1^—3. მუნერ ნტერი პჸუნა ირ კოჩის დო მუშენ რე გურიშ მუმაჰამაფალი თინა, მუდგას ბიბლია მოგურუანა?

წერმიდგინ, ნამდა უდუნდებელ ნტერი მორთხოზუ. თინა სქანდე ძალიერ რე დო უმოს ჩქარას მირულე. გიჩქუ, ნამდა ვა დაინდენს, მუშენდა სქან თოლით ძირი, მუჭო აფუ ნაჸვილა სქან მეგობრეფი. მუდგანერო ვაცადუდე ნტებას, თინა იშენ გიგოჭიშუანს. დუდიშ გინოტებაშ იმენდ ვაიღუ. მარა ველუქინ თეშ მიდგარენქ გემკორჩქინდუ. თის სქან ნტერშე უმოს ძალა უღუ დო შეულებ მიგეხვარას. თე დროს ალბათ შურ მუგადგუმუდ!

² შილებე ფთქუათ, ნამდა თეცალ ნტერი ხვალე სი ვარინ, მართალო ირ კოჩის მოთხოზუ. წოხოლენ დუდშე გებგით, ნამდა ბიბლია ღურას ნტერს უძახუ. თე ნტერშა მუთუნნერო ვა მანტინენა დო ვა მარჯგინენა. ბრელს მაფუნა ნაძირეფ, მუჭო მიდამღეს თიქ ჩქინ საჸოროფო კათა. მარა იეჰოვა ღურაშე ბრელით უმოს ძალიერ რე. თინა მარსხებელ რე, ნამუქით უკვე ქაძირუ, ნამდა შეულებ ორჯგინას თე ნტერს. ღორონთი მოპირნა, ნამდა თე ნტერს — ღურას, მოსპუნს ართ დო სამუდამოთ. ბიბლია მოგურუანა: „უკანასკნელ ნტერი, ნამუთ მისპუ, ღურა რე“ (1 კორინთელები 15:26). თენა მართალო სახიოლო ამბე რე!

³ მორთ, დეფიფქრათ, მუშმანწარა რე, მუჟამს მითინ ხოლოშიან  მიღურუნა. თენა მიმეხვარებნა, უჯგუშო ქიგებგათ თი იმენდიშ მნიშვნელობა, ნამუთ დიდ ხიოლს მომღანა. იეჰოვა მოპირნა, ნამდა ღურელეფს სიცოცხლე დართუნა (ესაია 26:19). ღურელეფშო გათელებაშ იმენდ არსებენს.

4. ა) მუშენ შილებე ფთქუათ, ნამდა საჸოროფო კოჩიშ ღურაშ დროს ქრისტეშ რეაქციაშე, იეჰოვაშ რეაქცია ხოლო იძირენ? ბ) მუნერ ურთიერთობა უღუდ იესოს ლაზარე დო თიშ დალეფწკუმა?

⁴ დღას გაფუნო მითინ ხოლოშიანი ნაღურა? თენა მანგარ გინაღალარ რე; თეცალ დროს სინწარე დო გურიშ ჭუა მანგარ ეიოჭოფალ რე. თე დროს ღორონთიშ სიტყვა მომჰამუანა (წეკითხი 2 კორინთელეფიშ 1:3, 4). ბიბლიაშე ბგებულენთ, მუს ფიქრენა იეჰოვა დო იესო ღურაშენ. იესო მუმაშ სრულყოფილ ამნახანტ რდუ დო თის არჩქილედუ, მუ გურსაჭვე რე კოჩიშ ღურა (იოანე 14:9). მუჟამს იესო იერუსალიმს რდუ, თინა ხშირას მიშუ ბეთანიაშა ლაზარე დო თიშ დალეფიშ, მართა დო მარიამიშ ოძირაფშა. თინეფქ დემეგობრეს. ბიბლია იჩიებუ: „იესოს მართათ უჸორდ, თიშ დათ დო ლაზარეთ“ (იოანე 11:5). მუჭოთ წოხლენ დუდშე გებგითინ, ლაზარექ დოღურ.

5, 6. ა) მუჭო იმოქმედუ იესოშ გურს ლაზარეშ გურშეჭირებულ ნათესეფიშ დო ხოლოშიანეფიშ ძირაფაქ? ბ) მუშენ რე გურიშ ემაქექაფალ თინა, ნამდა იესოს გურ ქელაჭუ მეგობარიშ ღურაქ?

⁵ მუჭო იმოქმედ მეგობარიშ ღურაქ იესოწკუმა? მუჭოთ ბიბლიაშე ბგებულენთ, იესოქ ლაზარეშ გურშეჭირებულ ნათესეფიშ დო ხოლოშიანეფიშ ოძირაფშა მიდართუ. თინეფიშ ძირაფაქ იესოშ გურს თეშ იმოქმედ, ნამდა „შურ გეშეკაშუ დო ეფორიაქუ“. თეშ უკულ „იესოს ჩილამურქ ქელაჸუნ“ (იოანე 11:33, 35). ნიშნენდუო ქრისტეშ გურჭუა თის, ნამდა იმენდ ვა უღუდუნ? მუშო ოკო რაგად, ვარ. იესოს უჩქუდ, ნამდა სასწაულ მოხვადუდ (იოანე 11:3, 4). მარა თინა იშენ გინაფლენდ თი გურჭუას, ნამუთ ღურას მოუღ.

⁶ ქრისტეშ თეცალ გურჭუა ჩქი გურს ემქექუანა. თავრეშე ბგებულენთ, ნამდა იესოს დო თიშ მუმას, იეჰოვას, ჯოგნა ღურა.  იეჰოვა ღორონთის შეულებ თე ნტერს ორჯგინას! ქობძირათ, მუშ კეთებაშ ძალა მეჩუ თიქ იესოს.

7, 8. კოჩიშ თოლით ქიდვეკვირვებუთ-და, მუშენ რდუ ლაზარე უიმენდო მდგომარეობას დო მუ აკეთუ იესოქ?

⁷ ლაზარე გამოქვაბულს რდუ დასაფლებული; იესოქ ქითხუ, მინაულარშე დიდ ქუა გემკუღალდესკონ. მართას თენა ვახუჯუდ, მუშენდა ლაზარე ოთხ დღაშ ნაღურა რდუ დო მართა ფიქრენდ, ნამდა თიშ სხეულს უკვე ჸორადუა აჸიდ დოჭყაფილი (იოანე 11:39). კოჩიშ თოლით ქიდვეკვირათინ, ქოარსებენდუო მუთუნნერ იმენდი?

⁸ დიდ ქუა გემკიღეს დო იესოქ დიძახუ: „ლაზარე, გეგმორთი!“. მუქ მოხვად თე დროს? „კოჩიქ, ნამუთ ღურელ რდუ . . . გეგმორთუ“ (იოანე 11:43, 44). წერმიდგინ, ხალხიშ ხიოლ, მიდგაქ თენა ძირუნ?! მნიშვნელობა ვა უღუ, მი რდუ თინეფშო ლაზარე — ჯიმა, ნათესე დო ვარ მეზობელ — თინეფს უჩქუდეს ნამდა, თინა ღურელ რდუ; მარა ლაზარე ასე თინეფშქას რდუ. ალბათ ხალხის მანგარო გუკვირდუდ თე ამბე დო გურშა ქიხუტოლუანდეს თის. თენა მართალო ღურაშ გინორჯგინას ნიშნენდ!

9, 10. ა) მუჭო ოძირუ იესოქ, მიშე უღუდ ღურელეფიშ გათელებაშ ძალა? ბ) მუ მხარეთ მოხვარუნა ბიბლიას ეჭარილ ღურელეფიშ გათელებაშ შემთხვევეფი?

⁹ იესოს თე სასწაულ მუშ დუდშა ვემუჭარაფუ. ონდო ლაზარეს დუძახუდუნ, თიქ ილოც დო თეთ ქაძირუ, ნამდა ღურელეფიშ გათელებაშ ძალა იეჰოვაქ მეჩუ (წეკითხი იოანეშ 11:41, 42). თენა ხვალე ართ შემთხვევა ვა რდუ, მუჟამსით იეჰოვაქ მუშ ძალა ათეშნერო გიმირინუ. ლაზარეშ გათელება ბიბლიას ინოჭარილ ღურელეფიშ გათელებაშ ჩხორო შემთხვევაშე ართ-ართ რე. * გურს ემკინანა თე სასწაულეფიშ გურშენ უმოსიშ გაგება! თავრეშე ვორწყეთ, ნამდა ღორონთის მითინ ვაფუ  გიშაგორილ, მუშენდა გათელებურეფ შქას რდეს ახალგაზრდეფ დო მოხუცებულეფ, ოსურკათა დო ქომოლკათა, ისრაელიან დო ისრაელიან ვა რდუნ ფერი. ღურელეფიშ გათელებას მანგარ ხიოლ მოჸუნდუ. მაგალთო, მუჟამს იესოქ ბაღანა ძღაბი გათელუნ, „მშობლეფიშ ხიოლს საზღვარ ვაუღუდ“ (მარკოზი 5:42). მართალო ქო, იეჰოვაშ ძალათ მოხვალამირ ათე სასაწაულქ ხალხი გახარუ.

¹⁰ იესოშ გუნათელებ ხალხიქ ბოლოს კინ დოღურუ. ნიშნენსო თენა თის, ნამდა აზრი ვა უღუდ თინეფიშ გათელებას? ვარ. ბიბლიას ეჭარილ თე შემთხვევეფი ამტკიცენს, ნამდა მუდგას იბლია ოგურუანსი, ჭეშმარიტება რე დო იმენდის მარზენა.

11. მუჭო ამტკიცენს ლაზარეშ გათელება ეკლესიასტეშ 9:5-ის ინოჭარილ სიტყვეფიშ ჭეშმარიტებას?

¹¹ ბიბლია მოგურუანა, ნამდა „ღურელეფს მუთუნ ვა უჩქუნა“ (ეკლესიასტეშ 9:5). თინეფ მუთუნს ვა გინაფლენა დო ვართ სოთინ აგრძელენა არსებობას. თეს ლაზარეშ გათელება ამტკიცენს. მუჟამს ლაზარექ გეთელუნ, მუთუნ გასაკვირ ამბე ეჩუო თიქ ხალხის ზეციურ ცხოვრებაშ ვარდა საშინელ ჯოჯოხეთიშ დაჩხერიშ გურშენ? ვარ. ბიბლიას თეცალ მუთუნ ვენოჭარ. თინა ოთხ დღას ღურელ რდუ დო მუთუნს ვა გინაფლენდ. ლაზარექ ღურაშ ლურით ქიდირულუ (იოანე 11:11).

12. მუ მარწმუნენა, ნამდა ლაზარექ სინამდვილეს გათელებურქ იჸუ?

¹² ლაზარეშ გათელება თის ხოლო მოგურუანა, ნამდა ღურელეფიშ გათელება რეალობა რე დო ვართ ხოლო ფანტაზია. იესოქ ლაზარე ხალხიშ თოლიშ წოხოლე გაცოცხლუ. თე სასწაულს თი რელიგიურ მანჯღვერეფ ხოლო ვევარანდეს, მიდგას ჯოგუდ იესო. თინეფ იჩიებუდეს: „მუ ფქიმნათ, თე კოჩ [იესო] ბრელ ნიშანს ოძირანს“ (იოანე 11:47). ბრელ მიშ გაცოცხლებულ ლაზარეშ ოძირაფშა დო თინეფს იესოშა რწმენა ურჩქინდუდეს. ლაზარეშ ძირაფა არწმუნენდ ხალხის, ნამდა იესო ღორონთიშ  მოშკუმალირ რდუ. თე მოვლენა მანგარ მტკიცებულება რდუ თინეფშო დო ათეშგურშენ გურგოჸინილ იუდეველ რელიგიურ მანჯღვერეფქ იესო დო ლაზარეშ ჸვილუა გინოჭყვიდეს (იოანე 11:53; 12:9—11).

13. მუ მარწმუნენა, ნამდა იეჰოვას მართალო შეულებ ღურელეფიშ გათელება?

¹³ ქორენო რეალური, ბჯერდან ღურელეფიშ გათელება? ქო, მუშენდა იესოქ თქუ, ნამდა მოურს დრო, მუჟამს „არძა, მით ონთხორუეს რე“, გეთელებუ (იოანე 5:28). იეჰოვა რე ირფელიშ შურიშ ინმადგუმალი. ძნელ რენო თიშ დაჯერება, ნამდა ღორონთის შეულებ კინ დურთინუას სიცოცხლე კოჩის? ბრელ მუთუნ იეჰოვაშ მეხსიერებაშა რე გერსხილი. ქოშუნო თის ჩქინ საჸოროფო ღურელეფი? სამყაროს ვეკოროცხენ თისხი მურიცხეფ რე, მარა ღორონთის არძაშა სახელ უჯოხო (ესაია 40:26). იეჰოვა ღორონთის შეულებ ღურელიშ არძა დეტალ ქიგიშინას დო თინეფს სიცოცხლე დურთინუას.

14, 15. მუს ბგებულენთ იეჰოვაშ გურშენ იობიშ სიტყვეფშე?

¹⁴ ქაკონო იეჰოვას ღურელეფიშ გათელება? ბიბლია მოგურუანა, ნამდა ღორონთის მანგარო ოკო ღურელეფიშ გათელება. ღორონთიშ მსახურ იობიქ იკითხუ: „კოჩიქ დოღურ-და, კინ იცოცხლენსო?“. იობის უჩქუდ, ნამდა თაშ ქოფთქუათინ, ონთხორუეს ოჯინე აჸიდუ, სოიშახ ღორონთი გიშინანდუ. თიქ იეჰოვას უწუ: „ქუდომძახუქ დო მა პასუხის ქიმერჩანქ, თიშენ ნამდა მიგენატრებუ სქან ხეშ გუნაჭყეფ“ (იობი 14:13—15).

¹⁵ დეფიქრი! იეჰოვას ართ შურ უღუ დო ელუ თი დროშ მოულას, მუჟამს ღურელეფს გათელენს! ვა ვორდათო ოკო თიშ მარდიელეფ თეშ გურშენ? მუქ შილებე ითქუას მომავალ გათელებაშ გურშენ? მი იჸუაფ გათელებულ დო სო?

16. მუ პირობეფს იჸუაფ ღურელეფიშ გათელება?

¹⁶ ბიბლიას ინოჭარილ ღურელეფიშ გათელებაშ შემთხვევეფშე ბრელ მუთუნს ბგებულენთ მომავალს ღურელეფიშ გათელებაშენ. ბიბლიურ დროს გაცოცხლებულ ღურელეფქ  დედამიწას შეხვადეს მუნეფიშიანეფს. ღურელეფიშ გათელება ანწი ხოლო იჸუაფუ დედამიწას, მარა ბრელით უჯგუშ პირობეფს. თე წიგნიშ მა-3 დუდშე ქიგებგით, ნამდა ღორონთი მთელ დედამიწას სამოთხეთ გინართინუანს. თაშ ნამდა, ღურელეფიშ გათელება ვეჸუაფ თიცალ ქიანას, ნამუთ კინ ჩხუპით, კრიმინალით დო ლახალათ იჸი ეფშა. თინეფ ბედნერო დო მარადიულო იცხოვრენა დედამიწას, სოდეთ მშვიდობა იჸუაფუ.

17. მი იჸუაფ გეთელებული?

¹⁷ მი გეთელებუ? იესოქ თქუ, ნამდა „არძა, მით ონთხორუეს რენან, თიშ [იესოშ] ხონარს ქიგეგონენა დო კილელენა“ (იოანე 5:28, 29). გამოცხადებაშ 20:13-ს ხოლო ინოჭარ: „ზღვაქ ქიმეჩუ თექიან ღურელეფ, ღურაქ დო სამარექ ხოლო ქიმეჩეს თექიან ღურელეფი“ (ქოძირ გეძინელ თემეფი «მუ რე „შეოლ“ დო „ჰადეს“?»). თე საერთო სამარე გიჩოლუ. მილიარდობით კოჩ კინ დართუ სიცოცხლეს. პავლე მოციქულქ ჭარ: „იჸუაფ ღურელეფიშ გათელება, მართალეფიშით დო მართალ ვა რენან თინეფიშ ხოლო“ (საქმეები 24:15). მუს ნიშნენს თენა?

18. მი იჸუაფუ „მართალეფ“ შქას, ნამუსით ღორონთი გათელენს დო მუჭო მოქმედენს თე იმენდ სქანწკუმა?

¹⁸ „მართალეფ“ შქას იჸუაფ ბიბლიას მოშინაფილ ღორონთიერ ხალხი, ნამუთ იესოშ დედამიწაშა მოულაშახ ცხოვრენდეს. ქიგიფშინათ ნოე, აბრაამი, სარა, მოსე, რუთი, ესთერი დო ღორონთიშ შხვა მსახურეფი. ნამთინე მოშინაფილ რე ებრაელეფიშ მა-11 დუდის. „მართალეფ“ შქას ჩქინ დროს ნაღურა იეჰოვაშ მსახურეფ ხოლო რენა. ჩქი მიღუნა ღურულეფიშ გათელებაშ იმენდ დო ათეშგურშენ ვა მოშკურნა ღურაშა (ებრაელები 2:15).

19. მი რენა „მართალ ვა რენან თინეფ“ დო მუშ საშვალებას არზენს თინეფს იეჰოვა?

¹⁹ მუჭო იჸუაფუ თინეფიშ საქმე, მიდგას დღას ვა გუგებ იეჰოვაშენ დო ვამსახურუდ თის? ღორონთი ვეგიჭყოლიდუანს მილიარდობით კოჩის, ნამუსით ბიბლიას „მართალ ვა რენან თინეფ“ ჯოხონა. თინეფი ხოლო გეცოცხლებნა დო მიაჩამნა დრო,  გეჩინებაფუან ღორონთი დო ემსახურან თის. ღურელეფიშ გათელება ანთას წანას გეგრძელებუ დო თინეფს შეიალებენა შხვა ართგურ კათაწკუმა ართო ემსახურან იეჰოვას დედამიწას. მუშმაჰამა იჸი თი დრო. ბიბლიას თე პერიოდის ჯოხო „სასამართლოშ დღა“. *

20. მუ რე „გეენა“ დო მი მოხვადუ თექ?

²⁰ ნიშნენსო თენა თის, ნამდა არძა, მიდგას დედამიწას უცხოვრებ, გეთელებუნ? ვარ. ბიბლია იჩიებ, ნამდა ნამთინე ღურელ „გეენას“ რე (ლუკა 12:5). „გეენა“ ჯოხოდ ოგვამეს, ნამუთ ჯვეშ იერუსალიმიშ გალე რდუ. თექ ჭუნდეს ნძორს დო შხვა გვამს. ღურელ კათას, ნამუსით თაქ გიორღვანდესინ, ებრაელეფს ნთხორუა დო გათელებაშ ღირსო ვემიორჩქუდეს. თაშ ნამდა, „გეენა“ მარადიულ განადგურებაშ სიმბოლო რე. მართალ რე, იესო დორინაფილ რე ღურელ დო თელიშ მოსამართლეთ, მარა საბოლა განაჩენ იშენ იეჰოვას გიმუღ (საქმეები 10:42). იეჰოვა დღას ვა გაცოცხლენს თინეფს, მიდგას უბადო დო ვეგმისწორებნან ფერ ხალხო მირჩქინანს.

21, 22. ა) ხოლო მუნერ გათელება არსებენს? ბ) მი რდუ ზეციურ ცხოვრებაშო გათელებულ პირველ პიროვნება?

²¹ ბიბლიას შხვანერ გათელებაშ გურშენ ხოლო ჭარ. თენა რე ზეცას სულიერ ცხოვრებაშო გათელება. ბიბლიას თეცალ გათელებაშ ხვალე ართ შემთხვევა ჭარ, თენა რე იესო ქრისტეშ გათელება.

²² იესო დოჸვილეს, მარა იეჰოვას ბრელ ხანს ვა დუტებ თინა სამარეს (ფსალმუნი 16:10; საქმეები 13:34, 35). ღორონთიქ გათელუ იესო, მარა თის უკვე ხორციელ სხეულ ვა უღუდ. მოციქულ პავლე ენწყუნს, ნამდა ქრისტექ „ჸვილირქ იჸუ ხორცის, მარა გეცოცხლუ შურს“ (1 პეტრე 3:18). თენა მართალო  დიდ სასწაულ რდუ. იესოქ დართუ სიცოცხლეს, მუჭოთ ძალიერ სულიერ პიროვნებაქ (წეკითხი 1 კორინთელეფიშ 15:3—6). იესო რდუ პირველ, ნამუქით თეცალ დიდებულო იჸუ გათელებულქ, მარა თინა ზეციურ ცხოვრებაშო გათელებულ ბოლო პიროვნება ვა რდუ (იოანე 3:13).

23, 24. მი დო მუსხი პიროვნება მიშმურს იესოშ „ჭიჭე ოჭყიშალშა“?

²³ იესოს უჩქუდ, ნამდა გათელებაშ უკულ ზეცაშა დირთუდუ. ღურაშა ჭიჭე ხანით ადრე, თიქ მუშ ართგურ მიმაჸუნალეფს უწუ: „მეურქ, ნამდა ადგილ მოიმზადათ“ (იოანე 14:2). თინეფს, მიდგას ზეცაშა ოკო ულინუდესკონ, იესოქ „ჭიჭე ოჭყიშალ“ გიოდუ (ლუკა 12:32). მუსხი კოჩ მიშმურს ართგურ ქრისტიანეფიშ თე ჭიჭე ჯგუფშა? გამოცხადებაშ 14:1-ს მოციქულ იოანე იჩიებ: „მიკიბჯინ დო აჸ, ღორონთიშ კირიბ [იესო ქრისტე] გიმარე სიონიშ გვალას დო თიწკუმა ართო 144 000, ნამუსით ჸვას მიკოჭარნა მუშ სახელ დო მუშ მუმაშ სახელი“.

²⁴ თე ქრისტიანეფ, ნამუშ რიცხვი 144 000 რე, ზეციურ ცხოვრებაშო იჸუაფუნა გათელებული. თინეფ შქას ქრისტეშ ართგურ მოციქულეფ ხოლო იჸინა. მუჟამს იჸუაფ თე ქრისტიანეფიშ გათელება? მოციქულ პავლექ ჭარ, ნამდა თენა თიმ დროს მოხვადუდ, მუჟამს ქრისტე იჸუაფუდ მოულირი (1 კორინთელები 15:23). მა-9 დუდის ქობძირუნთ, ნამდა ჩქი ზუსტას თე პერიოდის ფცხოვრენთ. ამდღა დედამიწას დოსკილადირ 144 000-შე მითინქ დოღურ-და, თინა ხეთეშე იჸუაფ გათელებულ ზეცას ოცხოვრებელო (1 კორინთელები 15:51—55). ხალხიშ უმენტაშ გათელებულ იჸუაფ მომავალს სამოთხეთ გინორთელ დედამიწას ოცხოვრებელო.

25. მუს გებგენთ ანწიან დუდის?

²⁵ იეჰოვა ნამდვილო ორჯგინანს ჩქინ ნტერს, ღურუს, დო ართ დო სამუდამოთ მოსპუნს თის! (წეკითხი ესაიაშ 25:8). შილებე ქიკითხათ: „მუშენ გათელენს ღორონთი ნამთინეს ზეცაშ ოცხოვრებელო?“. თინეფიშ გათელება ზეციურ მთავრობას ოხუ. ანწიან დუდის მეტის ქიგებგენთ თე მთავრობაშენ.