1. მუ რე საჭირო ბედნერ ოჯახ მიღუდანი?

იეჰოვას ოკო, ნამდა ბედნერ ოჯახ გიღუდას. თიშ სიტყვა, ბიბლია გიოწურუანს ოჯახიშ თითოულ წევრის დო ოძირანს, მუ როლ აფუ მერჩქინელ ღორონთის თინეფშა. მუჟამს ოჯახიშ წევრეფ ღორონთიშ დუნაზუკოლს მეყუნან, თეს ჯგირ შედეგეფ მაჸუნუ. იესოქ თქუ: „ბედნერ თინა რე, მით ირჩქილუაფ ღორონთიშ სიტყვას დო იცვენს თის!“ (ლუკა 11:28).

2. მუ ოკო ვაღიარათ ბედნერ ოჯახ მიღუდანინ თიშენ?

² ოჯახურ ბედნერობაშო მნიშვნელოვან რე თიშ აღიარება, ნამდა ოჯახიშ დუმარსხუაფალ იეჰოვა რე, ნამუსით იესოქ „ჩქინ მუმა“ დუძახ (მათე 6:9). დედამიწას ოჯახეფი იეჰოვაშ ჭყოლოფუათ არსებენს დო არძაშ უჯგუშო თის უჩქ, მუ რე საჭირო თიშ ბედნერობაშო (ეფესოელები 3:14, 15). მუს იჩიებ ბიბლია ოჯახიშ თითოულ წევრიშ მოვალეობაშენ?

3. მუს იჩიებ ბიბლია პირველ ოჯახიშ გოჭყაფაშენ დო მუშენ ოკო ბჯერდან, ნამდა თენა სიმართლე რე?

³ იეჰოვაქ გაჭყ პირველ კოჩ დო ოსური, ადამ დო ევა, ნამუთ  დაოჯახუ. ღორონთიქ თინეფ დედამიწას სამოთხეს, ედემიშ ბაღის, დახორუ. ღორონთის ოკოდ თინეფს ბაღანეფქ აჸვენუესკო. იეჰოვაქ თინეფს უწუ: „ინაყოფიერით დო გემრავლით, გეიოფშით დედამიწა, ქემინჯით თის“ (დაბადება 1:26—28; 2:18, 21—24). თენა ვა რე ზღაპარ დო ვართ მუნაგონ ამბე. იესოშ სიტყვეფშე იძირე, ნამდა პირველ ოჯახიშ გოჭყაფაშენ დაბადებას მოჩამილ ამბე, წკონდა სიმართლე რე (მათე 19:4, 5). მართალ რე, ამდღარ რინა ვა რე ია-ვარდით მოფინილი. თეცალ ცხოვრება ვემშეშ ღორონთიშ დუდშეიან განზრახვაშა, მარა თეშ უმკუჯინუო, შილებე მიღდან ბედნერ ოჯახურ ცხოვრება. ქობძირათ, მუ რე თეშო საჭირო.

4. ა) მუჭო შეულებ ოჯახიშ თითოულ წევრის, ხე ქეშუნწყუას ოჯახიშ ბედნერობას? ბ) მუშენ უღუ ოჯახიშ ბედინერობაშო დიდ მნიშვნელობა თის, ნამდა მეტ გებგათ იესოშ ცხოვრებაშ გურშენ?

⁴ ოჯახიშ თითოულ წევრს შეულებ ხე შეუნწყუას ოჯახიშ ბედნერობას, მუჟამსით თინეფ ღორონთცალო გეგმირჩქინანა ჸოროფას (ეფესოელები 5:1, 2). მარა მუჭო მივაჸუნათ ღორონთის, ნამუსით ვა ვორწყეთ? იეჰოვაქ დედამიწაშა მუშ პირველგოჭყაფილ სქუა მაშქუ, ნამუშ მაგალითშე ქიანაშ მუდგარენს ბგურაფლენთ იეჰოვაშ გურშენ (იოანე 1:14, 18). მუჟამს იესო დედამიწას რდუ, თინა თიცალ სრულყოფილო გიმირჩქინანდ მუშ მუმაშ თვისებეფს, ნამდა თი დროს იესოს ორწყედ დო ურჩქილედუნ თი ხალხშო, თენა იეჰოვაშ ძირაფა დო რჩქილა ცალ რდუ (იოანე 14:9). თაშ ნამდა, უმოს ბედნერ ოჯახ მიღუდან თიშენ, საჭირო რე, მივაჸუნათ იესოშ დუნატებ მაგალითის დო დევეკვირათ, მუჭო გიმირჩქინანდ თინა ჸოროფას.

5, 6. ა) მუჭო ოქცუ იესო კრებეფს დო მუშ გურაფა შეულებუნა ქომონჯეფს თიშ მაგალითშე? ბ) მუშ კეთება რე აუცილებერ, ნამდა ცოდეფქ ქიმეპატუან?

⁵ ბიბლია იჩიებ, ნამდა ქომონჯეფქ თეშ ოკო მექცუან ოსურეფს, მუჭოთ იესო ოქცუდ მუშ მოწაფეეფს. ბიბლია ქომონჯეფს ურაგად: „ქომონჯეფი, გიჸორდან თქვან ოსურეფ, მუჭოთ ქრისტექ იჸოროფუ კრება დო დუდ შეწირ თიშო . . . ქომონჯეფს ხოლო მუშ სხეულცალო ოკო უჸორდან მუნეფიშ ოსურეფი. მისით მუშ ოსურ უჸორსინ, თის მუშ დუდით უჸორს, მუშენდა  დღას მითინს ვა გოჯოგაფ მუშ ხორცი, პირიქით ოდიარუანს დო გალუაფუ თის, მუჭოთ ქრისტე — კრებას“ (ეფესოელები 5:23, 25—29).

⁶ იესოს უჸორდ მუშ მოწაფეეფი. თენა ჯგირ მაგალით რე ქომონჯეფშო. მართალ რე, იესოშ მოწაფეეფი შორს რდეს სრულყოფილებაშე, მარა იესოს იშენ „ბოლოშა უჸორდ თინეფ“ დო სიცოცხლე დათმუ მოწაფეეფიშ გურშენ (იოანე 13:1; 15:13). ბიბლია უზუკოლუნს ქომონჯეფს: „გიჸორდან თქვან ოსურეფ დო სასტიკო ვემექცუათ თინეფს“ (კოლოსელები 3:19). მუ მეხვარებუ ქომონჯის, მიაჸუნას თე ზუკოლს, თიმწკუმა მუჟამს ოსურ ვექციებ საჭირო რენ თეშ? თის ოკო შუდას, ნამდა მუ ხოლო ვა რე უჩილათ, დო ქაკო ღორონთიქ ქაპატუას-და, მუქ ხოლო აპატუას ოკო შხვას დო მით უმეტეს, მუშ ოსურს. მუშო ოკო რაგად, ოსურქ ხოლო თაშ ოკო მიქცუას (წეკითხი მათეშ 6:12, 14, 15). ჩილ დო ქომონჯ ბედნერო იცხოვრენა, მუჟამს თინეფ ვა კოროცხუნა ართიანიშ ჩილათეფს.

7. მუს ითვალისწინენდ იესო დო მუშენ რე თენა ქომონჯეფშო სამაგალითო?

⁷ ქომონჯეფს ოკო შუდან, ნამდა იესო ირო აქციენდ ყურადღებას მუშ მოწაფეებს. იესოს არჩქილედ, მუ შეულებდეს დო მუ ოსაჭირდეს მუშ მოწაფეეფს. ართშა, მუჟამს მოწაფეეფ შულადირ რდესინ, იესოქ თინეფს უწუ: „მორთ სოდგაინ მიდაფთათ, ხვალე ქუდოფსკიდათ დო ჭიჭე ქიმიფსვანჯათ“ (მარკოზი 6:30—32). ოსურეფს ხოლო ოსაჭირნა ყურადღება. ბიბლია ოსურეფს „უმოს სუსტ ჭურჭელო“ მიშინუანს დო ქომონჯეფს ურაგად, ნამდა პატი ცან თინეფს. მუშენ? მუშენდა „სიცოცხლეშ უდუმსახურებ საჩუქარს“ ქომონჯ დო ოსურ ართნერო ღებულენა (1 პეტრე 3:7). ქომონჯეფს ოკო შუდან, ნამდა ღორონთი კოჩის ართგურობათ აფასენს დო ვართ ხოლო სქესით (ფსალმუნი 101:6).

8. ა) მუშენ შილებე ითქუას, ნამდა „მიდგას მუშ ოსურ უჸორსინ, თის მუშ დუდ უჸორს“? ბ) მუს ნიშნენს ჩილ დო ქომონჯშო „ართ ხორცო“ რინა?

⁸ ბიბლიას ჭარ, ნამდა „მიდგას მუშ ოსურ უჸორსინ, თის მუშ დუდ უჸორს“. იესოქ თქუ, მუშენ რე თენა თაშ: ჩილ დო ქომონჯი „ჟირ ვარინ, ართ ხორც რენა“ (მათე 19:6). თავრეშე რჩქუ, ნამდა თინეფს შხვაწკუმა ვა უღუდან ოკო სქესობრივ ურთიერთობა  (იგავები 5:15—21; ებრაელები 13:4). ჩილ დო ქომონჯი ვა ქიმინუნა თეს, თინეფ ქოფიქრენა ართიანიშ მოთხოვნილებეფშენ-და (1 კორინთელები 7:3—5). ჸუჯ ქათხით თე სიტყვეფს: მითინს ვა გოჯოგაფ „მუშ ხორცი, პირიქით ოდიარუანს დო გალუაფ თის“. ქომონჯეფს მუნეფიშ დუდცალო უჸორდან ოკო მუნეფიშ ოსურეფ დო დღას ვა გაჭყორდან, ნამდა პასუხის აგენა იესო ქრისტეშ წოხოლე (ეფესოელები 5:29; 1 კორინთელები 11:3).

9. მუ ჭარ ფილიპელეფიშ 1:8-ს იესოშ გურშენ დო მუშენ ოკო გიმირჩქინან სათუთ გრძნობეფ ქომონჯეფქ მუნეფიშ ოსურეფშო?

⁹ პავლე მოციქულქ თქუ, ნამდა იესო ქრისტე „სათუთ გრძნობეფს“ გიმირჩქინანდ (ფილიპელები 1:8). იესოშ თე თვისება ბრელს მანგარო მოწონდ, თინეფ შქას ოსურეფ ხოლო რდეს, მიქით იესოშ მოწაფეეფო გინირთეს (იოანე 20:1, 11—13, 16). ოსურეფს ხოლო ოსაჭირნა ქომონჯეფშე სათუთ გრძნობეფიშ გიმორჩქინა.

10. მუ მაგალითის არზენს იესო ოსურეფს?

¹⁰ ოჯახიქ ქიმწიძინას თიშენ, თის ხემანჯღვერე — დუდ ოკო ჸუნდას. იესოს ხოლო ჸუნს ხემანჯღვერე. „ქრისტეშ დუდ . . . ღორონთი რე“, „ოსურიშ დუდ კოჩ რე“, — ჭარ ბიბლიას (1 კორინთელები 11:3). იესო, ნამუთ ღორონთის უჯერენსინ, ჯგირ მაგალით რე ჩქინო, მუშენდა არძას პუნა ხემანჯღვერე, ნამუსით ოკო დუჯერათ.

11. მუნერო ოკო უჯინედას ოსურ ქომონჯიშ ხენჯღვერუას დო მუ მაჸუნუ თეცალ საქციელს?

¹¹ არძა ქომოლკოჩ არასრულყოფილ რე, ათეშგურშენ თინეფ მინშა ჩირთუნა დო იდეალურო ვასრულენა ოჯახის მუნეფიშ მოვალეობას. მუჭო ოკო მიქცუას ოსურქ თე დროს? თიქ უპატიცემუოთ ოკო ვემექცუას მუშ ქომონჯის დო მუშ დუდშა ოკო ვეჭოფას ოჯახიშ ხენჯღვერუა. თის ოკო ვა გაჭყორდას, ნამდა სიმშვიდე დო ლიბ ხასიათის დიდ ფას უღუ ღორონთიშ თოლს (1 პეტრე 3:4). საქმეშ თეცალ მერინა მეხვარებ თის, ნამდა მუდგა ძნელ ვა რდასინ, ღორონთიშ მოსაწონ დაჯერება გიმირჩქინას. ბიბლიას ინოჭარ: „ოსურ . . . დიდ პატის ოკო ცენდას ქომონჯის“  (ეფესოელები 5:33). მარა მუ ირაგადე, მუჟამს ქომონჯის მუშ დუდო დო ხემანჯღვერო ვემიორჩქ ქრისტე? ბიბლია ურაგად ოსურეფს: „ქუდუჯერით თქვან ქომონჯეფს, მუშენდა თინეფ, მით სიტყვას ვა უჯერან, უსიტყვეთ იჸუან შიებულქ ოსურეფიშ საქციელით, მუჟამს ძირუნა, ნამდა სუფთას იქციებუთ დო დიდ პატიცემას გიმირჩქინანთ“ (1 პეტრე 3:1, 2).

12. მუშენ ვა ნიშნენს ოსურიშ მხარეშე აზრიშ ტაქტიანო გიმოხანტუა ქომონჯიშ უპატიცემუობას?

¹² ქომონჯ მუშ რწმენაშ ვა რდასინ ხოლო, ოსურიშ მხარეშე ვეჸიდ უპატიცემუობა, თინა ქომონჯიშე განსხვავებულ აზრის გეგმოხანტუნდ-და, ოღონს თენა ტაქტიანო ოკო აკეთას. შილებე ოსურიშ აზრიქ გამართას დო თიშ მორჩქილაფაქ მთელ ოჯახის ჯგირობუა მოუღას. ართშა აბრაამქ ვედეთანხმუ მუშ ოსურიშ, სარაშ აზრის, ნამუთ ართ-ართ ოჯახურ პრობლემაშ გინოჭკირუას ოხუდ, მარა ღორონთიქ უწუ აბრაამს: „ქუმურჩქილე თის[სარას]“ (წეკითხი დაბადება 21:9—12). მარა მუდგას ქომონჯი საბოლათ გინმოჭყვიდუნსინ თინა ღორონთიშ კანონეფს ვაწინააღმდეგ-და, მუშო ოკო რაგად, ოსურ უჯერს დო ხუჯის უკინენს თიშ გინნაჭყვიდას (საქმეები 5:29; ეფესოელები 5:24).

13. ა) მუს ურაგად ტიტეშ 2:4, 5 გათხილ ოსურეფს? ბ) მუს იჩიებ ბიბლია ცალ-ცალკე ცხოვრებაშ დო განქორწინებაშ გურშენ?

¹³ მუჟამს ოსურ მუშ საქმეს ასრულენსინ, თეს ბრელ ჯგირობუაშ მოღალა შეულებ ოჯახშო. მაგალთო, გათხილ ოსურეფიშ გურშენ ბიბლია იჩიებ, ნამდა ოკო „უჸორდან ქომონჯეფი, უჸორდან სქუალეფი, რდან საღას აზროვნენან ფერეფი, ზნეობრივო სუფთეფი, მეოჯახეეფი, ჯგირეფი, ქომონჯეფიშ დამჯერეფი“ (ტიტე 2:4, 5). ოსურ, ნამუთ თაქ ინოჭარილს მეჸუნსინ, ქომონჯიშ დო ბაღანეფიშ პატიცემას დემსახურენს (წეკითხი იგავეფიშ 31:10, 28). არასრულყოფილ კოჩიშ დო ოსურიშ ქორწინება ვეჸი სრულყოფილი, ათეშენ შილებე ჩილ დო ქომონჯ შქას ურთიერთობაქ გილელას დო თინეფქ ცალ-ცალკე ცხოვრება, ვარდა განქორწინება გეგნოჭყვიდან. ბიბლია განსაკუთრებულ შემთხვევეფიშ დროს ცალ-ცალკე ცხოვრებაშ უფლებას ირზენს. მარა თე საკითხის მითინქ ოკო ვა უჯინას არასერიოზულო, მუშენდა ბიბლიას ინოჭარ: „ოსურქ ვეჩეთხუას ქომონჯის . . . ვართ ქომონჯიქ  მიოტუას ოსური“ (1 კორინთელები 7:10, 11). ბიბლიურო განქორწინება დაშვებულ რე ხვალე ართ-ართ მეუღლეშ მხარეშე ღალატიშ დროს (მათე 19:9).

14. მუჭო ოქცუდ იესო ბაღანეფს დო მუ ოსაჭირუნა ბაღანეფს მშობელეფშე?

¹⁴ იესოქ ჯგირ მაგალით დოუტუ მშობელეფს, მუჭო მექცუესკო მუნეფიშ ბაღანეფს. ართშა, მუჟამს მოწაფეეფი ვე მიაშკვანდენს ბაღანეფს იესოშა, თიქ თქუ: „ქუმაშკვით ბაღანეფ ჩქიმდა, ვა ჭოფათ“. ბიბლია იჩიებ, ნამდა თეშ უკულ იესოქ „ბაღანეფ ქიხუტოლუ, ხეს გედვანდ დო ხვამანდ“ (მარკოზი 10:13—16). იესოს ქოუღუდ დრო ბაღანეფშო-და, თქვა ხოლო ვაიღუდანიო ოკო დრო თქვან ბაღანეფშო?! ბაღანეფს ბრელ ყურადღება ოსაჭირნა დო ვართ ხოლო ნამთინეშა მიკოჯინა. დრო ოკო გეგმურათ თინეფიშ გურაფას, მუშენდა თეს იეჰოვა ითხინს მშობელეფშე (წეკითხი კანონიშ 6:4—9).

15. მუშ კეთება შეულებუნა მშობელეფს მუნეფიშ სქუალეფიშ ოთხილარო?

¹⁵ ქიანა უბადოთ რე ეფშა, ათეშგურშენ ბაღანეფს არძაშ უმოსო ამდღა ოსაჭირუნა მზრუნველ მშობელეფი, ნამუთ დოთხილანს თინეფს უზნეო კათაშე, არძაშ უმოსო თინეფშე, მიდგას ბაღანეფიშ გილალუაფა ოკო. დეფიქრი, მუჭო თხილუ იესოქ მუშ მოწაფეეფ,  ნამუქით ართშა თინეფს ჸოროფათ „სქუალეფ“ დუძახ. მუჟამს ღურაშ წოხოლე იესო ოჭოფესინ, თიქ იზრუნ თიშო, ნამდა მოწაფეეფი გოუტებდესკო (იოანე 13:33; 18:7—9). მშობელეფი, თქვა დიდ ყურადღება ოკო მიაქცუათ თქვან სქუალეფს, მუშენდა ეშმაკი ოცად, გლახა გაუკეთას თინეფს. ბაღანეფს ოკო ეჩუათ შხვადოშხვა ოშქურანჯეფშენ * (1 პეტრე 5:8). ამდღა თინეფი ფიზიკურ, სულიერ დო ზნეობრივ საფრთხეშ წოხოლე გერენა.

16. მუ რეაქცია უღუდ იესოს მოციქულეფიშ სწორ ვა რენ ფერ საქციელშენ დო მუს გურაფლენა თავრეშე მშობელეფი?

¹⁶ იესოშ ღურაშ წოხოლენ სერს მოციქულეფ ნირზენდეს, მი რდუ თინეფ შქას უდიდაშ. იესოქ თეშ გურშენ ვა განჭყორ  მუშ მოციქულეფს, თიქ ხოლო ართშა ჸოროფათ უზუკოლ დო მუშ მაგალითით ოძირუ, მუჭო ოკო მოქციებედესკო (ლუკა 22:24—27; იოანე 13:3—8). მშობელეფი, ქარწყეთო მუჭო შეილებნა მიქცუათ იესოცალო, მუჟამს თქვან სქუალეფს ჭკუაშ გურაფა ოსაჭირუნა? მართალ რე, მინშა დასაჯება ხოლო საჭირო რე, მარა თე დროს მშობელეფს ზედმეტიქ ოკო ვამურთან. თინეფქ დუდ ოკო არიდან უდუფიქრებუო რაგადის, ნამუთ ბაღანეფიშ გურს „ყამაცალო ჭკირუნს“ (იერემია 30:11; იგავები 12:18). მშობელეფქ მუნეფიშ ბაღანეფ თეშ ოკო დასაჯან, ნამდა თინეფქ გურ ქუგუჩან მუნეფიშ სწორ ვა რენ ფერ საქციელს (ეფესოელები 6:4; ებრაელები 12:9—11).

17. მუნერ მაგალით დოუტუ იესოქ ბაღანეფს?

¹⁷ ქირზენსო იესო ბაღანეფშო მაგალითის? მუშო ოკო რაგადი, ქო. იესოქ ბაღანეფს მშობელეფიშ დაჯერებაშ მაგალით მეჩუ. თიქ თქუ: „მუჭოთ მუმაქ მოგურუნ თეშ იფჩიებუქ . . . ირო მუმას მოწონსინ თის ვორთუქ“ (იოანე 8:28, 29). იესო უჯერდ მუშ ზეციერ მუმას. მუჭო ბიბლიას ჭარუნ თეშ, ბაღანეფქ ხოლო დუჯერან ოკო მშობელეფს (წეკითხი ეფესოელები 6:1—3). მართალ რე იესო სრულყოფილ ბაღანა რდუ, მარა თინა უჯერენდ მუშ ხორციელ მშობელეფს, იოსების დო მარიამს, ნამუთ ვა რდეს სრულყოფილეფი. თენა ხეს უნწყუნდ ოჯახიშ არძა წევრიშ ბედნერობას (ლუკა 2:4, 5, 51, 52).

18. მუშენ უჯერენდ იესო ირო მუშ ზეციერ მუმას დო მის უხარენა გურს დამჯერე ბაღანეფი?

¹⁸ ბაღანეფ ოკო ოცადუდან, იესოცალო მიქცუან დო მშობელეფიშ გურ გახარანი. მართალ რე, მინშა ვა რე ადვილ მშობელეფიშ დაჯერება, მარა ღორონთი მელუ თეს ბაღანეფშე (იგავები 1:8; 6:20). იესო ირო უჯერდ მუშ ზეციერ მუმას, მუდგა რთულ სიტუაციას ვა რდუკონ. ართშა ღორონთიშ ნებაშ შესრულებაქ იესოს თიცალ ძნელქ აჸუ, ნამდა თქუ: „ემოჩილითე თე სასმისი [მოვალეობა]“. მარა თიქ იშენ ვეგნურთ ღორონთიშ ნებას, მუშენდა ჯგირო არჩქილედ, ნამდა ღორონთის უჯგუშო უჩქუდ, მუ რდუ ოკეთებელი (ლუკა 22:42). მუჟამს ბაღანეფ დაჯერებას  გურაფლენა, თინეფ გურს უხარენა მშობელეფს დო ზეციერ მუმას ხოლო (იგავები 23:22—25). *

19. ა) მუჭო ოცად სატანა ბაღანეფიშ ჩილათას? ბ) მუჭო შილებე იმოქმედას მშობელეფწკუმა ბაღანაშ არასწორ საქციელქ?

¹⁹ ეშმაკ ოცადუდ იესო მიოჩილითუკონ, დო მუ გასაკვირ რე, თის ბაღანეფიშ ჩილათა ხოლო ოკოდასინ (მათე 4:1—10). თეშო ეშმაკ ართმახანეფიშ ზეგავლენას გიმირინუანს, ნამუთ ვა რე ადვილ გინარჯგინალი. ათეშენ დიდ მნიშვნელობა უღუ თის, ნამდა ბაღანეფ ვა რდან თიცალ ხალხწკუმა, მით გლახაშ მეტის მუთუნს ვა დაგურუანს! (1 კორინთელები 15:33). პატრიარქ იაკობიშ ცირასქუა, დინა, ომაჸალუდ თინეფს, მით თაყვანს ვა ცენდ იეჰოვას. თეს დიდ პრობლემეფქ მაჸუნ (დაბადება 34:1, 2). დეფიქრი, მუშმადიდა გურჭუა შილებე მიორინუას კოჩიქ ოჯახის მუშ უწესო საქციელით! (იგავები 17:21, 25).

20. მუს ოკო აკეთენდას თითოულ წევრი ოჯახიშ ბედნერობაშო?

²⁰ ოჯახურ პრობლემეფს უმოს ადვილო ვორჯგინანთ,  ბიბლიურ ზუკოლეფს ქიმუვაჸუნუთ-და. ოჯახიშ ბედნერობა ბიბლიურ პრინციპეფიშ გიმორინაფაშა რე გერსხილ. ქომონჯეფ, გიჸორდან თქვან ოსურეფ დო თეშ მექცით თინეფს, მუჭოთ იესო ოქცუ მუშ კრებას. ოსურეფ, ქუდუჯერით ქომონჯეფს დო მიაჸუნით იგავეფიშ 31:10—31-ის მოჩამილ „ხემორძგვი ოსურიშ“ მაგალითის. მშობელეფ, ღორონთიშ სიტყვათ მორდით თქვან სქუალეფი (იგავები 22:6). მუმალეფ, რდათ ოჯახიშ ჯგირ ხემანჯღვერეფი (1 ტიმოთე 3:4, 5; 5:8). ბაღანეფ, ქუდუჯერით დიდა დო მუმას (კოლოსელები 3:20). ოჯახის მითინ ვა რე სრულყოფილ დო არძა ჩირთუ. ათეშენ, რდათ თანდაბალეფი დო მუჟამს მეჩირთუთინ, ართ-მაჟიას ბოდიშ ქოუწით.

21. მუნერ მომავალ ელუნა ღორონთიშ თაყვანიშმცემელეფს დო მუჭო შემლებუნა ამდღა ხოლო მიღუდან ბედნერ ოჯახურ ცხოვრება?

²¹ მართალ რე, ბიბლიას ქიანა ზუკოლ დო პრინციპ რე მოჩამილ, ნამუთ ოჯახურ ცხოვრებას ოხუ. თეშ გარდა, თინა მოგურუანა, ნამდა ახალ ქიანას ღორონთიშ თაყვანიშმცემელეფ სამოთხეს იცხოვრენა დო უზომეთ ბედნერეფ იჸინა (გამოცხადება 21:3, 4). იეჰოვაშ თაყვანიშმცემელეფს მუთუნშა ვე შედარებენ ფერ მომავალ ელუ! მარა ღორონთიშ სიტყვას, ბიბლიას ინოჭარილ პრინციპეფს ქიმვუაჸუნით-და, ამდღა ხოლო ბედნერ ოჯახურ ცხოვრება მაღვენუნა.