დებაბდ პატინქტონს, ლონდონიშ ართ-ართ უბანს, სოდეთ ბრელ ოჯახ ოხორანდჷ. თექ დიაჩქიმ დო სუმ უნჩაშ დაწკუმა ართო ფცხოვრენდჷ. მუაჩქიმ შუმილია რდუ დო ჸუდეშა თითქმის ვემიშ.

ბაღანობას დიაჩქიმქ დუმოგურუ, ნამდა ირ სერს იბლოცკო. ჭიჭე ბიბლია მიღუდ, სოდეთ ხვალე ფსალმუნეფ ჭარუდ; მელოდია ჩქიმით მიბგონ, ნამდა თიშ ბირაქ შემალებუკო. ჯგირო ფშუ, ართ წიგნშე თეცალ ფრაზა ეშიბკითხჷ: „ართ დღას შილებე ჭუმენერ დღაქ ვა გოთანდას“. თე სიტყვეფქ გურს მანგარო ქუმოფხვად დო მინშა მომავალშე ფიქრ ვა მორულუანდჷ, ფიფქრენდჷ: „მუშენ გოფრჩქინდჷ? გვალო თენა რენო ცხოვრება?!“. ღურა ვა მოკოდ.

ჭიჭე ხანშა ოკულტიზმით დებინტერეს. ვოცადუდ ღურელეფიშ შურწკუმა მიჩიებინუდკო, სკოლაშ მეგობრეფწკუმა ართო ხშირას გილეფშ სასაფლეფშა დო თექ საშინელებეფიშ კინოეფს ვუჯინედით. მართალ რე, მოშკურდეს, მარა ინტერეს ხოლო მიღდეს.

ვით წანერ ვორდინ უკვე ხეშე ვორდჷ ულირ. ქიდიბჭყჷ სიგარეტიშ შუმა დო თიშა დამოკიდებულქ გინიფრთჷ. უმოს გვიანო, მარიხუანაშ შუმა ხოლო ქიდიბჭყჷ. 11 წანერო გინიფრთინ, ოშუმალიშ შუმა ხოლო ქიდიბჭყჷ. მართალ რე, თიშ გემო ვა მობწონდჷ, მარა შუმაშ უკულ მიღუდუნ თი მდგომარეობა მობწონდჷ. მანგარო მიჸორდჷ მუსიკა დო სხაპუა. შესაძლებლობა ქუმმაჩამუდუნ წვეულებეფშა დო კლუბეფშა მიფშჷ. მინშა სერით ჸუდეშე მებტყობუნდჷ დო გოთანას იფრთუდ. მაჟია დღას თიცალ შულადირ ვორდჷ, მუთუნიშ დუდ ვა მიღუდ დო ათეშენ გაკვეთილეფს ხშირას ვოჩილითუანდჷ. ვოსწრუდინ თიმწკუმა ხოლო, შესვენებაშ დროს ოშუმალს ფშუნდჷ.

სკოლაშ ბოლო კლასეფს უკვე გლახა ნიშნეფ პჸუნდჷ. დიაჩქიმს მანგარო აწყუნ გურქ დო გენერვიან, მუჟამსით ჩქიმ საქციელეფიშ გურშენ ქიგეგ. ჩქი წებკინდით დო მა ჸუდეშე მიდაფრთჷ. მუსხირენ ხანს ჩქიმ მეგობარ ბოშწკუმა, ტონწკუმა, ფცხოვრენდჷ, მიდგას მანგარ გლახა რეპუტაცია უღუდ. თინა ხირულენდჷ, გიმოჩანდჷ ნარკოტიკეფს დო მოძალადე რდუ. მალას დებორსულ დო 16 წანერ ვორდინ, მა დო ტონის ბოშიქ ქეშმეძინეს.

პირველო იეჰოვაშ მოწმეეფს თიმწკუმა შეფხვად, მუჟამსით თავშესაფარს ფცხოვრენდჷ, ნამუთ თიცალ დიდალეფშო რდუ, მიდგას უკანონო სქუალეფ ჸუნდეს. თექ ოთახ მთავრობაქ მუჩჷ. თავშესაფარს ჟირ იეჰოვაშ მოწმე ოსურ ხშირას იძირუანდჷ მუსხირენ ახალგაზრდა დიდას. ართ დღას თინეფს ჩიებას გევაჸუნ. მოკოდ დუვამტკიცკო, ნამდა არასწორ მუდგარენს იჩიებდეს. თინეფქ ჩქიმ კითხვეფს მშვიდას უპასუხეს დო ირფელ ბიბლიაშე გემინწყეს. თინეფ მანგარ კეთილეფ დო თავაზიანეფ რდეს, მუდგაქ მანგარო მიმეწონ. ათეშენ გინობჭყვიდ, ბიბლიაშ გურაფა დიბჭყკო.

მალას ბიბლიაშე თიცალ მუდგარენ ქიგებგჷ, მუდგაქ ჩქიმ ცხოვრება დოთირუ. თიშ უმკუჯინუო, ნამდა დიო ხოლო ახალგაზრდა ვორდჷ, ღურაშა მანგარო მოშკურუდ. მარა, ასე უკვე მიჩქუდ, ნამდა იესოშ გურაფაშ თანახმათ, ღურელეფიშ გათელება იჸუაფუდ (იოანე 5:28, 29). თეს გეძინელ, ქიგებგჷ, ნამდა ღორონთ პირადო ჩქიმდე ზრუნენს (1 პეტრე 5:7). ჩქიმ გურს განსაკურთებულო იერემიაშ 29:11-ის ინოჭარილ სიტყვეფქ შეხუ: „მუშენდა მიჩქჷ, მუთ მილამ თქვანო, — იჩიებ იეჰოვა, — მშვიდობა მილამ დო ვართ ხოლო უბედრობა, ნამდა მომავალ დო იმენდ ქიმერჩათ“. თეშ უკულ, ქიდებჯერ, ნამდა არსებენდჷ დედამიწას მარადიულ ცხოვრებაშ იმენდ (ფსალმუნი 37:29).

იეჰოვაშ მოწმეეფქ დიდ ჸოროფა გიმირჩქინეს ჩქიმწკუმა. მუჟამსით თინეფიშ შეხვალამას პირველო დევესწრჷ, თექ ჯგირ დო სასიამოვნო გარემოქ დოფხვად. არძაქ მეგობრულო შეფხვად (იოანე 13:34, 35). თინეფ მანგარო გენესხვავებდეს ეკლესიაშ მსახურეფშე. იეჰოვაშ მოწმეეფქ მთელ გურით მემღეს თიშ უმკუჯინუო, ნამდა გლახა ცხოვრებაშ წეს მიღუდ. თინეფს არჩქილედეს, ნამდა დრო მოსაჭირუდ, ჩქიმდე ზრუნენდეს, ყურადღებას ვა მარკენდეს დო ირნერო მოხვარუდეს. ბგინაფლენდჷ, ნამდა დიდ მოჸოროფე ოჯახიშ წევრ ვორდჷ.

ბიბლიაშ გურაფაშ შედეგო ქიმეფხვად, ნამდა საჭირო რდუ დიფთირეკო ცხოვრებაშ წეს, ნამდა ღორონთიშ მაღალზნეობრივ ნორმეფიშ თანახმათ იფცხოვრიკო. მანგარო გამჭირდჷ სიგარეტიშ მეტებაქ. თეწკუმა ართო, ქიმეფხვად, ნამდა თიცალ მუსიკეფს ვურჩქილედ, ნამუთ მარიხუანაშ შუმაშ სურვილს მირჩქინანდჷ. ათეშენ გინობჭყვიდ, შურო ვა ვურჩქილკო თეცალ ბირეფს. მივოტე წვეულებეფშა დო ბარეფშა გილულა, მუშენდა თექ შუმაშ ცდუნება მაღვენუდ. მოკოდ, თიცალ მეგობრებ პჸუნდკო, მით დადებითო იმოქმედენდჷ ჩქიმწკუმა დო მიმეხვარებდეს ახალ ცხოვრებაშ დოჭყაფას (იგავები 13:20).

თიმ პერიოდის ტონი ხოლო გურაფლენდჷ ბიბლიას. იეჰოვაშ მოწმეეფ თიშ კითხვეფს ბიბლიაშე არზენდეს პასუხის, ათეშენ ტონიქ დერწმუნ, ნამდა, მუდგას გურაფლენდჷ ჭეშმარიტება რდუ. თიქ უჯგუშობაშა დოთირუ ცხოვრებაშ წეს. მიოტუ ჯვეშ მეგობრებწკუმა ურთიერთობა, სიგარეტიშ შუმა დო ხირუა. იეჰოვაშ მოსაწონო იფცხოვრითკონ თიშენ, გინობჭყვიდით ჟირხოლოქ მივოტეთკო უზნეო ცხოვრება დო ჩქინ სქუაქ ოჯახურ გარემოს მირდკო. ათეშენ 1982 წანას კანონიერო დეფქორწინით.

ასე ხოლო ფშუ, მუჭო ბგორუნდჷ სტატიეფს ჟურნალეფს „გინაჯინალ კოშკი“ დო „გეგშაკურცხით“, * სოდეთ თინეფიშ ბიოგრაფიეფ რდუ ჭარილ, მიდგას ართ დროს ჩქიმცალ ცხოვრებაშ წეს უღდეს, მარა დითირეს. თინეფიშ მაგალითიქ გურშა ელამკინ დო ქომუჩ ძალეფ, ხელეფს ვეგმუკინკო დო გუვაგრძელკო უჯგუშობაშა თირუა. იეჰოვას ვოხვეწუდ, ჩქიმდა გურქ ვეუოლკო. 1982 წანას მა დო ტონიქ დიბნათით დო იეჰოვაშ მოწმეეფო გინიფრთით.

იეჰოვაწკუმა დამეგობრებაქ ჩქიმ სიცოცხლე ირსხჷ. ტონიქ დო მა რთულ პერიოდ გინიბღით, მარა ჩქინ დუდშა გეგმოფცადით, მუჭო ელამრდეს იეჰოვა. დიბგურეთ, ნამდა სირთულეეფიშ დროს მივენდითკო იეჰოვას. ჩქი ბრელშა იბგინით, ნამდა იეჰოვა მოხვარდეს დო ელურდჷ ჩქინ ოჯახის (ფსალმუნი 55:22).

ბედნერ ვორექ, ნამდა ჩქიმ ბოშის დო ძღაბის მივეხვარ იეჰოვაშ გაჩინებაფას. ამდღა კინ თეცალ გრძნობეფ მიღჷ, მუჟამსით ვორწყექ, მუჭო ეახლოვებნა ჩქიმ მოთალეფ იეჰოვა ღორონთის.

ასე უკვე მშვიდას ბლურს, მუშენდა ვართ ღურაშა მოშკურ დო ვართ თიშე ფიფქრენქ ჭუმან მუ იჸუაფ. მა დო ტონი ირ მარას იბძირუანთ იეჰოვაშ მოწმეეფიშ კრებას დო გურშა ელუკინანთ თინეფს. ჩქი თინეფწკუმა ართო შხვეფს ხოლო გინოფჩანთ სახიოლო ამბეს დო ვოგურუანთ, ნამდა იესოშ რწმენას გეგმირჩქინანა-და, მომავალს მარადიულო იცოცხლენა.