დედამიწას ცხოვრებაშ დროს იესო სრულყოფილო მეჸუნდჷ მუშ ზეციერ მუმაშ მაგალითის დო გიმირჩქინანდჷ თიშ თვისებეფს. თიქ თქუ: „ჩქიმით მუთუნს ვა ვორთუქ, მუთ მუმაქ დუმოგურუ, თის იფჩიებუქ ... ირიათო თის ვორთუქ, მუთ თის მოწონს“ (იოანე 8:28, 29; კოლოსელები 1:15). თიშე დაკვირება, მუჭო ოქცუდ იესო ოსურკათას დო მუნერ დამოკიდებულება უღუდ თინეფიშ მიმართ, უჯგუშო ქუგმოგებაფუანა, მუნერ დამოკიდებულება უღჷ ღორონთის ოსურკათაშ მიმართ დო მუშ კეთებას ელჷ თინეფშე.

სახარებეფს ინოჭარილ ცნობეფიშ თანახმათ ბრელ გურაფილ იჩიებ, ნამდა იესოშ დამოკიდებულება ოსურკათაშ მიმართ, მანგარო გენესხვავებუდ თიმ დროს გავრცელებურ შეხედულებაშე. მუთ გენესხვავებუდ თინეფ ართიანშე? დო მუთ არძაშე უმოს მნიშვნელოვან რე, ამდღა ხოლო ათავისფალენსო იესოშ გურაფეფ ოსურკათას?

იესოქ თქუ: „კოჩ, ნამუთ ოსურს ჩეთხინუანს დო შხვას მიჸონანს, მრუშენს“ (მარკოზი 10:11, 12). თე სიტყვეფით იესოქ ქეწინააღმდეგ რაბინეფიშ გურაფას, ნამდა კოჩის „არძა მიზეზით“ შეულებუდ, ჩეთხუკო ოსურს (მათე 19:3, 9). მრუშობა ოსურიშ ღალატ რდუნ თენა იუდეველეფიშ უმენტაშშო ახალ მუდგარენ რდუ. რაბინეფ ხალხის ოგურუანდეს, ნამდა ქომოლკოჩ ქიმრუშენდ-და, თენა ოსურიშ ღალატო ვეთვალუდ, მარა მუჟამსით ოსურ თაშ ქიმიქციებუდ, მოღალატე გიშეშ. ბიბლიაშ ართ კომენტატორიშ სიტყვეფით, „იესოქ ჩილ დო ქომონჯიშ ზნეობრივ ვალდებულება ართიანს გაუმანგჷ, მუდგათ ოსურიშ სტატუს დო ღირსება მაღალას ქიგიორინუ“.

მუჭო მოქმედენს იესოშ გურაფეფ ამდღა: იეჰოვაშ მოწმეეფიშ კრებაშ შეხვალამეფს, ოსურკათა თავისფალო გიმოხანტუნს მუშ აზრის ქომოლკათაშ წოხოლე. თინეფს ვაშქურნა, ნამდა მიდგაინ უზნეო თოლით ქუდუჭყანს ჯინას ვარდა ზედმეტო დეახლოებ. ქრისტიან კოჩეფ ირნერო ოცადნა, მექცუან „უნჩაშ ხანიშ ოსურს — მუჭოთ დიდას, დო ახალგაზრდა ოსურს — მუჭოთ დას, მთელ სიწმინდეთ“ (1 ტიმოთე 5:2).

იესო აფასენდჷ ოსურკათაშ აზრის. იესოშ დროს ებრაელ ოსურკათაშ უმენტაშის ჯერდჷ, ნამდა ბედნერეფ იჸუაფდეს, მუჟამსით ღირსუან ქომოლსქუა ქაჸვენდეს, განსაკუთრებულო თინა წინასწარმეტყველ ქიჸუაფუდ-და. მუჟამსით ართ ოსურქ ხონარმაღალო მიოძახ „ბედნერ რე თინა, მიდგაშ ქვარას ალახედ“, იესოქ გიმირინუ შესაძლებლობა, ნამდა ქაძირუკო, მუ რდუ უმოს მნიშვნელოვან (ლუკა 11:27, 28). იესოქ თე ოსურს უწუ, ნამდა ღორონთიშ მორჩილება უმოს მნიშვნელოვან რდუ, ვინემ ებრაულ ტრადიციეფიშ თანახმათ ოსურკათაშ კონკრეტულ ჯგუფიშ მიმართ პატიცემაშ გიმორჩქინა (იოანე 8:32).

მუჭო მოქმედენს იესოშ გურაფეფ ამდღა: თინეფ, მიდგას ქრისტიანულ კრებას გურაფაშ საქმე ოვალნა, მოუწოდენა ოსურკათას, ნამდა კომენტარეფს მიღან მონაწილება. თინეფ აფასენა სულიერო მოწიფულ ოსურკათას, მით შხვეფშო ჯგირ მაგალით რენა, მუჭოთ სიტყვათ თეშ საქმეთ (ტიტე 2:3). თეწკუმა ართო, თინეფს უღნა პატი, ხუჯ ქუდუკინან სახიოლო ამბეშ ქადაგებას (ფსალმუნი 68:11; ქოძირით ჩარჩო მა-9 გვერდის „ ვარზენდუო პავლე მოციქულ ოსურკათას რაგადიშ საშვალებას?“).

მუჟამსით იესოქ იაიროსიშ ცირასქუა გათელ, მუჭოთ ქომონჯღურელ ოსურიშ ბოშ, თეთ ოძირუ, ნამდა ძღაბიშ სიცოცხლე ხოლო თიცალ ძვირფას რდუ, მუნერით ბოშიშ (მარკოზი 5:35, 41, 42; ლუკა 7:11—15). თი ოსურ, ნამუთ იესოქ დემონეფშე გათავისფალ, „აბრაამიშ ცირასქუათ“ მიშინუ; თეცალ გამოთქმას ნამთინ ებრაელ მაჭარალ ვერინუანდჷ (ლუკა 13:10—16). თეცალ პატიცემათ ეფშა სიტყვეფით თიქ ხვალე თინა ვაძირუ, ნამდა თე ოსურ საზოგადოებაშ სრულფასოვან წევრ რდუ, თინა ხოლო ქაძირუ, ნამდა თე ოსურს ძალიერ რწმენა უღუდ (ლუკა 19:9; გალატელები 3:7).

მუჭო მოქმედენს იესოშ გურაფეფ ამდღა: ართ აზიურ ანდაზა იჩიებ: „ძღაბიშ რდუალა მეზობელიშ ყვავილეფიშ წყარუაცალ რე“. მოჸოროფე ქრისტიან მუმალეფშა ოკო ვემოქმედას თე აზრიქ დო თინეფქ ართნერო ოკო იზრუნან, მუჭოთ ქომოლსქუალეფშე, თეშ ოსურსქუალეფშე. ქრისტიან მშობლეფ ირფელს ორთნა, ნამდა არძა სქუას საჭირო განათლება ქიმეჩან დო იზრუნან თინეფიშ ჯამრთელობაშე.

თეშ გინაწონს, იესოქ გინოჭყვიდ, თიშ გათელებაშ ამბე ოსურკათაქ გეგნოჩკო შხვეფს (მათე 28:1, 8—10). თიშ უმკუჯინუო, ნამდა თე ართგურ ოსურკათაქ მუშ თოლით ძირჷ უფალიშ ღურა დო დასაფლება, მოციქულეფს იშენით გუჭირდეს, თინეფს ქუდუჯერესკონ (მათე 27:55, 56, 61; ლუკა 24:10, 11). მუჟამსით გათელებაშ უკულ იესოქ პირველო ოსურკათას გიმეცხად, თეთ ოძირუ, ნამდა თინეფს ხოლო თეშ შეულებდეს ქრისტეშ გურშენ დამოწმება, მუჭოთ შხვა მოწაფეეფს (საქმეები 1:8, 14).

მუჭო მოქმედენს იესოშ გურაფეფ ამდღა: იეჰოვაშ მოწმეეფიშ კრებეფს, თი ქომოლკათა, მით ხემძღვანელენს კრებას, პატის ცენს ოსურკათას დო აფასენს თინეფიშ აზრის. თაშ იქციებნა ქრისტიან ქომონჯეფ ხოლო დო პატიცემას გიმოხანტნა მუნეფიშ ოსურეფიშ მიმართ თით, ნამდა მთელ გურით ურჩქილენა თინეფს (1 პეტრე 3:7; დაბადება 21:12).

მუჟამსით ქომოლკათა მეჸუნს იესოშ მაგალითის, თეშნერო ოსურკათას პატიცემათ ოქცუ დო ვემდუღანს თავისუფლებას, მუთ ღორონთის დუდშე აფუდ განზრახულ თინეფშო (დაბადება 1:27, 28). ქრისტიან ქომონჯეფ, თიშ მანგიორო, ნამდა იფიქრან ოსურეფშე ირფელით უჯგუშეფ რენა, ხემძღვანელენა ბიბლიურ პრინციპეფით, მუდგას ბედნერობა მოუღ თინეფიშ ოსურეფშა (ეფესოელები 5:28, 29).

მუჟამსით ელენაქ ბიბლიაშ გურაფა დიჭყჷ, ქომონჯ მანგარ გლახათ ოქცუდ, მარა თენა მითინშა ვა უთქუალ. თიშ ქომონჯიქ თიცალ გარემოს ირდჷ, სოდეთ ძღაბიშ მოტაცება დო თიშა ფიზიკურ შეურაცხყოფაშ მერინაფა ჩვეულებრივ მუდგარენ რდუ. ელენა იჩიებ: „ბიბლიაშე ნაგურეფუქ ძალეფ ქომუჩ. ქიგებგჷ, ნამდა არსებენს პიროვნება, მიდგას ვუჸორქ, ზრუნენს ჩქიმდე დო მაფასენს. თეს გეძინელ, ქიგებგ, ნამდა ჩქიმ ქომონჯ ბიბლიაშ გურაფას ქიდიჭყანდ-და, ჩქიმ მიმართ დამოკიდებულება დათირუდ“. ელენაშ ოცნებაქ რეალობათ გინირთ, მუჟამსით თიშ ქომონჯიქ ქიდიჭყჷ ბიბლიაშ გურაფა, დინათ დო იეჰოვაშ მოწმეთ გინირთ. ელენა იჩიებ: „თიქ ქიდიგურუ მუშ დუდიშ კონტროლ. ასე თავისფალო შემლებნა, ვაპატუათ ართიანს. ბიბლიურ პრინციპეფიშ გიმორნაფაქ მიმეხვარ, ქიბგინკო, ნამდა ჩქიმ ოჯახის ვოსაჭირუქ დო თექ თხილერ ვორექ“ (კოლოსელები 3:13, 18, 19).

თეცალ შემთხვევა ხვალე ელენას ვა უღჷ. მილიონობით ქრისტიან ოსურ ბედნერ რე, მუშენდა ქომონჯწკუმა ართო ოცად, გეგმირინუას ბიბლიურ პრინციპეფ მუშ ქორწინებას. თინეფს თანაქრისტიანეფ პატის ცენა, გურშა ელუკინანა დო დუდის თავისფალო ოგინაფუანა (იოანე 13:34, 35).

ქრისტიან ოსურკათას დო ქომოლკათას ჯგირო არჩქილე, ნამდა არასრულყოფილეფ დო ცოდამეფ რენა. მარა თინეფ ეახლოებნა მოჸოროფე ღორონთის დო მუმას, იეჰოვას, დო იმენდ უღნა, ნამდა გეთავისფალებნა ღურაშ მონობაშე დო მიღენა „ღორონთიშ სქუალეფიშ დიდებულ თავისუფლებას“ (რომაელები 8:20, 21).