1^—3. მუ კითხვეფ უღუ ხალხის დო მუნერო პასუხენს შხვადოშხვა რელიგია?

ანთასობით წანა რე ხალხის თეცალ კითხვეფი აწუხენს. თენა მნიშვნელოვან კითხვეფი რე. ვა უღუ მნიშვნელობა, მი ვორეთ დო სო ფცხოვრენთ, თე კითხვეფიშ პასუხი არძას მოინტერესნა.

² წოხლენ დუდშე გებგით, ნამდა იესო ქრისტეშ ღურათ გინოგაფილ გიშაჸიდირალ მარადიულო ცხოვრებაშ საშუალებას მარზენა. ჩქი თინა ხოლო ქიგებგით, ნამდა ბიბლიას წინასწარ რე რაგადებულ თი დროშენ, მუჟამს „ვეჸუაფუ ღურა“ (გამოცხადება 21:4). თი დროშ მოულაშახ, ირ კოჩ ღურუ. „ცოცხალეფს უჩქნა, ნამდა დოღურუნა“, — თქუ ბრძენ მეფე სოლომონქ (ეკლესიასტე 9:5). ჩქი ირნერო ვოცადუთ, მუთ შილებე ბრელ ხანს იფცხოვრათ. მარა იშენ მოინტერესნა, მუ მუთმოხვადუ ღურაშ დროს.

³ საჸოროფო კოჩიშ ღურა გურს მანგარო ალმოჭუანა. თე დროს შილებე ფიფქრენდათ: მუ მდგომარეობას რე თინა? ხომ ვეწვალებუ? ფთხილანანო თინა? შემლებნანო თიშ მოხვარა? ქობძირუნთო თის დღას? მსოფლიოშ შხვადოშხვა რელიგიეფ თე კითხვეფს შხვადოშხვანერო პასუხენს. ნამთინე რელიგია ოგურუანს, ნამდა მიდგა ცხოვრებას ჯგირს ორთუდუნ, ღურაშ უკულ ცაშა მეურს, გლახაშ მაკეთებელი — ჯოჯოხეთშა. შხვა რელიგიეფ ოგურუანა, ნამდა ღურაშ უკულ კათა ოშურეთშა,  მუნეფიშ ჯვეშეფშა მეულა. თიცალ რელიგიეფ ხოლო რე, ნამუთ ოგურუანს, ნამდა ღურაშ უკულ კოჩ ოშურეთშა გინურს, სოდეთ გესამართლებ დო უკულ ახალშო დებადებუ შხვა სხეულით.

4. მუ საერთო უღუ ბრელ რელიგიაშ გურაფეფს?

⁴ თე რელიგიეფიშ გურაფეფს ართ საერთო აზრი უღუ: ფიზიკურ სხეულიშ ღურაშ უკულ კოჩიშ ნამდგარენ ნაწილ სიცოცხლეს აგრძელენს. ამდღა არსებენსინ თი რელიგიეფშე დახე არძა იჩიებუ, ნამდა კოჩის ღურაშ უკულ ხოლო შეულებ ძირას, გეგას დო იფიქრას. მარა მართალო თაშ რენო თენა? კოჩიშ ემოციეფი დო აზრეფ დაკავშირებულ რე ტვინიშ მუშობაწკუმა. ღურაშ დროს კოჩიშ ტვინი მითმიოტალენს ფუნქციონირებას. გამორიცხულ რე, ჩქინ აზრეფქ დო ემოციეფქ ტვინიშ უმშო გაგრძელას არსებობა.

5, 6. მუს მოგურუანა ბიბლია ღურელეფიშ მდგომარეობაშ გურშენ?

⁵ კოჩიშ ტვინ იეჰოვა ღორონთიქ გარჩქინუ, ათეშგურშენ თის არძაშ უჯგუშო უჩქ, მუ აღოლე კოჩის ღურაშ დროს. ღორონთი მუშ სიტყვა ბიბლიაშე მოგებაფუანა, მუ მდგომარეობას რენა ღურელეფი. ბიბლია მოგურუანა, ნამდა მუჟამს კოჩ ღურუნ, თინა მითმიოტალენს არსებობას. ღურა სიცოცხლეშ საპირისპირო მდგომარეობა რე. ღურელეფ ვარწყენა, ვართ ფიქრენა დო ვართ მუთუნ ოგინუნა. ფიზიკურ სხეულიშ ღურაშ დროს კოჩ მთლიანო მითმიოტალენს არსებობას. კოჩის ვა უღუ უღურალ შური. *

⁶ ბრელ დაკვირებაშ უკულ სოლომონქ ჭარ: „ღურელეფს მუთუნ ვა უჩქუნა“. თიქ უმოს კონკრეტულო ხოლო თქუ, ნამდა ღურელეფს ვართ ჸოროფა დო ვართ გოჯოგაფა შეულებნა. თინეფშო ვა არსებენს „ვართ საქვარ, ვართ ნააზრეფი, ვართ რჩქინა დო ვართ სიბრძნე სამარეს“ (წეკითხი ეკლესიასტეშ 9:5, 6, 10).  ფსალმუნიშ 146:4 ხოლო იჩიებ, ნამდა კოჩ ღურუნ თიმ დღას „დინუ თიშ ფიქრეფი“. ჩქი არძა ღურაშ სქუალეფ ვორეთ დო ვეშემლებნა იბცოცხლათ სხეულიშ ღურაშ უკული. ჩქინ სიცოცხლე შემლებნა სანთელიშ ალს მეუგურუათ. მუჟამს სანთელ დოშკირტუნ, ალი სოთინ ვემურს. თინა უბრალოთ დინუ, ვა არსებენს.

7. მუს მეუგურუ იესოქ ღურა?

⁷ იესოშ სიტყვეფშე იძირე, მუ მდგომარეობას რენა ღურელეფი. მუჟამს მუშ მეგობარ ლაზარექ დოღურუნ, იესოქ მოწაფეეფს უწუ: „ჩქინ მეგობარ ლაზარექ ქიდირულუ“. მოწაფეეფქ იფიქრეს, ნამდა ლაზარეს დასურო ლურდ, გეგშეკეთკონ თიშენ. თინეფქ ვა გოხვადეს იესოშ ნარაგადის. ათეშენ იესოქ თინეფს ეუნწყ დო უწუ: „ლაზარექ დოღურ“ (წეკითხი იოანეშ 11:11—14). გურ ქუგუჩი, იესოქ ღურა ლურს მეუგურუ. ლაზარეს ვართ ცაშა ულინუ დო ვართ ჯოჯოხეთშა. თის ვართ ანგელოზეფ უძირუ დო ვართ მუშ ჯვეშეფს შეხვალამუ. ლაზარეს ვართ შხვა კოჩიშ სხეულით მურთუმ. თინა ლურენჯ კოჩცალო მუთუნს ვა გინაფლენდ. ბიბლიაშ შხვა ადგილეფს ხოლო რე ღურა დო ლური ართიანწკუმა მეგურაფილი. მაგალთო, ბიბლია მოწაფე სტეფანეშენ, ნამუთ ქუალეფით ჸვილესინ, იჩიებუ, ნამდა თიქ „ღურაშ ლურით ქიდირულუ“ (საქმეები 7:60). თეგვარო, მოციქულ პავლექ ხოლო ჭარ, ნამდა მინ ქრისტიანქ „ღურაშ ლურით ქიდირულუ“ (1 კორინთელები 15:6).

8. სოვრეშე მიჩქუნა, ღორონთის კოჩიშ ღურა ვაკოდუნ?

⁸ რდუო ღორონთიშ დუდშეიან განზრახვა ხალხიშ ღურა? მუშო ოკო რაგად, ვარ. იეჰოვაქ კოჩ მარადიულ ცხოვრებაშო გაჭყუ. თე წიგნიშე ქიგებგით, ნამდა ღორონთიქ პირველ ჩილ დო  ქომონჯი სამოთხეს დახორუ. თიქ ადამ დო ევას სრულყოფილ ჯამრთელობა მეჩუ. იეჰოვას თინეფშო ხვალე ჯგირ ოკოდუ. ნამ მშობელს ოკო, მუშ სქუაქ დირჩინას დო დოღურას? მუშო ოკო რაგად, ნამთინს ვარ. იეჰოვას უჸორდ მუშ სქუალეფ დო ოკოდ თინეფს ბედნერო უცხოვრებუდესკო დო დღას ვა ღურესკონ. ბიბლია კათაშ გურშენ იჩიებ, ნამდა იეჰოვაქ „მარადიულობა ხოლო ქინოდუ თინეფიშ გურეფს“ (ეკლესიასტე 3:11). ღორონთის მარადიულ ცხოვრებაშ კორნებათ ვაფუთ გოჭყაფილი. იეჰოვაქ ირფელ გაკეთუ, მარადიულ ცხოვრებაქ შეიოლებერქ ქიჸუასინ თიშენ.

9. მუშ უფლება ვემეჩუ ღორონთიქ ადამს დო მუშენ ვარდ ძნელ ღორონთიშ დაჯერება?

⁹ მუშენ ღურუ კოჩი? თე კითხვაშ პასუხი მიბღათ თიშენ, ქიგიფშინათ მუქ მოხვად, მუჟამს დედამიწას ხვალე პირველ ოსურკოჩ დო ქომოლკოჩ ცხოვრენდ. ბიბლიას ჭარ: „იეჰოვა ღორონთიქ გეიჸონ დიხაშე ირნერ ჯა, თოლშო სახიოლო დო ოჭკომალო ირგუნფერ“ (დაბადება 2:9). იეჰოვაქ ადამს ართ მუდგარენიშ უფლება ვემეჩ: „ბაღიშ არძა ჯაშე შეილებ ჭკომე, მუსხი გოკონ, მარა ჯგირ დო ფურიშ ჩინებაშ ჯაშე ვაჭკომა, მუშენდა მუ დღას ოჭკომუნქინ, თიმ დღას დოღურუქ“ (დაბადება 2:16, 17). თე მითითებაშ მეჸუნა შურო ვარდ ძნელი. სამოთხეცალ ბაღის ბრელ ჯა რდუ, ნამუშ ნაყოფ აჭკომედეს ადამ დო ევას. თე მითითებაშ მეჸუნათ თინეფ ქაძირანდეს, ნამდა იეჰოვა ღორონთიშ მარდიელ რდეს ირფელშენ, მუთ თიქ მეჩუ დო სრულყოფილ სიცოცხლეშენ ხოლო. დაჯერებათ თინეფ თის ხოლო ქაძირანდეს, ნამდა პატის ცენდეს მუნეფიშ ზეციერ მუმაშ ავტორიტეტის დო უჸორდეს თიშ მითითებეფი.

10, 11. ა) მუჭო გიმირჩქინეს ღორონთიშ უდუჯერებუობა პირველ ოსურ დო კოჩიქ? ბ) მუშენ რდუ უდუჯერებუობა სერიოზულ საკითხი?

¹⁰ გურსაჭვე რე, ნამდა ადამ დო ევაქ ღორონთიშ უდუჯერებუობა ისხუნუეს. სატანაქ გვერს ორაგადაფუ ევაშა: „მართალო გიწისო ღორონთიქ ბაღიშ ნამთინ ჯაშე ვაჭკომათია?“. ევაქ გვერს უწუ: „ბაღიშ ჯაშ ნაყოფეფ შემლებუნა ბჭკომათ, მარა თი ჯაშ ნაყოფიშ გურშენ, ნამუთ ბაღიშ შქაგურს გეჩანსინ, ღორონთიქ მიწის: ვაჭკომათ, ვართ მიკანჭათ, ვა ღურათინ თიშენ“ (დაბადება 3:1—3).

¹¹ „ვარ, ვა ღურუთ, — უწუ სატანაქ. — უჩქ ღორონთის, ნამდა მუ დღას ოჭკომუნთ თიშ ნაყოფისინ, თოლ გუგანჯამუნა დო ღორონთცალო ჯგირ დო ფურ გარჩქვენუდან იჸი“ (დაბადება 3:4, 5). სატანას ოკოდ, ევა ქუდაჯერუკო, ნამდა ვარებულ ნაყოფიშ ჭკომუა ჯგირობუას მოუღანდ. სატანაშ სიტყვეფშე იძირე, ნამდა ევას შეულებუდ, მუშით გინოჭყვიდუკო, მუ რდუ ჯგირ  დო მუ — ფური; შეულებუდ მუჭო ოკოდუნ თეშ მუქციებინუდკო. სატანაქ ღორონთის ხოლო ეკაბრალ ტყურა, ნამდა ადამ დო ევას ნაყოფიშ ჭკომუათ მუთუნ ვაღოლედეს. ევაქ ქუდუჯერ სატანას. თიქ გამკოწილ ნაყოფ დო ოჭკომუ. უკულ მუშ ქომონჯის ქიმეჩ დო თიქ ხოლო ოჭკომუ. თინეფიშ საქციელიშ მიზეზ ურჩქინჯობა ვა ჸოფე. ადამ დო ევას გვალო ჯგირო უჩქუდეს, ნამდა ღორონთიქ ვაკეთათია უწუნ თის ორთუდესინ. ნაყოფიშ ჭკომუათ თინეფქ შეგნებულო ვა დუჯერეს ღორონთიშ უბრალო მითითებას. ადამ დო ევაქ მუნეფიშ ზეციურ მუმა დო თიშ ძალაუფლება მუთუნო ვემირჩქინეს. მოჸოროფე გუმაჭყაფალ ღორონთიშ თეცალ არდებას მუთუნნერ გამართლება ვა უღუდ!

12. სოვრეშე იძირე, მუს გინაფლენდ იეჰოვა, მუჟამს ადამ დო ევაქ თიშ წინააღმდეგ მიდართეს?

 ¹² ქიმიპჸონათ თეცალ მაგალითი: ფთქუათ, ნამდა სქუა მორდი. თიშა მუთუნ ვა დაირკებუ. მარა თიქ სქან სიტყვას გინურთ დო თიცალ მუდგარენ გაკეთუ, ნამუთ ოძირანს, ნამდა პატის ვა რცენს დო ვართ უჸორქ. მუს იგინანდ თე დროს? თენა მანგარო ქელგოჭუანდ გურს. წერმიდგინ, მუ გურიშ ელმაჭუაფალ იჸუაფუდ იეჰოვაშო ადამ დო ევაშ საქციელ, მუჟამს თინეფქ თიშ წინააღმდეგ მიდართეს.

13. იეჰოვაქ თქუნ თეშ, მუ აღოლედ ადამს ღურაშ დროს დო მუს ნიშნენდ თენა?

¹³ ვა არსებენდ მუთუნნერ მიზეზ, ნამდა იეჰოვას შეუნარჩუნებუდკო ადამ დო ევაშა მარადიულ სიცოცხლე. თინეფქ დოღურეს, მუჭოთ იეჰოვაქ თქუნ თეშ. ადამ დო ევაშ არსებობაქ მეჭყორდ. თინეფს ვეგნურთუმნა ოშურეთშა. თენა იძირე იეჰოვაშ სიტყვეფშე, ნამუთ ადამს უწუ: „დიხას დართუქ, მუშენდა თიშე რექ ეჭოფილ; ტვერ რექ დო ტვერს დართუქ“ (დაბადება 3:19). ღორონთიქ ადამ დიხაშ ტვერშე გაჭყუ (დაბადება 2:7). ადამ გოჭყაფაშახ სოთინ ვა არსებენდ. თეგვარო, მუჟამს იეჰოვაქ ადამს უწუ ტვერს დართუქია, თენა თის ნიშნენდ, ნამდა ადამ კინ თი მდგომარეობას დართუდ, ნამუთ დუდშე უღუდ ანუ ვეარსებენდ. ადამ ტვერცალო უსიცოცხლო იჸუაფუდ, სოვრეშეთ რდუ გუნაჭყეფუ.

14. მუშენ ღურუ კოჩი?

¹⁴ ადამ დო ევას უღუდეს შანსი ამდღა ხოლო ცოცხალ ჸოფედესკონ. მარა თინეფქ დოღურეს, მუშენდა ვა დუჯერეს ღორონთის დო შეცოდეს. კოჩ თიშენ ღურუ, ნამდა ადამშე ცოდაქ გეგნად დო ღურაქ ირკოჩშა გეგნორთუ (წეკითხი რომაელეფიშ 5:12). ცოდა მემკვიდრეობათ მიღებულ ლახალაცალ რე, ნამდგაშა მითინს ვანტინე. შეცოდებას აუცლებერო ღურა მაჸუნუ. თინა კაცობრიობაშ ნტერ რე (1 კორინთელები 15:26). ჩქი მარდიელ ოკო ვორდათ იეჰოვაშ, მუშენდა თიქ იზრუნ გიშაჸიდირალშო, ნამუთ მირსხენა თე საცოდება ნტერიშ ხეშე!

15. მუშენ რე გურიშ ემაკინალ თიშ რჩქინა, მუდგას ბიბლია ოგურუანს ღურაშ გურშენ?

¹⁵ სიმართლე ღურელეფიშ მდგომარეობაშ გურშენ, ნამუთ ბიბლიას ჭარუნ, გურიშ ემაკინალ რე. მუჭოთ გებგითინ, ღურელეფ ვეწვალებნა დო მუთუნს ვა გინაფლენა. თინეფს ჩქინდა გლახა ვაკეთებენა. ათეშენ, მუთუნნერ მიზეზ ვა არსებენს, მოშქურდან თინეფშა. ჩქი ვამმახვარებენა ღურელეფშა დო ვართ ღურელეფს მახვარებენა ჩქინდა. ჩქი ვეშემლებნა თინეფწკუმა რაგად დო ვართ თინეფს შეულებუნა ჩქინწკუმა რაგადი. ბრელ რელიგიურ მანჯღვერი აღორენს ხალხის, ითამ შეულებუნა ღურელეფიშ მოხვარა. ბრელს მართალო წანს თეცალ ტყურაშ დო ფარას უგანს თინეფს. მარა ჩქი მიჩქუნა სიმართლე დო თხილერ ვორეთ თეცალ ტყურეფშე.

16. მიშ გავლენაშ თუდო რე ბრელ რელიგიაშ გურაფეფ დო სოვრეშე იძირე თენა?

¹⁶ ქაგურუანსო სქან რელიგია ღურელეფიშ გურშენ თის, მუდგას ბიბლია იჩიებ? ბრელ რელიგია ბიბლიაშე გინორთელს ოგურუანს, მუშენდა თინეფიშ გურაფეფ ეშმაკშე მოურს. ეშმაკი გიმირინუანს რელიგიეფს, ხალხი ქუდაჯერუას, ნამდა სხეულიშ ღურაშ უკულ თინეფ შხვადო აგრძელენა ცხოვრებას. თენა რე სატანაშ ართ-ართ ტყურა, ნამუსით თინა გიმირინუანს, ხალხ მაჩილითუას ღორონთის თიშენ. მუჭო ორთ თეს?

17. მუშენ უტახუნს ღორონთის სახელს გურაფა მარადიულ ტანჯებაშ გურშენ?

¹⁷ ფთქვითინ თეშ, მინ რელიგია ოგურუანს, ნამდა კოჩ გლახა ცხოვრებათ ქოცხოვრენდ-და, ღურაშ უკულ ჯოჯოხეთიშ დაჩხერს მოხვადუ დო თექ ირიათო იწვალებდას იჸი. თეცალ გურაფა სახელს უტახუნს ღორონთის. იეჰოვა ჸოროფაშ ღორონთი რე დო თის აზრო ხოლო ვამალე ხალხიშ თეცალ წვალება (წეკითხი 1 იოანეშ 4:8). მუს იფიქრენდი თიცალ კოჩშენ, ნამუთ მუშ სქუას, დასაჯასინ თიშენ, დაჩხერშა მითაჭოფაფუანს ხეს? ქოცენდიო პატის თეცალ მშობელს? ქუგაკორინედუო თიშ გაჩინებაფა? მუშო ოკო რაგად, ვარ. ალბეთ იფიქრენდი, მუ სასტიკ კოჩ რენია! სატანას ოკო დაჯერას ხალხი, ნამდა იეჰოვა მარადიულო აწვალენს თინეფს დაჩხერს.

18. მუ რელიგიურ ტყურაშა რე გერსხილ ღურელეფიშ თაყვანიშცემა?

 ¹⁸ ნამთინე რელიგია თის ხოლო ოგურუანს, ნამდა ღურაშ უკულ კათა შურეფო გინმირთუნა დო ცოცხალეფქ თინეფს პატი ოკო ცან. თე რელიგიეფ იჩიებნა, ნამდა ღურელიშ შურეფს შეულებნა ცოცხალეფ დოთხილუან, ვარდა თინეფიშ ნტერქ ქიჸუან. ბრელს ჯერს თეშ, ათეშგურშენ ღურელეფშა ოშკურნა დო თაყვანს სცენა თინეფს. მარა ბიბლიას ღურა ლურშა რე მეგურაფილ დო ჩქი ხვალე ართ ჭეშმარიტ ღორონთის, ჩქინ გუმაჭყაფალს იეჰოვას ოკო ფცათ თაყვანი (გამოცხადება 4:11).

19. ნამ შხვა ბიბლიურ გურაფაშ უჯგუშო გაგებას მოხვარნა ღურულეფიშ მდგომარეობაშენ სიმართლეშ რჩქინა?

¹⁹ მუჟამს მარჩქვენუნა, მუ მდგომარეობას რენა ღურელეფინ, დღას ვემიბღორებუთ დო ვედებჯერენთ თის, მუდგას რელიგიეფ ოგურუანა. სიმართლეშ რჩქინა მოხვარნა ბიბლიაშ შხვა გურაფეფ ხოლო უჯგუშო ქიგებგათ. მაგალთო, მუჟამს დერწმუნებუქ, ნამდა კოჩ ღურაშ უკულ სიცოცხლეს სოთინ ვაგრძელენსინ, უჯგუშო ქიგეგენქ თი დუნაპირებუს, ნამუთ ოხუ სამოთხეთ გინორთელ დედამიწას მარადიულო ცხოვრებას.

20. მუ საკითხის გენიფხილენთ ანწიან დუდის?

²⁰ დიდ ხანიშ წოხლე ართ ღორონთიერ კოჩის, იობის თეცალ კითხვაქ გურჩქინდ: „კოჩიქ დოღურ-და, კინ იცოცხლენსო?“ (იობი 14:14). ქიშილებენო ღურელქ, ნამუთ ვა არსებენსინ, კინ დართას სიცოცხლეს? ანწიან დუდის ქიგებგენთ, მუ გურიშ ემაკინალ იმენდის მარზენა ბიბლია თე საკითხშენ.