დუდ 13

მუჭო მიორინუანა ღორონთის შეურაცხყოფას ტყურა რელიგიეფ?

ᲩᲐᲠᲗᲔᲑᲐ

ღორონთ ჸოროფა ქორენ-და, მუშენ ორთნა უბადობას თი რელიგიეფ, მით ამტკიცენა, ნამდა ღორონთიშ სახელით მოქმედენა? მარტივო ქოფთქუათინ, თინეფ ტყურა რელიგიეფ რენა დო შეურაცხყოფას მიორინუანა ღორონთის. მუჭო ორთნა თინეფ თეს? მუს ფიქრენს ღორონთ თეშე დო მუშ კეთება ულამ თის?

1. მუჭო მიორინუანა შეურაცხყოფას ტყურა რელიგიეფ ღორონთის მუნეფიშ გურაფეფით?

ტყურა რელიგიეფქ „ღორონთიშ ჭეშმარიტება ტყურაშა“ გოთირუეს (რომაელები 1:25). მაგალთო, თინეფიშ უმენტაშ ღორონთიშ სახელს ვა ურაგად მუნეფიშ მიმაჸუნალეფს. მარა ბიბლია მირაგადნა, ნამდა ღორონთიშ სახელ ოკო გიმიბრინუათ (რომაელები 10:13, 14). ნამთინე რელიგიურ ლიდერ იჩიებ, ნამდა უბადობა ღორონთიშ ნებათ ხვადუ. მარა თენა ვა რე სიმართლე. ღორონთ დღას ვა რე უბადობაშ მიზეზ (წეკითხით იაკობიშ 1:13). სანარღოთ, რელიგიეფიშ ტყურა გურაფეფქ ხალხ ღორონთის გემკაჸათ.

2. მუჭო მიორინუანა შეურაცხყოფას ტყურა რელიგიეფ ღორონთის მუნეფიშ საქმეეფით?

ტყურა რელიგიეფ ხალხის თეშ ვაქცუნა, მუჭოთ იეჰოვა ოქცუ. ბიბლია იჩიებ, ნამდა თე რელიგიეფიშ „ცოდვეფქ ცას ქიმიანჭჷ“ (გამოცხადება 18:5). საუკუნეეფიშ დინახალე, რელიგიეფ მიშეშეს პოლიტიკურ საქმეეფშა, ხუჯის უკინენდეს ჩხუპეფს დო იწონუანდეს ხალხიშ ჸვილუას ვარდა თეშ მიზეზ რდეს. ნამთინე რელიგიურ ლიდერს მოწონს ფუფუნებას ცხოვრება დო ათეშენ მუშ მიმაჸუნალეფშე ფარას ითხინს. თეცალ მოქმედებეფ ამტკიცენს, ნამდა თინეფ შურო ვეჩინენა ღორონთის დო ვა უღნა უფლება, თიშ წარმომადგენელეფ რდან (წეკითხით 1 იოანეშ 4:8).

3. მუს ფიქრენს ღორონთ ტყურა რელიგიეფშე?

ტყურა რელიგიეფიშ მოქმედება თქვან გარისხებას ქიწვიენს-და, მუჭო ფიქრენთ, მუს გინაფლენდას იჸი ღორონთ? თის უჸორს ადამიანეფ, მარა თინა ირისხებ, მუჟამსით რელიგიურ ლიდერეფ შეურაცხყოფას მიორინუანა თის დო გლახათ ოქცუნა მუნეფიშ მიმაჸუნალეფს. ღორონთ მოპირნა, ნამდა ტყურა რელიგიეფ გენადგურებ დო „მეტო ვეარსებენს“ (გამოცხადება 18:21). მალას ღორონთ მოსპუნს არძა ტყურა რელიგიას (გამოცხადება 18:8).

ქიგეგით უმოს

უმოს ქიგეგით თიშ გურშენ, მუს ფიქრენს ღორონთ ტყურა რელიგიეფშე დო მუ აკეთეს თინეფქ. თეს გეძინელ, ქოძირით მუშენ ოკო ვემგოტებაფუან თექ იეჰოვაშ გაჩინებაფა.

4. ღორონთ ვეწონუანს არძა რელიგიას

ბრელს ჯერს, ნამდა რელიგიეფ შხვადოშხვა შარას მოგენს, ნამდგას ღორონთშა მეჸუნს კოჩ. მარა ქორენო თენა სიმართლე? წეკითხით მათეშ 7:13, 14 დო უკულ გარჩით თუდო მოჩამილ კითხვეფ:

მუჭო ეჭარუნს ბიბლია სიცოცხლეშა მიმაჸუნაფალ შარას?

ქოძირით ვიდეო დო უკულ გარჩით თუდო მოჩამილ კითხვა.

ვიდეო: „ქუმოწონსო ღორონც არძანერ რელიგია?“ — ნაწყვეტ (3:22)

იჩიებნო ბიბლია, ნამდა ღორონთის არძანერ რელიგია მოწონს?

5. ტყურა რელიგიეფშე ვეძირე ღორონთიშ ჸოროფა

რელიგიეფ ღორონთის ბრელნერო მიორინუანა შეურაცხყოფას. განსაკუთრებულო თით, ნამდა ჩხუპეფს ღებულენა მონაწილებას. ართ-ართ მაგალითიშ ოძირაფალო, ქოძირით ვიდეო. უკულ გარჩით თუდო მოჩამილ კითხვეფ.

ვიდეო: „მუ როლ უღდეს ეკლესიეფს მა-2 მსოფლიო ომიშ დროს?“ (2:22)

მუ პოზიცია უკინებდეს ეკლესიეფს მაჟია მსოფლიო ომიშ დროს?
მუს ფიქრენთ თინეფიშ პოზიციაწკუმა დაკავშირებით?

წეკითხით იოანეშ 13:34, 35 დო 17:16. უკულ გარჩით თუდო მოჩამილ კითხვეფ:

მუს გინაფლენდას იჸი იეჰოვა, მუჟამსით რელიგიეფ ჩხუპეფს მონაწილენა?
ტყურა რელიგიეფს ბრელ გლახა საქმეშა მიშუძნა ბრალ. თქვა მუჭო ორწყეთ თის, ნამდა რელიგიეფ ვემეჸუნა ღორონთიშ ჸოროფაშ მაგალითის?

ტყურა რელიგიეფიშ საქმეეფშე ვეძირე ღორონთიშ ჸოროფა

6. ღორონთის ოკო, ადამიანეფ გათავისფალას ტყურა რელიგიეფშე

წეკითხით გამოცხადებაშ 18:4 a დო უკულ გარჩით თუდო მოჩამილ კითხვა:

მუჭო მოქმედენს თქვანდა თიშ რჩქინა, ნამდა ღორონთის ოკო, ქიმეხვარას თითოულს, მით ტყურა რელიგიეფშე რე ღორებულ?

7. გაგრძელით გურაფა ჭეშმარიტ ღორონთიშ გურშენ

მუჭო ფიქრენთ, ოკო იმოქმედასო ტყურა რელიგიეფქ ღორონთიშ გურშენ თქვან შეხედულებაშა? წერმიდგინით თეცალ სიტუაცია: სქუა ვემეჸუნს მუმაშ ბრძნულ რჩევას. თინა მეურს ჸუდეშე დო გლახა შარას გიოდირთუ. მუშო ოკო რაგად, მუმა ვეწონუანს სქუაშ თეცალ საქციელს. მუშენ ვეჸუაფუდ სწორ, მუმაშა ქიგემდვალდესკო ბრალ უდუჯერებელ სქუაშ ცხოვრებაშ წესიშ გურშენ?

ქიჸუაფუდუო სწორ, ტყურა რელიგიეფიშ საქმეეფიშ გურშენ იეჰოვაშა ქიგემდვალდესკო ბრალ დო მემტებდესკო თიშ გაჩინებაფა?

ნამთინექ შილებე თქუას: „ვა მოინტერეს ღორონთ, მუშენდა რელიგიეფს გლახაშ მეტ მუთუნ ჯგირ ვა მოუღ“.

თქვა ხოლო თაშ ხომ ვა ფიქრენთ?
მუშენ ოკო ვემოქმედას ტყურა რელიგიეფიშ საქმეეფქ, იეჰოვაშ გურშენ ჩქინ შეხედულებაშა?

დასკვნა

ტყურა რელიგიეფ არასწორ გურაფეფით დო გლახა საქმეეფით შეურაცხყოფას მიორინუანა ღორონთის. ღორონთ განადგურენს თინეფს.

გამეორებელ კითხვეფ

მუს ფიქრენთ ტყურა რელიგიეფიშ გურაფეფიშ დო საქმეეფიშ გურშენ?
მუს ფიქრენს იეჰოვა ტყურა რელიგიეფშე?
მუ განზრახვა უღჷ ღორონთის ტყურა რელიგიეფწკუმა დაკავშირებით?

თე დუდიშ თებაშ თარიღ

მიზან

ანწიან კრებაშ შეხვალამას ქოკითხით ართ-ართ დამსწრეს: „მუშენ გინირთჷ იეჰოვაშ მოწმეთ?“

შხვა მიზან:

დამატებით მასალა

ქიგეგით ჟირ მხარეშ გურშენ, მუდგას რელიგიეფიშ უმენტაშ ორთჷ დო მიუღებელ რე ღორონთშო.

„ართ რენო არძა რელიგია? არძას მეჸუნსო ადამიან ღორონთშა?“ (ვებ მასალა)

მუშენ ოკო იეჰოვას, შხვეფწკუმა ართო ფცათ თის თაყვან?

„აუცილებერ რენო, ვორდათ ნამდგაინ რელიგიაშ მიმაჸუნალ?“ (ვებ მასალა)

ართ მღვდელს ეჭვეფ გურჩქინ მუშ რელიგიაქ. მარა, თეშ უმკუჯინუო, თის გურ ველაფ ღორონთიშ გურშენ ჭეშმარიტებაშ გურაფაშა.

„მუშენ დიტუ მღვდელქ ეკლესია?“ („გეგშაკურცხით!“ ფრევალი, 2015 წ.)

საუკუნეეფ რე, მუთ რელიგიეფ ტყურეფს ეკაწამენა ღორონთის, ითამ თის ვა ვოინტერესუთ დო სასტიკ რე. ქიგეგით სიმართლე სუმ თეცალ ტყურაშ გურშენ.

„ღორონთიშ გურშენ გავრცელებურ ტყურეფ“ („გინაჯინალ კოშკი“ 1 ნოემბერი, 2013 წ.)

a თიშ გაგებელო, მუშენ მიშინუანს წიგნ „გამოცხადება“ ტყურა რელიგიეფს, მუჭოთ ოსურკოჩის, სახელო დიდ ბაბილონს, ქოძირით დანართ 1.

შილებე თექ ხოლო მიგეწონან

ᲑᲠᲔᲚᲨᲐ ᲓᲝᲡᲣᲛᲐᲚᲘᲠ ᲙᲘᲗᲮᲕᲔᲤᲘ

მუჭო იტარებ ბიბლიაშ გურაფა იეჰოვაშ მოწმეეფწკუმა ართო?

იეჰოვაშ მოწმეეფწკუმა ბიბლიაშ უფასო გურაფაშ დროს, შეილებნა ბიბლიაშ ნებისმიერ თარგმანიშ გიმორნაფა. ბიბლიაშ გურაფაშა შეილებნა დაპატიჟათ მთელ ოჯახ ვარდა მეგობრეფ.

მარადიულო გეხარით ცხოვრებათ! — ქიგეგით, მუს ოგურუანს ბიბლია