მამუკა: ოთარ, ჩქიმო მართალო სასიამოვნო რე სქანწკუმა ართო ბიბლიურ საკითხეფშენ ჩიება. * წოხლეიან მსჯელობაშ დროს სი წიმოჭკირ საკითხ ღორონთიშ სამეფოშ გურშენ დო იკითხჷ, მუშენ წანა იეჰოვაშ მოწმეეფს, ნამდა სამეფოქ 1914 წანას დიჭყჷ მართველობა.

ოთარ: ქო, ართ თქვან პუბლიკაციას ბკითხულენდჷ დო თექ ჭარუდ, ნამდა ღორონთიშ სამეფოქ მართველობა 1914 წანას დიჭყჷ. თექ დემეინტერეს, მუშენდა სი თქვი, ნამდა თქვან არძა შეხედულება ბიბლიაშა რე გერსხილ.

მამუკა: ქო, თაშ რე.

ოთარ: მა ნაკითხირ მაფჷ ბიბლია, მარა ვა ფშუდ თექ 1914 წანა ქორდჷ დო ვარ მოშინაფილ. ათეშენ ონლაინ ბიბლიას ქიდიბჭყჷ გორუა დო ქინვოჭარ — „1914“, მარა მუთუნ ვეშამიჸოთ.

მამუკა: მართალო ოცქვაფალ რექ, პირველ რიგის თიშ გურშენ, ნამდა მთლიან ბიბლია ნაკითხირ გაფჷ. ალბათ გიჸორს ღორონთიშ სიტყვა.

ოთარ: ქო, ბიბლიაცალ ძვირფას ნამთინ წიგნ ვა რე.

მამუკა: თაშ რე. თიშ გურშენ ხოლო მოკო ქუგოცქუე, ნამდა სქან კითხვაშე პასუხიშ გიმარკვიებელო კინ ბიბლია გიმირინე. სი ზუსტას თინა ღოლი, მუდგას ბიბლია ელამჩანა: „დოგორ დო მიღჷ რჩქინა“. * ჯგირ რე, ნამდა თეცალ მონდომას გიმირჩქინანქ თე საქმეშო.

ოთარ: მადლობა. მოკო, უმოს გებგე თე საკითშე. თე კითხვაშ პასუხ შხვადო ხოლო ბგორჷ დო თი წიგნის ხოლო, ნამდგას ჩქი ვარჩიენთ. თაქ ინოჭარუდ მეფეშ სიზმარიშ გურშენ. თიქ ძირჷ დიდ ჯა, ნამუთ მოჭკირეს დო უკულ კინ გეფალ. წესიერო ვაგმაგინ.

მამუკა: ქო, თენა რე წინასწარმეტყველება, ნამუთ დანიელიშ მა-4 დუდის ენოჭარ. თაქ მოჩამილ რე სიზმარ, ნამუთ ბაბილონიშ მეფე ნაბუქოდონოსორქ ძირჷ.

ოთარ: ზუსტას თეშ ამბე მაფჷ. თე წინასწარმეტყველება ბრელშა გინიბკითხჷ, მარა ალალას ქოფთქუე, ვემეფხვად, მუ შქას რე თენა ღორონთიშ სამეფო ვარდა 1914 წანაწკუმა.

მამუკა: სინამდვილეს, ოთარ, ბოლოშა წინასწარმეტყველ დანიელს ხოლო ვარჩქილედ თიშ მნიშვნელობა, მუდგას ჭარუნდჷ.

ოთარ: მართალოვო?

მამუკა: ქო. დანიელიშ 12:8-ს თინა იჩიებ: „ქიმიფრჩქილე, მარა ვენუანჭჷ მნიშვნელობას“.

ოთარ: ხვალე ვა პჸოფექ. ასე ჭიჭე გურშა ელამკინ.

მამუკა: სინამდვილეს, დანიელს თიშენ ვარჩქილედ თე საკითეფ, ნამდა ღორონთშე დიო ვა რდჷ დრო, ადამიანეფ ბოლოშახ ქინონჭაფდესკო თე წინასწარმეტყველებაშ მნიშვნელობას. მარა თენა ასე შეიოლებერ რე.

ოთარ: მუშენ იჩიებუთ თეს?

მამუკა: ყურადღება ქიმიაქცი, მუს ბკითხულენთ უკულიან მუხლის. დანიელიშ 12:9 იჩიებ: „თე სიტყვეფქ ფულირქ დო ბეჭედგეშქუმალირქ ოკო იჸუას უკანასკნელ დროშახ“. თავრეშე იძირე, ნამდა თე წინასწარმეტყველებეფიშ მნიშვნელობას „უკანასკნელ დროს“ ქიგეგენდეს. ჩქი ასე თე პერიოდის ფცხოვრენთ. ბიბლიაშ გურაფაშ დროს გუვარჩიენთ, მუ ამტკიცენს თეს. *

ოთარ: შეილებნო ჩქიმდა თე წინასწარმეტყველებაშ ენწყუმა?

მამუკა: ქივეცადებუქ.

მამუკა: დაჭყაფუს მოკლეთ ქიგიფშინათ, მუ ძირჷ მეფე ნაბუქოდონოსორქ სიზმარს. თეშ უკულ შემალებენა მნიშვნელობაშენ ქიფჩუათ.

ოთარ: ჯგირ.

მამუკა: სიზმარს ნაბუქოდონოსორქ ძირჷ ქვერსემ ჯა, ნამუთ ზეცას მიანჭუდ. უკულ თიქ ქიგეგონ, ნამდა ჯა ოკო მოჭკირესკო. მარა ჯინჯ დიხას ოკო ქინუტებდესკო. „შქვით დროშ“ მიკულაშ უკულ ჯა კინ გემწირდუდ. * პირველო, თე წინასწარმეტყველებაქ მეფე ნაბუქოდონოსორშა ოკო შესრულკო. თიშ უმკუჯინუო, ნამდა თე ჯაცალო ნაბუქოდონოსორ ხოლო ძალიერ დო ირკოჩ იჩინენდუნ ფერ მეფე რდჷ, თინა ადამიანეფშე გიშალაფირ იჸუაფუდ სოიშახ „შქვით დრო“ ვემკიშ. ქორშუნო, მუჭო შისრულ თექ?

ოთარ: ვარ, ვაფშჷ.

მამუკა: ბიბლიაშე ბგებულენთ, ნამდა ნაბუქოდონოსორ „შქვით დროშ“ დინახალე, მუთ შქვით წანას ნიშნენს, ჭკუაშე რდჷ გინულირ. თე პერიოდის თის ვეშულებუდ მართველობა, მარა „შქვით დროშ“ უკულ ქუმორთჷ ჭკუაშა დო კინ ქიდიჭყჷ მართველობა. *

ოთარ: ჯგირ, თე ირფელ ქიგებგჷ, მარა მუ შქას რე თენა ღორონთიშ სამეფო ვარდა 1914 წანაწკუმა?

მამუკა: ხელათ ეინწყუნქ. თე წინასწარმეტყველებას ჟირ მნიშვნელობა უღჷ. პირველო თექ შისრულ, მუჟამსით მეფე ნაბუქოდონოსორიშ მეფობაქ მეჭყორდჷ. მაჟია შესრულება ღორონთიშ სამეფოწკუმა რე დაკავშირებულ.

ოთარ: სოვრეშე გიჩქჷ, ნამდა წინასწარმეტყველებაშ მაჟია მნიშვნელობა ღორონთიშ სამეფოს ოხუ?

მამუკა: პირველ რიგის, თეს წინასწარმეტყველებაშე ვორწყეთ. დანიელიშ 4:17-ის ენოჭარ: „ცოცხალეფს უჩქუდან, ნამდა უზენაეს მეფენს ადამიანეფიშ სამეფოშა, მიდგას ოკო, თის ამეფენს“. ქიმიაქციო ყურადღება ფრაზას „ადამიანეფიშ სამეფო“?

ოთარ: ქო, თაქ ჭარჷ, ნამდა „უზენაეს მეფენს ადამიანეფიშ სამეფოშა“.

მამუკა: სქან აზრით, მი რე „უზენაეს“?

ოთარ: ფიფქრენქ, თაქ ღორონთშე მეურს ჩიება.

მამუკა: მართალ რე. თავრეშე ვორწყეთ, ნამდა თე წინასწარმეტყველება ხვალე ნაბუქოდონოსორშე ვა რე. თენა ოხუ „ადამიანეფიშ სამეფოს“ ხოლო, ნამუთ მთელ კაცობრიობაშა ღორონთიშ მართველობას ნიშნენს. წინასწარმეტყველებაშ მთლიან კონტექსტის წებკითხენთ-და, თეს ლოგიკურო მიფრჩქინანთ.

ოთარ: მუს გულისხმენქ?

მამუკა: ბიბლიაშ წიგნ „დანიელს“ ბრელშა იმეორებ თიშ მთავარ თემა. თინა რაგადანს ღორონთიშ სამეფოშ მართველობაშ დოჭყაფაშ გურშენ, ნამდგაშ მეფე ღორონთიშ სქუა, იესო, რე. მორთ ჟირ დუდით უკახალე გეგნოფრთათ დო ქობძირათ დანიელიშ 2:44. შეილებნო წეკითხე?

ოთარ: ქო, თაქ ჭარჷ: „თი მეფეეფიშ დროს ზეციერ ღორონთ დამყარენს სამეფოს, ნამუთ დღას ვეკოცენს. თე სამეფო შხვა ხალხის ვეგნაჩამუ. თინა აკარღვანს დო ბოლოს მუღენს არძა თე სამეფოს, დო მუ მარადიულო იჸუაფ“.

მამუკა: მადლობა. სქან აზრით, ქიმურსო თე მუხლის ღორონთიშ სამეფოშ გურშენ ჩიება?

ოთარ: ჰმმ, ვა მიჩქჷ.

მამუკა: ყურადღება ქიმიაქცი, თაქ ჭარჷ, ნამდა თე სამეფო „მარადიულო იჸუაფ“, ღორონთიშ სამეფო მართალო მარადიულ რე, მარა შემლებნანო თენა ნამთინ ადამიანურ მართველობაშე ხოლო ფთქუათ?

ოთარ: ვარ.

მამუკა: დანიელიშ წიგნის მაჟია წინასწარმეტყველება ხოლო რე, ნამუთ ღორონთიშ სამეფოს ოხუ. თენა ინოჭარ დანიელიშ 7:13, 14-ის: „თის ქიმიაჩ ძალაუფლებაქ, დიდება დო სამეფოქ, ნამდა არძაქ, ხალხეფქ, ერეფქ დო შხვადოშხვა ნინაშა მორაგადე კათაქ, თიშ მსახურეფქ იჸუესკო. თიშ მართველობა მარადიულ მართველობა რე, ნამუთ ვემეჭყორდუ, დო თიშ სამეფო ვეკოცენს“. ქარწყექო, თაქ ხოლო სამეფოშ გურშენ მეურს ჩიება?

ოთარ: ქო, თაშ რე.

მამუკა: თაქ ვემურს ჩიება ჩვეულებრივ სამეფოშე. ყურადღება ქიმიაქცი, თაქ ჭარჷ, ნამდა თე სამეფოს ძალაუფლება აღვენუ არძა ხალხშა, ეროვნებაშა დო ნინაშა. შხვა სიტყვეფით ქოფთქუათინ, თე სამეფო მთელ მსოფლიოს იმართველენს.

ოთარ: აიშახ ვა მიჩქუდ, თე მუხლის თე აზრ ქინოძუდუნ, მარა მართალო თაშ იჩიებ.

მამუკა: ქუჯინ, ხოლო მუს იჩიებ წინასწარმეტყველება: „თიშ მართველობა მარადიულ მართველობა რე, ნამუთ ვემეჭყორდუ, დო თიშ სამეფო ვეკოცენს“. თენა მანგარო გჷ თი აზრის, ნამუთ დანიელიშ 2:44-ს იბკითხით, ვარო?

ოთარ: ქო.

მამუკა: მორთ, მოკლეთ ქიგიფშინათ, მუთ იფჩით. დანიელიშ მა-4 დუდის ენოჭარილ წინასწარმეტყველება იჩიებ, ნამდა „უზენაეს მეფენს ადამიანეფიშ სამეფოშა“. თენა თის ნიშნენს, ნამდა თე წინასწარმეტყველება ხვალე ნაბუქოდონოსორშე ვა რდჷ რაგადებულ. თეს გეძინელ, დანიელიშ წიგნიშ შხვა ნაწილს ქობძირით წინასწარმეტყველებეფ, სოდეფ ჩიება მეურს ღორონთიშ სამეფოშ დამყარებაშე, ნამდგაშ მეფე იესო რე. მუჭო ფიქრენქ, ქორენო ლოგიკურ, ფთქუათ, ნამდა დანიელიშ მა-4 დუდის ენოჭარილ წინასწარმეტყველება ღორონთიშ სამეფოს ხოლო ოხუ?

ოთარ: ლოგიკურ რე, მარა იშენით ვაგმაგინ, მუ შქას რე თაქ 1914 წანა.

მამუკა: მორთ დუვართათ მეფე ნაბუქოდონოსორს. წინასწარმეტყველებაშ პირველ შესრულებაშ დროს ჯა ნაბუქოდონოსორს განასახიერენდჷ. თიშ მართველობაქ მეჭყორდჷ, მუჟამსით ჯა მოჭკირეს დო თექ გეგრძელ „შქვით დროს“. თე პერიოდის თინა ჭკუაშე რდჷ გინულირ. „შქვით დროშ“ მიკულაშ უკულ, ნაბუქოდონოსორს ჭკუაქ დართჷ დო კინ ქიდიჭყჷ მართველობა. წინასწარმეტყველებაშ მაჟია შესრულებას ღორონთიშ მართველობა მეჭყორდუდ, მარა თენა ვეუაფუდ ღორონთიშ ბრალ.

ოთარ: მუს გულისხმენქ?

მამუკა: ბიბლიურ დროს ისრაელ მეფეეფშე, ნამუთ იერუსალიმშე მართველენდეს, თქუალირ რდჷ, ნამდა „იეჰოვაშ ტახტის“ გეხედეს. * თინეფ ღორონთიშ მართველობას განასახიერენდეს თიშ ხალხ შქას. თაშ ნამდა, თინეფიშ მართველობა ღორონთიშ მართველობას გიმოხანტუნდჷ. მარა ჭიე-ჭიეთ თინეფქ ღორონთიშ მორჩილება მიოტეს დო გლახა მაგალითის ირზენდეს. ისრაელეფიშ ურჩობაშ შედეგო, ღორონთიქ დუშვჷ, ნამდა ჯვ. წ. 607 წანას ბაბილონელეფს გეუჭოფდესკო იერუსალიმ. თე დროშე მოჸუნაფილ იერუსალიმს ნამთინ მეფე ვა რდჷ იეჰოვაშ მართველობაშ წარმომადგენელ. თეთ ეინწყუმუ ღორონთიშ მართველობაშ მეჭყოლადა. გასაგებ ქორენო სქანო თე ირფელ?

ოთარ: ქო

მამუკა: თაშ ნამდა, ჯვ. წ. 607 წანას დიჭყჷ თი „შქვით დროქ“, მუჟამსით ღორონთიშ მართელობა ვა რდჷ. „შქვით დროშ“ მიკულაშ უკულ ღორონთ დანიშნენდჷ ახალ მეფეს, მარა უკვე ზეცას. თე პერიოდის შესრულებუდ თი შხვა წინასწარმეტყველებეფ, ნამუთ დანიელს იბკითხით. ასე რჩქინდუ მნიშვნელოვან კითხვა: მუჟამ ითუ „შქვით დროქ“? თე კითხვას ქუპასუხენთ-და, თინა ხოლო მარჩქვენნა, მუჟამ დიჭყჷ ღორონთიშ სამეფოქ მართველობა.

ოთარ: ასე ქიმეფხვად. „შქვით დროქ“ 1914 წანას ითუო?

მამუკა: ზუსტას! სწორას მეხვად.

ოთარ: მარა სოვრეშე მიჩქნა თენა?

მამუკა: დედამიწას მსახურებაშ დროს იესოქ ქუმოძირეს, ნამდა „შქვით დრო“ დიო ვა რდჷ მიკულირ. * თეს დიდ პერიოდ იგულისხმებუდ. „შქვით დროქ“ იესოშ დედამიწაშა მოულაშახ ოშობით წანაშ უკახალე დიჭყჷ დო თიშ ზეცაშა დორთაშ უკულ ხოლო გეგრძელ. მორთ თინა ხოლო ქიგიბშინათ, ნამდა „დანიელს“ ენოჭარილ წინასწარმეტყველებაშ მნიშვნელობა „უკანასკნელ დროშახ“ * ვეუაფუდ ბოლოშა ენწყუმილ. 1800-იან წანეფიშ ბოლოს ბიბლიაშ მარკვიებელეფქ დეინტერესეს თე საკითხით დო გურგედვალირ გიმორკვიება ქიდიჭყეს. თინეფქ თი აზრშა ქიმერთეს, ნამდა „შქვით დროქ“ 1914 წანას ოკო გეთუკო. მსოფლიო მოვლენეფქ დამტკიც, ნამდა ღორონთიშ სამეფოქ მართალო 1914 წანაშე დიჭყჷ ზეცას მართველობა. თე წანას დიჭყჷ ბოლო დღალეფქ — უკანასკნელ დროქ. თენა ძალამ ბრელ ინფორმაცია ქორე ოფიქრებელო.

ოთარ: ხოლო ართშა ოკო გეგნიბკითხე თე ინფორმაცია, ნამდა უჯგუშო ქიგებგე.

მამუკა: მა ხოლო დროქ დემესაჭირ, ჯგირო ქიგებგიკო თე წინასწარმეტყველებეფიშ მნიშვნელობა. ფიფქრენქ, ჩქინ მსჯელობაქ ქუგოძირეს, ნამდა იეჰოვაშ მოწმეეფიშ გურაფა ღორონთიშ სამეფოშ გურშენ მართალო ბიბლიაშა რე გერსხილ.

ოთარ: თეს ირო ვორწყედ დო მანგარო მობწონს.

მამუკა: ვორწყექ, სი ხოლო გოკო, სქან რწმენა ბიბლიაშა რდას გერსხილ. მუჭოთ ფთქვი, ართდროულო ბრელ ინფორმაციაშე იფჩით დო ალბათ კითხვეფ ხოლო გაღვენუ. მაგალთო, ჩქი ფთქვით, ნამდა ღორონთიშ სამეფოწკუმა დაკავშირებულ „შქვით დროქ“ ჯვ. წ. 607 წანას დიჭყჷ, მარა სოვრეშე მიჩქნა, ნამდა თე „შქვით დროქ“ 1914 წანას ითუ? *

ოთარ: ქო, საინტერესო რე.

მამუკა: კინ ბიბლიაშე შემლებნა ზუსტას ქიგებგათ, მუზმა ხანს იგრძელებ „შქვით დრო“. მუს თქუანქ, უკულიან შეხვალამას თეშენ ქიფჩუათინ? *

ოთარ: ჯგირ იჸუაფ.