1, 2. მუშენ რე ჩქინო დიდ პატი ლოცვაშ საშვალება მიღუნან თინა დო მუშენ ოკო მიჩქუდან, მუს იჩიებ ბიბლია ლოცვაშენ?

ქიანაშმადიდა სამყაროს დედამიწა ართ ჭიჭე პლანეტა რე. „ცა დო დიხაშ გუმაჭყაფალ“ იეჰოვა ღორონთშო „ხალხეფ ვედრაშე გითოლაფირ წყარიშ ართ ჭვეთცალ რენა“ (ფსალმუნი 115:15; ესაია 40:15). მარა ბიბლიას ინოჭარ: „იეჰოვა ხოლოს რე არძაწკუმა, მიდგა თხულენს თის, არძაწკუმა, მიდგა ჭეშმარიტებათ თხინს თის. მუშ მოშქურანჯეფიშ კორნებას შეასრულენს, ქიმირჩქილუანს თინეფიშ ხვეწინს“ (ფსალმუნი 145:18, 19). დეფიქრ მუს ნიშნენს თენა! ირფელიშ შემალებე გუმაჭყაფალ ღორონთი ხოლოს რე ჩქინწკუმა დო მომრჩქილუანა, მუჟამს ჭეშმარიტებათ ფთხინთ თის. დასურო მუშმადიდა პატი რე ჩქინო, ნამდა შემლებუნა იბლოცათ.

² ქუმოკონა იეჰოვაქ ჩქინ ლოცვეფი ქიმირჩქილუას-და, თიშ მოსაწონო ოკო იბლოცათ. მარა ქეშმალებენანო თენა, ვა მარჩქვენუეს, მუს იჩიებ ბიბლია ლოცვაშენ-და? ლოცვა მოხვარნა დევეახლოვათ ღორონთის, ათეშგურშენ მიჩქუდან ოკო, მუს იჩიებ ბიბლია ლოცვაშენ.

3. მუ რე ართ-ართ მნიშვნელოვან მიზეზი, მუშ გურშენით ოკო იბლოცათ იეჰოვაშ წოხლე?

³ ართ-ართ მნიშვნელოვან მიზეზ თინა რე, ნამდა იეჰოვას  ოკო იბლოცათ. ღორონთიშ სიტყვას პკითხულენთ: „მუთუნშენ ვედიჭყათ ჭირება, არძა თქვან ოთხუალ ლოცვათ, ხვეწებათ, სიმარდულით ქოუწით ღორონთის დო ღორონთიშ მშვიდობა, ნამუთ ირნერ აზრიშე უმოს რე, დოთხილანს თქვან გურეფს დო გონებას ქრისტე იესოთი“ (ფილიპელები 4:6, 7). ჩქი ვარია ოკო ვა ფთქუათ თეცალ ჯგირ საშუალებაშენ, ნამდგას სამყაროშ უზენაეს მართველ მარზენა!

4. მუჭო მიმანგარენა რეგულარულ ლოცვა იეჰოვაწკუმა ურთიერთობას?

⁴ ხოლო ართ მიზეზ თინა რე, ნამდა რეგულარულ ლოცვა იეჰოვაწკუმა ურთიერთობას მიმანგარენა. ჯგირ მეგობრეფს ხვალე თიმწკუმა ვა გაშინენა ართიან, მუჟამს მუთუნ ოსაჭირნა. თინეფს ართიანიშ ჯგირ დო ფურ ოინტერესნა დო ართიანს მუნეფიშ აზრეფშენ, პრობლემეფშენ დო გრძნობეფშენ ეჩიებნა. თე დროს მეგობრობა უმოსო იმანგარებუ. ზუსტას თეცალ რე ჩქინ ურთიერთობა იეჰოვაწკუმა ხოლო. თე წიგნიშე სი უკვე ქიგეგი, მუს მოგურუანა ბიბლია იეჰოვაშენ, თიშ თვისებეფშენ დო განზრახვეფშენ. სქანო ასე იეჰოვა უმოს რეალურ პიროვნება რე. ლოცვა გარზენს თიშ საშვალებას, ნამდა ზეციერ მუმას ქეჩუე, მუს გინაფლენქ დო მუ გაწუხენს. თეგვარო, უმოსო დეახლოებუქ იეჰოვას (იაკობი 4:8).

5. სოვრეშე იძირე, ნამდა იეჰოვა ვა ურჩქილე არძა ლოცვას?

⁵ არძა ლოცვას ურჩქილენო იეჰოვა? ჸუჯ ქათხი, ესაია წინასწარმარაგადეშ დროს, მუ უწუ ღორონთიქ ისრაელეფს, მუს ვა მორჩილუდესინ თიშენ: „ბრელს ლოცულენთ, მარა ვაირჩქილეთ; ხელეფ ზისხირით გაფნა ეფშა“ (ესაია 1:15). თაშ ნამდა, ჩქინ ნამდგაინ საქციელიშ გურშენ იეჰოვაქ შილებე ვე მირჩქილუას ჩქინ ლოცვა. ქუმოკონა ღორონთიქ ჩქინ ლოცვეფი ქიმირჩქილუას-და, ოკო ვოსადაგუდათ მუსხირენ მთავარ მოთხოვნას.

6. ქუმოკონა ღორონთიქ ჩქინ ლოცვეფი ქიმირჩქილუას-და, ნამ მთავარ მოთხოვნას ოკო ვოსადაგუდათ დო მუჭო?

⁶ მთავარ მოთხოვნა რწმენაშ გიმორჩქინა რე (წეკითხი მარკოზიშ 11:24). მოციქულ პავლექ თქუ: „რწმენაშ უმშო ვესიამოვნებე ღორონთშა, მუშენდა მით ღორონთშა მეურსინ, ოკო წანდას, ნამდა თინა არსებენს დო აჯილდოენს მთელ გურით მუშ მაგორუს“ (ებრაელები 11:6). ნამდვილ რწმენა ხვალე თიშ რჩქინას ვა ნიშნენს, ნამდა ღორონთი არსებენს, ირჩქილე დო პასუხენს ლოცვეფს. რწმენა საქმეეფშე ოკო იძირედას. ირდღაშიან საქმეებით დო ცხოვრებათ ოკო ვოძირანდათ, ნამდა რწმენა მიღუნა (იაკობი 2:26).

7. ა) მუშენ ოკო მიღუდან პატიცემა დო რიდი, მუჟამსით იეჰოვაშ წოხლე ბლოცულენთ? ბ) მუჭო შემლებნა თანდაბალო დო გურგონწყუმილო იბლოცათ?

⁷ თეშ გარდა იეჰოვა ჩქინდე თის ხოლო ითხინს, ნამდა ლოცვაშ დროს თანდაბალ დო გურგონწყუმილ ვორდათ. ვა მიღუნანო თიშ მიზეზ, ნამდა თანდაბალო იბლოცათ იეჰოვაშ წოხლე? საერთოთ, მუჟამს პრეზიდენტის ვარდა შხვა მაღალ თანამდებობაშ კოჩის შეხვადნა, მორდებუანო დო პატიცემათ ურაგადნა. თაშ ნამდა, უმოს პატიცემა დო რიდ ოკო ვა მიღუდანიო, მუჟამს ლოცვაშ დროს იეჰოვას ვეჩიებუთინ?! (ფსალმუნი 138:6). იეჰოვა ხომ „ირფელიშ შემალებე ღორონთი რე“ (დაბადება 17:1). ლოცვაშ დროს ოკო ვოძირანდათ, ნამდა თანდაბლურო  ვაღიარენთ ჩქინ მდგომარეობას ღორონთიშ წოხლე. თანდაბლობა მოხვარა გურგონწყუმილო იბლოცათ დო ვართ ხოლო დაზეპირებულ სიტყვეფით (მათე 6:7, 8).

8. მუჭო შემლებნა ლოცვას ოსადაგუნ თეშ მიფქცუათ?

⁸ ღორონთიქ ქუმომრჩქილუანინ თიშენ, ხოლო ართ მოთხოვნას ოკო ვაკმაყოფილენდათ: ჩქინ საქციელ ლოცვეფს ოკო ოსადაგდას. მუჟამსით იეჰოვას ლოცვათ მუთუნს ფთხინთინ, თინა ჩქინდე ელუ, ნამდა მუთ შემლებნა თის ირფელს გუვაკეთენთ. მაგალთო, ღორონთის ქოფთხულენთ „ქომჩან ამდღარ დასაბაღ ქობალ-და“, მუშობა ვედებზარუათ ოკო, თიშ უმკუჯინუო, მუნერ სამუშა მაშინა (მათე 6:11; 2 თესალონიკელები 3:10). ქოფთხულენთ ღორონთის, გინვორჯგინათ ხორციელ სისუსტეს-და, შორს ოკო ვორდათ თიცალ სიტუაციეფშე, ნამუქით შილებე მიმოჩილითუანი (კოლოსელები 3:5). ჟიშე მოჩამილ მთავარ მოთხოვნეფიშ გარდა, ოკო მიჩქუდან ლოცვას ოხუნფერ მუსხირენ კითხვაშ პასუხი.

9. მიშ წოხლე ოკო იბლოცათ დო მიშ სახელით?

⁹ მიშ წოხლე ოკო იბლოცათ? იესოქ მუშ მიმაჸუნალეფს დაგურუ, ნამდა ზეციერ მუმაშ წოხლე ულოცებდესკონ (მათე 6:9). თაშ ნამდა, ჩქი ხვალე იეჰოვა ღორონთიშ წოხლე ოკო იბლოცათ. მარა იეჰოვა ითხინს, ნამდა ვაღიარათ მუშ ხვალეგუნაჭყეფ სქუაშ, იესო ქრისტეშ როლი. მა-5 დუდშე გებგით, ნამდა ღორონთიქ იესო დედამიწაშა მაშქუ, კაცობრიობა ცოდა დო ღურაშე გეგშუჸიდირუდკონ თიშენ (იოანე 3:16; რომაელები 5:12). იეჰოვაქ იესო მღვდელმთავარო დო მოსამართლეთ დარინუ (იოანე 5:22; ებრაელები 6:20). ათეშგურშენ ბიბლია მოგურუანა, ნამდა ღორონთიშ წოხლე იესოშ სახელით იბლოცათ. იესოქ მუშ პიჯო თქუ: „მა ვორექ შარა, ჭეშმარიტება დო სიცოცხლე. მუმაშა ჩქიმ უმშო მითინს ვემიართე“ (იოანე 14:6). თაშ ნამდა, ხვალე იეჰოვა ღორონთიშ წოხლე ოკო იბლოცათ მუშ სქუაშ სახელით.

10. მუშენ ვა რე აუცილებერი, ლოცვაშ დროს განსაკუთრებულ მდგომარეობაშ დაკინება?

 ¹⁰ აუცილებერ რენო, ლოცვაშ დროს განსაკუთრებულ მდგომარეობა მიკინებდან? იეჰოვა ვეთხინს ჩქინდე ხელეფ ვარდა მთელ სხეულ მუთუნ განსაკუთრებულო მიღდან. ბიბლია მირაგადნა, ნამდა ლოცვაშ დროს შემლებნა შხვადოშხვანერ მდგომარეობას ვორდათ. ლოცვაშ დროს კოჩ შილებე ხედას, გერდას, დუდ დოკინელ აფუდას ვარდა დოჩოქინელ რდას (1 მატიანე 17:16; ნეემია 8:6; დანიელი 6:10; მარკოზი 11:25). დიდ მნიშვნელობა უღუ, მუნერ გურით ბლოცულენთინ თის დო ვართ ხოლო განსაკუთრებულ მდგომარეობაშ დაკინებას შხვეფიშ ოძირაფალო. სოდგა ვა ვორდათინ, ირდღაშიან საქმეეფიშ, ვარდა ველუქინ ფერ სიტუაციეფიშ დროს შემლებნა გურს იბლოცათ. შილებე მითინქ ვემეხვადას ბლოცულენთინ თის, მარა იეჰოვა ირჩქილე თეცალ ლოცვეფს (ნეემია 2:1—6).

11. ნამ პირად საკითხეფშენ შემლებნა იბლოცათ?

¹¹ მუშ გურშენ შემლებნა იბლოცათ? ბიბლიას ინოჭარ: „მუდგა ვა ფთხუათინ, თიშ ნებას ქათანხმუ-და, თინა [იეჰოვა] მირჩქილენა“ (1 იოანე 5:14). თაშ ნამდა, შემლებნა იბლოცათ ირფელშენ, მუთ თიშ ნებას ოთანხმუ. ქიშილებენო ღორონთის ქივეჩუათ თინა, მუთ პირადო მაწუხენა? მუ რაგად ოკო! იეჰოვაშ წოხლე ლოცვა შილებე მეგობარწკუმა რაგადის მეუგურუათ. შემლებნა ღორონთის გურგონწყუმილო ვეჩუათ ირფელი, მუთ გურს მიღუნა (ფსალმუნი 62:8). ლოცვაშ დროს ღორონთის წმინდა შურ ოკო ფთხუათ, მუშენდა თინა მიმეხვარებნა, ვაკეთათ მუთ სწორ რე (ლუკა 11:13). შემლებნა ღორონთის ფთხუათ, ქიმმეხვარან ჭკვერულო გეგნოპჭყვიდათ საკითხეფ დო ქომჩან ძალა პრობლემეფიშ გინაღალარო (იაკობი 1:5). შეფცოდით-და, ქრისტეშ მსხვერპლიშ საფუძველშა პატიება ოკო იფთხუათ (ეფესოელები 1:3, 7). მუშო ოკო რაგად, ხვალე ჩქინ დუდშენ ვარინ, ჩქინ ოჯახიშ წევრეფ დო თანამორწმუნეეფშენ ხოლო ოკო იბლოცათ (საქმეები 12:5; კოლოსელები 4:12).

12. მუჭო შემლებუნა ლოცვაშ დროს არძაშ უმოს მნიშვნელოვანო მიფრჩქინათ თიცალ საკითხეფ, ნამუთ ზეციერ მუმას ოხუ?

 ¹² ლოცვაშ დროს არძაშ უმოს მნიშვნელოვანო ოკო მიფრჩქინათ თიცალ საკითხეფ, ნამუთ იეჰოვა ღორონთის ოხუ. იეჰოვა მუთუნნერ ჯგირობუას ვა მარკენა, ათეშ გურშენ ლოცვაშ დროს გიმოფხანტათ ოკო თიშ მარდიელეფ ვორეთინ თინა დო სიტყვეფით განვადიდათ (1 მატიანე 29:10—13). მათეშ 6:9—13-ს ინოჭარილ ლოცვაშ ნიმუშშე ბგებულენთ, ნამდა ოკო იბლოცათ ღორონთიშ სახელიშ განწმენდაშენ (წეკითხი). თეშ გარდა იესოქ თინა ხოლო დუმოგურეს, ნამდა ოკო იბლოცათ ღორონთიშ სამეფოშ მოულაშენ დო თიშ ნებაშ შესრულებაშენ, მუჭოთ ცასინ, თეშ თუდო დედამიწას ხოლო. თე მნიშვნელოვან საკითხეფიშ უკულ იესოქ პირად საკითხეფ მიშინუ. პირველ რიგის ღორონთის ოხუნ ფერ საკითხეფშენ ქობლოცულენთ-და, თეთ ვოძირანთ, ნამდა ხვალე ჩქინ ჯგირობუა ვა მოინტერესნა.

13. მუჭოთ ბიბლიაშე ვორწყეთინ, მუსხი ხანს ოკო იბლოცათ?

¹³ მუსხი ხანს ოკო იბლოცათ? ბიბლია ვეჩიებ მუსხი ხანს იბლოცათ, მუჟამსით ხვალე ვარდა შხვეფწკუმა ართო ვორეთინ. მაგალთო, ვა რე აუცილებერ ბრელ ხანს იბლოცათ ჭკომუაშ წოხოლე, მარა შილებე ჩქინ ლოცვაქ მეტ ხანს გეგრძელას, მუჟამსით პირად სიკითხეფშენ ბლოცულენთ (1 სამუელი 1:12, 15). იესოს ვა მოწონდ დუდ მართალო მეუღუდუნ თი კათაშ საქციელ, ნამუთ ბრელხანს ლოცულენდეს შხვეფიშ ოძირაფალო (ლუკა 20:46, 47). თეცალ ლოცვეფით იეჰოვა ვაგმაკვირებენა. მთავარ რე გურგონწყუმილო იბლოცათ. თაშ ნამდა, ღორონთიშ მოსაწონ ლოცვეფ შილებე მოკლეთ ქოფთქუათ, ვარდა ბრელ ხანს გეგრძელას, გარჩქუ საჭიროებეფს დო სიტუაციას.

14. მუს ნიშნენს „უმუჭყვადუო ლოცვა“ დო მუშენ ოკო ვორდათ იეჰოვაშ მარდიელი?

¹⁴ მუჭომ ხშირას ოკო იბლოცათ? ბიბლია მირაგადნა, ნამდა „უმუჭყვადუო“ დო „ირიათო“ იბლოცათ (მათე 26:41; რომაელები  12:12; 1 თესალონიკელები 5:17). მუშო ოკო რაგად, თენა თის ვა ნიშნენს, ნამდა მთელ დღას ბლოცულენდათ. ბიბლია მირაგადნა, რეგულარულო იბლოცათ დო იეჰოვას მადლობა უწუათ ჩქინო აკეთუნ თი ჯგირ საქმეეფშენ, ქოფთხუათ, ნამდა ირ შარა-კარს ქიგმოწურუან, გუმამანგარან დო ქალამდირთან. მუშ მაჯგირა რე, იეჰოვას ვაფ დოდგინელ წესეფ, მუსხი ხანს დო მუჭომ ხშირას იბლოცათ. ქუვაფასენთ ლოცვას-და, ირო დობგორუნთ დროს ჩქინ ზეციერ მუმაწკუმა დარაგადაფალო.

15. მუშენ ოკო ფთქუათ ბოლოს „ჰამენი“, მუჟამს ჩქი ვარდა შხვა ლოცულენსინ?

¹⁵ მუშენ ოკო ფთქუათ ლოცვაშ ბოლოს „ჰამენი“? სიტყვა „ჰამენი“ ნიშნენს: „ჭეშმარიტო“, ვარდა „თაშ ქოჸოფედას“. ბიბლიას მოჩამილ მაგალითეფი მოძირანა, ნამდა ხვალე ბლოცულენთ დო ვარ შხვეფწკუმა ართო, ლოცვაშ ბოლოს „ჰამენი“ ოკო ფთქუათ (1 მატიანე 16:36; ფსალმუნი 41:13). მუჟამს ჩქინ პირად ლოცვაშ ბოლოს „ჰამენს“ ფქუანთინ, თეთ ვოძირანთ, ნამდა ირფელ გურგონწყუმილო ფთქვით. მარა მუჟამსით შხვა ლოცულენს დო ბოლოს ჩქი გურს ვარდა ხონარმაღალო „ჰამენს“ ფთქუანთინ, თეთ ვოძირანთ, ნამდა ვოთანხმუთ ირფელს, მუდგაქ ლოცვაშ დროს ირაგადუ (1 კორინთელები 14:16).

16. მუშა ოკო ვორდათ დარწმუნებულ, მუჟამს ბლოცულენთინ?

¹⁶ პასუხენსო იეჰოვა ლოცვეფს? მუშო ოკო რაგადი, ქო. ჩქი მიღუნა თიშ მიზეზ, ბჯერდან, ნამდა „ლოცვეფიშ მარჩქილე“ ღორონთი მილიონობით კოჩიშ გურშე ეკნარაგადა ლოცვეფს ირჩქილუანს (ფსალმუნი 65:2). იეჰოვაქ შილებე ჩქინ ლოცვეფს შხვადოშხვანერო ქუპასუხას.

17. მუშენ შემლებნა თიშ რაგად, ნამდა იეჰოვა მინშა ანგელოზეფს დო დედამიწას ჸუნსინ თი მსახურეფს გიმირინუანს, ჩქინ ლოცვეფს ქუპასუხასინ თიშენ?

¹⁷ იეჰოვა მინშა ანგელოზეფს დო დედამიწას ჸუნსინ თი მსახურეფს გიმირინუანს ჩქინ ლოცვეფს ქუპასუხასინ თიშენ (ებრაელები  1:13, 14). მაგალთო, ბრელ რე თიცალ შემთხვევა, მუჟამს მიდგარენს ღორონთშა უთხუ მოხვარა ბიბლიაშ გაგებაშ გურშენ; თეშ უკულ ბრელ ხანს ვემკურთუმ დო თის იეჰოვაშ მოწმეეფ შეხვალამნა. თენა თის ნიშნენს, ნამდა სამეფოშენ ქადაგებაშ საქმეს ანგელოზეფ მონაწილენა (გამოცხადება 14:6). მინშა, მუჟამსით რთულ სიტუაციას ვორეთ დო მოხვარა მოსაჭირნან, იეჰოვაქ შილებე მუშ ნამდგაინ მსახურ გეგმირინუას დო თაშ ქოუპასუხას ჩქინ ლოცვას (იგავები 12:25; იაკობი 2:16).

18. მუჭო პასუხენს იეჰოვა მუშ მსახურეფიშ ლოცვეფს წმინდა შურით დო ბიბლიათ?

 ¹⁸ მუშ მსახურეფიშ ლოცვეფს იეჰოვა წმინდა შურით დო ბიბლიათ ხოლო პასუხენს. მაგალთო, პრობლემეფიშ დროს, მუჟამს ღორონთის მოხვარას. ფთხულენთინ, თიქ შილებე მუშ წმინდა შურით ქიმმეხვარან დო გუმამანგარან (2 კორინთელები 4:7). ხშირას ლოცვეფიშ პასუხეფს ბიბლიაშე ბღებულენთ, მუშენდა იეჰოვა ბიბლიათ გიმოწურუანა, მუჭო გინოპჭყვიდათ სწორას საკითხეფი. მოსაჭირნან ფერ ბიბლიურ მუხლეფ შილებე ქობძირათ ბიბლიაშ პირად გურაფაშ ვარდა თიცალ პუბლიკაციაშ კითხირიშ დროს, მუნერით თე წიგნ რე. ვოხვილუთინ ფერ ბიბლიურ აზრეფ შილებე კრებაშ შეხვალამეფს მიფრჩქილუათ თანაქრისტანეფშე ვარდა კრებაშ უხუცესეფშე, მით ჩქინ ჯგირობუათ რენა დაინტერესებული (გალატელები 6:1).

19. მუქ ოკო ვაგმოჭყორდან, მინშა ღორონთი ჩქინ ლოცვეფს ვა პასუხენსინ თის ქოფიფქრენთ-და?

¹⁹ მინშა შილებე მაძირედან, ნამდა იეჰოვას დრო მეუღ დო ვა პასუხენს ჩქინ ლოცვეფს. მარა თენა თიშ გურშენ ვა რე, ნამდა იეჰოვას ჩქინ ლოცვაშა ვაპასუხებენ. ვაგმოჭყორდან, ღორონთი ლოცვას მუშ დროს პასუხენს დო მუშ ნებას ოსადაგუნ თეშ. იეჰოვას ჩქინ უჯგუშო უჩქ, მუ მოსაჭირნა დო მუჭო მიმეხვარანი. ღორონთი მარზენა საშვალებას, ჩქინ მოქმედებათ ქუვოძირათ, ნამდა მეპჸუნთ ბიბლიას ინოჭარილ ზუკოლს:  „ქითხით . . . დოგორით . . . დუხაკეთ“ (ლუკა 11:5—10). თეთ ვოძირანთ, ნამდა მანგარო მოკონა ღორონთიქ ქომპასუხან ჩქინ ლოცვაშა დო ბჯერა ქომპასუხენან. შილებე ლოცვაშ პასუხ იშენ დო იშენ არგამათ ვეძირედას. მაგალთო, პრობლემაშ დროს ქობლოცულენთ-და, შილებე ღორონთიქ პრობლემა ვეგნომჭყვიდან, მარა თიშ გინაღალარო ძალა ქომჩანი (წეკითხი ფილიპელეფიშ 4:13).

20. მუშენ ოკო გიმიბრინუათ ლოცვაშ დიდებულ პატი?

²⁰ მარდიელ ვორეთ, ნამდა ჩქინ ვებერთელა სამყაროშ გუმაჭყაფალ ხოლოს რე არძაწკუმა, მით თიშ წოხლე ლოცულენს მუჭო საჭირო რენ თეშ (წეკითხი ფსალმუნიშ 145:18). მორთ, ირო დუვაფასათ ლოცვაშ პატი დო თეთ უმოსო დევეახლოებუთ ლოცვეფიშ მარჩქილე — იეჰოვა ღორონთის.