას, გებჯერდათ თის, მუდგაშ საშვალებაქ მუმაჩეს დო მოხიოლდან, ნამდა ჩქინ და დო ჯიმალეფს ხოლო მიაჩეს კომენტარეფიშ კეთებაშ შესაძლებლობაქ. მუჟამსით კრებაშ შეხვალამას ჩქინ დუდშე წოხოლე თანაქრისტიანს ქიგვორინუანთ, თეშნერო შემალებენა გურშა ელვუკინათ ართიანს (წეკითხით რომაელეფიშ 1:11, 12).